བོད་བཞུགས་གླུ་པ་གླུ་མ་དག་ལ་མཛུབ་མོ་བཙུགས་པའི་འོས་བབ་ང་ཚོ་ལ་མེད། ཁ་བདག་པོ་རྒྱོབ།

དོན་དངོས་ལ་ལྟ་མི་ཤེས་པ་འགས་ཟུག་སྐད་རྒྱག་དུས་བཙན་བྱོལ་དུ་གནས་པའི་སྐྱིད་རྒྱགས་མི་ཁྱོག་པ་འགའ་ཡང་ཟུག་སོང་། ད་དུང་བོད་ཀྱི་གླུ་པ་གླུ་མ་དག་ལ་ངོ་རྒོལ་ཡོད་ཅེས་དྲ་ལམ་ནས་དཔའ་རྟགས་དང་དཔུང་པ་ངོམས་པའི་བྱ་སྤྱོད་དགོད་བྲོ་བ་མང་པོ་ཞིག་ད་ནངས་ནས་འཁྲབ་མགོ་ཚུགས་འདུག ཟུག་མཁན་འདི་དག་ལས་མང་ཤོས་ནི་ངོ་དེབ་དང་སྐད་འཕྲིན་ནང་གི་ངོ་གདོང་སྟོན་མི་ཕོད་པའི་མི་སྐོར་ཞིག་རེད། ཁོ་ཚོས་ཁ་ནས་གཏམ་ཚིག་གསུམ་བཤད་པའང་འགན་ཁུར་ལེན་འདོད་མེད་པར་པར་རྫུན་དང་མིང་རྫུན་ཕབ་ཏུ་ཡིབས་ཏེ་"ཁྱི་རྒན་རྒྱགས་དུས། གནམ་ལ་ཟུག་ཟེར་བ་བཞིན་སྐྱག་དྲི་བྲོ་བའི་སྐད་ཆ་མང་པོ་ཞིག་དྲ་ལམ་དུ་སྤུངས་བཞིན་ཡོད།

གླུ་པ་ཡ་ཏུང་གི་གླུ་དབྱངས་གཅིག་གིས་མི་རིགས་ཀྱི་དབྱངས་ཀྱི་འགྱུར་ཁུག་དང་དམངས་ཁྲོད་ཀྱི་སྒྱུ་རྩལ་གསོན་པོ་བདག་ཉར་ཐུབ་པའི་བྱས་རྗེས་འདི་ཙམ་ཁྱེད་ང་འདྲ་བ་ཚོས་མི་ཚེ་གཅིག་ལ་འབད་འབད་དུང་དུང་ཇི་ལྟར་བྱས་རུང་ཉིན་མོའི་རྨི་ལམ་ཙམ་ལས་མེད་པ་འདི་ཧ་གོ་དགོས། བཙན་བྱོལ་དུ་ཡོང་ནས་རང་ཁ་སོས་ཐབས་ཙམ་ལས་མི་རིགས་ལ་སྨན་པའི་བྱས་རྗེས་གྲོག་མའི་རྐང་རྗེས་ཙམ་ཞིག་བཞག་མ་མྱོང་པར་ད་རུང་བོད་བཞུགས་གླུ་པ་གླུ་མ་དག་ལ་སྡིགས་ཤིང་གཤེ་བའི་ཧམ་པ་འདི་དང་ངོ་ལྤགས་འདི་ག་ནས་རག་བྱུང་། གདོང་ལ་ཁྲག་ཡོད་ཅིང་ཁོག་ལ་སྙིང་ཡོད་ན་བསམ་གཞིགས་ཅུང་ཐོངས། སླད་ནས་སྐྱིད་རྒྱགས་མི་ཁྱོག་པའི་སྐད་ཆ་དེ་བཤད་མ་འདུག

བཙན་བྱོལ་ནང་གི་འཚོ་བ་གཞིར་བཞག་ནས་སྐད་ཆ་བཤད་སྣང་བ་སྐྱིད་པོ་བཤད་མཁན་ཚོས་དོན་དངོས་བོད་ནང་གི་དངོས་ཡོད་དཀའ་ངལ་དང་སྤྱི་སྐད་མེད་པའི་དཀའ་ངལ་ཇི་ཡོད་གསལ་པོར་ཤེས་པར་གྱིས། བཙན་བྱོལ་ནང་དུ་དབུས་སྐད་ཆ་ལེ་ཆོ་ལེ་དེ་བཤད་བཞག་ན་ཧ་ལམ་སྐད་བརྡ་མི་འཕྲོད་པ་ཞིག་མེད་ཚད་རེེད། འོན་ཀྱང་བོད་ནང་དུ་དེ་འདྲ་མིན། ཆོལ་ཁ་གསུམ་བར་སྐད་བརྡ་འཕྲོད་ཐུབ་ཕར་ཞོགས། ཡ་ཏུང་དང་ཀུན་དགའ་གཉིས་ཀྱིས་སྡེ་དགེ་སྐད་ཐོག་ནས་བཤད་ཡོད་ན་མར་སྡེ་དགེ་དང་དཀར་མཛེས་གཉིས་ན་གོ་ཙམ་རེད། རྫ་ཆུ་ཁ་པ་དང་གསེར་རྟ། བྲག་མདོ། རྟའུ། འདབ་པ། དར་རྩེ་མདོ། མི་ཉག ཆ་འཕྲེང། འཇོལ་པ། ཉག་རོང་། རྒྱལ་ཐང་། འབའ་པ། ཡར་རྩིས་ན། ཡུལ་ཤུལ་དང་འཇོ་མདའ། གོ་འཇོ་སོགས་རེ་གཉིས་ཀྱིས་གོ་བ་ལས། སྨ་ཁམས། ཚ་བ། བྲག་གཡབ། ཆབ་མདོ། འབྲི་རུ། སོག་རྫོང་། ཀྲ་མོ། སྤོ་མདའ་སོགས་ཀྱིས་གོ་མི་ཐུབ་པའང་ཅུང་ཙམ་ལས་གོ་མི་ཐུབ།

