སྲོང་བཙན་ཟིན་བྲིས་ལེགས་བཅོས་ཐུབ་པ།

བོད་ཡིག་གི་དྲ་ཚིགས་དང་ཟིན་བྲིས་གཉེེར་མཁན་ཇེ་མང་ནས་ཇེ་མང་དུ་འཕེལ་བཞིན་པའི་དུས་སྐབས་འདིར་<སྲོང་བཙན་ཟིན་བྲིས།>ཀྱི་པར་གཞི་ལ་བཟོ་བཅོས་དང་མཛེས་རྩལ་སྣོན་མ་བྱས་ནས་ཟིན་བྲིས་ཀྱི་ཁ་དོག་མ་ཡལ་བའི་སྒེར་གཉེར་ཟིན་བྲིས་ཞིག་གི་འཕོ་འགྱུར་གྱི་ལམ་སྣེ་གསར་པ་ཞིག་ཏུ་གོམ་པ་སྤོས་ཡོད།

སྤྱི་ན་བོད་ཡིག་དྲ་ཚིགས་ཁག་ལྟ་ཀློག་བྱེད་མཁན་ཉུང་ཉུང་ཡིན་པས་བདག་གི་ཟིན་བྲིས་ལྟ་བུ་ཞིག་ལ་མིག་ཤར་ཙམ་བྱེད་མཁན་ཡང་ཧ་ཅང་དཀོན་པོ་ཡིན་ངེས་མོད། རེད་དེ་རང་གིས་ཞར་ཞོར་དུ་རྩོམ་ཡིག་ཐར་ཐོར་རེ་བྲིས་ཤིང་བསམ་ཚུལ་ཡིག་ཐོག་བཀོད་པའི་སྤྲོ་སྣང་རེ་ཡོང་དུས་ཡིག་འབྲི་འགའ་ཤོག་ཐོག་ཏུ་ཕབསནས་ཉར་ཚགས་རེ་བྱས་ཀྱང་མང་པོ་ཞིག་བོར་བརླག་དང་ཆུད་ཟོས་སུ་སོང་དང་འགྲོ་བཞིན་འདུག་སྟབས་ཉར་ཚགས་བྱེད་ས་ཞིག་བྱུང་ན་ཕན་ཐོགས་ཕྲན་བུ་ཡོང་ངེས་དང་། འདི་ནས་མར་རྩིས་པའི་རང་ཉིད་ལོ་རྒན་བདུན་ཅུ་ལྷག་ཙམ་སྟེ་ཕྱི་ལོ 2060 ལོར་ད་ལོ་སང་ལོའི་རྩོམ་ཉོག་དེ་དག་ལ་ལྟ་རྒྱུ་རེ་བྱུང་ན་ཆུང་དུས་དྲོ་སྐྱིད་ཀྱི་འཚོ་བ་དང་སྐྱོ་སྡུག་གི་བརྒྱུད་རིམ་ལ་དྲན་གསོ་རེ་ཡོང་ངེས་སྙམ་ནས་ཟིན་བྲིས་རེ་གཉེར་ཁུལ་བྱས་པ་ཡིན། 

<སྲོང་བཙན་ཟིན་བྲིས།>ནི་ཟིན་བྲིས་ཀྱི་ཁ་དོག་ལས་དྲ་ཚིགས་ཀྱི་རྣམ་པར་སྒྱུར་མེད་སྟབས་ལྟ་ཀློག་བདེ་བ་དང་ངོས་གཙང་མའི་ཁྱད་ཆོས་ཤིག་ཡོད། <ཆ་འཕྲིན།> <ཆེད་རྩོམ།> <འབོལ་རྩོམ།> <རྩོམ་བཏུས།> <སྲོང་བཙན་བོད་ཡིག> <གྲོགས་པའི་ཚོམས།> བཅས་ཚན་པ་དྲུག་ཏུ་ཕྱེས་ཡོད་ལ། <རྩོམ་བཏུས།>་ནང་དུ་གཞན་གྱི་རྩོམ་ཡིག་ལེགས་པོ་བརྒྱུད་འགོད་དང་། <གྲོགས་པའི་ཚོམས།>སུ་གུས་ཀྱི་དྲ་གྲོགས་བློ་མཐུན་མི་ཉུང་བ་ཞིག་གི་རྩོམ་ཡིག་ཉར་ཚགས་བྱེད་ས་ཞིག་ཏུ་འགྱུར་འདོད་ཀྱིས་ས་མིང་ཞིག་བཞག་ཡོད།

གུས་པས་སྔ་ལོ་བཟུང་རང་གིས་ABCDཐེབས་ཆག་ཤེས་པ་དེས་ཕོ་ཚོད་ཀྱིས་Blogg དང Wordpress གཉིས་ཀའི་ཐོག་ཏུ་ཚོད་ལྟའི་ཚུལ་དུ་ཟིན་བྲིས་གཉེར་ནས་ལོ་འཁོར་གཅིག་ཙམ་སོང་ལ་དེའི་རིང་དུ་ཉམས་མྱོང་རིམ་གསག་བྱས་ཏེ་ཟིན་བྲིས་ཀྱི་ཕྱོགས་གང་ཐད་ནས་འཐུས་ཚང་བྱེད་ཐུབ་ཙམ་བྱུང་། འོན་ཀྱང་ད་རུང་མི་འདང་ས་མང་བས་ལེགས་བཅོས་བྱེད་འདོད་ཤིན་ཏུ་ཆེ་ནའང་བཟོ་བཅོས་ལག་རྩལ་གྱི་མི་འདང་བ་དང་རང་གིས་ཤེས་པའི་ABCDདེ་ཙམ་གྱིས་ཕན་ཐོགས་ཡོང་དཀའ་བ་འདུག ལྷག་པར་དུ་HTMLནང་དུ་ལས་ཀ་དེ་དག་ནི་ཧ་ཅང་རྒྱ་ཆེན་པོ་དང་རྙོག་འཛིང་ཅན་ཞིག་འདུག་སྟབས་ཉམས་མྱོང་ཡག་པོ་རེ་མེད་ན་ཨིན་ཡིག་ཤེས་པས་ཅི་ཡང་མི་ཕན་པ་འདུག་པས་བདག་གི་གྲོགས་པོ་བོད་ཀྱི་དཔེ་མཛོད་ཁང་གི་གློག་ཀླད་ཁྱད་མཁས་དང་དྲ་ཚིགས་ཇུས་འགོད་པ་བསོད་ནམས་ཟླ་བ་ལ་རེ་ཞུའི་སྙན་ཚ་བཟོ་དགོས་བྱུང་། གྲོགས་པོ་ཁོང་གིས་དཀའ་ལས་དང་དུས་ཚོད་ནར་བཏང་བྱས་ནས་ཇུས་འགོད་དང་པར་གཞི་བཟོ་བཅོས་ལེགས་པོར་གནང་བྱུང་བས་ཁོང་ལ་སྙིང་ཐག་པ་ནས་བཀའ་དྲིན་ཆེ་ཞུ་བ་ཡིན། 

ད་རུང་ཡར་རྒྱས་དང་འཐུས་ཚང་གཏོང་རྒྱུ་ཡོད་ཀྱང་(ཇོ་ལགས་ཀུན་དགའ་དོན་འགྲུབ་)མེད་ན་(ཨ་ཕོ་རིན་མེད་)རྐྱང་རྐྱང་གིས་ཡོང་ཐབས་མི་འདུག་པས་དེ་ཙམ་ལ་ཡིད་ཁ་གང་ནས་སྡོད་རྒྱུ་ལས་ཐབས་གཞན་མ་མཆིས།

སྲོང་བཙན་ཟིན་བྲིས་གཙོ་གཉེར་བ་སྲོང་བཙན་གྱིས་དགའ་བསུའི་ཚུལ་དུ་སྤེལ། ཕྱི་ལོ 2014-9-26ཉིན།

དགེ་ལུགས་རྒྱུགས་སྤྲོད་ཀྱི་སྐོར་ཡང་བསྐྱར་གླེང་བ།

                                        ཀླུ་སྐལ་རྒྱམ།

  2014-8-31--ཉིན་ནས་བཟུང་མཉམ་མེད་རི་བོ་དགེ་ལྡན་པའི་གདན་ས་སྤྱིའི་རྒྱུགས་སྤྲོད་དངོས་སུ་མགོ་བཙུགས་བྱས་སོང་། ཉིན་མ་འདི་ཚོ་ནི་རྒྱུགས་སྤྲོད་པ་རྣམས་ཀྱིས་ཉིན་མོའི་ཟས་ཀྱི་བྲོ་བ་མི་ཚོར་ཞིང་།  མཚན་མོར་གཉིད་ཀྱི་དུངས་ཀ་ཡོངས་སུ་བྲལ་བའི་དུས་སྐབས་ཧ་ཅང་གི་ཛ་དྲག་པོ་ཞིག་རེད། དེ་ཡང་ལོས་ཡིན་ཏེ་རྒྱུགས་སྤྲོད་སྣ་གཅིག་གི་གཞུང་ཚན་ལའང་ཧ་ལམ་པོ་ཏི་གཅིག་རེ་ཡོད་པས།  སང་ཉིན་ཁྱོད་ཀྱིས་རྒྱུགས་སྤྲོད་གང་ཞིག་གཏོང་བ་དེར་དེ་རིང་ཁྱོད་ཀྱིས་སྔོན་ཆད་བལྟས་ཟིན་པ་རྣམས་ལ་དྲན་གསོ་དང་ཕྱོགས་བསྡོམས་ཤིག་བྱེད་དགོས་ལ།  དེ་ལ་དགོས་པ་ནི་ཁུ་སིམ་སིམ་གྱི་ཆུ་ཚོད་ཁོ་ན་རེད།

