ང་ལ་དགྲ་བོ་སུ་ཡང་མེད།

ཀུན་སྤྱོད་ནི་ཆོས་ལུགས་ལས་གལ་ཆེ་བ་ཡིན་ཞེས་པའི་༸གོང་ས་མཆོག་དང་ཧྥིརན་ཛི་ཨོལ་ཋི་གཉིས་ཀྱི་གསུང་རྩོམ་གསར་པའི་སྔོན་གླེང་།

ང་ལ་ཐུག་མ་མྱོང་བའི་མི་མང་པོ་ཡོད་པ་མ་གཏོགས་དགྲ་བོ་སུ་ཡང་མེད། ལོ་ངོ་ཉི་ཤུའི་ཡར་སྔོན་ཞིག་ལ་ཏཱ་ལའི་བླ་མ་མཆོག་གིས་ང་ལ་དེ་ལྟར་གསུངས་མྱོང་། ཁོང་གིས་ད་དུང་ང་ཚོས་དགྲ་བོའི་ས་ནས་བློ་བསྐྱེད་མང་ཤོས་ལེན་ཐུབ་པས། ཕྱོགས་གཅིག་ནས། དགྲ་བོ་ནི་ང་ཚོའི་དགེ་རྒན་ཡག་ཤོས་དེ་ཡིན་ཟེར། ཤེས་རབ་ཀྱིས་ཕྱུག་ཅིང་། དངོས་ཡོད་དང་མཐུན་པའི་ཚིག་འདི་དག་ནི། འཇིག་རྟེན་འདིའི་སྟེང་གི་ཆེས་ཁྱད་དུ་འཕགས་ཤིང་། མི་ལོ་ཧྲིལ་པོ་ལྔ་བཅུ་ང་དྲུག་རིང་རྒྱ་གར་ནང་བཙན་བྱོལ་དུ་བཞུགས་རྗེས། དགུང་ལོའང་མཐོ་ཤོས་ཡིན་པའི་ཡུལ་གྱལ་བ་ཁོང་གི་གསུང་ཚིག་རེད། སྤྱི་ལོ་1959 ལོ་ནས་བཟུང་། རྒྱ་མིས་བཙན་བཟུང་བྱས་པའི་ཕ་ཡུལ་དུ་སྡོད་དབང་མེད་པར་གཞན་ཡུལ་དུ་འཚོ་དགོས་བྱུང་རུང་། ཁོང་གིས་རྒྱ་མིི་དང་ཁོང་ཚོའི་འགོ་ཁྲིད་ཚོར་སྡང་སེམས་བཅངས་མེད་པ་མ་ཟད། སྐབས་རེེར་དེ་ལས་ལྡོག་སྟེ་རང་ཉིད་དམར་ཕྱོགས་པའི་ནང་པ་ཞིག་གམ། ནང་པ་དམར་ཕྱོགས་པ་ཞིག་ཡིན་ཟེར་བ་མ་ཟད། ཁོང་གིས་ད་དུང་པེ་ཅིང་གི་དམར་ཕྱོགས་འགོ་ཁྲིད་ཚོའི་ཆེད་དུ་སྨོན་ལམ་གསུང་གི་ཡོད་ཟེར་ལ། བཞད་མོ་དང་མཉམ་དུ་ཡུ་རོབ་ནང་ལ་ཡིན་ན། ངས་སྔོ་ལྗང་ཚོགས་པར་Green Party འོས་འཕེན་ངེས་ཡིན། གང་ཡིན་ཟེར་ན། ཁོར་ཡུག་གི་དཀའ་ངལ་འདི་ང་ཚོའི་གསོན་གནས་ལ་ཐུག་ཡོད་ཟེར།

