མི་ཚེ། རྣམ་ཤེས་ནུབ་པ།

                 

དྲོད་དང་ཨ་མའི་དཔང་ཁྱིམ་སློག་པ་དེ་གྱོན་ནས།།

འཁྱགས་ལ་རེངས་བ་མེད་པའི་དགུན་གཞུང་དེ་བཞུར་སོང་།།

ལུས་ཤར་སེམས་པ་སྦྱར་བའི་སྙིང་ཉེ་ཡི་བར་ཐག།

སྐྱིད་ལ་ཡིད་འཚིམ་མེད་པའི་ནམ་ཟླ་དེ་འཁུམས་སོང་།།

རིང་པོ་རྫོགས་མཐའ་མེད་པའི་རྒྱ་ལམ་དེ་དེད་བཞིན།།

རྒྱུག་ལ་བྲེལ་ཤ་འཚུབ་པའི་སྙིང་མེད་ཀྱི་ཚུགས་ཀ།།

ཨ་མྱེས་མིག་མཐར་སྐྱིལ་བའི་སྐྱོ་ཚེག་རང་བབ་པ།།

བསམ་ན་ཤ་རུས་གཟེར་བའི་འཁུན་སྒྲ་དེ་ཤོར་འགྲོ།།

ཨ་མའི་མགོ་སྐྲ་གཟེངས་པོར་ཁ་འདབ་དེས་སྒྱུར་བ།།

སྐྱ་ལ་སྔོ་སེར་མདོག་གི་དུས་མཐའ་ཡི་བརྙན་རིས།།

ཨ་ཕའི་ཁ་སྤུ་འགུལ་ལ་གྲང་རླངས་ཤིག་འཁྱིལ་ལེ།།

ངོ་གདོང་སྐྱོ་ཉམས་སྐྱེལ་མའི་ས་ཚིགས་ནས་བྲལ་བ།།

བུ་ཡུག་ལྷག་རླུང་འུར་སྒྲས་འཁོར་ཡུག་ཀུན་གླེམ་པ།།

སེམས་མེད་རླངས་འཁོར་འགྲོས་དེ་མྱུར་པོ་རང་ཡིན་པས།།

གྱེན་ལངས་ནག་ཡོ་གཉིས་ལས་རབ་རིབ་ཅིག་འགུལ་བ།།

བར་དོའི་ཕྲང་ལམ་བརྒྱུད་ཚུལ་འདི་འདྲ་ཞིག་ལོས་ཡིན།།

སྦྲེལ་ཐག་ཐི་གུ་ཆད་པའི་ལོ་ཟད་དང་ཟླ་ཡལ།

ཕུར་རྩལ་གཤོག་རལ་ཟད་ཟད་སླེབས་རྒྱུ་ནི་མེད་པའི།།

དཔྲལ་བ་སི་དྷིས་བྱུགས་པའི་མི་ནག་གི་ཀློང་ན།།

ད་ནི་སྲོག་ཕྲ་རྟ་རྔ་ཆད་པ་ལས་ཅི་བྱ།།

སྡུག་ལ་བསྟུམ་པའི་ལྐོག་གཏམ།

ལེབ་ཅིང་སྲབ་པའི་ནམ་མཁའ་ན/

འོད་མཚེར་མཚེར་གྱི་འཛུམ་ཀོང་དེ/

རྟག་ཏུ་བྲང་ཁ་སྦྱར་ནས/

ཧུབ་འཐུང་ལེན་རེ་མཉམ་དུ་མིད་པར་སྐྱེལ་དུས/

མཐའ་ཡས་པའི་རྒྱུ་སྐར་གྱི་ཁྲོད་ན/

ལྷོད་ཀྱིས་བསྐྱོད་པ་དང་འདྲ་བའི་སྐྱིད་སྣང་དེ/

སྟོན་དུས་ཟླ་བ་ལས་བསིར་བསིར་གྱིས་ལྐོག་གཏམ་འབབ་དུས/

ལག་པས་འགྲམ་པ་བཏེགས་ཏེ་རྣ་བ་སྲིང་མཁན་དེ་སུ་ཞིག/

ཤུབ་ཤུབ་གྱིས་སྙིང་ལ་བྱིམ་བྱིམ་གནང་སྐབས/

གས་ཤིང་ཆག་པའི་ཧྲག་སྒྲ་དེས/

འཇིག་རྟེན་གྱི་མཚན་འཇགས་དཀྲོགས/

མུ་ནས་མུར་རྨི་ལམ་སྒོམ་པའི་སེམས་པ་དེ/

གཉིད་ལམ་འཐུག་པའི་མལ་ས་ནས/

