ཡིག་གཟུགས་གསར་པ་གསུམ་ཕབ་ལེན།

བྷོད་རྡོར་འཆང་གིས་ལག་བྲིས་དང་པིར་བྲིས་ཀྱི་ཚུགས་དོན་པའི་གློག་ཀླད་ཀྱི་ཡིག་གཟུགས་གསར་པ་གསུམ་བཟོས་འདུག་པས་ཁ་པར་དང་གློག་ཀླད་དུ་སྤྱོད་འདོད་པ་ཚོས་འདི་ནས་ཕབ་ལེན་བྱ་ཐུབ་པ་བཟོས་ཡོད།

ཕབ་ལེན་བྱོས།

སྙན་འཇེབས་ཚིག་གི་མཆོད་པ།

 

རྣམ་དཔྱོད་པད་འདབ་ཕྱོགས་བཅུར་ལྷུག་པར་གྲོལ།།

ལེགས་བཤད་གཞུང་ལུགས་མེ་ཏོག་རབ་ཏུ་བཞད།།

པཎ་ཆེན་མཚན་གྱི་ཟེ་བ་གཙུག་ཏུ་བཞེས།།

ས་པཎ་ཀུན་དགའ་རྒྱལ་མཚན་སྙིང་ནས་མཆོད།།

ལུང་གཉིས་མཁྱེན་རབ་ནོར་བུས་རབ་གཏམས་པ།།

ས་སྐྱ་ལེགས་བཤད་གཞུང་ལུགས་གྲགས་པ་ཅན།།

མི་ལོ་སྟོང་ལ་ཟིན་ཀྱང་ཉམས་པར་མེད།།

ས་པཎ་ཀུན་དགའ་རྒྱལ་མཚན་སྙིང་ནས་མཆོད།།

རིགས་ལམ་འབུམ་གྱིས་ཕྱུག་པའི་རིག་གཏེར་གཞུང་།།

ཚིག་གཏེར་མཁས་པའི་ཁ་རྒྱན་མཁས་འཇུག་བརྩམས།།

རིག་པའི་གནས་ལྔ་འཆད་ལ་འགྲན་ཟླ་བྲལ།།

ས་པཎ་ཀུན་དགའ་རྒྱལ་མཚན་སྙིང་ནས་མཆོད།།

ཧོར་སོག་རྒྱལ་པོའི་གཙུག་ན་བརྗིད་ཀྱིས་འཇིངས།།

བསྟན་པའི་ཉི་འོད་ཕྱོགས་མཐའ་ཀུན་ལ་སྲིངས།།

བོད་སོག་སྐྱེ་འགྲོ་མ་ལུས་སྐྱོང་མཁས་པ།།

ས་པཎ་ཀུན་དགའ་རྒྱལ་མཚན་སྙིང་ནས་མཆོད།།

ས་པཎ་ཀུན་དགའ་རྒྱལ་མཚན་གྱི་འདས་ཆེན་ཉིན་མོར་སྒོ་གསུམ་གུས་ཕྱག་དང་བཅས་ཏེ་ཕུལ།

2020/12/7

༸སྐྱབས་མགོན་༸གོང་མ་མཆོག་གི་འཁྲུངས་སྐར་བསུ།

སྐྱེ་འགྲོ་འདུལ་བའི་སྙིང་སྟོབས་གོ་ཆ་བཟུང་།།

བསྟན་ལ་སྨོན་པའི་སྐྱེ་རབས་ཕྲེང་བ་འཛིན་།།

