མདང་དགོང་ང་རང་ལུས་ཀྱི་ལྷུ་ཚིགས་དང་གཟུགས་པོ་ཡོངས་རྫོགས་གཟེར་ཏེ་ཚ་བ་འཕར་ཞིང་ཆམ་པ་ཞིག་ན་གྲབས་ཨེ་ཡིན་བསམ་ནས་ཚ་བའི་སྨན་ཞིག་བཏུང་རྗེས། ང་ཚོའི་རྒྱུན་ཤེས་ཏེ་པག་རྒྱགས་ཚད་ཟས་ནས་ཉལ་ན་དྲག་སྐྱེད་ཡོང་ཐུབ་ཟེར་བ་བཞིན་ཐུག་པ་ཡིད་གང་བ་ཞིག་བཏུང་སྟེ་མགོ་རུམ་བཏུམས་ཀྱིས་ཉལ་སྡོད་པ་ཡིན།
དུས་རྒྱུན་ང་ཚོའི་འཚོ་བའི་ཁྲོད་ཀྱི་ཚ་བ་གཅོག་ཐབས་དང་ཆམ་པ་སྔོན་འགོག་གི་རྒྱུན་ཤེས་ལ་དེ་ཙམ་དོ་སྣང་མི་བྱེད་ལ། ཕ་མ་ཚོས་པག་རྒྱགས་ཚད་ཟས་ནས་ཉོལ་ཟེར་བ་དང་འདྲ་བའི་རྒྱུན་ཤེས་འགའ་རེ་ཡོད་མོད། དེ་དག་སྨན་བཅོས་ལག་ལེན་དང་མཐུན་པ་ཞིག་ནི་ཨེ་ཡིན་སྙམ་པ་ཡང་ཡང་འབྱུང་གི་ཡོད།
གྷོ་གྷུལ་བཤེར་འཚོལ་ནས་<ལུས་ལ་ཚ་བ་རྒྱས་དུས་ཇི་ལྟར་བྱེད་དགོས།>འདི་ལྟར་བྲིས་ཏེ་འཚོལ་ཞིབ་ཅིག་བྱས་པས་བོད་ཀྱི་སྨན་གཞུང་ནང་གི་ཚ་བའི་རྒྱུ་རྐྱེན་དང་དེའི་འབྱུང་འབྲས། སྨན་བསྟེན་ཐབས་སོགས་ཧ་ཅང་རྒྱས་པོ་ཞིག་རྙེད་སོང་། འོན་ཀྱང་འདི་དག་ནི་རྒྱུན་ནད་བཅོས་ཐབས་ལས་འཕྲལ་སེལ་བཅོས་ཐབས་ཤིག་མིན་པ་མ་ཟད། བོད་སྨན་དེ་དག་ཀྱང་སྨན་ཁང་ནས་བསྟེན་གཏུགས་ཀྱིས་རག་རྒྱུ་ལས་སྟབས་བདེ་ཚོང་ཁང་ནས་ཉོ་རྒྱུ་མེད་ལ། སྨན་བཏུང་མི་དགོས་པར་འཕྲལ་སེལ་ཚ་བ་གཅོག་ཐབས་ཀྱི་རྒྱུན་ཤེས་སོགས་ཀྱང་གསལ་པོ་འཁོད་མི་འདུག གང་ལྟར་འཚོལ་བཤེར་བྱས་ནས་ངས་མི་རྙེད་པ་ཞིག་མ་ཡིན་པར་རྙེད་རྒྱུ་མེད་པ་ཞིག་ཡིན་འདུག
སྤྱི་ཚོགས་འཕྲོད་བསྟེན་དྲ་བ་དང་རྒྱུན་ཤེས་དྲ་བ་འགའ་རེ་ཡོད་ཀྱང་ཀུན་གྱིས་ཨེ་ཙི་ན་ཚ་དང་བཅོས་ཐབས་དཀའ་བའི་ནད་རིགས་སོགས་ཆེན་པོ་རྐྱང་ལས། ཡང་ཡང་འབྱུང་ཉེ་བའི་མགོ་གཟེར་པ། ཆམ་པ་ན་བ། ཚ་བ་འཕར་རྒྱས་པ། གྲོད་ཁོག་བཤལ་བ། མཁྲིས་པ་དང་ཁྲག་བཤེར་འཕར་བ། ཡ་མ་ན་བ་སོགས་ནི་ཆུང་ཆུང་ཞིག་ལ་བརྩིས་ནས་བཀོད་མི་འདུག་ཅིང་། དེ་ནི་ལོས་ཡིན་ཏེ་འུ་ཅག་ལ་དུས་ནམ་ཞིག་ཏུ་འགོ་ཚུགས་པར་མ་ཤེས་པའི་འཚོ་བའི་གོམས་གཤིས་ངན་པ་ཞིག་ཡོད་པ་ནི་ཆེན་པོ་གཙིགས་སུ་བཟུང་ནས་ཆུང་ཆུང་དོ་སྣང་མི་བྱེད། གཏམ་ཞིག་བཤད་ཀྱང་ཆེ་བཤད་དང་། ལས་ཞིག་རྩོམ་ཡང་ཆེ་ས་ནས་འཇུས་ཏེ་དགོས་མཁོ་ཆེ་བའི་ལས་ཀ་ཆུང་ཙག་དེ་ཚོ་ལས་རྒྱུ་དགའ་པོ་མི་བྱེད་པ་དེ་དག་ཡིན། འདིའི་མཇུག་འབྲས་ནི་རྒྱུན་ཤེས་ཀྱིས་ཕོངས་པའི་སྤྱི་ཚོགས་ཤིག་གི་གྲལ་མཐའ་ན་ད་དུང་འཐོམ་མེ་སྡོད་ཡོད་པ་དེ་རེད།
