འབྲས་ལྗོངས་སུ་བསྐྱོད་པའི་ཟིན་ཐོ།

ཚན་པ་བཞི་པ།)

རུམ་བཏེག་དགོན་ནི་བཀའ་བརྒྱུད་པའི་དགོན་པ་ཞིག་ཡིན་ལ་སྔོན་བྱུང་ལོ་རྒྱུས་ཀྱི་ཕྲེང་ཐག་ན་ཤིན་ཏུ་གསལ་ཞིང་འཚེར་ལ་ཕྱིས་ཀྱི་དུས་ཡུན་ཁྲོད་དུའང་ས་གནས་འདིར་གོ་བབ་ངེས་ཅན་ཟིན་པ་དང་འབྲས་ལྗོངས་མི་དམངས་ཀྱི་སེམས་སུ་ལྷང་ངེར་འགྱིང་འདུག

རྙིང་མའི་ཆོས་བརྒྱུད་ཀྱིས་ཡོངས་སུ་ཁྱབ་པའི་འབྲས་མོ་ལྗོངས་སུ་བཀའ་བརྒྱུད་པའི་དགོན་པ་ནི་རུམ་བཏེག་དགོན་པ་རྩིས་པས་དགོན་ཆུང་ཉི་ཤུ་ཙམ་ཡོད་འདུག་ལ། ས་སྐྱ་པའི་དགོན་ཁག་གཉིས། བོན་དགོན་གཅིག དུས་ཕྱིས་སུ་འཛུགས་པའི་དགེ་ལུགས་པའི་དགོན་པ་སེར་བྱེས་གྲྭ་ཚང་གི་ཡན་ལག་སེར་བྱེས་འགྲོ་ཕན་གླིང་བཅས་ཡིན།

ད་ཆར་ཧིན་དྷི་དང་ཡི་ཤུ་ཆོས་ལུགས། ནང་པ་བཅས་ཀྱིས་གྲུབ་ཡོད་རུང་ནང་པ་མང་ཤོས་ཡིན་འདུག 

དེ་སྔར་ས་འདིའི་མི་དམངས་ཚོས་རྒྱལ་བ་ཀརྨ་པ་མཆོག་ས་འདིར་ཕེབས་འཐུས་ཆོག་པའི་རེ་ཞུ་དང་ངོ་རྒོལ་ཐེངས་མང་བྱས་རུང་རྒྱ་གར་གཞུང་གིས་ད་བར་ཕེབས་གཅུག་མེད། གནས་ཚུལ་འདི་གུས་པས་དེ་སྔ་ནས་གོ་ཐོས་བྱུང་ཡང་ཀརྨ་མ་མཆོག་རང་གི་དགོན་པ་ཞིག་ཏུ་ཕེབས་མ་ཐུབ་པ་ནི་ཁོང་ལ་དེ་ཙམ་གལ་ཆེན་ཞིག་དང་ས་འདིའི་མི་དམངས་ཀྱི་གྱོང་གུད་ཆེན་པོ་ཞིག་མ་རེད་དྲན་མྱོང་། འོན་ཀྱང་ད་རེས་དངོས་སུ་འདིར་ཡོང་དུས་རྒྱལ་བ་ཀརྨ་པ་དགོན་པ་ཞིག་ཏུ་ཕེབས་ཐུབ་མིན་གྱི་གནད་དོན་ཞིག་མ་ཡིན་པར་མི་རིགས་ཤིག་གི་རིག་གཞུང་ཉར་ཚགས་དང་ཆོས་ལུགས་སྲ་བརྟན། ཡུལ་སྲོལ་གོམས་གཤིས་བཅས་གནས་ཐུབ་མིན་གྱི་གནད་དོན་ཞིག་ལ་ཐུག་འདུག་པ་སྙམ། 

རླངས་འཁོར་དང་ཚོང་ཁང་། མགྲོན་ཁང་དང་ཁྱིམ་ཚང་ཆེས་མང་པོ་ཞིག་ཏུ་༸གོང་ས་མཆོག་གི་སྐུ་པར་ལས་རྒྱལ་བ་ཀརྨ་པ་མཆོག་གི་སྐུ་པར་མང་བར་འདུག་པས་ཁོང་ལ་དགའ་དད་ཅི་ཙམ་ཡོད་པར་རྟོགས་ཐུབ་ལ། ཁོང་གིས་འཕྲིན་ལས་ཀྱིས་ཅི་ཙམ་ཁྱབ་ཡོད་པའང་ཤེས་ཐུབ་ཀྱི་འདུག 

ཁོང་ཉིད་ས་འདིར་ཞབས་ཀྱིས་བཅགས་ཐུབ་ན་བོད་པ་ཙམ་མིན་པར་འབྲས་ལྗོངས་དང་དེ་མིན་གྱི་ནང་པ་མང་པོ་ཞིག་གི་རིག་གཞུང་དང་སྐད་ཡིག་བརླག་ཉེན་ཡོད་པའི་ཡིད་སྐྱོ་གནས་བབ་དེ་སླར་གསོ་དང་འཇིག་ཉེན་ལས་སྐྱོབ་ཐུབ་པའི་རེ་བ་ཧ་ཅང་ཆེ། གནད་དོན་འདི་ནི་བཀའ་རྒྱུད་ཙམ་མིན་པར་ངེད་ཅག་བོད་རིགས་སུ་གཏོགས་པ་སུའང་འབྲེལ་ཆེ་ཞིང་མི་རིགས་དང་རིག་གཞུང་ཉམ་ཆག་ཏུ་འགྲོ་མི་འདོད་པའི་སྐྱེ་བོ་ཞིག་ཡིན་ཕྱིན་ངེས་པར་ཐུགས་བསམ་བཞེས་ཏེ་འབོད་བརྩོན་གང་ཐུབ་གནང་དགོས་པ་འདུག

མཇུག་རྫོགས།