དེ་སྔོན་བཞིན་༸གོང་ས་མཆོག་གི་འཁྲུངས་སྐར་ཉིན་མོ་ནི་སྤྲོ་སྣང་དང་དགའ་བ། སེམས་བབ་ལྷོད་པོ་གཏན་ནས་མེད་པར་གྱུར་ཅིང་། འདི་ཉིན་ཅི་ཞིག་བྱེད་དགོས་པའི་མནོ་བསམ་རེའང་འཁོར་གྱི་མི་འདུག ཁོང་གི་དགུང་ལོ་དང་བགྲེས་ཉམས། ཕེབས་བཞུགས་ཀྱི་རྒས་ཚུགས་དེ་དག་མཐོང་སྐབས་ངོ་མ་ཡིན་སེམས་པ་སྐྱིད་པོ་ཞིག་ཁྱོན་ནས་མི་འདུག མི་མང་པོ་ཞིག་ལ་ཁོང་ནི་འགྱུར་མེད་རྟག་བརྟན་ཞིག་དང་འཆི་མེད་རྡོ་རྗེ་ཞིག་ཚུལ་དུ་ཡོད་ལ། དགུང་ལོ་༡༡༣བཞུགས་པ་ཞལ་བཞེས་ཡོད་ཅེས་སྨྲས་ཤིང་བསམས་ཏེ་ཁོང་ལ་ཁེན་པའི་འདུ་ཤེས་དེ་འདོར་ཀྱི་མེད་ལ། ཁོང་གིས་གནང་རྒྱུ་རེད་བསམ་པའི་དྲན་པ་དེའང་གཏན་ནས་བསྐྱུར་འཇོག་མེད་པར་མུ་མཐུད་དེ་སེམས་པ་ལྷོད་པོ་དེ་འདྲུ་ནས་ཆས་བཞིན་ཡོད།
ཁོང་ཉིད་མཇལ་བའི་ལོ་དེ་ནས་བཟུང་མི་བཅོ་ལྔ་ཙམ་ལ་ཁོང་གི་མཛད་པ་དང་ལེགས་བཤད་རྟག་ཏུ་མཐོང་ཐོས་ཡོད་ཅིང་ངོ་མཚར་བའི་རྣམ་ཐར་ཆེས་མང་པོ་ཞིག་མཇལ་སྐལ་ཐོབ་པ་ནི་ཅི་འདྲའི་སྐལ་བ་བཟང་སྙམ་པ་ཡང་ནས་ཡང་དུ་འཁོར་ཡོང་གི་འདུག བདག་གི་མི་ཚེ་ནང་དུ་ཆེས་དད་པ་སྐྱེས་ས་གསུམ་ཞོགས་ཟེར་ན་ཐོག་ཐོག་མེད་པར་སྟོན་པ་ཐུབ་པའི་དབང་པོ་དང་རྗེ་ཙོང་པ། རྒྱལ་བ་རིན་པོ་ཆེ་གསུམ་ཨང་པོ་བགྲང་རྒྱུ་ནི་ཐེ་ཚོམ་མི་དགོས་པ་ཞིག་ཡིན། ངས་རྟག་ཏུ་ཁོང་གསུམ་པོ་ལ་ཅི་འདྲིའི་མཚུངས་ཆོས་ཞིག་འདུག་ཨང་སྙམ་བཞིན་ཡོད་ལ། རྣམ་དཔྱོད། བཟོད་སྒོམ། བྱམས་བརྩེ། དེ་ལས་ཀྱང་དགའ་ཞིང་དད་ས་ནི་ཞི་དུལ་བག་ཡོད་དང་ཁོགས་ཡངས་ཁེར་ཚུགས། མི་གཞི་དྲང་ལ་མི་ཆོས་དང་བསྟུན་པའི་མཛད་པ་མཐའ་དག་ནི་ང་ཙམ་མིན་པར་སྐྱེ་བོ་རྣམས་ཀྱིས་ཁོང་གསུམ་ལ་དགའ་དད་བྱེད་པའི་རྒྱ་རྐྱེན་གཙོ་བོ་ཡིན།
