སྔོ་སངས་ཀྱི་ནམ་མཁའ། ལྗང་མདོག་གི་རྩི་ཤིང། ད་དུང་སྤུན་ཉེ་དང་གྲོགས་པོ་ཚོའི་དྭངས་གཙང་གི་སེམས་པ་དེ་ཡོད་པས་ང་རང་སྔ་བཞིན་བདེ་ཞིང་སྐྱིད་པ་ཡོད།
ས་འདིར་ནད་ཡམས་ཀྱི་འཇིག་པ་ཆེ་ཞིང་ཆགས་སྒོ་ཡི་བྱུང་བ་མང་བའང་ལྡོག་ཏུ་མེད་པ་ཞིག་ཏུ་གྱུར་འདུག་པས། སྔོན་བསགས་ལས་དབང་གིས་བཀོད་པ་ཅི་འདྲ་ཞིག་གཏོང་ན་དེ་བསྟུན་གྱིས་འགྲུལ་བཞུད་བྱེད་ཐབས་ལས་མེད།
སྐྱེ་མ་ཉིད་ནས་སྐད་ཅིག་མ་རེ་རེ་བཞིན་འཆི་ལམ་ལ་སྙེག་བཞིན་པ་དེ་ཡང་བྱ་དངོས་ཀུན་གྱི་རང་བཞིན་ཡིན་བཤིས། འཇིགས་ཤིང་སྐྲག་པ་བྱ་དགོས་པ་ཞིག་མ་ཚོར། གསོན་པའི་ཡུན་ཐུང་ལ་དགའ་ཤིང་སྤྲོ་བས་འཚོ་དགོས། འདི་ནི་གསོན་པའི་དོན་སྙིང་ཤིག་ཏུ་རྩི་ཆོག།
སྙིང་ཉེ་བའི་མི་རྣམས་དང་ས་ཐག་གིས་ཆོད་ཅིང་ཞེ་ཐོགས་སའི་ཕ་ཡུལ་ཡང་ཐག་རིང་ན་ཡོད་པས་ཁོག་པ་སྐྱོ་སྡུག་གིས་ཁེངས་དགོས་པ་ཞིག་ལོས་ཡིན་མོད། གང་ལ་སྡོད་ཀྱང་ཕ་ཡུལ་དུ་རྩིས་ཏེ་སྐྱོ་བ་སངས་ཐག་གིས་མི་ལོ་ཉི་ཤུ་སྐྱེལ་ཡོད།
སྙིང་ཉེ་དག་གི་སེམས་པ་དྲོན་མོ་ཁོ་བོའི་ཕྱོགས་ལ་སྐུར་ཞིང་། ཁྱེད་ཅག་གིས་དྲན་གདུང་གི་ཚོར་བ་སྐྱུར་མོ་རྟག་ཏུ་མྱོང་བཞིན་ཡོད་པ་ཤེས་ནའང་ཅི་བྱ་མེད་པའི་ལས་དབང་འདི་ལ་ཁག་འདོགས་རྒྱུ་ལས་བྱ་ཐབས་ཅི་ཡོད་ཨང་།
མཇུག་ཏུ་ཁྱེད་ཅག་ནི་བདེ་ཞིང་སྐྱིད་པར་ཡོད་དགོས། ངེད་ཀྱང་སྐྱིད་ཅིང་བདེ་བར་ཡོད།
2021/5/18
Comments
Post a Comment