ཕ་ཡུལ་དང་དགུན་ཟླ།










དགུན་འཁྱགས་ལག་པས་ས་གཤིན་དམ་དུ་འཆིང་།།
བཞུན་རྒྱུན་བཙན་པོ་འགུལ་མེད་མལ་དུ་བསྙལ།།
མཐོ་འགྱིང་རི་ཚོམ་གངས་དཀར་རྩམ་པས་གཡོགས།།
ཕ་ཡུལ་སྐྱིད་པོ་ཆབ་རོམ་སྦུབས་ན་ཚུད།།

ལྗོན་པའི་འདབ་ལོ་སྟོང་ལྡན་ཁྲ་ཆིམ་བཞད།།
གྲུ་བཞི་ཞིང་སར་སྟོན་ཐོག་གཡོར་ཞིང་ལྡེང་།།
རི་སུལ་སྟེབས་མར་སྔོ་ལྗང་ཚོས་ཀྱིས་བྲིས།།
དགུན་ལྷགས་སྔུན་ན་སྐྱོ་བའི་ཁ་རུ་བསྟབས།། 

སྐྲ་ཕོན་དམར་དཀྲིས་ཕོ་ཉམས་སྟོབས་ཀྱིས་བརྗིད།།
ཁུར་ཚོས་མདོག་དམར་ཉམ་ཆུང་འཛུམ་གྱིས་བཀོང་།།
ཕོ་རྒོད་མཛེས་མའི་རང་ཆོས་མེ་ཏོག་ཆུན།།
ནམ་ཟླ་འཁྱགས་པའི་དཔང་ན་ཁ་སོ་བརྡབ།།

རྩིགས་ཁུག་རྒྱབ་སྙེ་ཉི་ལྡེང་རྒས་པོ་ཁྱུ།།
གཉེར་རིས་བསྡུས་པའི་མི་འདོད་རྣམ་འགྱུར་འབུར།།
བྱིས་ཆུང་ལག་རེངས་ཁ་རླངས་དྲོད་ཀྱིས་གསོས།།
དཔྱིད་ལ་རེ་བའི་མིག་ཟུང་རྒྱོང་ལ་སྲིངས།།
-----------
2014-12-3

0 comments:

Post a Comment