སྙན་ངག་གི་མཆོད་པ། ཞི་བདེ་གཟེངས་རྟགས་ལ་ཕུལ།

སྙན་ངག་གི་མཆོད་པ། ཞི་བདེ་གཟེངས་རྟགས་ལ་ཕུལ།


རྩོམ་པ་པོ། དངོས་དགའ།- བཙན་རུས།-འཇའ་ཐང་འབྲང་བུ།-གངས་བཙན་པོ།-བློ་དབང་།-སྲོང་བཙན།




                           བསྟོད་པ་དད་པའི་རི་མོ།
    
                                      –•དངོས་དགའ།
ཀུན་ལ་ཕན་ན་ཀྱོག་ཐིག་ཙམ་ལ་ཕྱི་ནུད་ཕར་ཟད་ནོན་གྱིས་འཇུག ། 
འཚེ་བའི་ལས་ཀྱི་ཟུར་ཆ་ཙམ་ལ་སྐད་ཅིག་ཙམ་ལའང་གཡེང་བ་སྤངས། ། 
འདྲིས་དང་མ་འདྲིས་འཇིག་རྟེན་ཡོངས་ལ་བརྩེ་བའི་བསམ་པས་ཤུགས་ཀྱིས་མཁྱུད། །
ཤེས་ལྡན་མི་བུ་སུ་ཞིག་ཡིན་ན་ཞི་བདེའི་མགོན་པོར་འདི་ལྟར་བསྟོད། ། 
མཚོན་དང་དམག་དཔུང་ཏིལ་འབྲུ་ཙམ་གྱིས་རྒྱབ་རྟེན་དཔུང་གཉེན་འཚོལ་མ་མྱོང་། །
དམར་སེར་མདོག་ཅན་ཐེབས་ཆག་ཙམ་ཞིག་རྟག་ཏུ་བསྣམས་པའི་གྲྭ་རྐྱང་འདིས། །
སྐྱེ་རྒུ་ཡོད་ཚད་གཉེན་དུ་བཀུག་པའི་མཛད་པ་འདི་ནི་ངོ་མཚར་ཆེ། །
ཤེས་ལྡན་མི་བུ་སུ་ཞིག་ཡིན་ན་ཞི་བདེའི་མགོན་པོར་འདི་ལྟར་བསྟོད། ། 

མགོན་པོ་གང་ཉིད་ཀྱི་སྐྱབས་འོག་པ་དངོས་དགས་2013, 12,10, དགོང་མོར་དང་བ་ཆེན་པོས་སྦྱར་བའོ། །
---------------------------------------------------------------------------

      གངས་རི་གླིང་གི་ཉི་ཟེར།
         
                                       –•བཙན་རུས།

བཙན་པོ་བཞུད་པའི་མྱ་ངན་ཐང་དཀྱིལ་དུ།།
སྲིད་པའི་ཀློང་ནས་ཉི་འོད་མ་ཤར་ཡང་།།
རྒྱ་ཕིབས་མུན་པས་བསྒྲུབས་པའི་བར་གསེང་ནས།།
ཞི་བདེའི་ཆར་ཟིམ་བབས་པའི་གཏམ་རྒྱུད་བྱུང་།།

གངས་རི་གླིང་ཕྲན་མེ་ཡིས་སྲེགས་ཤུལ་དུ།།
གདོང་དམར་རིགས་ཀྱི་རུས་རྐང་མཐོར་ན་ཡང་།།
མཐེབ་བོང་གནམ་ལ་རེ་བའི་མིག་ཆུའི་ཁྲོད།།
མེས་པོའི་ཁྲག་རྒྱུན་གསེབ་ནས་ཞི་བའི་གཏམ།།

རྟེན་འབྱུང་བསླུ་བ་མེད་ཅན་སྟོན་པ་པོ།།
ས་འཛིན་གཞིས་སུ་མ་འཛིན་ཕེབས་རྗེས་ལ།།
བསྟན་པ་ཆུ་བོ་རྒྱུན་སྐྱོང་གསོ་བའི་མགོན།།
གོ་ལའི་གཞི་ཁྱིམ་འདི་ལ་གསར་དུ་བཞད།།

ལྐོག་གྱུར་སྲིད་ཀྱིས་རྒྱལ་ཕམ་གླེང་བ་ནས།།
མི་ཆོས་འཚོ་བའི་གནད་ཀྱི་བྱ་བ་བཅས།།
འཚེ་མེད་སེམས་པའི་ལམ་གྱི་གཞུང་ཤིང་དུ།།
གང་གི་ཐུགས་ཀྱིས་སྐྱོང་མཛད་ཞི་བའི་དཔོན།།

