Skip to main content

སྲོང་བཙན་དང་གངས་རྒོད་ཀྱི་གླེང་མོ།


དུས་ཚོད། 2012-2015
ས་གནས། ཨིན་ཇི། རྒྱ་གར།
འདྲི་མཁན། གངས་རྒོད།
འདྲི་ས། སྲོང་བཙན།
བརྒྱུད་ལམ། ངོ་དེབ།

གངས- དྲ་གྲོགས་སྲོང་བཙན་ལགས་ལ་འཚམས་འདྲི་ཞུ། སྐུ་ཉིད་ལ་དྲི་བ་འགའ་འདྲི་འདོད་སྐྱེ། དུས་ཚོད་ཡོད་སྐབས་དྲི་ལན་རེ་ཅིས་ཀྱང་འདེབས་རྒྱུ་མ་བརྗེད་རོགས།
སྲོང་-དུས་ཚོད་ཡོད་པས་ཁྱེད་ཀྱིས་གང་འདོད་འདྲི་རོགས་གནང་།
གངས-གོ་ཐོས་ལ་ཁྱེད་རང་རྩོམ་པ་པོ་ཡག་པོ་ཞིག་ཡིན་ཚད་འདུག གང་འདྲ་བྱས་ཏེ་རྩོམ་རིག་ལ་འཇུག་པའི་སྐོར་ཞིག་གསུང་རོགས།
སྲོང་-ཧཧ། ངས་རང་ཉིད་རྩོམ་པ་པོ་ཞིག་ཡིན་སྙམ་ཤར་ཀྱི་མེད། དེ་བས་ཀྱང་རྩོམ་པ་པོ་ཡག་པོ་ཞིག་བསམ་པའི་ཟུར་ལའང་འཁོར་མ་མྱོང་། ཁྱེད་ཚོས་ཡག་མི་ཡག་གི་མཚམས་ཐིག་གང་འདྲ་ཞིག་ལ་འཛིན་གྱི་ཡོད་མེད་མ་ཤེས། རེད་དེ། ངས་བདེན་པ་ལ་བཅོལ་བའི་ཡིག་འབྲི་རེ་རེེ་ནམ་ཡང་ཁ་ཡག་ངོ་དགའ་དང་མི་བདེན་རྫུན་སྒྲིགས། རི་ཆུ་ནགས་གསུམ་ལ་བསྟོད་གླུ། ལྷ་དང་བླ་མ་མགུར་གླུ་མི་ལེན་པར་རང་གི་མིག་མདུན་ན་ཡོད་པའི་སྤྱི་ཚོགས་ཀྱི་བྱ་དངོས་ལ་དོ་སྣང་དང་ཡིད་འཇོག་བྱས་ཏེ་འབྲི་ཐབས་བྱེད་ཀྱི་ཡོད། གལ་ཏེ་མཐེ་མོ་སྒྲེང་མཁན་རེ་གཉིས་ཙམ་ཡོད་ན་འདི་ཉིད་ལ་མོས་པ་ཙམ་རེ་ཡིན་སྲིད། དེ་ལས་གཞན་ཡག་ཟེར་ས་ཞིག་མེད།
 གངས-རྩོམ་ཡིག་འབྲི་རྒྱུ་ལས་སླ་པོ་ཞིག་མིན་པར་མ་ཟད། དེ་ལས་ཀྱང་སྤྱི་ཚོགས་ཀྱི་གནས་བབ་མཐོང་ཞིང་ཐོས་ནས་ཡི་གེ་ཕབ་རྒྱུ་དེ་ཧ་ཅང་དཀའ་སྙམ། ཁྱེད་ལ་མཚོན་ན་འདི་ཉིད་དཀའ་ངལ་ཞིག་ཏུ་ཚོར་བཞིན་ཨེ་ཡོད།