དོན་དག་གོ་མ་ཐུབ་པའི་ཁྱབ་བསྒྲགས་དེས་སུ་ལ་ཕན་ཐོགས་སམ། དོན་གོ་བ་གཙོ་བོ་མ་ཡིན་པའི་འཁྲབ་སྟོན་ཞིག་ཡིན་ན་རྟའུ་ལོག་སྐད་དང་རྒྱ་རོང་ལོག་སྐད། ཅོ་ནེ་དང་པ་རིས་སོགས་ཀྱི་ལོག་སྐད་ཀྱིས་བཤད་བཞག་ནའང་མི་ཆོག་པ་གང་ཡང་མེད། འོན་ཀྱང་ད་ཐེངས་ཀྱི་གླུ་པ་གླུ་མ་ཚོས་སྡིངས་ཆའི་སྟེང་ནས་གླུ་ལེན་གར་འཁྲབ་ཅིག་མ་ཡིན་པར་<ཐར་ལོ>སྟོན་པའི་ཁྱབ་བསྒྲགས་དང་བོད་མི་ཚོས་ལྟད་མོ་དེར་རྒྱབ་སྐྱོར་དང་ཐུགས་འཁུར་ཡོང་བའི་རེ་བ་སྟོན་པ་ཞིག་ཡིན། སྤྱི་ན་གློག་བརྙན་རིགས་ལ་དགའ་མོས་བྱེད་མཁན་མང་ཤོས་ནི་གཞན་སྐྱེས་ཡིན་ཞིང་གློག་བརྙན་སྒྱུ་རྩལ་གྱིས་ཤུགས་རྐྱེན་ཐེབས་དགོས་ས་དེའང་གཞོན་སྐྱེས་ཚོ་ཡིན་སྟབས་རྒྱ་སྐད་ཀྱི་ལམ་ནས་བརྡ་ཁྱབ་གཏོང་བ་དེས་ཕན་ནུས་དང་ཁྱབ་རྒྱ་ཡོང་རྒྱུ་གསལ་པོ་རེད། དེང་སྐབས་བོད་ཀྱི་ཡུལ་ལུང་སོ་སོའི་གཞོན་སྐྱེས་བརྒྱ་ཆ་དགུ་བཅུ་ལྷག་གིས་རྒྱ་སྐད་གོ་ཐུབ་ཅིང་། ལྷག་པར་ཕྱི་ལོ་༢༠༠༥དྲུག་ནས་སློབ་གྲྭ་འགྲིམས་མཁན་ཇེ་མང་དང་སློབ་གསོ་ཐོབ་མཁན་དུ་གྱུར་པས་རྒྱ་སྐད་བཤད་ཉན་ཀྱི་གྲངས་ཀ་ཇེ་མང་དུ་སོང་ཡོད་པ་གསལ་པོར་ཆགས་ཡོད།

ད་ལོའི་ཁམས་པའི་བོད་སྐད་བརྙན་འཕྲིན་ཐོག་གི་བཅའ་འདྲི་ལེ་ཚན་ནང་དུ་འཁྲབ་སྟོན་པ་ཕུར་པ་སྐྱབས་གདན་ཞུས་ཀྱིས་ཁོང་སྒེར་གྱི་མི་ཚེ་དང་གློག་བརྙན་ལས་རིགས་ཐད་ནས་ཁ་བརྡ་བྱེད་དུས་ཁོང་གིས་རྒྱ་རོང་བའི་སྐད་ཤེས་པ་ཙམ་ལས་དེ་མིན་ཀུན་གྱིས་གོ་ཐུབ་པའི་སྐད་རྒྱག་མི་ཤེས་པས་མཐར་རྒྱ་སྐད་ཀྱིས་བགྲོ་གླེང་མི་བཟོ་དཀའ་མེད་བྱུང་སོང་། དཔེ་འདི་བཞིན་ཡོངས་ཁྱབ་ཏུ་གོ་དགོས་པ་ཞིག་ཡིན་ན་ཡང་ན་སྐད་སྒྱུར་དང་ཡང་རྒྱ་སྐད་མ་སྤྱོད་རང་སྤྱོད་ཅིག་ཆགས་ཡོད། ཁྲོན་ཏུང་སློབ་འབྲིང་ན་སློབ་གཉེར་བྱེད་བཞིན་པའི་ངའི་ཤ་ཉེ་དང་ཉལ་ཁང་གཅིག་པའི་བོད་རིགས་སློབ་མ་ཁ་ཤས་འདུག ཁོ་ཚོ་ནི་དར་མདོ་དང་མི་ཉག རོང་བྲག་ནས་ཡིན་འདུག་པས་ངས་ཁྱེད་ཚོའི་དབར་བོད་སྐད་རྒྱག་གི་ཨེ་ཡོད་ཅེས་དྲིས་པ་ཡིན། རྒྱ་སྐད་ལས་བོད་སྐད་རྒྱག་ན་ངའི་སྐད་ཁོང་ཚོས་མི་གོ་ལ་ཁོ་ཚོའི་སྐད་ངས་གོ་མི་ཐུབ་ཀྱི་མི་འདུག་ཟེར། འདི་དང་འདྲ་བར་ད་བར་སློབ་ཆེན་ནང་གི་བོད་རིགས་སློབ་མ་ཚོའི་དབར་གོ་བརྡ་མི་འཕྲོད་པའི་དཀའ་ངལ་ཆེ་བས་སྤྱི་སྐད་དགོས་ཀྱི་འདུག་ཅེས་སྐད་རྒྱག་འགོ་བརྩམས་ཡོད།

ང་ཚོས་འདི་ནས་དབུས་སྐད་ཆ་ལེ་ཆོ་ཞིག་ཤེས་པའི་བཀའ་དྲིན་ལས་བགྲོ་གླེང་དང་གསལ་བསྒྲགས་གང་བྱས་ནའང་ཉན་བཤད་ཐུབ་པ་ཙམ་ཞིག་ཡོད། ང་རང་འཛིན་གྲོགས་དག་དང་མི་ལོ་༡༦ལྷག་ལ་མཉམ་བཤིག་མཉམ་འགྲོས་བྱས་ནས་ཡོང་བ་ཡིན། ད་ལྟ་ཡང་འཛིན་གྲོགས་ནང་གི་ཨ་མདོ་བ་དང་རྒྱ་ཐང་བ། ཏྲེ་ཧོར། རྫ་ཆུ་ཁ་པ་སོགས་ཀྱིས་རང་རང་ཕ་ཡུལ་གཅིག་པའི་དབར་ཕ་སྐད་བརྒྱབ་ནས་སྐད་ཆ་བཤད་དུས་གཞན་གྱིས་ཚིག་གཅིག་གཉིས་ལས་རྩ་བ་ཉིད་ནས་གོ་ཐུབ་ཀྱི་མེད་པ་དངོས་ཡོད་ཡིན། ཡུལ་ལུང་སོ་སོའི་སྐད་ལ་ཁྱད་པ་ཆེན་པོ་ཡོད་པའི་དངོས་ཡོད་དཀའ་ངལ་འདི་འདྲའི་གནས་སྟངས་ལ་བལྟས་ཏེ་སྐད་ཆ་བཤད་དགོས་པ་ལས། སྣང་བ་སྐྱིད་ཐག་ཆོད་པའི་སྐད་ཅོར་དེ་ད་ནས་མ་རྒྱག་རོགས།

2016-11-17

ཐའེ་ཝན་དང་བོད་ནི་ཨ་རྒྱ་གཉིས་ཀྱི་སྤོ་ལོ་ཡིན།

ཆབ་སྲིད་ནི་རང་ལ་ཁེ་ཕན་ཡོང་ཐབས་ཀྱི་ཐབས་ཇུས་ཤིག་ཡིན་པས་གང་ལ་ཁེ་ཕན་ཆེ་ན་དེར་འཇུག་རྒྱུ་ལས་ལས་འབྲས་དང་བདེན་པ། ཀུན་སྤྱོད་དང་འགན་ཁུར་ཞིག་ནམ་ཡང་རྩ་བར་འཛིན་གྱི་མེད། གཞུང་ལུགས་ཀྱི་ངོས་ནས་བལྟས་ན་ཆབ་སྲིད་ནི་ཐབས་ཇུས་ཤིག་ཡིན་པ་ལས་དེ་ལས་ཁ་གསལ་བ་སྟེ། རྒྱུ་འབྲས་སྲུང་དགོས་མིན་དང་དྲང་བཞག་ཡོད་དགོས་མིན་སོགས་ཀྱི་གནད་དོན་ཐད་དུ་སྒེར་གྱི་ལྟ་ཚུལ་བཟང་ངན་བཏོན་པ་ལས་རྩ་བའི་སྒྲོམ་གཞི་ལ་འདི་འདྲ་ཞིག་དགོས་ཞེས་པ་ནི་ཡོད་སྐད་མི་འདུག སྤྱི་ཚོགས་ཀྱི་འགྱུར་འགྲོས་ཁྲོད་ནས་ཆབ་སྲིད་དང་ཆོས་ལུགས་མཐུན་ལམ་དམ་ཟབ་ཀྱང་བྱུང་མྱོང་ཞིང་། རྦད་དུ་འགལ་བའི་རང་བཞིན་ཡང་བྱུང་ཡོད་པས་ན། རྣམ་པ་གཅིག་ཏུ་འགྲོ་ཐུབ་རྒྱུ་ཞིག་མེད་པ་འདུག