འདས་པའི་ལོ་ངོ་སུམ་ཅུ་སོ་གསུམ་རིང་འདིར་ང་ཚོས་ཁོང་ལ་ཐེངས་སུམ་ཅུ་ལྷག་མཇལ་ཞིང་། བརྙན་འཕྲིན་བཅར་འདྲི་ཐེངས་བཅོ་ལྔ་ལྷག་ཞུས་མྱོང་། གདུང་སེམས་བསྐྱེད་པའི་བཅར་འདྲིའི་ནང་དོན་འདི་འདྲའམ། ཡང་ན་མཚར་སྣང་དོད་པའི་མི་འདི་འདྲར་ཧ་ལམ་མཇལ་མ་མྱོང་། ངས་བཅར་འདྲིི་ཞུས་མྱོང་པའི་མི་སུས་ཀྱང་ཁོང་གི་བཞད་མོ་འདི་འདྲ་བཞད་མ་མྱོང་། ཞིབ་འཇུག་བཅར་འདྲི་survey མང་པོར་ཁོང་ཉིད་འཛམ་གླིང་འདིའི་སྟེངགི་མི་ཡག་ཤོས་སུ་བདམས་ཐོན་བྱུང་བ་དེ་སྟེས་དབང་གིས་བྱུང་བ་ཞིག་གཏན་ནས་མ་རེད། འདས་པའི་ལོ་ངོ་ཁ་ཤས་ནང་འདིར། ཆོས་ཀྱི་དབུ་ཁྲིད་ཁོང་གིས་ཆོས་ལུགས་དང་མ་འབྲེལ་བའི་ཀུན་སྤྱོད་རིན་ཐང་གལ་ཆེན་ནས་གལ་ཆེན་དུ་འགྱུར་བཞིན་པར་བརྩིས་པ་རེད། དེ་རིང་ཁོང་གིས་གོམ་གང་མདུན་སྤོས་ཀྱིས་ཆོས་ཀྱི་དབུ་ཁྲིད་ཅིག་ལ་ཐུན་མིན་དུ་གྱུར་བའི་སྡོམ་ཚིག་ཅིག་བཀོད་ཡོད། དེ་ནི་ཀུན་སྤྱོད་ནི་ཆོས་ལུགས་ལས་གལ་གནད་ཆེ་བ་ཡོད། ཀུན་སྤྱོད་ནི་ལྷན་སྐྱེས་ཀྱི་ཁྱད་གཤིས་ཡིན་ལ། ཆོས་ལུགས་ནི་སློབ་ནས་གོམས་པ་ཞིག་ཡིན་གསུངས། རྒྱལ་སྤྱིའི་ཁྱོན་དུ་གནང་བའི་གསུང་བཤད་ཁག་ཏུ་ཁོང་གིས་ཆོས་དང་མ་འབྲེལ་བའི་ཀུན་སྤྱོད་རིན་ཐང་དེ་ཆོས་ལུགས་ཀུན་ལས་བརྒལ་ཡོད་པར་ཡང་ནས་བསྐྱར་དུ་གསུང་བཞིན་ཡོད། ཨེལ་བྷརཊི་ཞི་ཝེ་ཛར་Albert Schweitzer གྱིས་རིག་པ་གཅིག་མཚུངས་འདིར་ཚེ་སྲོག་ལ་བརྩི་འཇོག་བྱེད་པ་ཟེར་བའི་ཐ་སྙད་གཞན་པ་ཞིག་བཀོལ་ཡོད། 

ཏཱ་ལའི་བླ་མ་མཆོག་གིས་ཆོས་ལུགས་དང་མ་འབྲེལ་བའི་ཀུན་སྤྱོད་རིན་ཐང་དེ་རྒྱལ་ཁོངས་དང་། ཆོས་ལུགས། རིག་གཞུང་བཅས་ཀྱི་ས་མཚམས་བརྒལ་ནས། མི་ཐམས་ཅད་ལ་ལྷན་སྐྱེས་སུ་ཡོད་པའི་རིན་ཐང་མངོན་མཚོན་བྱས་ཡོད་པ་མ་ཟད། དེ་ཉིད་མི་ཚང་མར་འཇུག་པ་ཞིག་ཀྱང་ཡིན། ཕྱི་ཚུལ་ཙམ་དང་། ཕྱིའི་དངོས་པོའི་རིན་ཐང་ཙམ་མ་ཡིན་པར། འདི་དག་ནི་དྲན་པ་ཉེར་བ་བཞག་པ་དང་། སྙིང་རྗེ། སེམས་འདུལ་བ། བདེ་བར་སྙེགས་པ་བཅས་ཀྱིས་མཚོན་པའི་ནང་སེམས་ཀྱི་རིན་ཐང་ཡིན། ཁོང་གིས་གལ་སྲིད་ང་ཚོས་རང་ཉིད་ལ་བདེ་སྐྱིད་བསྐྲུན་འདོད་པ་དང་། གཞན་ལ་བདེ་སྐྱིད་བསྐྲུན་འདོད་ན། ང་ཚོས་སྙིང་རྗེ་སྒོམ་དགོས། ང་ཚོ་ཚང་མས་འཛུམ་གྱིས་ཁེངས་པའི་ངོ་རིས་ལས། ཁྲོ་གཉེར་གྱིས་ཁེངས་པའི་ངོ་རིས་མཐོང་འདོད་མེད་ཟེར། 

