སྐུ་ངོ་ཐུབ་བསྟན་ལུང་རིགས་ཀྱི་ཁ་སྤུ་རྫུན་མ།

བཏགས་ཆོས་སྐུ་ངོ་ཐུབ་བསྟན་ལུང་རིགས་བློ་ཡུལ་དུ་འཆར་བར་གདག་གཞི་ཁ་སྤུ་ཅན་དེ་ཅིས་ཀྱང་བློ་ཡུལ་དུ་འཆར་དགོས་ཤིང་། སྐུ་ངོའི་གདོང་ན་མངོན་གསལ་གྱི་རྟགས་ཤིག་ཡོད་པ་ནི་ཁ་སྤུ་དེ་ཡིན། ཁོང་ནམ་མཇལ་ལ་ཁ་སྤུ་དེའང་མཐོང་འོང་ལ། ཁ་སྤུ་ནག་ནག་པོ་དེས་ཁོང་ཉིད་སྒོམ་ཚུགས་དང་དཀྱེལ་ཡངས། གནའ་མྱི་རུས་རྐང་ཅན་ཞིག་འདུག་སྙམ་གྱི་ཚོར་བ་ཞིག་སུ་ལའང་བསྟེར་གྱི་ཡོད།

འགུལ་གྲགས་མེད་པའི་བར་སྐབས་ཤིག་ནས་སྐུ་ངོའི་གདོང་ཕྱི་ལ་གཅིག་དོན་ཡོང་དུས། སུ་ཞིག་ཡིན་རུང་མི་བདེ་བ་ཞིག་གི་ཚོར་སྣང་འགོག་མེད་ཅིག་བྱུང་བ་ནི། ཁོང་གི་ཁ་སྤུ་དེ་སྔོན་མའི་སྐུ་ངོ་ཐུབ་བསྟན་ལུང་རིགས་ཀྱི་ཁ་སྤུ་དེ་མ་ཡིན་པར། ཤ་ཕྱོགས་ཁུག་རྟའི་བྲང་སྤུ་ནས་བཏོགས་ཏེ་བཟོས་པའི་ཁ་སྤུ་རྫུན་མ་ཞིག་ཡས་མཆུ་ན་ཁྱོན་ནས་མི་འཕྲོད་བཞིན་དུ་བཙུགས་འདུག་པའི་ཐུབ་བསྟན་ལུང་རིགས་ཀྱི་ཁ་སྤུར་གྱུར་འདུག གཅིག་བྱས་ན་ཁོང་གི་དེ་སྔོན་གྱི་ཁ་སྤུ་དེའང་སུ་ཞིག་གི་བྲང་སྤུ་བཏོགས་ནས་བཙུགས་པའི་རྫུན་བཟོའི་ཁ་སྤུ་ཞིག་ཨེ་ཡིན་སྙམ་པའི་ནེམ་ནུར་ཞིག་དབང་མེད་དུ་སྐྱེ་འོང་ལ་ད་དུང་སྐུ་ངོའི་གདོང་ལ་བཅེར་ནས་ཉེ་འཁོར་ཚོས་ཀྱང་མགོ་གཡུག་རེ་གནང་ནས་སྐུ་ངོ་ལ་ཁྱེད་སུ་ཡིན་ཞེས་འདྲི་ཚིག་རེ་འཕེན་བཞིན་འདུག

