རྒྱུགས་སྤྲོད་བཙན་པོ་མ།

          











གཉའ་གུག་རྒྱུས་འདར་ཟས་ལ་ཡིད་ག་ལོག་ཅིང་།།
མཚན་ཉིན་གཉིད་འཕྲོག་འབྱུང་བཞི་ན་ན་མང་བ།།
ཅི་བཤད་གཏམ་ལ་ལན་ཐུང་ཚིག་རེ་བྱིན་མཁན།།
ཁེར་རྐྱང་སེམས་སྡུག་ཅན་དེ་རྒྱུགས་ཀྱིས་བཟོས་སོང་།

མོག་མོག་ལྕེ་ཐོག་བཞག་ཀྱང་བྲོ་བ་མ་རྙེད།།
ལིམ་ཇ་ཁྱུར་མིད་བཏང་རུང་སྐྱིར་མོ་མ་ཚོར།།
སི་པན་བརླན་བཟའ་བྱས་རུང་ཁ་ལྕེ་མ་ཚ།།
ཡོད་ཚད་རྒྱུགས་སྤྲོད་ཟེར་བས་བཅོམ་འཕྲོག་བྱས་སོང་།།


འཕྲིན་ཕྲན་ཏིག་ཏིག་སྒྲ་དེ་རྣ་ལ་གཟན་པ།།
གྲོགས་པོས་བརྙན་པར་སྐུར་རུང་ལྟ་འདོད་མ་སྐྱེ།།
ཚོགས་ནང་བགྲོ་གླེང་འཁྲུགས་མོད་ཉན་བསམ་མི་འགི།།
སེམས་སྐྱིད་སྤྲོ་སྣང་ཅན་དེ་རྒྱུགས་ཀྱིས་མནར་སོང་།།

དབུགས་རིང་ནར་མོ་གཅིག་མཐུད་གཅིག་རྒྱུག་རེད་འགི།།
ཨ་ར་ཨུ་རུ་ཁ་དང་མི་འབྲལ་འདོན་སོང་།།
སུ་ཞིག་འཕྲད་ཀྱང་སྡུག་མུག་སློང་བའི་གཞི་མ།།
སྐྲོ་ཐུང་བློ་རྒྱ་ཆུང་དེ་རྒྱུགས་ཀྱིས་བཟོས་སོང་།།

ལྗིག་ལྕི་གཟུགས་མེད་ཁུར་པོས་གཉའ་ནས་མནན་སོང་།།
འབྲེལ་མེད་མི་ཚོགས་མང་བས་ཟུར་ནས་བཅུན་བཙུར།།
རེ་རེ་རྒྱུགས་འཐོན་ཟིན་པས་སྡུག་ལ་སྦྱར་བ།།
མི་སྐྱིད་སྡུག་སྒོམ་བྱེད་དགོས་རྒྱུགས་ཀྱིས་བཟོས་སོང་།།

ཐད་རིས་གཉེར་མ་གསབ་པས་རྗེས་སུ་ལུས་ཤིང་།།
སེམས་ངོ་རྣམ་རྟོག་རྒོད་པས་ཡིད་བློ་འཁྲུལ་གདའ།།
རང་ལུས་སྟོབས་ཤུགས་སྐྱོ་བས་ཟུག་གཟེར་ལངས་སོང་།།
ད་ནི་རྒྱུགས་སྤྲོད་ཟེར་དུས་ཁོག་འདར་ཤོར་འོང་།།

-------------------2014-10-31------------------
                                             

0 comments:

Post a Comment