ཉི་མ་ནུབ་ཁ་ན།

ནུབ་ཀྱིས་ཉི་མ་འཐེན་ནས་བྲོས་ལ་ཁད།།

མུན་ནག་འདོམ་གྱིས་ས་ཆེན་གཞལ་བ་ན།།

སྣང་བའི་བར་སྣང་དེ་ནི་ལག་མཐིལ་ཙམ།།

སེམས་དང་བར་སྣང་འདྲེས་པས་རབ་རིབ་གྱུར།། 

སྙིང་གི་རྩིབས་རུས་དགུན་གྱི་ཚད་པས་བཙིར།

ཟུང་ཁྲག་འཁོལ་བའི་ལྷང་ལྷང་སྐད་ཀྱིས་དཀྲོགས།།

གཉིད་ཀྱི་རྒྱ་མཚོ་སྐེམ་པའི་འདམ་མྱགས་ན།།

སེམས་པ་ཁེར་སྐྱེས་མེ་ཏོག་ཟོལ་གྱིས་འཕུར།།

སྐྱིད་ན་སྐད་འགོ་མི་མཐོ་འཇམ་གྱིས་སྡོད།།

སྡུག་དུས་སྐྱོ་ལྭ་མི་གོན་འཛུམ་ནས་འགྲོ།། 

སེམས་པ་ལག་པས་སྐྱོར་བཞིན་ག་ལེར་ཉལ།།

རང་གི་ལག་ན་རང་ཉིད་བདེ་བར་སྒོམ།།

དགའ་དང་བདེ་བ་འཆར་དང་ནུབ་ཀྱིས་ཡོང་། 

སྐྱོ་དང་རྒུད་པ་དྲག་ཏུ་འཁྱུག་ཅིང་འབབ།། 

སྐྱིད་ལ་སྡུག་པའི་མི་ཚེ་འཛད་པ་ན།།

འཁོར་བའི་མུན་ན་མུན་པ་དེ་ཙམ་མཐུག། 

2019/2/23

མཚོ་ཁ་གཡེང་པ།

ཉི་མ་དམར་པོ་དེ་མཚོ་མོའི་ཞབས་ལ་ནུབ།།
རླབས་རིས་གྱ་གྱུ་དེ་མཐའ་ནས་མཐའ་ལ་དེད།།
བསིལ་རླུང་འཇམ་པོ་ནི་གདོང་ལ་གཏོད་བཞིན་སྤུར།།
དབུགས་རིང་གཏོང་གཏོང་ལ་མཚོ་ཁ་གཡེངས་ནས་ལུས།།

དྲན་གདུང་འགོག་མེད་ཅིག་ནུབ་ཁས་འདྲེན་ནས་བྱུང་།།
ཡིད་ཀྱི་རྒྱ་མཚོ་དེ་འཇགས་མེད་རླུང་གིས་གཡོས།།
མངར་སྐྱུར་ཚོར་བ་ཞིག་གཏིང་ནས་གཏིང་དུ་འཁོལ།།
སེམས་པ་ཐོགས་མེད་འདི་བྲང་གིས་ག་ལ་ཁོག།

དགའ་སྐྱོ་ཆགས་སྡང་གིས་རི་བོ་བརྩིགས་པ་ལ།།
རྣམ་རྟོག་འགོག་མེད་ཀྱི་རླུང་ལྷག་བྲེལ་མ་འཚུབ།།
བཙན་ས་མ་ཟིན་པའི་སེམས་པ་གཤོག་ཐོགས་འདིས།།
ཚོར་བའི་རླབས་རིས་ལ་འཚོ་བའི་རི་མོ་བྲིས།།

ཅི་དང་གང་ལ་ཡང་ཞེ་ཐོགས་མེད་གྱུར་ན།།
མ་དག་ས་ལ་ནི་འཚོ་སྟངས་མི་ཤེས་པས།།
དག་པ་རབ་འབྱམས་ཤིག་མ་རྙེད་ཚུན་ལ་ནི།།
ཞེ་བློ་སྲབ་མེད་འདིས་གར་ཁྲིད་མི་རྒྱུགས་ཅི།།

རྫུན་གྱི་བྲིན་ཁ་དེ་ཇེ་མཐོ་ཆེ་མང་ན།།
བདེན་པ་སྲུང་རྒྱུ་ནི་སྲོག་དང་ཐུག་པའི་ལས།།
སྐེ་དེ་མ་ཆད་ནའང་མགོ་དེ་ལྷུང་ངེས་པས།།
རང་ཁ་སྲུང་རྒྱུ་ནི་རང་ཉིད་འཚོ་ཐབས་ཡིན།།

ཁ་ཁོག་གཉིས་པོ་ན་རྣམ་འགྱུར་མངར་སྐྱུར་རེ།།
ཚུལ་འཆོས་རྒྱབ་ཏུ་ནི་མ་ལྐུངས་ཐབས་མེད་རེད།།
འཇིག་རྟེན་འཁོར་བ་ན་སྐྱིད་ཉལ་བྱ་བསམ་ན།།
ཟ་རེ་ཟུ་རེ་དེ་ཐབས་ཀྱི་མཆོག་ཡིན་ཚོད།།

2020/2/14