སྲོང་།-ངོ་མ་རེད། རྩོམ་ཡིག་འབྲི་རྒྱུ་དེ་སུམ་རྟགས་དག་གསུམ་ཤེས་པ་ཙམ་གྱིས་འགྲིག་པ་ཞིག་གཏན་ནས་མིན་པར། དཔེ་ཀློག་དང་སྦྱོང་བརྡར་ཧ་ཅང་དགོས་པ་ཞིག་རེད། མ་ཟད་ལྷན་སྐྱེས་ཀྱི་རྩོམ་རྩལ་ཡོད་མེད་ལའང་ལྟོས་ཚབས་ཆེ་སྙམ། དེ་ལས་ཀྱང་དཀའ་བ་དེ་ནི་སྤྱི་ཚོགས་ཀྱི་གནས་བབ་མཐོང་ཐུབ་པའི་གོ་རྟོགས་དེ་རེད། རང་གིས་མཐོང་བའི་གནས་བབ་དེ་རྩོམ་ཡིག་ལམ་དུ་འཁྱེར་ཤེས་པ་དང་འབྲི་ཕོད་པ་དེ་ཡིན། ངེད་ཅག་གི་སྤྱི་ཚོགས་ནང་དུ་རྩོམ་འབྲི་བ་མང་ཡང་སྤྱི་ཚོགས་དཔྱད་བརྗོད་པ་ཧ་ཅང་ཉུང་ཉུང་ཡིན་པའི་རྒྱུ་མཚན་ཡང་འདི་གར་ཐུག་ཡོད། 
གངས-ཁྱེད་རང་གི་རྩོམ་ཡིག་རེ་ཟུང་ལས་མཐོང་མྱོང་མེད། བརྒྱུད་ལམ་གང་ཞིག་ནས་ཀྱེད་ཀྱི་རྩོམ་ཡིག་རྙེད་ཐུབ། ང་རང་བལྟ་འདོད་ཡོད།
སྲོང་།-ངས་ད་བར་རྩོམ་ཡིག་ཕྱི་རུ་བཏོན་ཐབས་བྱེད་ཀྱི་མེད། དེར་བརྟེན། ཁྱེད་ཀྱིས་བཙལ་ཀྱང་ལག་སྟོང་དུ་འགྱུར་རྒྱུ་ལས་ཅི་ཡང་མེད།
གངས།-ངས་གསལ་པོར་མ་ཤེས་པ་ཞིག་ནི་རྩོམ་ཡིག་བྲིས་ནས་མི་ལ་མི་བསྟན་པ་དེ་རེད། གཞན་ལ་མ་བསྟན་ན་བྲིས་ནས་དགེ་མཚན་ཞིག་ཨེ་ཡོད། ངས་བསམ་ན་དགེ་མཚན་ཡོད་པ་ཞིག་མི་འདོད།
སྲོང་།-རེད། ཀློག་པ་པོ་མེད་ན་རྩོམ་པ་པོས་གང་ཞིག་ཡི་གེར་ཕབས་ཀྱང་དོན་མེད་ལྟ་བུ་རེད། འོན་ཀྱང་ང་རང་གིས་རྩོམ་ཡིག་མི་བཏོན་པ་ལའང་རྒྱུ་མཚན་ཞིག་ཡོད། མུན་ནག་ལ་དགའ་མཁན་ཞིག་ཡིན་ན་ངས་སྒྲོན་མེ་ཐོགས་རུང་དགའ་བསུ་དང་ཕན་ཐོག་ཡོད་རྒྱུ་མ་རེད་བསམ། གང་ལྟར་ངས་སྤྱི་ཚོགས་ལ་ཉེ་བའི་རྩོམ་ཡིག་རེ་ཟུང་བྲིས་པ་ལ་མང་པོས་དགའ་མོས་བྱེད་ཀྱི་མེད་ཚད་འདུག ངོས་ལེན་མི་ཐོབ་པའི་སྐད་ཆ་བཤད་ན་རང་གི་ཁ་ན་བ་ལས་གཞན་ཅི་ཡོད། མ་རེད་དམ།
