དགེ་བཤེས་དགེ་སློང་གི་སྤྱི་ཚོགས་ཞབས་ཞུ།

བླ་ཐོབ་དཔོན་པའི་དབང་ཆ་ལག་ལ་མེད།།

མཁས་པའི་མཚན་སྙན་ཁུར་བའི་གྲགས་པ་མེད།།

འཁོར་ཚོགས་དཔུང་གི་རྒྱབ་རྩ་མི་མངའ་ཡང་།།

གཞན་དོན་ལག་གིས་སྒྲུབ་པའི་བློ་སྟོབས་ཡོད།།

ཁ་ནས་བྱམས་བརྩེ་འདོན་པའི་སྐད་ངག་མེད།།

མཛུབ་མོས་སྙིང་རྗེ་འབྲི་བའི་ལག་རྩལ་མེད།།

བཤད་ན་ཁ་ལྕེ་བདེ་བ་མེད་ན་ཡང་།།

བྱམས་བརྩེ་ལག་ལེན་ཁེལ་བའི་སྙིང་སྟོབས་ཡོད།།

མཐོན་པའི་ཁྲི་ནས་སྙན་པོ་མ་བཤད་པར།།

གཞུང་ལུགས་བར་ནས་འགལ་འདུ་མ་བྲིས་པར།།

དབང་སྐུར་ཕྱག་དབང་གནང་སྲོལ་མེད་ན་ཡང་།།

ཉམ་ཐག་འགྲོ་བ་སྐྱོབས་པའི་སེམས་བཟང་ཡོད།།

དགེ་བཤེས་མཚན་གནས་ལེན་པའི་དོན་གོ་ཆོད།།

ཆོས་གྲྭ་ལོ་མང་འགྲིམས་པའི་དོན་རྟགས་གསལ།།

གཞུང་ལུགས་ཞིབ་ལྟ་བྱས་པའི་དོན་འབྲས་སྨིན།།

ནུས་མེད་འགྲོ་ལ་སྨན་པའི་ཕྱག་ལས་མཛད།།

ས་ཡོམ་གོད་ཆག་ཁྲོད་ཀྱི་ཁང་ཧྲིལ་ན།།

ཁྱིམ་ཐོར་དུད་ཚང་འཇིག་པའི་གཡང་ས་ན།།

མི་ཤི་རོ་ཡི་ཕུང་པོའི་དུར་ས་ན།།

ཁྱེད་ཀྱིས་ཉིན་མཚན་སྦྲེལ་ནས་རོགས་རམ་མཛད།།

བཀྲེས་ལྟོགས་སྡུག་གིས་བཙིར་བའི་མལ་ས་དེར།།

གྲང་འཁྱག་རླུང་ནག་འཚུབ་པའི་ལུང་མདོ་དེར།།

བདག་མེད་བུ་ཕྲུག་ངུ་བའི་རི་ལུང་དེར།།

ཁྱེད་ཀྱིས་རང་ནུས་ཡོད་དགུ་བཏོན་པར་མཛད།།

སེར་བྱེས་ཏྲེ་ཧོར་དགེ་བཤེས་དགེ་སློང་གིས་བ་ཡུལ་ས་འགུལ་ཁྲོད་སྒུད་སྐྱོབས་ཀྱི་ལས་དོན་སྤེལ་ཏེ་རོགས་རམ་ཧ་ཅང་གནང་བ་ཁག་དྲ་ཐོག་ནས་ཡང་ཡང་མཐོང་བས་སེམས་ཚོར་ཆེ་པོས་བྲིས་པའོ།།