ཅི་མཛད་འགྲོ་བའི་དོན་དུ་སྨིན་པ་ཡི།།

བདག་གི་ལྷ་སྐལ་༸སྐྱབས་མགོན་༸གོང་མ་མཆོད།།

ཐུགས་རྒྱུད་བྱམས་བརྩེ་མེ་ཏོག་རབ་ཏུ་སྨིན།།

སྙན་པའི་གདམས་པ་ཟབ་མོ་ཆར་དུ་འཇོ།།

ཀུན་ཀྱང་བདེ་ལ་འགོད་པར་མཛད་མཁས་ཅན།།

༸སྐྱབས་མགོན་༸གོང་མ་མཆོག་གི་འཁྲུངས་སྐར་བསུ།།

རིས་མེད་རྒྱལ་བའི་བསྟན་པ་ཉམས་སུ་བཞེས།།

བསྟན་དང་བསྟན་འཛིན་ཡོངས་ལ་སྙིང་ནས་གུས།།

དཔལ་ལྡན་ས་སྐྱའི་དབུ་འཕང་དགུང་ལ་བཏེགས།།

༸སྐྱབས་མགོན་༸གོང་མ་མཆོག་གི་འཁྲུངས་སྐར་བསུ།

ཐུགས་བསྐྱེད་སྨོན་ལམ་དུས་སུ་སྨིན་པ་ཡིས།།

འཁོན་རིགས་བསྟན་པ་སྤེལ་ལ་འགྲན་པར་མེད།།

ས་ཆེན་གོང་མ་རྣམས་ཀྱི་ཐུགས་སྲས་གང་།།

༸སྐྱབས་མགོན་༸གོང་མ་མཆོག་གི་འཁྲུངས་སྐར་བསུ།

འཛམ་གླིང་ས་ཆེན་ཞབས་ཀྱི་པདྨོ་བཞད།།

ལེགས་བཤད་བདུད་རྩི་ཞིམ་མངར་རྟག་ཏུ་བསྩལ།།

སྐྱེ་དགུའི་ཡིད་རབ་འཕྲོག་པའི་རྒྱལ་བའི་སྲས།།

༸སྐྱབས་མགོན་༸གོང་མ་མཆོག་གི་འཁྲུངས་སྐར་བསུ།།

སྐུ་གཞོན་ཉི་མ་སྤྲིན་བྲལ་དབྱིངས་སུ་ཚེས།།

གསུང་རབ་སྦྲང་ཆར་འགག་མེད་མཁའ་ནས་བབས།།

ཐུགས་རྗེ་བསིལ་རླུང་དུས་ལས་མི་ཡོལ་བར།།

གུས་འབངས་སློབ་མའི་ཚོགས་རྣམས་སྐྱབས་གྱུར་ཅིག།

སྔོན་བསགས་དགེ་བ་བཟང་པོའི་བྱིན་མཐུ་ལས།།

ཚེ་འདིར་དཔལ་ལྡན་བླ་མ་ཁྱེད་ཉིད་མཇལ།།

བདག་ཉིད་བསྐལ་པ་ཡུན་གྱི་སྲིད་མཐའི་བར།།

བླ་ལ་ཁྱེད་དང་འབྲལ་མེད་རྗེས་བཟུང་ཤོག།

2021/9/5

སྤྲུལ་སྐུ་ཨོ་རྒྱན་ལ་ཉི་མར་སྐྱབས་སུ་མཆི།

 

