Skip to main content

བློ་བཟང་སེང་གེ་རྩ་དགོངས་ཞུས་ཤོག





ལྷ་མི་ཐམས་ཅད་འཁྲུགས། ཆོལ་ཞེན་ཡོད་ཚད་སློང་བའི་དེ་རིང་། འོས་ཤོར་བའི་སྡུག་ནད་མ་ཐེབས་ཤིང་། དོན་གྱི་ཕམ་ཁ་ཁེལ་བས་ནད་མ་ཆོག་པར་ལ་ལས་ངུ་འབོད་དང་། རེ་འགས་དམོད་མོ་བཏབས་ནས་ཟམ་འོག་གི་སྤྲང་པོ་ཁྱུ་ཅིག་གིས་སྤྲང་འཛིང་ལྡིར་རེ་བྱེད་པ་དང་གཉིས་སུ་མེད་པ་ཞིག་ད་ལྟ་ད་དུང་ཡང་ག་ས་གང་དུ་བྱེེད་བཞིན་འདུག མ་གཞིར་སྤྲང་འཛིང་བྱེད་པ་ལ་ལྟ་དགོས་དོན་མེད་རུང་མཐོ་དཔོན་པའི་གོ་ཐོབ་ཅན་དང་ལྷ་བླ་མའི་མཚན་སྙན་ཅན་ཚོས་རང་རང་གི་ནུས་མཐུ་རེ་བེད་སྤྱོད་བཏང་ནས་ཁྱེད་ལ་ཕྱོགས་ཀུན་ནས་གཏོར་མ་བཞིན་བཅའ་འདོད་དང་རྔ་གོག་བཞིན་རྡུང་འདོད་ཀྱི་ཁ་ལག་ཡོད་ཚད་ཐམས་ཅད་འདར་སིག་སིག་བྱེད་བཞིན་འདུག བསྟན་པོའི་དགྲ་བོ་རྒྱང་ལ་བཞག ཕ་གཞིས་འཕྲོག་མཁན་རིང་དུ་དོར་ནས་བློ་བཟང་སེང་གེ་ལ་ལྷ་མིང་ཅན་ཚོས་ཁ་གདང་མིག་བགྲོད་བྱས། དཔོན་མིང་ཅན་དག་གིས་ལག་རིང་ཐུང་བྱས་ནས་དཔུང་ངོམ་དང་གཡུལ་ངོམ་བཤམས། མངོན་ལྐོག་དང་རྒྱབ་མདུན་ཀུན་ནས་འཁྲབ་རྒྱུ་མེད་ན་མ་གཏོགས་འཁྲབ་བཞིན་འདུག་པས། ད་ནི་བློ་བཟང་སེང་གེ་ཁྱེད་ཀྱང་རྟ་ཁེར་རྒྱུག་དང་དཔའ་བོ་ཁེར་བུད་བྱེད་དགོས་དོན་མེད་ལ། རྡ་སའི་རི་ངོགས་ཀྱི་ཕྱི་ཁང་པ་ཨ་འདམ་ཅན་ལ་ནང་རུལ་སུངས་ཀྱི་རྙིང་དྲི་ཅན་དེ་ཐབས་དགུ་ལན་བརྒྱ་ཡིས་སྐྱོང་དགོས་དོན་ཅི་ཞིག་ཡོད། སྐྱ་ཆད་སྔོ་སྡུག་གི་སྒྲིག་འཛུགས་སྤར་མོ་གང་དེ་ཁྱེད་གཅིག་པུས་གནམ་ལ་དཀྱག་དགོས་དོན་མེད་ལ་ལག་ཐོག་ཚད་ཀྱིས་ཐུར་ལ་འདྲུད་དུས་ཁྱེད་ཁོ་ནས་ལ་ལ་འདྲུད་ཐབས་ཀྱང་ཨེ་ཡོད་མི་ཤེས།

