རྒྱལ་བའི་དབང་པོ་ཀརྨ་པ་རིན་པོ་ཆེའི་འཁྲུངས་སྐར་བསུ།

 

སྒམ་པའི་གཤིས་ལ་ཐུགས་སེམས་རབས་ཏུ་ཡངས།།

རྫིག་པའི་ཉམས་ལ་མཁྱེན་རྒྱ་ཤིན་ཏུ་ཟབ།

བར་ཆད་མང་ཡང་ཐུགས་སེམས་ཞུམ་པར་མེད།།

རྒྱལ་བའི་དབང་པོ་ཀརྨ་པ་ལ་འདུད།།

ཕྱི་ནང་ཉེ་འཚེ་དུག་གི་རྦ་རླབས་འཕྱུར།།

དུག་ཅན་ཆུ་སྲིན་ནག་པོས་མཆེ་སྡེར་གཡོས།།

འཇིགས་རུང་རྒྱ་མཚོ་ཆེན་པོར་བགྲོད་པ་ལ།།

ཁྱོད་སྐུ་རྡོ་རྗེ་བྲག་རི་བརྟན་པར་དགོས།།

རྒྱལ་བའི་དབང་པོ་ཀརྨ་མཆོག་ལ་ཕྱི་ནང་གཉིས་ནས་ཐབས་བརྒྱ་ཇུས་སྟོང་གིས་སུན་བཙེར་བཟོས་ཤིང་། ཁོང་ཉིད་རླབས་ཆེན་གྱི་སྐྱེས་བུ་ཞིག་ཆགས་པར་མཐོང་འདོད་མེད་པའི་སྐྱེ་བོ་དུ་མ་ཞིག་གིས་ཁོང་ལ་དངོས་ཤུགས་ཅི་རིགས་ནས་བདུད་ལས་སྣ་ཚོགས་ཤིག་བརྩམས་ཏེ་ཁོང་གི་མཛད་འཕྲིན་འགོག་ཐབས་སོགས་བྱས་རྐྱེན་ད་ལྟ་ཁོང་ཉིད་ཀྱི་དད་ལྡན་པ་མི་འབུལ་ཁྲག་དུ་མ་ཡོད་སའི་ཧི་མ་ལ་ཡའི་རི་བརྒྱུད་དུ་ཕེབས་རྒྱུ་སྐུ་ངལ་འཕྲད་ཅིང་། འཛམ་གླིང་ཁྱོན་དུ་ཁོང་གི་མཛད་འཕྲིན་སྤེལ་བར་རང་དབང་གི་འགྲུལ་བཞུད་ལ་དཀའ་ཁག་འབྱུང་བཞིན་ཡོད་པ་ནི་བོད་ཀྱི་བསྟན་སྲིད་ལ་གྱོང་ཆེན་པོ་ཞིག་ཡིན་པས་ཕྱི་ནང་གི་ཉེ་འཚེ་འདི་དག་ཉེ་བར་ཞུ་སྟེ་ཁོང་ཉིད་སྐྱེ་འགྲོའི་དཔལ་དུ་སྐུ་ཚེ་བརྟན་ཅིང་རླབས་ཆེན་གྱི་མཛད་བཟང་མཐའ་དག་གེགས་མེད་བདེ་བླག་ངང་འགྲུབ་ཐུབ་པའི་སྨོན་ལམ་སྙིང་ནས་འདེབས་བཞིན་ཡོད།

ཞེས་ཀརྨ་པ་སྐུ་ཕྲེང་དང་པོ་དུས་གསུམ་མཁྱེན་པ་ཞེས་པའི་མཚན་སྙན་པའི་བ་དན་དཀར་པོ་འཛམ་གླིང་ཁྱོན་དུ་གྲགས་པ་འབར་མྱོང་བ་གོང་ཉིད་དང་ཕ་ཡུལ་གཅིག་ཅིང་། ད་ལྟའི་ཀརྨ་པ་རིན་པོ་ཆེ་ལའང་དད་གུས་ཆེན་པོ་ཡོད་པས་ཁོང་གི་འཁྲུངས་སྐར་ལ་ཚིག་སྣ་རེ་བྲིས་ཀྱང་འབྲེལ་ཆེན་པོ་ཡོད་ངེས་སྙམ་ནས་སྨོན་ཚིག་འདི་བཞིན་ཏྲེ་ཤོད་གངས་ཀྱི་རྭ་བ་ནས་འཚར་ལོངས་བྱུང་ཞིང་མཐའ་མེད་པའི་རྒྱ་མཚོའི་འགྲམ་ནས་སྐྱབས་བཅོལ་བའི་མིང་བྱང་ཐོགས་པའི་གུས་ཏྲེ་ཧོར་བསོད་ནམས་ཀྱིས་བྲིས་ཤིང་འབུལ་བ་ལགས།

2021/6/26