Skip to main content

སྐད་ཆ་འདི་ཚར་གཅིག་ཉན་རོགས།


མདང་ནུབ་ང་རང་ལ་ངོ་དེབ་བརྒྱུད་ཨིན་ཡིག་གི་ལམ་ནས་ཡི་གེ་འགའ་འབྱོར་སོང་། ངས་ཁོ་ལ་སྐད་སྐུར་ཤོག་ལབ་པ་བཞིན་སྐད་ཆ་སྐུར་ནས་ངེད་གཉིས་ཕར་ཚུར་ཐེངས་མང་བཤད་རེས་བྱས་པ་ཡིན། ང་རང་ལ་བསམ་ཡུལ་ལས་འདས་པའི་སེམས་སྡུག་དང་སེམས་པ་ལྗིག་ཏིག་ཏིག་ཅིག་གིས་མནན་བྱུང་།

ཁོང་ནི་མ་སུ་རི་ནས་སློབ་ཐོན་བྱས་ཏེ་ད་སྐབས་སློབ་གྲྭ་གཞན་ཞིག་ཏུ་ཡོད་འདུག་ཅིང་རྒྱ་གར་སླེབས་ནས་ལོ་ངོ་བཅུ་ཙམ་སོང་འདུག་པ་དང་། ཁོང་གིས་ཟེར་ན་སློབ་གྲྭ་ནང་དུ་ཧ་ལས་པའི་འཚོ་བ་སྐྱོ་པོ་སྐྱེལ་བ་ཡིན། འདིར་ཕྱོགས་སྤུན་མཆེད་དང་ངོ་ཤེས་སུ་གང་མེད་པས་སློབ་གྲྭའི་གུང་སེང་ཟླ་ངོ་དེ་དག་གང་ལའང་འགྲོ་ས་མེད་པ་ལྷག་སོང་། ད་སྐབས་ཀྱི་སློབ་གྲྭ་དེ་ན་སྔ་བཞིན་མིན་པར་འགྲོ་སོང་ཡང་མང་པོ་ཞིག་སྒེར་ངོས་ནས་གཏོང་དགོས་ཀྱི་འདུག སྤུན་མཆེད་དང་ངོ་ཤེས་སུ་ཡང་མེད་པས་དཀའ་ལས་ཁག་པོ་དཔེ་འདུག་ཅེས་ཁ་གསང་པའི་ཐོག་ནས་བཤད་སོང་། 
ངས་ལེན་འདེབས་ཅི་འདྲ་ཞིག་བྱེད་དགོས་མིན་མ་ཤེས་པར་རེ་ཞིག་ལུས་སོང་། འོན་ཀྱང་མཐའ་མར་ངས་ཁ་གསང་པོའི་ཐོག་ནས་དོན་དངོས་བཤད་པ་ལས་བྱ་ཐབས་མ་རྙེད། 

ང་རང་གྲྭ་ས་སླེབས་ནས་ལོ་༡༦ཙམ་ཡིན་ལོ་དུས་དེ་དག་རིང་དུ་འཚོ་བ་སྐྱོ་པོ་སྐྱེལ་ནས་སླེབས་པ་ཞིག་ཡིན། ད་སྐབས་ཡིན་རུང་སྐུ་འགྱེད་གསོགས་ནས་ཁ་གསོ་ཐབས་ཙམ་ལས་ཅི་ཡང་མེད་མཁན་ཞིག་ཡིན་དེ་བཞིན་གྲྭ་པ་མང་ཆེ་བ་ཞིག་དེ་འདྲ་རེད། ཁྱེད་ལ་རོགས་རམ་བཟོ་ཐུབ་པའི་ནུས་པ་གང་ཡང་མི་འདུག ངོ་མ་ཡིན། ངས་དུས་རྒྱུན་སློབ་ཕྲུག་གུང་སེང་ལེན་མཁན་མེད་པའི་དཀའ་ངལ་དང་སློབ་ཐོན་བྱས་ནས་འགྲོ་ས་མེད་པ་དང་རོགས་རམ་བྱེད་མཁན་མེད་པའི་དཀའ་ངལ་མི་ཉུང་བ་ཞིག་ཤེས་གི་ཡོད། རང་ལ་ནུས་པ་ཞིག་ཡོད་ན་ངོ་མ་ཡིན་གུང་སེང་ལེན་རྒྱུ་ཙམ་རེ་ལོས་བྱེད་བསམ་གི་ཡོད། འོན་ཀྱང་གྲྭ་པའི་འཚོ་བ་ནི་སྟབས་བདེ་དང་འཚོ་བ་གཞན་བརྟེན་ཡིན་པས་གཞན་ལ་རོགས་རམ་བྱེད་རྒྱུ་ནི་དཀའ་ལས་ཁག་པོ་རེད། འདི་ལྟར་རང་གི་དངོས་ཡོད་ཀྱི་འཚོ་བ་དག་བཤད་ཡོད། 