གངས།-སྤྱི་ཚོགས་ཀྱིས་ངོས་ལེན་མི་ཐོབ་པའི་སྐད་ཆ་ཨེ། ད་དུང་ངས་ཁྱེད་ཀྱིས་རྩོམ་ཡིག་མི་སྤེལ་པའི་རྒྱུ་མཚན་དེ་གསལ་པོར་མ་ཤེས།
སྲོང་།-ངས་རྩོམ་ཡིག་འབྲི་དུས་རང་ཉིད་ཐེབས་པའི་སྤྱི་ཚོགས་ཀྱི་མུན་ནག་གི་ཤོག་ངོས་དེ་འབྲི་ཅི་ཐུབ་བྱེད་ཀྱི་ཡོད། སྤྱི་ཚོགས་ནང་དུ་ཁ་ཡག་ངོ་དགའ་དང་། བསྟོད་གླུ་་བྲིན་རྒྱུག་ཆེ་བས། ངས་འདི་དག་ལས་ལྡོག་ཕྱོགས་ཤིག་འབྲི་ན་ལམ་ཁ་ཞིག་ཨེ་ཡོད། ད་ཁྱེད་ཀྱིས་གསལ་པོར་མཁྱེན་ཡོད་ངེས།
གངས།-བཀའ་དྲིན་ཆེ། ད་དུང་འདྲི་རྒྱུ་ཞིག་ལ། ང་ཚོའི་སྤྱི་ཚོགས་ནང་དུ་རྩོམ་ཡིག་འབྲི་ཀློག་ལ་ལྟ་སྟངས་དེ་ཙམ་ཡག་རྒྱུ་མེད་པ་དང་། ལྷག་པར་དུ་དགོན་སྡེ་ནང་དུ་རྩོམ་ཡིག་འབྲི་ཀློག་ལ་མཐོང་ཚུལ་ཡག་པོ་མེད་པ་འདྲ། ཁྱེད་ཀྱིས་བལྟས་ན་ཁྱེད་ཡོད་སའི་དགོན་སྡེ་ནང་དུ་དེ་ལྟར་རེད་དམ།
སྲོང་།-ངས་རྩོམ་ཡིག་འབྲི་ཀློག་གི་གོམ་སྣེ་ཐོག་མ་སྤོ་དུས་སྟོང་ལོ་གསར་པའི་ཚེས་ཤར་ལ་ཁེལ་ཡོད། སྐབས་དེ་དུས་གཏོང་ཡིག་འབྲི་ཐུབ་མཁན་ཡང་རེ་ཟུང་ཙམ་རེད། རྩོམ་ཡིག་འབྲི་ཀློག་གི་འཁོར་་ཡུག་ཧ་ཅང་གུ་དོག་པ་དང་། སྙན་ངག་སྦྱོང་ན་སྨྱོན་པ་ཆགས་འགྲོ རྩོམ་པ་པོ་སྨྱོན་པ་རེད་ཟེར་བའི་ལྟ་ཚུལ་གྱི་ན་བུན་སྟུགས་པོ་ཞིག་གིས་ཡོངས་སུ་བཏུམས་འདུག འཁོར་ཡུག་འདི་འདྲའི་ནང་དུ་རྩོམ་ཡིག་འབྲི་ཀློག་ཡག་པོ་ཡོད་ཟེར་ན་ཁྱེད་ཀྱང་དགོད་མོ་ཤོར་ངེས། གང་ལྟར་སྐབས་དེ་དུས་ཀྱི་གནས་བབ་ནི་དེ་འདྲ་རེད། ཕྱི་ལོ་༢༠༠༣དེ་ཤད་ཅིག་ནས་ངས་ནོར་སྡེ་ཚགས་པ་ཐོག་ཏུ་སྙན་ཚིག་ཅིག་སྐུར་ཡོད་པས་ཚགས་ཤོག་ནང་དུ་བཀོད་འདུག ཉིན་ཞིག་རྒན་ཕྲུག་གཅིག་པ་ཞིག་གིས་ཁྱེད་ཀྱིས་སྙན་ངག་འདྲ་བྲིས་ནས་ཅི་བྱེད། རྒན་གྱིས་ཚགས་ཤོག་ནང་ནས་མཐོང་འདུག ཚོགས་གཏམ་རག་ས་ཡོད་ཟེར། ངས་སྡུག་པ་ཅི་ཡང་བྲིས་མེད། ཅེས་ལེན་འདེབས་བྱས་རུང་ང་རང་བློ་བདེ་པོ་ཞིག་མ་བྱུང་། ཁོང་གིས་དངོས་རྫུན་ཡིན་མིན་མ་ཤེས། རྒན་གྱིས་ནི་ཅི་ཡང་གསུང་མ་མྱོང་།