དྲོད་འཇམ་གྱི་སོ་ཁ་ན་ལྷོད་ཀྱིས་འདུག་ཨང་/

སྙིང་ལ་འདེབས་པའི་རྐང་རྗེས་དེ/

ཁ་བའི་འདབ་མ་ལ་སྤར་བའི་རྡོ་རིང་ཞིག་སྟེ/

བཞུ་མི་ཐུབ་པའི་གཉེར་རིས་ཞིག་དང་འདྲ་བར/

ལྟེབས་མ་ལྟེབས་མར་བྱས་ཏེ་རྒྱང་ལ་སྲིང་འདུག/

ད་དུང་ཚིག་གཏམ་རྐང་རྗེན་མ/

གངས་འདབས་ན་ནར་ནར་གྱིས་བྲིས་བསམ་མོད/

གཡོར་ཞིང་འཁྱོགས་པ་དེས་རྒྱང་ལ་དེད་སོང་/

ཟུབ་པའི་སྒྲོན་མེ། མུན་ནག་གི་འཇིག་རྟེན།

    

སེར་བྱེས་མཁན་ཟུར་བྱམས་པ་ཐེག་མཆོག་དགོངས་པ་རྫོགས་པའི་གཏམ་ངན་འདི་གོ་མ་ཐག་འཕྲལ་དུ་བྲིས།

སྡུག་དབྱངས་གཟན་སྒྲ་གྱ་གྱུ་ལམ་དུ་ལྷུང་།། 

ཕྱག་རྒྱ་སྙིང་དམར་གས་པའི་བར་སྟོང་ཕྱེ།།

མུན་ནག་སྙིང་གཟན་མགོ་ལ་གཡོགས་དུས་དུ།།

རེ་འབོད་སུ་ལ་བཅོལ་བསམ་ཡིད་མུག་འཐིམ།

བསུབ་ན་ཟུབ་ཏུ་མེད་པའི་ཞབས་རིས་ནར།།

སྒོ་གསུམ་ཁྲག་ལ་བརྫིས་པའི་ལོ་ཟླ་སྟུགས།།

དཀའ་སྡུག་གཉེར་རིས་ལྟེབ་མའི་བརྩེགས་ཁུལ་ན།།

བདེན་དོན་བརླན་ལ་མཆོང་བའི་རང་ཚུགས་འཁྱིལ།།

ཉལ་རི་གནམ་ལ་བཞེས་པའི་སྟོབས་ཅན་མཐུ།། 

སྟོང་གྲམ་གཅིག་ལ་བསྡུས་པའི་མཁྱེན་རྒྱ་ཡངས།།

བགྲད་ལམ་མུ་མཐར་སྲིང་བའི་ལམ་གཤོང་པོ།།

ནུབ་དཔྱང་ཉི་རྒས་ལྷན་ལ་འགྲན་དོན་ཅི།།

ངུ་བསམ་མཆི་མ་སྐམ་པའི་གདུལ་བྱ་ཚོགས།།

ཅི་བྱེད་འཚུབ་མའི་རླུང་ནག་སྔུན་ནས་གཡོ།།

འོ་དོད་གྲེ་བ་རལ་བའི་མུད་ལམ་ནས།། 

ཀྱེ་མ་ཀྱེ་ཧུད་རེ་འབོད་ཐག་ལ་ཁད།།

          

རྒྱུག་ཞིབ་པའི་མྱོང་ཚོར།

འབྲོག་པ་ཁྱིས་དེད་ནས་གྲལ་མགོ་ཞེས་པའི་དཔེ་བཞིན་ཉིན་མ་འདི་དག་གི་རིང་སེར་བྱེས་མཁས་སྙན་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོའི་རྒྱུགས་ལེན་པ་འགྲོ་དགོས་ཐུག། ཞོགས་པ་ཆུ་ཚོད་བདུན་དང་སྐར་མ་བཅུའི་ཐོག་སོང་ཡང་། ཆོས་གྲྭ་ནང་སླེབས་དུས་འདུས་མང་དང་ངའི་རོགས་པ་རྒྱུགས་བཞེས་པ་བཞི་ཆ་ཕེབས་ཟིན་འདུག ང་ཚོ་སར་དབུ་རྙིང་གོང་མ་དང་། ཕར་ཕྱིན་འོག་མའི་འཛིན་གྲྭ་གཉིས་རེད་འདུག 