རྒྱལ་བ་རིན་པོ་ཆེ་ཟེར་ན་ལྷ་ཞིག་དང་སངས་རྒྱས་དངོས་ཡིན་སྙམ་ནས་དད་པའི་མིག་ཆུའང་འཐོར་མཁན་ཡོད་པ་ནི་དོན་དངོས་ཡིན་རུང་། ངེད་ལ་ནི་ཁོང་ཉིད་སངས་རྒྱས་དང་བྱང་སེམས་རེད་ཨང་སྙམ་པ་ཨུ་ཚུགས་ཀྱིས་སྒོམ་ནའང་དད་པ་དམིགས་བསལ་བ་ཅི་ཡང་སྐྱེ་མ་ཐུབ་ལ་ལྡོག་ཏེ་ཁོང་གི་མི་ཚེ་གཅིག་ཏུ་བཀའ་སྤྱོད་འབོད་བརྩོན་དང་དགའ་སྐྱོ་ཁྲོ་གསུམ་བརྒྱུད་ནས་ཡོང་བའི་སྐྱེ་བོ་ཞིག་ཏུ་མཐོང་བཞིན་ཡོད། ད་བར་གསུང་ཆོས་དང་ལེགས་བཤད། ཆེད་ཁྲིད་དང་དཔེ་ཁྲིད། མྱོང་ཁྲིད་དང་ཟབ་ཁྲིད་ཅེས་པ་བླ་མ་དང་མཁས་དབང་། དགེ་བཤེས་ཚོས་ཅི་བས་མང་པོ་གནང་བཞིན་ཡོད་ནའང་ཁོང་གི་གསུམ་དུམ་རེ་གནང་ལུགས་དང་ཁྲིད་ལུགས་ལ་ནི་བསྡུར་ས་མེད་པ་ཞིག་འདུག་ཅིང་། དེ་ནི་རྒྱལ་བ་རིན་པོ་ཆེ་ཆེ་པོ་ཞིག་ཡིན་པའི་ཐད་ནས་མིན་པར་མི་ཚང་མར་མྱོང་བ་རེ་ཡོད་ཡོད་པ་ཡིན། ངས་ནམ་ཡང་ཁོང་ཉིད་གྲྭ་ཚང་ཞིག་གི་མཁན་པོ་དང་གདན་ས་ཞིག་གི་དགེ་སྐོས་ཡིན་ཚེ་ལས་སྣེ་བཙན་པོ་ཞིག་དང་ཕན་མེད་ཀྱི་ལམ་སྲོལ་ལ་མི་བསྟུན་ཞིང་དགོས་མེད་ཀྱི་ལས་ཀ་མང་པོ་ཞིག་ཆུ་ནང་འཕངས་ཕོད་པའི་ལས་སྣེ་བཙན་པོ་ཞིག་ལོས་ཡིན་སྙམ་ལ། ཁྱིམ་ཚང་ཞིག་གི་ཕ་རྒན་ཞིག་ཡིན་ཚེ་བུ་ཕྲུག་དག་གཅེས་ལོངས་སུ་མི་གཏོང་ལ་སྒྲིག་འཛུགས་ཡོད་པའི་ཁྱིམ་ཚང་བཟང་པོ་ཞིག་སྐྲུན་ཡོད་པ་ཁོ་ཐག་ཡིན་པ་སྙམ། ཁོང་གིས་བཀའ་སློབ་ནན་པོ་དང་མཐའ་ན་ཚོགས་གཏམ་རེ་མ་གཏོང་ན་བསྒྱུར་བཅོས་དང་འགོ་འཛུགས་མི་བྱེད་པའི་ངེད་ཅག་འགོ་མཇུག་ཚང་མའི་ལས་ཀ་ཅུང་ནི་དེ་འདྲ་རྐྱང་རྐྱང་ཡིན་ལ། བོད་དང་ལྷག