༼ བསྟོད་པའི་ཤིས་ཚིག་སྙན་ལྡན་དྲི་ཟའི་མགུར་དབྱངས། ༽
♨/སྨྲ་སྲས:གསེར་འཇམ།
སྐུ༵་རྣམ་ངུར་སྨྲིག་འཛིན་ལ་རིགས་བརྒྱའི་བདག།
གསུ༵ང་ལེགས་ཡོན་ཏན་རིན་ཆེན་ཚོགས་ཀྱི་གཏེར།།
ཐུ༵གས་འཕགས་བརྩེ་ལྡན་བྱང་ཆུབ་དངོས་ཀྱི་རྗེ།།
དབྱེར་མེད་དབུ་གདུགས་བླ་མར་གུས་པས་འདུད།།
མདོ་སྔགས་གཞུང་ཀུན་འཆ༵ད་ཉན་ལེགས་མཐར་བྱིན།།
ངོ་མཚར་ཟླ་མེད་རྩོ༵ད་པའི་ལང་ཚོ་རྒྱས།།
བདེན་དོན་ལེགས་འབྱེད་རྩོམ༵་པ་རིག་བདག་མཆོག།
རབ་དགའ་གངས་ཅན་བོད་དགོན་མཆོག་ནི་མཛེས།།
འཁྲུལ་མེད་བཀའ་ལུང་བདུད་རྩིའི་ཟེགས་མས་འཁྱུད།།
རིགས་མཆོག་བདེ་འབྱུང་ལྷག་བསམ་པདྨོ་འཛུམ།།
མངོན་པར་མཛེས་པའི་དབང་ཕྱུག་མི་ཡི་མཆོག།
རྒྱལ་བསྟན་རྒྱ་མཚོའི་ཞབས་ལ་ཕྱག་འཚལ་ལོ།།
མཁྱེན་དཔྱོད་རྩལ་རྫོགས་མཐུ་དཔལ་བླ་མའི་སྐུ༷།།
དག་གསལ་མགྲིན་པའི་ཟིལ་གནོན་ཚངས་དབྱངས་གསུ༵ང།།
སེམས་ཅན་ཡོད་དོ་བདེ་ཞིང་འགོད་མཁས་ཐུག༵ས།།
དད་པའི་གེ་སར་དགུང་འཕྱུར་ཨེ་མ་མཚར།།
སྨྲ་རྒྱལ༵་དབ༵ང་བོ་བསྟན༵་པ་འཛི༵ན་ལ་མཁ༷ས།།
ཚུལ་ཁྲིམས་དྲི་བཟང་འབྱོར་ལྡན་རྒྱ༵་མཚོ༵་བཙུ༷ན།།
རྨད་བྱུང་སྐལ་ལྡན་གདུལ་བྱ་ཆོས་སྟོན་བཟ༷ང་།།
གངས་ལྗོངས་འགྲོ་བའི་སྐྱབས་མགོན་ལ་གསོལ་འདེབས།།
སྙིགས་དུས་བསྟན་དང་འགྲོ་བའི་གསོས་བྱོན་པའི།།
སྟོན་པ་ཏཱ་ལའི་བླ་མ་གཙུག་ན་མཛེས།།
སྙན་གྲགས་བ་དན་སྲིད་གསུམ་གཡོ་བའི་རྗེ།།
རིས་མེད་འགྲོ་ཡོངས་འཁོར་མཚོ་ལས་འདྲེན་ཤོག།
འཛོམས་བྲལ་བླ་མ་རྒྱང་རིང་གྲོང་དུ་འཚོ།།
རྗེས་འཁྲེང་འགོག་བྲལ་དམར་སེམས་སྟོང་ལྷང་ངེ།།
སྐྱོ་གདུང་སྨྱུག་རྩེ་བཞུར་བའི་ཐིགས་པ་རེས།།
ཐབས་བྲལ་དྲན་མགུར་བྲིས་ཀྱང་སྐྱོ་བ་གཅིག།
རྣམ་དཀར་འཕྲིན་ལས་ཕྱོགས་མེད་རྒྱས་བའི་མགོན།།
རྣམ་ལེགས་ཀུན་ཕན་རྗེ་བཙུན་བླ་མ་ཉིད།།
རྣམ་དག་ཡིད་ནས་གསོལ་དང་ཕྱག་འཚལ་ལས།།
