མ་ཧེ་དང་ཐུག་པའི་ལེའུ།
ཉི་མ་ནུབ་རི་རྒྱབ་ནས་ཕྱེ་ཙམ་ཞིག་མངོན་འདུག།
ཁྲག་དམར་རླན་གྱིས་ཕྱི་ནང་ཚོས་པ་དེ་ཨེ་ཡིན།
དམར་ལ་འོད་མདོག་སྐྱོ་བའི་རྒས་ཉམས་ཤིག་བཟུང་སྟེ།།
བདག་སོགས་སྣོད་བཅུད་གཉིས་ཀ་དམར་ནག་ཅིག་བཟོས་བྱུང་།།
རྐང་སྣེས་འཕྲད་ལམ་གཅོད་བཞིན་བག་ཡངས་སུ་རྒྱུ་བ།།
དགྲ་བཅོམ་ཕེབས་ལུཌ་མིན་ཡང་གཤིས་འཇམ་གྱི་ཚུཌ་ཡོད།།
མཐོང་ན་མི་མཐུན་མེད་པ་འདི་རིགས་ལ་ཟེར་སྙམ།།
ལྟ་མཁན་སུ་ཡང་མ་བྱུང་སྐྱོ་སྐྱོ་ཞིག་བྱུང་སོང་།།
ཡ་གི་སྤང་ཁུག་དེ་ན་ཟོག་ཁྱུ་ཞིག་འཛོམས་ནས།།
ས་ལ་མགོ་བོ་དྲུད་བཞིན་ལྷོད་པོ་ཞིག་སྡོད་འདུག
རྭ་རྩེ་གྱེན་དུ་གཟེངས་བའི་བླང་རྒན་དེས་བལྟས་བྱུང་།།
སྒྲ་མེད་གསང་བརྡ་སྤྲོད་འདྲ་ཚང་མ་དེ་འདྲོགས་སོང་།།
རྭ་ལེབ་མ་ཧེ་ཚོན་པོ་ཕོ་ཤེད་དེ་ཚ་བ།།
ཕྲ་ཐུང་རྔ་མ་དེ་ཡང་གཡུག་གཡུག་འདྲ་བྱས་ནས།།
རྒྱུག་དང་མཆོང་གྲགས་བྱས་པའི་སྟ་གོན་དེ་བྱས་པས།།
བླ་རྒན་སྐྲག་འགོ་དེ་ཡང་འདི་ཉིད་ནས་ཚུགས་བྱུང་།།
དཔའ་མདོག་ཁྱི་ལ་བཟོ་དགོས་བཤད་ཚུལ་དེ་ཡོད་རུང་།།
རྫིག་མདོག་ཟོག་ལ་མི་འགྲོ་ངེས་གཏན་དེ་ཡིན་པས།།
ལྐུག་རྟགས་ལོ་དགུ་སྟོན་ན་སྡུག་གྱོང་དེ་མྱོང་སྲིད།།
དེ་དུས་དེ་ན་ངུས་ཀྱང་སྐྱབས་མཁན་ཞིག་མེད་ངེས།།
དེང་གི་སྤྱི་ཚོགས་གྲས་ན་གྲྭ་བླ་དག་སྡང་བ།།
མ་འགྲིག་ཉེས་དགུ་ཐམས་ཅད་མགོ་བོ་ལ་གཡོག་དུས།།
བསམ་མེད་ཟོག་ཁྱུ་ཞིག་གིས་སྡང་ལུཌ་འདི་མཐོང་སྐབས།།
ཅུང་ཙམ་མ་བདེ་ཟོལ་གྱིས་སྐྱོ་བ་ཞིག་སྐྱེས་བྱུང་།།
མགོ་རིལ་དཔུང་རྗེན་ཙམ་ནི་གང་ན་ཡང་འདུག་པས།།
རིག་མྱོང་རྩ་ནས་མེད་ཚུལ་བཟོ་ལྟ་དེ་ཅི་ཡིན།།
ས་གཞི་ནགས་ཚལ་མ་ལུས་དམར་མདོག་གིས་ཁྱབ་ཀྱང་།།
ཁོ་བོའི་གོས་གཟན་དམར་ལ་སྡང་སྟངས་དེ་ཅི་ཡིན།།
མ་རྡུང་རྡོག་རྫི་ཐེབས་ཀྱང་གསོན་ཐབས་དེ་དཀའ་བས།།
ག་ལེར་འགྲོ་མཚམས་གཅོད་བཞིན་བློ་ཐབས་ཤིག་འཐེན་རུང་།།
ཕྱི་ལ་བྲོས་རྒྱུ་དེ་ལས་བཀོད་པ་ཞིག་མ་རག།
སྡར་མ་བྲོས་སྟངས་དེ་ནི་ད་རེས་ཡིན་བསམ་བྱུང་།།
ཕྱི་ལྟས་ལན་གཅིག་མ་བྱས་ཤར་རེ་དེ་རྒྱུག་པས།།
རྐང་སྣེ་རྡོ་ལ་ཐོགས་ནས་གད་ཞབས་ན་ལྷུང་སོང་།།
མ་ཧེའི་རང་རྗེས་གསལ་བའི་འདམ་སྙོག་དེའི་ནང་ན།།
བདག་གིས་སྐུ་ལུས་རྗེན་པའི་རང་རྗེས་དེ་དཔར་བཞག།
ཕྱི་གོས་འཐུམ་བརྒྱབ་བྱས་ཏེ་རང་གནས་སུ་ལོག་པ།།
ཇག་བཅོམ་བཙན་རྒོད་ཁ་ནས་སྟོང་ལོག་དེ་འདྲ་བ།།
མགོ་ལུས་ཡོངས་སུ་དྲི་ངན་ན་འདམ་ཡིས་འགོས་ལུགས།།
གསོ་ཕག་སྐྱག་དོང་ཁ་ནས་འབུད་ཚུལ་དེ་དྲན་བྱུང་།།
སྟག་དང་འཐབ་ནས་ཤི་རུང་སྐད་གྲགས་རེ་ཡོད་ངེས།།
གླང་ཆེན་ཁ་ནས་མཐར་ན་དཔའ་གཏམ་རེ་བཤད་ཆོག
མ་ཧེ་ཁྱུ་ཞིག་དོ་ཡང་ལོ་རྒྱུས་ཞིག་མིན་པས།།
བྲོས་པའི་རྣམ་ཐར་འདི་ནི་ལེགས་པོ་རང་བྱུང་ཤག
2017-2-11
