ཁ་ཚ་དགོས་གཏུགས་ཀྱི་ལས་ཀ།

  —སྤྱི་སྐད་ཡོང་ཐབས་སྐོར་ཐབས་ལམ་གླེང་བ།

    དྲ་བའི་འཇིག་རྟེན་ན་འཁོར་དང་སྐྱོད་བཞིན་པའི་ངེད་ཅག་བོད་པ་ཚོར་དྲ་བ་དང་ཤ་རུས་བཞིན་ཁ་ཁར་གཏོང་ཐབས་མེད་པའི་དེ་རིང་གི་དུས་སུ། དྲ་བ་སྤྱད་དེ་ཉིན་རེའི་ཆེས་དགོས་མཁོ་དང་ནམ་ཡང་མ་ཤེས་ཐབས་མེད་ཀྱི་འཚོ་བའི་རྒྱུན་ཤེས་སོགས་སྣ་སྒོ་དུ་མ་ནས་སྤེལ་དང་འགྲེམས་བཞིན་པ་ནི་ཧ་ཅང་དགའ་འོས་པ་ཞིག་ཡིན་ལ། མི་མང་པོས་ཞར་ཞོལ་དུ་ལུས་ཀྱི་འཕྲོད་བརྟེན་དང་འཁོར་ཡུག་བདག་བཅེས། སྐད་ཡིག་བཀོལ་སྤྱོད། རིག་གཞུང་རྒྱུན་འཛིན་སོགས་རང་རང་གིས་ཐུབ་ཚད་འཇོན་ཚད་གང་ཡོད་བསྒྲུབས་ཏེ་རང་རེའི་གངས་ཅན་པ་ཚོའང་དེང་རབས་ཀྱི་དཔལ་ཡོན་སྣ་ཚོགས་པ་ལ་གོམ་པ་མདུན་སྐྱོད་བྱེད་བཞིན་པའང་སྤྲོ་སྣང་སྐྱེ་དགོས་པ་ཞིག་རེད། 

ད་རེས་བདག་གིས་ཆེས་བཤད་འདོད་པ་ནི་གཅིག་གྱུར་གྱི་སྐད་བརྡ་མེད་པའི་ཁོར་ཡུག་དང་དེས་སྤྲོད་པའི་དཀའ་ཁག་དང་སྐྱོ་གནས་དེ་ཡིན། རང་རེའི་དང་ས་འདྲེས་ཡིན་པའི་འབྲུག་རྒྱལ་ཁབ། དེ་བཞིན་ཧི་མ་ལ་ཡ་མི་རིགས་མོན་དང་ལ་དྭགས་སོགས་བོད་ཡིག་བཀོལ་སྤྱོད་བྱེད་བཞིན་པའི་རང་དབང་ཅན་གྱི་ཡུལ་གྲུབ་དེ་དག་དང་བསྡུར་ན་རང་རེ་གངས་ཅན་པ་གཞིས་བྱེས་གཉིས་སུ་སྐད་ཡིག་སྲུང་སྐྱོབ་དང་སྐད་ཡིག་དང་འབྲེལ་བའི་བརྡ་འཕྲིན་གསར་གཏོད་དྲ་ཚིགས་དང་ཚགས་པ། དུས་དེབ་དང་རྩོམ་དེབ་འགྲེམས་སྤེལ་བྱེད་པ་ནི་ཧ་ཅང་མཚོན་མཐོ་ཞིང་སྤུས་ཀ་བཟང་བ་ནི་དོན་དངོས་ཤིག་ཡིན། འོན་ཀྱང་ཆེས་སྐྱོ་གནས་དང་ཆེས་དཀའ་ཁག་དེ་ནི་སྐད་བརྡ་གཅིག་འགྱུར་མེད་པ་འདི་ཡིན་ཞིང་གཅིག་འགྱུར་གྱི་སྐད་བརྡ་མེད་སྟབས་སྡིངས་ཆ་གཅིག་གི་སྟེང་ནས་མདོ་དབུས་ཁམས་གསུམ་གྱི་མི་སྣ་མཉམ་འཛོམས་ཐོག་བགྲོ་གླེང་དང་གྲོས་བསྡུ་བྱེད་ཐབས་བྲལ་ཞིང་གལ་ཏེ་མཉམ་འཛོམས་བྱུང་རུང་སྐད་རིགས་གཞན་ཞིག་བཀོལ་ནས་ཁ་བརྡ་བྱེད་དགོས་པ་ནི་ངས་བལྟས་ན་རང་རེའི་མདུན་སྐྱོད་ཀྱི་བཀག་རྡོ་ཆེ་ཤོས་དེ་རེད་འདུག་སྙམ། སྐད་ཡིག་གཅིག་འགྱུར་སྐོར་གྱི་ཆེད་རྩོམ་དང་མཁས་པའི་ཚོགས་འདུ་སོགས་ཀྱི་མཐའ་ཐུག་གི་གྲུབ་དོན་ནི་སྐད་བརྡ་གཅིག་འགྱུར་གྱི་གཞི་འཛིན་ས་ནི་དབུས་སྐད་ཡིན་ལ་དབུས་སྐད་ལའང་སྙིང་དོར་གཅུད་ལེན་བྱས་ཏེ་ཆེས་ཕུན་སུམ་ཚོགས་པའི་སྤྱི་སྐད་ཅིག་འགྲུབ་ཐབས་བྱེད་དགོས་ཞེས་ཤོག་དཀར་ཐོག་ཏུ་ཡིག་ནག་བྲིས་འདུག་ནའང་ད་བར་འུ་ཅག་གི་སྤྱི་ཚོགས་ནང་དུ་ཕན་འབྲས་དང་འགུལ་སྤྱོད་ཅིག་གཏན་ནས་ཡོང་མི་འདུག