ཏཱ་ལའི་བླ་མའི་ཡིད་ཆེས་ཀྱི་སྲོག་ཤིང་གཅིག་ནི། མི་ཐམས་ཅད་བདེ་བ་དོན་དུ་གཉེར་བ་དང་། སྡུག་བསྔལ་ལ་གཡོལ་བར་འདོད་པའི་བློ་འདིས་གཅིག་ཏུ་སྒྲིལ་ཡོད་པར་འདོད་པ་དེ་རེད། འདི་ནི་མིའི་རིགས་ཀྱི་ཆེས་རླབས་ཆེ་བའི་ལེགས་གྲུབ་ཀུན་གྱི་འབྱུང་གནས་རེད། རྒྱུ་མཚན་དེ་ལ་བརྟེན་ནས། ང་ཚོས་ང་ཚོ་འགྲོ་བ་མི་ཞེས་པའི་མིང་ཚིག་འདི་དག་ཏུ་རྩ་བ་ཚུགས་ཡོད་པའི་གཞི་རྩའི་ངོ་བོ་ཞིག་ལ་བསམ་བློ་གཏོང་བ་དང་། ལག་ལེན་བསྟར་དགོས། 

ཏཱ་ལའི་བླ་མ་མཆོག་གི་དགོངས་པ་ལྟར་ན། ཆོས་ལུགས་དང་མ་འབྲེལ་བའི་ཀུན་སྤྱོད་མེད་པར། ང་ཚོའི་མིག་མདུན་གྱི་དཀའ་ངལ་ཚང་མ་སྟེ། དབུས་ཤར་Middle East རྒྱལ་ཁག་ནང་དང་། ཡུཀི་རཱན་Ukirine སོ་མཱ་ལི་ཡཱ་Somalia ལྷོ་ཨ་ཧྥི་རི་ཀ་སོགས་ནང་གི་དམག་འཁྲུག་དང་། རྒྱལ་སྤྱིའི་ཁྱོན་དུ་མི་གྲངས་ས་ཡ་ཉི་ཤུ་ལྷག་བཙན་བྱོལ་བར་གྱུར་པའི་གནས་སྟངས། ནཱ་ཇེ་རཱི་ཡཱ་Nigreia དང་ཨཧྥི་གྷནི་སི་ཐནAfghanistan ནང་གི་ནང་འཁྲུག གནམ་གཤིས་ཀྱི་འགྱུར་ལྡོག་དང་ཁོར་ཡུག་གི་དཀའ་ངལ། རྒྱལ་སྤྱིའི་དཔལ་འབྱོར་ཉམས་ཉེས། རྒྱལ་སྤྱིའི་ཁྱོན་གྱི་བཀྲེས་ལྟོགས་ཀྱི་དཀའ་ངལ་སོགས་ཚང་མ་སེལ་མི་ཐུབ། འཆད་རྒྱུའི་གསུང་གླེང་ཁག་ཏུ་ཁོང་གིས་རང་ཉིད་ཀྱི་གསར་བརྗེའི་རང་བཞིན་ལྡན་པའི་སྡོམ་ཚིག་ཁག་ལ་གསལ་འགྲེལ་དང་རྒྱས་འགྲེལ་མཛད་ཡོད་ལ། ཏཱ་ལའི་བླ་མ་མཆོག་གིས་བཏོན་པའི་བླང་བྱ་ནི་གདུང་སེམས་དང་སྙིང་རྗེའི་གསར་བརྗེ་ཞིག་སྟེ། ཁོང་གི་འདས་པའི་གསར་བརྗེ་ཡོངས་རྫོགས་གཅིག་ཏུ་བསྡུས་པའི་གསར་བརྗེ་ཞིག་རེད། གདུང་སེམས་དང་སྙིང་རྗེ་མེད་ན། འཕེལ་འགྱུར་འདི་མ་གཞི་ནས་འགོ་འཛུགས་ཡོད་མི་སྲིད། 