རྣམ་ཀུན་མཆོག་ལྡན་སྐུ་ཚེ་རབ་བརྟན་ཤོག།
ཅེས་ ༢༠༡༥ལོའི་ཟླ ༤ ཚེས ༢༢ཉིན་ ༧ གོང་ས་ཐམས་ཅད་མཁྱེན་པ་རྒྱལ་དབང་བསྟན་འཛིན་རྒྱ་མཚོ་དགུང་ལོ་བརྒྱ་ཅུར་སོན་པའི་རྟེན་འབྲེལ་ལ་བུ་གསེར་ལག་པ་འཇམ་དཔལ་ཤེས་རབ་ཀྱིས་བསྟོད་པའི་ཤིས་ཚིག་གམ་མཆོད་པར་འབུལ་བ་ལེགས་སོ།།
------------------------------
ཁྱེད་ཀྱི་འཁྲུངས་སྐར་ལ་རྟེན་འབྲེལ་ཞུ།
གཙང་དབྱངས་ལྡན།
མཐའ་བྲལ་ལྟ་བ་རྣམ་དག་ཐུགས་ལ་གསལ།།
འཆད་པའི་གྲུ་ཆར་གདུལ་བྱའི་ཁམས་དང་མཐུན།།
མི་འཇིགས་ཞི་བདེའི་གསེར་གྱི་ཁྲི་འཕང་མཐོ།།
གྲུབ་པའི་མཆོག་བརྙེས་མགོན་ཁྱོད་སྐུ་ཚེ་བརྟན།།
མདོ་རྒྱུད་ལུང་རིག་ཀུན་ལ་མཁས་བའི་མགོན།།
ཐུབ་བསྟན་རྒྱལ་མཚན་བསྒྲེང་པའི་ངུར་སྨིག་ཅན།།
སྙིགས་དུས་བསྟན་འགྲོའི་ངང་ཚུལ་སྨྲ་མཁས་པ།།
གངས་ཅན་མགོན་པོའི་སྐུ་ཚེ་བརྟན་པར་སྨོན།།
གངས་ལྗོང་ལྷ་ཡུལ་དག་པའི་ཞིང་ཁམས་ན།།
སྙིང་རྗེ་དཔག་བསམ་ལོ་མའི་རང་མདངས་གསལ།།
བསླབ་ཁྲིམས་ཀ་བུར་དྲི་ཡིས་བརྒྱན་པ་ཁྱོད།།
རྒྱལ་སྲས་བྱང་ཆུབ་སེམས་དང་འབྱོར་བས་མགོན།།
ཁྱེད་ཀྱི་བརྩེ་བ་འཛམ་གླིང་ཡོངས་ལ་ཁྱབ།།
དྭངས་གཙང་སླད་མེད་འགྲོ་དྲུག་ཀུན་ལ་གནང་།།
བོད་རིག་ཁྲི་མ་འབུམ་གྱི་སྐྱབས་མགོན་ལགས།།
ཁྱེད་སྐུའི་མཛན་འཕྲིན་རྟག་ཏུ་བརྟན་པར་སྨོན།།
དབྱར་གྱི་ལང་ཚོ་འཁྲུངས་པའི་ནམ་ཟླ་དང་།།
ཁུ་བྱུག་མགྲིན་དབྱངས་སྙན་པའི་དུས་ཚིག་འདིར།།
ཁྱེད་ཉིད་དགུང་གྲངས་བརྒྱད་ཅུར་ཕེབས་པ་བསུ།།
འདགའ་སྐྱིད་དགོད་སྒྲས་ཁྲོད་ནས་གྱ་སྟོན་རོལ།།
དངོས་སུ་མ་མཇལ་སེམས་པ་རྡོ་ལས་འཁྱག།
དབུགས་རིང་དབྱངས་སུ་བརྩེགས་ནས་འདུག་པ་ལས།།
མཇལ་འདོད་ཡོད་ཀྱང་ང་རང་མཇལ་དབང་མེད།།
འོད་སྟོང་འཁྱིལ་བའི་ཉི་མ་དེ་རིང་ལ།
རྒྱང་རིང་ཡུལ་ནས་དགུང་གྲངས་བརྒྱད་ཅུར་ཕེབས།
ཨ་མདོའི་ཡུལ་ནས་སྐུ་ཡིས་གྱ་སྟོན་རོལ།།
