ནུབ་ཀྱིས་ཉི་མ་འཐེན་ནས་བྲོས་ལ་ཁད།། མུན་ནག་འདོམ་གྱིས་ས་ཆེན་གཞལ་བ་ན།། སྣང་བའི་བར་སྣང་དེ་ནི་ལག་མཐིལ་ཙམ།། སེམས་དང་བར་སྣང་འདྲེས་པས་རབ་རིབ་གྱུར།། སྙིང་གི་རྩིབས་རུས་དགུན་གྱི་ཚད་པས་བཙིར། ཟུང་ཁྲག་འཁོལ་བའི་ལྷང་ལྷང་སྐད་ཀྱིས་དཀྲོགས།། གཉིད་ཀྱི་རྒྱ་མཚོ་སྐེམ་པའི་འདམ་མྱགས་ན།། སེམས་པ་ཁེར་སྐྱེས་མེ་ཏོག་ཟོལ་གྱིས་འཕུར།། སྐྱིད་ན་སྐད་འགོ་མི་མཐོ་འཇམ་གྱིས་སྡོད།། སྡུག་དུས་སྐྱོ་ལྭ་མི་གོན་འཛུམ་ནས་འགྲོ།། སེམས་པ་ལག་པས་སྐྱོར་བཞིན་ག་ལེར་ཉལ།། རང་གི་ལག་ན་རང་ཉིད་བདེ་བར་སྒོམ།། དགའ་དང་བདེ་བ་འཆར་དང་ནུབ་ཀྱིས་ཡོང་། སྐྱོ་དང་རྒུད་པ་དྲག་ཏུ་འཁྱུག་ཅིང་འབབ།། སྐྱིད་ལ་སྡུག་པའི་མི་ཚེ་འཛད་པ་ན།། འཁོར་བའི་མུན་ན་མུན་པ་དེ་ཙམ་མཐུག། 2019/2/23