ཆོས་བརྒྱུད་ཀུན་ལ་ཆ་རྒྱུས་ཅན། 

སྦྱོང་པའི་ཡོན་ཏན་བླ་ན་མཐོ།། 

རྣམ་པར་གཅོད་པའི་ཤེས་རབ་མངའ།། 

ཨོ་རྒྱན་ཉི་མ་དོན་ལ་མཁས།།

ཕལ་བའི་བློ་ལ་མི་བདེ་བའི།། 

ཆོས་ཀྱི་གཤིས་ལུགས་མཚར་པོ་དག། 

དོགས་འདྲི་ཚིག་གི་ལམ་དུ་དྲངས།། 

ཨོ་རྒྱན་ཉི་མ་ཚིག་ལ་མཁས།། 

རང་ལྟ་མཆོག་འཛིན་གཡག་རྐོ་ལ།། 

ངར་ལྕགས་ཚིག་གིས་ཨུ་ཁུང་འབིགས།། 

ཆོས་པ་རློམ་པའི་གྲྭ་རྒན་རྣམས།། 

ཁྱེད་ཀྱིས་འགྲམ་ལྕགས་ཡང་ཡང་ལྡེབ།། 

སྦྱོང་པར་མི་དགོས་འཚང་རྒྱ་བ།།

དབང་སྐུར་ཙམ་གྱིས་སྡིག་དག་པ།།

སྔགས་མཚན་འབུམ་གསག་འགྲིག་བློ་ཅན།།

ཁྱེད་ཀྱི་ཚོགས་གཏམ་བདུད་རྩི་ཡིན།།

བྱིང་རྨུགས་ཏིང་འཛིན་འཁྲུལ་ནས་སྒོམ།།

ཅི་ཡང་མི་བསམ་དྲན་པ་རྒྱལ།།

ཧ་ཤང་ལྟ་བའི་རྗེས་སྙེག་ལ།།

ཁྱེད་ཀྱི་དོགས་སློང་བདུད་རྩི་ཡིན།།

གང་ལ་དཔྱད་པས་འཇུག་པ་ཡིས།།

སངས་རྒྱས་ཕེབས་ཀྱང་འདུལ་དཀའ་བ།།

རྟོག་གེ་མགོ་མཁྲེགས་དེ་དག་ལ།།

ཁྱེད་ཀྱི་ཁ་རྡུང་བདུད་རྩི་ཡིན།།

ང་ཆེ་ང་མཁས་དྲེགས་པས་བཟི།།

ཡོད་ཚད་རིགས་ལམ་ནང་དུ་དྲངས།།

སེམས་པ་ཆོས་དང་འདྲིས་མེད་དག།

ཁྱེད་ཀྱི་གཤེ་གཤེ་བདུད་རྩི་ཡིན།།

རང་བླ་གཙོ་བཟུང་སྤྱི་བླ་དོར།།

སྒེར་ཆོས་གཙིགས་འཛིན་སྤྱིར་ཆོས་གློད།།

བོད་ཀྱི་བླ་མའི་ཆོས་ལུགས་ལ།།

ཁྱེད་ཀྱི་མཚང་འདྲུ་བདུད་རྩི་ཡིན།།

སྤྲུལ་སྐུ་ཨོ་རྒྱན་ཉི་མས་དྲ་ཐོག་ཏུ་ཆོས་བྱེད་པ་དག་གི་སྐུ་སྤྱོད་ལ་གཤེ་གཤེ་དང་ཆོས་བརྒྱུད་ཚང་མའི་ལྟ་གྲུབ་ལ་དོགས་སློང་སྣ་ཚོགས་ཤིག་གནང་གི་འདུག་སྟབས་ཕྱེད་རྩེད་མོའི་ཟོལ་གྱིས་ཁོང་ལ་མཆན་དུ་བྲིས།

2019/11/30

ཀུ་ཤུ་པར་གཞི་wordནང་དུ་བོད་ཡིག་གི་མཐའ་མཉམ་པོ་ཡོང་ཐབས།

 

ཀུ་ཤུ་པར་གཞི་wordནང་དུ་བོད་ཡིག་གི་མཐར་ངོས་མཉམ་མི་ཡོང་བའི་དཀའ་ངལ་དེ་སེལ་ཐབས་ཤིག་དྲ་གྲོགས་གཅིག་གི་བརྒྱུད་ཤེས་རྟོགས་བྱུང་ཞིང་ཀུ་ཤུ་གློག་ཀླད་སྤྱོད་མཁན་གྲས་ལ་འདི་ནི་ཕན་ཐོགས་ཡོད་པ་ཞིག་ཡིན། Thai Distributed ཡིག་གཟུགས་མཐའ་མཉམ་བྱེད་ཆས་དེ་wordནང་དུ་ཚུར་འདོན་ཐབས་ནི་ཁྱེད་ཀྱི་ཀུ་ཤུ་གློག་ཀླད་རང་གི་མཛུབ་མནོན་Keyboard ནང་གི་སྐད་ཡིག་འདེམ་ཁུལ་ནས་Thai སྐད་ཡིག་དེ་ཉིད་འདེམས་རྗེས་གློག་ཀླད་སྒོ་བསྐྱར་ཕྱེས་བྱོས་ད། word ནང་བོད་ཡིག་ཡིག་གཟུགས་མཐའ་མཉམ་བྱེད་ཆས་དེ་མངོན་ཡོད། 

