རིགས་པའི་བརྡར་ཤ་གཅོད་པའི་ཆོས་གྲྭ་ན།།
རིགས་ལམ་རླབས་ཀྱི་ཕྲེང་བ་མགོ་ནས་སྐོར།།
རིགས་པའི་གློག་འགྱུ་ཁྱུག་པའི་གར་སྟབས་ཅན།།
རིགས་སྨྲ་ཁྱེད་རྣམས་གུས་པས་འདུད་ས་ཡིན།།
གནས་མཆོག་དེ་ནི་དགོན་པ་ཙམ་ཞིག་མིན།།
དགོན་སྡེ་དེ་ཡང་ཆེ་བ་ཙམ་ཞིག་མིན།།
ཡུལ་སྡེ་ཀུན་ལ་ས་གྲགས་གནམ་གྲགས་ཅན།།
གདན་ས་ཆེན་པོ་དཔལ་ལྡན་འབྲས་སྤུངས་ཡིན།།
གཞུང་ལུགས་ཆེན་མོ་ཤེས་རྒྱ་མཐོང་རྒྱ་ཙམ།།
རྩོད་པ་དགོས་ན་རིགས་ལམ་མྱུར་མོ་ཙམ།།
འཆད་ལ་ཐུག་ན་ཁ་ལྕེ་བདེ་བ་ཙམ།།
དེ་འདྲ་ཙམ་ཞིག་མ་བསམ་ཞིབ་ཏུ་ལྟོས།།
ཐོས་པའི་དོན་ཉིད་བསམ་པས་གཏིང་དུ་སྐོར།།
བསམ་དོན་མཐའ་དག་རྒྱུད་ཀྱི་རུས་ལ་སྦྱོར།།
སྒོ་གསུམ་ཉོན་མོངས་བསླབ་པའི་རྒྱ་ལ་འཆུད།།
གནས་མཆོག་དེ་ན་སྐྱེས་ཆེན་རི་འདྲ་ཡོད།།
མཁས་པ་ཟེར་བ་ས་ཕྱོགས་ཀུན་ལ་ཡོད།།
སྨྲ་བསམ་བརྗོད་མཁས་གནའ་དང་ད་ལ་ཡོང་།།
ཇི་ཙམ་མཁས་ན་དེ་ཙམ་ཞི་ཞིང་དུལ།།
གནས་མཆོག་དེ་ཡི་ཁྱད་ནོར་ཉག་གཅིག་ཡིན།།
རྩོད་པའི་ཚེ་ན་གང་ཡང་ལབ་ཀྱང་འགྲིག།
འགལ་འདུལ་ཅན་ལ་ལུང་གིས་རྡུང་ཡང་ཆོག
ལུང་ཚིག་སྐྱོར་ན་བསོད་གྲགས་མ་ཟེར་ཨང་།།
གདན་ས་སེ་རའི་སྐྱེས་ཆེན་འཁྲུལ་མེད་ཡིན།།
གཞུང་ལུགས་དྲངས་དུས་གུས་པས་མཚན་དངོས་སྨོས།།
བཅའ་ཡིག་ཟེར་ནས་ཚིག་རྩུབ་མ་གནང་དང་།།
གདན་ས་སེ་རའི་སྐྱེས་ཆེན་རི་བོ་དེའི།།
ཟབ་ཅིང་བརླིང་བའི་ཕྱག་རྩོམ་ངོ་མ་ཡིན།།
མཇལ་བ་ཙམ་ལ་དད་པ་འཕེལ་འགྱུར་བ།
རྒྱལ་ཚབ་ཁྲི་ཟུར་ད་དུང་དེ་ན་ཡོད།།
གོ་སྐབས་ཡོད་དུས་ལན་གཅིག་མཇལ་བར་བྱོས།།
ཕྱི་ཆོད་དུས་ན་མཇལ་སྐལ་ཡོད་རེ་དཀོན།།
སྐུ་ཤ་སྐམ་རིད་སྙུང་གཞི་བཞེས་ན་ཡང་།།
རྣམ་ཐར་མཇལ་ན་དད་པའི་སྤུ་ལོང་གཡོ།།
གྲྭ་རྐྱང་ཞིག་གི་མི་ཚེ་སྐྱེལ་བའི་བུ།།
དགའ་ལྡན་ཁྲི་ཆེན་མཇལ་རྒྱུ་མ་བརྗེད་ཨང་།།
གོ་ཐོབ་སྤྲོད་ན་མི་མཉེས་རྣལ་འབྱོར་པ།།
ངན་ངོན་འཚོ་བ་རྒྱུན་དུ་རྟེན་པར་མོས།།
དབུ་སྐྲ་དཀར་ཡང་རིགས་པའི་དཔའ་བོ་ཆེ།།
དཔལ་ལྡན་གྲགས་པ་མཇལ་རྒྱུ་རག་ཐབས་བྱོས།།
མི་དགའ་གཏམ་གྱིས་སུན་གཙེར་བཟོས་ན་ཡང་།།
རྒྱལ་བའི་རྗེས་སུ་ཤ་འབྱར་རུས་འབྱར་མཁན།།
གནད་ལ་ཐུགས་དུས་རང་ཚུགས་ཡོད་པའི་མི།།
ཡོངས་འཛིན་གླིང་སྤྲུལ་མཇལ་རྒྱུ་མ་བརྗེད་ཨང་།།
གཞུང་ལུགས་དཔེ་སྐྲུན་མང་བ་ཙམ་ཡང་མིན།།
ཞིབ་ཕྲ་དག་ཐེར་མཛད་བཟང་བཀའ་དྲིན་ཅན།།
བློ་གླིང་དཔེ་ཚོང་སྒོ་མོ་ཕྱེས་ཡོད་ན།།
ཞར་དང་ཞོར་ལ་ཡང་ཡང་གཟིགས་པར་མཛོད།།
འདུ་ཁང་ཆེ་ཡང་ཨར་མདམ་རྣོ་སྐུད་ཙམ།།
ཆོས་གྲྭ་མཐོ་ཡང་ལྕགས་གདུང་ལྕགས་ལེབ་ཙམ།།
དེ་ཙམ་མཇལ་ན་འགྲིག་ཤག་མི་གནང་བར།།
སྐྱེས་ཆེན་དག་ལ་གུས་པས་མཇལ་བར་བྱོས།།
པེ་ཧར་རྒྱལ་པོ་གོ་ཐོབ་བཟང་ན་ཡང་།།
ངེད་ཅག་ལ་ནི་སྡོངས་གྲོགས་བྱེད་རེ་དཀའ།།
ན་ནིང་ད་ལོར་ལྷ་རྐུབ་བུད་གྲགས་ལ།།
མ་མཇལ་ན་ཡང་ལྟས་ངན་ཡོང་དོགས་མེད།
2016-2-8