འཁོར་བ་སྡུག་གི་རྒྱ་མཚོ།









ཉི་ཤར་ཚད་པ་གཟོད་ཐབས་མེད་དུས་ཀྱང་།།
རྔུ་ནག་ཐིག་པས་གདོང་ལ་རི་མོ་བྲིས།།
ལུས་སྟོད་རྔུ་ལེན་བརླན་གྱིས་འཚོས་པས་ན།།
ད་དུང་ཉོས་ཞེས་སྐད་གཟན་འདར་འདར་ཞིག།
འདི་ཉིད་མཐོང་དུས་སེམས་ལ་སྡུག་ནད་ཅིག།
དཀོན་མཆོག་གསུམ་པོ་ཡང་ཡང་འབོད་འདོད་ཅིག

མི་ཐེབས་ཁུར་པོ་ནན་གྱིས་གཉའ་ལ་ཁུར།།
སྒྱུས་ཁུག་ལྷུག་ལྷུག་འགྲོ་མ་རྒྱུག་གིས་སོང་།།
མཆུ་ཏོ་སྐམ་ནས་སེར་ཀ་དུ་མ་གས།།
སྐད་རྩ་འབུར་ཏེ་དབུགས་ཀྱང་མི་ལེན་པ།།།
འདི་ཉིད་མཐོང་དུས་སེམས་ལ་སྡུག་ནད་ཅིག།
དཀོན་མཆོག་གསུམ་པོ་ཡང་ཡང་འབོད་འདོད་ཅིག


མགོ་སྐྲ་གཟེང་པར་ཐལ་བས་སྐྱ་མདོག་བསྒྱུར།།
གྲ་མཉམ་མེད་པའི་སྤུ་སོབ་འགྲམ་ངོས་གང་།།
དྲེག་ནག་ངན་པས་སེན་དང་སོར་མོ་ཁེངས།།
ཨ་ཐང་ཆད་པའི་སྐྱོ་ཉམས་གདོང་ནས་འཕྱུར།།
འདི་ཉིད་མཐོང་དུས་སེམས་ལ་སྡུག་ནད་ཅིག།
དཀོན་མཆོག་གསུམ་པོ་ཡང་ཡང་འབོད་འདོད་ཅིག

ཁྱོ་གས་རྡུང་བའི་རྨ་ཤུལ་རྣག་གིས་འབུར།།
བཟའ་ཟླས་བྲད་པའི་དཔག་བཤུལ་དམར་རེ་མངོན།།
ཨ་མ་ཟེར་བའི་ངུ་གཟེར་བཙན་པོ་འབར།།
ཨ་ཕར་བསྙེན་ནས་ངལ་གསོ་དུས་ཀྱང་འཕྲོག།
འདི་ཉིད་མཐོང་དུས་སེམས་ལ་སྡུག་ནད་ཅིག།
དཀོན་མཆོག་གསུམ་པོ་ཡང་ཡང་འབོད་འདོད་ཅིག

གྲོང་སྟག་རྨོ་རྨོས་ཐུད་ལུད་རྒྱག་བཞིན་གཤེད།།
ཁྱིམ་མཚིས་ཨ་ཕས་ལྡོག་མིག་ལྟོས་ནས་སོང་།།
ཤ་ཉེ་སྤུན་ཡང་རྒྱང་ནས་རྒྱང་ནས་དཀྱེད།།
ཁེར་རྐྱང་ཁྱིམ་ལ་སྡུག་ཁ་མ་སོས་པ།།
འདི་ཉིད་མཐོང་དུས་སེམས་ལ་སྡུག་ནད་ཅིག།
དཀོན་མཆོག་གསུམ་པོ་ཡང་ཡང་འབོད་འདོད་ཅིག།

བུ་རྒོད་ལོན་ནས་རྐུན་མའི་ལས་ལ་ཞུགས།།
བུ་མོ་མཚར་ཏེ་གཞན་ཡུལ་གནའ་མ་ཤོར།།
བུ་ཕྲུག་མང་ཡང་ཕ་མ་སྐྱུར་ནས་སོང་།།
རྒས་ཁོག་གཉིས་པོ་འཚོ་བ་འཁྱོལ་ཙམ་ཞིག།
འདི་ཉིད་མཐོང་དུས་སེམས་ལ་སྡུག་ནད་ཅིག།
དཀོན་མཆོག་གསུམ་པོ་ཡང་ཡང་འབོད་འདོད་ཅིག


རྒས་ཤིང་ཁོགས་པའི་ལུས་གཟུགས་ནང་དུ་གུག།
སྐམ་ཞིང་རིད་པའི་རྐང་ཟུང་འཁྱར་མ་འཁྱོར།།
སོ་ཐག་ཆད་ནས་ཟས་ཀྱང་མུར་མུར་ལྡད།།
འདི་འདྲ་དུས་ཀྱང་ཁྱིམ་ལས་མ་སྐྱུར་བ།།
འདི་ཉིད་མཐོང་དུས་སེམས་ལ་སྡུག་ནད་ཅིག།
དཀོན་མཆོག་གསུམ་པོ་ཡང་ཡང་འབོད་འདོད་ཅིག

མི་ཚེའི་མཐའ་མཇུག་དབུགས་རྒྱུ་ཆད་ལ་ཁད།།
མལ་སའི་ནང་ནས་མཐའ་མའི་ཁ་ཆེམ་འཇོག།
འགྱེད་གདུང་ངང་དུ་འཆི་བ་སྒུག་དུས་དེར།།
ཉེ་དུ་འཛོམས་ནས་ཤུལ་བཞག་འཕྲོག་རེས་རྩེད།།
འདི་ཉིད་མཐོང་དུས་སེམས་ལ་སྡུག་ནད་ཅིག།
དཀོན་མཆོག་གསུམ་པོ་ཡང་ཡང་འབོད་འདོད་ཅིག

ཤི་མ་ཐག་ཏུ་རྐང་ལག་ཐག་པས་བཅིངས།།
རོ་ལས་གཤན་པས་ལུས་ཤ་དུམ་བུར་བཏུབ།།
རོ་གོས་ཟེར་བཞིན་གོས་ལྷེབ་ཙམ་ཡང་དོར།།
ཚིག་བཞི་མིང་ཡང་ལྷག་མེད་གཙང་ཕྱག་བྱས།།
འདི་ཉིད་མཐོང་དུས་སེམས་ལ་སྡུག་ནད་ཅིག།
དཀོན་མཆོག་གསུམ་པོ་ཡང་ཡང་འབོད་འདོད་ཅིག

བལྟས་པ་ཙམ་གྱིས་འདི་ནི་མྱ་ཁམས་འདྲ།།
བསམ་པའི་ཚེ་ན་མི་ཡུལ་སྡུག་གི་གཞི།།
ཞིབ་ཏུ་དཔྱད་ན་སྐད་ཅིག་ཁོམ་ལོང་མེད།།
མི་ཚེ་ཞེས་པ་སྙིང་པོ་ཏིལ་འབྲི་ཙམ།།
སུ་དང་གང་ལ་བདེ་བས་ཕོངས་པ་འདི།།
འཇིག་རྟེན་ཆེ་པའི་བྱེད་གཟུགས་དངོས་མ་ཞིག།

0 comments:

Post a Comment