འབྲས་ལྗོངས་སུ་བསྐྱོད་པའི་ཟིན་ཐོ།

(ཚན་པ་དང་པོ།)

དུས་ཚོད། 2015-5-13

རྒྱ་གར་གྱི་ས་ཁྲའི་ཆེས་མཐའ་མར་ཆགས་པའི་ཀར་ཎ་ཊ་ཀའི་མངའ་སྡེ་ནས་འགྲུལ་བཞུད་འགོ་ཚུགས།

མངའ་སྡེ་འདི་ནི་བོད་མི་བཙན་བྱོལ་བའི་གྲངས་འབོར་ཆེས་མང་ཤོས་ཡོད་ས་ཞིག་ཡིན་ལ། སེར་འབྲས་དགའ་གསུམ་དང་བཀྲ་ཤིས་ལྷུན་པོ། རྙིང་མའི་གདན་ས་དཔལ་ཡུལ་ཐེག་ཆེན་རྣམ་གྲོལ་གླིང་། ད་དུང་ས་སྐྱ་དང་བཀའ་རྒྱུད་བཅས་ཀྱི་དགོན་ཁག་དུ་མ་ཡོད། ས་འདིར་བོད་མི་རྣམས་གཞིས་ཆགས་ཁག་ལྔ་ལར་བགོས་ཡོད་པ་ནི། སྦེལ་ཀོབ་ལུགས་བསམ་བསམ་འགྲུབ་གླིང་། ཧོ་སུར་རབ་རྒྱས་གླིང་། ཀོ་ལེ་གྷལ་དོན་ལྡན་གླིང་། མོན་གྷོ་འདོད་དགུ་གླིང་བཅས་ཡིན། 

ཉིན་གུང་ཆུ་ཚོད་12ནས་སྤྱི་སྤྱོད་རླངས་འཁོར་བརྒྱུད་ཆུ་ཚོད་6རིང་དུ་འགྲུལ་བཞུད་བྱས་མཐར་མངའ་སྡེ་ཀར་ཎ་ཊ་ཀའི་གྲོང་ཁྱེར་ལྟེ་བ་སྦེང་ལོར་འབྱོར། རླངས་འཁོར་ལས་ཅ་དངོས་ཁྱེར་བཞིན་མེ་འཁོར་འབབ་ཚུགས་ཀྱི་སྒུག་ལམ་3པའི་ས་འཁོད་ཅུང་ཡོད་ས་ཞིག་ཏུ་སྤུངས། ད་དུང་ཆུ་ཚོད་4ཙམ་སྒུག་དགོས་པས་མི་དྲུག་དྭང་བླང་ཐོན་ནས་ཅ་དངོས་སྲུང་རྒྱུ་དང་གཞན་རྣམས་རང་རང་དགུང་མོའི་ནུབ་ཇ་འཐུང་བར་འགྲོ་རྒྱུ་བྱས་པ་བཞིན་རང་རང་འགྲོ་སོང་། ང་ཚོ་མི་ལྔ་མཉམ་རུབ་ཀྱིས་ཟ་ཁང་ཡག་པོ་ཞིག་ཏུ་འགྲོ་ཐབས་ཀྱིས་ལམ་གྱ་གྱུ་འགའ་བརྒྱུད་དེ་སོང་ཞིང་ལམ་བར་དུ་ཟ་མ་གཡོས་སྦྱོར་གྱི་དྲི་མ་ཡོད་ཚད་ཞིམ་པོ་ཞིག་ཚོར་ཀྱི་འདུག་པས་ང་ཚོ་ཚང་མ་ཧ་ཅང་ལྟོགས་ཡོད་པ་ཤེས་ཀྱི་འདུག ཟ་ཁང་ཅུང་ཡག་པོ་ཞིག་ནས་ཟ་མ་ཡིད་ཚིམས་པ་ཞིག་ཟས་ཏེ་ཁྲོམ་ལ་འཁྱམ་ཉུལ་ཅུང་བྱས་མོད། ཚོང་ཟོག་ཡོད་ཚད་ངེད་ཅག་ལ་མཁོ་དགོས་མེད་པ་རྐྱང་རེད་འདུག་པས་ང་ཚོ་མུ་མཐུད་ཚོང་ཁང་ཉུལ་བའི་འདུན་པའང་རིམ་བཞིན་འགག་སོང་། མཚན་མོའི་བསིལ་བ་འགམ་བཞིན་ཕྱིར་ཇི་ལྟར་ཡོང་བའང་མ་ཚོར་པར་འབབ་ཚུགས་སུ་ལྷུང་འདུག ད་ནི་གྲོད་ཁོག་རྒྱག་པ་འདྲ་སྟེ་གཉིད་འདོད་ཀྱི་ཉོབ་སྣང་ཞིག་གིས་ལུས་ཡོངས་སུ་སྡོམ་པ་ལྟར་གྱུར་ཅིང་། ང་ཚོ་མི་ལྔ་འཁོར་སྒམ་9པའི་ནང་དུ་ཁེལ་འདུག་པས་ཅ་དངོས་ཁྱེར་ཏེ་འཁོར་སྒམ་9པའི་ནང་སོང་ཞིང་སྐར་མ་6/7 གྱི་ལམ་བར་དུ་ཅ་དངོས་དག་ལྗིད་ཐག་ཆད་པས་ངལ་གསོ་ཐེངས་བཅུ་གྲངས་ཤིག་བྱེད་དགོས་བྱུང་། མེ་འཁོར་ནང་དུ་འབྱོར་དུས་ལུས་ཡོངས་སུ་རྔུལ་ནག་གིས་ཚོས་འདུག་ཅིང་། གདོང་ནས་རྔུལ་ཆུ་ཐིག་ཐིག་ཟག་བཞིན་འདུག ང་ཚོ་ཚང་མ་ཧར་ནས་སྐད་ཆའང་དོན་མི་ཐུབ་པར་གྱུར་ཅིང་ད་ནི་ངོ་མ་རྒས་པ་འདྲ་ཞེས་བཤད་པ་ཡིན། དགོང་མོའི་ཆུ་ཚོད་12ཟིན་འདུག་ད་ནི་ཉལ་ཟེར་ནས་ཚང་མ་ཉལ་གྲབས་བྱས་སོང་། 

