ད་ལྟ་ལོ་གསར་ཚེས་གཅིག་རྫོགས་པར་ཆུ་ཚོད་གཅིག་ཙམ་ལས་མི་འདུག ཉིན་མོ་འདི་ནི་ངེད་ཅག་བོད་པ་ཚོའི་བཀྲ་ཤིས་པའི་ཉིན་མོ་ཞིག་སྟེ། ཉིན་འདིར་ནང་མི་ལྷན་འདུས་དང་དགའ་ཉེ་མཉམ་འཛོམས་བྱས་ཏེ་དགའ་དགའ་སྤྲོ་སྤྲོ་གནང་བའི་དུས་ཚོད་གལ་ཆེན་ཞིག་ཡིན། ངས་ཀྱང་དུས་ཚད་འདི་དམ་འཛིན་གྱིས་ནང་མི་མཉམ་འཛོམས་ངང་དགའ་སྤྲོ་ཞིག་བྱ་དགོས་བསམ་རུང་། འདི་ནི་རྨི་ལམ་ཙམ་ལས་མངོན་འགྱུར་བྱ་ཐབས་དཀའ་བ་ཞིག་ལོས་ཡིན་པའང་དྲན་གསོ་ཐེབས་བྱུང་།
ད་བར་བཙན་བྱོལ་དུ་སླེབས་པའི་ལོ་ཟླ་དེ་དག་གི་རིང་དུ་དཀའ་སྡུག་གི་མི་ཚེ་རིང་མོའི་བསྐོས་འཛེག་ཏུ་གོམ་པ་ར་རེ་བཞིན་སྤོས་ཏེ་སླེབས་ཡོད་ཅིང་འདི་ནི་དཀའ་ཚེགས་ཀྱི་རིམ་བཞུད་ཅིག་ཡིན་རུང་དེ་ལས་ཀྱང་བཟོད་པ་དཀའ་བ་དེ་ནི་ཕ་མ་དང་ཁྱིམ་ཚང་ཁ་བྲལ་བའི་སྐྱོ་སྡུག་དེ་ཡིན། ཡིད་སྐྱོ་དགོས་པའི་གནས་ཚུལ་འདི་ནི་ང་ཙམ་མིན་པར་མི་ཆེས་མང་པོ་ཞིག་ལ་ད་ལྟ་ཡང་འཕྲད་བཞིན་ཡོད་པའི་དཀའ་ངལ་ཆེ་ཤོས་དེ་ཡིན་ཞེའ་ཟེར་ཆོག་པ་འདྲ། སྟབས་ཡག་པའི་གནད་དོན་ཞིག་ནི་ད་ཆར་བརྡ་འཕྲིན་གྱི་འཕེལ་རླབས་མྱུར་ཞིང་དང་དྲ་བའི་དུས་རབས་སུ་སྐྱོད་མགྱོགས་པས་འཛིང་གླིང་མཐའ་རྒྱ་ཆེ་རུང་སྐར་ཆ་ཁ་ཤས་ནང་དུ་ཕན་ཚུན་འཚམས་འདྲི་དང་གནས་ཚུལ་འདྲི་རེས་བྱ་ཆོག ཁོ་བོས་ཀྱང་ཕ་མ་གཉིས་པོར་ཁ་པར་བཏང་ནས་སྟབས་བདེ་འཚམས་འདྲི་རེ་བྱས་པ་ཡིན་མོད། དེ་སྔ་དང་འདྲ་བར་ཁ་པར་འཇོག་གྲབས་བྱེད་དུས་ཨ་མས་ཡང་ནས་ཡང་དུ་"ཚེ་རིང་ནད་མེད་"ཅེས་གསུང་བཞིན་སྐད་ཆ་མཚམས་འཇོག་མི་ཐུབ་པའི་ཚུལ་དེ་དེ་རིང་ཡང་གནང་བྱུང་། འཚམས་འདྲི་ཞུ་ཐུབ་པའི་དགའ་བའི་མུར་སྐྱོ་བ་རྣོན་མ་རེའང་བྱུང་སོང་། ཁ་པར་བཞག་རྗེས་ད་རུང་ཡང་སྙིང་ཁ་ན་རྡོག་རྡོག་ཅིག་འདུག་པས་དབུགས་ཀྱང་ལེན་དཀའ་བ་ཞིག་གྱུར།
