དེ་རིང་གི་བཙན་བྱོལ་སྤྱི་ཚོགས།

ནང་ལ་འཇིགས་ཞུམ་མེད་པར་དཔུང་ངོམ་བྱས།།

ས་འོག་དར་ཐག་འཐེན་ནས་ནང་མགོ་རྡུང་།།

ཕྱི་ནང་ག་ཕྱི་ལོག་པའི་སྤྱི་ཚོགས་འདི།།

དགྲ་བོས་མཚོན་ཆ་མ་སྤྱད་ཕམ་སྟངས་སྐྱོ།།

དགྲ་བོ་ཕ་ཁར་བཞག་ནས་ནུབ་ལ་བྲོས།།

ནུབ་ནས་དགྲ་ལ་མ་རྒོལ་ནང་འཁྲུགས་ལངས།།

ཕུ་ནུ་ནང་དམེ་བྱས་ཏེ་དུས་ཚོད་བསྐྱལ།།

དགྲ་བོའི་དཀྲུང་ཤིང་འོག་ལ་ཡོངས་སུ་འཚུད།།

རིགས་རུས་གཅིག་ལས་ཆད་པའི་སྤུན་ཟླ་ལ།

ཆོལ་གསུམ་མིང་ལ་འཇུས་ཏེ་རིས་སུ་བཅད།།

གངས་ཅན་བོད་ཀྱི་ཆབ་སྲིད་གདུགས་དཀར་འོག།

མཐུན་སྒྲིལ་ལག་གདང་ཐོར་འདི་སྐྱོ་བའི་གཞི།།

མགོན་སྐྱབས་བླ་མ་དགུང་གི་ཉི་ཟླ་ཁོང་།།

རྒས་ཤིང་འཁོགས་པའི་སྣང་བརྙན་མཇལ་ཐེངས་རེ།།

ནང་ཁུལ་འཇིགས་ཞུམ་མེད་པའི་འཁྲུག་ལང་འདིར།།

ཁོང་ཉིད་ཐུགས་ཕམ་ཡོང་སྲིད་བསམས་ནས་འགྱོད།། 

ནག་པོའི་སྟོབས་ཤུགས་ཉིན་བཞིན་འཕེལ་དུས་སུ།།

འུ་ཅག་ནུས་པ་གཅིག་ཏུ་མ་སྒྲིལ་པར།།

ཁ་མཆུ་བོགས་མ་བླངས་པའི་ནང་རྩོད་འདིས།།

གསོན་པོ་གཡང་ལ་མཆོང་དང་ཁྱད་པར་ཅི།།

དཀའ་ངལ་མེ་སྟག་ཆུང་དུས་མ་གསོད་པར།།

མེ་ལྕེ་དགུང་ལ་འཕྱུར་དུས་སྐྱོ་མདོག་འཁྲབས།།

འཇམ་ཐབས་བསླུ་བྲིད་མཁས་པའི་ཟུར་པ་དག།

ལོ་རྒས་རྫི་དིབ་ཆགས་ནས་གཅོས་ལགས་སམ།།

ཁྲིམས་འགྲེལ་སྙིང་ནད་རྩོད་པའི་རྐྱེན་དུ་བྱས།།

བཅའ་ཁྲིམས་རྐུབ་འོག་བཙུར་ནས་ཧད་འདུག་བྱས།།

ཁྲིམས་མེད་ལུང་མེད་ཕྱོགས་སུ་འདེད་པར་འདི།།

ནག་ཉེས་ནམ་མཁར་ཤོང་ཐབས་ཡོད་ས་མེད།།

ཁྲིམས་ར་ཁྲིམས་བཤིག་ར་བའི་ཁང་ཆུང་ནས།།

ཁྲིམས་དཔོན་ཁྲིམས་ལུགས་བཤིག་ལ་དཔའ་མངལ་བ།།

ཁྲིམས་མགོ་བསྟན་པ་བཤིག་པའི་སྟ་རེ་རྣམས།།

ཁྲིམས་ཤིང་ཙན་དན་སྡོང་པོ་གཅོད་ལ་རྣོ།།

གྲོས་རར་མི་ཚེ་སྐྱེལ་ནས་འཆི་ལ་ཁད།།

བཅའ་ཁྲིམས་ལག་གིས་འཛིན་པའི་ཆེན་པོ་དག།

འཕོ་འགྱུར་བྱ་རིམ་མེད་པར་འཕོ་འགྱུར་བཏང་།།

ནང་རླུང་འཚུབ་མ་ཁྲིད་པའི་དཔའ་རྟགས་སྟོན།།

བསམ་ཡོད་གཉེན་ཉེ་ཚོགས་རྣམས་ཡིད་སེམས་མུག།

བསམ་མེད་བྱིས་པ་དག་ནི་འདུར་རྒྱུགས་བཏང་།།

བསམ་ངན་དགྲ་བོ་ནག་པོ་ཁོང་དགོད་ཤོར།།

བསམས་ཤིང་བསམ་ན་སྡུག་གི་མཆི་མ་ཡོང་།།

2021-6-8