སྤྱི་ལོ་2015 ལོའི་ཟླ་དང་པོའི་ནང་། ཧྥ་རན་སིའི་རྒྱལ་ས་པེ་རཱ་སི་Paris རུ་གནས་བཅས་པའི་ཤཱག་ལིས་ཧེབ་ཌོ་Charlie Hebdo རབ་གཏགས་གསར་ཤོག་གི་རྩོམ་སྒྲིག་ཁང་དང་། ཇིའུ་མི་རིགས་ཁྲོམ་རྭ་ཆེན་མོ་སོགས་སུ་ཁ་ཆེའི་འཇིགས་སྐུལ་རིང་ལུགས་པས་བཙན་འཛུལ་དང་འཇིགས་སྣང་སྐུལ་དུས། ཏཱ་ལའི་བླ་མ་མཆོག་གིས་མཚམས་རེར་ངའི་བསམ་པར་ཆོས་ལུགས་ཟེར་བ་ཞིག་གཏན་ནས་མེད་ན་ཡག་ག་ཡོད་ས་རེད་དྲན་གྱིན་འདུག ཆོས་ལུགས་ཐམས་ཅད་དང་། ཆོས་དཔེ་ཐམས་ཅད་ཀྱིས་མངོན་དུ་མ་གྱུར་བའི་དྲག་སྤྱོད་སྦས་སྐུང་བྱེད་བཞིན་ཡོད། རྒྱུ་མཚན་དེའི་དབང་གིས་ང་ཚོར་ཆོས་ལུགས་ཐམས་ཅད་ལས་བརྒལ་བའི་ཀུན་སྤྱོད་མཁོ་བ་རེེད། སློབ་གྲྭ་ཁག་ལ་མཚོན་ན་ཆོས་ལུགས་འཛིན་གྲྭ་ལས་ཀུན་སྤྱོད་ཀྱི་འཛིན་གྲྭ་ཚུགས་རྒྱུ་དེ་གལ་གནད་ཆེ་བ་ཡིན། ཅིའི་ཕྱིར་ཞེ་ན། འགྲོ་བ་མིའི་གསོན་གནས་ཀྱི་སླད་དུ་རྟག་ཏུ་ང་ཚོ་ཕྱོགས་དང་རིས་སུ་གཅོད་མཁན་དེར་གལ་གནད་དུ་འཛིན་པ་ལས། ང་ཚོའི་ཐུན་མོང་རང་བཞིན་ངོས་ཟིན་རྒྱུ་དེ་གལ་གནད་ཆེ་བས་སོ་ཟེར། དཔྱོད་ཤེས་འདི་ནི་གཤམ་དུ་འབྱུང་རྒྱུའི་བཅར་འདྲི་འདིའི་སྐུལ་རྐྱེན་ཡིན། 

འདི་ན་འཛམ་གླིང་ལ་བཅོས་སྒྱུར་གཏོང་ནུས་པའི་འཕྲིན་གསར་ཞིག་ཡོད། 

སྤྱི་ལོ་2015 ལོའི་ཟླ་7པའི་ཚེས་6ཉིན་མོར། ནོ་བྷེལ་ཞི་བདེའི་གཟེངས་རྟགས་བཞེས་མཁན་ཁོང་དགུང་ལོ་བརྒྱད་ཅུར་སོན་བཞིན་ཡོད། དུས་སྟོན་འདི་ཉིད་སྲུང་བརྩི་ཞུ་ཆེད། དེབ་ཆུང་འདི་ཉིད་འཛམ་གླིང་གི་སྐད་ཡིག་ཆེ་ཁག་ཏུ་དུས་གཅིག་ཏུ་པར་སྐྲུན་བྱས་པ་ཡིན། ཧྥིརན་ཛི་ཨོལ་ཋིས་Franz Alt སྤྱི་ལོ་2015 ལོར་ཇར་མཱན་ནས་སྤེལ།

འདྲེ་རིག་ལྡན་གྱིས་འདི་ཟླའི་ཚེས་4ཉིན་ཨ་རི་ནས་བོད་ཡིག་ཏུ་བསྒྱུར།

སྲོང་བཙན་གྱིས་འདི་ཟླའི་ཚེས་5ཉིན་པར་རིས་ཤིག་ནས་གློག་ཀླད་དུ་གཏགས།