དེ་ནས་རྒྱུན་རིང་མ་འགོར་བར་རྩོད་རྒྱུགས་ཀྱི་དུས་ཚོད་རན་སོང་། སྐབས་དེར་དབུ་རྙིང་གོང་མ་ནས་དབུ་བཙུགས་ཏེ། མཚན་ཐོ་དང་པོ་ལན་རྒྱག་མཁན་བསྡད། གཉིས་པས་རྩོད་རྒྱུགས་ཀྱི་དྲི་བ་འཐེན་རྗེས་དུས་ཡུན་སྐར་མ་ལྔ་རིང་མནོ་བསམ་གཏང་ཆོག། དུས་ཚོད་ཟིན་པ་དང་སྟངས་འཛིན་པས་དྲིལ་བརྡ་གཏོང་འོང་ཞིང་། དེ་ནས་ཡར་བཞེངས་ཏེ་རྟགས་གསལ་གཏོང་དགོས། དགེ་འདུན་རེར་རྟགས་གསལ་སྐར་མ་བཅུ། ལན་སྐར་མ་བཅུ་བཅས་ཁྱོན་དུས་ཚོད་སྐར་མ་ཉི་ཤུ་ཡོད། དེའི་རིང་གཞུང་གི་ཁོག་དང་། ས་བཅད་སྒྲིག་སྟངས། རྟགས་གསལ་དངོས་གཞིའི་སྐབས་རིགས་ལམ་མྱུར་ཟབ་གསལ་གསུམ་གྱིས་ཕུ་ཐག་གཅོད་སྟངས་དང་། གནད་ལ་འཁེལ་བའི་ཐལ་ངག། ཤེས་བྱེད་ཀྱི་ལུང་། རྒྱབ་རྟེན་གྱི་ཚད་མ། གཞུང་ལུགས་ལྟ་རྒྱ་དང་མཐོང་རྒྱ་ཆེ་ལུགས་དང་། གསུང་ལན་སྟེར་མཁན་གྱིས་ཀྱང་གཞུང་གི་གོ་བ། འཛིན་མཚམས། ཞིབ་ཆ་གནང་སྟངས་སོགས་ལ་བལྟས་ནས་ཨང་གྲངས་འབུལ་དགོས།

ངས་མནོ་བསམ་ཞིབ་ཏུ་གཏོང་དུས་རྒྱུགས་སྤྲོད་སྐབས་ཀྱི་གལ་གནད་ཆེ་བ་ཞིག་ནི་རྒྱུགས་ཞིབ་པ་ཚོ་རེད། ཁོ་ཚོས་སྣང་མེད་ངང་སྨྱུ་གུ་གཡོ་འགུལ་རེ་ཐེབས་ན་མི་ཞིག་གི་མི་ཚེ་ལ་ཡང་འགྱུར་བ་གཏང་སྲིད་འདུག

 སྔོན་མར་གསར་བུ་ཞིག་གིས། ང་ཚོ་གྲྭ་ཚང་གི་རྒྱུགས་སྤྲོད་དེ་ལས་སླ་བོ་མ་རེད། གྲྭ་ཚང་གི་རྒྱུགས་སྤྲོད་ལས་ཟག་ན་ལས་ཀར་འགྲོ་དགོས་རེད། ལོ་གཅིག་ལས་ཀ་འགྲོ་ཟིན་རྗེས་དཔེ་ཆར་ལྟ་འདོད་མེད་པ་ཞིག་ཆགས་རྒྱུ་རེད། དགེ་ལུགས་རྒྱུགས་སྤྲོད་ལོ་གཅིག་མ་འཕྲད་ཀྱང་ཡང་བསྐྱར་ལོ་གཅིག་དཔེ་ཆར་ལྟ་ཆོག་རེད། ཅེས་བཤད་འདུག་སོང་། ངོ་མ་རེད། 

ང་ཚོས་ངེས་པར་དུ་ཡིད་གཟབ་གནང་དགོས་འདུག གྲྭ་ཚང་རིན་པོ་ཆེ་ནས་རྒྱུགས་སྤྲོད་ཀྱི་བྱེད་སྒོ་དང་། ཨང་ཀི་རྩེ་སོན་རྣམས་ལ་གཟེངས་བསྟོད་ཀྱི་མཛད་སྒོ་སྤེལ་བ་སོགས་མྱི་རྒྱུ་དུས་ཚོད་གསུམ་གྱིས་འགྲོ་གྲོན་དཔག་མེད་དུ་བཏང་བ་འདི་ནི་འདུས་མང་གི་བློ་རྩེ་སློབ་གཉེར་ཕྱོགས་སུ་གཏད་ཅིང་། སློབ་གཉེར་ལ་དགའ་བ་དང་དང་བ། སྤྲོ་བ་འཕེལ་བའི་ཕྱིར་དུ་མ་ཡིན་ནམ། དེ་ལྟ་བུའི་ཐབས་ཤེས་སྣ་ཚོགས་ཀྱིས་སློབ་གཉེར་བ་སྐྱེད་སྲིང་དང་བདག་སྐྱོང་བྱེད་པ་རེད། ལས་ཡིན། ང་ཚོ་འདིར་ཚོགས་པ་ཆེན་པ་ཞིག་བཙུགས་ནས་བསྡད་པའི་དགོས་དམིགས་ཀྱང་འདི་ཁོ་ནའི་ཆེད་དུ་མ་ཡིན་ནམ།