རེ་བའི་རྨི་ལམ་ཉིན་མཚན་གཉིས་ལས་ཤོར།།
སྤྱན་རས་གཟིགས་ཁྱོད་སྐུ་ཚེ་བརྟན་པར་སྨོན།
༧ གོང་ས་རིན་པོ་ཆེ་མཆོག་དགུང་གྲངས་བརྒྱད་ཅུར་ཕེབས་པའི་་སྐུའི་འཁྲུངས་སྐར་ལ་༢༠༡༥ ༤ ༢༡ ཉིན།
----------------------------
གྱ་སྟོན་བསུ་བའི་སྙན་ངག
མྱི་ཆེན།
ཁྱེད་ལ་བསྙེས་པའི་གངས་རིའི་མགོ་བོ་ནི། །
སྲིད་པའི་ཉམ་ངར་ལྷུང་བའི་ཉམས་ཤིག་མངོན།།
བྱིན་ཆེན་ཟེར་མའི་ཟླ་འོད་སིམ་པོ་དེས། །
རི་ལྗོངས་དག་ཁྲུས་བྱེད་པར་ཀུན་ནས་སྨོན། །
མི་ཕྱེད་དད་པའི་ནམ་མཁའ་ཡངས་པོ་ལ།།
མཛད་བཟང་རྒྱུ་སྐར་དབུས་ཀྱི་ཟླ་བ་གཞོན། །
གདུང་སེལ་བདུད་རྩིར་འཇོ་བའི་དཔལ་དེ་དག།
སྙིགས་ལྔའི་རང་མཚང་གཞོམ་པའི་ཐབས་སུ་དགེ།
གང་ལ་རེ་བའི་དད་འདུན་ཞགས་པའི་སྣེ། །
སྲིད་དུ་བརྐྱངས་པའི་གཞིས་པ་གྲངས་མི་ཟིན།།
སེམས་ཀྱི་མཐིལ་ལ་རྩེན་པའི་ཡིད་བཞིན་ནོར།།
སྲིད་པའི་གངས་ཆེན་རལ་བའི་དཔལ་དུ་སྨོན།།
ཐུབ་པའི་ལུགས་བཟང་དུས་མཐའི་རི་སུལ་འདིར།།
སྨུག་སྤྲིན་དྲ་བར་འཐིབས་པའི་རླབས་རིས་ཏེ། །
ལས་ཉོན་རླུང་བུར་འགྲོགས་པ་བརྩེ་བའི་འགྲོས།།
འཁོར་བའི་ལྡིང་ཁང་མཛེས་པའི་དཔལ་ལ་བསྒྱུར།།
དེ་སླད་ཐུགས་བསྐྱེད་དཔུང་བ་དར་བའི་བྱིན། །
བརྩེ་བའི་རང་ཁྱིམ་མཛེས་པའི་དཀྱིལ་འཁོར་དུ།།
རིང་མིན་འབེབ་པར་བྱང་མཐའི་མགོ་རེག་གིས། །
གྱ་སྟོན་བསུ་བའི་གཏམ་གྱི་དོན་པོར་དྲངས། །
དེ་སླད་སྐུ་བཞིའི་རྒྱལ་ཐབས་ལ་དབང་བའི། །
སྟོན་པ་མཆོག་ཁྱེད་སྐུ་ཚེ་རྟག་བརྟན་ཅིང་། །
མཛད་བཟང་འཇིག་རྟེན་ཁམས་ཀྱི་ཡུལ་ཀུན་ཏུ།།
བདེ་སྐྱིད་འཚོ་བའི་དཔལ་དུ་རྒྱས་པར་ཤོག །
2015.6.8 རྒྱ་ས་པེ་ཅིན་དུ།།
བསྟོད་གླུ་ངག་གི་མཆོད་པ
༼ཨ༽གདུང་སེལ་གྱིས་
བཀྲ་ཤིས་དུས་སྟོན་ཉི་བཟང་དེ་རིང་ཤར།།
ཤིང་མོ་ལུག་ལོའི་འབའ་སྒྲའི་དགུང་ནས་བསུ།།
དགའ་སྐྱིད་དུས་ཀྱིས་ཁ་བཏགས་དེ་རིང་འབུལ།།
