སྐད་འཕྲིན་བཀག་སྡོམ་དང་དེ་ལས་ཐར་ཐབས་ཡོད་དམ།

                                                                                                          སྲོང་བཙན།

མདང་དགོང་མཚན་དཀྱིལ་ནས་མགོ་བཙུགས་ཏེ་རྒྱ་གར་གཞུང་གིས་རྒྱ་ནག་གིས་བཟོས་པའི་མཉེན་ཆས་མི་འདྲ་བར་59བཀག་སྡོམ་བྱེད་པའི་གསལ་བསྒྲགས་སྤེལ་ཡོད། ཉེ་སྔོན་ས་མཚམས་སུ་དོན་རྐྱེན་བྱུང་བས་ལ་དྭགས་པ་བསོད་ནམས་དབང་ཕྱུག་གིས་རྒྱ་ནག་ལ་དམག་འཁྲུག་གཅིག་བུས་ཁ་གཏད་བཅག་པ་ལས་མཉེན་ཆས་སྤྱོད་མཚམས་འཇོག་པ་དང་ཚོང་འབྲེལ་མཚམས་འཇོག་བྱེད་པ་དེ་ནུས་པ་ཆེ་བ་ཡོད་པས་རྒྱ་གར་མི་མང་ཚོས་རང་རང་གིས་རྒྱ་ནག་ལ་ནུས་ལྡན་གྱི་དམག་འཁྲུག་འདི་རྒྱག་དགོས་པས་འབོད་སྐུལ་བྱས་ཡོད་པ་དང་རྐྱེན་དེས་རྒྱ་ནག་གི་མཉེན་ཆས་བསུབ་བྱེད་ཀྱི་Remove China App ཞེས་པའི་མཉེན་ཆོས་བཟོས་ཏེ་རྒྱ་ནག་གི་མཉེན་ཆས་བསུབ་པའི་ལས་འགུལ་ཡང་འབྱུང་མུས་རེད།

གྷལ་ཝན་ལུང་གཤོངས་སུ་རྒྱ་དཀར་ནག་གཉིས་གདོང་བྱུང་སྟེ་ཕན་ཚུན་གསོད་རེས་དང་ཤི་རྨིས་དེས་སླར་ཡང་རྒྱ་གར་གཞུང་མང་གཉིས་ཀ་ཁོང་ཁྲོ་ཆེན་པོ་ལངས་པའི་རྐྱེན་རྩ་བཟོས་ཏེ་རྒྱ་གར་གཞུང་གིས་རྒྱ་ནག་མཉམ་དུ་འཇོག་པའི་ཚོང་འབྲེལ་གན་རྒྱ་དུ་མ་ཞིག་རྩིས་མེད་དང་གྲུ་ཁ་ནས་ཅ་དངོས་བཀག་འགོག་གིས་རྒྱ་ནག་གི་ཅ་དངོས་འགག་སྒོ་ནས་ཡོང་མ་བཅུག་སོགས་དཔལ་འབྱོར་གྱི་དམག་འཁྲུག་མགོ་བཙུགས་ཡོད་མོད། རྒྱ་གར་གཞུང་འཛིན་ཚོགས་པས་ནུས་ལྡན་གྱི་བྱ་ཐབས་སྤེལ་མིན་དོགས་སློང་དང་སྲིད་བློན་མོ་དྷིས་རྒྱ་ནག་ལ་བསྟུན་ཐབས་ཀྱི་ཐབས་ཇུས་བཟུང་སྟེ་དམག་འཁྲུག་ཆེན་པོ་ཞིག་རྒྱག་མི་ཐུབ་ཅེས་རྩོད་གླེང་འབྱུང་གི་ཡོད། འོན་ཀྱང་མདང་ནུབ་མཚན་དཀྱིལ་གྱི་མཉེན་ཆས་བཀག་སྡོམ་དེས་གཞུང་འཛིན་ཚོགས་པས་འཇམ་ཐབས་དང་བསྟུན་མཁས་རང་བཞིན་གྱི་རྣམ་འགྱུར་མི་འཛིན་པར་ཕྱོགས་ཡོངས་ནས་རྒྱ་ནག་དང་དམག་འཁྲུག་ཅིག་རྒྱག་རྒྱུ་ཡིན་པའི་རྣམ་པ་གསལ་པོར་བསྟན་ཡོད།

སྐད་འཕྲིན་བཀག་སྡོམ་དེས་བོད་ཕྱི་ནང་གཉིས་ཀྱི་འབྲེལ་ལམ་གྱི་ཐག་པ་གཅིག་བུ་དེ་གཅོད་དོགས་ཀྱིས་ང་རང་འཚུད་པའི་བོད་ནང་དུ་འབྲེལ་བ་ཡོད་པ་དག་སླར་ཡང་༩༠གོ་གྲངས་ཀྱི་གནས་སྟངས་དེ་ལྟ་བུ་འབྱུང་སྲིད་སྙམ་པའི་སེམས་འཚབ་སླེབས་པ་དང་མི་སྒེར་པ་ཙམ་མིན་པར་གཞུང་དང་ཚོགས་པ་ཁག་ལའང་བོད་ནང་གི་གནས་ཚུལ་འབྱོར་བའི་རྒྱུ་ལམ་ཆད་པ་ལྟ་བུར་ངོས་འཛིན་ཆོག་པ་ཞིག་ཡིན་པས་སེམས་འཚབ་བྱེད་རིན་ཡོད་པ་ཞིག་ཀྱང་རེད་སྙམ།

