བདག་གི་དྲ་ཚིགས་དང་རྨི་ལམ།

དགའ་ཕྱོགས་འདི་གང་ནས་རྙེད་པ་མ་ཤེས་ལ་དུང་བ་འདི་ཇི་ལྟར་ལོབས་པ་མ་རྟོགས་པའི་མི་ཚེ་འགྲུལ་བཞུད་ཁྲོད་ན་དགའ་ཕྱོགས་ཤིག་དང་དུང་བ་ཞིག་སྔ་མོ་སྔ་མོ་ནས་ཡོད་འདུག འདོར་མི་ཐུབ་པའི་དགའ་ཕྱོགས་དེ་དང་བསྒྱུར་མི་གཏུབ་པའི་དུང་བ་དེ་ཡིས་ངེད་ཀྱི་མི་ཚེ་ལ་སྤྲོ་སྣང་དང་རེ་བ། ཆེས་སྐྱིད་པོའི་རྨི་ལམ་རེ་རྟག་ཏུ་རྨིས་འཇུག་པས་ནམ་ཡང་ང་རང་སྤྲོ་སྣང་གི་ཕྱོགས་སུ་གོམ་པ་རེ་རེ་བཞིན་སྤོ་དགོས་པའི་སྐུལ་ལྕག་གཏོང་གི་ཡོད།

མི་ལོ་བཅུ་ལ་རུམ་པའི་རྨི་ལམ་དེ་ནི་ཐུང་ཐུང་ཞིག་མིན་ལ་དྲན་ངོས་ན་གསལ་བའི་མི་ལོ་དེ་དག་གི་ཁུག་པ་ན་ཆེས་དཀའ་སྡུག་བཙུར་མནན། གོམ་པ་རེ་རེའི་འདེགས་འཇོག་ཀྱང་ལྗིག་ཏིག་ཏིག་རེ་ཡོད་པ་ན། སུག་བཞི་འཛུགས་དགོས་ཐུག་རུང་ཨ་ནན་ཨུ་ཚུགས་ཀྱིས་འགོས་པའི་འབར་འབུར་ལ་ལྕོག་གི་ཉ་ག་ནས་རྦབ་འདྲིལ་གྱིས་ལ་འདབས་ལ་སླེབས་ཡོད་པས། ཕྱི་བལྟས་རེ་བྱེད་དུས་མགོ་བོ་ཕར་གཡུག་ཚུར་གཡུག་གིས་དབུགས་རིང་རེའང་ནར་གྱིས་ཤོར་འགྲོ། 

ད་རེས་ཀྱི་རྒྱལ་ཁའི་རྔ་ཆེན་རྡུང་བའི་སྐད་སྒྲ་དེས་ངེད་ཀྱི་རྨི་ལམ་དེ་རྨི་ལམ་ཞིག་མ་ཡིན་པར་རང་ལག་དྲོད་མོ་ན་ཆུ་བུར་མིག་གིས་ལྟ་ཉན་མྱོང་གསུམ་བྱེད་ཐུབ་པས་རྨི་ལམ་མངོན་འགྱུར་བྱུང་བའི་རྣམ་འགྱུར་གསོན་པོ་དེ་གྲུབ་ཡོད་པ་དཔང་པོར་བྱས། 

ད་ཐེངས་ཀྱི་སྲོང་བཙན་ཟིན་བྲིས་ཀྱི་ཇུས་འགོད་ནི་ཇུས་འགོད་ཆེས་གསར་ཤོས་ཤིག་ལ་ཇུས་འགོད་འདི་འདྲ་བ་ནི་ད་བར་བོད་ཀྱི་དྲ་ཚིགས་རེ་གཉིས་ཙམ་ལས་མི་འདུག དྲ་ཚིགས་ཀྱི་པར་གཞི་ཆེ་ཆུང་གསུམ་དང་ཡང་ན་པར་གཞི་མི་འདྲ་བར་ལྔ་ཡོད་ཟེར་ཡང་ཆོག གློག་ཀླད་(tablet,iPad) དང་ཁ་པར་གྱི་པར་གཞི་སོ་སོར་ཡིན་ལ་iPad དང་ཁ་པར་ནས་ཞེང་དང་སྲིད་ལའང་པར་གཞི་མི་འདྲ་བ་བཟོས་ཡོད། 

