སྐུ་ངོ་སྤེན་པ་ཚེ་རིང་ནི་བོད་ཀྱི་སྲིད་སྐྱོང་རེད། ཁོང་ལ་གུས་བརྩི་གནང་རོགས།

 

འདས་ཟིན་པའི་མི་ལོ་བཅུའི་རིང་དུ་སྐུ་ངོ་སེངྒེ་ལ་དགའ་མཁན་ཞིག་ཡིན་ན་བཟོད་པར་དཀའ་བའི་གནས་ཚུལ་བྱུང་ཞིང་། སྐུ་ངོ་སྤེན་ཚེས་གསུང་སྟངས་དང་གནང་ཕྱོགས་མང་པོ་ཞིག་ལ་བརྟེན་ནས་སྤྱི་ཚོགས་འཁྲུགས་ཐེབས་ཤིང་། ཁོང་གི་རྒྱལ་སྐྱོར་བས་ལོ་ངོ་མང་པོའི་རིང་དུ་དགྲ་བོ་ཞིག་ཡིན་ནའང་དེ་འདྲ་སྡུག་པོ་རང་བཟོ་ཨེ་ཡོང་བསམ་པའི་སྐྱོན་འཛུགས། རྫུན་གཏམ། དཀྲུང་ཤིང་། མ་ཉེས་ཁག་གཡོགས་དེ་འདྲ་མང་པོ་ཞིག་བཟོས་པའི་རྐྱེན་རྩ་ལས་སྐུ་ངོ་སེངྒེ་ལ་དགའ་བའི་མི་ཁྲི་ཚོ་དུ་མའི་སེམས་ལ་བཟོད་པར་དཀའ་བའི་ན་ཚའི་ས་བོན་བཏབ་ཡོད། 

འགྲོ་བ་མི་ནི་ཁོང་ཁྲོ་ལང་ཆོག་ཆོག་དང་ཚུར་གནོད་པར་བྱས་ན་དེ་ལ་གནོད་ལེན་སྤྲོད་རྒྱུར་གོམས་སྡོད་པ་ཞིག་ལ་སོང་། ཚུར་ལ་ཅི་བྱས་ན་དེ་མཚུངས་ཕར་ལ་བྱེད་པ་ནི་ཆོས་ཉིད་ཅིག་ཡིན་ཞིང་། ཚན་རིག་ནང་དུ་འདི་ལ་སྐྱེ་དངོས་ཀྱི་འཚོ་ཐབས་ཟེར་ཞིང་རང་ཉིད་འཚོ་དགོས་ན་གཞན་ལ་གནོད་ལན་སྤྲོད་དེ་རང་ཉིད་སྐྱེ་འཕེལ་ཡོང་བ་བྱེད་དགོས་པ་བཤད་ཀྱི་འདུག འོན་ཀྱང་ངེད་ཅག་ནི་ལས་དབང་གཅིག་གིས་བཅིངས་པའི་རིགས་མཐུན་སྤུན་ཟླ་ཡིན་པས་ནང་ཁུལ་བཟོད་སྒོམ་བྱེད་དགོས་ཤིང་དེས་རང་ཉིད་ཐེབས་པའི་སྤྱི་ཚོགས་ལ་ཕན་རླབས་ཆེན་པོ་ཡོང་ཐུབ། 

ལྷག་པར་དུ་ང་ཚོའི་མིག་མདུན་རང་ནས་དགུང་ལོ་ཇེ་ཆེར་ཕེབས་བཞིན་པའི་༸གོང་ས་མཆོག་གི་ཞལ་རས་མཇལ་ནས་ཐུགས་བསམ་གཏོང་ཐུབ་དགོས། ཁོང་དགུང་ལོ་འདི་འདྲ་ལ་མ་ཕེབས་བར་དུ་ང་ཚོའི་ཆེད་དུ་སྐུ་ལས་སྐྱོན་ཞིང་ད་ལྟ་ཁོང་ཉིད་སྐུ་ངལ་གསོ་བའི་དུས་ཚོད་ལ་སླེབས་དུས་ཁོང་གི་སྙན་དུ་མ་འགྲིག་མ་འཐུས་ཟེར་བའི་གཏམ་ངན་རྐྱང་རྐྱང་མ་ཡོང་བ་ཞིག་བྱེད་དགོས། ཁོང་ཐུགས་བདེ་པོས་ངང་བཞུགས་ཆོག་པའི་ལས་འགན་དེ་ང་ཚོ་བོད་མི་མི་རེ་ངོ་རེ་ལ་ཡོད། 