ད་ལྟ་ཞོགས་པའི་ཆུ་ཚོད་7 པ་ཡོལ་འདུག་ནའང་རོགས་པ་ཚོ་ཅུང་དཀའ་ཡོད་པ་འདྲ། ཁོ་ཚོ་གཉིད་མཐུག་པོ་ཞིག་གི་མལ་དུ་འཐིམ་འདུག ང་རང་མདང་དགོང་ཆུ་ཚོད་གསུམ་ཙམ་ལས་གཉིད་གཏན་ནས་མ་ཡོང་། གཉིད་འཐིམ་ཙམ་ལ་མེ་འཁོར་ལག་ཁྱེར་ཞིབ་བཤེར་པས་གཉིད་དཀྲོགས་ནས་ལག་ཁྱེར་སྟོན་ཤོག་ཟེར། ཞིབ་བཤེར་ཚར་དུས་གཉིད་བསམ་རུང་གཉིད་ཅིག་ཁུག་ཏུ་མ་གཅུག མདུན་ཐད་དེར་ཕོ་གསར་བཅུ་གྲངས་ཤིག་རུབ་ནས་འདུག་པས་ཁོ་ཚོས་འགྲོ་ཞོར་ཅ་དངོས་རྐུ་ཁྱེར་བྱེད་དོགས་ཀྱིས་གཉིད་ཡུར་ཙམ་ལ་ཡང་སད་ཡོང་། ཕ་ཆེར་ངེད་ཚོ་ཕུད་གཞན་མི་གཅིག་རྐུབ་སྟེགས་རེར་མི་མདུན་བརྒྱད་རེ་འཚང་ནས་འདུག་སྟབས་ཧ་ལམ་ཡར་འགྲོ་མ་སོང་གི་ལམ་ཁའང་འགག་འདུག མཐའ་ན་གསང་སྤྱོད་སྒོ་འགྲམ་ལའང་སྐྱིད་ཉལ་བྱས་ཏེ་འདུག་པས་ས་སྟོང་ཞིག་གང་ན་ལྷག་ཡོད།