བདེ་སྐྱིད་ཆོས་དབྱངས་ཀྱིས་འཁྲབ་སྟོན་ལེའུ་དང་པོ་ཚར་མ་ཐག་འབྲོག་ཆུང་དངོས་གྲུབ་ཀྱིས་ལེའུ་གཉིས་པ་དབུ་བཙུགས་ཏེ་སྟོན་མོ་གཤམ་འགོ་བརྩམས་ནས་ལྷ་འཁྲུགས་ནས་ཐལ་རྡུལ་མ་ཡལ་གོང་། མི་འཁྲུགས་པའི་རྡུལ་འཚུབ་སློང་འགོ་བརྩམས་ཏེ་ནག་ཉེས་ཡོད་ཚེ་བློ་སེང་གི་མགོ་ཐོག་ཏུ་གཡོགས་འདོད་དང་། སྡིག་ཉེས་ཆ་ཚང་བློ་སེང་གི་མིང་ཐོག་ཏུ་འཇོག་བསམ་གྱིས་རྩ་དགོངས་དང་ཡོངས་དགོངས་ཞུས་ཏེ་རང་ཉིད་དཀར་པོ་བྱུང་ན་ཅི་ཡང་བྱེད་ཐུབ་པའི་སྐུ་ངོ་འདི་ཚོའི་སྐྱུག་མེར་ལང་སའི་བྱེད་བབ་འདི་དག་བློ་བཟང་སེང་གེ་ཁྱེད་ཀྱིས་མཐོང་ཡོད་ཚད་རེད་ལ་གོ་དགོས་ཚད་རེད།  ད་ནི་བློ་བཟང་སེང་གེ་ཁྱེད་དང་ཁྱེད་ལ་རེ་བའི་མི་མང་ཁྲི་ཕྲག་ལྷག་ལ་འགྲོ་བསམ་ན་ལམ་དཀར་པོ་མི་འདུག་ཅིང་། སྡོད་བསམ་ན་ས་གྲུ་བཞི་ཞིག་མི་རག་པས། སྐབས་རྗེས་མའི་སྲིད་སྐྱོང་ལས་དགོངས་ཞུ་གནང་སྟེ་ཕྱིར་ཨ་རི་ལ་ཕེབས་རོགས། ས་དེ་ལ་ཁྱེད་ཉིད་ཤོང་སའི་ནམ་མཁའ་དང་རང་ཉིད་བཞུད་སའི་ལམ་ཆེན་དེ་ཡོད་པས་སྤྲང་ཚང་འདི་ལས་རིང་དུ་གྱེར་རོགས།

དེ་རིང་སང་ཉིན་བཙན་བྱོལ་ནང་དུ་ཁ་གདངས་ནས་སྡོད་ན་ཁ་ནང་འབུ་སྐྱག་འདྲ་མ་གཏོགས་ཅི་ཡང་ཟག་རྒྱུ་མེད་པར་ཤེས་ནས་བོད་ལ་འགྲོ་མཁན་ཇེ་མང་ནས་ཇེ་མང་དང་། ཕྱི་རྒྱལ་དུ་སོང་ནས་རང་ཁ་གསོ་ཐབས་ཙམ་ལས་མི་རིགས་ཀྱི་རང་དབང་བསྐྱར་གསོ་དང་མི་རིགས་ལ་བཅངས་པའི་སེམས་ཤུགས་ཡོད་ཚད་བརླགས་ཏེ། མི་རིགས་གཞན་སྒྱུར་གྱི་ལས་ཀ་བྱེད་མཁན་ཉིན་རེ་ལས་ཉིན་རེ་ཇེ་འཕར་འགྲོ་བཞིན་པ་ནི་ཧ་ཅང་གསལ་པོ་ཡིན་ལ། ད་ལན་འོས་བསྡུའི་ནང་དུ་མི་ཁྲི་བཞི་ལྷག་གིས་ཆ་ཤས་གཏན་ནས་མ་བླངས་པར་འདི་ནས་གསལ་པོར་གྱུར་ཡོད། འོས་མི་བླུག་པའི་ངོ་རྒོལ་ལས་འགུལ་ཡང་བརྩམས་ཏེ་རྡ་སའི་རི་ངོགས་ལ་རེ་བ་དང་ཡིད་ཆེས་མེད་པ་གསལ་སྟོན་བྱས་ཡོད།

རྡ་སའི་རི་ངོགས་ཀྱི་སྒྲིག་འཛུགས་འདིའང་ཚོགས་པ་ཞིག་ལས་མི་ཤེད་ཅན་ཞིག་གིས་ཁུར་ཐུབ་ཚད་དང་། བུ་དཔའ་བོ་ཞིག་གིས་སྐྱོང་ཐུབ་རྒྱུ་ཞིག་མ་ཡིན་པར་གོང་གི་དབུ་ཁྲིད་ཀྱི་ལམ་སྟོན། གཤམ་འོག་གི་གཞུང་ཞབས་ཚོས་ཤར་སྐྱོད། མི་མང་དག་གིས་སེམས་ཁུར་དང་རོགས་རམ་བཅས་ལ་བརྟེན་ནས་འགྲོ་དགོས་པ་ཞིག་ཡིན་རུང་། ད་ཆར་འོས་ཤོར་གྱི་སྨྱོ་ནད་འཚབ་ཆེན་དེ་འགོས་ནད་བཞིན་ས་ཁྱབ་རྡབ་ཁྱབ་ཏུ་སོང་ནས། རྡ་སའི་རི་ངོགས་ཀྱི་སྒྲིག་འཛུགས་དེ་དུམ་བུ་དགུ་ལ་སོང་ཡང་ཁྱད་ཅིག་གཏན་ནས་མེད་པར། ལྷ་མི་ཐམས་ཅད་སྨྱོ་འཚུབ་འཚུབ་བཟོ་དུས། བློ་བཟང་སེང་གེ་ཁྱེད་དང་ཁྱེད་ལ་རེ་བའི་མི་མང་ཚོས་བློ་ཕམ་དང་ཡིད་ཆད་འབུམ་ཁྲག་གཅིག་ཁུར་ཏེ། རྡ་སའི་རི་ངོགས་ནས་ཕྱིར་འཐེན་བྱེད་རྒྱུ་འདམ་ཁ་ཞིག་མི་བརྒྱབ་དཀའ་མེད་རེད་ལ། འགྲོ་ལམ་མེད་ས་ནས་ཨུ་ཚུགས་ཤིག་མི་བྱེད་པར་ཕྱི་ནུབ་བྱེད་རྒྱུ་འགོ་མ་བཙུགས་རང་བཙུགས་རེད། འདི་ནི་གདམ་ཁ་མེད་པའི་གདམ་ཁ་ཞིག་ཡིན།

སྒྲིག་འཛུགས་འདི་ཁོ་ཚོའི་རྐུན་ལག་ནང་དུ་ཡོད་གྱུར་ན་ཁྲ་རིལ་རིལ་དང་སྣུམ་བཙིར་བཙིར་བཟོ་རྒྱུ་ཡོད་མདོག་བྱས་ཏེ་སྐད་མགོ་ལ་མཐོ་དམན་དང་། ལག་གཡས་ལ་སུ་རིང་འདྲ་ཚད་ནས། ནམ་ཉི་མ་མ་ཤར་བར་དུ་འཁྲབ་ནས་སྡུག་ཚད་ཅིག་བཟུང་གི་མེད་ན། ཁོ་ཚོའི་ལག་ཏུ་གཅིག་ཞོགས་དང་ཁྲ་ཆུང་མིག་ལ་ལྟད་མོ་དང་གོར་གོར་རྣ་ལ་སྙན་པོ་ཞིག་ཡོང་རྒྱུ་གདན་མི་ཟ་བས། དེ་དུང་ཁོ་ཚོའི་ཁ་ནང་དུ་མཛུབ་མོ་བཅུག་ནས་འདུག་ལུགས་དེ་མཐོང་རྒྱུ་རེད། མི་རིགས་ལ་དཀའ་ངལ་དང་མི་མང་ལ་རང་དབང་དགོས་ན་དགོས་མཉམ་ལས་ངེད་ཅག་འགའ་ཤས་ལ་ཆེས་དམིགས་བསལ་གྱི་དཀའ་སྡུག་ཅིག་ཡོང་རྒྱུ་མེད་ལ། བདེན་མཐའ་གསལ་རུང་ངེད་ཅག་ལ་ལྷག་པོ་ཅིག་ཐོབ་རྒྱུ་མེད་པར། དེ་དུས་ཀྱང་ཧམ་པ་ཅན་དེ་ཚོས་ཤ་བཏོགས་ནས་རུས་པ་ངེད་ཅག་ལ་འབྲད་བཅུག་རྗེས་ད་དུང་གང་མེད་ཚད་སྦྱིིན་ཡོད་པའི་འགྱིང་ཉམས་ཤིག་སྟོན་རྒྱུ་རེད།

