ཞི་ལ་ལི་ཨ་རིའི་ཙུང་ཐུང་འདེམས་བསྐོ་ཆེན་མོའི་ནང་ཞུགས་པ།> ཁ་བྱང་འདི་མཐོང་མ་ཐག་བོད་སྐད་ཐོག་ཕབ་བསྒྱུར་བྱས་ཡོད་པའི་བརྙན་འཕྲིན་རྒྱུན་མཐུད་འཁྲབ་ཚན་ལྷ་རྗེ་ཞི་ལ་ལི་ཞེས་པ་དེའི་ནང་གི་ཞི་ལ་ལི་ཨ་རིའི་སྲིད་འཛིན་དུ་ལངས་པའི་སྐོར་གྱི་དགོད་དྲོ་བའི་ལྟད་མོ་གསར་པ་ཞིག་ལོས་ཡིན་སྙམ་ནས་གསར་འགྱུར་ལ་ཞིབ་ལྟ་ཐེངས་གཅིག་བྱས་པས་ང་རང་གད་མོ་ཤོར་ཏེ་གྲོག་ཁོག་ཀྱང་གཟེར་སོང་། གསར་འགྱུར་དེ་ནི་ལྷ་རྗེ་ཞི་ལ་ལིའི་སྐོར་མ་ཡིན་པར་ཨ་རིའི་སྲིད་འཛིན་ཟུར་པ་ཁེ་ལན་ཊིའི་སྐུ་ཟླ་ལྕམ་ཧི་ལཱ་རིན་ཨ་མི་རི་ཀི་སྲིད་འཛིན་འོས་བསྡུ་ནང་ལངས་རྒྱུ་ཡིན་པའི་སྐོར་གྱི་གསར་འགྱུར་ཚན་པ་བོད་ཡིག་ཏུ་ཕབ་བསྒྱུར་བྱས་པ་ཞིག་རེད་འདུག
བོད་ཀྱི་གསར་ཁང་དང་རླུང་འཕྲིན། བརྙན་འཕྲིན་ཚན་པ་བཅས་ཀྱི་བརྡ་ཆད་བཀོལ་སྟངས་དང་རྩོམ་བསྒྱུར་བྱེད་ལུགས་རེ་འགས་བོད་ཀྱི་སྐད་ཡིག་གཅིག་འགྱུར་ལ་བར་ཆད་དང་བརྡ་ཆད་གཏན་འབེལ་དང་ཡོངས་ཁྱབ་བེད་སྤྱོད་ལ་འགོག་རྐྱེན་རེའང་འགྱུར་བཞིན་འདུག རེ་བ་ཆེ་བའི་མཚོ་སྔོན་རླུང་འཕྲིན་ཁང་བཅས་ཀྱི་མིང་བརྡ་སྤྱོད་ལུགས་གང་མང་ཞིག་བོད་སྐད་ཐོག་ཡོད་མུས་བཞིན་རྒྱ་སྐད་སྤྱོད་པ་གང་མང་མཐོང་རྒྱུ་འདུག དཔེར་ན། ཨ་རིའི་སྲིད་འཛིན་དང་ཨིན་ཇི་སྲིད་བློན་ཞེས་ཡོད་བཞིན་དུ་ཨ་རིའི་ཙུང་ཐུང་། ཨིན་ཇི་ཙུང་ལི། སྤྱི་འཐུས་ཚོགས་པ་ལ་སྤྱི་འཐུས་ཏང་། འགོ་ཁྲིད་དང་འགན་འཛིན་ལ་འགོ་གཙོ་ཞེས་ཡོངས་ཁྱབ་མིན་པར་བཀོལ་སྤྱོད་དང་། ཉེས་རྟོག་ཅུས། སྲིད་གྲོས་ཨུ་ཡོན། ཀུ་ཤུ་ཀུང་ཟི། སྤྱི་ཁྱབ་ཧྲུང་ཅི། སོགས་ལ་བོད་ཀྱི་མིང་བརྡ་ཡོད་བཞིན་དུ་ད་དུང་འདི་ལྟར་ཨུ་ཚུགས་ཀྱིས་བཀོལ་སྤྱོད་བྱེད་བཞིན་པ་ནི་ཆེད་དུ་སྐད་ཡིག་ཅིག་ཡ་མ་གཟུགས་སུ་གཏོང་འདོད་པས་ཡིན་སྙམ་ལ། ཡང་སྙིང་རྩོམ་སྒྲིག་པ་ཚོས་མ་ཤེས་མ་མཐོང་བ་ནི་ཡིན་མི་སྲིད་ལ་ཅིས་ཕྱིར་བོད་སྐད་དག་མ་ཞིག་མ་བཀོལ་ཡིན་ནམ་སྙམ་སྟེ། ཀྲུང་གོའི་གཞུང་འབྲེལ་གསར་འགྱུར་ཁང་ཞིག་གི་བོད་ཡིག་པར་ངོས་ཀྱི་གློག་འཕྲིན་ཡིག་ཟམ་དུ་གོང་གི་གནད་དོན་ཐོག་ནས་གླེང་སྟེ་གློག་འཕྲིན་ཞིག་བཏང་བས་ཕྱིར་ལན་ཞིག་འབྱོར་སོང་། "ཁྱེད་རང་གི་དགོངས་འཆར་དག་གནད་ལ་འཁེལ་བ་ཤ་སྟག་རེད་ལ་ང་རང་ནས་ཀྱང་ནམ་རྒྱུན་སེམས་ཁྲལ་བྱེད་སའང་ཡིན་མོད། ཡིན་ནའང་ང་ཚོ་ན་ཆུང་རྣམས་ལ་རྒན་རབས་ཚོས་གཅིག་གྱུར་བྱས་པའི་མིང་ཚིག་དེ་དག་སྒྱུར་དབང་མེད་པས་ཅི་བྱ་གཏོར་མེད་ཀྱི་གནས་ལྟ་བུར་གྱར་ཡོད་ལ། རྒན་པ་ཚོས་ཨུ་ཚུགས་བྱས་ནས་སྒྱུར་གྱིན་མི་འདུག་པ་མ་ཟད། ད་དུང་དེའི་སྐོར་ཞུས་ན་དགའ་གི་མི་འདུག་པས་ཐབས་བཀོད་མེད་པ་ལྟར་ལུས་ཡོད་ལགས། མི་རིགས་གཞན་སོག་པོ་ལྟ་བུས་སྔ་མོ་ནས་དེ་དག་བསྒྱུར་ཟིན་ཞེས་འཆད་ཀྱིན་འདུག" ཁོང་གིས་ཡིག་ལན་འདི་ནས་མཐོང་བ་ནི་རྩོམ་སྒྲིག་པ་གཞོན་སྐྱེས་ཚོར་བྱ་ཐབས་མེད་པའི་གནས་སུ་གྱར་འདུག་པ་མཐོང་ལ། ཕྱོགས་གཞན་ནས་ཆབ་སྲིད་ཀྱི་ཇུས་ངན་ཞིག་ཡིན་པའི་ཚོར་བའང་སྟེར་ཡོང་བ་འདུག
མ་གཞི་བཙན་བྱོལ་ཁྲོད་དུ་སྐད་ཡིག་བཀོལ་སྤྱོད་ཀྱི་ཁྱབ་ཁོངས་དོག་ལ་བེད་སྤྱོད་བྱེད་མཁན་ཉུང་བ་དངོས་བདེན་ཡིན་རུང་རྒྱལ་ཕྱི་ནང་གི་གསར་འགྱུར་འབྲི་འགོད་ལ་གཅིག་གྱུར་དང་ཚད་ལྡན་ཡག་པོ་བྱུང་ཡོད་ཅིང་། མིང་བརྡ་བཀོལ་ལུགས་དང་སྒྲ་སྒྱུར་ཚུལ་ཐད་ནས་ཧ་ཅང་ལེགས་པོ་ཆགས་ཡོད། ཨིན་དང་རྒྱ་ཡིག་གི་མིང་བརྡ་སོ་སོའི་སྒྲ་ཉེ་སྒྱུར་བྱེད་ཐབས་བྱེད་བཞིན་ཡོད་ལ། ད་དུང་ཧྥ་རན་སུ་དང་འཇར་མེ། སོགས་ཀྱི་མི་མིང་དང་ས་མིང་སོགས་ཨིན་སྐད་ལ་མ་བསྟུན་པར་རང་རང་གི་སྐད་གདངས་དང་ཇེ་ཉེ་བྱེད་དགོས་ལུགས་ལམ་སྟོན་བཞིན་སླད་ནས་ལམ་དེ་གར་བཞུད་འགོ་རྩོམ་རྒྱུ་རེད་སྙམ།
<<ཨིན་བོད་ཚིག་མཛོད་གསར་མ>>འི་རྩོམ་སྒྲིག་པ་རྒན་ཀརྨ་སྨོན་ལམ་མཆོག་གིས་བཅའ་འདྲི་ཞིག་ཏུ་འདི་འདྲ་ཞིག་གསུངས་འདུག
"ང་ཚོས་མི་དང་ས་མིང་སོགས་ཀྱི་སྒྲ་གདངས་དག་དབྱིན་ཡིག་ནང་བྲིས་ཡོད་ན་ཨ་རི་དང་དབྱིན་ཇི་གཉིས་ཀྱི་སྒྲ་གདངས་ཕལ་ཆེར་གཅིག་པ་ཡིན་སྲིད་ཀྱང་། ཧྥ་རན་སི་དང་འཇར་མན་སྐད། སི་པན་སྐད་སོགས་དབྱིན་ཡིག་དང་འབྲི་ཚུལ་འདྲ་པོ་ཡོད་ཀྱང་སྒྲ་གདངས་མི་འདྲ་བ་ཡོད་སྟབས། འདྲ་བ་རྒྱུ་མཚན་བྱས་ནས་ས་ཆ་དང་མི་མིང་སོགས་ཁག་ཅིག་ཡོངས་གྲགས་ཡིན་ཡང་། ང་ཚོས་རིགས་ཁ་ཤས་ལ་དོ་སྣང་མ་བྱས་པར་ནོར་འཁྲུལ་ཤོར་གྱི་འདུག ལྷག་པར་དུ་རྒྱ་གར་གྱི་མི་དང་ས་ཆའི་མིང་སོགས་དབྱིན་ཡིག་ནང་བྲིས་པ་གཞིར་བཟུང་ཚུར་བསྒྱུར་བ་ཡིན་ན། དཀའ་ངལ་ཆེན་པོ་ཡོད་པ་ཞིག་ཚོར་གྱི་འདུག ས་ཆ་དང་མི། ལུང་པའི་མིང་སོགས་རྒྱ་གར་ཡིན་ན་རྒྱ་གར་གྱི་འབོད་སྟངས་ཁོ་ན་བསྒྱུར་རྒྱུ་དང་། ཉི་ཧོང་དང་ཧྥ་རན་སིའི་སྐད་ཡིན་ན་སྒྲ་གཞིར་བཞག་བསྒྱུར་རྒྱུ་གལ་ཆེན་པོ་རེད། དཔེར་ན། (Michael) དབྱིན་ཡིག་ཐོག་མེ་ཁཱལ་འབོད་ཀྱི་ཡོད་ཀྱང་། ཧྥ་རན་སི་སྐད་ཐོག་མེ་ཤཱལ་འབོད་ཀྱི་ཡོད་སྟབས། ང་ཚོས་མིང་དེའི་ཁུངས་མ་འཚལ་བར་མེ་ཁཱལ་ཡིན་ཤག་བྱས་ནས་བསྒྱུར་ཚེ། རྒྱལ་སྤྱིའི་གསར་འགྱུར་ཁག་གིས་མེ་ཤཱལ་ཞེས་འབོད་སྐབས་ངོ་གནོངས་དགོས་པ་ཆགས་རྒྱུ་རེད།"