དེ་ལྟར་ཐུགས་ཀྱི་དྲོ་འཇམ་ཉི་འོད་ཀྱིས།།
སྲིད་པའི་གླིང་འདིའི་མི་ཡི་རིགས་ཅན་ལ།།
ཟེར་མ་བློ་ཡིས་གསེབ་ཏུ་སྟེར་བས་ན།།
མགོན་པོ་གང་ནི་ཞི་བདེའི་དེད་དཔོན་འོ།།

ངེས་རྟེན་གཞི་ཁྱིམ་བྲལ་བའི་ཡུལ་གྱལ་ངས།།
ཞི་བའི་དེད་དཔོན་མཚོན་པའི་གཟུ་དཔང་ཉིན།།
དགའ་གུས་གཟུགས་ཅན་མིན་པའི་འདུན་པ་ཡིས།།
གང་ཉིད་སྐུ་ཚེ་རྟེན་པའི་སྨོན་ལམ་འདེབས།།

  ༢༠༡༤-༡༢-༨ ཉིན།
-----------------------------------------------------------------

    སྙན་ངག་གི་མཆོད་པ། ཞི་བདེ་གཟེངས་རྟགས་ལ་ཕུལ།

                                            –•འཇའ་ཐང་འབྲོག་བུ།

རྣམ་སྲས་བང་མཛོད་ཀྱི་སྡེའུ་མིག་དགྲ་བོས་ཁྱེར་སོང་། །
ཕོ་བྲང་དམར་པོ་ཡི་མཁར་རྫོང་སྒྱོགས་ཀྱིས་གཏོར་སོང་། །
བཙན་པོའི་གདུང་རྒྱུད་ཀྱི་སྤོབས་པར་བར་ཆད་གཡབ་དུས། །
གངས་དཀར་རྭ་བ་ཡི་རྐང་རྗེས་རྗེན་པ་རྗེན་རྐྱང་། །

བྱམས་བརྩེ་དཀྱེལ་ཡངས་ཀྱི་བསམ་པས་འཛུམ་ཞལ་གྲོལ་སོང་། །
གཞན་ཕན་མཐའ་མེད་ཀྱི་ནུས་པས་དགོད་སྒྲ་ཤོར་སོང་། །
འཛམ་གླིང་ཞི་བདེ་ཡི་འགན་འཁྲི་ཕྲག་པར་ལེན་དུས། །
ཐལ་མོ་ཙོག་ཙོག་གི་ཕྱག་རྒྱ་དྲོན་པོ་དྲོ་རྐྱང་། །

བཙན་གནོན་ང་གཅིག་གི་གྲོས་དོན་རྫུན་པར་བསྒྲགས་སོང་། །
བཅིང་གྲོལ་དམར་དམག་གི་གསང་བའི་རྒྱབ་འདུན་བཏོར་སོང་། །
བདེན་དོན་རྒྱལ་ཁམས་དང་རྒྱལ་ཁམས་ལྷན་དུ་བརྡར་དུས། །
རང་བཙན་གཙང་མ་ཡི་རྒྱབ་ཤ་དཀར་པོ་དཀར་རྐྱང་། །

ཀུན་ཁྱབ་ལྷག་བསམ་གྱི་དཔུང་བས་བྱས་རྗེས་བཞག་སོང་། །
ཐ་དད་མི་རིགས་ཀྱི་འདྲ་མཉམ་བདག་གིར་བཞེས་སོང་། །
ནོར་སྦེལ་གཟེངས་རྟགས་ཀྱི་ཆེ་བ་མགུལ་རྒྱན་སྒྲོན་དུས། 
ཞི་བདེའི་དེད་དཔོན་གྱི་མཚན་སྙན་བདེན་པ་བདེན་རྐྱང་། །

ལྟ་བ་མཐའ་བྲལ་གྱི་རྟེན་འབྱུང་རང་གཤིས་རྟོགས་སོང་། །
སྤྱོད་པ་འཚེ་མེད་ཀྱི་བྱ་བས་ཉིན་མཚན་བདས་སོང་། །
འཁོར་ཚོགས་རྒྱ་མཚོ་ཡི་དབུས་ནས་དམ་ཆོས་འཆད་དུས། །
མ་བཅོས་སྤྱན་ཟུང་གི་འདབ་མ་རློན་པ་རློན་རྐྱང་། །