རང་རེའི་བོད་མིའི་འདུ་ཤེས་ཁྲོད་ཆབ་སྲིད་ནི་ཆོས་བཞིན་སྐྱོང་དགོས་པ་ཞིག་ཏུ་མཐོང་ནས་ཡོད་ཅིང་། ཆབ་སྲིད་པ་ཞིག་ཡིན་ན་དྲང་བཞག་བདེན་པ་འཛིན་མཁན་གྱི་མི་སྣ་ཞིག་ཡིན་ལོས་དགོས་སྙམ་པ་དེས་དོན་ལྔ་སྣོད་དྲུག་ལ་བག་ཆགས་ཅི་བས་འཐུག་པ་ཞིག་འཇོག་ཡོད་སྟབས་དཀའ་ངལ་མང་པོ་ཞིག་རང་བཞིན་གྱིས་འདྲུ་ནས་ཡོང་གི་ཡོད། ད་ཡོད་ནུབ་ཕྱོགས་ཀྱི་སྤྱི་ཚོགས་ན་ངེད་ཅག་ལྟར་མ་ཡིན་པར་རང་ལ་ཁེ་ཕན་སྐྲུན་ཅིང་གཞན་ལ་གྱོང་ཁ་སྤྲོད་པ་ཐུབ་པ་ཞིག་བྱུང་ན་ཆབ་སྲིད་པ་ལེགས་པོ་ཞིག་ལ་བརྩི་བཞིན་པའང་གསལ་པོ་ཡིན་སྟེ། ད་ལོའི་ཨ་མེ་རི་ཀའི་འོས་འདེམས་དེ་ལས་ཀྱང་ཁ་གསལ་ཆགས་ཡོད།

ད་རེས་ངས་འདི་ནས་བཤད་འདོད་པ་དེ་ནི་ཐའེ་ཝན་དང་བོད་ཀྱི་གནད་དོན་དེ་ཡིན་ལ་འདི་ནི་ནུབ་ཕྱོགས་པ་ཚོས་ཆབ་སྲིད་ཀྱི་ལག་ཆ་ཡག་པོ་ཡིན་པས་འདི་ཉིད་གློད་ཀྱང་མི་སྲིད་ལ་དམ་དུའང་འཛིན་མི་སྲིད། སྤོ་ལོ་རྩོད་མཁན་གཉིས་ཀྱི་བར་དུ་སྤོ་ལོ་ཞིག་མེད་ན་དོན་མེད་རྐང་པ་གཡུག་རྒྱུ་ལས་ཐོབ་ཤོར་གྱི་འགྲན་རྩོད་ཅི་ཡང་བྱེད་རྒྱུ་མེད་པས། སྤོ་ལོ་ནི་ཁོ་གཉིས་ཀྱི་རྩ་བའི་ཁེ་ཕན་ཆེད་དུ་ཕར་གཡུག་ཚུར་གཡུག་བྱ་རྒྱུ་དེ་ཡིན། ཐའེ་བོད་གཉིས་ནི་ཨ་རྒྱ་གཉིས་ཀྱིས་བར་ན་སྤོ་ལོ་བཞིན་ཡོད་སྟབས་སུས་རྐང་པ་སྔུན་ལ་བསྲིངས་ནས་རྡོག་ཐོ་གཞུས་ཏེ་དྲ་བའི་སྒོ་འགྲམ་དུ་ཁྲིད་རྒྱུ་དེ་ནི་འགྲན་ཡ་ལ་ཞེད་སྣང་སློང་བྱེད་ཡག་ཤོས་དེ་ཡིན། ཌོ་ནལ་ཁྲོམ་གྱིས་ཐའེ་ཝན་སྤྱད་ནས་ཀྲུང་གོའི་དྲ་བའི་སྒོ་ནང་དུ་བླུག་གྲབས་བྱས་པས་ཀྲུང་གོ་ནི་སྡོད་མི་བདེ་ཞིག་བཟོས་ཡོད་པ་རེད། ཀྲུང་གོས་ཀྱང་སྲིད་ཇུས་གསར་པ་ཞིག་བཏོན་རྩིས་ཡོད་ཅེས་སྦོམ་ཤོམ་བཤད་རུང་ཐའེ་ཝན་དང་མཁའ་མཚོའི་འགྲིམ་འགྲུལ་མཚམས་གཅོད་ན་ལས་དེ་མིན་ཧ་ལོས་དགོས་པ་ཞིག་བཟོ་ཐབས་མེད་པ་གསལ་པོ་རེད། ཐའེ་ཝན་གྱི་དཔལ་འབྱོར་རྟེན་གཞི་ཅུང་བརྟན་པོ་ཡིན་པས་ཀྲུང་གོའི་ཚོང་ལམ་འགག་ནའང་འ་ཆད་འུ་ཐུག་ཅིག་ཡོང་མི་ཐུབ་པས། ཀྲུང་གོའི་ཐབས་ལམ་ཅི་ཞིག་བཀོལ་ན་ད་གཟོད་ཐའེ་ཝན་དཀའ་ངལ་རང་བཞིན་གྱི་ལམ་དུ་དེད་ཐུབ་པའི་སྲིད་ཇུས་ཤིག་སུ་ལའང་བཤད་རྒྱུ་རག་གི་མེད། གནས་སྟངས་འདི་འདྲའི་འོག་ནས་ཀྲུང་གོས་ཌོ་ནལ་ཁྲོམ་ལ་ཞེ་པོ་ཞིག་བཟོ་རྒྱུ་ཡོད་མདོག་འཁྲབས་ནའང་ཌོ་ནལ་ཁྲོམ་མི་སྐྲག་པ་མ་ཟད་ཐའེ་ཝན་ནི་དེ་ལས་ཀྱང་ཞེད་སྣང་སྤུ་ཙམ་འབྱུང་གི་མེད།

