བདག་གི་གསལ་བཤད་དང་དུས་བབ་ཚང་གི་སྐྱུགས་བྲོ་བའི་ངོ་གདོང་།

ད་ཐེངས་ཀྱི་<<དུས་བབ་ཚང་གི་སྐྱུགས་བྲོ་བའི་ངོ་གདོང་།>>ཞེས་པའི་རྩོམ་ཡིག་འདི་ནི་བདག་གི་རྩོམ་ཡིག་ངོ་དེབ་དུ་བཀོད་པ་དག་ལས་དགའ་རྟགས་དང་མཆན་བཀོད་ཆེས་མང་ཤོས་དེ་ཡིན། དགའ་རྟག53དང་མཆན་བཀོད159འདུག་པས་བདག་གི་བསམ་པ་ལས་ཆེས་ཆེར་རྒལ་སོང་། 

དགའ་རྟགས་འདི་ལྟར་མང་དོན་ནི་དུས་བབ་ཚང་གི་གདོང་འབབ་འཐུག་པོ་དེའི་འོག་གི་ངོ་གདོང་རུལ་དྲི་ཅན་དེ་གསལ་བསྟན་བྱས་པས་ཡིན་སྲིད་ལ། མཆན་བཀོད་མང་ཤོས་ཀྱིས་ནི་ངེད་ལ་སྨ་འབེབས་དང་ཟུར་ཟ་ཧམ་བཤད་སོགས་གང་མང་བྱས་འདུག ངས་ཇི་ལྟར་བསམས་ཀྱང་འདི་ལྟར་ཡོང་དོན་ནི་གཅིག་ན་དུས་བབ་ཚང་གི་སྐྱོན་འཚང་བསྔོགས་པ་དང་གཉིས་ན་རྩོམ་ཡིག་གི་ཁྲོད་ན་ཨ་མདོ་ཞེས་པའི་ཚིག་གསུམ་སྤྱད་ཡོད་པས་ཡིན་སྙམ།མི་མི་ཉུང་ཞིག་གིས་ངེད་ཀྱི་རྩོམ་ཡིག་གི་ཁ་ཕྱོགས་བསྒྱུར་ཏེ་འདས་པོ་ཁོང་གཉིས་ལ་སྨ་འབེབས་ཡིན་ཚུལ་དང་། ཡང་ཁམས་དང་ཨ་མདོའི་བར་གྱི་རེས་ཆད་ཀྱི་སྐད་ཆ་སྡུག་པོ་དེའི་ཐོག་ཏུ་འདྲེན་གང་ཐུབ་བྱེད་སོང་། ཁྱེད་ཚོས་ཇི་ལྟར་བཤད་ཀྱང་ཆོག་ལ་གང་འདྲ་བསམ་རུང་མི་ཆོག་པ་མེད། རེད་དེ། ཁྱེད་ལ་ཨ་མདོ་ཞེས་བཤད་ཙམ་ལའང་སྙིང་ལ་གས་ཆག་དང་སྟོད་ན་རླུང་གིས་འཚང་ཡོང་བ་ནི་ད་བར་ང་དང་ཁྱེད་ཁོ་དང་མོ་ཟེར་བའི་འཇིག་རྟེན་གྱི་སྦྲུལ་ཚང་དུ་ཁོད་ཅིང་གནས་པས་ཡིན། འདིར་ངེད་ཀྱིས་ཁག་མེད་སྙམ་པའི་བསམ་བློ་སྐྱེས་ཐུབ་སྟེ་གཞན་ཕན་དང་སྙིང་རྗེ། ཀུན་ཁྱབ་ཀྱིས་ཁེངས་པའི་གཞུང་ལག་མཐུལ་ཙམ་ལའང་མིག་ལྟོས་དང་བསམ་གཞིགས་བྱེད་མྱོང་མེད་ན་རང་ཁ་གསོ་ཐབས་ཙམ་གྱི་ཆེད་དུ་དེང་གི་བྱེད་ལུགས་སྡུག་པོ་དེ་འདྲ་ནི་ལུས་དང་གྲིབ་མ་བཞིན་ཡོང་ཞིང་རྒྱུ་བ་ཡིན་པས་ནམ་ཡང་བྱེད་ལུགས་འདིའི་འོག་ནས་ཐར་དཀའ། 