ཁ་རྒྱུན་དུ་ཡང་། གསེར་ནག་གི་མཆོད་རྟེན་བཞེངས་པ་ལས་གྲྭ་བ་གཅིག་རབ་ཏུ་བྱུང་ན་ཕན་ཡོན་ཆེ་གསུངས། རབ་ཏུ་བྱུང་བ་ལ་ཕན་ཡོན་དེ་འདྲ་ཡོད་ན། རབ་ཏུ་བྱུང་ནས་སློབ་གཉེར་གནང་བ་ལ་བཤད་ཅི་དགོས། དེས་ན་ང་ཚོས་ཀྱང་འདིར་བསྡད་ནས་སློབ་གཉེར་བ་བདག་སྐྱོང་གང་ནུས་དང་སྤུས་ཚད་གང་མཐོ་གཏང་ཐབས་བྱེད་དགོས་པ་ལས། གནས་དབྱུང་རྩ་བ་ནས་གཏང་མི་རུང་།

འོ་ན། བདག་སྐྱོང་གང་འདྲ་བྱེད་དགོས་རེད་ཅེ་ན། དང་པོ།

ཡུལ་གྱར་བའི་འཚོ་བ།

མི་ལོ་བཅུ་ཕྲག་ལྷག་འདས་ཤིང་སོང་བའི་དེ་རིང་ཡང་།

ཡུལ་གྱར་གྱི་འཚོ་བ་སྐྱུར་མོ་བྲང་དུ་བཟུང་སྟེ།

མི་ཡུལ་གྱི་བདེ་སྡུག་གི་བྲོ་བ་མྱོང་བཞིན་ཡོད།

ཡུལ་གྱར་ན་རང་དབང་ཡོད་ཀྱང་ཕ་ཡུལ་མེད།

ཡུལ་གྱར་ན་གྲོགས་པོ་ཡོད་ཀྱང་ཕ་མ་མེད།

ཡུལ་གྱར་ན་མི་ཚོགས་འདུས་རུང་སྤུན་ཟླ་མེད།

མདོར་ན་ཡུལ་གྱར་ན་ཅི་ཡང་མེད་པའི་བྱེ་ཐང་ཞིག་དང་མཚུངས་ལ།

གང་ཡང་མི་ལྡན་པའི་མྱ་ངན་གྱི་ཐང་ཆེན་པོ་ཞིག་དང་འདྲ་བས།

ནམ་ཡང་གནས་འཆར་ས་ཞིག་མིན་ལ་གཏན་ནས་འཚོ་བའི་མེ་ཏོག་བསྡུ་ས་ཞིག་མིན་ཨང་། 

མངར་སྐྱུར་གྱི་འཚོ་བ་དེ་ནི་ས་མཐའ་ནས་རོལ་བའི་མི་ཚེ་ཞིག་དང་།

སྐྱིད་སྡུག་ལ་མཐིམ་པའི་མི་ཚེ་དེ་ནི་ཡུལ་གྱར་གྱི་ཁ་དོག་ཡིན་པས།

སྐྱོ་ལ་སྡུག་པའི་འཚོ་ཐབས་འདི་སུ་ཞིག་གིས་གནང་བ་ཡིན་ནམ།

ཐད་ལ་བརྐོས་པའི་རི་མོ་འདི་གང་ཞིག་ནས་རྙེད་པ་ཡིན་ནམ།

དག་ཞིང་གི་བཀོད་པ་ན་འོད་ཀྱིས་འཚེར་བའི་དཀོན་མཆོག་ཡ།

དྲང་མཉམ་གྱི་བར་ན་སྤྱན་རས་བགྲད་པའི་ལས་འབྲས་ཡ།

ཁྱེད་ཚོའི་ཐུགས་རྗེ་དང་བྱིན་རླབས་གང་ན་ཡོད།

ཁྱེད་ཚོའི་བདེན་པ་དང་བསླུ་མེད་གང་དུ་ཡོད།

ངས་ཁྱེད་ཅག་འབོད་བཞིན་ཡོད། 

སྐད་ཤུགས་ཆེ་པོས་ཐོག་ནས་འབོད་བཞིན་ཡོད།

དཀོན་མཆོག་དང་ལས་འབྲས་ཡ།

༢༠༡༤-༡༡-༦

རྒྱུགས་སྤྲོད་བཙན་པོ་མ།

          