རྒྱལ་པོའི་ལམ་ལུགས་ཀྱི་སྲིད་ཇུས་མགོ་གཞུག་སློག་སོང་། །
ཡང་དག་དམངས་གཙོ་ཡི་སྒོ་མོ་དལ་གྱིས་ཕྱེས་སོང་། །
དགའ་ལྡན་ཕོ་བྲང་གི་མིང་བྱང་གཤག་བཅོས་གཏོང་དུས། །
དེང་རབས་ཆབ་སྲིད་ཀྱི་ལམ་སྲོལ་གསར་བ་གསར་རྐྱང་། །

ཕྱོགས་རིས་ཆོས་བརྒྱད་ཀྱི་འཆིང་བའི་མདུད་པ་བཀྲོལ་སོང་། །
སྣ་ཚོགས་ཞྭ་རིགས་ཀྱི་མཛེས་རྒྱན་དབུ་ལ་བསྒྲོན་སོང་། །
མ་འདྲེས་སྙིང་རྗེ་ཡི་ལེགས་བཤད་ཀུན་ལ་འགྲེམ་དུས། །
གྲངས་མེད་འགྲོ་ཁམས་ཀྱི་མོས་ངོར་གཅིག་པ་གཅིག་རྐྱང་། །

སྤྱི་ལོ༢༠༡༤ཟླ༡༢ཚེས༩ཉིན་སང་ཉིན་གྱི་འཛམ་གླིང་ཞི་བདེའི་དུས་དྲན་ལ་དམིགས་ཏེ་མེའི་སོར་འགྲུལ་བཞུད་ཀྱི་སྤྱི་སྤྱོད་རླངས་འཁོར་ཞིག་ཏུ་བྲིས།
-----------------------------------------------------------------

    གངས་ཅན་པའི་ཁ་བསོད་ཉིན།

                                                 –•གངས་བཙན་པོ།

ངོ་མཚར་གསར་པའི་དགའ་སྟོན་དེ་རིང་བསུ།།
ཞི་བདེ་སྣང་བ་དཀར་པོའི་ངང་ཚུལ་འདིས།།
རྒྱལ་ཕྲན་གླིང་བཞིར་འགྲོ་བའི་དོན་དུ་བྱོན།།
གོ་ལ་ཟླུམ་པོའི་སྟེང་ན་ཁྱེད་ཉིད་རྒྱལ།།

ས་ཆེན་རྐང་པའི་འཇལ་ཀྱང་སྲིད་པ་འཕེལ།།
ལུས་ཀྱི་དར་རྒུད་གཡོ་བའི་འཇིག་རྟེན་འདིར།།
སྙིགས་མའི་དུས་ཀྱི་འཛུམ་དྲུག་ཤོར་ལ་ཁད།།
བསིལ་ལྡན་ལྗོངས་ཀྱི་ཉི་མ་ཁྱེད་ཉིད་རྒྱལ།།

ཡུལ་ཁམས་སྐྱོངས་བའི་ང་ཕོ་ཡོད་ནའང་།།
རང་དབང་བདེན་པའི་ལམ་ཁར་བསྐྱོད་མཁན་དཀོན།།
ལོ་རྒྱུས་ཁྲག་གི་དཀྲུགས་པའི་མུན་པའི་གླིང་།།
མཐའ་མཚམས་འདི་ན་ཁྱེད་ཉིད་ཞི་བའི་རྒྱལ།།

གནས་ལུགས་རྟོགས་པའི་ཅ་ཅོ་འདོན་མཁན་མང་།།
དུས་ཀྱི་འགྱུར་བག་གནས་ལ་རྨོངས་བས་ན།།
འཚེ་མེད་ཞི་བའི་རིན་ཐང་མི་རྟོགས་ཨང་།།
མཁས་མཛངས་འབུམ་གྱི་དབུས་ན་ཁྱེད་ཉིད་རྒྱལ།།

གྲང་ངར་ལྕགས་སྒྲོག་སྲ་བའི་ལུས་གཡོགས་ཀྱང་།།
གངས་ཅན་རྒུད་པའི་རེ་བའི་དུས་འདའ་བར།།
ས་འོག་དར་ཐག་འཐེན་པའི་གནས་འདི་ན།།
གཞུང་ཤིང་དྲང་བའི་ནང་ན་ཁྱེད་ཉིད་རྒྱལ།།

ལ་ལ་ཤེས་བྱའི་གནས་ལ་མཁས་ཀྱང་རུང་།།
གཞན་ཕན་སེམས་ཀྱི་རྩ་བ་མེ་རུ་བསྲེགས།།
ངག་གི་རྩེ་དགའ་རོལ་བའི་འཛམ་གླིང་འདིར།།
སྣ་འཛོམས་གཟེངས་རྟགས་ཕུལ་བ་ཁྱེད་ཉིད་རྒྱལ།།