དེས་རྗེས་ནས་སྨྱུག་མིང་བཀོལ་ཏེ་རང་གི་ཉེ་འཁོར་དག་གིས་ཤེས་མི་ཐུབ་པའི་ཐབས་ཤེས་དེ་འཐེན་པ་ཡིན། 
ལོ་རེ་བཞིན་སྤྱི་ཚོགས་ཀྱི་འགྱུར་འགྲོས་ནི་ཧ་ཅང་མྱུར་ལ། དགོན་སྡེ་ནང་དུའང་འགྱུར་བ་སྣ་ཚོགས་ཤིག་དང་གོམ་པ་མཉམ་སྤོ་བྱེད་ནས་སྔ་བཞིན་སྡོད་ས་མེད་པ་ཞིག་ཏུ་ཆགས་སོང་། དེ་སྐབས་ནས་ད་ལྟའི་བར་གནམ་ས་ལྟ་བའི་འགྱུར་ལྡོག་སོང་འདུག ཕྱིས་སུ་དུས་དེབ་ཅིག་ཏུ་རང་མོས་སྙན་ངག་གི་ལམ་ནས་རང་གི་ལྟ་ཚུལ་ཞིག་བྲིས་པ་ཡིན། དེ་མི་འགར་རེས་མ་གཏོགས་གོ་བ་ལེན་ཐུབ་མི་འདུག་པས་ཡག་པོ་བྲིས་འདུག་ཟེར་མཁན་རེ་ཟུང་ཙམ་ལས་རྙོག་དྲ་བཤད་མཁན་བྱུང་མ་སོང་། དེའི་ཕྱི་ལོ་ཙམ་ལ་དུས་དེབ་ཏུ་གོ་བདེ་པོའི་ཐོག་ནས་དངོས་ཡོད་དང་བདེན་པ་གཞི་བཞག་གི་སྙན་ཚིག་འགའ་བྲིས་ཡོད་པས། ངའི་རྒྱབ་ལ་ཞབས་བརྟེན་མང་པོ་འཚོགས་གི་ཡོད་འདུག མ་ཟད་ང་ལ་དངོས་སུ་དེ་འདྲ་མ་བྲིས་ཟེར་ནས་བསླབ་བྱ་གནང་མཁན་ཡང་རེ་ཟུང་བྱུང་སོང་། གང་ལྟར་འགྱུར་བ་མང་པོ་སོང་ཡོད་ཀྱང་འགྱུར་མེད་རྡོ་རྗེ་ནི་སྤྱི་ཚོགས་ཀྱི་ནག་ཉེས་གླེང་མི་ཆོག་པ་དེ་ཡིན་འདུག
གངས།-བཀྲ་ཤིས་བདེ་ལེགས། འུ་གཉིས་དྲ་འབྲེལ་ཆད་ནས་ལོ་གཉིས་མ་ཟིན་ཙམ་སོང་འདུག དེའི་རིང་དུ་སྐུ་ཉིད་སྔར་བཞིན་བདེ་གནས་ཡིན་ཤག་དང་གང་རྩོམ་བྱ་བ་རྣམས་གང་འཕེལ་སོང་ཡོད་ངེས་རེད། འུ་གཉིས་བར་གྱི་གཏམ་གླེང་དག་ད་བར་ངས་ཉར་ཚགས་བྱས་ཡོད། ད་རེས་ཁོམ་སྐབས་དང་བསྟུན་ནས་ཁ་བརྡ་རེ་བྱེད་ན་བསམ་སོང་། ལོ་ངོ་གཉིས་མ་ཟིན་ཙམ་འདི་དག་གི་རིང་དུ་ངེད་ལའང་འགྱུར་བ་ཡག་སྡུག་གཉིས་ཀ་བྱུང་འདུག དེ་བཞིན་ཁྱེད་ལའང་འགྱུར་བ་རེ་ནི་ཅེས་ཀྱང་སོང་ཡོད་ངེས་སྙམ། 
