སྟོང་ལོ་ཉེར་གཅིག མི་ཡུལ་གྱི་ལོ་གསར།

ལོ་རྙིང་ཟད་པའི་གྲིབ་ནག་ནུབ་ཅིང་གནམ་ལོ་གསར་པའི་སྐྱ་རེངས་ཚེས།།

འཇིགས་རུང་ནད་ཀྱི་མཁར་རྫོང་བཅོམ་ནས་སྐྱིད་ཀྱི་དཔལ་ལ་རོལ་འདོད་སྐྱེ།།

ཁ་ངོ་བཏུམས་པའི་རས་ལྷེ་དཀར་པོ་ཁ་དང་འབྱེ་འདོད་གཏིང་ནས་ལངས།།

སེམས་ཐག་ཉེ་ཡང་བར་ཐག་བཅད་ལ་ཡིད་སེམས་ཀུན་ནས་སྐྱོ་བས་རྡུང་།།

ལོ་ཡི་ཕྲེང་བ་རེ་རེ་ཆད་ཅིང་ན་རྒའི་ལང་ཚོ་ཟད་ཅིང་རལ།།

གཞོན་པའི་སྣང་བ་ནུབ་ཅིང་ཡལ་ནས་ཐོད་ཀྱི་གཉེར་མ་ལྟེབ་སུལ་མཐུག།

མཉེན་ལྕུག་ཡང་པོའི་འབྱུང་གཞི་དེ་ཡང་ལྗིད་ལ་མཁྲེགས་པའི་རང་མདོག་མངོན།།

ལོ་གསར་དེ་ནི་ལོ་གསར་མ་ཡིན་ཚེ་ཐག་གཅོད་པའི་སྟ་རེ་འདྲ།།

ཚེ་ཡི་ཚེ་ལ་ངེས་པར་མེད་ལུགས་མིག་མདུན་དེ་ནས་མཐོང་ཐེངས་རེར།།

འཇིགས་སྐྲག་ན་བུན་ཡིད་ལ་འཁྲིགས་ཏེ་སེམས་ཀྱི་གོམ་ཁ་ཆོས་ལ་ཕྱོགས།།

སེམས་ཀྱི་ངན་ལང་ཐུར་ལ་ཤོར་བས་ཆོས་སེམས་དེ་ཡང་ཉིན་འགའ་ཙམ།།

ཆོས་པའི་གཟུགས་ཀྱིས་འཆི་ལམ་སྙེད་པའི་མི་ཚེ་འདི་ཡང་སྐྱོ་བའི་གཞི།།

ཡིད་ཀྱིས་བརྟེན་སའི་སྐྱེས་བུ་དག་ཀྱང་ཕྱི་མའི་ལམ་དེ་འདེམས་ནས་བཞུད།།

སྙིང་རུས་སྲ་མོ་ལྕགས་གོང་འདྲ་བའི་ཕོ་རབ་རྣམས་ནི་མུན་ལ་བཅུག།

གཞོན་པའི་ཚོགས་ཀྱི་མགོ་བོ་བྲེག་ནས་སྐྱེད་ཅིང་འཚར་བར་ཤིན་ཏུ་དཀའ།།

གངས་ཅན་བོད་ཀྱི་རྒྱལ་ཁམས་འདི་ཡི་ཚེ་སྲོག་ཕྲ་མོ་ཆད་ལ་ཉེ།།

རབ་དཀར་གངས་ཀྱི་ཕ་ས་སྨུག་པོ་མི་ལོ་ཉི་ཤུ་རྒྱང་དུ་བཀྱེད།།

ལས་ཀྱིས་འབྲེལ་ཐག་དམ་དུ་འཆིང་བའི་ཉེ་དུ་ཚོགས་ཀྱང་མཇལ་སྐལ་བྲལ།།

ཁྱིམ་དུ་ལོག་པའི་རེ་སེམས་དེ་ཡང་ཉིན་བཞིན་འགྲིབ་ཅིང་འཛད་ལ་ཉེ།།

མི་ཡུལ་འདི་ནས་ལོ་གསར་རོལ་བར་སྐྱིད་ཀྱི་ཚོར་བ་ཅི་ལ་ཡོད།།

2021/2/17