བརྩེ་བའི་བྱམས་པས་བསྐྱངས་པའི་སྲོག་ལྡན་དང་།།
དེང་རབས་འཕྲུལ་ཆས་གསར་བའི་འཇོ་སྒེག་གཉིས།།
ཚུལ་མཐུན་ལས་ལ་སྦྱར་བ་ངོ་མཚར་གནས།།
ཀྱེ་མ་ཞིང་འདིར་གཟིགས་མཁན་ཁྱེད་ཉིད་རྒྱལ།།

འདས་པའི་ལོ་ཟླ་དཀའ་སྡུག་ངང་གིས་བསུ།།
ཐོར་ཞིག་མི་རིགས་ཤིག་གི་དར་རྒུད་བསམ།།
སྤྲང་འཁྱམས་མི་ཚེ་ཞིག་གི་སྐྱོ་གུར་འོག།
རྒྱུས་མེད་ཡུལ་དུ་ཁྱེད་ཉིད་བདེན་པའི་རྒྱལ།།

མཐོན་པོའི་དཔུང་ལ་བཙན་པོའི་རྗེས་ཡོད་པས།།
རུས་པ་ས་ལ་འཐིམས་པའི་ལོ་རྒྱུས་མང་།།
ཞེན་ཆགས་གནས་སུ་འཕེལ་བའི་རྨི་ལམ་ཁམས།།
བསམ་གཞིགས་ཁྲོད་ན་གདམས་པ་ཁྱེད་ཉིད་རྒྱལ།།

དེ་རིང་བཀྲ་ཤིས་ཉི་མ་འོད་ཀྱིས་བསུས།།
ཁ་བ་གངས་ཅན་པ་ཡི་དགའ་སྟོན་ཡོད།།
འཛམ་གླིང་ཞི་བདེ་ནང་ནས་ཁྱད་མཚར་ཅན།།
ལྷ་མོ་དོན་གྲུབ་ཁྱེད་ཉིད་ཕྱོགས་བཅུར་རྒྱལ།།

  ༸གོང་ས་མཆོག་ལ་འཛམ་གླིང་ཞི་བདེའི་གཟེངས་རྟགས་ཕུལ་ནས་ལོ་གྲངས་ཉེར་ལྔ་འཁོར་བའི་དུས་སྟོན་འདིར་ཆེད་དུ་སྤེལ།   ༢༠༡༤/༡༢/༡༠ཉིན་ཕུལ།
---------------------------------------------------------------                  


    བསྟོད་ཚིག་དད་པའི་མེ་ལོང་།     
                                            –•བློ་གཡང་

སྐུ་ཡི་མཚན་དཔེའི་འཛམ་གླིང་ཡོངས་སུ་ཁྱབ།།
གསུང་གི་བདུད་རྩིས་གདུལ་བྱའི་ཤེས་རྒྱུད་བརླན།།
ཐུགས་ཀྱི་བརྩེ་བའི་སྐྱེས་འགྲོ་བདེ་ལ་འགོད།།
ཕྱག་ན་པད་མོ་བསྟན་འཛིན་རྒྱ་མཚོར་འདུད།།

སྤྱི་ན་བདག་ཅག་སྟོན་པའི་བསྟན་པ་དང་།།
བྱེ་བྲག་འཇམ་མགོན་བླ་མའི་བསྟན་པ་དེར།།
དཀའ་བ་ཁྱད་གསོད་ངལ་བ་དང་བླངས་ཏེ།།
འཛིན་མཁས་སྤེལ་ལ་ཟླ་བྲའི་མགོན་པོར་འདུད།།

སྤྱོད་པ་འཚེ་མེད་ལྟ་བ་རྟེན་འབྱུང་ཞེས།།
ཐ་སྙད་སྲོལ་གཏོད་ཞི་བདེའི་ལམ་སྟོན་པོ།།
འཛམ་གླིང་ཞི་བདེ་བསྐྲུན་ལ་ངལ་མ་གྱུར།།
ཞི་བདེའི་དེད་དཔོན་ཆེན་པོ་ཁྱེད་ལ་འདུད།།

ཡང་སྒོས་ཁ་བ་ཅན་གྱི་ལྗོངས་འདི་ལ།།
ཤིན་ཏུ་བརྩེ་བའི་བོད་མི་སྐྱབས་གཅིག་ཉིད།།
ཐུགས་རྗེས་གཟིགས་ཤིང་ཡལ་བར་འདོར་མྱོང་མེད།།
བཀའ་དྲིན་གཞལ་མཐའ་བྲལ་བའི་མགོན་པོར་འདུད།།