གཉའ་གུག་རྒྱུས་འདར་ཟས་ལ་ཡིད་ག་ལོག་ཅིང་།།

མཚན་ཉིན་གཉིད་འཕྲོག་འབྱུང་བཞི་ན་ན་མང་བ།།

ཅི་བཤད་གཏམ་ལ་ལན་ཐུང་ཚིག་རེ་བྱིན་མཁན།།

ཁེར་རྐྱང་སེམས་སྡུག་ཅན་དེ་རྒྱུགས་ཀྱིས་བཟོས་སོང་།

མོག་མོག་ལྕེ་ཐོག་བཞག་ཀྱང་བྲོ་བ་མ་རྙེད།།

ལིམ་ཇ་ཁྱུར་མིད་བཏང་རུང་སྐྱིར་མོ་མ་ཚོར།།

སི་པན་བརླན་བཟའ་བྱས་རུང་ཁ་ལྕེ་མ་ཚ།།

ཡོད་ཚད་རྒྱུགས་སྤྲོད་ཟེར་བས་བཅོམ་འཕྲོག་བྱས་སོང་།།

སེར་བྱེས་གྲྭ་ཚང་གི་རྩོད་རྒྱུགས་ཆེན་མོ་ལེགས་གྲུབ་ཟིན་པ།

འདི་ལོའི་ཕྱི་ཟླ་༡༠ ཚེས་༡༩ ནས་བཟུང་དེ་རྒྱུགས་ཞིབ་པ་གྲངས་བཞི་ཅུ་ཞེ་ལྔས་འཛིན་གྲྭ་ཉི་ཤུ་རྩ་བཞིའི་རྒྱུགས་ཞུགས་པ་དགེ་འདུན་ཞལ་གྲངས་༡༩༡༠ སྡེ་ཚན་དགུར་ཁག་དགོས་ཀྱིས་རྒྱུགས་སྤྲོད་འགོ་འཛུགས་ཏེ་ཉིན་གྲངས་ལྔའི་རིང་དུ་ཉིན་རེའི་ཆུ་ཚོད་དྲུག་རེ་རྒྱུགས་ལེན་བྱས་ཡོད།  

     (དགེ་ལུགས་རྒྱུགས་སྤྲོད་ཆེན་མོར་ཞུགས་མཁན་དང་སློབ་ཕྲུག་འཛིན་གྲྭ་དྲུག་པ་མན་ཚུད་མེད།)

 དོ་ནུབ་གྲུབ་འབྲས་གསལ་བསྒྲགས་གྱང་ངོས་ན་སྦྱར་འདུག་པས་རང་རང་གི་གྲུབ་འབྲས་ལྟ་མཁན་ཚོས་འུར་ཟིང་དང་འཚང་ཀའི་བར་ནས་གཡོ་འགུལ་ཡང་བྱེད་དཀའ་ཚད་དུ་འདུག

རྒྱུགས་སྤྲོད་འདི་ནི་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོ་ལས་ཟུར་སྦྱོང་སློབ་ཚན། བློ་རྒྱུགས། རྩོད་རྒྱུགས། བྲིས་རྒྱུགས་བཞི་ལས་ཆེས་དཀའ་ཁག་དང་གལ་ཆེན་དུ་བརྩི་བའི་རྩོད་རྒྱུགས་ཆེན་མོ་ཡིན་དེ་ཡིན། སློབ་གཉེར་དོ་དམ་ཁང་གི་དོ་དམ་པ་དགེ་བཤེས་ལྷ་རམས་པ་ལྔས་ཟླ་ཕྱེད་ཙམ་ནས་ཉིན་མཚན་གཉིས་ཀར་རྒྱུགས་ལེན་གྱི་གྲ་སྒྲིག་དང་དགོས་ངེས་ཀྱི་མཐུན་རྐྱེན་ཁག་ལེགས་སྒྲུབ་བྱས་པ་དང་། སློབ་གཉེར་བ་ཚོས་ཀྱང་ཟླ་ངོ་གཅིག་ཙམ་ལ་སྔ་ལངས་ཕྱི་ཉལ་གྱིས་སྦྱོང་ཟིན་པ་ཁག་ལ་ཕྱོགས་སྡོམ་དང་དཀའ་གནད་ལ་བསམ་གཞིགས་གཏིང་ཟབ་བྱེད་པ། འཛིན་གྲོགས་མི་ཉུང་བ་ལྷན་འདུས་ཀྱིས་བགྲོ་གླེང་དང་དོགས་དཔྱོད། དོགས་མཐའ་དཔྱད་དཀའ་བའི་གཞུང་མཁྲེགས་པོ་དག་མཁྱེན་རྒྱ་ཅན་ལ་བཀའ་འདྲི་དང་བགྲོ་གླེང་འཐུས་ཚང་གནང་ཡོད། འདི་ལོ་ནི་སྔོན་དང་མི་འདྲ་བར་དོགས་འདྲི་ཁག་འཕྲིན་ཕྲན་བརྒྱུད་མཁྱེན་དཔྱོད་ཡངས་པའི་དགེ་བའི་བཤེས་གཉེན་རྣམས་ལ་ཡིག་ངག་གི་ལམ་ནས་བཀའ་འདྲི་དང་དོགས་དཔྱོད་ཀྱང་ལེགས་པོར་བྱ་སའི་ཆེས་སྟབས་བདེའི་ལམ་བུ་ཞིག་ཀྱང་རྙེད་ཡོད། ད་དུང་དགོས་ངེས་ཀྱི་ཟུར་བལྟའི་གཞུང་ལུགས་དུ་མ་ནས་ཁ་བསྐང་གིས་ཟུར་རྒྱན་བྱས་ཏེ་ལོ་གཅིག་གི་རྩོད་གཞུང་ལྟས་ཟིན་པ་ཁག་བསྐྱར་སྦྱོང་གང་ལེགས་བྱེད་པའི་སྔོན་འགྲོའི་ཆ་རྐྱེན་འཐུས་ཚང་བ་ཞིག་གནང་ཡོད། 