གསེར་ཕྲེང་ལྟ་བུའི་གཞུང་ཆེན་པོ་ཞིག་ལ་ཉིན་རེ་གཉིས་ནང་ངེས་ཆ་གཏོང་རྒྱུ་ཧ་ཅང་དཀའ་ནའང་།    ལོ་གཅིག་གི་གྲྭ་སྒྲིག་དང་སྦྱོང་བརྡར་ལས་ས་བཅད་རེ་རེའི་མགོར་སླེབས་དུས་ས་ཁོངས་དེའི་བརྗོད་དོན་རྣམས་ཧ་ལམ་སེམས་སུ་འཆར་ཐུབ་པ་ལྟ་བུ་ཡིན།  དེའི་ཕྱིར་རྒྱུགས་སྤྲོད་འདིར་ཞུགས་པའི་མི་ཞིག་ཡིན་ན་ལོ་གཅིག་གི་རིང་དུ་ཁྱོད་ལ་སོས་དལ་དལ་གྱི་རྣམ་གཡེང་གི་ཆུ་ཚོད་རིང་བོ་ཞིག་མེད་ཅེས་བཤད་ཆོག   དེ་ལྟར་ལོ་གཅིག་གི་རིང་ཉིན་མཚན་ཁོར་མོ་ཡུག་ཏུ་ནངས་སྔ་ལངས་དང་དགོང་ཕྱི་ཉལ་བྱས་ཏེ་དཀའ་སྡུག་བསྟེན་དྲག་པ་དང་།  མཚན་རེར་ཆུ་ཚོད་བཞིའམ་ལྔ་ཙམ་ལས་གཉིད་མ་ཁུག་པའི་དབང་གིས་ལུས་ལ་ན་ཚ་འདྲ་མིན་བྱུང་སྟེ་རྒྱུགས་སྤྲོད་ཕྱིར་འཐེན་བྱེད་མཁན་ཡང་ལོ་རེར་སུམ་ཅུ་ནས་བཞི་བཅུ་ཙམ་ལོ་རྟག་པར་འབྱུང་གི་ཡོད་ལ།   གདན་སའི་ཁྲོད་འདི་ནི་ཧ་ཅང་གི་རྒྱུན་ལྡན་ཞིག་ཏུའང་གྱུར་ཡོད།

གདན་ས་སོ་སོར་ལོ་ངོ་བཅུ་བདུན་རིང་སོ་སོའི་ཡིག་ཆའི་སློབ་ཚན་གཙོ་བོར་བྱས་ཏེ་སྦྱངས་པ་རྣམས་ཀྱིས་ལྡེ་མིག་བྱས་ཏེ།   སྐབས་འདིར་ནི་རྗེ་ཙོང་ཁ་བ་ཡབ་སྲས་དང་དཔལ་ནལེནྡྲའི་པཎ་གྲུབ་དག་གི་གསུང་ལ་ཁུངས་གཏུགས་ཏེ་གཞུང་པོ་ཏི་ལྔའི་རྩ་བ་ལ་རྒྱ་བོད་ཀྱི་འགྲེལ་བ་འགྲེལ་བཤད་མི་འདྲ་བ་དུ་མའི་སྟེང་ནས་ལོ་དྲུག་གི་རིང་དུ་བསྐོར་བ་ཐེངས་གསུམ་བྱེད་དགོས་པ་ཡིན།  གྲྭ་སའི་དཔེ་ཁྲིད་ཀྱི་ཞལ་རྒྱུན་དུ་འགྲེལ་བ་རྩ་བའི་སྟེང་དུ་བླངས།   རྩ་བ་བློ་ཐོག་ཏུ་བླངས།   ཞེས་གསུངས་པ་ལྟར་རྩ་བ་གང་ཞིག་ཡིད་སྐྱོར་བྱེད་དུས་དེའི་འགྲེལ་བ་འགྲེལ་རྣམས་ཀྱིས་བཤད་སྲོལ་མི་འདྲ་བ་རྣམས་རྩ་བ་རང་གི་སྟེང་ནས་མ་འདྲེས་པར་དྲན་གསོ་ཐུབ་པ་ཞིག་དགོས་ལ།  ནང་བསྟན་སློབ་སྦྱོང་གི་རིམ་པ་འདི་རིག་གནས་གཞན་གྱི་སློབ་སྦྱོང་གི་རིམ་པ་དང་མི་འདྲ་བ་ནི།  ཤེས་པ་ཙམ་གྱིས་མི་ཆོག་པར་ཐོས་བསམ་སྒོམ་གསུམ་གྱི་བསླབ་པའི་རིམ་པ་རིམ་གྱིས་བརྒྱུད་དགོས་པ་འདི་ཡིན་ལ།   དགེ་ལུགས་རྒྱུགས་སྤྲོད་ཀྱི་གོ་རིམ་འདིས་ནི་ཁྱེད་རང་རིམ་པ་དེ་ལས་ཁྲིད་ཀྱིན་ཡོད།

དེ་ཡང་བཀའ་རམས་འཛིན་གྲྭ་གཉིས་དང་སློབ་དཔོན་འཛིན་གྲྭ་གཉིས། ལྷ་རམས་འཛིན་གྲྭ་གཉིས་བཅས་ལ་གདན་ས་གསུམ་དང་སྟག་ཚ་རྭ་སྟོད་པ་བཀྲ་ཤིས་ལྷུན་པོ་བཅས་ཀྱི་རྒྱུགས་སྤྲོད་བྱེད་པོ་དགེ་འདུན་པ་དྲུག་བརྒྱ་ལྷག་ཅིག་ཡོད་ལ།  རང་ལ་རྒྱུགས་སྤྲོད་ཀྱི་ཆ་རྐྱེན་ཚང་ན་ངེས་པར་དུ་དགེ་ལུགས་པའི་ཁྲོད་ནས་ཡིན་མི་དགོས་ལ། ཐ་ན་དགེ་འདུན་པ་ཡང་ཡིན་མི་དགོས་པར་ཆོས་བརྒྱུད་དང་སྐྱ་སེར་ལ་དབྱེ་བ་མེད་པར་སུ་ཡིན་ཡང་ཞུགས་ཆོག་པ་ཞིག་ཡིན།  དེ་ཡང་བཀའ་རམས་འཛིན་གྲྭ་གཉིས་ལ་ཕར་ཕྱིན་ལ་ཟུར་བཀོད་དང་བཅས་པས་གཉིས་སུ་ཕྱེ་བས་བཀའ་པོད་ལྔ་དང་།  རིག་གནས།  ཆོས་འབྱུང་།  ལོ་རྒྱུས་བཅས་ཀྱི་འབྲི་རྒྱུགས་སྣ་དགུ་དང་། རྩོད་རྒྱུགས་སྣ་ལྔ་བཅས་བསྡོམས་པས་ལོ་རེར་རྒྱུགས་སྤྲོད་སྣ་ཁ་བཅུ་བཞི་དང་།   སློབ་དཔོན་འཛིན་གྲྭ་གཉིས་ལ་རིག་གནས་ཀྱི་སྐོར་མེད་པས་འབྲི་རྒྱུགས་དྲུག་དང་རྩོད་རྒྱུགས་ལྔ་བཅས་རྒྱུགས་སྤྲོད་སྣ་བཅུ་གཅིག་དང་།  ལྷ་རམས་འཛིན་གྲྭ་གཉིས་ལ་འབྲི་རྒྱུགས་མེད་པས་རྩོད་རྒྱུགས་སྣ་ཁ་ལྔ་རེ་བཅས་ཡིན་ལ།  འཛིན་གྲྭ་རེའི་ལོ་དང་བོར་པོད་ལྔའི་སྟོད་ཆ་དང་ལོ་གཉིས་པར་སྨད་ཆ།  དེ་ཡང་གཞུང་སོ་སོ་སྟེ་བཀའ་རམས་སྐབས་སུ་ཕར་ཕྱིན་ལྟ་བུར་མཚོན་ན་རྣམ་བཤད་སྙིང་བོ་རྒྱན་དང་།  སློབ་དཔོན་སྐབས་སུ་གསེར་ཕྲེང་སྟོོད་སྨད་བྱས་ཏེ་སློབ་ཚན་དུ་བསྒོས་ཡོད།  ལྷ་རམས་གཉིས་ལ་ནི་སྔར་གྱི་གཞུང་ཆ་ཚང་ལས་ཁྱབ་མགོ་ཡོང་བས་སྟོད་སྨད་ཙམ་ལས་གཞུང་ངེས་བཟུང་དམིགས་བསལ་མེད།   འཛིན་གྲྭ་གང་ཡིན་ཡང་རྟགས་གསལ་རང་མོས་ཀྱིས་གཏོང་ཆོག་པ་མིན་པར་རྒྱུགས་ཞིབ་པའི་མདུན་དུ་ཤོག་དྲིལ་བྱས་ཏེ་ཁྱབ་མགོ་རྣམས་བཞག་ཡོད་ལ།  དེ་ལས་གཅིག་བླངས་ཏེ་ཤོག་དྲིལ་དེར་གདེམས་གསེས་བྱེད་ཆོག་པའི་རྟགས་གསལ་གྱི་མགོ་གསུམ་ཡོད་པ་ལས་གཅིག་ལ་བགྲོ་གླེང་བྱེད་དགོས།  ཁྱབ་མགོ་རང་གི་ལག་ཏུ་བླངས་པ་ནས་ཁྱོད་ལ་སྐར་མ་ལྔའི་རིང་བསམ་བློ་གཏོང་བའི་གོ་སྐབས་ཡོད།  དུས་ཡུན་བཀའ་རམས་དང་སློབ་དཔོན་གཉིས་སྐར་མ་བཅོ་ལྔ་དང་ལྷ་རམས་ཆུ་ཚོད་ཕྱེད་ཀའི་རིང་ཡིན།   དེ་ཡང་རང་གིས་མགོ་འཛུགས་ས་དེ་ལས་མ་བཏང་བར་རྟགས་གསལ་གཞན་ལ་འཕྲོས་ན་རྒྱུགས་ཞིབ་པས་འགོག་ངེས་ལ་བརྒྱ་ཆའི་སྐར་མ་ཡང་གཅོག་ངེས་པ་ཡིན།