རང་ཡུལ་གངས་ཅན་ལྗོངས་དང་ཞལ་བྲལ་ཏེ།།
རྒྱུས་མེད་གཞན་ཡུལ་ཕེབས་དགོས་བྱུང་ན་ཡང་།།
བསྟན་དགྲ་རྒྱ་མིའི་ཐོག་ཏུ་ཁོང་ཁྲོའི་ཚབ།།
བྱམས་དང་སྙིང་རྗེ་སྒོམ་པོ་ཁྱེད་ལ་འདུད།།

གཞན་ཡུལ་ཕེབས་ཏེ་བགྲང་བྱ་ང་ལྔ་སོང་།།
རྐྱེན་ངན་གྲོགས་འཆར་བརྗོད་པ་མ་རུང་ནའང་།།
འཛམ་གླིང་ཀུན་ལ་ཏཱ་ལའི་བླ་མ་ཞེས།།
ཡོངས་སུ་གྲགས་པའི་མགོན་པོ་ཁྱེད་ལ་འདུད།།

མདོར་ན་༧སྐྱབས་མགོན་ཏཱ་ལའི་བླ་མ་ཡིས།།
ཞི་བདེའི་གཟེགས་རྟགས་བཞེས་པའི་དུས་དྲན་ལ།།
གཞིས་བྱེས་བོད་མི་ཡོངས་ཀྱིས་ཚབ་བྱས་ཏེ།།
སྐུ་ཚེ་ཁྲི་ཕྲག་བརྟན་པའི་སྨོན་འདུན་ཞུ།།

མཛད་པ་ཆ་ཤས་ཙམ་ཞིག་བྲིས་ཁུལ་བྱས།།
གསོན་འོས་སྙན་པོའི་དབྱངས་དང་མ་འདྲེས་ཀྱང་།།
བློ་དམན་བུ་ཆུང་བློ་གཡང་བདག་གིས་ནི།།
བླ་མ་དྲན་པའི་གདུང་བ་ངག་ནས་ཤོར།།

ཕྱི་ལོ ༢༠༡༤/༡༢/༡༠ ཉིན་མགོན་པོ་ཁྱེད་ཀྱི་སློབ་གྲལ་དུ་འཁོད་པའི་ཐ་ཤལ་བ་བློ་གཡང་ནས།
-----------------------------------------------------------------

བདག་གི་མཆོད་པ། ཉེར་ལྔ་ལ་ཕུལ།
                                                 –•སྲོང་བཙན།

བྱིན་བསིར་ཆབ་ཀྱིས་གླང་པའི་རང་གཤིས་བརླན།།
མཚན་དཔེ་ཉི་གཞོན་ཟེར་བརྒྱས་སྨག་རིབ་འདེེད།།
དཀྱེལ་ཡངས་ས་ཆེན་དེས་ནི་དྲོད་ཀྱིས་སྐྱོང་།།
གངས་ཅན་མགོན་པོ་བསྟན་འཛིན་རྒྱ་མཚོ་མཁྱེན།།

རྟེན་འབྱུང་སྙན་དབྱངས་རིང་མོ་འགུལ་དུ་བླངས།།
འཚེ་མེད་སྲབ་འཇམ་དར་ཡུག་ཕྱག་ཏུ་བཞེས།།
བྱམས་བརྩེ་ཀུན་མཉམ་འཛུམ་མུར་ཞལ་ནས་འཕྲོས།།
གངས་ཅན་མགོན་པོ་བསྟན་འཛིན་རྒྱ་མཚོ་མཁྱེན།།

གཟེངས་པ་མེ་ཏོག་ཕྲེང་བ་སྣ་ཚོགས་མོད།།
ཞབས་རྡུལ་སྤྱི་བོས་བླངས་པའི་ཟློས་གར་མཚར།།
ཕྱོགས་བཞི་ས་ཆེན་འགྲིམས་པའི་སེམས་པ་ཆེ།།
གངས་ཅན་མགོན་པོ་བསྟན་འཛིན་རྒྱ་མཚོ་མཁྱེན།།

རང་སྲོག་དམར་ཆུང་མཆོད་ལ་མི་འཛེམ་པར།།
རང་ལུས་སྡོང་རྐང་འཛུགས་པའི་བོད་འབངས་ཚོས།།
ཟུང་ཁྲག་སྒྲོན་མེར་སྤར་ནས་སྐྱབས་ཞུ་བའི།།
གངས་ཅན་མགོན་པོ་བསྟན་འཛིན་རྒྱ་མཚོ་མཁྱེན།།
༢༠༡༤/༡༢/༩ མེ་སོར་གྲོང་ཁྱེར་ནས།

No comments:

Powered by Blogger.