    རྒྱུགས་སྤྲོད་འདི་ནི་ཆེས་དཀའ་ཚེགས་ཅན་ཞིག་ཏུ་རྩི་བཞིན་པ་  ནི་ལོས་ཡིན་ཏེ་དཔེར་ན་ངེད་ཀྱི་འཛིན་གྲྭར་མཚོན་ན་འདུལ་བ་མདོ་རྩ་བའི་འགྲེལ་བ་ཀུན་མཁྱེན་མཚོ་སྣ་བས་མཛད་པའི་   <མཚོ་ཊིཀ་ཉི་མའི་འོད་ཟེར་>གྱི་སྟོད་ཆ་ཤོག་གྲངས་༦༡༦ ཅན་དེའི་གཞུང་གི་ས་བཅད་དང་ས་བཅད་རེ་རེ་ནས་འཕྲོས་པའི་སྤྱི་དོན་ཡན་ལག་དང་བཅས་པ་བློ་ཐོག་ན་ཡོད་དགོས་ལ། ཆེས་གྲངས་ཀ་མང་ཞིང་ཡན་ལག་དང་ཉིད་ལག་བརྒྱ་ཕྲག་རྒལ་བ་དག་སྡོམ་ཚིག་གི་ཐོག་ནས་རེ་རེ་བཞིན་བརྩིས་ཏེ་ཤར་མར་སྐྱོར་ཐུབ་དགོས། 

སེར་བྱེས་གྲྭ་ཚང་གི་འབྲེལ་ཡོད་འགན་ཁུར་བ་དང་པར་ལས་སྡེ་ཚན་གྱི་འགན་འཛིན་མཆོག་ལ།

གུས་པས་ཁྱེད་ཅག་གི་ཉིན་རེའི་ཐུགས་བྲེལ་ཆེ་བའི་ལས་འགན་དང་ངལ་གསོ་ལྷོད་པོ་ཞིག་གནང་ཁོམ་མེད་པའི་གལ་ཆེའི་ཕྱག་ལས་ཁག་རྒྱུན་ཆད་མེད་པ་གནངས་དང་གནང་བཞིན་པ་ནི་མིག་བཙུམས་ཀྱང་གསལ་མཐོང་ཡིན་པས་སྙིང་དབུས་ནས་བཀའ་དྲིན་ཆེ་ཞུ་རྒྱུ་དང་།

ཁྱེད་ཅག་གིས་མཚོན་པའི་གྲྭ་ཚང་གི་འབྲེལ་ཡོད་ཕྱག་ལས་པ་མི་གྲངས་༥༠༠ལྷག་གིས་ཉིན་མཚན་སྦྲེལ་ནས་ངལ་བ་དང་དུ་བླངས་དེ་དགེ་འདུན་སྲི་ཞུ་ནར་མར་སྒྲུབ་པའི་རྐྱེན་གྱིས་སློབ་གཉེར་བ་ཚོས་སློབ་གཉེར་ཁོ་ནར་འབད་རྒྱུ་ལས་ལས་དོན་གང་ལའང་ཐེ་གཏོགས་བྱེད་མི་དགོས་པའི་གནས་བབ་དེ་བྱུང་བ་རེད། 

རང་རེའི་གྲྭ་ཚང་དེ་སྒྲིག་ཁྲིམས་ཞིབ་ཚགས་དང་སློབ་གཉེར་སྤུས་ལེགས། སློབ་གཉེར་བའི་ཀུན་སྤྱོད་འཐུས་ཚང་། འཚོ་བའི་མཐུན་རྐྱེན་ཇེ་ཡག ལྷག་པར་༸གོང་ས་མཆོག་གིས་སྔགས་བརྗོད་ཀྱི་མེ་ཏོག་ཐེངས་མང་གནང་བ་སོགས་ཕྱོགས་གང་ཐད་ནས་ཕུན་སུམ་ཚོགས་པའི་ཡར་ངོའི་ཟླ་བཞིན་འཕེལ་བ་འདི་ནི་ཁྱེད་ཅག་གི་ཉིན་རེའི་ཕྱག་ལས་ཁག་དང་ཁ་འབྲལ་ཐབས་མེད་པས་བདག་གིས་འདི་ནས་སྙིང་ཁོངས་རུས་པའི་གཏིང་ནས་བཀའ་དྲིན་ཆེ་ཞེས་ཞུ་བ་ལགས།