མ་གཞི་རྒྱུགས་སྤྲོད་འདིར་ཞུགས་པའི་མི་རྣམས་ནི་གདན་ས་སོར་ཤེས་ཡོན་དང་ཀུན་སྤྱོད་ཀྱི་སློབ་སྦྱོང་སྔོན་དུ་སོང་བ་ཤ་སྟག་ཡིན་པས་སྒྲིག་འགལ་གྱི་རིགས་ནི་ཧ་ལམ་མི་སྲིད་པ་ལྟ་བུ་ཞིག་ཡིན་ལ།   འབྲི་རྒྱུགས་ཀྱི་སྐབས་སུ་འདུ་ཁང་དུ་རྒྱུགས་སྤྲོད་པས་བཀང་ཡོད་ནའང་ཤོག་བུའི་ཧྲོག་སྒྲ་ཙམ་ལས་ཕྱི་ལོགས་ནས་ཉན་ན་ཧ་ལམ་འདུ་ཁང་དུ་མི་ཞིག་ཨེ་ཡོད་དམ་སྙམ་པའི་ཐེ་ཚོམ་སྐྱེ་སྲིད།   དེ་ལྟར་རྒྱུགས་སྤྲོད་ཡོངས་སུ་རྫོགས་ཏེ་ཟླ་གཅིག་དང་ཕྱེད་ཀའི་རྗེས་སུ་དུས་མཚུངས་སུ་རྒྱུགས་སྤྲོད་ཀྱི་གྲུབ་འབྲས་རྣམས་གདན་ས་སོ་སོར་གསལ་བསྒྲགས་བྱེད་ངེས་རེད་ལ།དགེ་ལུགས་པའི་དྲ་རྒྱའི་སྟེང་དུའང་ཐོན་ཡོང་།

བཀའ་རམས་ལས་ཁྱོད་རང་གཞུང་ཚན་གང་རུང་གཅིག་ལ་སྐར་མ་ཕྱེད་ཀས་རྒྱུགས་ཚད་མ་ལོངས་ན་རྒྱུན་ལས་ཀྱིས་ཁ་སྣོན་བྱེད་པའི་ཐོབ་ཐང་ཡོད་ལ།  གཞུང་གཅིག་ལ་སྐར་མ་གཅིག་གིས་མ་ལོངས་ལ་ཁྱོད་ལ་བསྐྱར་རྒྱུགས་གཏོང་རྒྱུའི་ཐོབ་ཐང་ཡང་ཡོད།   སློབ་དཔོན་གྱི་སྐབས་སུ་སྐར་མ་གཅིག་གི་མ་ལོངས་ན་ཁྱེད་ཀྱི་དྲིས་ལན་ལ་བསྐྱར་ཞིབ་བྱེད་པའི་ཐོབ་ཐང་ཡོད་ཀྱང་ཁྱོད་ལ་བསྐྱར་རྒྱུགས་ཀྱི་གོ་སྐབས་མེད།   དེ་ལའང་ཐོག་མར་གྲྭ་ཚང་དྲུག་གི་མཁན་པོ་རྣམས་ཀྱིས་མང་མོས་ཀྱིས་འོས་ཤོག་ཐོབ་དགོས།  ལྷ་རམས་ཀྱི་སྐབས་སུ་ནི་བསྐྱར་རྒྱུགས་དང་བསྐྱར་ཞིབ་གཉིས་ཀ་མེད།      འཛིན་གྲྭ་འོག་མའི་སྐབས་སུ་འཛིན་གྲྭ་གཅིག་ཏུ་ཐེངས་གཉིས་ལ་རྒྱུགས་མ་འཕྲོད་ན་ཁྱོད་ཀྱི་རྒྱུགས་སྤྲོད་ཀྱི་གོ་སྐབས་ཡོངས་སུ་ཤོར་བ་ཡིན།

དེ་ལྟར་ཐབས་ལམ་གྱི་སྒོ་མོ་རིམ་གྱིས་དོག་ཏུ་བཏང་སྟེ་གདན་ས་ཁག་གིས་ཁྱེད་ལ་ཆེས་མཐོ་བའི་ཤེས་ཡོན་གྱི་སློབ་སྦྱོང་ཞིག་སྤྲོད་ཀྱིན་ཡོད་ལ།  འདི་ཕྱི་གཉིས་ཕན་གྱི་མི་ཚེའི་ལམ་ཁ་ཞིག་ཀྱང་སྟོན་གྱིན་ཡོད།

          2014-9-3--མཚན་མོ།

སྟོད་འགག་སེར་བོ་ཞིག་གི་བརྒྱུད་རིམ།

—•ཀླུ་སྐལ་རྒྱམ།

         

 

སྟོད་འགག་སེར་བོ།  ཞྭ་མོ་སེར་བོ། ད་དུང་ཆོས་གོས་སེར་བོ་བཅས་གྱོན་པའི་ལྷ་རམས་པའི་དགེ་བཤེས་ལྔ་བོ་འདིས་གྲྭ་སའི་དཀྱེལ་ཡངས་ཀྱི་རྣམ་པ་གསར་བའི་སློབ་གསོའི་ལམ་ལུགས་ཤིག་མཚོན་གྱི་ཡོད་ལ།  འདིའི་ཁྲོད་དུ་ས་སྐྱ་དང་རྙིང་མ། བཀའ་བརྒྱུད་དང་དགེ་ལུགས། གཡུང་དྲུང་བོན་དང་བཅས་པ་འདུས་ཡོད། ཁོང་ཚོའི་ཐོད་པའི་རྒས་གཉེར་གྱི་ཁྲོད་དུ་དཀའ་སྡུག་གི་ལོ་ཟླ་རིང་མོ་ཞིག་གི་མི་ཚེའི་ལོ་རྒྱུས་སྦས་ཡོད་ལ། ཁོང་ཚོའི་འཛུམ་མདངས་ཀྱི་ངོས་སུ་ཕྲག་ལ་ལྕི་བའི་འགན་འཁྲི་ཅི་ཞིག་དང་དུ་ལེན་རྒྱུར་སྤྲོ་བས་བརྟས་ཡོད།

མི་ལོ་ཉེར་གསུམ་ལྷག་གི་སློབ་ཞུགས་ཀྱི་བརྒྱུད་རིམ་རིང་མོའི་ཁྲོད་ཁོང་ཚོ་འདི་ལྟར་གཟི་བརྗིད་ལྡན་པའི་ངང་སློབ་མཐར་ཕྱིན་ཡང་ཕྱི་ཚུལ་ནས་གྲྭ་དམངས་དང་ཁྱད་པར་འབྱེད་པའི་མངོན་མཚན་གྱི་རྟགས་ནི་སྟོད་འགག་སེར་བོ་འདི་ཁོ་ན་ཡིན། འདིས་ནི་གྲྭ་སའི་རྒྱས་སྤྲོས་མེད་པའི་དཔལ་འབྱོར་གྱི་བཀོལ་སྤྱོད་དེ་མཚོན་གྱི་ཡོད།   གྲྭ་སའི་གྲྭ་བ་མང་ཆེ་བར་སྒེར་གྱི་ཁང་བ་མེད་ལ་རླངས་འཁོར་གྱི་རིགས་དེ་བས་ཀྱང་མེད།  སྣུམ་པོ་མེད་པའི་སྤྱི་ཐབ་ཀྱི་ཟ་མ་ནི་ཐུན་མོང་གི་ལོངས་སུ་སྤྱད་བྱ་དེ་ཡིན།  དེའི་ཕྱིར་གྲྭ་སའི་གྲྭ་བ་དང་གྲྭ་བ་གཞན་དག་བསྡུར་ན་ཁོང་ཚོའི་ངོ་གདོང་ལ་ཅི་ཞིག་མ་ཚང་བ་ལྟ་བུའི་སྐྱ་ཐང་ཐང་ཞིག་དང་གྱོན་གོས་སྲབ་མོ་དེ་ཧ་ཅང་རྙིང་ཧྲུལ་དུ་སོང་བ་ཤ་སྟག་ཡིན།  འཛིན་གྲྭ་དམའ་བའི་གྲྭ་བ་ལོ་གཞོན་མང་ཆེ་བའི་སྟོད་འགག་གི་མཆན་གོར་གཤགས་ནས་ལྷབ་ལྷུབ་ཏུ་གཡུགས་ཀྱིན་ཡོད།  དེ་ནི་ཆོས་རྭའི་ནང་དུ་དགག་སྒྲུབ་ཀྱི་རྩོད་པ་བྱེད་སྐབས་འཚང་ཁ་བྱས་ནས་གཤགས་རལ་ཏུ་བཏང་བ་ཞིག་རེད།  ལྷམ་ནི་ཧ་ཅང་གི་སྟབས་བདེ་ཞིག་སྟེ།  དུས་ཚུགས་བཞི་གར་བརྗེ་རེས་མེད་པའི་ཡུལ་མི་ཚོས་གྱོན་བཞིན་པའི་བསིལ་ལྷམ་རྐང་བའི་མཛུབ་བར་དུ་འཛིན་རྒྱུ་འགྱིག་གིས་བཟོས་བ་ཞིག་ཡིན་ལ།  འགྲོ་བའི་སྐབས་གོམ་པ་ལེན་མ་ཤེས་ན་ཐག་སྒྲ་བར་མེད་དུ་གྲགས་འོང་།  གྱོན་ཆས་ཕྱོགས་ཡོངས་ནས་གཅིག་པའི་རྐྱེན་གྱིས་ངོ་གདོང་སོགས་ན་དམིགས་བསལ་གྱི་རྟགས་མཚན་མེད་ན་ཡུལ་མི་ཚོ་ཡང་ཡང་ནོར་བཞིན་ཡོད། དེ་ལྟར་ཟས་གོས་དང་ཁོར་ཡུག་ནམ་གཤིས་སོགས་ངན་ངོན་དང་བཟང་རྒྱུ་མེད་ན་ཡང་། ནང་བསྟན་རིག་གནས་ཀྱི་དྲི་མ་ཅུང་ཟད་ཚོར་བ་ནས་བཟུང་ཁོང་ཚོའི་སེམས་ཁམས་དུས་རྟག་ཏུ་དགའ་བདེས་བརྒྱན་ཡོད། ཡུལ་བསྐོར་དུ་ཡོང་བའི་ཕྱི་གླིང་གི་མི་ཚོས།  ཁོང་ཚོའི་བག་ཕབ་ཀྱི་སྤྱོད་ལམ་དང་ངོ་གདོང་གི་འཛུམ་མདངས། འཆམ་མཐུན་གྱི་རྣམ་པ་འདི་དག་མཐོང་སྐབས།  འདི་དག་གང་ནས་བྱུང་ཞིང་འབྱུང་བའི་རིག་གནས་དེ་ལ་རང་དབང་མེད་པར་ཡིད་སྨོན་དང་སྦྱོང་འདོད་སྐྱེ་གྱིན་ཡོད།  དེའི་ཕྱིར།    མི་རིགས་དང་ཆོས་ལུགས་ལ་དབྱེ་བ་མེད་པར་འཚང་ཁ་ཤིག་ཤིག་གིས་ཡུལ་གྲུ་ཀུན་ནས་འདིར་སློབ་སྦྱོང་དུ་ཡོང་བཞིན་ཡོད་ལ།  ལ་ལ་ཞིག་སློབ་མཐར་ཕྱིན་ནས་ཕྱིར་སོ་སོའི་ཡུལ་དུ་ལོག་པ་དང་། ཁ་ཤས་འདི་གར་གཏན་བསྡོད་བྱས་ཡོད།   དཔེར་ན།  ད་ལྟའི་རྭ་སྟོད་གྲྭ་ཚང་གི་མཁན་པོ་དེ་གར་སློབ་མཐར་ཕྱིན་པའི་ཕྱི་གླིང་བའི་དགེ་བཤེས་དབུ་སྐྲ་སེར་བོ་དང་སྤྱན་ལྗང་ཁུ་ཅན་ཞིག་ཡིན་ལ།  སྔོན་ལོར་ཝེ་བན་གྱི་གྲྭ་བ་ཞིག་ལྷ་རམས་སློབ་མཐར་ཕྱིན་པ་ལྟ་བུ་རེད།