་པར་བཙན་བྱོལ་ནང་གི་ལེགས་བཅོས་དང་། དེ་ལས་ཀྱང་རི་བོ་དགེ་ལུགས་པ་ད་ཆ་སྤུས་ཀ་བཟང་ཞིང་མི་ཕྱུག་ཆེ་ལ། སློབ་གཉེར་ཡར་ཐོན་དང་སྒྲིག་འཛུགས་ལེགས་པོ་ཡོང་བ་ཁག་༸རྒྱལ་བ་མཆོག་གི་ནན་གསུང་དང་ཚོགས་གཏམ་རེ་རེས་སྐུལ་ནས་ཡོང་བ་ཤ་སྟག་ཡིན། ཁོང་ཉིད་ཞལ་མ་བཞུགས་ན་ངེད་ཅག་གི་ལས་དོན་མང་པོ་ཞིག་སྒྲུབ་ཐབས་མེད་ཅེས་བཤད་པའང་དངོས་ཡོད་ཡིན་པ་ནི་གོང་དུ་བཤད་པ་ལྟར་རེད། ངེད་ཅག་སྣ་ལ་འཇུས་ནས་ཁྲིད་མཁན་མེད་ན་ལམ་དུ་དེ་ཙམ་བསྐྱོད་མི་ཤེས་པའི་མི་རིགས་ཤིག་པས་ཁོང་ཉིད་ལྟ་བུ་ཞིག་མེད་ན་ཕྱོགས་མང་པོ་ནས་དཀའ་ངལ་དང་རྙོག་འཛིངས་ཡོང་རྒྱུ་གཏན་ཁེལ་རེད།
རྒྱལ་སྤྱིའི་ཐོག་ཏུ་ཁོང་ཉིད་ལྷ་དང་བླ་མ་ཞིག་མཐོང་ནས་དད་ཅིང་མོས་པ་མ་ཡིན་པར། འཇིག་རྟེན་སྐྱེ་འགྲོ་མང་པོའི་ཁྲོད་ནས་དཀའ་སྤྱོད་འབད་བརྩོན་ཀྱི་འགག་འཕྲང་རྒལ་ནས་ཡོང་བའི་སྐྱེ་མཆོག་ཅིག་ཡིན་པ་མཐོང་བཞིན་ཡོད་ལ། མི་གཞི་དྲང་ལ་ཁ་ཁོག་མེད་པའི་དྭང་གཙང་བྱིས་པའི་སེམས་ཁམས་ཁུར་ཡོད་པའི་མི་ཞིག་མཐོང་བཞིན་ཡོད། ཁོང་གི་མདུན་དུ་ཡོང་ཞིང་འདུར་བའང་དབང་དང་ལུང་། མན་ངག་དང་བརྒྱུད་པ་ཉན་འདོད་མ་ཡིན་པར་སྐྱེ་མཆོག་ཞིག་གིས་མི་ཚེ་བརྒྱུད་རིམ་ནས་རྙེད་པའི་སྡོམ་ཚིག་དེ་ཉན་དུ་ཡོང་ཞིང་། ཇི་ལྟར་བྱས་ཏེ་མི་ཚེ་དཀའ་ཁག་ནས་གྲོལ་དགོས་པ་དང་། གང་འདྲ་བྱས་ཏེ་དཀའ་སྡུག་ལ་གདོང་ལེན་བྱེད་དགོས་པའི་ལམ་སྟོན་ཉན་དུ་ཡོང་བ་ཡིན་ལ། བདེ་སྐྱིད་ལྡན་པའི་མི་ཚེ་ཞིག་ཇི་ལྟར་སྐྱེལ་དགོས་པའི་དྲི་ལན་དེ་ཐོབ་རེས་མི་ཚོགས་ས་ཡ་མང་པོས་ཁོང་གི་མདུན་དུ་རྒྱུག་བཞིན་ཡོད།
Comments
Post a Comment