ཌོ་ནམ་ཁྲོམ་གྱིས་སྤོ་ལོ་གཉིས་པ་ཞིག་གཡུག་རྒྱུ་ཡོད་པ་དེ་ནི་བོད་ཀྱི་གནད་དོན་དེ་ཡིན་ཞིང་། བོད་ཀྱི་གནད་དོན་ལ་སྐད་ཆ་སྦོམ་པོ་རེ་བཤད་པ་ཙམ་མིན་པར་ཀྲུང་གོ་ལ་འགྲམ་ལྕགས་གཞུས་པའི་ཐབས་ཇུས་སྤེལ་རྒྱུ་ཡོད། སྐད་ཆའི་ཐོག་ནས་ཌོ་ནལ་ཁྲོམ་གྱིས་བོད་ལ་རང་བཙན་ཡོད་པའི་བསྒྲགས་གཏམ་སྤེལ་རུང་། དེས་བོད་ལ་རང་བཙན་ཐོབ་ཐུབ་པའི་ནུས་པ་གང་ཡང་སྤྲོད་མི་ཐུབ། ད་ཡོད་དབུ་མའི་ལམ་འགག་ས་ཡང་ཀྲུང་གོའི་ལག་པ་ལ་ཐུག་པ་ཡོད་པ་ལས་ནུབ་ཕྱོགས་ཀྱི་རྒྱབ་སྐྱོར་དེས་གང་ཡང་ཕན་གྱི་མེད་པར་གསལ་པོ་ཆགས་ཡོད། འོན་ཀྱང་ཌོ་ནལ་ཁྲོམ་གྱིས་རྔ་ལ་ལྟོས་ཏེ་ཆམ་ཞིག་འཁྲབ་རྒྱུ་ཡོད་པ་ནི་༸གོང་མཆོག་གདན་ཞུ་དང་དེ་ཡང་ཆབ་སྲིད་ཀྱི་རྣམ་པར་ཤུགས་ཆེན་མངོན་ཐབས་བྱ་རྒྱུ་དེ་ཡིན། ཀྲུང་གོས་ད་ནས་བཟུང་ཌོ་ནམ་ཁྲོམ་ལ་ཁོང་ཁྲོ་ཇི་ཙམ་སློང་ཐུབ་ན་རང་རེ་ལ་དེ་ཙམ་ཡག་པའི་གོ་སྐབས་ཤིག་མངོན་འགྱུར་འབྱུང་གི་ཡོད་ཅིང་། འགལ་ཟླའི་རྣམ་པ་མེ་རི་བཞིན་འབར་ཚེ་གཅིག་ཏུ་བྱས་ན། ཌོ་ནལ་ཁྲོམ་གྱི་སྲིད་འཛིན་ཁྲི་འདོན་མཛད་སྒོ་ལ་༸གོང་ས་མཆོག་མགྲོན་འབོད་བཟོ་སྲིད་ཅིང་། ཁྲི་ཁ་ལངས་པའི་རྗེས་ཀྱི་ཉིན་མ་བརྒྱའི་མཛད་རིམ་ནང་དུ་བོད་དང་འབྲེལ་བའི་གནད་དོན་ལའང་ལག་པ་འཆང་རྒྱུ་འོངས་ཉེ་ཆེ། འདི་དག་ནི་རང་རེ་ལ་མཚོན་ལ་དགའ་འོས་པ་ཞིག་ཨེ་ཡིན་མི་ཤེས་ལ་བོད་ཀྱི་གནད་དོན་ཐག་གཅོད་ཀྱི་དཀའ་ངལ་དེ་ཇེ་ཆེར་གཏོང་བའི་རྐྱེན་ངན་ཞིག་ཀྱང་འགྱུར་མི་སྲིད་པ་མིན། འོན་ཀྱང་ད་ཡོད་ཀྱི་རང་རེའི་བསམ་ཚུལ་ལྟར་ཀྲུང་གོ་ལ་གནག་པོ་ཞིག་བཟོ་ཐུབ་པ་ནི་གཏན་གཏན་རེད།

2016-12-14

བཞི་མཆོད་ངོ་སྤྲོད་སྙིང་བསྡུས།

བཞི་མཆོད་ངོ་སྤྲོད་སྙིང་བསྡུས

介紹小燃燈節

དེ་རིང་ནི་བཞི་མཆོད་རེད། མིང་གཞན་ལ་སེ་ར་བཞི་མཆོད་ཟེར།

今天是小燃燈節，又稱色拉燈節

ཧོར་ཟླ་བཅུ་པའི་ཚེས་ཉེར་བཞི་ནི་གདན་ས་ཆེན་པོ་>སེ་ར་ཐེག་ཆེན་གླིང་>ཕྱག་འདེབས་པ་པོ་<རྗེ་བྱམས་ཆེན་ཆོས་རྗེ་>དགོངས་པ་རྫོགས་པའི་འདས་མཆོད་ཀྱི་ཉིན་མོ་ཡིན།

藏曆十月二十四是色拉寺創始人蔣曲確傑的圓寂日

ཁོང་གི་མཚན་ཆ་ཚང་ལ་<བྱམས་ཆེན་ཆོས་ཀྱི་རྗེ་ཤཱཀྱ་ཡེ་ཤེས་>ཞེས་སུ་གསོལ།

尊者的全名為蔣曲確寂傑釋迦益西

ཕྱི་ལོ 1354 ལྷ་སའི་ཤར་ཕྱོགས་སུ་གནས་པའི་<ཚལ་གུང་ཐང་>དུ་སྐུ་འཁྲུངས། རྗེ་ཙོང་པ་ལས་དགུང་ལོ་བཞི་ཡིས་ཆེ་བ་ཡོད།

公元1354年於拉薩東部察貢唐出生，比宗喀巴大師略長四歲

རྗེ་ཙོང་ཁ་པ་བླ་མ་གཙོ་བོར་བསྟེན་ནས་མཁས་པའི་ཕ་རོལ་དུ་ཕྱིན་ཅིང་། རྗེའི་སློབ་མ་གཙོ་བའི་གྲས་ཤིག་ཡིན་ལ་རྗེའི་གསོལ་འདྲེན་པ་ཡང་ཡིན།

後來成為宗喀巴大師的主要弟子之一

རྗེའི་དངོས་སློབ་ཁྲོད་ནས་རྒྱ་ནག་རྒྱལ་པོའི་དབུ་བླར་ཕེབས་མྱོང་བའི་མི་སྣ་གཉིས་བྱུང་སྟེ་རྗེ་བྱམས་ཆེན་ཆོས་རྗེ་དང་བྱང་དར་མ་གཉིས་སོ། ཁོང་གཉིས་ལ་<མི་དབང་གཙུག་ན་མཛེས་གཉིས>ཞེས་གྲགས་པ་ཡིན།

在宗喀巴大師的諸多親傳弟子中有兩位曾經歷任中國皇帝的國師一位是蔣達瑪，另一位就是我們的蔣曲確傑  此二人被稱為人中之龍

རྒྱ་ནག་གོང་མ་ཏ་མིང་རྒྱལ་པོས་རྗེ་ཙོང་ཁ་པ་རྒྱ་ནག་ཏུ་གདན་ཞུ་ནན་ཆེར་བྱས་ནའང་ཁོང་གཏན་ནས་ཕེབས་པ་མ་གནང་། རྗེ་ཉིད་ཀྱི་ཚབ་ཏུ་རྗེ་བྱམས་ཆེན་ཆོས་རྗེ་རྒྱ་ནག་ཏུ་མངགས།