དཔལ་འབྱོར་ཁོ་ནས་འཇིག་རྟེན་ཁ་ལོ་བསྒྱུར་བའི་སྐབས་འདིར་འགྲོ་བ་མིའི་བཟང་སྤྱོད་ཀྱི་གོམས་གཤིས་ཡོད་ཚད་ཉམས་རྒུད་དུ་འགྲོ་བཞིན་ཡོད་ལ།  དེ་མཚུངས་སུ་ནང་བསྟན་སློབ་སྦྱོང་གི་བསྟི་གནས་གཞན་ཁག་ཀྱང་ཉམས་དམས་སུ་འགྲོ་བཞིན་ཡོད།  འོན་ཀྱང་གྲྭ་སའི་སློབ་སྦྱོང་གི་མཁའ་དབུགས་སྟུག་པོའི་ཁྲོད་དུས་རབས་རྐྱེན་ངན་གྱི་རླངས་པ་ཅི་ལྟར་འཐིབ་ཀྱང་ནམ་ཡང་ཉམས་པ་མེད་པར་མདུན་ནས་མདུན་དུ་བཞུར་གྱིན་ཡོད།  འདི་ནི་ཤེས་རྒྱུད་ཀྱི་ཆོས་གང་ཞིག་ཉམས་དམས་སུ་འགྲོ་བ་དེ་ཕྱིའི་ཁོར་ཡུག་ལས་གཙོ་བོ་ནང་སེམས་ཀྱི་འདུ་ཤེས་ལ་ཐུག་པའི་ནང་བསྟན་ཆོས་ལུགས་ཀྱི་ལྟ་གྲུབ་ཅིག་སྟོན་ཀྱི་ཡོད་ལ།  མིའི་སེམས་ཁམས་ལ་ཁྲིམས་ལུགས་ཁོ་ནས་དབང་བསྒྱུར་བྱེད་མི་ནུས་པར་རང་གིས་རང་ལ་དབང་བསྒྱུར་བྱེད་དགོས་པའི་གནས་ལུགས་ཤིག་ཀྱང་སྟོན་གྱི་ཡོད།  ལྷག་པར་ཏུ་གྲྭ་ས་སྤྱིའི་སློབ་སྦྱོང་གི་སྒྲིག་འཛུག་དང་།  མི་སྒེར་གྱི་ལྡོག་ཏུ་མེད་པའི་དོན་གཉེར་གྱི་བསམ་བློ་ལས་བྱུང་བ་ཞིག་རེད།  ལོ་རེ་བཞིན་སློབ་གཉེར་གྱི་ཆེད་དུ་ཚོགས་འདུ་ཆེ་ཆུང་དུ་མ་འཚོག་གྱིན་ཡོད་ལ་དེ་ལ་ཞུགས་མཁན་ནི་དགེ་བཤེས་རྣམས་དང་འཛིན་གྲྭ་ཐོན་ཟིན་པའི་གྲྭ་བ་ཚོ་ཡིན།  ཚོགས་འདུའི་སྟེང་སུས་ཀྱང་རེ་བ་དང་བསམ་འཆར་འདོན་ཆོག་ལ།  སྐྱོན་བརྗོད་དང་ཐེར་འདོན་ཡང་བྱེད་ཆོག  ཉེས་འགོག་ལེགས་སྤེལ་གྱི་བསླབ་བྱ་སུ་ལ་ཡོད་ན་མཐོ་དམན་དང་ཆེ་ཆུང་གི་དབྱེ་བ་མེད་པར་དེ་ལ་མང་མོས་ཀྱིས་ཐག་གཅོད་གཏན་འབེབ་བྱེད་པ་རེད། 

      གྲྭ་སའི་སློབ་སྦྱོང་གི་ཐོག་མ་ནི་ཚན་པ་ཉེར་བཞི་ཡོད་པའི་བསྡུས་གྲྭའི་རིགས་ལམ་ཡིན་ལ། འདི་ནི་ནང་བསྟན་གཞུང་ལུགས་ཙམ་དུ་མ་ཟད་ཆབ་སྲིད་དང་དཔལ་འབྱོར་ལོ་རྒྱུས་ལ་སོགས་པའི་རིག་གཞུང་དང་རིག་གནས་སྤྱི་ལ་རྩོད་སྒྲུབ་ཀྱིས་དཔྱོད་ཚུལ་སྟོན་བྱེད་ཅིག་ཡིན་ལ།  རིགས་ལམ་དེ་ལ་སྦྱངས་ཏེ་རང་གི་ཤེས་རབ་གྱི་རལ་གྲི་རྣོ་དབལ་ཅན་དུ་གྱུར་བ་ན།  དེ་ནས་འཛིན་གྲྭ་གོང་མ་རྣམས་རིམ་གྱིས་བགྲོད་དགོས་པ་ཡིན།  རྩྭ་བརྔ་བ་ལ་ཐོག་མར་ཟོརབ་བརྡར་བའི་དཔེ་ལྟར་རང་གི་དཔྱོད་ཤེས་ཀྱི་ནུས་པ་ཚད་དུ་སྨིན་པར་བྱས་ཏེ་རིགས་ལམ་དེས་གཞུང་ལུགས་གཞན་དང་གཞན་ལ་ཡང་དམིགས་འབྱེད་པ་ནི་བོད་དུ་ལོ་ངོ་སྟོང་ཕྲག་གི་སྔོན་ནས་དར་ཡོད་པས།  རྒྱ་ནག་གི་རྩོམ་པ་པོ་ལེས་ཁེ་ཧྥོས། སྔོན་དུ་ཤེས་ཚོར་ཇེ་ཟབ་ཏུ་བཏང་ནས་ཕྱིས་སུ་ཤེས་བྱ་སློབ་པ་ཨ་རིའི་སློབ་གསོ་རྒྱ་ནག་ལས་ཁྱད་པར་འབྱེད་བྱེད་དུ་སྟོན་པ་ནི་གསར་བ་གང་ཡང་མིན།

