དགའ་ལྡན་ཕོ་བྲང་སུའི་རྒྱབ་ལ་ཡོད།


གཟིམ་ཤག་དགའ་ལྡན་ཕོ་བྲང་ནས་གཞུང་ས་དགའ་ཕོ་བྲང་དུ་འགྱུར་མྱོང་ཞིང་། གཞུང་ས་དགའ་ལྡན་ཕོ་བྲང་ནས་དགའ་ལྡན་ཕོ་བྲང་དུ་བསྒྱུར་བའི་བླ་བྲང་འདི་ལོ་རྒྱུས་ཡུན་རིང་ལྡན་པ་ཙམ་མ་ཟད། ཆོས་ཕྱོགས་ཀྱི་ནུས་ཤུགས་ཅན་དང་། ཆབ་སྲིད་ཀྱི་ཆེས་མཐོའི་འགན་དབང་ཡོད་པའི་དུས་སྐབས་རང་བཞིན་ལ་སླེབས་པ་ཞིག་ནས། འགན་དབང་ཆ་ཚང་མང་གཙོའི་ལམ་ནས་འོས་འདེམས་བྱས་པའི་དབུ་ཁྲིད་ལ་རྩིས་སྤྲོད་བྱས་ཏེ། བླ་བྲང་ཞིག་གིས་ཆེས་མཐོའི་ཆབ་སྲིད་ཀྱི་འགན་དབང་ལེན་རྒྱུ་མཚམས་འཇོག་བྱེད་པ་ཞིག་དེབ་ཐེར་ན་འཁོད་ཡོད་ཅིང་བཀོད་རིན་ཡོད་པ་ཞིག་ཀྱང་ཡིན།

རྒྱལ་བ་རིན་པོ་ཆེས་ཆབ་སྲིད་འགན་དབང་གཙང་བཞག་བྱས་རྗེས་སུ། དགའ་ལྡན་ཕོ་བྲང་ཡང་བླ་བྲང་སྒེར་པ་ཞིག་ཏུ་བསྒྱུར་གནང་མཛད་པ་ནས་འགོ་ཚུགས་ཏེ། ཆབ་སྲིད་ལ་ཐེ་ཇུས་དང་། ཁྲིམས་ལུགས་ཀྱི་ཐོག་ནས་ནུས་ལྡན་དབང་ཆ་གང་ཡང་མེད་པ་ཞིག་ཆགས་ཡོད། འོན་ཀྱང་ཆོས་ཕྱོགས་ཀྱི་ཐད་ནས་ནུས་པ་ཧ་ཅང་ཆེ་བ་ནི་བཤད་ཅི་དགོས་ཏེ། རྒྱལ་བ་རིན་པོ་ཆེའི་གཟི་འོད་ཀུན་དུ་འཕྲོ་ན་དགའ་ལྡན་ཕོ་བྲང་གི་ནུས་སྟོབས་ཀྱང་དོན་གྱིས་གནམ་འོག་ཏུ་ཁྱབ་རྒྱུ་ཡིན་ཁར། ཨིན་ཇིའི་རྒྱལ་མོའི་ཕོ་བྲང་དང་འདྲ་བར་སྤྱི་ཚོགས་སུ་ཤུགས་རྐྱེན་དང་དེ་འབྲེལ་གྱི་དབང་ཆ་ཞིག་ཀྱང་རང་བཞིན་དུ་ཡོད།

དགའ་ལྡན་ཕོ་བྲང་ནི་རྒྱལ་བ་རིན་པོ་ཆེའི་བླ་བྲང་ཡིན་པའི་རྒྱུ་མཚན་དེ་ཁོ་ནས། བོད་ཕྱི་ནང་གཉིས་སུ་ཤུགས་རྐྱེན་དང་མི་མང་ཚོས་ཀྱང་དད་གུས་རང་བཞིན་དང་། བརྩི་འཇོག་བླ་མེད་ཀྱིས་གོང་དུ་བཀུར་བཞིན་ཡོད་ཁར། སུས་ཡིས་ཀྱང་ཕོག་ཐུག་དང་མ་གུས་པ། ལན་སློག་ནུས་པ་ཞིག་མ་ཡིན། འདི་དག་ནི་དགའ་ལྡན་ཕོ་བྲང་དང་རྒྱལ་བ་རིན་པོ་ཆེ་གཉིས་པོ་དོན་གཅིག་མིང་གི་རྣམ་གྲངས་སུ་བལྟས་ཤིང་། དགའ་ལྡན་ཕོ་བྲང་གི་བྱ་བྱེད་ལས་གསུམ་ཐམས་ཅད་རྒྱལ་བ་རིན་པོ་ཆེའི་ཐུགས་བཞེད་དང་མཛད་པ་ཡིན་སྙམ་སྐྱེས་པ་ལས་བྱུང་བ་ཞིག་ཡིན། དེ་ལྟ་ནའང་དགའ་ལྡན་ཕོ་བྲང་གིས་རྒྱལ་བ་རིན་པོ་ཆེའི་བཞེད་དགོངས་མ་ཡིན་པའི་ལས་རྩོམ་བཞིན་པ་དང་། རྒྱལ་བ་རིན་པོ་ཆེས་མཁྱེན་རྟོགས་མེད་པའི་ཕྱག་ལས་རེའང་ཡོད་སྐད་འདུག་པ་སྤྱི་ཚོགས་སུ་ལབ་གླེང་དང་དོགས་པ་ཟ་མཁན་ཡོད། རྒྱལ་བ་རིན་པོ་ཆེས་བཅར་འདྲི་ཞིག་ལ་ལན་འདེབས་ཞིག་གནང་འདུག་སྟེ། ''ཐེངས་ཤིག་གྲོགས་པོ་ཞིག་གིས་ངོས་ལ་གློག་འཕྲིན་བརྒྱུད་ཡི་གེ་དེ་ཙམ་མང་པོ་ཕུལ་རུང་ཡིག་ལན་མེད་དོན་ཅི་ཡིན་ཞེས་དྲིས་བྱུང་། འོན་ཀྱང་ངོས་ཀྱིས་རྩ་བ་ནས་ཤེས་རྟོགས་མ་བྱུང་། ངོས་ཀྱི་ལས་ཀ་བྱེད་མཁན་ཚོས་མཚམས་རེ་དེ་འདྲ་དང་ངོས་ཀྱིས་མ་བསམ་པ་རེའང་བྱེད་ཀྱི་ཡོད།'' ཅེས་ཞལ་འཛུམ་དང་བཅས་གསུངས་འདུག དཔེ་མཚོན་འདི་དང་འདྲ་བ་གནད་དོན་རེ་གཉིས་ཐོག་ཏུ། དགའ་ལྡན་ཕོ་བྲང་གི་ཐག་གཅོད་དང་བཀའ་སྩལ། རེ་སྐུལ་སོགས་ལ་རྒྱལ་བ་རིན་པོ་ཆེའི་ཐུགས་བཞེད་ཚུད་ཡོད་མིན་དོགས་པ་ཆེ་ལ། གཅིག་བྱས་ན་རྒྱལ་བ་རིན་པོ་ཆེའི་དགོངས་པ་དང་ཡོངས་སུ་ལྡོག་ཕྱོགས་སུ་སོང་ཡོད་པའི་ལས་དོན་རེའང་ཡོང་དང་འབྱུང་བཞིན་པ་ཡོད་སྲིད། རྒྱུ་རྐྱེན་འདི་འདྲ་ལ་བརྟེན་ནས། གདན་ས་ཁག་ཏུ་དགའ་ལྡན་ཕོ་བྲང་གི་བཀའ་སྩལ་(དམིགས་བསལ་དགེ་བཤེས་ཟེར་བ་སོགས)དང་ལེན་མི་བྱེད་པའི་གནས་ཚུལ་མང་པོ་བྱུང་ཡོད་ཅིང་། དགའ་ལྡན་ཕོ་བྲང་གི་སྐུ་ངོ་ཚོ་ཁྲོས་པའི་ཚུལ་གྱིས་ཁ་པར་ཧྲག་སེ་བཞག་སྟེ་རྣམ་འགྱུར་རྩུབ་པོ་ཐེངས་མང་བསྟན་ཡོད་རུང་། ངོས་ལེན་བྱེད་ཐབས་མ་བྱས་པའི་ལོ་རྒྱུས་རེའང་ལོ་མང་སྔོན་ནས་བྱུང་མྱོང་།