སྐྱབས་མགོན་ཉི་ཟླ་དོ་ཡའི་སྐུ་ཁམས་བཟང་།།
དགོང་གྲངས་བརྒྱད་བཅུར་སོན་ཞིང་སྐུ་ཚེ་བརྟན།།
ཞི་བདེ་དབུ་མའི་ལམ་བཟང་སྐྱོང་མཁས་པ།།
ཤིང་མོ་ལུག་ལོར་གྱ་སྟོན་དགའ་བའི་བསུ།།
གསེར་ཞལ་མྱུར་མཇལ་ཡོང་བའི་སྨོན་འདུན་ཞུ།།
དེད་དཔོན་ཁྱེད་ཉིད་དགོང་ལོ་བརྒྱད་ཅུར་ཕེབས།།
བསིལ་ལྡན་ཁ་བའི་སྲོལ་གྱིས་གྱ་སྟོན་བསུ།།
མཉམ་འཛོམས་མེད་པའི་ལས་དབང་སྐྱོ་ན་ཡང་།།
བརྗེད་མེད་བླ་མའི་གྱ་སྟོན་དགའ་བའི་བསུ།།
གངས་ལྗོངས་འཚེ་མེད་ཞི་བདེ་ཐོབ་པར་སྨོན།།
སྒང་དྲུག་བོད་ལ་མྱུར་དུ་ཕེབས་པར་སྨོན།།
སྤུར་རྒྱལ་སྤུན་ཟླའི་རེ་སྒུག་འགྲུབ་པར་སྨོན།།
ཁྱེད་སྐུ་ནད་མེད་ཁྲི་ལོར་ཁྲི་ལོར་སྨོན།།
བོད་རྒྱལ་ལོའི་༢༠༡༥ལོའི་བོད་ཟླ་༤ཚེས༡༨ཉིན་ཤུལ་ལུས་བོད་མིའི་མིང་ཙམ་འཛིན་པ་༼ཨ༽གདུང་སེལ་གྱིས་གོང་ས༧སྤྱི་ནོར་རྒྱལ་བའི་དབང་བོ་མཆོག་རང་ཅག་གི་མགོན་དང་དཔུང་གཉེན་དུ་བཞུགས་ནས་དགོང་གྲངས་བརྒྱད་ཅུར་ཕེབས་པའི་དགའ་སྟོན་དང་འབྲེལ་ཡིད་དགའ་བའི་ངང་ནས་ཤར་མར་བྲིས་པ་དགེའོ།།
----------------------------
སྐུ་ཚེ་ཁྲི་ལོར་ཤོག
ཨགཞས་ཆུང་། ཐེན་ཅིན།
ས་ཡི་གོ་ལའི་སྤྱི་གཙུག་གི་ནོར་བུ་འོད་པོ་ཆེ
གངས་དཀར་པོའི་འདབས་རོལ་ཞས་ཀྱིས་བཀྱག་ནས
ཁྱེད་ཉིད་གང་ལ་བཞུད་སོང་
ཉིན་མཚན་དུས་དྲུག་གི་འཁོར་སྟངས་ཀློང་ནས
བོར་མ་མྱོང་བའི་ནོར་བུ་འོད་ཆེན
ལོ་ཟླའི་ལྟེབས་གཉེར་གྱི་ཐེམ་སྐས་རེ་ནས
འཁྲེང་ཞེན་དང་དད་འདུན་ཁོག་ལ་བཟུང་ནས
གསོལ་འདེབས་དང་སྨོན་པ་ཞེ་ལ་འཁྱིལ་ནས
མི་ལོ་མང་པོའི་སྐུ་ངལ་བཞེས་སོང་
གངས་ཁ་བ་ཚང་གི་ཉི་མ་སེར་བོ
ཡུལ་འཛམ་བུ་གླིང་གི་ཞི་བདེའི་དེད་དཔོན
ཞི་བའི་རང་གཤིས་ཀྱི་ཕྱག་བྱས་ནས
གུས་པའི་སེམས་འདུན་གྱི་མགོ་སྒུར་ནས
སྐུ་ཚེ་སྐལ་བརྒྱར་བརྟན་པར
གསོལ་འདེབས་སྙིང་ནས་ཞུ
ཟླ་༦པའི་ཚེས༨ཉིན།