ཁ་ཉིན་ཚ་ཚོད་27ནས་37བར་འགྲོ་བཞིན་འདུག་སྟབས་ཚ་བས་ནན་ཨེ་ཆོག་སྙམ་པ་རེའང་བྱུང་ཞིང་། ངེད་ཚོས་གསང་སྤྱོད་ནང་དུ་ཁྲུས་ཐེངས་གཉིས་གསུམ་རེ་བྱས་ནའང་དེ་ཙམ་ཕན་པ་ནི་མ་མཆིས། 

མི་མང་པོས་ས་འདིའི་མེ་འཁོར་བརྒྱུད་དུས་ཟ་འཐུང་དཀོན་པོ་ཡོད་ལུགས་བཤད་པས་ཐོག་མ་ནས་མི་དྲུག་རེས་གཙང་ཆུ་སྒམ་གཉིས་རེ་ཉོས་ཏེ་ཁུར་ཡོད་མོད། ཟ་འཐུང་དཀའ་ངལ་ཞིག་ནི་གཏན་ནས་མི་འདུག་ལ་ཚ་ཚོད་འདི་འདྲ་ཆེ་རུང་ཆུ་གྲངས་མོ་བཙོང་མཁན་ནི་ཧ་ཅང་འབེལ་པོ་རེད་འདུག མི་རེ་འགར་རྒྱ་གར་གྱི་ཟ་མ་འཕྲོད་ཀྱི་མེད་ན་ལས་གཞན་ཕྱི་ནས་བཙོང་མཁན་དང་མེ་འཁོར་ནང་དུ་མངགས་ཉོ་དང་འབབ་ཚུགས་ཆེ་ཆུང་མང་པོ་ཐུག་གི་འདུག་པས་ཟ་འཐུང་དཀའ་ངལ་ཡོད་ལུགས་བཤད་པ་ནི་བདེན་པའི་གཏམ་ཞིག་ག་ལ་ཡིན།

ད་བར་མེ་འཁོར་འདིས་ཁྱོན་མངའ་སྡེ་ཀར་ཎ་ཊ་ཀ་དང་ཏ་མི་ན་དྲོལ། ཧེ་དྷ་བྷདུ། ཨོ་རི་ས། ནུབ་བྷ་གྷ་ལ་བཅས་བསྐོར་བསྐྱོད་ཀྱིས་འགྲུལ་པ་བསྡུ་རུབ་དང་སྐྱེལ་འདྲེན་བྱེད་བཞིན་ཡོད། མེ་འཁོར་ནང་དུ་རྐུབ་སྟེགས་མེད་པའི་མི་གྲངས་ཕོན་ཆེར་འཛུལ་ནས་ཡར་འགྲོ་མ་སོང་གི་ལམ་ཁ་ཞིག་རྙེད་ཀྱང་དཀའ་བའི་ཚད་དུ་འདུག་པ་ནི་ཚ་བས་བཙིར་ཐོག་ཏུ་དཀའ་ལས་འཐོལ་པ་ཞིག་ཡིན། རྒྱ་གར་གྱི་མི་འདི་ཚོ་ནི་བཙོག་བཙོག་མེད་པར་ས་ཞིག་རག་ན་ཉལ་རྐྱང་བྱེད་པ་དང་མི་ཉམ་ཆུང་རེ་འགའ་ཉིན་མཚན་གསུམ་པོར་རྐུབ་གཅིག་ཀྱང་གཙུག་ས་མི་རག་པར་ལངས་ནས་འགྲོ་མཁན་ཡང་དུ་མ་འདུག མེ་འཁོར་ནང་དུ་དུ་བ་མི་འཐེན་པ་ཙམ་ལས་ཁ་ནི་ཟེར་བའི་ཁ་ལ་རྫས་ངན་འདྲ་མིན་ཟས་ཏེ་ཁུག་དཀྱོག་ཡོད་ཚད་ལ་ཆུ་མ་བཤོས་ཏེ་དམར་ཤར་རེ་བཟོས་འདུག 

མུ་འགོད།