ཁོ་ཚོ་སུ་ཡིས་བོད་སྤྱི་པར་བསམ་བློ་མ་བཏང་བར་སྦྱོར་ངན་གང་ཞིག་བརྩམས་ཀྱང་དེ་ནི་མི་དེ་དང་དེ་ཚོའི་སྐྱོན་ངན་ཞིག་ཡིན་པས་ཁྱེད་ཀྱིས་མིའི་སྐྱོན་ངན་དེ་དག་གི་རྗེས་སུ་འཇུག་དགོས་དོན་གང་ཡང་མེད། ཁོ་ཚོ་མང་པོ་ཞིག་གིས་བོད་ཀྱི་སྲིད་སྐྱོང་གི་མཚན་ནས་མ་འབོད་པར་ཁྱི་སེང་ཟེར་ནས་མི་སེམས་དུམ་བུར་བཏང་བའི་ཐ་སྙད་མང་པོ་བཀོལ་སྤྱོད་བྱས་ཡོད། ང་ཚོས་སྤེན་ཕག་ཟེར་ནས་མ་འོས་པའི་ཚིག་འདི་འདྲ་ནམ་ཡང་སྤྱོད་མི་རུང་ཞིང་། བོད་ཀྱི་སྲིད་སྐྱོང་ནི་ཆབ་སྲིད་ཐད་ནས་ཆེས་མཐོ་བའི་དབུ་ཁྲིད་དེ་ཡིན་པས་གུས་བརྩི་ངེས་པར་བྱེད་དགོས། མང་གཙོའི་སྤྱི་ཚོགས་ནང་དུ་གང་ཞིག་བརྗོད་ཆོག་པའི་སྨྲ་བརྗོད་རང་དབང་ཆེན་པོ་ཡོད་ཀྱང་བཟང་སྤྱོད་དང་འགལ་བའི་སྨྲ་བརྗོད་བྱེད་རུང་བ་ཞིག་མིན། ཁྱེད་ཀྱིས་དབུ་ཁྲིད་ཚོས་གནང་ཕྱོགས་མི་འགྲིག་པར་མཐོང་ཚེ་གུས་བརྩི་དང་བཟང་སྤྱོད་ཐོག་ནས་བསམ་ཚུལ་འདོན་དགོས་ལ། ཁོང་ནི་ཆེས་མཐོ་བའི་དབུ་ཁྲིད་ཡིན་པ་དང་སྤྱི་པའི་ལས་ཀ་བྱེད་མཁན་ཡིན་པ་ཐུགས་ལ་བཅངས་དགོས། 

སྐུ་ངོ་སེངྒེ་ལ་དགའ་ཞིང་ཁོང་ལ་གུས་བརྩི་ཡོད་པའི་མི་ཞིག་ཡིན་ན་ཁོང་གིས་མི་ལོ་དེ་དག་གི་རིང་དུ་སྤྱི་དོན་ཆེད་དཀའ་ངལ་དེ་འདྲ་མང་པོ་གདོང་ལེན་བྱས་ཤིང་། ཁོང་ནག་པོ་བཟོ་ཐབས་ཅི་འདྲ་ནའང་ཞལ་འཛུམ་འཛུམ་ངང་ནང་ཁུལ་ལ་བཟོད་སྒོམ་གནང་ཐུབ་པ་དེ་ལ་མིག་དཔེ་ལྟ་དགོས་པའི་འབོད་སྐུལ་ཞུ་བཞིན་ཡོད་ལ། སྤྱི་དོན་ཆེད་དུ་རང་ཉིད་བློས་བཏང་། ནང་ཁུལ་རིགས་མཐུན་སྤུན་ཟླ་ལ་བཟོད་སྒོམ། སྐྱོན་འཛུགས་གང་ཞིག་བྱས་ཀྱང་ཁོག་པའི་ནང་ཤོང་ཐུབ་པའི་བློ་སྟོབས། མདུང་རྩེ་དགྲ་ལ་བཏད་ཐུབ་པའི་སྙིང་སྟོབས་བཅས་ལ་བློ་སྦྱོང་དང་མིག་དཔེར་བལྟས་ནས་སྤྱི་པའི་ལས་དོན་བྱེད་པར་འགོག་རྐྱེན་བཟོ་མི་རུང་བའི་འབོད་སྐུལ་ནན་ཆེར་ཞུ་བཞིན་ཡོད། 

ཕྱི་ལོ2021/5/20