----------------------------
བསྟོད་ཚིག་དད་པའི་རོལ་མོ།
རྔ་བ། ___࿑སྒ་མིང་བ།
རླབས་ཆེན་ཚོཊ་གཉིས་ཡོངས་རྫོཊ་པའི། །
ལུང་རྟོགས་བསྟན་པའི་སྙིང་བོའི་གཏེར། །
གཞན་ཕན་པདྨའི་རང་མདངས་དཀར། །
ཕྱག་ན་པད་མོས་དགེ་ལེགས་སྩོལ། །
མཚན་དཔེའི་དཀྱིལ་འཁོར་རྫོགས་པའི་སྐུ། །
རྒྱལ་ཀུན་ལེགས་བཤད་གཅིག་བསྡུས་གསུང་། །
ཤེས་བྱ་མ་ལུས་ཀུན་གསལ་ཐུགས། །
སྐུ་གསུང་ཐུགས་ཀྱིས་དངོས་གྲུབ་སྩོལ། །
གང་གི་སྐུ་གསུང་ཐུགས་ཀྱི་ཡོན། །
ཕྱོགས་བཅུར་བཞུགས་པའི་རྒྱལ་སྲས་ཀྱིས། །
མ་ལུས་བརྗོད་པར་མི་ནུས་ཀྱང་། །
དད་པས་ངག་འཕྲེང་སྤེལ་ལ་སྤྲོ། །
རྒྱལ་ཀུན་བྱམས་བརྩེ་གཅིག་སྤུངས་པའི། །
མི་ཡི་རྣམ་རོལ་འགྲོ་བའི་མགོན། །
གསང་གསུམ་རྨད་བྱུང་ཆ་ཤས་ཀྱི །
ཡོན་ཏན་བརྗོད་པ་སུ་ཡིས་ནུས། །
དཔག་བསམ་ཤིང་གི་གྲིབ་བསིལ་གྱིས། །
འགྲོ་བའི་ཚ་གདུངས་ཡོངས་བསལ་ཏེ། །
བྱམས་བརྩེའི་འོད་དཀར་ལས་འཁྲུངས་པའི། །
༧གོང་ས་མཆོག་གི་ཞབས་བརྟན་ཤོག །
གང་གི་མཛད་འཕྲིན་མཐའ་བྲལ་བ། །
བསྟན་པའི་ལག་རྗེས་བརྗོད་འདས་པ། །
གདུལ་བྱའི་སྐྱེ་འགྲོ་བགྲངས་མེད་པ། །
གང་གི་མཛད་བཟང་སུ་ཡིས་བརྗོད། །
ཁོང་གི་ཐུགས་བསྐྱེད་སྨོན་ལམ་གྱིས། །
འཛིན་མའི་ཁྱོན་འདིར་ཆོས་སྒྲས་འགེངས། །
འགྲོ་བ་ཡོངས་ལ་ཞི་བདེས་ཁྱབ། །
གངས་ཅན་མགོན་དུ་རྟག་བརྟན་ཤོག །
ལོ་རྒན་བརྒྱད་ཅུའི་ཁུགས་སོ་ན། །
ཞལ་འཛུམ་གསེར་གྱི་འོད་ཧེམ་ཧེམ། །
འཚེར་བའི་ཟླ་མེད་རྒྱལ་སྲས་ཁྱེད། །
འགག་མེད་བསྐལ་བརྒྱར་བརྟན་པར་ཤོག །
༢༠༡༥/༦/༢ཉིན།
----------------------------
དྲན་གདུང་དད་པའི་རླབས་ཕྲེང་།
རྩོམ་པ་བོ། བ་ཡོད་གྲགས་པ་རྒྱལ་མཚན།
བྱམས་བརྩེའི་བདུད་རྩི་ཞི་བདེའི་གསོས་སུ་འཁྱིལ།།
ཟླ་བྲལ་ཤེས་རབ་འཁྲུལ་མེད་གདམས་པས་མངོན།།
ཐབས་ཤེས་ཟུང་འབྲེལ་ཕྱག་བཞེས་ཁྲོད་དུ་གསལ།།