__སླད་ནས་དྲ་ཐོག་ཏུ་ཡོང་ཐུབ་པ་དཀའ་བས་ཁྱེད་ཀྱིས་དྲི་བ་ལ་ལན་འདེབས་མ་བྱུང་ན་དགོངས་དག་ཞུ།

ཕྱི་ལོ2020ལོའི་དགེ་ལུགས་རྒྱུགས་སྤྲོད་ཆེན་མོར་ཞུགས།

 

འདི་ལོའི་དགེ་ལུགས་སྤྲོད་ཆེན་མོར་འཚུད་སྟབས་གཞུང་ཆེན་ཁག་ལ་བསྐྱར་སྦྱོང་དགོས་པས་དུས་ཡུན་ཟླ་བ་བདུན་གྱི་རིང་བསྐྱར་སྦྱོང་བྱས་འདུག་པ་དང་དེའི་རིང་དུ་ཞོགས་སྔ་ལངས་དང་དགོང་ཕྱི་ཉལ་བྱེད་དགོས་པ་ནི་སྨོས་ཅི་དགོས། 

དཀའ་ཚེགས་ཆེ་བའི་འབྲི་རྒྱུགས་ཚན་པ་དགུ་དང་རྩོད་རྒྱུགས་ལྔ་བཅས་ཁྱོན་རྒྱུགས་མི་འདྲ་བཅུ་བཞི་སྤྲོད་དགོས་སྟབས་སེམས་ངལ་དང་ལུས་ངལ་གཉིས་ཀ་འདུག་ཅིང་། སློབ་ཚན་ཕྱི་མ་ཕྱི་མ་བསྐྱར་སྦྱོང་བྱེད་དུས་སྔ་མ་སྔ་ལ་བརྗེད་འགྲོ་བ་སོགས་ཀྱིས་སྡུག་ལ་མང་པོར་སྦྱར་སོང་། 

ཏོག་དབྱིབས་ན་ཚ་དེའི་རྐྱེན་གྱིས་རྒྱུགས་སྤྲོད་བྱེད་མི་ཐུབ་པའམ་མཇུག་བསྡུ་མི་ཐུབ་པའི་དཀའ་ངལ་འཕྲད་ཉེན་གྱི་སེམས་འཚབ་མང་པོ་བརྒྱུད་དགོས་བྱུང་ཡང་མཐར་རྒྱུགས་ཞུགས་པ་དགེ་འདུན་ཞལ་གྲངས་༡༠༤༧གྱིས་ཉིན་གྲངས་༢༣རིང་དུ་འདི་ལོའི་དགེ་ལུགས་རྒྱུགས་སྤྲོད་ཆེན་མོ་དེ་ལེགས་པར་སྤྲད་ནས་དེ་རིང་མཇུག་བསྡུས་པ་རེད།

དུས་ཡུན་འདིའི་ནང་དུ་གུས་ལ་སྙིང་ཉེ་བའི་དགེ་རྒན་རྣམས་དང་། ཕ་མ་སྤུན་མཆེད། ས་ཐག་ཉེ་རིང་འདྲ་མིན་ནས་གྲོགས་གྲོགས་མཆེད་མང་པོས་སེམས་ཁུར་དང་ལྷག་པར་རྒྱུགས་སྤྲོད་གཏོང་རེ་བཞིན་རྒྱུགས་གང་འདྲ་བྱུང་མིན་དྲིས་ཏེ་སེམས་ཁུར་གནང་སོང་། རང་ཉིད་ནས་ཀྱང་སེམས་ཁུར་གནང་མཁན་ཁག་གི་ཐུགས་རེ་སྣང་མེད་མ་གཏོང་བར་ རྒྱུགས་གཞི་སློབ་ཚན་རེ་རེ་ལ་བསྐྱར་སྦྱོང་ཐེངས་བཞི་ལྔ་རེ་བྱས་ཏེ་འབད་པར་ལྷོད་མེད་བྱས་ཡོད། རང་གི་ནུས་པ་ཡོད་ཚད་བསྒྲིམས་ནས་འབད་པར་བྱས་པས་རྒྱུགས་ཚད་མ་ལོང་ནའང་བློ་འགྱེད་དགོས་པ་ཅི་ཡང་མེད།  

