(རྒྱལ་སྤྱིའི་སྐད་ཡིག་ཉིན་མོར་རྗེས་དྲན་མཚོན་བྱེད།)
སྐད་ཡིག་གསེར་ཐག་བཞིན་དུ་འགུལ་ལ་བརྒྱན།།
སྐད་ཡིག་རྣ་ལོང་ཇི་བཞིན་སྙན་དུ་འདོགས།།
སྐད་ཡིག་མིག་འབྲས་ལྟར་དུ་གཅེས་པར་བཟུང་།།
སྐད་ཡིག་ལག་པའི་བར་ནས་ཤོར་མི་རུང་།།
མ་སྐད་ཨ་མའི་སྙན་དབྱངས་རོལ་མོའི་ཚུལ།།
མ་སྐད་ངག་ནས་འཁྲོལ་བའི་མགྲིན་བཟང་ལས།།
མ་སྐད་ཚིག་ལ་བརྒྱུས་ཏེ་དབྱངས་སུ་བཀུག།།
མ་སྐད་ཀ་མད་སུམ་ཅུ་བོར་མི་རུང་།།
ཕ་སྐད་དག་པ་སྨྲ་བའི་ཁ་ལྕེ་དགོས།།
ཕ་སྐད་ཇི་བཞིན་འབྲི་བའི་ལག་རྩལ་མཁོ།།
ཕ་སྐད་རྒྱུད་དུ་སྤྱོད་པའི་སྙིང་སྟོབས་དགོས།།
ཕ་སྐད་བརླག་པར་མ་བྱེད་ཕ་བཟང་བུ།།
རང་སྐད་རང་གིས་སྤྱོད་པའི་སྤོབས་པ་དགོས།།
རང་སྐད་གཞན་ལ་སྤེལ་བའི་མཁྱེན་རྒྱ་དགོས།།
རང་སྐད་གོང་འཕེལ་གཏོང་བའི་ཆོད་སེམས་དགོས།།
རང་སྐད་ཉམས་པར་མ་བྱེད་གངས་ཅན་པ།
སྐད་ལ་བག་ཆགས་འཇོག་ཙམ་བྱེད་དགོས་མེད།།
སྐད་ཡིག་འཕགས་ནོར་བདུན་ལྡན་ལག་ན་ཡོད།།
སྐད་ཅིག་ཡུན་ཐུང་ཙམ་ཡང་མ་ལྷོད་པར།།
སྐད་ཡིག་བདག་གཅེས་མཛོད་ཅིག་རིགས་ཀྱི་བུ།
གཞན་སྐད་དག་པ་སྨྲ་རུང་རང་སྐད་མིན།།
གཞན་སྐད་ཇི་བཞིན་ཤེས་རུང་ཕ་སྐད་མིན།།
གཞན་སྐད་མ་ལུས་མཁྱེན་ཀྱང་མ་སྐད་མིན།།
གཞན་སྐད་མ་ཡིག་ཚུལ་དུ་མ་སྤྱོད་རོགས།།
དབྱིན་སྐད་སྨྲ་ལ་སྤོབས་པ་ལོས་ཀྱང་དགོས།།
དབྱིན་ཡིག་འབྲི་ལ་བརྩོན་པ་མཁོ་ན་ཡང་།།
དབྱིན་སྐད་དེས་ནི་རང་སྐད་གསོད་བྱེད་པས།།
དབྱིན་སྐད་དེ་ལ་གཟབ་པར་བྱེད་རོགས་ཨང་།
རྒྱ་སྐད་ཤེས་ན་ཕན་ཚུན་སྟབས་ཀྱང་བདེ།།
རྒྱ་སྐད་རྒྱག་ན་གོ་བརྡ་འཕྲོད་ཀྱང་སླ།
རྒྱ་སྐད་འདི་པས་རང་སྐད་གཏོར་སྲིད་པས།།
རྒྱ་སྐད་འདི་ལ་དོགས་ཟོན་བྱེད་རྒྱུ་གལ།།
མེས་པོའི་གཅེས་ནོར་ཕ་སྐད་ལམ་ནས་འཛིན།།
མེས་པོའི་ཤུལ་བཞག་སྲུང་ཞིང་ཉར་བ་བྱ།།
མེས་པོའི་མཛོད་ལ་ཇི་བཞིན་མངའ་རྙེད་པ།།
མེས་པོའི་བུ་ཚ་ཡང་དག་བགྱིས་ཤིག་བུ།།
བོད་ཀྱི་མི་ལ་བོད་སྐད་རྒྱག་རོགས་གནོངས།།
བོད་ཀྱི་ཡུལ་ལ་སྐད་ཡིག་བཀོལ་རོགས་གནོངས།།
བོད་ཀྱི་སྐད་ལ་སྲུང་སྐྱོབས་མཛད་རོགས་གནོངས།།
བོད་ཀྱི་སྐད་ཡིག་དར་སྤེལ་བྱེད་རོགས་གནོངས།།
2017-2-21