 དེ་ལྟར་ལོ་ངོ་བཅུ་བདུན་གྱི་རིང་ལ་ཕྱི་ཉལ་སྔ་ལངས་ཀྱིས་གདན་ས་སོ་སོའི་སློབ་གཉེར་རིམ་གྱིས་རྫོགས་པ་ན།འཛིན་གྲྭའི་ནང་རྩེ་ཏོག་གིས་སྐད་གྲགས་ཆེ་བའི་དགེ་ལུགས་རྒྱུགས་སྤྲོད་ཆེན་མོར་ལོ་ངོ་དྲུག་གི་རིང་ཞུགས་དགོས་ལ།  ལོ་ངོ་དྲུག་གི་རིང་དེ་ནི།  ལུས་སེམས་ཀྱི་ངལ་དུལ་དང་།  འཇིགས་སྣང་།   སེམས་ཁྲེལ་གྱིས་ཟིན་པའི་ལོ་ངོ་དྲུག་ཡིན།   དེའི་རིང་ལ་སྒྲིག་འཛུགས་ཀྱི་ངོས་ནས་སློབ་ཁྲིད་བྱེད་མཁན་ཅི་ཡང་མེད་པར་རང་གིས་དཔྱོད་ཀྱི་ནུས་པ་བེད་སྤྱོད་གཏོང་བའི་དུས་ཡིན་ལ། དགེ་ལུགས་རྒྱུགས་སྤྲོད་པ་ཞིག་གིས་བཤད་དོན།  སྐབས་དེར་ཁོས་ཉིན་རེ་ལ་ཆུ་ཚོད་བཅུ་བདུན་ལ་དཔེ་ལྟོས་བྱས་པ་ཡིན་ཟེར།  དེའི་ཁར་ཟས་ཐུན་གསུམ་གྱི་ཆུ་ཚོད་བསྣན་ན་ཤུལ་ཏུ་ངལ་གསོ་དང་གཉིད་ཀྱི་ཆུ་ཚོད་ཅི་ཙམ་ཞིག་ལྷག་འདུག གྲྭ་སར་སྤྱི་ཡོངས་ཀྱི་གོམས་སྲོལ་ཞིག་ནི་དགོང་མོ་ཆུ་ཚོད་མང་བོ་དཔེ་ཆ་བལྟ་རྒྱུ་དེ་རེད་ལ། མང་ཆེ་བ་ཆུ་ཚོད་དང་བོ་ནས་གཉིས་པའི་བར་འདུག་ཀྱིན་ཡོད།  འོན་ཀྱང་དགེ་ལུགས་རྒྱུགས་སྤྲོད་པ་ཚོའི་ཉལ་ཁང་གི་གློག་འོད་ནི་ནམ་ཡང་གཟིམ་རྒྱུ་མེད།  མཚན་གུང་ཡོལ་རྗེས་ཐོག་བརྩེགས་ཅན་གྱི་ཉལ་ཁང་དེ་ཚོར་རྒྱང་བལྟ་ཞིག་བྱས་ན།  མཚན་མོའི་ལྷང་འཇག་གི་ཁྲོད་ནས་སྒེའུ་ཁུང་ཁ་ཤས་ལས་གློག་འོད་ལམ་ལམ་དུ་འཕྲོ་བཞིན་ཡོད་ལ།   དེ་ནི་དགེ་ལུགས་རྒྱུགས་སྤྲོད་པ་ཚོའི་ཉལ་ཁང་ཡིན།  ལྷ་རམས་སློབ་ཐོན་ཟིན་པ་ཞིག་གིས།  ཁོས་ལོ་ངོ་དྲུག་གི་རིང་ལ་དབྱར་ཁའི་དཔལ་ཡོན་ལ་རོལ་མྱོང་བྱས་པ་མི་དྲན་ཟེར།  དེ་ནི་འགྲོ་འཆག་ཉལ་འདུག་གང་གི་སྐབས་སུ་ཡང་དམིགས་བསལ་ཅན་གྱི་ཚོར་ཤེས་ཤིག་གིས་སེམས་ཁམས་ལ་ཡོངས་སུ་དབང་བསྒྱུར་བའི་རྐྱེན་གྱི་རེད་ལ།  གྲྭ་སའི་སློབ་གཉེར་བ་ཚོས་སྤྱི་ཡོངས་ཀྱི་འདུ་ཤེས་གཉིས་ཏེ།   ཀུན་སྤྱོད་དང་ཆུ་ཚོད་ཀྱི་འདུ་ཤེས་ཤུགས་དྲག་པ་ལས་བྱུང་བ་ཞིག་རེད།

 ལོ་ངོ་དྲུག་གི་རིང་ལ་རྒྱུགས་སྤྲོད་སྣ་ཁ་ལྔ་བཅུ་ལྷག་གཏོང་དགོས་ལ།  དེ་དག་བརྒལ་རྗེས་ད་དུང་ཁང་ཚན་དང་གྲྭ་ཚང་གདན་ས་སྤྱིའི་སྨོན་ལམ་ཆེན་མོའི་སྐབས་སུ་དམ་བཅལ་ཉིན་གྲངས་མང་བའི་རིང་འཇོག་དགོས།  གསེག་བཅད་བརྡར་གསུམ་གྱིས་བཙོ་སྦྱངས་ལེགས་པར་བྱས་བའི་གསེར་ལྟར་ཁོང་ཚོའི་མཚུངས་པ་མེད་པའི་ཤེས་རབ་དང་རྣམ་དཔྱོད་ཀྱི་ནུས་པ་ཡང་དེ་དང་འདྲ། 

    མདོར་བསྡུས་ནས་བཤད་ན།   དེང་གི་དུས་འདིར་གྲྭ་སའི་སློབ་སྦྱོང་ནི་མི་སྒེར་བྱེ་བྲག་པ་ཞིག་གི་དམིགས་འདུན་ཁོ་ནའི་ཕྱིར་མིན་པར་འཇིག་རྟེན་སྤྱི་སྨན་གྱི་འགན་འཁུར་སློབ་གསོ་ཞིག་གི་ངོ་བོར་འགྱུར་བཞིན་ཡོད་ལ།  འདི་དག་གིས་མཚོན་པའི་ལྷ་རམས་དགེ་བཤེས་རྣམས་ནི་ནང་བསྟན་ཀུན་སྤྱོད་རིག་པའི་མིག་དཔེར་འོས་པའི་མཚན་གཞི་དང་།  ནང་བསྟན་ལྟ་གྲུབ་ཉམས་བཞེས་དང་སྒྲོག་སྦྱངས་བྱེད་པའི་དོན་དམ་པའི་མཁས་དབང་དངོས་མ་རྣམས་ཡིན། 

                 2014/2/20

ཧི་མ་ལ་ཡའི་གྲྭ་རྒྱུན་དང་མོན་པའི་སྐྱེས་བུ།

ད་སྐབས་བོད་ནས་གྲྭ་རྒྱུན་ཡོང་མཁན་དཀོན་པའི་དཀའ་ངལ་གསར་པ་ཞིག་འཕྲད་བཞིན་པའི་དུས་སྐབས་དེར་༸ བདག་ཉིད་ཆེན་པོས་བསྟན་པའི་འགན་འཁྲི་དེ་ཧི་མ་ལ་ཡའི་མི་རིགས་ཚོ་ལ་བབ་ཡོད་ཅེས་ཉེ་དུས་ཀྱང་བསྐྱར་དུ་གསུངས་པ་འདི་ལ་གོ་རྒྱུ་གཉིས་པར་སྣང་སྟེ། གྲྭ་ས་ཁག་ཏུ་ཧི་མ་ལ་ཡའི་མི་རིགས་ཀྱི་གྲྭ་རྒྱུན་བསྡུ་འཚོལ་རུང་མིན་བཤད་རིས་དང་བསམ་བློའི་ལྟ་ཚུལ་གཉིས་གྱེར་བཞིན་པ་དང་སྐབས་ཁེལ་ཡོད་པས། ལྟ་ཚུལ་འདི་ཞི་འཇམས་སུ་བཏང་སྟེ་ཧི་མ་ལ་ཡའི་མི་རིགས་ནས་གྲྭ་རྒྱུན་འཚོལ་བསྡུ་དགོས་པའི་ལམ་བསྟན་ཞིག་དང་དོན་དངོས་སུ་བོད་དང་འདྲ་མཚུངས་ཀྱི་བསྟན་པའི་འགན་འཁྲི་ཁུར་ཐུབ་མཁན་ཞིག་དགོས་ན་ནི་ཧི་མ་ལ་ཡའི་མི་རིགས་ཁག་ལས་གཞན་དུ་འཚོལ་ས་མེད་པར་དགོངས་པ་རེའང་ལོས་ཡིན་སྙམ། 

གྲྭ་ས་ཁག་ཏུ་ཧི་མ་ལ་ཡའི་གྲྭ་རྒྱུན་འཚོལ་བསྡུ་བྱེད་པར་མི་འདོད་པ་འདི་ནི་ཕྱོགས་རིས་དང་ལྟ་ཚུལ་ནག་རྐྱང་ཞིག་མིན་པར་མི་ལོ་བཅུ་ཕྲག་གཅིག་ནང་དུ་འབྲུག་པ་དང་མོན་པ། ལ་དྭགས། འབྲས་ལྗོངས། ག་ཤ། ཁུ་ནུ། སྤིས་ཏི། བལ་ཡུལ། རྟ་མང་། ཤར་པ་སོགས་ཀྱི་གྲྭ་རྒྱུན་ཕོན་ཆེ་ཞིག་ཡོང་ནས་གྲྭ་ཚང་སོ་སོའི་སློབ་གྲྭར་འཛུལ་བཞུགས་བྱས་པ་དང་མཐའ་སློབ་ཐོན་ལག་ཁྱེར་ཐོབ་ནས་དགོན་པའི་ནང་དུ་གཞུང་ཆེན་གཟིགས་པར་བཞུགས་མཁན་ཞིག་ཆེས་དཀོན་པར་གྱུར་ཏེ། མང་པོ་ཞིག་རང་རང་ཡུལ་ན་ཕྱི་ལོགས་སུ་སོང་དང་འགྲོ་བཞིན་པ་འདིས་དགོན་སྡེ་ཁག་ཏུ་དཀའ་ངལ་ཞིག་བསལ་ཐབས་ལས་ལྡོག་སྟེ་དཀའ་ངལ་གསར་པ་ཞིག་གི་སྣེ་མོ་ལ་ལག་འཇུ་བྱེད་དགོས་ཐུག་ཡོད། དེར་བརྟེན། གྲྭ་རྒྱུན་འཚོལ་བསྡུ་རུང་མིན་གྱི་སྐད་ཆ་མི་ཉུང་བ་ཞིག་སླེབས་པ་རེད། དེ་སྔ་དང་ད་སྐབས་གཏན་ནས་འདྲ་མཚུངས་བྱེད་ས་མེད་པ་བདེན་དུ་ཆུགས་ཀྱང་གྲྭ་རྒྱུན་བདག་སྐྱོང་བྱེད་ལུགས་ལ་ལྟོས་ཚགས་ཆེན་པོ་ཞིག་ཡོད་འདུག་སྙམ་པ་ནི་ཁོ་བའི་རྨོངས་འཆར་ཙམ་ཡིན། 