ཁོ་བོས་དུས་རྒྱུན་དུ་ཁ་སེམས་གཉིས་ནས་བརྒྱ་ཁ་གཅིག་གཅོད་ཀྱིས་ཨ་མདོ་ཡག་དང་ཁམས་པ་གཙོག་ཟེར་བ་དང་། ཁོ་ཚོ་སྡུག་དང་ངེད་ཅག་བཟང་ཟེར་བའི་སྐད་ཆ་དང་བསམ་པ་ཞིག་གཏན་ནས་འཁོར་མ་མྱོང་ཟེར་ནའང་ཆོག རེད་དེ། བྱ་དངོས་ཀུན་ལ་བཟང་ངན་གྱི་ཆ་གཉིས་ཡོད་པས་བཟང་པོས་ངན་པ་བཀག་མི་ཐུབ་ཅིང་ངན་པས་བཟང་པོར་གཡོགས་ཐུབ་ཐབས་དཀའ་ན་གང་ཞིག་ཡོན་ཏན་དང་ཅི་ཞིག་སྐྱོན་ཡིན་པ་སྨྲ་བསམ་བྱེད་ནའང་ངས་ནི་ནམ་ཡང་མི་འགྲིག་པ་ཞིག་རེད་སྙམ་གི་མེད། ལྟ་ཚུལ་འདིའི་འོག་ནས་གྲོགས་པོ་དང་འཛིན་གྲོགས་ཚོ་ལ་ཁྱེད་ཚོ་ཨ་མདོ་བའི་མ་འགྲིག་པ་འདི་རེད་ཅེས་བཤད་མྱོང་ཞིང་། ཚུར་ངེད་ལའང་ཁྱེད་ཚོ་ཁམས་པའི་མ་འཐུས་པ་དེ་ཡིན་ཟེར་ནས་མཛུབ་མོ་བཙུགས་ཏེ་ཕན་ཚུན་བཤད་རེེས་དང་ཉན་རེས་བྱེད་པའི་ལོ་དུས་བཅུ་ཕྲག་དེའི་ནང་དུ་ངེད་ཅག་གི་དབར་དོགས་མི་བདེ་བ་དང་སྒོམ་མདོག་དང་ཁོ་ཚོ་དང་ང་ཚོ་ཟེར་བའི་བར་ཐག་རིང་པོ་དེ་གཏན་ནས་མེད་པར་གྱུར་ནས་གང་ལའང་འཛེམ་གཟན་བྱེད་མི་དགོས་པའི་ལྷན་ཡོངས་ཀྱི་འཁོར་ཡུག་དེ་སྐྲུན་ཐུབ་སོང་། 

ཡང་ད་ཐེངས་འཕག་འཚགས་རྒྱག་མཁན་དེ་དག་གིས་ཡང་སྙིང་ཅི་ཞིག་ཆེད་དུ་སྨྱོ་བཞིན་ཡོད་དམ་། རྩོམ་ཡིག་གི་ནང་འདས་པོ་ཁོང་གཉིས་ཀྱི་གནད་དོན་དེ་དུས་བབ་ཚང་གིས་མི་བཀོད་པའི་རྒྱུ་མཚན་དེ་ཁོང་གཉིས་ཨ་མདོ་བ་ཡིན་པའི་རྒྱུ་མཚན་གྱིས་ཨེ་ཡིན་སྙམ་པའི་དོགས་པ་སྐྱེས་སོང་ལ། དེ་ལྟར་སྐྱེ་མི་ཆོག་ཅེས་བཙན་བཀའ་གཏོང་མཁན་ཚོས་ཐེ་ཚོམ་ཟ་མི་ཆོག་ཡིད་ཆོས་བྱེད་དགོས་ཟེར་བཞིན་ཡོད་པས་ཁྲིམས་ལུགས་དང་ཀུན་སྤྱོད་གང་ཞིག་དང་མཐུན་ཐབས་མེད་ན་ངེད་ཀྱིས་ཀྱང་ལགས་སོ་དང་ཡ་ཡ་ཟེར་ཐུབ་ཐབས་མི་འདུག 