ད་ནས་བཟུང་རང་ཉིད་ཀྱིས་ཀྱང་སྒྲིག་འཛུགས་འདིའི་ཆ་ཤས་ཏིལ་འབྲུ་ཙམ་ལེན་རྒྱུ་མིན་པར་ཐག་གཅོད་ཟིན་ལ། རི་ངོགས་དེ་ནས་གསེར་ལྷུག་ལྷུག་འབབ་རུང་དགའ་རྒྱུ་དང་། གཡང་ལ་རྦབ་རིལ་ཐེབས་རུང་སྡུག་རྒྱུ་ཞིག་ཅི་ཡང་མེད་ན། རང་ཁ་ཁམ་བུ་ཙམ་དེ་གསོ་ཐབས་དང་གྲོད་ཁོག་རྩམ་ཁུག་འདྲ་དེ་རྒྱགས་ཐབས་ལས་རྐུ་ཇག་དང་ལྷ་འདྲེ་གདོན་བགེགས་མོད་པའི་རྡ་སའི་དཀྱིལ་འཁོར་དེ་ནས་ཕྱོགས་ཀུན་ནས་རིང་དུ་བཀྱེད་དེ་སྡོད་རྒྱུ་ལགས་པས། ཁྱེད་ཅག་གིས་རྐུབ་སྟེགས་ཐབས་ཅད་གཟུང་། གོ་གནས་ཐམས་ཆད་བླངས་ཏེ་ལྷ་གནས་ཆུང་ཆོས་རྒྱལ་ཆེན་པོ་ཟེར་བ་ལ་མོ་ལུང་ཐམས་ཅད་ཞུས། ལྷ་མོ་ཚེ་རིང་མཆེད་ལྔ་གྲགས་པ་དེར་མགོ་ལུས་ཐམས་ཅད་སྒུར་ནས་སྨྱོ་འཚུབ་འཚུབ་དང་བཟི་འཐོམ་འཐོམ་བྱེད་བཅུག་ནས་བཞུགས་རོགས། ངེད་ཅག་ལ་ཅི་ཡང་མི་ཁོམ་པས་ཁྱེེད་ཅག་ལ་འབུལ་ཆོག
2016-4-6




Comments

  1. ཁྱེད་རང་གི་འཁྲུགས་ཚད་དང་འཁྲུགས་ལུགས་འདི། རྡ་སའི་ལྷ་མིའི་འཁྲུགས་ཚད་འཁྲུགས་ལུགས་ལས་ཀྱང་བཞེད་སྣང་ཆེ་བ་འདུག

    ReplyDelete
  2. ཁྱོད་ཀྱིས་བཤད་པ་ལྟར་རྩ་དགོངས་ཞུ་ན་ཡག་ཤོས་སུ་མཐོང་། མ་འཇོན་འཇོན་མདོག་གིས་སྐུབ་སྟེགས་བཟུང་ན་ཅི་ལ་ཕན། ལྷག་བསམ་རྨ་མེད་ཅིང་གཞུང་སྲོང་ཅན་བདེ་སྲུང་བཀའ་བློན་མཆོག་ལྟ་བུས་ནག་ཉེས་ཅི་ཡང་མེད་བཞིན་དུ་དགོངས་པ་ཞུ་སྐབས་གཏན་གཏན་སྲིད་སྐྱོང་གིས་འཇོན་གྱི་མེད་པའི་མངོན་རྟགས་གསལ་པོ་རེད། ད་རྩ་དགོངས་ཞུས་ན་ཆོག་གིས་ལོ་ལྔ་ཡང་བསྐྱར་ཆུད་བཟོས་སུ་གཏོང་མི་རིགས་སོ།།

    ReplyDelete
    Replies
    1. གལ་ཏེ་མཁས་དབང་བློ་བཟང་སེངྒེས་མ་འཇོན་ན་དེ་ལས་ལྷག་པའི་འཇོན་མི་སུ་ཡང་མི་འདུག་ཐག་ཆོད་རེད། གསེར་ས་འོག་ཡོད་ན་འོད་ནམ་མཁའ་ཟེར་བའོ་དཔེ་ལྟར་ཡོད་ན་གཅིག་སྟོན་དང་། ཉིན་མཚན་དབྱེར་མེད་ཆང་རག་དང་ཐ་མག་གིས་ཆོད་དགོས་མཁན་དེ་རིགས་མིན་པ་ཅིག་སྟོན་དང་།

      Delete
  3. ཐམས་ཅད་འགྲིག་གི་མེད་པའི་རྩ་བ་དེ་་་སྤྱི་སེམས་ཅན་ཉུང་དྲག་པ་དང་ཞེན་སེམས་ཅན་མང་དྲག་པའི་ཕྱིར། དཔེར་ན་ཁྱེད་ལྟ་བུ་མང་དྲག་པའི་རྐྱེན་་་་ ངོ་མ་ཡིད་རེ་སྐྱོ།

    ReplyDelete
  4. བློ་བཟང་སེང་གེ་ལ་རྒྱབ་སྐྱོར་ཡོད་ཟེར་མཁན་ཚོས་མཆན་ཡིག་འདི་བལྟ་དགོས་པ་འདུག

