དཔེ་དེབ་བཀླགས་ཐོ་དང་དཔེ་ཆ་འདེམས་སྒྲུག


དཔེ་དེབ་ཀློག་རྒྱུ་ནི་གུས་པར་མཚོན་ན་ཆེས་དགའ་ཤོས་ཀྱི་བྱ་བ་ཞིག་ཡིན་པས། དཔེ་དེབ་ཆེ་མ་ཆུང་གསུམ་མང་པོ་ཞིག་བམ་ཀློག་དང་ཞིབ་ཀློག ཆེད་སྦྱོང་དང་ཟུར་བལྟ། ཕབ་བཤུས་དང་འདྲ་བཤུ་བྱས་པ་ཆེས་མང་བ་ཙམ་མ་ཟད། དཔེ་དེབ་ཉོས་པའང་གྲངས་ལས་འདས་པས་གྲྭ་རྐྱང་ཞིག་གི་ཇ་མངར་མོ་འཐུང་སྐལ་དེའང་ཐེངས་མང་པོར་ཆད་མྱོང་། ལོ་འགའི་ཡར་སྔོན་ནས་དཔེ་དེབ་བཀླགས་ཐོ་འབྲི་བའི་གོམས་གཤིས་ཤིག་འཇག་ཐབས་ཀྱིས་བཀླགས་ཐོ་འབྲི་བ་རྒྱུན་འཁྱངས་དང་ཨུ་ཚུགས་བྱས་པའི་དུས་དེ་ནས་བཟུང་སྟེ །དཔེ་དེབ་མང་པོ་ཞིག་ཀློག་པའི་ཡི་ག་འགག་ཅིང་ལྟ་བའི་བསམ་བློ་ཡོངས་སུ་ཆད་ནས་ན་ནིང་ད་ལོ་དཔེ་དེབ་གཅིག་ཀྱང་ཆ་ཚང་ཞིག་ཧ་ལམ་ཀློག་མེད།

བཀླགས་ཐོ་འབྲི་བའི་བརྒྱུད་རིམ་ཁྲོད་ན་དཔེ་དེབ་དེ་བཀླགས་ནས་བློ་སྐྱེད་ཅི་བྱུང་དང་། ནང་དོན་གསར་པ་དང་ཚིག་སྦྱོར་སྤྱོད་ཚུལ། ལུང་འདྲེན་དང་དཔེ་མཚོན་འགོད་སྟངས་སོགས་ལ་དོ་སྣང་བྱེད་དགོས་པས། དཔེ་དེབ་མང་པོ་ཞིག་ལ་ཅི་ཙམ་དོ་སྣང་དང་ཡིད་འཇོག་བྱེད་རུང་འདི་ཡིན་གྱི་བློ་སྐྱེད་ཅི་ཡང་མ་བྱུང་བས་དེ་ནས་འགོ་ཚུགས་ཏེ་དཔེ་དེབ་ཡོད་ཚད་ལ་མིག་གཡར་དང་བྱ་ར་བྱེད་པའི་ཁོམ་གླགས་དེ་མཇུག་བསྡུས་པ་ཡིན།

མ་གཞི་དཔེ་དེབ་ཇུས་འགོད་དང་དཔེ་ཚོགས་འཆར་འགོད་སོགས་ནི་བོད་ནས་ཐོན་པའི་དཔེ་དེབ་དག་ཧ་ཅང་སྤུས་ཚད་ཅན་དང་ཡར་ཐོན་གྱི་ཚད་གཞིར་སླེབས་འདུག་པས་མཐོང་ཙམ་ནས་ཀློག་འདོད་ཀྱི་འགྲམ་ཆུ་ལྡང་ཡོང་བ་ཞིག་རེད། ང་དང་འདྲ་བ་ཚོས་དཔེ་དེབ་འདི་ཚོ་སྒོར་མོ་ཕོན་ཆེ་བྱིན་ནས་ཉོས་ཡོད་ལ། སྐབས་རེ་ཉོ་འདོད་ཀྱིས་ལག་པ་ཟ་འཁྲུགས་ལང་ནའང་འཕུར་འཕུར་འགའ་བྱས་ནས་ཡོང་རྒྱུ་ལས་མེད་པ་ནི། དཔེ་དེབ་ཀྱི་གོང་ཚད་མཐོ་དྲགས། རང་ཉིད་འབྱོར་པ་དམའ་དྲགས་པས་རེད། དེང་ཕྱིས་ནས་ཇུས་འགོད་ནི་སྒྲིབ་གཡོག་ཙམ་ལས་ནང་སྙིང་ཅི་ཡང་མེད་པའི་དཔེ་དེབ་ཧ་ཅང་མོད་པོ་ཡོད་པར་ཤེས་པས། ཀུན་ལ་ལག་པས་རེག་པའི་བྱ་ལུགས་དེ་ཡོངས་སུ་མཚམས་འཇོག་བྱས་པ་ཡིན།