སྲོང་།-གྲོགས་པོ་ལགས་མ་ཐུག་ཡུན་རིང་། ཁྱེད་ས་ཡི་སྟིང་ན་འཛུལ་སོང་བ་ནི་ཨེ་ཡིན་བསམ་ནས་སྡོད་ཡོད། བསྐྱར་དུ་ཐུག་པ་ཧ་ཅང་དགའ་སོང་། རེད་རེད། ཁྱེད་ལ་འགྱུར་ཡག་པོ་རེ་སོང་ཡོད་པ་ཤེས་ཀྱི་འདུག ངེད་ལའང་འགྱུར་ལྡོག་རེ་གཉིས་ཙམ་བྱུང་སོང་ལབ་ན་མི་འགྲིག་པ་མེད། གཅིག་ནི་ལོ་ན་ཆེར་སོང་ནས་ཨ་ཁུ་དང་ཐུག་པ་ཐག་རིང་དེ་ཙམ་མི་འདུག ཧཧ། དགའ་འོས་ཀྱི་འགྱུར་བ་གཅིག་ནི། སྒེར་གཉེར་དྲ་ཚིགས་ཤིག་གཉེར་ནས་རང་རྩོམ་གཏམ་རྙོག་དེ་དག་སྤུངས་ཅི་ཐུབ་བྱེད་ཀྱི་ཡོད། ལོ་གཅིག་གི་ནང་དུ་རྩོམ་ཡིག་༣༢ཙམ་བྲིས་ཐུབ་འདུག་པས་ང་རང་བློ་ཁ་ཅུང་བདེ་ནས་ཡོད། 
གངས།- ཨོ་་་་ངོ་མ་གཏམ་བཟང་རེད། ཁྱེད་ལ་འགྱུར་ལྡོག་གཞན་ཞིག་བྱུང་འདུག་བ། དེ་སྔར་རྩོམ་ཡིག་ཕྱིར་བཏོན་ཐབས་བྱེད་ཀྱི་མེད་པར་ད་རེས་རྩོམ་ཡིག་སྤེལ་བ་མ་ཟད་ཁ་གྲངས་ཀྱང་མང་པོ་དེ་འདྲ་བྱུང་འདུག མ་གཞི་ཁྱེད་འགྱུར་བ་རེད་དམ་སྤྱི་ཚོགས་འགྱུར་བ་རེད། ཧཧ
སྲོང་།-སྤྱི་ཚོགས་ནི་སྔ་བཞིན་རང་སོར་གནས་འདུག ད་རེས་ངས་ཀྱང་ལྐུག་པའི་ཨུ་ཚུགས་རེ་མི་བྱེད་པར་རང་ཉིད་ལ་བཅོས་བསྒྱུར་རེ་བཏང་ཡོད། རྩོམ་ཡིག་ཁ་ཕྱོགས་བསྒྱུར་ཏེ་ལེགས་ཆ་རང་བཞིན་གྱི་གནས་ཚུལ་བཀོད་ཅི་ཐུབ་བྱེད་ཀྱི་ཡོད། གང་ལྟར་ཉེན་ཁ་མེད་པའི་རྩོམ་ཡིག་འབྲི་ལོབས་སུ་སོང་ཡོད་པས་ཁ་གྲངས་ཡང་མང་ཙམ་སླེབས་པ་རེད། སྙན་ངག་ལབ་ན་ཚད་མཐོ་དྲགས་པ་མི་འགྲོ་ཚིགས་བཅད་ཀྱང་རེ་འགའ་བྲིས་ཡོད་ལ་འདི་དག་ལ་དགའ་པོ་བྱེད་མཁན་ཡང་རེ་ཟུང་འདུག 