མདོ་སྨད་པ་ལ་གཅིག་ཏུ་བགྲང་ས་དང་གཉིས་ལ་བརྩི་ས་ཡིན་པའི་གཞོན་སྐྱེས་ཤེས་འཇོན་ཅན་ཉུང་ཉུང་རྙེད་རྒྱུ་མེད་པ་ཞིག་གཏན་ནས་མ་ཡིན་རུང་སྐུ་ངོས་སྤྱན་རས་ལ་མིག་ཤེལ་གསར་པ་ཞིག་གཡོགས་ནས་ཤར་ཕྱོགས་ཁུག་རྟ་མ་གཏོགས་གཟིགས་པར་མ་གནང་ཞིང་གསལ་བར་མ་གྱུར་བའི་གནས་སྟངས་ཡ་མཚན་པ་ཞིག་གསར་དུ་དྲ་ལམ་ན་ཁྱབ་འདུག ལོ་ལྔ་ཚན་ཞིག་གི་ཡར་སྔོན་དུ་གདན་ས་ཆེན་པོ་སེ་ར་ན་སྐུ་ངོ་ཐུབ་བསྟན་ལུང་རིགས་ཀྱི་ཁ་སྤུ་ནག་ནག་ཅན་གྱི་ཞལ་ནས་གསུང་པའི་བཀའ་སློབ་དེ་དག་ཁ་སང་དེ་རིང་ལའང་རྒན་ལགས་རྣམ་པ་ཚོས་ཤར་རེ་བགྲངས་གནངས་ཏེ་ངེད་ཅག་ལ་བཀའ་སློབ་གནང་གི་ཡོད། གསར་བུ་སྣང་མཐོ་ཚོས་ཉན་དེ་ཙམ་མ་འདོད་ནའང་སྐུ་ངོའི་ཞལ་གསུང་དེ་མ་རེད་ཟེར་ས་ཞིག་རག་མེད་ཚོད་ལ། སྐུ་ངོ་ནི་སྒམ་བརླིང་ཅན་ཞིག་འདུག་པས་ཞལ་གསུང་དེའང་བརླིང་པོ་ཞིག་ཡིན་སྙམ་གྱིས་མགོ་སྒུར་སྒུར་གྱིས་ཉན་ཡོད། དེ་དུས་སུ་ལ་ཡང་སྐུ་ངོའི་གཟིགས་རྒྱ་དེ་འདི་ཙམ་ཆུང་གི་རེད་སྙམ་པ་ཞིག་བློ་ཡུལ་དུ་མི་འཁོར་ལ་འཁོར་ཡང་བཤད་ས་ཞིག་མི་རག་ཐག་ཆག་ཡིན།

ཤར་ཕྱོགས་ཁུག་རྟ་ནི་འགྲེལ་བཤད་མི་དགོས་པའི་མི་སྣ་ཞིག་ཡིན་ལ། སྲིད་སྐྱོང་ལ་ཉེས་འཛུགས་གཞི་མེད་རྐྱང་རྐྱང་བྱེད་པའི་མི་སྣ་ཞིག་ཡིན་པ་ཀུན་ལ་གྲགས་ཤིང་གྲུབ་པས་ཨ་མདོ་བ་མང་པོ་ཞིག་གིས<ཤར་ཁུག་ཁྱེད་ངལ་རྒྱུ་ཟིག་མེད་ནོ་ཅི་རེད། ཁྱེད་ངོ་མི་ཚ་ར་ང་ཚོ་ངོ་ཚ་ཡོང་ཀི> <སྒེར་ནད་ཁུར་ནས་ཁ་གྲགས་ཚད་ལ་སྲིད་སྐྱོང་གི་མ་འགྲིག་རབས་རྐྱང་གླེང་ནས་ངོ་མ་སུན་གི> འདི་འདྲ་བའི་སྐད་ཆ་དམར་པོ་རེ་བཤད་ནས་ཁོང་ལ་ཁ་ཏ་སློབ་གསོ་བྱས་རུང་བོང་བུའི་རྣ་བར་གསེར་བླུག་རང་རེད། ཉན་རྒྱུ་བཞག་ནས་འཕག་འཚག་རྒྱག་གི་རེད། ཤར་ཕྱོགས་ཁུག་རྟ་ལབ་དུས་འགྲེལ་བཤད་མི་དགོས་པའི་ཚོད་དུ་སླེབས་པའང་སྲིད་སྐྱོང་ལ་ཉེས་འཛུགས་བྱེད་པའི་དཀའ་དྲིན་ཁོ་ན་ཡིན་ཀྱང་ཁོས་བཀའ་དྲིན་ལ་བསམ་ཤེས་བྱེད་ག་ལ་ཤེས།

