རྡ་སའི་ཡུལ་ནས་མཉམ་དུ་རྒྱུགས།།
ཞེན་ལོག་གྱེན་ལོག་ངོ་ལོག་གསུམ།།
རྡ་སའི་ཡུལ་ལ་མཉམ་དུ་བརྒྱབ།།
སླར་ལོག་གསུམ་པོ་བཙན་གྱིས་འཛུལ།།
ཁྲིམས་ཁང་མགོ་མཇུག་ཡོངས་སུ་ལོག།
བ་རྒན་ཚོགས་གཙོ་སྦྲང་མས་བཙག།
དཔེ་ཟུར་དབང་འདུས་ཁྱིམ་ལ་རྒྱུགས།།
འོས་བསྡུའི་འགན་འཛིན་གྲོད་ཁོག་བཤལ།།
རྙོང་དྲི་རྡ་སའི་ཡུལ་ནས་མཆེད།།
རྙོང་དྲི་སྣོམ་ལ་དགའ་བ་འགའ།།
དཔེ་ཟུར་དབང་འདུས་གཞང་ཁར་ཉལ།།
ལྐོག་ནས་འཇིགས་སྐུལ་མ་བཟོད་པར།།
ཚོགས་དྲུང་ངུས་ནས་ཞུ་བ་འཐེན།།
རྩ་དགོངས་ཞུས་ཀྱང་དགོངས་འཁྲོལ་མེད།།
ནག་ཉེས་ཡོད་ཚེ་མགོ་ལ་སྤུངས།།
ཁྲིམས་ཞིབ་ཀ་བ་ཆག་དུས་དེར།།
སེམས་ཤུགས་ཅན་གྱི་ཟུར་པ་ལངས།།
གྲོས་ཚོགས་ཀ་བ་ཆག་ཉིན་མོ།།
ཟུར་པའི་སེམས་ཤུགས་མཇའ་ལྟར་ཡལ།།
ཁྲིམས་ཟུར་བཀའ་ཟུར་གཞུང་ཟུར་གསུམ།།
ཁྲིམས་ཞིབ་ཁང་ལ་འགྲོན་དུ་སོང་།།
ཁྲིམས་དཔོན་ཕ་རྒན་ཉལ་ས་ན།།
ཁྲིམས་ཆང་འཐུང་ནས་བཟི་ཉལ་བྱས།།
ཟམ་གདོང་པན་ཆེན་མཁས་ཉམས་ཀྱིས།།
སུ་རུང་ཚིག་འགྲེལ་གསར་པ་མཛད།།
འཁྲབ་སྟོན་བཅའ་འདྲི་གཅིག་གིས་ནི།།
པད་འབྱུང་འོས་ཤོག་ཏག་ཏག་བཟོས།།
སྐུ་ངོ་སྲིད་སྐྱོང་གྲོད་ཁོག་ན།།
ཆབ་ཆེན་ཀི་ལོ་བཅོ་ལྔ་བཏང་།།
གསོལ་ཐབས་མ་བྱན་ཆེན་མོ་དེས།།
ཆབ་ཆེན་ནག་པོས་སྤྲིན་གོར་བཟོས(cake)
ཁྲིམས་དྲུང་ཁ་ལ་ཨ་ར་ཅན།།
ཁྲིམས་ཞིབ་ཁང་དུ་སྲན་མ་བརྔོས།།
བཀའ་ཤག་ནང་དུ་མག་པ་ཡོང་།།
ཆབ་སྲིད་སྲན་མ་བརྔོ་རྒྱུ་རེད།།
གཞུང་རྟེན་དགྲ་ལྷ་སྤྱན་འདྲེན་ཞུས།།
བཀའ་ཡིག་གོ་རྒྱུ་ཅན་ཞིག་བསྩལ།
སྐུ་དབང་གསོལ་སྩལ་གནང་ན་ཡང་།།
སྤྱི་དོན་ལབ་གླེང་མང་འདུག་ཟེར།།
དཀའ་ངལ་ཅན་ནས་ཞལ་འདེབས་བསྡུས།།
དཀའ་ངལ་ཅན་ལ་སྤྲོད་རྒྱུ་ཟེེར།།
ཁྱི་རྒན་ཁ་ནས་རུས་གོག་འཕྲོག།
སླར་ཡང་ཁྱི་ལ་བསྟེར་བ་འདྲ།།
སྐུ་ངོ་སྲིད་སྐྱོང་སྲིད་ལ་མཁས།།
བཀའ་བློན་བདུན་པོ་གཅིག་ལྕོགས་གནང་།།
ཁྲི་ལ་འཁོད་ནས་ཟླ་ངོ་ཙམ།།
ཡང་སྲིད་ཕམ་ཚོང་རྒྱག་ལ་ཁད།།
རྡི་ལི་དཔོན་གྱིས་བཀའ་འགུག་གནང་།།
ཚོགས་གཏམ་ཉི་མ་ཕྱེད་ཀ་བཟེད།།
མཇལ་འཕྲད་ཡག་པོ་བྱུང་སོང་ཞེས།།
འབྲོང་ཆུང་སྐུ་ངོས་གསལ་བཤད་བྱས།།
བཀའ་ཤག་ལྷན་འཛོམས་ཡོང་བར་ཤོག།
ཁྲིམས་དཔོན་གསར་པ་ཡོང་བར་ཤོག།
དམ་འབུལ་ཁྲིམས་མཐུན་ཡོང་བར་ཤོག།
གྲོས་ཚོགས་མཉམ་འཛོམ་ཡོང་བར་ཤོག།
དེ་རིང་གི་གུང་སེང་དང་བསྟུན་ད་ཞག་གི་བྱུང་བ་ཁག་རྩེད་མོའི་ཚུལ་གྱིས་བྲིས།།
2021/7/15
No comments:
Post a Comment