ད་སྔ་ལོ་རབས་བདུན་ཅུའི་ནང་དུ་གྲྭ་རྒྱུན་མེད་པའི་དཀའ་ངལ་བྱུང་སྟེ་ཧི་མ་ལ་ཡའི་མི་རིགས་ཁྲོད་དུ་གྲྭ་རྒྱུན་འཚོལ་བསྡུ་དང་གྲྭ་རྒྱུན་དེ་དག་བདག་སྐྱོང་ལེགས་པོར་གནང་བའི་ཉེར་ལེན་ལས་གྲྭ་རྒྱུན་ཆད་ཉེན་གྱི་བཀའ་ཁག་ཟློག་པ་ཙམ་དུ་མ་ཟད་ཁོ་ཚོའི་གྲས་ནས་སློབ་གཉེེར་སྤུས་ལེགས་ཅན་དང་གྲྭ་ཚང་ཁག་གི་ལས་འགན་རྐང་ལེན་བྱེད་ཐུབ་མཁན་དུ་མ་བྱུང་སྟེ་ད་སྐབས་སུ་ཆེས་དགོས་མཁོ་དང་ཕན་ནུས་ཅན་ཞིག་ཏུ་གྱུར་ཡོད།

འབྲས་སྒོ་མང་གྲྭ་ཚང་ལ་དྭགས་པས་འཛིན་སྐྱོང་བྱས་ནས་ཡོད་ཅིང་ཟེར་ནའང་རྫུན་དུ་མི་འགྲོ་བ་ཞིག་ཡོད་ལ་གྲྭ་ཚང་གཞན་དང་གཞན་ནའང་ཧི་མ་ལ་ཡའི་མི་རིགས་ཀྱི་གྲྭ་རྒྱུན་ཚོས་བསྟན་པའི་ཁུར་བཞེས་པ་མང་དུ་སྣང་ཞིང་། ད་སྐབས་ཀྱི་དགའ་ཤར་གྲྭ་ཚང་གི་མཁན་རིན་པོ་ཆེ་ནི་ལོ་རབས་བདུན་ཅུའི་སྐབས་ཀྱི་གྲྭ་རྒྱུན་ཁྲོད་ནས་ཆེས་གོ་གནས་མཐོ་ས་ཕེབས་པའི་ཧི་མ་ལ་ཡའི་མི་རིགས་ཤིག་ཡིན། འདི་ག་སེར་བྱེས་གྲྭ་ཚང་དུའང་ཕྱི་ལོ་༢༠༠༠ཐམ་པའི་རྗེས་ནས་ད་བར་ལོ་རེའི་ཁྲིམས་བདག་དགེ་བསྐོས་ཁྲོད་དུ་ཧི་མ་ལ་ཡའི་མི་རིགས་དྲུག་བྱུང་ཡོད་ཅིང་། འདི་ག་གྲྭ་ཚང་གི་དཔེ་ཁྲིད་དགེ་རྒན་གྲས་ནས་ཆེས་སློབ་མ་མང་ཤོས་ཀྱི་དཔེ་ཁྲིད་དགེ་རྒན་དེ་ནི་ཧི་མ་ཡའི་མི་རིགས་ཡིན་པ་སོགས་ཀྱིས་བྱེས་ཀྱི་གདན་ས་ཁག་ཏུ་ཧི་མ་ཡ་མི་རིགས་ཀྱི་གྲྭ་རྒྱུན་ཁག་ནས་ཞབས་འདེབས་རླབས་ཆེན་ཞུ་དང་ཞུས་མུས་སུ་ཡོད།

དེ་ལས་ཀྱང་དགའ་གུས་དང་སྤོབས་པ་བྱེད་ཆོག་པ་དེ་ནི་ཧི་མ་ལ་ཡའི་གྲྭ་རྒྱུན་ཁྲོད་ནས་གཞུང་ཆེན་སློབ་པ་མཐའ་སོན་གྱིས་ལྷ་རམས་དགེ་བཤེས་ཐོན་པ་ཙམ་མིན་པར་རང་རྒྱུད་ཉམས་ལེན་དང་འདྲེས་ནས་ཡོད་པའི་སྐྱེས་བུ་ངོ་མཚར་ཅན་དུ་མ་འདུག་པའི་ནང་ནས་<<མོན་པའི་བཤེས་གཉེན་ཆེན་པོ་གསུམ>>*ནི་ད་སྐབས་ངེད་ཅག་གི་མིག་མདུན་ན་འཚོ་ཞིང་བཞེས་པའི་རང་རྒྱུད་ཆོས་ཀྱིས་འཚོས་པའི་ཧི་མ་ལ་ཡའི་མི་རིགས་ཀྱི་སྐྱེས་བུ་ངོ་མཚར་ཅན་གསུམ་ཡིན་ལ་ཁོང་གསུམ་ཡང་ལོ་རབས་བདུན་ཅུའི་དུས་སྐབས་སུ་ཕེབས་པའི་གྲྭ་རྒྱུན་ཡིན། 

བདག་དང་འདྲ་བའི་གཞོན་སྐྱེས་ཚོའི་ཁྲོད་དུ་ལོག་རྟོག་ངན་པ་ཞིག་ཡོད་པ་ནི་གཞུང་ལུགས་རབས་འབྱམས་ལ་མཁས་པའི་བཤེས་གཉེན་མང་བ་ལས་ཉམས་ལེན་ཅན་གྱི་སྐྱེས་བུ་མེད་ཚད་འདུག་སྙམ་པ་དེ་ཡིན་མོད། དེང་གི་འཚོ་ཞིང་བཞེང་པའི་<<མོན་པའི་བཤེས་གཉེན་ཆེན་པོ་གསུམ>>དང་དེས་མཚོན་པའི་སྤྱི་ཚོགས་སུ་མི་མངོན་པའི་སྐྱེས་ཆེན་ཅི་འདྲའི་མང་པོ་ཡོད་འདུག་ཨང་སྙམ་ནས་དགའ་དད་དང་སྤྲོ་སྣང་ཆེན་པོ་རེ་སྐྱེས་མྱོང་བ་ནི་དོན་དངོས་ཤིག་ཡིན། 

ཁོང་གསུམ་པོས་ད་རུང་གཞན་ལ་སློབ་གསོ་གཏོང་བའི་ལས་འགན་ཆེ་ཙམ་བཞེས་ཐུབ་ཚེ་ངེད་ཅག་གི་གཞོན་སྐྱེས་ཚོ་ལ་ཤུགས་རྐྱེན་དང་སློབ་གསོའི་ནུས་པ་ཧ་ཅང་ཆེན་པོ་རེ་ཐེབས་ངེས་སུ་འདུག་སྙམ་པ་ཡང་དང་བསྐྱར་དུ་དྲན་ཡོང་གི་འདུག དེ་ལྟ་ནའང་གཅིག་ཏུ་ན་ཉམས་ལེན་ཅན་གྱི་སྐྱེས་བུས་ཚོས་གཞན་ལ་སྤོབས་པ་ཆེན་པོས་གསུང་སྨྲ་བ་ལའང་འཛེམ་ཟོན་ཆེན་པོར་གནང་བའི་ཕྱག་བཞེས་རེ་ཡོད་ཚད་འདུག་པས་ངེད་ཅག་གཞོན་སྐྱེས་ཚོས་བསོད་ནམས་ཀྱི་མ་ཁྱོག་པ་ཞིག་ཀྱང་ལོས་ཡིན་སྙམ།

རང་རེའི་སྤྱི་ཚོགས་ནང་དུ་གཞུང་ལུགས་འཆད་རྩོམ་དང་སྨྲ་མཁས་ཡོན་ཏན་གྱིས་ཕྱུག་པའི་དགེ་བཤེས་ཙམ་མིན་པར་ཉམས་ལེན་ཅན་གྱི་སྐྱེས་ཆེན་ཉུང་ངུ་ཙམ་མིག་དཔེ་ལྟ་ས་རེ་ཡོད་ནའང་དགོན་སྡེ་སློབ་གསོ་གང་འཕེལ་དང་གཞོན་སྐྱེས་ཚོས་དམིགས་འདུན་མ་བོར་བར་ཐོས་སྟབས་ཞི་ཞིང་དུལ་བ། སྒོམ་སྟབས་ཉེན་མོངས་ཆུང་བ། ཞེས་པའི་སྡོམ་ཚིག་གི་རྒྱ་ལས་མ་འདར་བ་ཞིག་ནི་ངེས་པར་ཡོང་ངེས་དང་།

དེང་གི་ཧི་མ་ལ་ཡའི་གཞོན་སྐྱེས་གྲྭ་རྒྱུན་ཚོ་ལ་ཤུགས་རྐྱེན་དང་བབ་ཆགས་བཟང་པོ་རེ་འཇོག་ནས་དགོན་སྡེ་ནང་གི་གྲྭ་རྒྱུན་འཚོ་གནས་དང་བསྟན་པའི་འགན་འཁྲི་ལེན་པའི་རྐང་འཛིན་པ་ཆེས་མང་པོ་ཞིག་འབྱུང་ཐུབ་པའི་ཆ་རྐྱེན་བླ་མེད་ཅིག་ཆགས་ཐུབ་པར་འདུག