སློབ་ཕྲུག་གཅིག་གུང་སེང་ལེན་རྒྱུ་ནི་ཧིན་སྒོར་ཆིག་ཁྲི་ཙམ་གྱི་འགྲོ་སོང་གི་ལས་ཀ་ཞིག་ཡིན་པས་ངེད་ལ་ནི་ལོ་རེའི་ཡོང་འབབ་ཀྱང་དེ་འདྲ་མེད། འོན་ཀྱང་འཚོ་བ་ཅུང་བཟང་བའི་ཁྱིམ་ཚང་དང་ཕྱི་རྒྱལ་དུ་བཞུགས་པའི་བོད་པ་གང་མང་ཞིག་ལ་ཧིན་སྒོར་ཆིག་ཁྲི་ཙམ་ནི་དེ་ཙམ་ཆེ་པོ་ཞིག་མ་རེད་སྙམ། 

སླད་ནས་རང་རང་གི་འཁོས་འབྱོར་ལ་དཔག་སྟེ་བོད་ནས་ཡོང་ཞིང་ལྟ་རྟོག་བྱེད་མཁན་མེད་པའི་སློབ་ཕྲུག་གཅིག་གཉིས་རེ་གུང་སེང་ལེན་པའམ་ཟླ་རེ་ཧིན་སྒོར་གཅིག་སྟོང་ཙམ་རེ་སྐུར་ཐུབ་ན་ཁོ་ཚོའི་འཚོ་བ་ལ་ཅུང་ཕན་ཐོགས་ངེས་པར་ཡོང་ཐུབ། འདི་ནི་དེ་ག་ཙམ་མིན་པར་སློབ་གྲྭ་དང་འབྲེལ་བ་བྱས་ཏེ་དངོས་ཡོད་དཀའ་ངལ་ཅན་དག་ལ་རོགས་རམ་བྱེད་ཐབས་དང་དེ་ལས་ཅུང་ནུས་པ་ཡོད་མཁན་དག་གིས་སློབ་ཐོན་བྱས་ཏེ་མཐོ་སློབ་དང་ཡོང་ན་ལག་ཤེས་སྦྱོང་བརྡར་ཁག་གི་འཚོ་བའི་འགྲོ་སོང་ལ་རོགས་རམ་རེ་བྱེད་ཐུབ་ན་ཧ་ཅང་ཕན་པ་ངེས་ཅན་རེད། 
ཨང་རིམ་ཐོན་པོ་བླངས་བའི་སློབ་ཕྲུག་དག་ལ་གཞུང་གི་རོགས་རམ་ཡོད་རུང་དེ་མིན་སློབ་ཐོན་དག་ལ་རོགས་རམ་ཅི་ཡོང་མེད་སྟབས་སློབ་གྲྭ་ཐོན་ཉིན་ནས་ཉིན་རེའི་འཚོ་བ་ཡང་སྐྱེལ་དཀའ་བའི་ཚོད་དུ་སླེབས་ཀྱི་ཡོད་འདུག

ཁྱེད་ཉིད་ལྟ་རྟོག་བྱེད་མཁན་མེད་པའི་སློབ་ཕྲུག་ཅིག་ཡིན་ན་འཛིན་གྲྭ་བཅུ་གཉིས་ཐོན་མཚམས་གང་ལ་འགྲོའམ་ཉིན་རེ་ལྟོ་ཐེངས་གཅིག་ཟ་དགོས་རུང་སྒོར་མོ་འདང་ངེས་ཡོད་དམ། འདི་ལྟར་བསམ་དུས་སློབ་ཕྲུག་མང་པོ་ཞིག་འཚོ་བ་སྐྱེལ་ཐབས་བྲལ་བའི་གནས་སུ་ལྷུང་བཞིན་ཡོད་པ་ཧ་ཅང་གསལ་པོ་རེད།   
 
ངེད་ཅག་ལ་རོགས་རམ་བྱེད་པའི་ཕྱི་རྒྱལ་བ་དེ་ཚོ་དཔལ་འབྱོར་འབྲིང་གྲས་དང་མང་ཆེ་བ་སྐྱོ་པོ་རྐྱང་ཡིན་འདུག འོན་ཀྱང་རང་གི་ཡོང་འབབ་ལས་ཟླ་རེར་ཨ་སྒོར་༡༠ཙམ་རེ་སྐུར་ཏེ་རོགས་རམ་བྱེད་བཞིན་ཡོད། ངེད་ཅག་བོད་མི་འབྱོར་འབྲིང་དང་ཡོང་འབབ་ཡོད་པའི་བོད་མི་ཚོས་རང་གི་་ཡོང་འབབ་ལས་ཟླ་རེ་ཧིན་སྒོར་༡༠༠༠རེ་སྐུར་ཏེ་སྦྱིན་བདག་རེ་བྱེད་ཐུབ་ན་ཅི་འདྲའི་ཡག་པོ་ཡོད།

མ་མཐའ་ཡང་ཨུ་ཐུགས་ཐབས་ཟད་ཀྱི་ལས་ཀ་དེ་འདྲ་བྱེད་པའི་གཞོན་སྐྱེས་ཉུང་དུ་འགྲོ་རྒྱུ་དང་འཚོ་བ་ལ་ཡིད་ཐང་ཆད་ནས་དུ་ནག་དང་ཆང་འཐུང་གིས་སྨྱོན་པ་བཟོ་བའི་ཐབས་ལམ་དེ་འདམ་མི་སྲིད།

Comments