在中國大明皇帝邀請宗喀巴大師，但宗喀巴大師沒有前往，而是叫他的親傳弟子蔣曲確傑替他前往大明

རྗེ་ཙོང་པས་བཀའ་ཕེབས་བཞིན་ཕྱི་ལོ 1419 ལོར་སེ་ར་ཐེག་ཆེན་གླིང་ཕྱག་བཏབ་པར་མཛད།

公元1419年應宗大師之命，創建色拉寺

ཁོང་གི་སྐུ་འདྲ་དང་ཐང་ཁ་སོགས་སུ་དབུ་ཞྭ་ནག་པོ་རིགས་ལྔ་ཅན་བཞེས་པ་ཞིག་མཇལ་རྒྱུ་ཡོད། འདི་ནི་རྒྱ་ནག་གོང་མའི་རྨི་ལམ་དུ་གཟིགས་སྣང་ཞིག་བྱུང་བ་བཞིན་བཞེངས་སུ་བཅུག་པ་གྲགས།

在有蔣曲確傑的唐卡以及畫像中我們常能看見他頭戴黑色五冠帽，傳聞那是大明皇帝曾經夢中尊者戴此帽，因此而戴此帽。

ཁོང་རྒྱ་ནག་ཏུ་ཕེབས་པ་ནས་དབུ་ཚུགས་ཏེ་རྒྱ་ཡི་ཡུལ་གྲུ་ན་རི་བོ་དགེ་ལྡན་པའི་བསྟན་པ་དབུ་བསྙེས་པ་ཡིན་འདུག

他任大明國師後，在中國才正式有格魯派的傳承

རྗེ་ཙོང་པ་དགོངས་པ་རྫོགས་ནས་མི་ལོ་བཅུ་བདུན་གྱི་རྗེས་ཏེ་ཕྱི་ལོ་ 1435 ལོར་རྗེ་བྱམས་ཆེན་ཆོས་རྗེ་རྒྱ་ནག་ནས་ཕྱིར་ལོག་པའི་ལམ་ཞོར་<མཛོ་མོ་མཁར>ལ་དགུང་ལོ་གྱ་གཉིས་ཐོག་ཏུ་དགོངས་པ་རྫོགས།

在宗喀巴大師圓寂十七年後，也就是公元1435年。從大明前往藏地途中於匝莫卡地區圓寂，享年八十二歲。

གུས་སྲོང་བཙན་གྱིས་ཕྱོགས་བསྒྲིགས་བྱས་ཤིང་མཁས་གྲུབ་ཀྱིས་རྒྱ་ཡིག་ཏུ་ཕབ་བསྒྱུར་བྱས།

2016/12/22

ད་ལོའི་དགེ་བསྐོས་འདི་གསེར་ཞིག་ཡིན་གསེར་གསེར་ནག་ཅིག་ཡིན།

སྤྱི་ཚོགས་འགྱུར་བ་ཐེབས་བཞིན་ཡོད། སྐྱེས་བུ་སྒེར་རེ་རེ་ཡང་འགྱུར་བ་ཐེབས་བཞིན་ཡོད། དེ་སྔར་གྱི་ལམ་སྲོལ་རེ་གཉིས་དེ་སྔར་གྱི་སྤྱི་ཚོགས་སུ་དགོས་མཁོ་ཡོད་ཅིང་དེ་སྔར་གྱི་མིས་ཆེས་ཡག་པོ་ཞིག་ཏུ་ངེས་འཛིན་བྱེད་མྱོང་། ད་ལྟ་ནི་སྤྱི་ཚོགས་དུས་རབས་སུ་ཁ་ཕྱོགས་པའི་ལམ་དུ་སྐྱོད་བཞིན་ཡོད་ཅིང་། དགོན་སྡེ་ཡང་གནའ་རབས་གནའ་རབས་ཀྱི་ལམ་སྲོལ་ཉག་གཅིག་ཏུ་འགྲོ་མི་ཐུབ་པར་དེང་དུས་དང་མཐུན་པའི་ལམ་ཕྱོགས་སུ་ག་ལེར་སྐྱོད་བཞིན་ཡོད། འདི་ནི་ལྡོག་ཐབས་མེད་པའི་འགྱུར་འགྲོས་ཤིག་རེད་ཟེར་ཆོག་པ་ཡིན། 

ངེད་ཀྱི་དགེ་རྒན་ཞིག་གི་བརྒྱུད་དགེ་བསྐོས་ཡེ་ཤེས་རྒྱལ་མཚན་ནི་སྨྲ་བ་ཉུང་ཞིང་ཡ་ཡོ་ཁྱ་ཁྱོག་མི་ཤེས་པའི་གྲྭ་པ་ངོ་མ་ཞིག་རེད་ཅེས་གོ་བ་ལས་དེ་མིན་ཁོང་དགེ་བསྐོས་མ་འཁེལ་སྔོན་ན་ཆ་རྒྱུས་གང་ཡང་མེད། གདན་ས་ནི་མི་ཁ་ཤས་ཙམ་འཚོག་ཅིང་འདུས་པ་ཞིག་མིན་པར། མི་གྲངས་ལྔ་སྟོང་ལྷག་གནས་འཆར་བ་ཞིག་ཡིན་པས་ཕན་ཚུན་ཆ་རྒྱུས་དང་ངོ་ཤེས་རྒྱུའང་ཅུང་དཀའ་བའི་ཚད་དུ་ཡོད། འོན་ཀྱང་ཁོང་ཉིད་ལ་ཕྱི་ལོ་2016ལོའི་དགེ་བསྐོས་འོས་ཐོབ་བྱུང་སྟེ། དེ་རིང་བར་ཁྱོན་ལོ་གཅིག་གི་རིང་དུ་དགེ་བསྐོས་ཀྱི་ཕྱག་ལས་གནང་ནས་སང་ཉིན་དགའ་ལྡན་ལྔ་མཆོད་ཉིན་དུས་ཡུན་གཙང་སྟེ་དགེ་བསྐོས་ཟུར་པ་ཆགས་རྒྱུ་རེད། དུས་ཡུན་འདིའི་རིང་དུ་ང་ཚོས་ཁོང་ཉིད་ཤེས་རྟོགས་ཟབ་མོ་བྱུང་ཡོད། 

དགེ་འདུན་པ་ཞིག་གིས་ཆོབ་དང་སྦྲགས་ཏེ་''དྷོ་ཊ་ཧ་རའི་1ས་ཁུག་འདི་ན་མི་སྤུས་གཙང་འདི་འདྲ་ཡང་ཡོད་འདུག”ཅེས་བཤད་མྱོང་། ངས་བསམ་ན་འདི་ཆོབ་སློང་བ་ཞིག་མ་ཡིན་པར་དངོས་གནས་ད་བར་དགེ་བསྐོས་སྤུས་གཙང་འདི་འདྲ་རེ་བྱུང་བའང་ཆེས་དཀོན་པོ་ཡིན་ཅིང་ཁོང་ནི་ཆེས་དཀོན་པའི་ནང་ནས་གཅིག་ཡིན་ཟེར་ཆོག མ་གཞི་ལས་སྣེ་སུ་ཞིག་ཡིན་རུང་བསམ་པ་དཀར་གཙང་གིས་དགེ་འདུན་ལ་སྲི་ཞུ་སྒྲུབ་འདོད་དང་དེ་བཞིན་སྒྲུབ་ཡོད་པ་ཞིག་ཡིན་རུང་། བསམ་བློའི་གུ་ཡངས་དང་། བློ་ཐག་ཆོད་མི། འདྲ་མཉམ་གྱི་ལྟ་བ། རང་ཚུགས་ཅན། དོན་དངོས་ལ་ལྟ་ཐུབ་པའི་བློ་སྟོབས་སོགས་ནི་མི་ཚང་མ་ལ་ཡོད་པ་ཞིག་མ་ཡིན་པར་སྐྱེས་བུ་རེ་ཟུང་གི་སྒེར་ཆོས་ཞིག་ཅི་ལ་མ་ཡིན། དེ་ལྟར་མིན་ན། འཇིག་རྟེན་ན་སྐྱེས་བུ་དམ་པ་ཉུང་ཉུང་ཞིག་ལས་མེད་དོན་ག་ལ་ཡོད། 