*<མིང་འདི་ནི་རང་གིས་བཏགས་པ་ཞིག་ཡིན། དགེ་སྐོས་ཟུར་པ་ཐུབ་བསྟན་ཕུན་ཚོགས། དགེ་སྐོས་ཟུར་པ་བཀྲ་ཤིས་ཚེ་དར། དགེ་སྐོས་ཐུབ་བསྟན་རབ་བརྟེན།)

ཞུ་ཡིག

གུས་པར་འོས་པའི་སྨོན་ལམ་བརྡ་འཕྲིན་ཞིབ་འཇུག་ཁང་གི་ལས་རྩོམ་བ་དང་འགན་འཛིན་བོད་ཀྱི་གསར་གཏོད་པ་བློ་བཟང་སྨོན་ལམ་ལགས་སུ།
གུས་པས་ལོ་མང་རིང་དུ་གློག་ཀླད་དང་ཨན་ཌོ་androidམ་ལག་གི་ཁ་པར་དང་iOSམ་ལག་གི་ཀུ་ཤུ་ཁ་པར་རིགས་སྤྱོད་མྱོང་བའི་ལོ་ཟླའི་ནང་དུ་ཉིན་རེའི་དགོས་མཁོ་དང་བེད་སྤྱོད་ལ་མེད་ཐབས་མེད་པ་དེ་ནི་སྐུ་ཉིད་ཀྱིས་བཟོས་གནང་བའི་སྨོན་ལམ་བོད་ཡིག་སྔ་ཕྱི་དང་སྨོན་ལམ་སྐད་གདངས་མཉེན་ཆས། ལྷག་པར་སྨོན་ལམ་ཚིག་མཛོད་སོགས་ཡིན་ལ་འདི་དག་མེད་ཚེ་གཏོང་ཡིག་ཅིག་འབྲི་གཏོང་བྱེད་ཐབས་མེད་པའི་གནས་སུ་གྱར་ཡོད་པ་ནི་ང་ལྟ་བུ་ཉུང་ཤས་ཤིག་མིན་པར་ཆེས་གྲངས་ཀ་མང་པོ་ཞིག་གི་གནས་ཚུལ་ཞིག་ཏུ་གྱུར་ཡོད། ད་སྐབས་ཨན་ཌོ་ཁ་པར་སྤྱོད་མཁན་ཡང་ཆེས་མང་བས་ཨན་ཌོ་པར་གཞི་སྨོན་ལམ་ཚིག་མཛོད་དེ་བཞིན་སྣ་འཛོམས་དང་ཆེས་སྟབས་ཡིན་པས་བོད་ཡིག་སྤྱོད་མཁན་ཚོར་ཕན་ཐོག་ཧ་ཅང་ཆེན་པོར་ཡོད་མུས་རེད། ཁ་རྩང་དེ་རིང་བཙན་བྱོལ་ནང་ཙམ་མ་ཟད་ལྷག་པར་དུ་བོད་ནང་དུ་ཀུ་ཤུ་ཁ་པར་རིགས་ཁུར་མཁན་ཇེ་མང་ནས་ཇེ་མང་དུ་འགྲོ་བཞིན་འདུག་པས་སྨོན་ལམ་ཚིག་མཛོད་དེ་iOS མ་ལག་ཐོག་ཏུ་བཟོ་ཐུབ་ན་དགེ་མཚན་ཅི་བས་ཀྱང་ཆེན་བས་གུས་པས་བོད་ཡིག་ལ་དུང་བ་ཡོད་པའི་བོད་མི་ཚོའི་ཚབ་བྱས་ཏེ་ཁྱེད་ལ་རེ་སྐུལ་ནན་མོར་ཞུ་བཞིན་ཡོད། སྤྱི་ན་iOS ནང་དུ་བོད་ཡིག་ཚིག་མཛོད་ཡོད་མོད་སྨོན་ལམ་ཚིག་མཛོད་བཞིན་སྟབས་བདེ་དང་སྣ་འཛོམས། ཚིག་སྣ་མང་བ་སོགས་ཀྱིས་མི་མདང་བའི་དཀའ་ངལ་ཆེ་བས་ཁྱེད་ལ་རེ་སྐུལ་འདི་ཕུལ་བ་ལགས། ཁྱེད་ཀྱིས་གུས་པའི་འཕྲིན་ཐུང་འདིར་དོ་སྣང་དང་གལ་ཆེན་བརྩི་རྒྱུ་རེ་བ་ཆེ། འདི་ནི་ངེད་མི་གཅིག་གཉིས་ཤིག་གི་རེ་བ་དང་དཀའ་ངལ་མིན་པར་རང་སྐད་ལ་དུང་བའི་ཁ་པར་སྤྱོད་མཁན་ཆེས་མང་པོ་ཞིག་གི་ཁྱེད་ལ་ཞུ་འདོད་པའི་འཕྲིན་ཐུང་ཞིག་ཡིན། འཕྲིན་ལན་ཡོད་པར་མཁྱེན།
གུས་སྲོང་བཙན་གྱིས།

ཤ་ཉེ་ལ་སྐུར་བའི་འཕྲིན་འཐུང་།

                                       ཚན་པ་གཉིས་པ།)

ཁྱིམ་ཚང་གི་སློབ་གསོ་དང་ཕ་མའི་ཤུགས་རྐྱེན་ནི་བུ་ཕྲུག་ཅིག་གི་མི་ཚེ་འགྱུར་བ་གཏོང་ཐུབ་པའི་ནུས་ལྡན་ཞིག་ཡིན་པ་ནི་སློབ་གསོ་སྨྲ་བ་ཚོས་རྙེད་པའི་གྲུབ་དོན་ཞིག་ཡིན་ལ། མིག་སྔའི་སྤྱི་ཚོགས་ཁྲོད་དུ་དཔེ་མཚོན་རུང་བ་མང་པོར་འཇོག་རྒྱུ་ཡོད། ཁྱེད་རང་ནི་ང་དང་ཤ་ཉེ་འབྲིང་པོ་གཉིས་དང་མི་འདྲ་བར་ཆུང་དུས་ནས་སློབ་གྲྭ་འགྲིམས་པའི་གོ་སྐབས་ཐོབ་ཡོད་ཅིང་ལོ་མང་རིང་དུ་བཅའ་སྡོད་སློབ་གྲྭ་སོང་ཡོད་པའི་རྐྱེན་གྱིས་ཁྱིམ་ཚང་གི་སློབ་གསོ་དང་ཕ་མའི་ཤུགས་རྐྱེན་ག་ཚད་ཅིག་ཐེབས་ཡོད་མེད་མ་ཤེས་ལ། ཕ་མ་དང་ཁྱིམ་ཚང་གི་ཡ་རབས་གོམས་གཤིས་དང་ཉམས་ཆུང་གཤིས་ཡག་གི་བབ་ཆགས་བཟང་པོ་དེ་ཚོས་ཁྱེད་ཀྱི་ཉིན་རེའི་འཚོ་བའི་ཁྲོད་ཤུགས་རྐྱེན་ཅི་ཙམ་ཐེབས་ཡོད་མ་ཤེས། 

ཁྱིམ་ཚང་སློབ་གསོ་དང་ཕ་མའི་ཤུགས་རྐྱེན་ཐེབས་ཡོད་མེད་ལ་མ་བལྟས་པར་ཁྱེད་ཀྱིས་ཕ་མ་གཉིས་ལ་དགའ་ཞིང་བརྩེ་བ་དང་ཁྱིམ་ཚང་ལ་དུང་ཞིང་མཛའ་བ་ནི་བཤད་མི་དགོས་པས་ཕ་མ་གཉིས་དང་ཁྱིམ་ཚང་ནི་ཁྱེད་རང་གིས་ཉིན་ལྟར་དྲན་བཞིན་པ་ཡིན་ལ་ནམ་ཡང་བརྗེད་མི་ཐུབ་པ་དེ་ཡིན་པ་ནི་ངས་ཚད་དཔག་བྱེད་ཐུབ། རང་ཡུལ་གད་ཁ་ཡིན་རུང་སྐྱིད་ཟེར་བ་བཞིན་ཁྱེད་ཀྱི་མཚན་མོའི་རྨི་ལམ་ལས་ཀྱང་ཕ་ཡུལ་དང་ཕ་མ་རྨི་བཞིན་ཡོད་ཅིང་ཕ་ཡུལ་ནི་ཆེས་སྐྱིད་པའི་ས་ཆ་དེ་ཡིན་བསམ་བཞིན་པ་ནི་ཁྱེད་དང་ཁྱེད་འདྲ་བའི་ལོ་ཆུང་བྱིས་པ་ཐུན་མོང་ལ་ཡོད་པ་ཞིག་ཡིན། 

ངས་ཁྱེད་ལ་རྡོག་རྡོག་བཤད་རྒྱུ་ནི། ཁྱེད་ཀྱིས་ཕ་མ་གཉིས་ལ་བརྩེ་བ་བཞིན་ཕ་མ་གཉིས་ལ་སློབ་སྦྱོང་ཡང་དག་ཅིག་བྱེད་དགོས་ཟེར་བ་དེ་ཡིན། ངེད་ཚང་ལ་ཁྱིམ་གྱི་རྒྱུ་ནོར་གཟི་བྱུར་རུ་དང་ཕྲུག་ཚ་རུ་ངོམ་དུ་རུང་བ་ཅི་ཡང་བསྟན་རྒྱུ་མེད་མོད། ཆེས་ངོམ་ཆོག་པ་དང་རིན་ཐང་གཞལ་དུ་མེད་པ་དེ་ནི་ཕ་མ་གཉིས་པོ་དེ་ཡིན། སྤྱིར་ཕ་མ་སུ་ཡིན་རུང་བུ་ཕྲུག་དག་གི་ཆེས་རྩ་ཆེའི་རྒྱུ་ནོར་ཞིག་ལ་བརྩི་རུང་། ངེད་གསུམ་གྱི་ཕ་མ་ནི་ཕ་མ་རང་འགའ་བ་ཙམ་མིན་ཞེས་བདག་གིས་སྐད་འགོ་མཐོན་པོར་བྱས་ནས་བཤད་ཐུབ།