ད་རེས་གུས་པས་ཆེད་དུ་ཞུ་དོན། དེང་སྐབས་ནི་དྲ་བའི་དེང་རབས་ཞེས་ཀུན་གྱིས་གླེང་མིན་ལ་མ་བལྟོས་པར་དྲ་བ་ནི་སྤྱི་ཚོགས་ནང་གི་ཉིན་རེའི་འཚོ་བ་ནང་ཁ་འབྲལ་ཐབས་མེད་པའི་མི་ཚེའི་ཆ་ཤས་ཤིག་ཏུ་གྱུར་ཡོད་པས་ཀུན་གྱིས་དྲ་བའི་ཐོག་ནས་མཐོང་ཐོས་དང་ལྟ་ཉན་བྱེད་དེ་འཚོ་བར་རོལ་བཞིན་ཡོད། འདི་འདྲ་བའི་དེང་སྐབས་སུ་ཕྱོགས་གང་ས་ནས་དྲ་བའི་ཐོག་ཏུ་ལས་དོན་སྤེལ་ནས་དགོས་ངེས་ཀྱི་དོན་ཆེན་གང་མང་ཞིག་གྲུབ་དང་འགྲུབ་བཞིན་པའང་མིག་མཐོང་ལག་ཟིན་རེད། བོད་ཀྱི་སྤྱི་ཚོགས་ལ་མཚོན་ནའང་ཉིན་རེའི་ལས་དོན་ཁག་དྲ་བའི་ཐོག་ཏུ་སྤེལ་ཏེ་འཛམ་གླིང་ཁྱོན་དུ་གནས་པའི་བོད་མི་ཚོས་ཤེས་རྟོགས་ཡོང་ཐུབ་པ་བཟོ་བའི་ལས་ཀ་གཉེར་མཁན་ཡང་གང་མང་ཡོད་ལ་ཁོ་ཚོའི་ལས་དོན་དེར་གྲུབ་འབྲས་ཀྱང་འཐོན་བཞིན་ཡོད། 

ཀུན་ཀྱིས་ཤེས་གསལ་བཞིན། བོད་ཀྱི་དགོན་སྡེ་ཆེ་མ་ཆུང་གསུམ་དང་སློབ་གྲྭ་ཆེ་འབྲིང་ཆུང་གསུམ་མང་པོས་རང་གི་སློབ་གཉེར་གྱི་སྤུས་ཚད་དང་འཚོ་བ། ཀུན་སྤྱོད་དང་སྒྲིག་ཁྲིམས། ཐུན་མོང་མིན་པའི་ཕྱག་ལས་འདི་དང་དེ་ཡིན་ཞེས་དྲ་ཐོག་ནས་པར་རིས་དང་བརྙན་པར། གསལ་བསྒྲགས་དང་རྩོམ་ཡིག་སོགས་ཕོན་ཆེར་འགྲེམས་འཇོག་བྱས་དང་བྱེད་མུས་ཡིན་པ་ནི་ངེད་ཅག་གིས་ཤེས་གསལ་རེད། ཁོ་ཚོས་དྲ་བ་སྤྱད་དེ་རང་རང་གི་ལས་དོན་ཕྱི་ལ་ངོམས་རྒྱུ་དེ་ནི་ཆེས་འོས་འཚམ་དང་ནམ་ཡང་བྱེད་རུང་བ་ཞིག་རེད། 

མི་སྒེར་ཞིག་ལ་མཚོན་ན་མཚན་སྙན་དང་མིང་གྲགས་ནི་དགོས་ངེས་ཡིན་ཞེས་ཁ་ཚོན་གཅོད་མི་ཐུབ་ནའང་སྡེ་ཆེན་པོ་ཞིག་དང་གཙུག་ལག་སློབ་གཉེར་ཁང་ཆེན་པོ་ཞིག་ལ་ཅིས་ཀྱང་མཚན་སྙན་དང་མིང་གྲགས་དགོས་ངེས་ཙམ་དུ་མ་ཟད་དུས་གཏན་ཏུ་སྤྱི་ཚོགས་ཁྲོད་ན་བག་ཆགས་ལེགས་པོ་འཇོག་ཐུབ་དགོས་པ་ནི་ཧ་ཅང་གལ་ཆེ་བས་དྲ་བ་སྤྱད་ནས་རང་གི་དངོས་ཡོད་བདེན་པའི་གལ་ཆེའི་ལས་དོན་ཁག་ནི་སྤྱི་ཚོགས་ནང་དུ་བྲིན་རྒྱུག་མྱུར་པོ་ཞིག་ངེས་པར་བྱེད་ཐུབ་དགོས།

