Skip to main content

དགའ་ལྡན་ལྔ་མཆོད་ཆེན་མོ།




མཆོད་སྤྲིན་མེ་ཏོག་བསིལ་ཆབ་དྭངས་མས་བྲིས།།
སྣ་ཚོགས་གར་གྱི་ཡིད་འོང་སྙན་གྱིས་གསིར།།
ཀུན་རྟོགས་བློ་ཡི་མཁའ་ན་འཇའ་ཚོན་ཕུབ།།
མཆོད་སྤྲིན་རྒྱ་མཚོས་གང་ཞིག་མཆོད་པར་བཞེངས།།

ཙོང་ཁའི་མཁའ་དབྱིངས་གངས་ཀྱི་འདབ་མ་འཕུར།།
གངས་དཀར་མེ་ཏོག་རྒྱས་པའི་སྤྲིན་རུམ་དུ།།
ལྷ་ཡི་གོས་དཀར་ཀླུབས་པའི་ཁྱེའུ་ཞིག།
བློ་བཟང་གྲགས་པའི་དཔལ་དེ་བདག་གིས་མཆོད།།

དུང་ཟླའི་འཛུམ་པ་གྲོལ་བའི་ར་བ་ན།།
བསིལ་འཁྱགས་རེག་བྱ་བབ་པའི་དགུན་སྲུབས་ལས།།
སྙན་ངག་དབྱངས་ལ་བརྒྱུས་པའི་ཟེར་བརྒྱ་འཕྲོས།།
བློ་བཟང་གྲགས་པའི་དཔལ་དེ་བདག་གིས་མཆོད།།

དབུས་འགྱུར་གོམ་ཁས་བཅད་པའི་རི་ལུང་ནས།།
བཙག་རླུང་འུར་ཀྱིས་སྤུར་བའི་ནམ་འཁྱགས་ཁྲོད།།
མི་འགྱུར་དམ་བཅའ་སྲོག་ལ་རྒྱས་བཏབ་པ།
བློ་བཟང་གྲགས་པའི་དཔལ་དེ་བདག་གིས་མཆོད།།

མི་མངོན་རྒྱ་མཚོའི་ཀློང་དུ་ཐོས་པས་བརྔུབས།།
ཐོས་དོན་གྲུ་ཆེན་སྐྱ་བས་རམ་འདེགས་འོག།
དགོངས་དོན་སྙིང་ལ་སིམས་པའི་དེད་དཔོན་ཆེ།།
བློ་བཟང་གྲགས་པའི་དཔལ་དེ་བདག་གིས་མཆོད།།

མི་ཐེག་བཀའ་ཆེན་དཔུང་གིས་མཐོངས་སུ་བཏེགས།།
གནད་ཀ་ཟབ་མོའི་འདུས་མདོ་སྟོབས་ཀྱིས་བཤགས།།
མདོ་སྔགས་རིན་ཆེན་རྒྱན་གྱི་དར་ཟབ་འཆང་།།
བློ་བཟང་གྲགས་པའི་དཔལ་དེ་བདག་གིས་མཆོད།།

མཁས་པའི་དོ་ཤལ་རྣ་བའི་ལོང་དུ་ཐོགས།།
བཙུན་པའི་གདུབ་བུ་དཔུང་གི་རྒྱན་དུ་བྱས།།
ཞི་དུལ་བག་ཀྱིས་ས་ཆེན་འདོམ་གྱིས་འཇལ།།
བློ་བཟང་གྲགས་པའི་དཔལ་དེ་བདག་གིས་མཆོད།།

རྟེན་འབྱུང་བདུད་རྩི་འགུལ་དུ་མུད་པས་ན།།
སྟོང་པའི་དབྱིངས་ལ་ཚིག་རིས་ཅི་ཡང་བྲིས།།
སྣང་སྟོང་སྒྱུ་མ་ཞོན་པའི་ཚུལ་གྱིས་འགྱིངས།།
བློ་བཟང་གྲགས་པའི་དཔལ་དེ་བདག་གིས་མཆོད།།

ཐོས་སྟོབས་གཡུལ་རལ་བསིགས་པས་གླང་སྤྱོད་བཏུལ།།
སྒོམ་སྟོབས་མཆེར་སྡེར་བགྲོད་པས་ཉོན་མོངས་བཅམ།།
གངས་ཅན་མཁས་དགུའི་གཙུག་ན་དཔལ་གྱིས་ནེམ།།
བློ་བཟང་གྲགས་པའི་དཔལ་དེ་བདག་གིས་མཆོད།།

བསམ་ན་ཡིད་སེམས་རྒྱ་མཚོ་དྲག་ཏུ་འཁྲུགས།།
ཀློག་ན་ཟུངས་ཁྲག་དྲོན་མོ་འཁར་རུ་འཕྱོ།།
རྗེས་དྲན་ཚིག་ལ་བརྐོས་པའི་རི་མོ་འགའ།།
ཡབ་རྗེ་བླ་མ་དགྱེས་པའི་མཆོད་པ་ཡིན།།
༢༠༡༤/༡༢/༣

Comments