ཁྱེད་རང་སྐྱེས་ནས་ཡུན་རིང་མ་སོང་བའི་ལོ་དེར་ཉིན་ཞིག་ལ་ང་རང་དགོན་ནས་ཁྱིམ་དུ་ཡོང་བ་ཡིན། ཨ་ཕའི་གདོང་གཡོན་མའི་མིག་དམར་ནག་དང་མིག་འགྲམ་སྔོ་ནག་བལྟ་མི་བཟོད་པ་ཞིག་ཆགས་འདུག ཨ་མ་ལ་ཅི་བྱུང་བ་རེད་ཅེས་དྲིས་པས་ལྕགས་རྟ་བཞོན་ནས་རྡབ་པ་རེད་ཅེས་སྣང་མེད་ངང་ལན་དེ་ལྟར་གནང་སོང་། རྗེས་སུ་ཤེས་རྟོགས་བྱུང་དུས་དེ་འདྲ་ཞིག་མིན་པར་མི་ཞིག་གིས་ཁུ་ཚུར་གྱིས་བཞུས་པ་ཡིན་འདུག་མོད་ཨ་ཕས་ལན་ཅི་ཡང་སློག་མི་འདུག་མ་ཟད་ཉེ་འབྲེལ་ཕོ་གསར་འཛིང་དགོས་ཟེར་མཁན་འགའ་ཤས་ལ་ཚིག་ངན་ཞིག་ཀྱང་ལབ་གཅུག་མི་འདུག ད་སྐབས་ཀྱི་སྤྱི་ཚོགས་ཁྲོད་དུ་གདོང་ལ་ཁུ་ཚུར་བཞུས་ན་ཁུར་ཐུབ་པའི་ཨ་ཕ་ག་ཚད་ཡོད་དམ། གྱོང་ཁུར་ན་ཁེ་ཞིག་ཡོད་བསམ་མཁན་དུ་ཙམ་ཡོད། ང་རང་གནས་ཚུལ་འདི་ཤེས་དུས་ཨ་ཕ་ལ་ཧ་ཅང་ཡིད་སྨོན་སྐྱེ་མྱོང་ལ་ད་དུང་ཡང་འདི་ཉིད་དྲན་ཐེངས་རེར་ཡིད་འགུལ་ཚད་མེད་ཐེབས་བཞིན་ཡོད། 

ཁྱེད་ཀྱིས་ཨ་ཕ་ལ་ཨ་ཡེས་ཀྱིས་མིང་མདོག་ཅི་ལྟར་འབོད་བཞིན་པ་ཤེས་ཀྱི་ཡོད་ཚད་རེད། མ་གཞི་ང་རང་ཕ་ཡུལ་བྲལ་ནས་མི་ལོ་བཅོ་ལྔ་ཙམ་སོང་ཞིང་འདས་པས་ཨ་ཡེས་ཀྱིས་མིང་མདོག་གསར་པ་རེའང་འབོད་བཞིན་ཡོད་སྲིད། ཨ་ཡེས་ཀྱིས་རྣམ་འགྱུར་ངན་པ་ཞིག་བསྟན་བཞིན་ཨ་ཕ་ལ་དྲི་མེད་ཀུན་་ལྡན་ཞེས་འབོད་པ་ཡང་ཡང་ཐོས་རྒྱུ་ཡོད། ཨ་ཡེས་ཀྱི་རྣམ་འགྱུར་ལས་དྲི་མེད་ཀུན་ལྡན་་ནི་ཨ་ཕའི་མིང་མདོག་ཡིན་པ་ཤེས་ན་ལས་དོན་དག་ཅི་ཞིག་ཡིན་པ་གཏན་ནས་ཤེས་ཀྱི་མེད། ཨ་ཕས་མི་ལ་རོགས་རམ་དང་གྲོང་སྟོད་སྨད་ཀྱི་ཇུས་གཏོགས་བྱས་ནས་ཉིན་འགའ་ཁྱིམ་ལའང་ཡོང་ཁོམ་མེད་པའི་ལས་ཀ་དེ་ནི་ངེད་ཆུང་དུས་སྐབས་ནས་བཟུང་མཐོང་རྒྱུ་ཡོད་ལ་ད་ལྟ་དེ་ལས་ཀྱང་ཇུས་གཏོགས་བྱེད་རྒྱུ་མང་བས་ངས་བསམ་ན་ཨ་ཡེས་ཀྱིས་མིང་མདོག་འབད་པར་ཐང་ཆད་ཡོད་རྒྱུ་དྲན། 

ངེད་ནང་ལ་ཡོད་སྐབས་ཨ་ཕ་ཚོང་ལ་སོང་ནས་ཡོང་རེས་བཞིན་བྱུང་སོང་ཁ་འཐབ་ཀྱི་ལྷག་ཡོད་ནི་ཧ་ལམ་བསྟན་རྒྱུ་མེད། ཨ་ཕས་དགོད་འཚེར་འཚེར་ངང་འདི་མ་གཏོགས་མ་རག་ཅེས་ཨ་ཡེས་ས་ནས་ཁ་རྡུང་ཟེར་རྒྱུ་སྒུག་ནས་སྡོད་ཀྱི་རེད་ལ། ཨ་ཕས་ལས་ཀ་དང་ཚོང་ལས་འཇོན་ཀྱི་མ་རེད་སྙམ་པ་ངས་ཀྱང་ཡང་ཡང་དྲན་མྱོང་། འོན་ཀྱང་གྲོང་པའི་འགོ་ཁྲིད་ཁུར་བའི་མི་ལོ་ལྔ་དྲུག་ནང་དུ་གྲོང་ཚོ་ཡར་རྒྱས་དང་ཉམ་ཐག་རོགས་རམ་སོགས་ཐབས་ཤེས་སྣ་མང་སྤེལ་ནས་ཧ་ཅང་ཡིད་འགུལ་ཐེབས་པ་བྱེད་ཚུལ་ང་ལས་ཁྱེད་ཀྱིས་མིག་མཐོང་ལག་ཟིན་བྱུང་ཡོད།  

ཚོང་ལས་ཁེ་པོགས་ལེན་དགོས་ན་མི་གྲུང་པོ་དང་མགོ་བདེ་པོ་ཁ་ནས་འདྲ་ཆགས་བཤད་ཤེས་ལ། སྒོར་མོ་བཅུ་བྱིན་པའི་ཚོང་རྫས་དེ་ལྡབ་འགྱུར་སྤར་ནས་རྒྱུ་དང་སྤུས་ཀ་བཟང་རབས། རང་ལ་ཁེ་པོགས་དེ་ཙམ་མེད་ཚུལ་ལུང་པ་གང་བཤད་ནས་མགོ་གཡོགས་དགོས་པ་ནི་ཚོང་ལས་ཀྱི་བྱ་བའི་བརྒྱུད་རིམ་ཁྲོད་དུ་འདོར་ཐབས་མེད་པ་ལྟ་བུ་ཞིག་རེད། མི་མགོ་གཡོགས་མི་ཕོད་པའི་ངེད་ཚང་གི་ཨ་ཕ་ནི་ཚོང་ལ་སོང་ནས་ཡོང་རེ་བཞིན་ཁེ་པོགས་བསྟན་རྒྱུ་མེད་པའི་གནད་དོན་དེ་ངས་ལོ་མང་པོའི་རྗེས་ནས་གཞི་ནས་ཤེས་པ་ཡིན། 

ཁྱེད་ཀྱིས་ཨ་ཕ་ས་ནས་བཟོད་སྲན་དང་། མི་གཞུང་དྲང་། གཞན་ལ་རོགས་རམ་བྱེད་པ། ཀུན་ལ་མཐུན་པོ་གནང་བ། སྤྱི་ཚོགས་ཀྱི་འགན་འཁྲི་ལེན་པ། གཡོ་སྒྱུ་ཁྲམ་གསུམ་མེད་པའི་ཕོ་རྒོད་ཅིག་གི་མི་ཚེའི་བརྒྱུད་རིམ་དེར་མིག་དཔེ་དང་སློབ་སྦྱོང་བྱས་ཏེ། དགེ་རྒན་དང་སློབ་གྲྭ་ནས་ཐོབ་པའི་ཤེས་ཡོན་གྱིས་ང་ཚོའི་གྲོང་ཚོལ་ལས་རྒལ་ཏེ་ངེད་ཅག་མི་རིགས་ཀྱི་ཁྱིམ་ཚང་ཆེན་པོ་དེ་སྐྱོང་ཐུབ་དགོས། སྐབས་དེ་དུས་ཁྱེད་ཀྱིས་ཕ་ཤུལ་བུ་འཛིན་བྱེད་ཐུབ་ཡོད་པས་ང་ཚོས་ཁྱེད་ལའང་དྲི་མེད་ཀུན་ལྡན་ཞེས་མིང་མདོག་དེ་འབོད་ཆོག

 ༢༡༤/༨/༣༠

ཨ་ཡེས།-ཁམས་སྐད། རྨོ་རྨོ་ལ་གོ 

གསལ་བཤད།>> དངོས་བྲིས་རྩོམ་ཡིག་ཅིག་ཡིན་སྟབས་ཚོར་བ་དངོས་དང་ཐག་ཉེ་དགོས་པས་ཨ་ཡེས་ལས་རྨོ་རྨོ་ཞེས་མ་བྲིས།