གངས།-རྩོམ་ཡིག་བྲིས་པ་ལས་ཉམས་མྱོང་རག་རྒྱུ་རེ་ཡོད་ཚད་འདུག་ལ། མ་ཟད་ཁྱེད་ཀྱི་རྩོམ་ཡིག་ཐུང་ཐུང་དེ་དག་ཉན་བྲོ་པོ་དང་གནད་དོན་གླེང་སློང་བྱེད་ཐབས་སྤྱད་མཁས་པ་བྱེད་འདུག་པ་མཐོང་གི་འདུག ཁྱེས་ལོབ་ད།
སྲོང་།-རྩོམ་ཡིག་འབྲི་དུས་འུར་ཤོབ་ཆེ་དྲགས་པ་དང་གནད་དོན་དངོས་གླེང་མི་ཐུབ་པ། ཆ་མི་ཚང་བ། ཉིད་ལག་མང་འགྲོ་བ་སོགས་དཀའ་ཁག་རིམ་པ་ཞིག་འདུག་ཅིང་། ད་སྐབས་དཀའ་ངལ་འདི་དག་ལས་ཅུང་རྒལ་ཐུབ་ཙམ་ཡོད་བསམ་ནས་འདུག་ཡོད། རྩོམ་ཡིག་གིས་གནད་དོན་ཆུང་ཆུང་ནས་འཇུས་ཏེ་ཆེ་པོར་སྙོབས་ཐབས་བྱེད་དགོས་པས་མཚམས་རེ་ཟ་དང་ཟུར་མང་པོ་ནས་བརྗོད་དོན་ཤོར་གྲབས་བྱེད་བཞིན་པ་དང་བཤད་པ་དག་དོན་དངོས་དང་ཧ་ཅང་ཐག་ཉེ་དགོས་པ་ལ་ཉེ་མི་ཐུབ་པའི་དཀའ་ཁག་ཅིག་ཀྱང་འདུག གང་ལྟར་ཐོག་མ་མགོ་འཛུགས་དུས་ཧ་ཅང་སྙིང་རྗེ་མོ་ཞིག་གིས་མགོ་འཛུགས་ཏེ་བརྗོད་དོན་ཁྱོན་ཡོངས་ལ་བྲོ་བ་དམིགས་བསལ་རེ་འབྱིན་ཨེ་ཐུབ་ཀྱིས་འབད་པ་བྱེད་བཞིན་ཡོད། ཁོམ་པ་ཡོད་ན་གོམས་པ་རེ་ཆགས་ཐུབ་པ་འདུག་སྙམ།
གངས།-ངས་བལྟས་ན་ཁྱེད་ཀྱིས་དེབ་ཅིག་འདོན་ཐུབ་ན་ཡག་པོ་མི་འགྲོ་བསམ། དེབ་འདོན་པ་དཀའ་ཁག་དང་ཡོད་ངེས་ཡིན་རུང་ཕན་ཐོག་ཀྱང་མང་པོ་ཡོད་རྒྱུ་རེད་སྙམ། གང་འདྲ་བྱེད་རྩིས་ཡོད།
སྲོང་།-སྤྱི་ན་དེང་སྐབས་དེབ་ལྟ་བའི་འཁོར་ཡུག་ཆུང་དུ་འགྲོ་བཞིན་འདུག་ལ་མ་ཟད་རྩོམ་མཁན་སྐད་གྲགས་ཅན་དག་གི་དེབ་ཅུང་བྲིན་པ་ལས་གཞན་ལ་འཁོར་རྒྱུག་གི་ཁྲོམ་རྭ་མི་འདུག