དྲ་གྲོགས་ཤིག་གིས་བརྙན་ཞིག་སྐུར་ནས་ཁོ་བོའི་ཕ་མ་གཉིས་པོ་རེད་ཅེས་སྟབས་བདེ་ངོ་སྤྲོད་རེའང་གནང་འདུག་ཕར་བལྟས་ཚོད་ལ་ཕ་མ་དེ་གཉིས་པོ་དགུང་ལོ་ཅུང་མཐོ་ཙམ་འདུག་ཅིང་གྲོགས་པ་དེས་ཟེར་ན་ཕ་མ་གཉིས་ཀ་དགུང་ལོ་བདུན་ཅུ་ལྷག་རེད་ཟེར། དེ་མ་ཉིད་དུ་ཁྱེད་བུ་ཤོས་དེ་ཨེ་རེད་ཅེས་དྲིས་པས་ཁོ་བོ་བུ་ཕྲུག་ཆུང་ཤོས་དེ་ཡིན་ཚུལ་ལན་ཞིག་འབྱོར་སོང་། ཁྱེད་རང་ད་ལོ་སང་ལོ་ལས་མ་ཕྱི་པར་བོད་དུ་གཉེན་འཕྲོད་དུ་ངེས་པར་འགྲོ་ན་ཡག་ཚུལ་སོགས་སེམས་ཚོར་ཞིག་དང་འགྲོགས་ནས་བཤད་པ་ཡིན་མོད། ཁོང་གི་ལན་དེས་ནི་ངེད་རང་སེམས་སྡུག་རྦ་རླབས་བཞིན་ཁོག་ཏུ་འཕྱུར་ཅིང་། སྐྱོ་ལ་སྡུག་པའི་འཚོ་བའི་སྒྲུང་འདི་འདྲ་ནི་མི་ག་ཚོད་ཅིག་ལ་ཡོང་མྱོང་ཞིང་ད་ལྟའང་དཀའ་ངལ་འདིའི་འོག་ན་ཅི་འདྲའི་མང་པོ་མྱོང་བཞིན་ཡོད་ཨང་བསམ་པའི་ཚོར་བ་ཞིག་མེ་ཕུང་བཞིན་འབར་བྱུང་། ང་ཚོ་ནི་བོད་རང་སྐྱོང་ལྗོངས་ཀྱི་འོག་ལ་ཡོད་པས་འགྲོ་བསམ་རུང་ཐབས་ཤེས་མི་འདུག། མ་ཟད་རང་ཁྱིམ་དུ་རང་ཉིད་དང་འབྲེལ་བའི་ལག་ཁྱེར་ཡོད་ཚོད་བཙན་འཕྲོག་བྱས་འདུག་པས་འགྲོ་ཐབས་ཤིག་ཡོད་པ་མ་རེད་ཟེར། ཁོང་གི་ཕ་མ་རྒན་རྒོན་གཉིས་ལོ་ཚོད་མཐོ་བའི་གོང་ལ་རང་ཉིད་ཀྱི་བུ་ཕྲུག་ཆུང་ཤོས་དེ་ས་མཐའ་ན་ཡོད་བསམ་དུས་ཅི་འདྲའི་དྲན་གདུང་ཞིང་དང་ཅི་འདྲའི་ཐུག་འདོད་ཅིག་ཡོད་རྒྱུ་རེད། མ་ཤི་ཚུན་ལ་ལན་གཅིག་ངོ་འཕྲོད་ཅིག་བྱུང་ན་བསམ་པའི་རེ་བ་ག་ཚོད་ཅིག་ཡོད་རྒྱུ་རེད། ཕ་མ་རྒན་འཁོགས་གཉིས་པོའི་བརྙན་དེ་བལྟས་ཀྱིན་རང་ཉིད་ཀྱི་མིག་མཐའ་ན་མཆུ་ཞག་འཁོར་ཞིང་རེ་བ་ཟད་པའི་གནས་ཚུལ་འདི་ཤེས་རྟོགས་བྱུང་དུས་གྲོགས་པོ་ཁོང་ལ་ཅི་ཡང་བཤད་མ་ཤེས་ལ་གང་ཡང་ལབ་རྒྱུ་ཟད་དེ་ཁོང་དང་ཡིག་འབྲེལ་ཡང་དེ་གར་མཚམས་བཞག་དགོས་བྱུང་།