རང་རེས་གྲྭ་ཚང་གིས་གནས་ཚུལ་འདིའི་ཐད་དུ་སྣང་ཆུང་དང་དོ་སྣང་ཆུང་སྐྱོན་ཧ་ཅང་འདུག་སྟེ། ལོ་རེའི་གྲྭ་ཚང་གི་ཐུན་མིན་གྱི་སྒྲུབ་མཆོད་དང་རྒྱུགས་སྤྲོད་ཆེན་མོ་སོགས་ཀྱི་ཕྱག་ལས་གལ་ཆེན་ཅི་འདྲའི་མང་པོ་ཡོད་རུང་པར་ལེན་དང་བརྙན་ཕབ་མི་བྱེད་ལ་འགའ་རེ་བྱས་ཀྱང་སྤྱི་ཚོགས་ནང་དུ་མཐོང་རྒྱུ་ཐོས་རྒྱུ་གཏན་ནས་མི་འདུག ད་སྐབས་གྲྭ་ཚང་གི་རྩོད་རྒྱུགས་ཆེན་པོ་དང་ཁེལ་བཞིན་པ་རེད། དྲ་ཐོག་ན་རྩེད་རྒྱུགས་ཆེན་མོའི་སྐོར་གྱི་ཆེད་པར་ཞིག་གཏན་ནས་མཐོང་རྒྱུ་མེད་ལ་ཆ་མི་ཚང་བ་གཅིག་གཉིས་ཡོད་པ་དེ་ནི་སྒེར་གྱིས་ཁ་པར་ནས་པར་ལེན་བྱས་པ་ཞིག་རེད།  

གུས་པས་གྲྭ་ཚང་གི་རྒྱུག་སྤྲོད་རེ་རེ་ཁེལ་ཡོང་དུས་རྩོམ་ཐུང་རེ་གཉིས་རེ་འབྲི་བསམ་གྱིས་བརྙན་པར་རེ་འཚོལ་ཐབས་བྱས་ནའང་གྲུབ་འབྲས་ནི་ཀླད་ཀོར་རྐྱང་རྐྱང་རེད། Googleསོགས་འཚོལ་བྱེད་གང་མང་ནས་བཤེར་འཚོལ་དང་གྲྭ་ཚང་གི་ངོ་དེབ་དང་དྲ་རྒྱ་སོགས་ལ་ཅི་ཙམ་འཚོལ་ཉུལ་བྱས་རུང་ལག་སྟོང་ལས་ཅི་ཡང་ཐོབ་རྒྱུ་མི་འདུག 

འདིའི་ཐད་ཀྱི་འགན་གཅིག་ནི་པར་ལས་སྡེ་ཚན་ལ་ཡོད་སྙམ་སྟེ་སྡེ་ཚན་འདི་ནི་ཆེད་དུ་གྲྭ་ཚང་གི་ལས་དོན་ཁག་པར་ལེན་དང་བརྙན་ཕབ་བྱེད་མཁན་དེ་ཡིན་པས་ཁྱེད་ཚོས་ཆ་གཞི་དང་ལྡན་པའི་སྒོ་ནས་གྲྭ་ཚང་གི་བྱ་བ་ཆེ་ཆུང་ཚང་མ་པར་ལེན་ཙམ་མ་ཟད་བརྙན་པར་དེ་ཉིད་སྤྱི་ཚོགས་ནང་རྒྱུག་ཐུབ་པ་བྱ་དགོས་ངེས་ཡིན་རུང་འོད་སྡེར་རེ་ཟུང་ལས་ཆེས་སྟབས་བདེ་བའི་དྲ་བ་བཀོལ་སྤྱོད་ཀྱིས་སྤྱི་ཚོགས་ནང་དུ་ཁྱབ་སྤེལ་གཏན་ནས་བྱེད་ཐུབ་མི་འདུག

ད་ནི་རྗེས་ཕྱོགས་ནས་གྲྭ་ཚང་གི་ལས་དོན་ཁག་གི་པར་རིས་བརྙན་ཐུང་སོགས་སྣ་འཛོམས་རང་བཞིན་གྱིས་དྲ་ཚིགས་ཡག་པོ་གཉེར་ཐུབ་དགོས་རྒྱུ་ནི་ཧ་ཅང་གལ་ཆེ་ལ། དེ་ལྟར་མ་ཐུབ་རུང་པར་རིས་ཁག་Google drive སོགས་ནས་གང་འདོད་ལེན་རྒྱུ་དང་མཐོང་རྒྱུ་ཡོད་པ་ཞིག་ནི་ངེས་པར་བྱེད་ཐུབ་དགོས།

འདི་ནི་དོན་མེད་བསམ་ཆ་ཞིག་ལ་མ་དགོངས་པར་གྲྭ་དམངས་དཀྱུས་མ་ཞིག་གིས་གྲྭ་ཚང་རིན་པོ་ཆེའི་ལས་དོན་ལ་ཕྱར་བ་གྲུ་འདེགས་ཀྱིས་བསམ་ཚུལ་ཞིག་ལ་བརྩིས་ནས་ངེས་པར་ཐུགས་སྣང་གནང་རོགས།

                                  —•གུས་སྲོང་བཙན་གྱིས། ༢༠༡༤/༡༡/༣