ལོ་གཅིག་བརྗེ་སྤོར་གཏན་ནས་མི་དགོས་ཁ་དོག་དམར་པའི་གཟན་ཤམ་གཅིག།
རྙིང་རལ་ཟད་པ་འདྲུད་བཞིན་རྒྱུ་བར་ངོ་ཚ་མི་ཉོ་བསིལ་ལྷམ་གཅིག།
དགུན་འཁྱག་ལྷག་པ་ཆེ་བའི་དུས་ན་རྐང་རྗེན་མི་གྲང་ལྷམ་རྙིང་གཅིག།
གྲྭ་རྐྱང་འཚོ་བ་སྟབས་བདེ་ཡིན་པས་འཆི་དུས་འགྱོད་པ་ཅི་ཡང་མེད།།
ཕུགས་རྒྱུ་བཅོལ་འཇོག་བུད་སྐྱེད་མེད་ན་སུ་དང་གང་གིས་བདའ་འདེད་མེད།།
དགྲ་གཉེན་ཁེ་འཛིན་སྨྱོ་ཆུ་མ་བཏུང་ཀླད་རྩ་འཁྲུགས་པའི་འཕྱ་ཀ་མེད།།
གཟའ་ཟླ་བུ་ཕྲུག་པང་དུ་མ་སློང་དུང་ཞེན་འཁོར་བའི་འཇུ་ཐག་མེད།།
གཟའ་ཅ་བཏུང་བ་ཅི་རག་ཙམ་ལས་ཡག་དང་གཙོག་གི་གདམ་གསེས་སྐྱུར།།
གནས་དང་གནས་མལ་ངན་ངོན་དེ་ལས་སྐྱིད་དང་དགའ་ཡི་ཐ་སྙད་སྐྱུར།།
སུ་དང་འགྲོགས་ན་ཡིད་བློ་བདེ་བཞིན་དོགས་དང་འཇིགས་པ་རྩད་ནས་སྐྱུར།།
གྲྭ་རྐྱང་འཚོ་བ་སྟབས་བདེ་ཡིན་པས་འཆི་དུས་འགྱོད་པ་ཅི་ཡང་མེད།།
ཆབ་དཔལ་རིག་གསུམ་གས་འཐོར་སོང་ཡང་ངེད་རང་གཏོར་དང་འཐོར་ཞིག་མེད།།
ཚན་རྩལ་དཔལ་ཡོན་བསླུ་ཁ་བཙན་ལ་བདག་ཉིད་མགོ་ཐོམ་འགྱུར་བ་མེད།།
དེང་རབས་སྤྱི་འགྲོས་ཧམ་ཤད་ཆེ་བར་མགོ་སྒུར་ལུས་འབུལ་ཞུ་རྩིས་མེད།།
གྲྭ་རྐྱང་འཚོ་བ་སྟབས་བདེ་ཡིན་པས་འཆི་དུས་འགྱོད་པ་ཅི་ཡང་མེད།།
ལྷ་ཀླུ་བཙན་གསུམ་མགོན་སྐྱབས་མི་དགོས་དཀོན་མཆོག་གསུམ་པོ་སྙིང་ན་ཡོད།།
རྔ་རྡུང་སྦུབ་དཀྲོལ་ཆོ་ག་མི་ཤེས་གཞུང་ཆེན་རྩ་བ་ངག་ལ་ཡོད།།
མོ་རྩིས་པྲ་ཕབ་སྦྱོང་པར་མ་བྱས་ལས་འབྲེལ་བསླུ་མེད་ཐད་ལ་ཡོད།།
གྲྭ་རྐྱང་འཚོ་བ་སྟབས་བདེ་ཡིན་པས་འཆི་དུས་འགྱོད་པ་ཅི་ཡང་མེད།།
སྔགས་འཆང་སྙེག་པའི་རལ་པ་མ་ཁུར་ཤ་ཀྱཱའི་དགེ་སློང་མགོ་རེག་ཡིན།།
གྲུབ་ཐོབ་རྟོག་པ་རོལ་རྡོལ་མི་ཡོང་བདེན་འཛིན་དགྲ་ལ་རྒོལ་མཁན་ཡིན།།
མཁས་དབང་སྙན་པའི་གྲགས་པ་མི་ཐོབ་རང་དམན་འཛིན་པའི་ཉམ་ཆུང་ཡིན།།
གྲྭ་རྐྱང་འཚོ་བ་སྟབས་བདེ་ཡིན་པས་འཆི་དུས་འགྱོད་པ་ཅི་ཡང་མེད།།
རྟུལ་ཕོད་དཔའ་རྒོད་ཡིད་སྨོན་མི་འཆོར་ཁྲིམས་སྲུང་གྲས་ན་འཚང་བཞིན་ཡོད།།
དབང་ཆེན་དཔོན་ལ་ཞུ་བ་མི་འབུལ་བདེན་པའི་དཔུང་ལ་རྒྱབ་བརྟེན་ཡོད།།
མི་ཁ་ལག་ཁར་ཞེད་སྣང་མི་སྐྱེས་ཆོས་ཀུན་སྒྱུ་མ་སྒོམ་བཞིན་ཡོད།།
གྲྭ་རྐྱང་འཚོ་བ་སྟབས་བདེ་ཡིན་པས་འཆི་དུས་འགྱོད་པ་ཅི་ཡང་མེད།།
གྲོང་དང་ཁྱིམ་སྒོར་སྐུ་ཕེབས་མ་ཐུབ་རང་ཤག་སྦུག་ལ་ལྷོད་སྡོད་བྱས།།
ཤི་གསོན་ཀུན་པོ་ཡར་འདྲེན་མ་ཐུབ་སེམས་བསྐྱེད་གོམས་ནས་སྐྱིད་ཉལ་བྱས།།
ཚེ་སྲིངས་དབང་གནང་ཚེ་བུམ་མ་བཟུང་འཆི་བ་ནམ་སླེབས་ངང་སྒུག་བྱས།།
གྲྭ་རྐྱང་འཚོ་བ་སྟབས་བདེ་ཡིན་པས་འཆི་དུས་འགྱོད་པ་ཅི་ཡང་མེད།།
༢༠༢༥-༣-༧
Comments
Post a Comment