བོད་ཀྱི་ཆ་འཕྲིན་གསར་འགྱུར་ཚན་པ་གཉིས།



བོད་རྒྱའི་འཕྲུལ་ཆས་ཡིག་སྒྱུར་གྱི་ཞིབ་འཇུག་ལ་གྲུབ་འབྲས་ཐོབ་པ།

  རིག་འབྱུང་དྲ་བའི་འཕྲིན། སྨྱན་སྦྱོར་གྱི་ལས་ཀ་ཕུན་ཚོགས་ཇེ་རྒྱས་སུ་སོང་བ་དང་བསྟུན། སྟེང་གི་བཀོད་པའི་སྒྲིག་གཞིར་འགྱུར་བ་སྣ་ཚོགས་ཤིག་འབྱུང་གིན་ཡོད་པ་ནི། འཕྲུལ་ཆས་ཀྱིས་མིའི་ཚབ་བྱེད་པའི་སྟབས་བདེ་རང་བཞིན་དེས་མི་རྣམས་ལ་སློབ་སྦྱོང་གི་གོ་སྐབས་གསར་བ་དང་དུས་ཚོད་མང་པོ་གསོག་འཇོག་ཐུབ་ཀྱིན་ཡོད་པ་རེད། དེ་བས་དུས་རབས་ཉེར་གཅིག་པ་མགོ་ཚེས་བ་ནས་རྒྱལ་ཁབ་དང་མི་རིགས་གང་ཡིན་ཡང་རང་སྐད་ཡིག་གི་འཕེལ་རྒྱས་དེ་གཙོ་བོ་གཞུང་ལུགས་སོགས་ཕྱི་རྐྱེན་གཙོ་བོར་འཛིན་གྱིན་མེད་པར་ཡི་གེའི་ནང་རྐྱེན་གྱི་གྲུབ་ལུགས་དང་དེའི་བཀོལ་སྤྱོད་དང་ཁྱབ་རྒྱ། རྩིས་འཕྲུལ་གྱི་མ་ལག་གསར་འབྱེད་སོགས་ཀྱི་འཕེལ་ཁ་དེའི་མཚོན་གྱིན་ཡོད་པ་རེད། 
སྔོན་ཡིན་ན་རྩིས་འཕྲུལ་ཡི་གེའི་མ་ལག་འཐུས་སྒོ་ཚང་བའི་དབྱིན་ཡིག་སོགས་ལ་དེ་དང་འབྲེལ་ཡོད་ཀྱི་འཚོལ་བཤེར་མ་ལག་དང་ཚིག་མཛོད་སོགས་ཡོད་པ་མ་ཟད། ཐ་ན་ཡིག་བསྒྱུར་གྱི་མཉེན་ཆས་ཡང་ཡོད་པ་ནི། མི་རིགས་གང་དེའི་སྐད་ཡིག་གི་བརྡ་སྤྲོད་ལ་འགལ་ཆ་མ་བྱུང་ན་ནང་དོན་ཕལ་ཆེ་བ་ཞིག་མི་རིགས་གཞན་གྱི་ཡི་གེར་དྲ་རྒྱའི་སྟེང་ཐད་ཀར་བསྒྱུར་ཆོག་པ་རེད། ལག་རྩལ་དེའི་རིགས་དབྱིན་ཡིག་དང་རྒྱ་ཡིག ཧྥ་རན་སེའི་ཡི་གེ་སོགས་ལ་ལྡན་ནས་ཡོད་པ་མ་ཟད། ཐ་ན་འབར་མ་དང་བལ་བོ། སོག་པོ་སོགས་མི་གྲངས་ཉུང་ངུའི་སྤྱོད་ཀྱིན་པའི་ཡི་གེ་དག་ལའང་སྔོན་ཆད་ནས་བྱུང་ཡོད་པ་ནི། འཛམ་གླིང་གི་སྐད་ཡིག་དགུ་བཅུ་ལྷག་ཕན་ཚུན་ལོ་ཙྰ་བྱེད་ཐུབ་པའི་མ་ལག་གོ་ངྒལ་དྲ་ངོས་སུ་བཞག་ཡོད་པ་རེད། 
རྗེས་ལུས་ཀྱི་གནས་བབ་སྐྱོ་བོ་དེ་བསྒྱུར་རྒྱུའི་ཐབས་སུ་བོད་ལྗོངས་སློབ་ཆེན་དེང་རབས་སློབ་གསོ་ལག་རྩལ་ལྟེ་གནས་ཀྱི་ཀྲུའུ་རེན་ཉི་མ་བཀྲ་ཤིས་ཀྱིས་བོད་ལྗོངས་ཀྱི་བོད་ཡིག་ཆ་འཕྲིན་ཅན་ཞིབ་འཇུག་དཔུང་སྡེའི་སྣེ་ཁྲིད་དེ། རིམ་པ་བཞིན་རྒྱལ་སྤྱིའི་ཚད་གཞི་ཅན་དང་རྒྱལ་ཁབ་ཚད་གཞི་ཅན་གྱི་བོད་ཡིག་བཟོས་པ་དང་། བོད་ཡིག་རྩིས་འཕྲུལ་གྱི་སྟེགས་བུ་དང་བོད་ཡིག་རྩིས་འཕྲུལ་གཞུང་ལས་མཉེན་ཆས་ཁ་ཚང་དང་། བོད་ཡིག་འགུལ་ལྡན་ཁ་པར། བོད་ཡིག་འཕྲིན་ཐུང་སྤེལ་གཏོང་སྟེགས་བུ། བོད་རྒྱ་སྐད་གཉིས་རྒྱང་སྦྲེལ་སློབ་གསོའི་མ་ལག་སོགས་རྒྱལ་ནང་གི་སྟོང་ཆ་གསབ་པའི་ཆ་འཕྲིན་ཐོན་རྫས་རབ་དང་རིམ་པ་བཟོས་ནས་བཏོན་པ་དང་། ཉེ་ལམ་ཡང་ལོ་གསུམ་གྱི་དུས་ཚོད་བེད་སྤྱད་དེ་ལེགས་འགྲུབ་བྱུང་བའི《ཉི་འོད་བོད་རྒྱ་འཕྲུལ་འཁོར་ཡིག་སྒྱུར་མ་ལག》དངོས་སུ་སྤྱོད་ཐུབ་པ་བྱུང་ལ། ལས་གཞི་དེའི་ནང་དུ་བོད་ཡིག་གི་ཐ་སྙད་རང་དབྱེ་དང་དེའི་ངོ་བོ་མཆན་འགོད། བོད་སྐད་ཀྱི་སྐད་མཛོད། ཚིག་ཐུང་གཞིར་བྱས་པའི་བོད་རྒྱ་སྡོམ་རྩིས་འཕྲུལ་ཆས་ཡིག་སྒྱུར་སོགས་ཁྱབ་ཁོངས་མི་འདྲ་བར་ཟབ་འཇུག་བྱས་ཡོད་པ་རེད། བོད་རྒྱ་དྲ་ཐོག་ཡིག་སྒྱུར་མ་ལག་འདིའི་ཁ་ཕྱེ་ནས་བོད་ཡིག་དུམ་བུ་ཞིག་གཏགས་པ་ན། ལམ་སེང་དེའི་རྒྱ་ཡིག་གི་འགྱུར་ཡིག་ཐོན་ཡོང་ལ་དག་མ་ཡིན་ཚད་ཀྱང་ཅུང་མཐོ། 
-------------------

