བང་ཆེན་དྲ་བ་ལ་གཏོང་བའི་སྐད་ཆ།

སྐུར་འོས་བང་ཆེན་དྲ་བའི་འགན་འཁུར་མི་སྣ་དང་ཆེས་གུས་པ་འོས་པའི་གསེར་རྟ་ཚུལ་ཁྲིམས་མཆོག་ལ།

དེ་རིང་གུས་པས་བསམ་ཆ་ཐེངས་གཉིས་པ་དེ་ཁྱེད་ཅག་གི་དྲུང་དུ་གཏོང་བཞིན་ཡོད། དེ་སྔོན་གྱི་བསམ་ཆ་ལྟར་ད་རེས་ཀྱང་ཁྱེད་རྣམ་པས་བང་ཆེན་དྲ་བ་སྤྱི་ཚོགས་སུ་མཁོ་རྒྱུག་ཆེ་བ་དང་བེད་སྤྱོད་སྟབས་བདེ་ཡོང་ཐབས་གནང་རོགས་ཟེར་བ་དེ་རང་ཡིན། 

བང་ཆེན་དྲ་བའང་མི་རྐྱང་སྐོར་ཞིག་གིས་ཨ་ནན་ཨུ་ཚུགས་ཀྱིས་དཀའ་སྤྱོད་རིམ་པ་མྱོངས་ནས་བཙུགས་པའི་དྲ་ཚིགས་ཤིག་མ་ཟད། ད་བར་འགལ་རྐྱེན་སྣ་མང་དང་དཀའ་ཁག་དུ་མ་འཕྲད་མིན་ལ་མ་བལྟས་པར་རྒྱུན་འཆང་དང་སྤྱི་ཚོགས་ཀྱི་གནད་དོན་ཀུན་ལ་བདེན་པའི་མིག་ཟུང་བཀོལ་ཐུབ་པའི་སྤྱི་ཚོགས་དྲ་ཚིགས་ཡག་པོ་ཞིག་ཡིན་པས་རྣམ་ཀུན་ལྟ་ཀློག་དང་དྲ་ཉུལ་བྱེད་བཞིན་པ་ཡིན། 

དྲ་ཚིགས་ཡག་པོ་ཞིག་ཡིན་ཕྱིན་སྤྱི་ཚོགས་ནང་མཁོ་རྒྱུག་དང་ཁྱབ་ཆེ་དེ་ཙམ་མེད་ན་དྲ་ཚིགས་དེ་གི་ཕམ་ཁ་ཡིན་པ་མ་ཟད་སྤྱི་ཚོགས་ཀྱི་གྱོང་གུད་ཀྱང་ཡིན་པས་ཕམ་ཁ་དང་གྱོང་གུད་དེ་མི་མཐུད་ཁུར་དགོས་དོན་མེད་ལ་འདི་མུས་བཞིན་ལྷག་ལ་སླད་ནས་གསག་པ་དཀའ་བའི་ནོར་འཁྲུལ་དང་ཕམ་ཁ་ཡོང་རྒྱུ་རེད་བསམས་ནས་གུས་པས་ཁྱེད་ཅག་ལ་བསམ་ཆ་འདི་ཕུལ་བ་ཡིན། 

ཉིན་རྒྱུན་ང་རང་གསར་འགྱུར་ཀློག་པ་སྤྲོ་བས་འཕྲིན་ཕྲན་དང་ངོ་དེབ་ནང་དུ་བརྒྱུད་འགོད་གསར་འགྱུར་ཅི་འདུག་ལ་དོ་སྣང་བྱེད་བཞིན་ཡོད་པས་བརྒྱུད་འགོད་གསར་འགྱུར་ཡོད་ཚད་དུས་བབ་དྲ་ཚིགས་ནས་བཤུས་ཡོང་བ་ཞིག་ལས་བང་ཆེན་དྲ་ངོས་ནས་བཤུས་པ་ཆེས་ཉུང་ཉུང་རེད་འདུག འདིའི་གནད་དོན་ནི་དུས་བབ་དྲ་བ་ལྟ་ཀློག་དང་ཁ་འབྱེད་བདེ་བས་ཉིན་རེ་བཞིན་འཁོར་རྒྱུག་ཆེ་ལ་བརྒྱུད་འགོད་མང་བ་ཡོང་གི་ཡོད། 

