བཀྲ་ཤིས་གཡང་བྱ་ཚེས་བྱུང་།
སྤྲེལ་ལོ་ཡལ་ནས་བྱ་ལོ་གསར་པ་ཚེས།།
ལོ་རྙིང་ཟད་ནས་གནམ་ལོ་གསར་པ་ཤར།།
སྔ་ལོ་རྫོགས་ནས་ད་ལོའི་ལོ་འགོ་ཚུགས།།
འདི་ལོའི་བྱ་ལོ་ལྷ་བྱ་གཡང་ལོ་ཡིན།།
མེ་མོ་བྱ་ལོ་བཀྲ་ཤིས་དབྱངས་དང་འགྲོག།
ཕ་མ་སྐུ་ཚེ་སྔ་ལས་རིང་ཞིང་བརྟན།།
ཁ་ཏོན་དགེ་སྦྱོར་གནའ་ལས་ད་གི་ཡག།
བདེ་སྐྱིད་དཔལ་ཡོན་རྟག་ཏུ་ཐོབ་པར་ཤོག
མེ་མོ་བྱ་ལོ་བདེ་ལེགས་ཆར་དུ་སྙིལ།།
ཁྱིམ་མི་མཉམ་འཛོམས་དགའ་སྐྱིད་དཔལ་ལ་རོལ།།
ལྷན་འཛོམས་ཉི་མ་སྔ་ལས་ལྷག་ཏུ་ཤར།།
ཚེ་རིང་ནད་མེད་རྟག་ཏུ་ཡོང་བར་ཤོག།
མེ་མོ་བྱ་ལོ་ཕུན་ཚོགས་དཔལ་དང་མཉམ།།
སྐྱེས་ཕོ་ཐམས་ཅད་དགྲ་ལྷའི་དཔུང་དང་འགྲོག།
སྨན་མོ་ཀུན་ལ་མཛའ་བརྩེ་ཆར་རྒྱུན་འབབ།།
རྒྱུ་འབྱོར་བདེ་སྐྱིད་རྟག་ཏུ་ཡོང་བར་ཤོག།
མེ་མོ་བྱ་ལོ་ནོར་ལྷ་དེ་དང་འགྲོག།
ཁྱིམ་ནོར་འཕེལ་བ་ཀླུ་དང་མཉམ་པར་ཤོག།
འབྲུ་ནོར་རྒྱས་པ་ལྷ་དང་མཉམ་པར་ཤོག།
ཁ་དྲོ་བཀྲ་ཤིས་རྟག་ཏུ་ཡོང་བར་ཤོག།
2017-2-27