དེང་སྐབས་ཨིན་ཡིག་དང་རྒྱ་ཡིག་སོགས་ཡིག་རིགས་མང་པོའི་ནང་དུ་དགོས་མཁོ་ཆེ་བའི་ལས་ཀ་དང་སྣ་མང་གི་རྒྱུན་ཤེས། ཡང་ཡང་འབྱུང་ཉེ་བའི་ན་ཚ་ཆུང་ཆུང་རིགས་ཀྱི་ནད་རྟགས་དང་འཕྲལ་སེལ་བཅོས་ཐབས། སྨན་གང་ཞིག་འཐུང་དགོས་མིན་། སྨན་དེའི་ཕན་ཡོན་དང་གནོད་ཆ། སྔོན་འགོག་གི་ཐབས་ལམ་སོགས་འཚོལ་བཤེར་ཐུབ་པ་དང་། དྲི་བ་བཏོན་ན་ལན་འདེབས་ཡིག་ལམ་དང་པར་རིས། བརྙན་ཕབ་དང་ཁྱད་མཁས་པར་ཁ་པར་དང་གློག་འཕྲིན་འབྲེལ་གཏུགས་བརྒྱུད་ལམ་སེང་དཀའ་ངལ་མང་དག་ཅིག་སེལ་ཐུབ་པའི་ཆ་རྐྱེན་ཡོད། འདི་དག་ཀྱང་དྲ་ཚིགས་སྒེར་རེ་རེ་དང་ཚོགས་པ་སྒེར་རེ་རེ་ནས་ལས་སྣེ་མི་འདྲ་བར་རེ་རེ་བྱས་པའི་གྲུབ་འབྲས་ཞིག་ཡིན་ལ། དེ་རིང་ཁ་སང་གྷོ་གྷོལ་འཚོལ་བཤེེར་མ་ལག་བརྒྱུད་སྣ་མང་ཤེས་བྱ་སྦྱོང་ཐབས་དང་། དྲ་ལམ་འདི་ཉིན་རེ་བཀོལ་སྤྱོད་དུང་ཕྱུར་དུ་མ་རྒལ་བཞིན་པའང་དོན་ལ་དྲ་ཚིགས་སྒེར་པ་རེ་རེ་ནས་བརྩམས་པའི་གྲུབ་འབྲས་ཤིག་ཆགས་ཡོད།
འདི་དག་ལ་མིག་བལྟས་བྱས་ཏེ་སླད་ནས་བོད་ཡིག་དྲ་ཚིགས་དག་གིས་ཀྱང་སྙན་ངག་དང་སྒྲུང་གཏམ་འབའ་ཞིག་གིས་དྲ་ངོས་ཁེངས་སྡོད་པའི་བཟོ་ལྟ་ངན་པ་དེ་བོར་ནས་ཉིན་རྒྱུན་འབྱུང་ཉེ་ཞིང་སྤྱི་ཚོགས་ནང་དུ་དགོས་མཁོ་ཆེ་བའི་སྣ་མང་གི་ཤེས་བྱ་འགོད་ཐབས་དང་། གཅིག་གཅིག་གཉིས་གཅིས་དྲ་ཚིགས་ཤར་གཏོང་བྱས་ཡོད་ཟེར་ནས་འུར་སྒྲོགས་ཙམ་མིན་པར་དངོས་དོན་ཕན་ཐབས་དང་འཚོ་བ་དང་ཁ་ཐག་ཉེ་བའི་རྩོམ་ཡིག་འབྲི་འགོད་སོགས་བྱེད་དགོས་པ་ནི་དྲ་ཚིགས་རྒྱུན་གནས་དང་སྐད་ཡིག་མཁོ་རྒྱུག་གི་གཞི་རྩ་ངོ་མ་དེ་གྱུར་ཡོད།
སེར་བྱེས་འཕྲོད་བསྟེན་སྨན་ཁང་དུ་བྲིས།
2015-3-16
རྩོམ་ཡིག་དེ་ཀློག་དུས་ཁྱེད་ཀྱི་གསུང་པ་དངོས་གནས་བདེན་པ་རང་རེད་འདུག་དྲན། ཆེ་ཆེ་དག་ལ་བལྟ་ནས་ཆུང་ཆུང་རྣམས་ལ་སྣང་མེད་དུ་བཏང་ཀྱང་། མདུན་དུ་སྨྱོ་མཆོང་བརྒྱབ་རྐྱང་བྱེད་པ་ལས། གཡས་གཡོན་ལ་ཕན་གནོད་གང་ཡོང་བསམ་བློ་དེ་ཙམ་མ་བཏང་མཁན་མང་མང་རེད་ལགས། ཉིན་ཞིག་ཆུང་ཆུང་འགའ་གནད་ཀ་ཅན་ཞིག་ཡིན་པ་འཚོར་དུས། ཨ་ཁ་ཟེར་རྒྱུ་ལས་མེད་རེད། ཧ་ཧ་ཧ་ རྩོམ་ལེགས་པོ་དང་བསམ་བློ་བཏང་རྒྱུ་འདུག་གོ།
ReplyDelete