ལོ་རྒྱུས་རྙིང་པའི་གཏིང་མི་སྔོགས་པར། དེ་རིང་གི་དགའ་ལྡན་ཕོ་བྲང་འདི་གནས་ཚད་གང་ཞིག་ལ་ཡོད་པ་དང་། ལས་དོན་ཁག་ཇི་ལྟར་སྤེལ་གྱིན་ཡོད་མེད་ནི། གལ་ཆེན་ནང་གི་དོན་ཆེན་ཡིན་པས། སུ་ཡིས་ཀྱང་དོ་སྣང་སྤྲོད་རིན་ཡོད་པ་ཞིག་རེད། དམིགས་བསལ་ཆབ་སྲིད་ཀྱི་འོས་བསྡུ་དང་འབྲེལ་བའི་གནད་དོན་མང་པོ་ལ། བར་འདུག་དང་ཕྱོགས་བཟུང་གི་རྣམ་འགྱུར་མི་བསྟན་པ། འོས་མི་གང་ཡང་རུང་བ་ཞིག་ལ་དངོས་ཤུགས་བརྒྱུད་གསུམ་ནས་རྒྱབ་སྐྱོར་གྱི་རྣམ་འགྱུར་ཡོད་མིན་ནི། ད་སྐབས་ཧ་ཅང་མིག་བགྲད་དེ་ལྟ་རིན་ཡོད་པ་ཞིག་ཡིན། ང་ཚོས་དགའ་ལྡན་ཕོ་བྲང་གིས། རྒྱལ་བ་རིན་པོ་ཆེའི་དགོངས་ཡངས་དང་གཟིགས་རྒྱ། ཁོང་གི་མཛད་པ་ཇི་བཞིན་ལག་བསྟར་དང་ལངས་ཕྱོགས་བཟུང་བཞིན་ཡོད་པའི་རེ་བ་དང་གསོལ་འདེབས་བྱེད་བཞིན་ཡོད། འདི་ནི་རེ་བ་བཟང་ས་ནས་བརྒྱབ་པ་གཅིག་པོ་མིན་པར། རྒྱལ་བ་རིན་པོ་ཆེའི་མཚན་གནས་རྗེས་འབྲེལ་ཡོད་པའི་དགའ་ལྡན་ཕོ་བྲང་དེ། དོན་དམ་གྱི་ནུས་ཤུགས་ལྡན་པའི་ཕྱོགས་སུ་སྐྱོད་ན་སྙམ་པའི་སྐུལ་སློང་བཟང་པོ་ཞིག་ཁུར་བཞིན་ཡོད།

སྐུ་ངོ་སྤེན་པ་ཚེ་རིང་གིས་ད་ཐེངས་འོས་བསྡུ་དྲིལ་བསྒྲགས་ཀྱི་སྐོར་སྐྱོད་འགོ་ཚུགས་རྗེས། གཏམ་བཤད་རེ་འགའ་དགའ་ལྡན་ཕོ་བྲང་དང་འབྲེལ་ཡོད་ཅིང་། སྐུ་ངོས་ཤེས་རྟོགས་རེ་འགའ་དགའ་ལྡན་ཕོ་བྲང་གིས་ཤུབ་ཤུབ་ཏུ་སྐུ་ངའི་རྣ་ཁུང་ན་འཕངས་ཡོད་པར་དོགས་པ་ཟ་མཁན་ཡང་ཉུང་ཉུང་མིན། དགའ་ལྡན་ཕོ་བྲང་གིས་ཕྱོགས་གཅིག་ནས་དུས་དབང་ཕྱིར་འགྱང་དགོས་པའི་གནད་དོན་ཁ་གསལ་བཀོད་དེ་ཡོངས་ཁྱབ་གསལ་བསྒྲགས་གནང་ཡོད་ལ། ཕྱོགས་གཞན་ཞིག་ནས་དུས་དབང་ཕྱིར་འགྱང་སྐོར་གྱི