གུས་ཀྱི་ངོ་དེབ་དང་instagramམཉེན་ཆས་བསུབ་ནས་ཉེ་ཆར་ཕབ་ལེན་བྱས་མ་ཐག་ཡིན་པས་དེའི་རིང་དུ་འབྲེལ་གཏུག་གནང་མཁན་མང་པོ་བྱུང་འདུག་ནའང་ལན་རྒྱག་ཐུབ་པ་བྱུང་མ་སོང་བས་དགོངས་སེལ་ཞུ་རྒྱུ་དང་ཁྱེད་ཅག་གི་སེམས་ཁུར་དག་སེམས་ཀྱི་གཏིང་རུམ་ནས་ཚོར་ཡོད། ཚང་མ་ཁ་དྲོ། 2020/9/11

རྫོགས་ཆེན་རིན་པོ་ཆེ།

 

ཨ་གདུགས་ལྭ་དཀར་ཚང་གི་སྲས་ཆུང་བ་རྫོགས་ཆེན་རིན་པོ་ཆེ་དཔལ་སྔ་འགྱུར་སྙིང་མའི་དབུ་འཛིན་དུ་བསྐོ་བཞག་བྱུང་བ་འཚམས་འདྲི་གྲངས་མེད་ཞུ།

ཏྲེ་ཧོར་ཨ་གདུགས་ལྭ་དཀར་ཚང་། ལྭ་དཀར་ཚང་ནི་མི་རབས་མང་པོར་རིས་མེད་བསྟན་པའི་སྦྱིན་བདག་ཆེན་པོ་ཞིག་ཡིན་ལ། རྗེ་རིན་པོ་ཆེ་གྲྭ་སྐོར་ལ་ཕེབས་པའི་གཏོང་སྒོ་སོགས་ཀྱི་སྦྱིན་བདག་གནང་བ་མ་ཟད། ལྷ་སའི་སྨོན་ལམ་ཆེན་མོ་ཐོག་མར་དབུ་འཛུགས་པའི་སྦྱིན་བདག་ཀྱང་མི་ཚང་འདི་ཉིད་ཀྱིས་མཛད་ཡོད་པར་གྲགས་ཤིང༌། 

རྒྱལ་མཆོག་བཅུ་གསུམ་པ་ཆེན་པོས་བོད་ཡུལ་གྱི་ཚྭ་ལའི་གཏེར་ཁ་ཚང་མ་ལྭ་དཀར་ཚང་གིས་བེད་སྤྱོད་ཆོག་པའི་དམིགས་བསལ་གྱི་བཀའ་ཐམ་གནང་ནས་བརྩེ་གཟིགས་བླ་ན་མེད་པ་གནང་མྱོང་། 

སྲས་ཆེ་བ་བསོད་རྒྱལ་རིན་པོ་ཆེ་དང་ཆུང་བ་རྫོགས་ཆེན་རིན་པོ་ཆེ་གཉིས་པོ་ལྭ་དཀར་ཚང་གི་ཁྱིམ་དུ་འཁྲུངས་ཤིང་ཁྱིམ་ཚང་ཆེན་པོ་འདི་ནི་བོད་ཀྱི་ལོ་རྒྱུས་དེབ་ཐེར་དུ་འཁོད་པའི་ཆེས་སྐད་གྲགས་ཅན་གྱི་ཏྲེ་ཧོར་ཡུལ་གྱི་ཁྱིམ་ཚང་ཞིག་ཡིན།

_ལོ་རྒྱུས་སྙིང་བསྡུས་འདི་བཞིན་ཕྲན་སྲོང་བཙན་གྱིས་བྲེལ་བའི་བར་གསེང་ནས་བྲིས།