གདན་སའི་དགེ་བསྐོས་ནི་ཁྲིམས་ལུགས་ལག་བསྟར་བྱེད་མཁན་དེ་ཡིན་པས་དགེ་འདུན་གྱི་ནང་ཁྲིམས་ཇི་བཞིན་རེ་འགས་བཙན་ཤེད་ཀྱིས་ཁྲིམས་ལག་བསྟར་བྱེད་ཅིང་། འདི་བཞིན་བྱེད་ན་སུས་ཀྱང་ཁུར་འདོད་མི་བྱེད་པའི་ངོ་རྒོལ་བྱེད་མི་སྲིད། དེ་ལྟ་ནའང་སེམས་སུ་དངངས་སྐྲག་དང་མི་སྐྱིད་པའི་ཚོར་སྣང་ནི་ལོས་ཡོང་སྟེ། འགྲོ་བ་མི་ནི་བདེ་སྐྱིད་ཀྱི་དགོད་སྒྲ་འདོད་མཁན་ཞིག་ལས་སྐྲག་སྣང་དང་ཞེ་སྣང་ལ་དགའ་མཁན་མིན་པས་གུས་གུས་ཞུམ་ཞུམ་བྱེད་ནའང་སེམས་ལ་ནི་མི་སྐྱིད་པའི་ཚོར་བ་ཡོང་རྒྱུ་ཆོས་ཉིད་དུ་གྲུབ་ཡོད། ཐབས་ལམ་འཇམ་པའི་ཐོག་ནས་ཁྲིམས་སུ་བཅས་པ་དག་ལག་ལེན་དུ་བྱས་ན་ཁྲིམས་བདག་ལ་ལས་སུ་སླ་བ་མ་ཟད་ཁྲིམས་ཁུར་མཁན་དག་གིས་ཀྱང་ལུས་སེམས་གཉིས་ཀྱིས་ཐེག་མི་ཐེག་བྱེད་མི་དགོས་པར་''སྒ་ཁུར་ཁུར་དངསྟན་གྱོན་གྱོན་"བཟོ་ཐུབ། དེ་ལྟར་ཡང་ཡིན་སྟེ། ས་པཎ་གྱིས། འཇམ་པོས་འཇམ་པོ་འཇོམས་བྱེད་ཅིང་། འཇམ་པོས་རྩུབ་པོའང་འཇོམས་པར་བྱེད།། ཅེས་སྡོམ་ཚིག་གནད་ལ་ཁེལ་བ་ཞིག་བརྒྱབ་ཡོད་པ་མ་ཡིན་ནམ། 

དགེ་བཤེས་ཡེ་ཤེས་རྒྱལ་མཚན་ནི་དགེ་བཤེས་ཙམ་ཞིག་མ་ཡིན་ལ་གདན་སའི་དཔེ་ཁྲིད་དགེ་རྒན་ཙམ་ཡང་མ་ཡིན་པར། དགེ་འདུན་སྟོང་ཕྲག་མང་པོའི་སེམས་ཀྱི་གཏིང་རུམ་དུ་ནམ་ཡང་ཡལ་མི་སྲིད་པའི་སྐྱེས་བུ་ཞིག་གི་རྣམ་འགྱུར་དེ་ཡིན་པས། ཁོང་ཉིད་དགེ་བསྐོས་ཀྱི་མཚན་གནས་དེ་སང་ཉིན་ནས་མཇུག་རྫོགས་པ་ཞིག་ཡིན་རུང་། བླ་དྭགས་སུ་ཐོབ་པའི་རླབས་ཆེན་གྱི་སྐྱེས་བུའི་མཚན་གནས་དེ་ནི་ཁོང་གི་སྐུ་ཚེ་གང་པོ་དང་སྐྱེ་བ་གཞན་དང་གཞན་དུ་འགྲོ་ཟིན་ནའང་རིང་ནས་ཡུན་ནས་གནས་རྒྱུ་རེད། དགེ་འདུན་པ་ཚོས་''ཁོང་ཉིད་དགེ་བསྐོས་ཚར་བ་དང་ཐད་ཀར་མཁན་པོར་བསྐོ་བཞག་དགོས་ས་རེད་”ཅེས་བཤད་མཁན་ཡང་མང་པོ་ཡོད། འདི་ནི་འགྲུབ་རྒྱུ་མེད་པ་ཞིག་ཡིན་ཀྱང་ཁོང་ལ་དགའ་ཞེན་དང་ཁོང་གི་ལས་ཀ་ལ་གདེང་འཇོག་བྱེད་པར་མཚོན་གྱི་ཡོད། 

ཁོང་གི་དུས་ཡུན་ལོ་གཅིག་གི་རིང་དུ་ཡོད་ཚད་བཙན་ཤེད་མ་ཡིན་པར་མི་ཞིག་གི་ཁྱོག་ཚད་དང་རྟ་ཞིག་གི་འདྲུ་ཐུབ་པ་འབའ་ཞིག་ལག་ལེན་དུ་བསྟར་ནས་དགེ་འདུན་དམངས་ཀྱི་སེམས་སུ་སྤྲོ་སྣང་གིས་ཁེངས་ཤིང་། མི་སྙན་པ་མང་པོ་ཞིག་ཉན་མི་དགོས་པར་ཐུགས་བག་ལྷོད་པའི་ཐོག་ནས་སློབ་གཉེར་ལ་བརྩོན་རྒྱུ་བྱུང་བ་འདི་འདྲ་ཡང་དཀོན་པའི་ཚད་དུ་གྱུར། དགུང་མོའི་ཆུ་ཚོད་དྲུག་པ་ནས་བཅུ་པའི་བར་དུས་ཡུན་ཆུ་ཚོད་བཞི་ཙམ་རེ་ཆོས་རྭའི་རྡོ་གཅལ་ནས་རྩོད་པ་བྱེད་དགོས་བྱུང་ན་ཐང་ལོས་ཆད་དེ་ཁ་རོགས་འདུག་ནའང་དཀའ་ལས་ཀྱིས་ལུས་སེམས་ཡོངས་སུ་ཉོབ་སྣང་འབྱུང་གི་ཡོད། ཉོབ་སྣང་དང་ལུས་སེམས་ངལ་དུབ་ནི་སློབ་གཉེར་བྱེད་པའི་བར་ཆད་ཡིན་ཅིག་ཡིན། དཀའ་ངལ་འདི་ཚང་མས་མཐོང་ཞིང་རིག་བཞིན་ཡོད་ནའང་ཆོས་རྭའི་ནང་གི་ཉོབ་སྣང་དང་ལུས་སེམས་ཐང་ཆད་པ་བསལ་ཐབས་བྱེད་ཕོད་མཁན་ཞིག་བྱུང་མེད།  ཁག་ཀྱང་མེད་དེ་ཆོས་རྭའི་དུས་ཡུན་རིང་པོ་བྱེད་ཐུབ་ན་ཆོས་རྭ་ཡུན་རིང་དེ་འདྲ་འཚོག་གི་ཡོད་ཅེས་ངོམ་ངོམ་བྱེད་རྒྱུ་དེ་ནི་སྔ་ནས་ད་བར་དར་ཞིང་རྒྱས་པ་ཞིག་ཆགས་འདུག་པས། དོན་དངོས་དང་ཡོངས་སུ་རོ་རྒྱབ་གཏད་པའི་དར་ཁྱབ་དེ་ལ་ལག་འཆང་ཕོད་ཀྱང་དཀའ་མོ་ནང་གི་དཀའ་མོ་ཞིག་རེད། འོན་ཀྱང་ཁོང་ནི་རང་གི་རྣམ་དཔྱོད་བེད་སྤྱོད་བཏང་སྟེ། དོན་དངོས་ཀྱི་དཀའ་ངལ་སེལ་ཐབས་བྱེད་པ་ལས་རྒྱབ་ལོགས་སུ་ཅི་བཤད་ལ་སྣང་དག་སྤུ་ཙམ་མེད་མཁན་དེ་ཡིན་འདུག་པས་ལོ་གཅིག་གི་ཡུན་དུ་རང་གི་རྣམ་དཔྱོད་ཀྱི་འཆར་སྒོ་ལས་བྱུང་བ་ཚང་མ་ལག་བསྟར་བྱས་ལ་བྱས་པ་ཙམ་གྱིས་མི་ཚད་པར་དགེ་འདུན་དམངས་ལ་ཧ་ཅང་འཕྲོད་པོར་བྱུང་ཡོད། 