ངེད་རང་རྩོམ་ཡིག་འབྲི་བར་སྤྲོ་བ་ཅན་ཞིག་ཡིན་པའི་རྒྱུ་མཚན་འདི་གར་ཐུག་པས་ཡིན་སྙམ་སྟེ། དཔེ་དེབ་དེ་གའི་ཚིག་སྦྱོར་བཀོལ་སྟངས་ལ་དོ་སྣང་བྱེད་པར་ཤོར་འགྲོ་བས། ཚིག་སྦྱོར་སྙན་འཇེབས་ལྷུན་ཆགས་པ་བསྟར་བའི་དཔེ་དེབ་ཅིག་ཡིན་ན། ཚར་གྲངས་ཅི་ཙམ་བཀླགས་ཤིང་འདོན་ནའང་ད་དུང་སྙན་པོ་ཞིག་འདུག་ཨང་སྙམ་གྱིན་བསྐྱར་ཀློག་ཡང་ཀློག་བྱེད་ཀྱི་ཡོད། འདི་ལྟ་བུའི་སྡེབ་ལེགས་ཚིག་སྦྱོར་ལྷུང་ལྷུང་བབས་པའི་དཔེ་དེབ་ནི་ཆེས་ཉུང་ལ། ཉུང་བ་ཙམ་མ་ཟད་རེ་གཉིས་ལས་མེད་པའི་ཁྲོད་ནས་གཅིག་ནི། སྒོར་ཤེས་རབ་རྒྱ་མཚོའི་དཔེ་དེབ་དག་རེད། <ང་ཚོ་སད་རན།> <རྒྱུན་ཤེས་དང་ལམ།> <དཔྱད་རྩོམ་དང་ལྟ་ཚུལ།> སོགས་ཀྱི་དཔེ་ཆ་དག་གི་ནང་དོན་འཐད་ལ་ལྟ་ཚུལ་དང་བློར་མི་བབ་པ་ཡོད་ལས་ཆེ་ནའང་། ཚིག་སྦྱོར་བཀོལ་སྟངས་འདི་འདྲ་ནི་ད་ལྟ་ཞལ་བཞུགས་འཚོ་གནས་ཡོད་པའི་གངས་ཅན་པའི་རྩོམ་པ་པོ་ཞིག་མེད་ཚད་དུ་སྣང་ལ། འདིའི་ཚིག་སྦྱོར་དག་སྤྱིར་བཏང་ཞིག་ཡིན་སྙམ་པ་འདོད་མཁན་ཞིག་ཡིན་ན། སྙན་མི་སྙན་གྱི་བྲོ་བ་འབྱིན་པའི་ཚོར་ཤེས་ལ་སྐྱོན་ཞུགས་ཟིན་པས། ཅི་མགྱོག་ཛ་དྲགས་སྨན་ཁང་དུ་བསྟེན་གཏུགས་བྱེད་དགོས་པའི་དུས་ལ་སླེབས་ཡོད། ད་དུང་དེ་མུས་སྡོད་ན་མངར་སྐྱུར་གྱི་བྲོ་བ་མྱོང་བའི་ཚོར་ཤེས་ཀྱང་མེད་འགྲོ་སྲིད།

ཁོང་ལ་འདི་ལྟ་བུའི་ཚིག་སྦྱོར་ལྷུན་ཆགས་ཞིང་སྙན་ཞིང་འཇེབས་པའི་ཚིག་གི་ཕྲེང་བ་དེ་གང་ནས་རྙེད་པ་ཡིན་ནམ། ལུང་སྐད་དང་འགྱུར་ཚིག་བསྒྲིགས། མི་འཛའ་བའི་ཚིག་བསྡུ་སྤུངས། བེད་མེད་ཀྱི་བརྡ་རྙིང་བཀོལ་བའི་དཔེ་ཆ་དག་དང་གནམ་ས་ལྟ་བུར་ཁྱད་བཞུགས་པའི་འབྱེད་ཆོས་དེ་སུས་བྱིན་པ་ཡིན་ནམ། གལ་ཏེ་ཁོང་ལ་དྲི་བ་འབུལ་བའི་གོ་སྐབས་ཤིག་བྱུང་ཚེ། ཆེས་ཐོག་མ་འདྲི་རྒྱུ་དེ་ནི། སྙན་འཇེབས་ཚིག་སྦྱོར་འདི་འདྲ་ཇི་ལྟར་བྱས་ཏེ་བཀོལ་སྤྱོད་དང་སྦྱངས་པར་བྱས་སམ་ཞེས་པ་འདི་རང་ཡིན། གང་ལྟར་ཁྱེད་རང་གསར་རྩོམ་ལ་མོས་པ་ཡོད་ཅིང་། ཚིག་སྦྱོར་ལ་སྤྲོ་དགའ་ཅན་ཞིག་ཡིན་ན་སྒོ་ཤེས་རབ་རྒྱ་མཚོའི་དཔེ་དེབ་དག་ཡང་ཡང་ཀློག་དགོས་རྒྱུ་དེ་ནི་ངས་བཤད་འདོད་པ་དེ་ཡིན།