    -བྱང་ཆུབ་ལོ་མ།

    (ཁ་བརྡའི་ནང་གི་མཆན།)

    བློ་བཟང་སེང་གེ་དང་བཀའ་ཤག་གི་ལས་དོན་གྲུབ་འབྲས་ཡིན་ནའང་འདྲ། འཐུས་ཤོར་རིགས་ཡིན་ནའང་འདྲ། ཡིག་ཐོག་ལ་བཀོད་ཚར་བའི་རྗེས་ལ། དེ་ཡིག་ཚགས་ཀྱི་ངོ་བོ་ནས་གསལ་པོར་སྡོད་ཀྱི་རེད། འདི་ནི་ལོ་རྒྱུས་སུ་འགོད་པ། ལོ་རྒྱུས་ནང་གསལ་པོར་འཇོག་པ་ཟེར་བ་དེ་རེད། མ་འོངས་པ་ན་ད་ལྟའི་རྩོམ་ཡིག་འདི་དག་ལོ་རྒྱུས་ཀྱི་གླེགས་བམ་ནང་ཚུད་འགྲོ་བ་རེད། རྩོམ་ཡིག་འདི་ཚོར་འདོད་པ་མེད་མཁན་ཚོས་ཀྱང་རང་རང་གི་ལྟ་སྟངས་ཡི་གེ་འགོད་དགོས་པ་རེད། དེ་ནས་མ་འོངས་པ་ན་ཞིབ་འཇུག་བྱེད་མཁན་དག་གིས་དབྱེ་བ་འབྱེད་ཀི་རེད། དེ་མིན། ཅིག་རེད་མིག་རེད་ལབ་ནས་ལན་འདེབས་ཚིག་གྲུབ་རེ་སྤེལ་བ་ཙམ་དང་། མང་ཚོགས་ནང་ལ་སྐད་ཆ་སྟོང་པ་རེ་བཤད་པ་ཙམ་གྱིས་ཅི་གང་ཕན་གྱི་མ་རེད། མདོག་ཉེས་ན། དེ་དག་ལོ་རྒྱུས་ནང་ལ་འཁོད་མི་འཁོད་ཐེ་ཚོམ་རེད། ཁ་ནས་བཤད་བསྡད་པས་འགྲིག་གི་ཡོད་པ་མ་རེད། ལག་པ་འགུལ་ནས་མ་བྲིས་ན། ལོ་རྒྱུས་ནང་ཐེབས་ཀྱི་མ་རེད། ལོ་རྒྱུས་ནང་མ་ཐེབས་པ་ཡིན་ན། ད་ལྟ་ལྟ་སྟངས་གཉིས་ཡོད་པ་འདི་རྩོམ་ཡིག་སྤེལ་མཁན་ཚོའི་ལྟ་སྟངས་ཀྱིས་མནན་ནས་གཅིག་གིས་འཐུས་པ་ཆགས་འགྲོ་གི་རེད། རྩོམ་ཡིག་འབྲི་མཁན་འདི་ཚོས་རྩོམ་ཡིག་རེ་བྲིས་ཡོང་དུས། དེ་ཉེན་ཁ་དང་གནད་འགག་གཉིས་ཀ་ཆགས་ཡོད་པ་རེད། གྲོས་ཚོགས་ར་བའི་ནང་ན། དེབ་ཐེར་དུ་འགོད་ཆེད་ཆེད་སྐད་ཆ་བཤད་ཀྱི་ཡོད་ཅེས་ཟེར་མཁན་ཡོད་པའང་གནད་འགག་འདིས་རེད། བློ་བཟང་སེང་གེ་དང་བཀའ་ཤག་གི་འཐུས་ཤོར་གླེང་བའི་རྩོམ་ཡིག་མང་སོང་བ་ཡིན་ན། ལོ་རྒྱུས་ནང་ལ་རང་བཞིན་གྱིས་ནག་པོ་ཆགས་བསྡད་ཡོད་པ་རེད། ང་ཚོར་འཐུས་ཤོར་སྐོར་འབྲི་མཁན་ལས་གྲུབ་འབྲས་གླེང་བའི་རྩོམ་ཡིག་འབྲི་མཁན་མེད་སོང་བ་ཡིན་ན། བློ་བཟང་སེང་གེ་དང་བཀའ་ཤག་སྐབས་འདི་རང་བཞིན་གྱིས་ནག་པོ་ཆགས་འགྲོ་བ་རེད། དེ་ལོ་རྒྱུས་ནང་ལ་འཁོད་འགྲོ་བ་རེད། ཚང་མས་གཟབ་གཟབ་བྱེད་དགོས་པ་རེད།