ཆེད་ལས་བོད་རྒྱ་ཡིག་སྒྱུར་མཉེན་ཆས་མ་ལག་ཐོག་མ་འགྲེམ་ལ་ཉེ་བ།


     མི་དམངས་དྲ་བའི་འཕྲིན། ཉེ་ཆར། བོད་ལྗོངས་སློབ་གྲྭ་ཆེན་མོའི་དེང་རབས་སློབ་གསོ་ལག་རྩལ་ལྟེ་གནས་སུ་རྒྱུས་ལོན་བྱུང་བ་ལྟར་ན། ཀྲུང་གོའི་ཆེད་ལས་བོད་རྒྱ་ཡིག་སྒྱུར་གྱི་མཉེན་ཆས་མ་ལག་ཐོག་མ་མི་འགྱངས་པར་ཕྱི་རུ་འགྲེམ་རྒྱུ་ཡིན་པ་དང་། སྐབས་དེར་རིན་མེད་སྒོས་མང་ཚོགས་ལ་ཡིག་སྒྱུར་ཞབས་ཞུ་འདོན་སྤྲོད་བྱ་རྒྱུ་རེད།
     མ་ལག་མཉེན་ཆས་འདིའི་མིང་ལ་ཉི་འོད་བོད་རྒྱ་འཕྲུལ་འཁོར་ཡིག་སྒྱུར་མ་ལག་ཅེས་ཟེར་ཞིང་། བོད་ལྗོངས་སློབ་ཆེན་གྱི་མི་20ཡིས་གྲུབ་པའི་ཞིབ་འཇུག་གསར་སྤེལ་ཚན་ཆུང་གིས་དུས་ཡུན་ལོ་3རིང་ཚན་རྩལ་གྱི་དཀའ་གནད་བཏོལ་ཏེ་མ་དངུལ་སྒོར་ཁྲི་200བཏང་ནས་རང་ཉིད་ཀྱིས་ཞིབ་འཇུག་གསར་སྤེལ་ལེགས་འགྲུབ་བྱུང་བ་ཞིག་ཡིན་པ་དང་། མིག་སྔར་མཚོན་བྱེད་རང་བཞིན་གྱི་ཞིབ་འཇུག་གྲུབ་འབྲས་བླངས་ཤིང་ཡིག་སྒྱུར་གྱི་ཡང་དག་ཚད་75%ལ་སླེབས་ཡོད་པ་རེད། ཞིབ་འཇུག་ཚན་ཆུང་འདིས་ད་དུང་བོད་ཡིག་མིང་མཚམས་རང་དབྱེ་དང་མིང་ལ་རྟགས་མཚན་འགོད་པར་རོགས་འདེགས་ཀྱི་བོད་ཡིག་གློག་རྡུལ་ཚིག་མཛོད་ཡང་ཞིབ་འཇུག་གསར་སྤེལ་བྱས་ཡོད་དེ། <<འཕྲུལ་ཀློག་ཚིག་མཛོད་>>དང་། <<མིས་ཀློག་ཚིག་མཛོད་>>གཉིས་ཡོད།

No comments:

Powered by Blogger.