བང་ཆེན་དྲ་ཚིགས་སྐད་ཡིག་གསུམ་ཐོག་བཟོས་ཡོད་སྟབས་དྲ་ལམ་ནས་ལྟ་དུས་ཁ་འབྱེད་དཀའ་བ་དང་དྲ་ངོས་གཙང་དག་གསལ་གསུམ་དེ་ཙམ་མི་འདུག་པ་མ་ཟད། ཁ་པར་ནང་དུ་དྲ་བའི་པར་གཞི་ཆེ་དྲགས་ཏེ་ཀློག་པ་པོ་ཞིག་གིས་མིག་ཤར་བྱེད་ཙམ་ལ་གསར་འགྱུར་གསར་པ་འདི་འདུག་སྙམ་པ་ལམ་སེང་ཤེས་ཐབས་དཀའ་བ་འདུག 

ངེད་ཅག་སྤྱི་ཚོགས་ཆུང་ཆུང་འདིའི་ནང་དུ་ཨིན་ཡིག་ཤེས་མཁན་ཚོས་བོད་ཀྱི་དྲ་ཚིགས་ཁག་ལྟ་ཀློག་དེ་ཙམ་མི་བྱེད་ལ་རྒྱ་ཡིག་ཤེས་མཁན་གྱི་ཀློག་པ་པོ་དེ་བས་ཀྱང་ཉུང་བས་ཨིན་ཡིག་དང་རྒྱ་ཡིག་པར་ངོས་ཀྱི་བང་ཆེན་དྲ་ཚིགས་དེ་ལྟ་ཀློག་བྱེད་མཁན་ཆེས་ཉུང་ཉུང་ཞིག་ཡིན་རྒྱུ་རེད་དྲན་བཞིན་ཡོད། འདི་ལྟར་ཉུང་ཉུང་ཞིག་ལས་མེད་ན་ད་རུང་པར་ངོས་གཉིས་པོ་རང་སོ་བཞག་ནས་དྲ་ཚིགས་ལྟ་ཀློག་ལ་འགལ་རྐྱེན་དེ་བཟོ་གཅུག་ན་བོད་རྒྱ་ཨིན་གསུམ་ཅན་གྱི་དྲ་ཚིགས་ཡིན་ཞེས་ངོམ་བྱེད་ཙམ་ལས་དོན་ལ་དགོས་པ་དེ་ཙམ་མི་འདུག་སྙམ་པས། ཁྱེད་རྣམ་པས་ཅི་དགོས་ཐག་གཅོད་གནང་རོགས། 

དེ་རིང་གུས་པས་ཁ་པར་ནས་ཚོད་ལྟ་ཞིག་བྱས་པས་དུས་བབ་དྲ་བ་སྐར་ཆ་བཅུ་ནས་བཅུ་གསུམ་བར་ཁ་ཕྱེ་ཐུབ་པ་མ་ཟད། པར་རིས་ཕུད་པའི་དྲ་ངོས་ཀྱི་ཡི་གེ་ཚང་མ་ལྟ་ཀློག་ཐུབ་ཀྱི་འདུག བང་ཆེན་དྲ་བ་སྐར་ཆ་ཉི་ཤུ་ནས་ཉེར་ལྔ་ཙམ་འགོར་མཚམས་ཁ་ཕྱེ་ཡོང་བ་དང་། ཁ་ཕྱེ་ཙམ་ལས་སྐར་མ་གསུམ་སོང་རུང་ཡི་གེ་ད་དུང་འཆར་མི་ཐུབ་པ་མ་ཟད་དྲ་ངོས་དེ་ཁ་པར་ནང་དུ་ཆེ་དྲགས་ཏེ་འཕྲོད་པོ་ཞིག་གཏན་ནས་མི་འདུག དེང་སྐབས་དྲ་བ་གང་འདྲ་ཞིག་ཡིན་རུང་ཁ་པར་གྱི་པར་གཞི་ནི་མེད་དུ་མི་རུང་ཞིག་ཡིན་ཏེ་ཁ་པར་སྤྱད་ནས་དྲ་ཉུལ་བྱེད་མཁན་ལས་གློག་ཀླད་བརྒྱུད་མཁན་ཆེས་ཉུང་ཉུང་རེད། 

ཁྱེད་རྣམ་པས་གཅེས་པ་འོས་པའི་དྲ་ཚིགས་དེ་རྒྱུན་གནས་དང་འཕེལ་རྒྱས། འཁོར་རྒྱུག་དང་ཁྱབ་བརྡལ་ཇེ་ཆེར་འགྲོ་མིན་གྱི་རྒྱུ་རྐྱེན་གཅིག་ནི་ཁྱེད་རྣམ་པའི་རང་ལག་ཏུ་ཡོད་པས། རང་ལག་དྲོད་མོ་ནས་སྐྱོན་ཆ་ལྷག་ཚེ་ཐབས་སྐྱོ་པོ་ཞིག་ཏུ་འགྱུར་རྒྱུ་རེད་བསམ།

ཁ་དྲོ། 

              སེར་བྱེས་ཏྲེ་ཧོར་སྲོང་བཙན་གྱིས་ཕུལ།