མ་གཞི་ང་རང་དེབ་འདོན་རྒྱུ་ཡང་མི་དགའ། ལྷག་པར་དུ་སྙན་དེབ་འདོན་རྒྱུ་ནི་ཆོ་མེད་ཅིག་རེད་བསམ་ནས་ཡོད། དེའི་རྒྱུ་མཚན་ནི་སྒོར་མོ་མང་པོ་སྤྱད་ནས་དེབ་བཏོན་ཐུབ་ཙམ་བྱུང་རུང་ཀློག་པ་པོ་ཆེས་ཉུང་བས་བཏོན་རུང་ཕན་ཐོག་དང་ཁྱབ་བརྡལ་འགྲོ་ཁག་པོ་རེད། ཡང་ཕྱོགས་གཅིག་ནས་ང་རང་ད་ལྟའི་རྩོམ་ཡིག་དག་ནི་འབོལ་རྩོམ་རང་བཞིན་དང་དྲ་ཐོག་གི་འཁོར་ཡུག་ལ་དམིགས་ནས་ཐུང་ཐུང་བྲིས་ཡོད་པས་དེ་དག་བསྡུས་ཏེ་དེབ་གཟུགས་བཟོས་རུང་དོན་སྙིང་ཞིག་མི་འདུག་དྲན་བཞིན་ཡོད། འོན་ཀྱང་<རྟེན་འབྱུང་དང་ཙོང་ཁ་པ།> བསྟོད་པ་ལེགས་བཤད་སྙིང་པོའི་སྦུས་དོན་འགྲེལ་བ།༽ ཞེས་པའི་དེབ་ཅིག་འབྲི་རྩིས་ཀྱིས་ལྟ་གོན་བྱེད་བཞིན་པ་ཡིན། འབྲི་སྟངས་དང་རྩོམ་གཤིས་དག་དེ་སྔར་གྱི་གཞུང་ལུགས་དག་དང་མ་འདྲ་བར་དེང་རབས་རྩོམ་གཤིས་ཐོན་ཐབས་དང་། དེང་གི་གཞོན་སྐྱེས་དང་དུས་རབས་གསར་པ་ལ་ཁ་ཕྱོགས་ནས་འབྲི་བསམ་ཡོད། འོན་ཀྱང་བློ་ཁ་ཚིམས་པ་ཞིག་ཡོང་ཨེ་ཐུབ་མི་ཤེས་ལ་གལ་ཏེ་རང་བློ་ཚིམས་པ་ཞིག་མ་བྱུང་ན་འདོན་རྩིས་མེད། ཚན་པ་རེ་རེ་བཞིན་ཁོམ་སྐབས་སྤྱད་ནས་འབྲི་ན་ལོ་ངོ་ལྔ་དྲུག་གཅིག་ནང་ཚར་ཐུབ་པ་བསམ་བཞིན་ཡོད། དུས་ཚོད་དཀོན་པོ་འདུག་པས་ཞིབ་ཕྲ་ད་དུང་མི་ཤེས་ཡ།
གངས།-ཨ་རོགས། ད་རེས་འུ་གཉིས་གླེང་མཚམས་འདི་ནས་འཇོག རྗེས་མ་མི་མཐུད་དེ་འཚོ་བའི་ནང་དུ་འཛུལ་ཏེ་གཏམ་རྙོག་རེ་གླེང་རེས་བྱེད། འུ་གཉིས་དྲི་ལན་དག་གིས་ང་རང་སྐྱིད་དུ་གཅུག་གི་འདུག འོན་ཀྱང་ཆུང་མས་ཉོལ་ཟེར་ནས་རང་དབང་རེ་མི་སྟེར་བའི་དཀའ་འདུག་ཡ། ཁྱེད་ཚོ་མི་རྐྱང་ཚོ་ངོ་མ་སྐྱིད་པོ་རེད། ཧ་རོ་ཡ།
སྲོང་།-ཧཧཧ ཆུང་མའི་ཁ་ལ་ཉན་ནས་ཡག་པོ་ཉོལ། སྒོ་ཁར་ཕུད་དུས་འགྱེད་པ་སྐྱེ་ཡོང་། ཡ་ཡ། གནས་སྐབས་བདེ་མོ། ཁ་དྲོ།

Comments