རྒྱལ་དབང་ཐུགས་ཕམ་ལོས་ཡོང་།


ཝཱཎ་བྱམས་པ་ལྷུན་གྲུབ།
སྤུན་ཟླ་ཁྲི་འབུམ་བསད་པའི།
དགྲ་བོར་ཕར་རྒོལ་མི་ཐུབ།
ནངས་སྔ་ཉི་མ་ཤར་ནས།
དགོང་དྲོ་མུན་རུབ་བར་དུ།
སྨྱུག་གྲི་ནང་ལ་སྐོར་ནས།
ནང་འཁོན་བྱེད་པའི་སྐྱོ་གར།
འགོ་བའི་ནད་ལྟར་ཁྱབ་ནས།
ཉིན་བཞིན་ཇེ་སྡུག་འགྲོ་འདི།
མཐོང་བས་སྐྱུག་མེར་ལངས་སོང་།

དགོས་པའི་དགྲ་བོར་མི་རྒོལ།
མི་དགོས་ཆོལ་གསུམ་ཁ་གཏོར།
སྤྱི་འགན་རྩ་དོན་འཐབ་རྩོད།
རྒྱ་དམར་གཞུང་ལ་མི་བྱེད།
རང་གཞུང་བོད་མིའི་སྒྲིག་འཛུགས།
རྩ་གཏོར་བཏང་བར་འབད་ཅིང་།
ཆོལ་གསུམ་ཆིག་སྒྲིལ་གཏོར་ན།
རྒྱལ་དབང་ཐུཊ་ཕམ་ལོས་ཡོང་།

ཆོལ་དང་ཆོལ་འབྲེལ་ནད་འདི།
བླ་མས་མི་ཐུལ་གདོན་འདྲ།
སྨན་པས་མི་ཐུལ་སྐྲན་འདྲ།
བླུན་པོ་རྣམས་ནི་ལྟ་ཅི།
མཁས་མིན་འཛིན་པ་དག་ཀྱང་།
བརྒྱ་བཤད་སྟོང་བཤད་བྱས་ཀྱང་།
གཟུ་བོར་གནས་མདོག་བྱས་ཀྱང་།
མདོར་དོན་འབབ་ཚུགས་འདིར་བབ།
མཐའ་ཐུག་འགོས་ནད་འདིས་ཟིན།
རྒྱལ་དབང་ཐུགས་ཕམ་ལོས་ཡོང་།

རྒྱལ་དབང་ཐུགས་ཕམ་བྱུང་བར།
དོན་དངོས་སེམས་འཚབ་ཡོད་ན།
ཆོལ་ལ་དགའ་ཞེན་ཡོད་ཀྱང་།
བོད་མིའི་སྤྱི་དོན་བསམས་ནས།
ཁ་དང་སྨྱུ་གུའི་མདའ་མཚོན།
བོད་པའི་ནང་ལ་འཕངས་ནས།
ཆོལ་གསུམ་ཆིག་སྒྲིལ་མ་བཤིག།
བོད་མིའི་སྒྲིག་འཛུགས་མ་གཏོར།
ཁ་དང་སྨྱུ་གུའི་མདའ་མཚོན།
འཕེན་ན་དགྲ་ལ་འཕོང་དང་།
གཏོར་ན་རྒྱ་གཞུང་གཏོར་དང་།

རྒྱལ་བའི་དོན་གྱི་དགོངས་པ།
བྱམས་དང་སྙིང་རྗེ་བསླབ་རྒྱུ།
འཛམ་གླིང་ཞི་བདེ་སྤེལ་རྒྱུ།
ཆོས་ལུཊ་རིས་མེད་བཀུར་རྒྱུ།
ཆོལ་གསུམ་མཐུན་སྒྲིལ་བྱ་རྒྱུ།
སྒྲིག་འཛུཊ་སྲ་བརྟན་ཡོང་རྒྱུ།
རྩ་དོན་མཉམ་མཐུན་རྩོད་རྒྱུ།
ནང་ཁུལ་ཞེ་འཁོན་སྤང་རྒྱུ།
དེ་དག་གཏོར་བཤིག་བཏང་ན།
རྒྱལ་དབང་ཐུཊ་ཕམ་ལོས་ཡོང་།

དེས་ན་ནངས་ལངས་དུས་ནས།
རྒྱལ་བའི་བཀའ་དགོངས་བསམ་ནས།
ཆོལ་གསུམ་མཐུན་སྒྲིལ་བསམ་ནས།
བོད་མའི་རྩ་དོན་བསམ་ནས།
སྤུན་ཟླའི་ཁ་ཆེམས་བསམ་ནས།
ཆོལ་ནད་དབང་དུ་མ་གཏོང་།
ཆོལ་དཀྲུག་ལས་ངན་མ་རྩོམ།
ནང་ཁུལ་ཟིང་འཁྲུག་མ་སློང་།
དགྲ་དགའ་གཉེན་སྡུག་མ་བྱེད།
བོད་ཕམ་རྒྱ་རྒྱལ་མ་བྱེད།
ཆིག་སྒྲིལ་ལས་ལ་འབད་རོགས།

{ཝཱཎ་བྱམས་པ་ལྷུན་གྲུབ་ནས། ༢༠༡༦ ༤། གི་དགོང་མོར། དེང་སྐབས་བློ་ཕམ་པ་དང་སྐྱུག་བྲོ་བའི་ནང་འཁྲུག་དང་ནང་དཀྲུག་གི་ལས་ངན་དེ་དག། ཉིན་བཞིན་ཇེ་སྡུག་ཏུ་འགྲོ་བཞིན་པ་མཐོང་ཐོས་བྱུང་བས་ཐོལ་བུར་བྲིས།}