དཀར་ཆག་ཚན་པ་ནི། མདུན་ངོས། འབོལ་རྩོམ། རྩོམ་བཏུས། འཚོ་བའི་ཟིན་ཐོ། ཆ་འཕྲིན། སྙན་ཚིག་ཟུར་ཉར། རིག་ཚན་གཞན། བཅས་དགར་ཡོད་ལ། པར་གཞི་མདུན་ངོས་ཀྱི་ཚན་པ། འཚོ་བའི་ཟིན་ཐོ། འབོལ་རྩོམ། ཆ་འཕྲིན། རྩོམ་ཡིག་གསར་ཤོས། སྙན་ཚིག རིག་ཚན་གཞན། ཀློག་གྲངས་མང་ཤོས། དྲ་ཚིག་བདག་པོ། ཡིག་ཚགས། སྡེ་ཚན།  འབྲེལ་བ་བྱེད། འདི་ལྟར་ཚན་པ་ཆེ་ཆུང་དུ་མ་ཡོད། དྲ་ངོས་ནས་རྩོམ་ཡིག་ལ་ Google,LiveJoural,wordPress,TyprPad,AIM,OpenID བཅས་ཀྱི་ཁ་བྱང་གང་རུང་སྤྱད་ནས་མཆན་བཀོད་གནང་ཐུབ་ལ་གློག་འཕྲིན་ཡང་གཏོང་ཆོག། 

ད་སྐབས་གློག་ཀླད་ལསiPad དང་ཁ་པར་བེད་སྤྱོད་གཏོང་མཁན་མང་བར་བལྟས་ཏེ་iPad དང་ཁ་པར་གྱི་པར་གཞི་རན་པོ་བཟོས་ནས་ཀློག་པ་པོ་ལ་སྟབས་བདེ་བྱས་ཡོད། Rssདྲ་ཤོག་ཀྱང་བཟོས་ཡོད་པས་Rss ཀློག་ཆས་དག་ལས་སྟབས་བདེ་ཐོག་ནས་ལྟ་ཀློག་བྱེད་ཐུབ། 

ད་དུང་ཆེས་རྣམ་པ་གསར་པ་ཞིག་ནི་དྲ་ངོས་ཡིག་གཟུགས་monlam uni ouchan1 གཏན་འཇག་བཟོས་ཡོད་པས་ཁྱེད་ཀྱི་ཁ་པར་གྱི་ཡིག་གཟུགས་ཅི་ཡིན་མིན་ལ་མ་ལྟོས་པར་དྲ་ངོས་ཀྱི་གཏན་འཇག་ཡིག་གཟུགས་ཧ་ཅང་སྙིང་རྗེ་པོ་དེ་མཐོང་ཐུབ། Samsung ཁ་པར་སྤྱོད་མཁན་དག་གིས་Google chromeསོགས་དྲ་འབྱེད་མཉེན་ཆས་ལས་བོད་ཡིག་གི་དྲ་ཚིགས་ལྟ་ཀློག་མི་ཐུབ་པའི་དཀའ་ངལ་ཡོད་མུས་ལ། འོན་ཀྱང་ཐབས་ལམ་མེད་པ་ཞིག་མ་ཡིན་ཏེ། UC browser ཕབ་ལེན་བྱོས་དང་དེ་ནས་བོད་ཡིག་གི་དྲ་ཚིགས་ལྟ་ཀློག་ལ་དཀའ་ངལ་ཅི་ཡང་མེད་ལ། སྲོང་བཙན་ཟིན་བྲིས་ཀྱང་བདེ་བླག་ངང་ཀློག་ཐུབ། 

གང་ལྟར་ཁྱེད་ཀྱིས་ཐུགས་སྣང་ཀྱིས་རྒྱབ་སྐྱོར་དང་ཡང་ན་བསམ་ཆ། ལེགས་སྤེལ་ཉེས་འགོག་གི་ལམ་སྟོན་གང་ཡོད་རུང་དྲ་ངོས་ན་མཆན་བཞག་རོགས། 

ཀློག་པ་པོ་ཁྱེད་ཉིད་མེད་ན་ངེད་ཀྱི་དྲ་ཚིགས་ཇུས་འགོད་སྙིང་རྗེ་ཞིང་ནང་དོན་ཕུན་སུམ་ཚོགས་པ་ཇི་ལྟར་ཡོད་རུང་གནའ་མ་ལེན་མཁན་མེད་པའི་བུ་མོ་མཛེས་མ་དང་ཆེས་ཤིན་ཏུ་རབ་ཏུ་འདྲ་བ་ཡིན་ནོ།།