དེང་སྐབས་ནང་སྙིང་ཅི་ཡང་མེད་པའི་<གཏོར་བརླག>གི་མཚེར་མ་རྩེ་རྣོ་ཅན་གྱིས་ཁེངས་པའི་དཔེ་དེབ་དང་། དཔེ་ཚོགས་དག་བྲིན་ཁ་སྐྱོན་ཞིང་། འདུར་རྒྱུག་མྱུར་བའི་འཁོར་ཡུག་ཨ་གསར་ཅན་གྱི་དུས་རབས་ཤིག་གི་མགོ་འབུས་ཤིང་རྩེ་མོ་རྒྱས་གྲབས་ཡིན་སྐབས་དེར། རིག་གསར་གྱི་ཡོ་ལང་ཤིག་བྱུང་ན་སླར་ཡང་རྙིང་གཞི་རྩ་གཏོར་དང་གསར་བྱུང་ནང་འདྲེན་ཐུབ་པའི་དཔའ་བོ་གྲངས་མེད་པ་ཞིག་ཅིས་ཀྱང་ཡོང་ངེས་སྙམ་པའི་དུས་ཚིགས་འདིར། ད་ལྟ་ད་དུང་རྙིང་གཞི<གཏོར་བརླག>བྱེད་བསམ་གྱི་གང་བའི་དཔེ་ཆ་དག་ལྟས་ན་བློ་སྐྱེད་འཕེལ་བ། བསམ་ན་ཡིད་རྟོག་རྒྱས་པའི་ཆ་ཞིག་གང་ནའང་མེད་པས། ཁྱེད་ཀྱིས་གང་ཞིག་བལྟ་དགོས་པ་དང་། ཅི་ཞིག་ཀློག་ན་འཐུས་པའི་ནང་བསམ་དེ་མཛུབ་རྩེར་སྐོར་དགོས། 

མི་ལ་ལ་ཞིག་ཏུ། <གཏོར་བརླག>གིས་ཁེངས་པའི་དཔེ་དེབ་དག་ཕར་སློག་ཚུར་སློག་བྱས་ཏེ་ཡ་མཚན་རབས་དང་། སྐད་གྲགས་ཡོད་ཚུལ་གྱིས་གནམ་ས་གང་བའི་སྐད་འུར་དུང་འབུད་འབུད་ཀྱིས། ཅི་ཞིག་ཐོབ་སྙམ་དུ་འཕག་འཚབ་བརྒྱག་པའི་རྡིར་སྒྲ་ཅི་བས་ཆེ་ལ། ཁྱེད་ལ་ཅི་ཞིག་ཐོབ་བམ། ནང་སྙིང་དང་ཚིག་གྲུབ་གང་རག་གམ། ཞེས་འདྲི་ཚིག་གཅིག་ལ་གཉིས་མཐུད་དུ་དྲིས་ན། འདུག་དང་ཡོད་ཟེར་བ་ལས་སྙིང་པོ་གཏམ་དུ་བྱས་པའི་ལེགས་བཤད་ཁ་གང་འཆད་རྒྱུ་མེད་པ་ནི་དེང་གི་མི་མང་པོ་ཞིག་གིས་དཔེ་དེབ་ཀློག་སྟངས་དང་དཔེ་ཆ་འདེམ་སྒྲུག་བྱེད་ཚུལ་གསོན་པོ་ཞིག་རེད། 

འུ་ཅག་གིས་ཞིབ་ཏུ་མ་བསམ་ན་ཡོད་དང་བཟང་ཟེར་ས་ན་ཐུར་དུ་འདྲུད་བྱེད་ཀྱི་ཀྱོ་བ་གུག་མོ་དེ་ཡོད་སྲིད་ལ། མེད་དང་སྡུག་ལབ་ས་དེ་ན་གྱེན་དུ་འདེབས་པའི་རྐ་བ་རིང་པོ་རེའང་ཡོད་སྲིད་པས། དཔྱད་ཤེས་ལ་དྲང་ཚུགས་དང་། ཤེས་རབ་ལ་གསོན་ཤུགས་བྱིན་དགོས་པ་ལས་སབ་སོབ་ཏུ་གྱུར་པའི་སྐད་ཆ་དང་། གཟུངས་བཞུག་མེད་པའི་འདམ་སྐུ་རྫིག་པོ་རེ་བཞེང་ན་ཅི་ཡང་མི་ཕན་པས། སྙིང་པོ་གཏམ་དུ་བྱས་པའི་དཔེ་དེབ་དང་དོན་སྙིང་ཁོག་ཏུ་སྦྲུམ་པའི་དཔེ་ཆ་རེ་བལྟ་རྒྱུ་ནི་གལ་ཆེ་བ་སྙམ་མོ།།

0 comments:

Post a Comment