་གནད་དོན་ཆ་ཚང་སྐུ་ངོའི་རྣ་ཁུང་དུ་བླུགས་དོན་ཅི་ཡིན་ནམ་སྙམ་བཞིན་ཡོད། མགོ་བོ་རྨོངས་སུ་བཅུག་པའི་གནད་དོན་འདི་དགའ་ལྡན་ཕོ་བྲང་གིས་གནང་མེད་ཚེ། སྐུ་ངོས་ཟླ་ཚེས་དང་བཅས་པ་ཤེས་རྟོགས་ཡོད་མི་སྲིད་ལ། དེ་བཞིན་གསུང་སྐད་ཆེན་པོས་བཤད་ཕོད་པ་ཞིག་མིན། དུས་དབང་ཕྱིར་འགྱང་གནང་བའི་བཀའ་ཤག་གི་ཡོངས་ཁྱབ་གསལ་བསྒྲགས་(http://www.khabdha.org/?p=74901 ) དེ་2015-8-31ཞོགས་པའི་ཆུ་ཚོད11ཙམ་ལ་སྤེལ་བ་ཞིག་ཡིན་རུང་། ཤར་ཕྱོགས་ཁུག་རྟས་2015-8-31ཞོགས་པའི་ཆུ་ཚོད7པ་ཡོལ་ཙམ་ལ་ཁ་བརྡའི་ཐོག་ཏུ་དུས་དབང་ཕྱིར་འགྱང་བྱས་ཚུལ་དང་དེ་ནི་སྲིད་སྐྱོང་གིས་གནང་སྟངས་ལ་བརྟེན་ནས་བྱུང་བ་ཡིན་ཚུལ་འཁོད་པའི་རྩོམ་ཡིག་( http://www.khabdha.org/?p=74874 )ཐུང་ཐུང་ཞིག་སྤེལ་ཡོད། ཁོས་ཐག་ཆོད་པས་སྲིད་སྐྱོང་གི་བྱས་ཉེས་ཡུལ་ཚུལ་གླེང་འདུག ཤར་ཕྱོགས་ཁུག་རྟས་དུས་དབང་ཕྱིར་འགྱང་སྐོར་དེ་སྔོན་ཚུད་ནས་གོ་ཡོད་པ་གཙོ་བོ་མ་ཡིན་པར། སྔོན་ཚུད་ནས་སུའི་ཁ་ནས་གོ་ཡོད་མིན་ནི་ང་ཚོས་ཤེས་འདོད་ཆེ་ཤོས་དེ་རེད། ཤར་ཁུག་གིས་ཐག་ཆོད་པས་བྲིས་པ་དེ་དང་། སྐུ་ངོས་སྤོབས་པ་ཆེན་པོས་བཤད་པ་གཉིས་ཆུ་ལ་ཆུ་བཞག་པ་བཞིན་དུ་སོང་འདུག་པས། ངས་བསམ་ན་ཤར་ཁུག་གི་རྣ་ལམ་དུ་སྐུ་ངོས་བླུགས་ཡོད་ཅིང་། སྐུ་ངོའི་སྙན་དུ་དགའ་ལྡན་ཕོ་བྲང་གིས་གསོལ་ཡོད་པ་འདུག་ཅེས་ཡང་ནས་ཡང་དུ་དྲན་བཞིན་ཡོད།

གལ་ཏེ་དུས་དབང་ཕྱིར་འགྱང་སྐོར་དེ་སྐུ་ངོས་བཤད་པ་ལྟར་ཡིན་ཚེ། དགའ་ལྡན་ཕོ་བྲང་གི་ཡོངས་ཁྱབ་གསལ་བསྒྲགས་ཀྱང་རྫུན་བཟོ་འཁྲབ་སྟོན་ཞིག་ཆགས་ཡོད། མུ་མཐུད་དེ་ཡོངས་ཁྱབ་གསལ་བསྒྲགས་མཇུག་མནན་བྱས་ཏེ། ཞེན་སྐུལ་གསལ་བསྒྲགས་ཞིག་སྤེལ་བའམ། ཡོངས་ཁྱབ་གསལ་བསྒྲགས་རྫུན་གཏམ་ཡིན་ཚུལ་འཁོད་པའི་དགོངས་སེལ་གསལ་བསྒྲགས་ཞིག་སྤེལ་མིན་ནི་འགག་རྩ་ལ་ཐུག་ཡོད། གལ་ཏེ་གསལ་བསྒྲགས་ཞིག་སྤེལ་ན་དེ་ཉིན་ནས་ང་ཚོས་དགའ་ལྡན་ཕོ་བྲང་སུ་ཞིག་གི་རྒྱབ་ལ་ཡོད་མིན་གསལ་པོ་གསལ་རྐྱང་ཞིག་ཤེས་རྟོགས་ཐུབ་རྒྱུ་རེད། མ་གཞི་དགའ་ལྡན་ཕོ་བྲང་གིས། རྒྱལ་བ་རིན་པོ་ཆེས་དུས་དབང་ཕྱིར་འགྱང་སྐོར་གྱི་གསུང་བཤད་དང་། དགའ་ལྡན་ཕོ་བྲང་རང་གིས་སྤེལ་བའི་ཡོངས་ཁྱབ་གསལ་བསྒྲགས་རྩིས་མེད་དུ་གཏོང་ཤེས་ཐབས་མེད་པ་ཞིག་ཡིན་རུང་། གལ་སྲིད་སྡིག་པ་མིག་བཙུམ་དང་རང་གི་ཡོངས་ཁྱབ་གསལ་བསྒྲགས་རྩིས་མེད་དུ་བཏང་དེ་སྐུ་ངོའི་བཤད་པ་ཇི་བཞིན་ཡིན་ཚུལ་གསུངས་ན་ནི། སྐུ་ངོའི་རྒྱབ་ལ་བཞེངས་ཏེ་མི་མངོན་པའི་འོས་ཤོག་ཐོབ་ཐབས་ཀྱི་ཆབ་སྲིད་ཀྱི་ཟློས་གར་ཞིག་འཁྲབ་བཞིན་ཡོད་པ་སྨོས་མེད་རེད། དེ་ཉིན་ནས་ང་ཚོས་དགའ་ལྡན་ཕོ་བྲང་དང་རྒྱལ་བ་རིན་པོ་ཆེ་གཉིས་པོ་དོན་གཅིག་མིང་གི་རྣམ་གྲངས་སུ་འཛིན་བཞིན་པ་ནོར་འཁྲུལ་ཞིག་ཡིན་པར་ངོས་འཛིན་ཐུབ་དགོས་ལ། མཐའ་ན་སྐུ་ངོས་བཤད་ཕོད་པ་བཞིན་དགའ་ལྡན་ཕོ་བྲང་གིས་ཀྱང་རྒྱལ་བ་རིན་པོ་ཆེའི་གསུང་བཤད་ལ་དགོངས་པ་བཀྲལ་ནས་ཕར་འཐེན་ཚུར་བྱེད་ཕོད་པའི་བློ་ཁོག་ཅིག་ཡོད་པ་མཐོང་རྒྱུ་རེད། རྒྱལ་བ་རིན་པོ་ཆེའི་ཐུགས་བཞེད་དང་ཡོངས་སུ་རྒྱབ་འགལ་གྱིས་བྱ་བྱེད་ལས་གསུམ་སྤེལ་བཞིན་ཡོད་པའི་དོགས་གནད་དེ་ཡང་ཡོངས་སུ་གསལ་པོ་ཆགས་ཡོད། སྐབས་དེ་ནས་བཟུང་དགའ་ལྡན་ཕོ་བྲང་གི་བཀའ་སྩལ་ལ་སུས་ཡིད་ཆེས་བྱེད་སྲིད་དམ། ཁྱེད་ཀྱིས་ད་དུང་ཡིད་ཆེས་བྱེད་རྩིས་ཡོད་དམ། ངས་བསམ་ན་ཁྱེད་ཀྱིས་གཏན་ནས་ཡིད་ཆེས་བྱ་ཐུབ་རྒྱུ་མ་རེད།

2016-2-1
Powered by Blogger.