 ད་སྐབས་དྲ་ལམ་ཐོག་ནས་ཨེ་ཙི་སྔོན་འགོག་གི་བྱ་བ་སྤེལ་ཞིང་ཉིན་རེའི་འཚོ་བའི་རྒྱུན་ཤེས་དང་ལྷག་པར་དུ་ཨིན་སྐད་ཆེད་ཁྲིད་ཀྱི་བྱ་བ་བཟང་པོ་རེ་མཛད་མཁན་སྤྱི་ཕན་མི་སྣ་མི་ཉུང་བ་ཞིག་གིས་དཀའ་ངལ་མང་པོ་ཁྱད་གསོད་བགྱིས་ཏེ་ཉིན་མཚན་སྦྲེལ་ནས་ཐུགས་ཁུར་སྐྱོད་བཞིན་པ་ནི་སངས་རྒྱས་སྟོང་སྐུ་བཞེས་པ་ལས་ཀྱང་དགོས་གལ་དང་ཕན་ཡོན་ཆེན་བ་ནི་མིག་བཙུམས་ཏེ་བཤད་ཐུབ་པ་ཞིག་རེད། རེད་དེ་སྤྱི་སྐད་མེད་པའི་དཀའ་ངལ་འཕྲད་དང་འཕྲད་བཞིན་པའི་དེ་རིང་གི་དུས་སུ་སྤྱི་སྐད་ཅིག་ཡོང་ཐབས་སུ་ལག་འགུལ་མཁན་ཞིག་གཏན་ནས་མེད་པ་འདི་ཅི་ཡིན་ད་རུང་བདག་གིས་མ་ཤེས། དཔེར་མཚོན་ཞིག་བཀོད་ན་ས་ཐག་རིང་པོ་ནས་དཔལ་འབྱོར་མང་པོ་བཏང་སྟེ་རྒྱ་གར་རྡ་རམ་ས་ལ་༸གོང་ས་མཆོག་གི་གསེར་ཞལ་འཇལ་བ་དང་གསུང་ཆོས་ཞུ་བ་སླེབས་པའི་ཁམས་དང་ཨ་མདོ་བ་ཧ་ཅང་མང་པོ་འདུག འོན་ཀྱང་༸མགོན་པོ་མཆོག་གི་གསེར་ཞལ་མཇལ་བ་ལས་ལས་ཁོང་གི་ཆེས་ཕུལ་ཏུ་བྱུང་བའི་ལེགས་བཤད་དང་འཛམ་གླིང་གི་སྐྱེ་བོ་གྲངས་མེད་ཅིག་དགའ་འགུལ་ཚད་མེད་སྐྱེ་སའི་འཇིག་རྟེན་བདེ་ཐབས་ཀྱི་གསུང་བཤད་ཟབ་ཅིང་རླིངས་བ་དེ་དག་གཏན་ནས་མ་གོ་བར་ཕྱི་རང་ཡུལ་དུ་ལོགས་དགོས་བྱུང་བའི་སྐྱོ་གནས་རང་བཞིན་འདི་སྤྱི་སྐད་མེད་པ་ལས་བྱུང་ཞིང་གཅིག་འགྱུར་གྱི་སྐད་བརྡ་ཡོང་ཐབས་ལ་འབད་པ་མ་བྱེད་པའི་ཉེར་ལེན་ལས་གྲུབ་པ་རེད། འདི་དང་འདི་འདྲ་ཞིང་འདི་ལས་ལྷག་པའི་སྐྱོ་གནས་རང་བཞིན་གྱི་བྱ་བ་མང་པོ་ཞིག་འུ་ཅག་གི་མགོ་ཐོག་ན་ལྷུང་བཞིན་ཡོད་ནའང་ད་རུང་འགུལ་སྐྱོད་ཅིག་མེད་དོན་ཅི་ཡིན་ནམ། ངས་རེ་བ་ནན་གྱིས་ཞུ་དོན་ནི་ཁམས་དང་ཨ་མདོ་བ་ཚོས་དབུས་སྐད་བཤད་ཉན་ལ་དང་དོད་དང་མི་མང་གི་གྲལ་མགོར་འཁོད་པ་དག་གིས་སྣེ་ཁྲིད་རེ་བྱེད་རོགས་ཞེས་སྐུལ་མ་གཏོང་རྒྱུ་དེ་ཡིན། མཚོ་སྔོན་བརྙན་འཕྲིན་ཁང་དང་ཁམས་པའི་བརྙན་འཕྲིན་ཁང་གིས་མཚོན་པའི་འབྲེལ་ཡོད་ཚོས་ཨིན་སྐད་དང་རྒྱ་སྐད་བཤད་ཐུབ་པའི་མདོ་འཛིན་པ་རེ་ཡོང་ཐབས་བྱེད་པ་ལས་མ་མཐའ་ཡང་དབུས་སྐད་ཚད་ལྡན་རེ་བཤད་ཐུབ་པའི་མདོ་འཛིན་པ་དང་གསར་འགྱུར་སྙན་སྒྲོན་པ་རེ་ཨེ་ཡོང་གི་ལས་ཀ་ཞིག་འཕྲལ་མ་ཉིད་དུ་མགོ་འཛུགས་དགོས་པ་ནི་ཁ་ཚ་དགོས་གཏུགས་རེད་འདུག་སྙམ།