གྲྭ་གཟུགས་དང་བླ་རྒན་སོགས་དེང་སྐབས་གྲྭ་པ་མིག་ལ་མི་འགྲོ་བའི་མི་འགས་སྤྱོད་བཞིན་པའི་ཐ་སྙད་དེ་དག་ཡང་སྐོར་བསྐྱར་སྐོར་བྱེད་ལུགས་ལ་ལྟོས་ན་ཆེད་དུ་གྲྭ་པའི་སྡེ་ནག་པོ་བཟོ་ཐབས་ཀྱི་ངན་ཇུས་འཐེན་པ་གསལ་པོ་རེད། བོད་ཆོས་དང་བླ་མས་འཕུང་། གྲྭ་པ་དང་ཆོས་པ་མི་མཁོ་ཟེར་བའི་གསར་བུ་སྣང་མཐོ་འགས་བྱེད་ལུགས་ཤ་ཚ་དགོས་པ་དེ་དག་ལ་སྙིང་རྗེ་བ་ལས་འོས་མེད་ན་ཡང་། མ་མཐའ་ཡང་མིག་གཉིས་རེ་ཡོད་པས་དེང་སྐབས་ཀྱི་གྲྭ་པ་ཚོས་ཉིན་མཚན་འཁོར་མོ་ཡུག་ཏུ་གཞུང་ལུགས་རབ་འབྱམས་ལ་བརྩོན་པ་གཅིག་ཏུ་མི་ལོ་བཅུ་ཕྲག་གསུམ་ཙམ་ལ་སྦྱོང་པ་དང་སྦྱང་འབྲས་རི་བོ་ལས་ཆེ་བ་དག་འཛམ་གླིང་ཁྱོན་དུ་སྟོན་བཞིན་ཡོད་ན་མི་མཐོང་བ་མི་སྲིད་པས་གུས་པས་ཆེད་དུ་ཁྱེད་ཅག་ལ་མིག་མ་བཙུམ་ཞེས་གདམས་པ་ཡིན།

གདམ་པ་འདི་ཉིད་ཁྱེད་ལ་སྩལ་བའི་དྲ་གྲོགས་ཁོ་བོས་བྱིན་པའི་ལག་རྟགས་ཙམ་ཡིན། ཁྱེད་ཀྱིས་ལག་སྙིལ་ཁ་སྦྱར་གྱིས་ལེན་པའི་ཆོ་ག་བྱེད་མ་ཐུབ་ནའང་ལྕེ་རྩེ་བཞག་ནས་མངར་སྐྱུར་གྱི་བྲོ་བ་རེ་མྱོང་དང་སླད་ནས་རང་ཉིད་འབབ་སྟེགས་མེད་པའི་མཐོ་ས་འཛེམ་ཡོད་པ་ཤེས་རྟོགས་དང་མྱོང་ཚོར་གསོན་པོ་རེ་སྐྱེ་ཡོང་བ་ཁོ་ཐག་ཡིན། དེ་དུས་རྐང་འོག་ན་ཡོད་ཀྱང་མཐོ་སྣང་དང་། ནག་ཁུང་ན་སྡོད་ཀྱང་ངོ་ཚ་བེར་བེར་གྱི་སྣང་བ་ལིང་ལིང་དེ་སྐྱེ་ངེས་པས་སྐབས་དེར་ཅི་ནས་ཀྱང་རྐང་པའི་འདེགས་འཇོག་མ་བཞག་པར་སྐྱོད་དང་འགྲོ་ལམ་རེ་ཡོད། ཁ་དྲོ་བཀྲ་ཤིས།