Skip to main content

གཞས་ཚིག་ཚོམ་བུ།——སྲོང་བཙན་གྱི་གཞས་ཚིག་ཚོམ་བུ།


མ་ཡུལ་བོད། 

 (གཞས་ཚིག)    ––•སྲོང་བཙན།

སྔོ་ཞིང་དྭངས་པའི་ནམ་མཁའ་འདི། ང་ཚོ་བོད་ཀྱི་མཁའ་དབྱིངས་རེད། དྭངས་གཙང་ནམ་མཁའ། ང་ཚོའི་མེས་པོ་ཚོས་ནམ་འཕང་གཅད་ས་རེད། ནམ་མཁའ་ཡ། ང་ཚོ་བོད་ཀྱི་མཁའ་དབྱིངས།
 མཐོ་ཞིང་བརྗིད་པའི་གངས་རི་འདི། ང་ཚོ་བོད་ཀྱི་གངས་རི་རེད། ཇོ་མོ་གླང་མ། ང་ཚོའི་མེས་པོ་ཚོས་རྒྱབ་རྟེན་བཅོལ་ས་རེད། གངས་རི་ཡ། ང་ཚོ་བོད་ཀྱི་གངས་རི།

རྒྱུག་ཅིང་འབབ་པའི་ཆུ་བོ་འདི། ང་ཚོ་བོད་ཀྱི་ཆུ་བོ་རེད། གསེར་ལྡན་རྨ་ཆུ། ང་ཚོའི་མེས་པོ་ཚོས་དཔའ་སྟོབས་ངོམ་ས་རེད། རྨ་ཆུ་ཡ། ང་ཚོ་བོད་ཀྱི་འབབ་ཆུ།
བཙན་ཞིང་དམར་བའི་ཕོ་བྲང་འདི། ང་ཚོ་བོད་ཀྱི་ཕོ་བྲང་རེད། ཕོ་བྲང་དམར་པོ། ང་ཚོ་མེས་པོ་ཚོས་རྒྱལ་ཕྲན་འགུག་ས་རེད།
ཕོ་བྲང་ཡ། ང་ཚོ་བོད་ཀྱི་ཕོ་བྲང་།

དཔའ་ཞིང་ངར་བའི་མི་རིགས་འདི། ང་ཚོ་བོད་ཀྱི་མི་རིགས་རེད། བཙན་པའི་མི་རིགས། ང་ཚོའི་མེས་པོ་ཚོས་ཕྱི་མིག་ལྟ་ས་རེད། མི་རིགས་ཡ། ང་ཚོ་བོད་ཀྱི་མི་རིགས།
དམ་ཞིང་གཙང་བའི་མཐུན་སྒྲིལ་འདི། ང་ཚོ་བོད་ཀྱི་མཐུན་སྒྲིལ་རེད། སྤུན་ཟླ་མཐུན་སྒྲིལ། ང་ཚོའི་མེས་པོ་ཚོས་ཁུ་ཚུར་སྒྲིམ་ས་རེེད། མཐུན་སྒྲིལ་ཡ། ང་ཚོ་བོད་ཀྱི་མཐུན་སྒྲིལ།
–––––––––––––––––––––––––––––––––––––––––––––
2014-12-6

ཕ་ཡུལ་དཀར་མཛེས།

གཞས་ཚིག -•སྲོང་བཙན།

སྤྲིན་པ་ལང་ལོང་འཕྱུར་བ། ཨ་སྔོན་སྔོ་ཞིང་དྭངས་བ། ཁྲི་གདུག་ཉི་མ་སེར་པོ། ནམ་མཁའ་དྭངས་གཙང་འདི་ནི། ང་ཡི་ཕ་ཡུལ་དཀར་མཛེས། ཕ་ཡུལ་དཀར་མཛེས།
སྨུག་པ་སིབ་སིབ་འཐིབ་པ། གངས་རི་མཐོ་ཞིང་བརྗིད་པ། སྤུན་གསུམ་ཁ་བ་ལོ་རིང་། རི་ལུང་མཛེས་པོ་འདི་ནི། ང་ཡི་ཕ་ཡུལ་དཀར་མཛེས། ཕ་ཡུལ་དཀར་མཛེས།

སྙེམ་མ་ལྡེམ་ལྡེམ་གཡོ་བ། རྩ་ཐང་ལྗང་ཞིང་ནེམ་པ། སྟོན་ཐོག་འབྲི་རིགས་སྣ་ལྔ་། ས་གཞི་ཕྱུག་པོ་འདི་ནི། ང་ཡི་ཕ་ཡུལ་དཀར་མཛེས། ཕ་ཡུལ་དཀར་མཛེས།
དགོད་སྒྲ་ལྷང་ལྷང་སྒྲོག་པ། སྐྱེས་ཕོ་དཔའ་རྩལ་འཛོམས་པ། བུ་མོ་སྐྱེས་གཟུགས་ཡག་པོ། མི་བཟང་གཤིས་བཟང་འདི་ནི། ང་ཡི་ཕ་ཡུལ་དཀར་མཛེས། ཕ་ཡུལ་དཀར་མཛེས།
2014-12-6

Comments