བ་ཡུལ་ས་འགུལ་ལ་གདུང་སེམས་མཉམ་བསྐྱེད་ཞུ།



བལ་ཡུལ་གྱི་ས་འགུལ།

ས་ཆེན་གློག་འགྱུ་འགྲེས་པའི་ལྟེབ་སུལ་ན།།
ཨ་ལོང་ཡང་ལོང་བརྒྱུས་པའི་གཡོ་སྐྱོམ་ཁྲོད།།
ཚེ་སྲོག་མེ་ཏོག་ཁུམ་པའི་ཟློས་གར་དེ།།
སྙིང་ལ་གཟན་མ་འདེབས་པའི་ཐོ་བ་ཞིག།

ཁང་བརྩེགས་སྒྱེལ་བའི་ལེབ་མོའི་གཏིང་རུམ་ན།།
སྙོམ་མོ་སྐད་ཀྱིས་བཅོལ་བའི་རེ་བ་དེ།།
ཤ་ཟད་རུས་ལ་འཛེར་བའི་ཆག་ཧྲིལ་དེས།།
ཚེ་སྲོག་མེ་ཏོག་ལྷན་དུ་རྒྱང་ལ་དེད།།

གཅེས་ཕྲུག་པང་དུ་འཁྱུད་པའི་སོག་རུས་སྟེང་།།
སྙིང་ཉེ་ལག་འཇུ་དམ་པའི་ཁྱིམ་ཕུགས་ན།།
ལྗིག་ཐེབས་བླ་གབ་སྟུགས་པོས་བཙུར་མནན་འོག།
ཤ་རུས་ཧྲུག་ཆག་སོང་བའི་ཚུལ་དེ་འཇིགས།།

དཀུ་ཟླུམ་སྐབས་ཕྱིན་གཞོག་བཏུབ་ཕྱོགས་སུ་འཕངས།།
ཕྱག་ཞབས་འཁོར་ལོའི་མཚན་འཁོད་དུམ་བུར་གྱུར།།
དཀྱིས་རིང་སྤྱན་ཟུང་མ་ཟུམ་འགྱིང་པའི་སྐུ།།
ཐལ་རྡུལ་གོད་ཆགས་དབུས་ན་ཉམས་རེ་ང་།།

ས་ཆེན་འཁྲོས་པའི་འཕག་འཚག་ཟུར་ཐོ་དེ།།
ཁ་ཤོར་མཆོད་རྟེན་བང་རིམ་སྟེང་དུ་བྲིས།།
མི་ནག་སྐྱེ་བོས་བཟོས་པའི་ཆག་སྒོ་འདི།།
མ་བརྗེད་དྲན་རྟེན་ཚུལ་དུ་ཉར་ནས་འདུག།
---------------------

བལ་པོ། ཚེ་སྲོག་སྙིང་རྗེ་མོ། 

གནའ་སྔ་མོ་སྔ་མོ་ཞིག་ནས་
མེས་པོ་ཨ་མྱེས་ཚོའི་དུས་སྐབས་ནས་
ཨ་ཅེ་ཁྲི་བཙུན་དང་ཁོང་གི་ཉེ་དུ་རྩ་ལག་
མི་བསྐྱེད་རྡོ་རྗེའི་འགྲུལ་བཞུད་རིང་མོ་
བྱ་རུང་ཁ་ཤོར་གྱི་གཏམ་རྒྱུད་སྙིང་རྗེ་མོ་
བལ་པོ་དང་བལ་ཡུལ་
མི་དམངས་ཀྱི་ཁ་ལྕེ་བར་ནས་འཆད་པའི་བལ་པོ་
ཧ་ཅང་ཉན་སྤྲོ་བའི་གཏམ་རྒྱུད་ནང་གི་བལ་པོ་
དད་པའི་ཕྱག་སོར་ན་འགྱིང་བའི་བལ་པོ་
ལྷ་ཡི་ཞིང་ཁམས་སུ་བསྒམ་སའི་བལ་པོ་
ཡུལ་གྲུ་ཁྱད་མཚར་བའི་བལ་པོ་
གནའ་གཏམ་དང་གཏམ་རྒྱུ་ཁྲོད་ཀྱི་བལ་པོ་
ད་དུང་་་་་

བརྡ་འཕྲིན་གྱི་སྐུད་སྣེ་ན་གྲགས་པའི་བལ་པོ་
བརྙན་མིག་གི་རྒྱ་མོ་ན་འཆར་བའི་བལ་པོ་
ཐལ་རྡུལ་དང་འཐོར་ཞིག་
ངུ་འབོད་དང་འཇིགས་སྐྲག་
ཚེ་སྲོག་སྙིང་རྗེ་མོ་དེའི་འགྲམ་ངོས་ན་
ཨར་འདམ་དང་རྣོ་ལྕགས་ཀྱིས་འཛེར་ནས་
རྩིགས་རྡོ་དང་གནམ་གཅལ་གྱིས་བཙུར་ནས་
ཨ་ཤིང་དང་སྒོ་ཐེམ་བར་ན་་་་
ད་དུང་་་་་་་

རླུང་ལ་སྤུར་བའི་རྣམ་ཤེས་ཡངས་མོ་
ཁད་ཀྱིས་ཞིམ་པའི་ཚེ་སྲོག་ཕྲ་མོ་
མེ་ཏོག་ལྟར་ཁུམ་གྱིན་པའི་ལུས་གཟུགས་དེ་དག་
མ་ཡུམ་ས་ཆེན་སྐྱོམ་པའི་ལྟེབ་ཁུག་ན་
རང་བྱུང་འབྱུང་བ་འགྲེ་བའི་སྒལ་གཞུང་ནས་
བརྗོད་ཀྱང་མི་ཕོད་པའི་ཆག་སྒོ་འདི་དག་
བསམ་ཡང་མི་ནུས་པའི་འཇིགས་སྐྲག་འདི་ཚོ་
ད་དུང་་་་་

0 comments:

Post a Comment