    ReplyDelete
  5. ཛ་དྲག་གི་གནས་སྟངས་འདིའི་སྐབས་སུ་མི་བུ་སྤྱང་གྲུང་འཛོམས་པ་དག་གིས་ཡ་རབས་དང་རྒྱུ་མཚན་གང་རུང་ལ་ཁ་གཡར་ནས་ཕྱིར་བཤོལ་བྱས་པ་ནི་ཁོང་ཅག་གི་བསོད་ནམས་ཟད་པ་རེད་ལ་གང་ལྟར་བོད་སྤྱི་བའི་ཆེད་དུ་རང་དོར་སྤྱི་གཅེས་ཀྱི་ཀུན་སློང་གིས་ཚད་གཞི་ངེས་ཅན་མེད་ཙང་རྩ་དགོངས་ཀྱི་ལས་སུ་ཞུགས་པ་ལོས་ཡིན།

    ReplyDelete
  6. First and for most I would like to remind you all that we are newly developing society with very few numbers of population in exile. There is a proverb in English "Little knowledge is dangerous" and I mean it to you all. You can write and read in Tibetan language doesn't mean you are good citizen of a country. Point finger to yourself and ask what do you do for the Tibet. Just writing comments is not what we want. Anyone can write and talk bullshit just you all do. Have a good day and hope you all will question yourself how much you do?

    ReplyDelete
  7. Yes you can say that point self but do you understand Tibetan Language ? If you do then you can learn lots things from writers and comments. If you have followed the beginning then you will discover the end of story. I think that you are too early say that. Actually you haven't seen the full movie yet. Ok ! May be they care more than Sikyong and who knows !! Wait and see.

    ReplyDelete
  8. ངོས་ནས་ཀྱང་ཏྲེ་ཧོར་བསོད་ནམས་ལགས་རྒྱབ་སྐྱོར་ཡོད།འོས་བསྡུས་སྐབས་སྲིད་སྐྱོང་བློ་སེང་ལ་བརྒྱ་ཆ 57.64རྒྱབ་སྐྱོར་འདུག་པས།ཡིན་ན་ལྷ་འདྲེ་རྒྱབ་སྐྱོར་མེད་པའི་རྣམ་པ་བསྟན་ཡོད།སོང་ཙམ་བློ་སེང་དགོངས་ཞུ་ལས་མ་འདས་སོ།
    བོད་ཀྱི་སེང་གེ་ལགས།ཁྱེད་རང་ཡར་ཐོན་ཅན་གྱི་རྒྱལ་ཁབ་ཨ་རི་ལྟ་བུ་མ་གཏོགས་རྡ་ས་ལ་འོས་པ་མི་འདུག
    ཁྱེད་རང་ལོག་ཕེབས་རོགས་གནང།
    བཙན་བྱོལ་བའི་སྲིད་སྐྱོང་རྐུབ་སྟེགས་དེ་སུར་དགོས་ན་སྤྲད་ཞོག
    བོད་་མི་གཞན་ཚོས་གཟིགས་དང་ཕྱི་རྒྱལ་ལ་ཕྱིན་ནས་དཔལ་འབྱོར་དང་སྟབས་ཆེན་རྒྱལ་ཁབ་མི་སེར་བསྒྱུར་རྒྱུར་དངངས་དྲག་བྱ་པ་མ་གཏོགས་རྡ་སར་ཕྱིར་ཕེབས་མཁན་ཇི་ཙམ་འདུག
    ཚང་མས་ཤེས་གསལ་རེད།
    བསམ་བློ་ག་ཚད་བཏང་ཡང་ཁྱེད་རང་རྡ་ས་ལ་འོས་པ་མི་འདུག
    ག་ཡིན་ཟེར་ན་མི་དང་ལེན་བྱས་ན་ལྷ་འདྲེ་དང་ལེན་བྱ་ཡི་མི་འདུག
    སྔ་ཙམ་ལོག་ཕེབས་རོགས་གནང།ནག་པོ་བཟོས་ཡོང།

    ReplyDelete
  9. བརྗོད་དོན་ག་རེ་ཡིན་རུང་མིན་རུང་རྩོམ་ཡིག་འབྲི་རྩལ་དེ་ཡིད་དབང་འཕྲོག་སོང་།

    ReplyDelete

Post a Comment