ཁོང་གིས་ཆབ་རིལ་གཉིས་2ལ་འདི་འདྲ་ཞིག་གསུངས་འདུག་སྟེ། ''ཉེས་ཆད་གཅོད་དུས་ཁོང་ཁྲོ་ཁྱོན་ནས་མི་ཟ་བའི་ཐོག་ནས་གཅོད་དགོས་གསུངས་ལ་དེ་འདྲ་མ་ཡོང་ན་ཉེས་པ་ཆེ་ཆུང་དང་མི་འཚམ་པའི་ཉེས་ཆད་གཅོད་ཉེན་ཆེ་”ཞེས་གསུངས་པའང་ཁ་ཙམ་མིན་པར་ཁོང་གི་ལོ་གཅིག་གི་ཁྲིམས་ལུགས་དེ་བཞིན་ལེགས་ཉེས་འབྱེད་པའི་བློས་དཔྱད་ཅིང་བརྟག་ནས་གནང་པ་ཤ་སྟག་ཡིན་པ་ནི་ཀུན་གྱིས་ཤེས་གསལ་རེད། ཁོང་གིས"ཆོག་མི་ཆོག་བཤད་པ་ཚང་མ་ཁ་ཐུག་དྲན་ནས་བཤད་བཞག་པ་རྩ་བ་ནས་མེད། གང་བཤད་པ་དེ་ལག་བསྟར་བཟོ་རྒྱུ་ལས་ཕྱི་སྣུར་བྱེད་མི་སྲིད་''ཅེས་ཡང་ཡང་གསུང་མྱོང་བའང་གྲྭ་མང་ཚོས་ཤེས་གསལ་རེད། 

ཁ་སང་འབྲས་སྤུངས་ཚན་རིག་བགྲོ་གླེང་ལ་ཕེབས་པའི་དགེ་འདུན་པ་འགའ་ཤས་ཀྱིས་དགེ་བསྐོས་བརྗེ་ཉིན་ཁོ་ཚོ་ཕྱིར་འཁོར་ཐུབ་ས་མ་རེད་ཅེས་སེམས་ཁྲལ་དང་འབྲེལ་ནས་སྔ་སྣུར་བྱས་ཏེ་དར་དཀར་གཏོང་འགྲོ་ན་ཞེས་གྲོས་བྱེད་ཀྱི་འདུག དགེ་འདུན་པ་ཚོ་ལ་མཚོན་ན་ཁོང་ལ་ཐུགས་རྗེ་ཆེ་ཞེས་སྤྲོད་རྒྱུ་ཞིག་དང་བཀའ་དྲིན་མཚོན་པའི་འབུལ་བ་ཞིག་ཅི་ཡང་མེད་པས་དར་དཀར་ཕུལ་ཏེ་བཀའ་དྲིན་མཚོན་པར་བྱ་རྒྱུ་དེ་ནི་རིན་ཐང་བྲལ་བའི་ལེགས་འབུལ་ཞིག་ཡིན་པས། དར་དཀར་རྐྱང་པ་དེ་ཁོང་ལ་འབུལ་ཐུབ་མིན་སེམས་ཁྲལ་བཟོ་བའང་ཁག་ག་ལ་ཡོད།

ད་དུང་ལོ་གཅིག་གི་སྒྲིག་གཞི་གང་དང་ཅི་ལག་བསྟར་བྱས་པ་ཞིབ་ཕྲ་བཤད་རྒྱུ་ཡོད་རུང་དགེ་འདུན་གྱི་ནང་ཁྲིམས་ཡོད་ཚད་དྲ་ལམ་དུ་བསྒྲགས་ནའང་དེ་ཙམ་དགོས་པ་འདྲ་མ་མཐོང་བས་ཁོང་ཉིད་མཚོན་བྱེད་ཙམ་གྱི་གནད་དོན་རེ་གཉིས་འབུར་ཐོན་བྱས་ཏེ་སྨྲས་པ་ལགས།