ཞི་བདེའི་བླ་མ་དམངས་གཙོའི་དེད་དཔོན་མཆོག།
གྲངས་ཉུང་མི་རིགས་ཤིག་གི་འཁོར་ཡུག་ལས།།
འཁའ་རུ་བགྲོད་དེ་གླིང་བཞིའི་དཔལ་དུ་འཕུར།།
དབང་མེད་གཞན་ཡུལ་འགྲིམ་པའི་དགེ་སྦྱོང་ཞིག།
རྒྱལ་ཁབ་ཡོངས་ཀྱི་བླ་ན་གདུགས་བཞིན་འཁོར།།
རྩུབ་མོའི་དྲག་མཚོན་དུག་བཞིན་རྒྱང་དུ་དོར།།
གནོད་པའི་ལན་དུ་བརྩེ་བས་འཁོན་ལན་སྤྲད།།
གདུག་པའི་དམག་དཔུང་ཞི་བས་ཕམ་མཛད་དེ།།
ཐམས་ཅད་ཁྱེད་ཀྱི་བྲན་དུ་སྤྲིན་བཞིན་བསྡུས།།
རྟེན་འབྱུང་ལྟ་བས་སྤྲས་པའི་ལེགས་བཤད་ཀྱིས།།
ཤར་ནུབ་ཚན་རིག་མཁན་དག་འབངས་སུ་བཀུག།
འཛམ་གླིང་མཁས་པའི་གཙུག་རྒྱན་ཡིད་བཞིན་ནོར།།
གདུལ་བྱའི་མགོན་དཔུང་དམ་པར་རྟག་བཞུགས་ཀྱཻ།།
འགྱུར་སྐྱེན་ལོ་ཟླའི་གོམ་འགྲོས་བཞུད་བརྡའི་ཁྲོད།།
དྲན་གདུང་རླབས་འགྱུས་ཚོར་ཁམས་བླ་འོག་བརྗེ།།
མ་མཇལ་མཆི་མའི་ཆབ་ཀྱི་མཆོད་སྐྱེམས་འདིས། །
རེ་སྒུག་འབོད་ཚིག་བྲག་ཅར་འཐབ་བཞིན་ཡོད།།
གཞིས་ལུས་ཆོལ་གསུམ་བོད་མིས་དུས་དྲུག་ཏུ།།
ཁྱེད་ཞལ་མཇལ་ལ་སྒུག་ཡུན་རིང་དྲགས་སོང་།།
ངོ་མཚར་མཛད་འཕྲིན་གཞན་དུ་རྒྱས་མོད་ཀྱང་།།
བླ་སློབ་མྱུར་འཛོམས་སྐལ་བཟང་མ་གཡེལ་ཀྱཻ།།
ཁྱེད་སྐུ་བརྟན་ལ་དགའ་བ་འབུམ་གྱིས་བརྟས།།
མ་མཇལ་བགྲེས་འདི་གདུང་བའི་སྣོན་མར་གྱུར།།
དགའ་སྐྱོ་འདྲེས་མའི་ཚོར་འདུའི་གཡུལ་ས་ནས།།
དད་འདུན་འབུམ་གྱིས་གྱ་སྟོན་བསུ་བཞིན་ཡོད།།
དགུང་གྲངས་བརྒྱད་ཅུའི་ཐེམ་སྐས་བཞེས་ན་ཡང་།།
བཅུ་དྲུག་ལང་ཚོའི་གཞོན་ཉམས་རྣམ་བཀྲ་ཞིང་།།
མཁྱེན་དཔྱོད་ཉི་མའི་གཟི་མདངས་རབ་རྒྱས་ཏེ།།
སྐྱེ་རྒུའི་མགོན་དུ་བསྐལ་བརྒྱར་བཞུགས་ཤིག་ཀྱཻ།།
ཞེས་པ་འདི་ནི་ ༧ གོང་ས་སྐྱབས་མགོན་མཆོག་གི་སྐུའི་གྱ་སྟོན་དང་འབྲེལ་ཏེ། གུས་ཕྲན་(བ་ཡོད་གྲགས་པ་རྒྱལ་མཚན་)དུ་འབོད་པས། བོད་རྒྱལ་ལོ་ ༢༡༤༢ བོད་ཟླ་ ༤ ཚེས་ ༡༦ ཉིན། སོར་བཅུའི་འདབ་མ་སྙིང་གར་ཟུམ་སྟེ་གུས་པས་སྦྱར་བའོ།།
