ས་ག་ཟླ་བ་བཤན་པའི་ལོ་གསར།

ས་ག་ཟླ་བ་ནི་དུས་ཆེན་གསུམ་འཛོམས་ཀྱི་ཟླ་བ་ཞིག་ཡིན་ལ་ཟླ་བ་འདིར་བོད་ཡུལ་སྟོད་སྨད་བར་གསུམ་དུ་སྡིག་སྤང་དགེ་སྒྲུབ་བྱེད་པའི་ལམ་སྲོལ་བཟང་པོ་མི་ནུབ་ཇེ་རྒྱས་དང་འཐུས་སྒོ་ཇེ་ཚོགས་སུ་འགྲོ་བཞིན་ཡོད་ཅིང་། འདིའི་རིང་དུ་སྲོག་བླུ། ཚེ་ཐར། སྦྱིན་གཏོང་། བསྙུང་གནས་སོགས་སྡིག་འཛེམ་དང་དགེ་སྒྲུབ་བྱེད་པའི་བྱ་བའི་རྣམ་གྲངས་མང་པོ་ལག་བསྟར་བྱེད་མུས་ཡིན་པ་ནི་དགའ་འོས་རང་བཞིན་ཞིག་ཅི་ལ་མིན།

དེ་ལྟར་ནའང་ན་ནིང་ད་ལོའི་ས་ག་ཟླ་བ་ནི་རྣམ་པ་གཞན་ཞིག་ཏུ་འགྱུར་ཉེན་དང་སྡིག་སྤང་གོ་ལྡོག་ཏུ་སོང་གྲབས་བྱེད་པའི་གོ་རྒྱུ་ཐོས་རྒྱུ་མང་པོ་འདུག་ཅིང་། གཅིག་གཅིག་གིས་ཚེ་ཐར་སྐྲག་མོ་བཏང་སོང་། གཉིས་གཉིས་ཀྱིས་སྲོག་གླུ་དཔེ་མེད་བྱས་སོང་ཟེར་བའི་གཏམ་སྙན་ཞིག་གི་ཆེད་དུ་སྲོག་བླུ་དང་ཚེ་ཐར་རྒྱ་ཆེན་བཏང་ཞིང་། སྦྱིན་གཏོང་གི་བྱ་བ་ཆེས་ཆེར་མཛད་ནས་ས་ག་ཟླ་བ་ནི་བཤན་པའི་ལོ་གསར་ཞིག་ལ་གྱུར་ཏེ་བཤན་པ་ཚོས་སྔོན་ཚུན་ནས་ས་ཕྱོགས་གང་ས་ནས་ར་ལུག་དང་སྒོ་ཟོག་ཕོན་ཆེར་ཉོས་ཤིང་གོང་ཚོད་ལྡབ་ལོག་སྤར་ནས་དགོད་འཛུམ་འཛུམ་གྱིས་ས་ག་ཟླ་བ་ངང་སྒུག་བྱས་ནས་སྡོད་ཡོད། ད་དུང་རྒྱ་ནག་གི་ཡུལ་གྲུ་གཞན་ནས་ཉ་རིགས་ཕོན་ཆེར་དབོར་འདྲེན་གྱིས་བོད་ཀྱི་ས་ག་ཟླ་བ་རེ་སྒུག་གིས་ཉོ་ཚོང་གི་བྲེལ་བ་འཚུབ་འཚུབ་བྱེད་གི་ཡོད། 

མ་རྩ་དེ་ཙམ་མེད་པའི་བཤན་པ་ཚོར་ཁེ་སྤོགས་དོ་ལོག་སྤྲད་དེ་ཁོ་ཚོས་སྔ་ལྷག་བཤན་ལས་བྱེད་པའི་མ་རྩ་བཙུགས་ནས་བཤན་ཚོང་གི་ལས་ཇེ་མང་དང་ཇེ་ཡག་ཏུ་བཏང་ནས་ཚེ་སྲོག་ཤོར་བའི་གྲངས་ཀ་ལོ་རེ་བཞིན་ཇེ་འཕེལ་དུ་གཏོང་བཞིན་ཡོད། ཁྱེད་ཀྱིས་ས་ག་ཟླ་བའི་དགེ་སྒྲུབ་གནང་སྟངས་དེས་སེམས་ཅན་ཤི་བའི་གྲངས་ཀ་ཇེ་འཕར་དང་ཚེ་སྲོག་ཤོར་བའི་སྒོ་ཟོག་ཇེ་མང་དུ་འགྲོ་བཞིན་པ་ནི་དངོས་ཡོད་ཀྱི་བྱུང་བ་ཞིག་ཡིན་པས་ཁྱེད་ཀྱི་ཅི་དགའ་བསམ་བློ་ཞིབ་མོ་ཐོངས།