སྐུ་ངོ་ཐུབ་བསྟན་ལུང་རིགས་ཀྱིས་ཤར་ཕྱོགས་ཁུག་རྟ་སྤྱི་འཐུས་སུ་ལངས་པའི་རྒྱབ་སྐྱོར་གྱིས་འདི་སྐད་གསུངས་ཏེ་་་་་ཁོ་བ་ནི་༸གོང་ས་ཐམས་ཅད་མཁྱེན་པའི་བཞེད་དགོངས། བོད་དང་བོད་མིའི་ཕུག་ཕན་བཀའི་བླང་དོར་ལམ་སྟོན་ལ། རང་གི་འདི་དང་ཕྱི་མའི་༸སྐྱབས་གནས་ཉག་གཅིག་གི་དད་པ་དག་སྣང་ཙམ་གྱིས་མ་ཡིན་པར། བརྟག་ཅིང་དཔྱད་པས་ཀྱང་བོད་དང་བོད་མིའི་ཕུག་ཕན་དེ་བས་ལྷག་པ་ཞིག་མེད་པར་ངེས་པ་རྙེད་པའི་ཐོག ད་བར་སྤྱི་ཚོགས་ཀྱི་གླེང་སྟེགས་གང་སར། རང་དབང་གིས་འཇིགས་ཞུམ་མེད་པར་མགོན་པོ་གང་གི་བཀའི་ཕེབས་སྒོ་ཁག་ལ་མཐའ་གཅིག་ཏུ་ཉམས་ལེན་གུས་བཀུར་དང་།(སྐུ་ངོའི་མ་རྩོམ་ལ་ལྟ་འདོད་ན་འདི་ནོན)གསུང་དུམ་འདིར་བལྟས་ན་ཤར་ཁུག་གིས་༸རྒྱལ་བའི་བཞེད་དགོངས་རྟོགས་ཚུལ་དེ་གཞི་མེད་སར་ཉེས་འཛུགས་དང་། ཁུངས་མེད་སར་རྫུན་བཤད་པ་དེ་ཡིན་ནམ། ཡང་ན་དར་དམར་གནམ་ལ་འཕྱར་ནས་ངོ་རྒོལ་བྱེད་ཚུལ་དེ་བོད་མིའི་ཕུགས་ཕན་ལ་ངེས་པར་རྙེད་སྟངས་ཡིན། གྲོགས་གྲོགས་པོ་ཚུན་ཆད་སུན་དགོས་པའི་གཞི་མེད་སྐྱོན་འཛུགས་དང་ངོ་ཚ་ཞེལ་ཁྲེལ་མེད་པར་ཧམ་བཤད་དང་ངུ་ཟུག་དེ་དག་འཇིགས་ཞིམ་མེད་ཚུལ་དེ་ཡིན་ནམ། སྐུ་ངོའི་ཟབ་ཅིང་བརླིང་བའི་ཚིག་འབྲི་རེ་རེ་ན་ཤར་ཁུག་གི་བྱེད་ངན་བྱེད་ལུགས་ཀྱི་རྣམ་ཐར་བསྡུས་ཏེ་བྲིས་པ་ཡིན་ནམ་སྙམ་ལ། ད་དུང་སྐུ་ངོས་ཅི་ཞིག་གསུང་གྲབས་ཡོད་དམ།

ང་ཚོས་སྐུ་ངོ་ཐུབ་བསྟན་ལུང་རིགས་ངོ་མ་དེ་མཐོང་འདོད་ལ་ཟམ་གདོང་བླ་མའི་དགེ་ཕྲུག་ཡིན་རབས་དེ་ཉན་འདོད། ཟམ་གདོང་བླ་མ་དང་ཁ་ཁོག་གཉིས་ཀ་འདྲ་ཚུལ་དེ་ལྟ་འདོད། འོན་ཀྱང་ང་ཚོས་དེ་རིང་མཐོང་བའི་སྐུ་ངོ་ཐུབ་བསྟན་ལུང་རིགས་ནི་དེ་སྔར་གྱི་སྐུ་ངོ་ཐུབ་བསྟན་ལུང་རིགས་མ་ཡིན་པར། རྡ་སའི་མྱི་གྲལ་ལ་མི་ཚུད་པའི་མི་ཞིག་མདོ་སྨད་སྤྱི་འཐུས་སུ་རྒྱབ་སྐྱོར་བྱེད་པའི་ཐུབ་བསྟན་ལུང་རིགས་རེད། ཁ་སྤུ་རྫུན་མ་ཞིག་དང་ངོ་གདོང་རྫུན་མ་ཁུར་བའི་ཐུབ་བསྟན་ལུང་རིགས་རེད། 

2015-9-9