སྐད་འཕྲིན་བཀག་སྡོམ་ཇི་ལྟར་བྱེད་ཀྱི་ཡིན་མིན་གསལ་པོར་མི་ཤེས་ནའང་ད་བར་རྒྱ་སྤྱིའི་ནང་དུ་མཉེན་ཆས་བཀག་སྡོམ་བྱེད་ཐབས་ཀྱི་ཐབས་ལམ་ཡོངས་ཁྱབ་སྤྱོད་བཞིན་པ་ནི་Android དང་iOS གཉིས་ཀྱི་མཉེན་ཆས་ཕབ་ཡུལ་ནས་མཉེན་ཆས་ཁག་ཕྱིར་འཕེན་བྱས་ཏེ་ཕབ་ལེན་མི་ཐུབ་པ་བཟོ་གི་ཡོད་པས་ཐབས་ལམ་འདི་ཉིད་སྤྱོད་སྲིད། དེ་ལྟར་ཡིན་དབང་དུ་གཏོང་ན་ད་ཡོད་མཉེན་ཆས་མུ་མཐུད་བསྐྱར་གསོupdate བྱ་ཐབས་མེད་ནའང་ཡོད་པ་དེ་མུ་མཐུད་བེད་སྤྱོད་གཏོང་ཐུབ། Android ཁ་པར་རིགས་ལ་Apps Store དེ་ཁོ་ན་ལས་ཕབ་ལེན་བྱ་མི་དགོས་པར་ཕབ་ལེན་བྱ་ས་མང་པོ་ནས་ལེན་ཐུབ་ཀྱི་ཡོད་སྟབས་ཕབ་ལེན་བྱེད་རྒྱུ་མི་རག་པའི་དཀའ་ངལ་ཡོང་མི་ཐུབ། འོན་ཀྱང་iOSཁ་པར་རིགས་ལ་App Storeགཅིག་བུའི་ལམ་ཁ་བརྒྱུད་ནས་མཉེན་ཆས་ལེན་དགོས་སྟབས་ཅུང་དཀའ་ངལ་འབྱུང་སྲིད་མོད། ཐབས་ལམ་གཏན་ནས་མེད་པའང་མིན་སྟེ་ཀུ་ཤུ་ཁ་པར་གྱི་country/region ནས་ས་གནས་རྒྱལ་ཁབ་གཞན་ཞིག་ལ་ཁ་སྒྱུར་བྱས་ན་ཕབ་ལེན་བྱ་རྒྱུ་མི་རག་པའི་དཀའ་ངལ་དེ་སེལ་ཐུབ།  འདི་ནི་ཕབ་ལེན་བྱ་ཡུལ་ནས་མཉེན་ཆས་བཀག་སྡོམ་བྱེད་པ་གཞི་བཞག་གིས་བཤད་བཞིན་ཡོད་པས་བཀག་སྡོམ་གྱི་བྱ་ཐབས་གཞན་བྱུང་ན་འདིས་ཕན་ཐོགས་པ་ཞིག་མིན།

རྒྱ་ནག་སོགས་དམག་ཕྱོགས་རྒྱལ་ཁབ་རེ་གཉིས་ཕུད་དེ་མིན་རྒྱལ་ཁབ་ནས་VPNམཉེན་ཆས་རག་རྒྱུ་དཀའ་ངལ་མེད་པས་དྲ་རྒྱའི་ལྕགས་རི་འཛུགས་ནའང་དེ་ལས་གཡོལ་ཐུབ་པའི་ཐབས་ལམ་དེ་དཀའ་ངལ་ཅན་ཞིག་མིན། བཀག་སྡོམ་ཇི་ལྟར་བྱས་རུང་དེ་ལས་ཐར་ཐབས་ཀྱི་ཐབས་ཤེས་ཀྱང་སྣ་ཚོགས་ཤིག་ཡོང་གི་ཡོད་པས་བོད་ཕྱི་ནང་གཉིས་སུ་དྲ་འབྲེལ་ཆད་ནས་མི་ནག་གི་མཚན་མོ་ལྟ་བུ་ཞིག་འཆར་མི་སྲིད་པས་སེམས་འཚབ་དེ་ཙམ་སྐྱེ་དགོས་པ་མི་འདུག་སྙམ། མདང་ནུབ་དང་ད་ནངས་གཉིས་ཀར་སྐད་འཕྲིན་གྱི་འབྲེལ་ལམ་ཆད་དོགས་ཀྱིས་བོད་ནང་གི་འབྲེལ་ཡོད་ཚོར་ལན་བཞག་པའི་ཆ་འཕྲིན་གྱིས་ཁེངས་འདུག་པས་སེམས་འཚབ་ཞུ་ཐབས་ཀྱི་གནས་ཚུལ་རེ་གཉིས་འབྲི་འདུན་སྐྱེས་ཏེ་ཤར་མར་བྲིས།
2020/6/30