ད་དུང་ས་གཞན་གྱི་ཉ་རིགས་ཡུལ་གཞན་གྱི་མཚོ་དང་མཚེའུ་ནང་དུ་གཏོང་ན་ས་ཆུ་མི་འཕྲོད་པར་གསོན་པོར་གནས་རྒྱུ་ཆེས་དཀའ་མོ་ཞིག་ཡིན་ལ་འདི་ནི་སྐྱེ་ཁམས་འཕེལ་འགྱུར་གྱི་འགྲོ་སྟངས་ཡིན་པས་ཚན་རིག་ལ་ཁ་ཕྱོགས་པའི་མི་ཞིག་ཡིན་ན་གསལ་གསལ་ཐིང་ཐིང་ཤེས་ངས་རེད།

དབུས་གཙང་ཕྱོགས་སུ་ས་ག་ཟླ་བར་སྦྱིན་གཏོང་བྱ་བ་གཉེར་བས་ཟླ་བ་འདིར་བོད་མི་ཕྱེད་ཀ་སློང་མོ་བ་ཞིག་ཏུ་གྱུར་སྙམ་སྟེར་ལ། གྲོང་གསེབ་འགར་ཁྱིམ་སྟོང་པ་བསྐྱུར་ནས་སློང་མོར་འགྲོ་སྲོལ་ངན་པ་ཞིག་དར་ཁྱབ་འདུག་ཅིང་། འབྱོར་བ་ཅུང་ཡོད་རུང་སློང་མོ་བྱེད་པར་འཛེམ་ཟོན་མི་བྱེད་པའི་སྲོལ་ངན་དེ་ཇེ་དར་དུ་བཏང་བས། ས་ག་ཟླ་བ་ནི་ལས་ཀ་མི་བྱེད་པར་སློང་མོ་རྒྱག་པའི་ཞོར་ལས་ཞིག་ཏུ་འགྱུར་ཉེན་གྱིས་ལོ་ཆུང་ཚོར་བབ་ཆགས་ངན་གོམས་དང་གཤིས་ཀ་སྡུག་པོ་ཞིག་ནད་ཡོམ་བཞིན་འགོས་པའང་ཁྱེད་ཀྱིས་བསམ་བློ་ཐོངས་དགོས་པ་འདུག

ཕྱོགས་ཡོངས་ཀྱི་གནས་ཚུལ་དང་གལ་ཆེ་ཆུང་གི་གདམ་ཀ་ཤེས་པའི་ཐོག་ནས་ཆོས་ལ་འཇུག་དགོས་པ་ལས་དད་པ་ཙམ་གྱིས་ཡིན་ཤག་ཤག་བྱེད་དེ་སོང་ན་རྙོག་དྲ་མཐུ་མོ་རེ་འདྲུད་དེ་འོང་བས་སྐབས་དེ་དུས་ཁྱེད་ཀྱི་དད་པ་དེས་སྡིག་ལས་འཚབ་ཆེ་རེའང་བྱེད་བཞིན་ཡོད་པས་ཅིས་ཀྱང་ཡིད་གཟབ་གནང་དགོས།

ཡག་ཤོས་བྱུང་ན་ཟླ་བ་འདིར་ཤ་ཟ་ཁྲག་འཐུང་དང་། ཆང་བཏུང་དུ་འཐེན། ཤོ་རྒྱག་བག་རྩེ། ཆོས་འཇིག་རྟེན་གང་ལའང་གནོད་ལས་སུ་སོང་བའི་བྱ་ངན་སྤངས་ཞིང་། ཤིང་སྣ་འདེབས་འཛུགས། ཁོར་ཡུག་གཙང་སེལ། དངོས་ཡོད་ཉམ་ཐག་ཁྱིམ་དུ་སྨན་བཞིན་རོགས་རམ་དང་། ཁེར་རྐྱང་རྒས་འཁོགས་དག་ལ་འཚོ་བའི་ཁ་གསབ། སློབ་མ་རྩེ་ཕུད་དང་ཉམ་ཐག་སློབ་མ་དག་གི་སློབ་ཡོན་རོགས་ཕན་བྱེད་ཐུབ་ན་ཆོས་མཐུན་ཙམ་མ་ཟད་མི་རིགས་ཀྱི་རིག་གནས་འཕེལ་རྒྱས་དང་། ཡ་རབས་གོམས་གཤིས་བཟང་པོ་མི་ཉམས་རྒྱུན་འཛིན་ཡོང་བར་ནུས་པ་གལ་ཆེན་ཐོན་ངེས་ཡིན་པས་ཀུན་གྱིས་ཐུགས་སྣང་གནང་རོགས།