----------------------------
༧ རྒྱལ་བ་བསྟན་འཛིན་རྒྱ་མཚོ།
ཧོར་ཞི་བདེ་རྒྱ་མཚོ།
ཁྱེད་ཀྱང་ཁྱེད་རང་གི་ལྟ་བ་ཚིགས་སུ་བཅད་དེ།།
ངས་ཀྱང་ང་ཉིད་ཀྱི་སྣང་བ་མདུན་དུ་བཞག་སྟེ།།
སུས་ཀྱང་སུ་ལ་ཡང་སྒེར་གཅོད་བག་ཙམ་མེད་པར།།
བརྩེ་བའི་ཉམས་ལེན་དེ་བསྐྱང་ཚུལ་ཡང་ཡང་གསུང་གི།།
དཔེ་ཐོག་བྲོ་རྡུང་གིས་ས་རྒྱ་མི་ཆོད་གསུང་གི།།
བརྩེ་བ་དམར་དམར་ཞིག་ལག་ལ་ཨེ་ཞོག་ལྟ་གི།།
ལམ་དང་ལུགས་སྲོལ་ཞེས་འཛེར་མ་བརྡབས་པ་འདྲ་དེ།།
མི་འགྱུར་ཚད་ཐིག་ཅིག་མིན་པ་གོ་དགོས་གསུང་གི།།
བདེ་ས་འཇམ་ས་རུ་ཞེན་པ་ཨ་འཐས་ཤིག་གིས།།
ཟ་ཆོག་འཐུང་ཆོག་གིས་འཆི་སྒུག་མ་གནང་གསུང་གི།
ལོ་ཟླའི་སྐེ་ཚིགས་དེ་བསྲིངས་ནས་མ་བསྒོར་གསུང་གི།
སྟོང་ཚེགས་འབུམ་ཚེགས་ཀྱིས་སྐྱར་ཁྲིད་དམར་ཁྲིད་གནང་གི།
དང་དོང་འབར་འབུར་གྱི་འཇིག་རྟེན་ཁྲ་ཁྲ་ཡིན་གསུང་།།
གཡག་སྣ་ཁུ་ཚུར་དེ་རྡོ་དང་དབྱུག་པ་ཡིན་གསུང་།།
ཀྱག་ཀྱོག་གྱང་གྱོང་གིས་ལམ་ཁ་མ་འགོག་གསུང་གི།
རྨང་གཞི་འདི་འདྲ་ནས་ཞིབ་དང་ནན་གྱིས་གནང་གི།
སྲིད་པའི་ཤ་གསེང་ནས་རུས་པ་བཅག་སྟེ་བཙལ་བས།།
གསུང་གི་ཟུར་རེ་ཡང་སྙིང་ལ་ཟུག་ནས་བུད་འགྲོ།།
འཁོར་བའི་རུས་གསེང་ནས་མགོ་བོ་བཀས་ཏེ་རྙེད་པས།།
འཛུམ་གྱི་ཆ་རེས་ཀྱང་སེམས་པ་བསྡུས་ནས་བུད་འགྲོ།།
བློ་དང་ཐོས་པ་དེ་སྒྲུབ་པའི་རྨང་དུ་བཞག་ཚུལ།།
བྱམས་དང་ཤེས་རབ་ཀྱིས་མུན་པ་དོང་དུ་སྤྲུགས་ཚུལ།།
དད་པ་དག་སྣང་གི་ཕག་ནས་ལྟ་དགོས་མེད་པའི།།
ཉི་མ་སེར་པོ་འདི་བྲིས་ནས་བྲིས་ཚོད་མི་འདུག།
ཟབ་མོ་བརླིང་པོ་དག་འབྲི་ཡང་ཤེས་པ་མི་འདུག།
འདྲ་བོ་འདྲ་བོ་དག་ཟློས་པར་དགོས་པ་མི་འདུག།
དེ་རིང་སྲིད་པ་འདིའི་ཟུར་ཁར་བརྡར་ཚུལ་ཞིག་གིས།།
རྣམ་ཐར་ཆེན་མོ་དེའི་ངོས་གཅིག་འདི་ལྟར་མཐོང་སོང་།།