1དྷོ་ཊ་ཧ་ར་ནི། སེ་ར་དགོན་པ་དང་འདབས་འབྲེལ་ཡོད་པའི་རྒྱ་གར་གྲོང་གསེབ་ཅིག་ཡིན།

2ཆབ་རིལ་ནི། དགེ་བསྐོས་ཀྱི་ཕྱག་རོགས་སྒྲིག་འཛུགས་ལྟ་རྟོག་བྱེད་མཁན་ཡིན།

2016-12-22 སེ་རའི་བཞི་མཆོད་ཉིན།

མ་གླེང་ཐབས་མེད་ཀྱི་སེར་བྱེས་དགེ་བསྐོས་ཟུར་བ།

 མ་གཞི་ནས་སྤྱི་ཚོགས་ཤིག་གི་སྣེ་ཁྲིད་པ་ནི་ཧ་ཅང་དཀའ་ལ་ལྷག་པར་དུ་བསྒྲིགས་ཁྲིམས་དེ་ཙམ་འཐུས་ཚང་མིན་ཚེ་དཀའ་ངལ་ཆེ་བ་སྨྲོས་མེད་རེད། ཆེ་བ་རྒྱལ་ཁབ་ནས་ཆུང་བ་མི་སྒེར་ལ་དབང་བའི་ཚོགས་པ་གང་འདྲ་ཞིག་ཡིན་རུང་དེ་ཉིད་དབང་སྒྱུར་བ་པོ་གང་དེ་བཀྲ་ཤིས་ལོ་ལེགས་ཀྱི་ངང་ནས་ལས་སྣེའི་མཇུག་སྐྱོང་ཐུབ་མཁན་ཤིན་ཏུ་དཀོན། དེ་བས་ཀྱང་དེང་དུས་ཀྱི་མི་སྡེ་སྤྱི་ཚོགས་རྙོག་ཟིང་ཅན་ལྟ་བུ་ཞིག་གི་སྣེ་ཁྲིད་དགོས་ན་ཅི་འདྲའི་དཀའ་ཁག་ཆེ་བ་ཞིག་རེད་ཨང་། འདི་ལྟར་བསམ་གཞིག་རེ་བྱས་ན་༢༠༡༦་ལོའི་སེར་བྱེས་དགེ་བསྐོས་ཡེ་ཤེས་རྒྱལ་མཚན་ཁོང་ལྟ་བུ་ནི་མ་གླེང་ཐབས་མེད་ཅིག་རེད། ལོ་དེ་ཡི་རིང་ལ་ཁོང་གི་མཛད་པ་ཕྱག་ལས་རྣམས་ནི་ཅི་འདྲའི་བློར་བབ་པ་དང་། ཅི་འདྲའི་དགེ་མཚན་ཅན་དག་དག་རེད། ང་ཚོ་སྟེ་བྱེས་གྲྭ་ཚང་གི་གྲྭ་བ་ཡོད་ཚོད་ཀྱི་སེམས་ན་ཧ་ཅང་གསལ་ཆ་ཡོད་པ་ཞིག་སྟེ། ཁོང་གི་ལྷོད་ལ་བབ་ཅིང་རང་ཆས་སུ་མངའ་བའི་མི་གཤིས་དེ་དང་། དྲང་བདེན་ཁོ་ནར་གཙིགས་སུ་འཛིན་ཞིང་ཁ་བཤད་དོན་སྟེང་དུ་གནས་པ། སྨྲ་བ་ཉུང་ཞིང་སྨྲས་པ་རྣམས་ལ་འགན་ཁུར་བྱེད་པ། སྤྱི་ཕན་དང་དངོས་ཡོད་ལག་དུ་བསྟར་བ། རང་ཚུགས་རི་བོ་བཞིན་བརྟན་ཅིང་། མི་སྒེར་ལ་ཆེད་གསོད་ནམ་ཡང་མི་བྱེད་པ། བསྒྲིགས་ཁྲིམས་དམ་ལྷོད་རེམ་པ། ཆེ་ཉམས་བསྟན་རྒྱུར་མི་དགའ་བར་གྲྭ་མང་གི་གསེབ་ཏུ་མར་འཛུལ་དེ་ཁྲིམས་ཁུར་མཁན་ཞིག་གི་འདུ་ཤེས་འཛིན་པ་མ་གཏོགས་ང་ནི་ཡོད་ཚོད་ཀྱི་བདག་པོའོ། ངས་མཛུབ་མོ་གང་དུ་གཏད་ན་དེ་ཤར་ཡིན་དགོས་སྙམ་པ་གཏན་ནས་མེད་པ། མདོར་ན་ལོ་དེ་ཡི་ཁོང་གི་ཕྱག་ལས་རྣམས་ནི་ཅི་འདྲ་གཙང་དག་ཡང་དག་འབའ་ཞིག་རེད། ཅི་འདྲ་རྗེས་སུ་ཡི་རངས་ཞུ་འོས་པའི་ཕྱག་ལས་རྐྱང་རྐྱང་རེད། ང་ཚོ་ལ་ཁོང་འདྲ་བའི་ལས་སྣེ་ཡོད་ན་ད་གཟོད་གདན་སའི་ནང་དུ་དྲོད་སྐྱིད་དམིགས་བསལ་བ་རེ་ཡོང་རྒྱུ་འདུག ཁོང་ལས་སྣེ་རྗེ་རེན་དུས་སུ་ང་རང་སེམས་སྐྱོ་བཞིན་འདུག ངོ་མ་ཡིན། ཁོང་འདྲ་བའི་དགེ་བསྐོས་ཤིག་བཙལ་དགོས་ན་སྲིད་མཐའ་ཙམ་ཡིན་ས་རེད། འདི་ནི་ང་མི་གཅིག་གི་སེམས་སུ་བབས་ནས་འུར་སྒྲོག་བྱས་པ་ཞིག་གམ། ཡང་ན་ངེད་གཉིས་བར་དུ་དམིགས་བསལ་འབྲེལ་བ་གང་རུང་ཞིག་ཡོད་པས་གཏན་ནས་མིན། དེ་འདྲ་ཡིན་མིན་བྱེས་ཀྱི་གྲྭ་རྒྱུན་ཡོད་ཚོད་ལ་གསལ་ཆ་ཡོད་པ་ཞིག་རེད། ཕྱིས་འབྱུང་གི་ལས་སྣེ་དག་གིས་ཀྱང་རང་རང་གི་ལས་སྣེ་དེ་བཀྲ་ཤིས་བདེ་ལེགས་ཤིག་གི་ངང་ནས་མཇུག་ལེག་པར་སྐྱོང་འདོད་ན་ཁོང་ལ་དམིགས་དཔེ་བལྟས་ནས་ཕྱག་ལས་གནང་ན་བདག་གཞན་དགེ་བ་གཉིས་ཕན་ཞིག་ཡིན་པ་གོར་མ་ཆགས། ངས་འདི་ལྟར་བཤད་དོན་ནི་ང་རང་སྒེར་གྱི་དོན་དག་ཞིག་རྩ་བ་ཉིད་ནས་མིན། ང་ཚོ་བསྒྲིགས་ཁྲིམས་སྲུང་མཁན་དང་གནན་མཁན་གཉིས་ཀ་ལ་ཁོང་གི་ཕྱག་ལས་དེ་འདྲ་དགོས་ཀྱི་འདུག་ཟེར་བ་ཡིན། དཔེར་ན་ཁོང་དགེ་བསྐོས་བྱས་པའི་རིང་གི་གྲྭ་ཇ་འཚོགས་ལུགས་དེ་འདྲ་ཞིག་དེ་སྔ་ལོ་བཅུ་ཡི་ཚུན་ཆད་དུ་བྱུང་མ་མྱོང་བ་ཞིག་རེད། དེ་ནི་དགེ་བསྐོས་དང་བྱེས་པ་གྲྭ་ཚང་གཉིས་ཀ་ལ་ཐུན་མོང་དུ་མཁོ་བ་ཞིག་རེད། དེ་བཞིན་དུ་ཆོས་ར་འཚོགས་ལུགས་ལྟ་བུར་ཆ་མཚོན་ན་བཀག་ཆེ་ནས་གྲྭ་མང་ལ་སུན་པོ་མ་བཟོས་པ་དང་། ལྷོད་ཆེ་ནས་རྩོད་པ་མཐུར་ཤོར་དུ་མ་སོང་བ་ཏག་ཏག་དགོས་ཤིང་མཁོ་བ་ཞིག་བྱས་པ་དང་། ཕྱི་ལོགས་སུ་དམ་དྲགས་ནས་གུང་སེང་ལ་ཡང་ལྷོད་གཡེང་བྱ་ས་མེད་པ་དེ་འདྲ་མ་ཡིན་པར་དགོན་པ་དང་ཁད་ཉེ་བའི་གྲོང་རྡལ་དག་ཏུ་བསྐྱོད་ཚེ་དགོངས་ཤོག་མི་དགོས་པ་བྱས་པ་དང་། ནང་ལོགས་སུ་ཡང་གྲྭ་ཇ་དང་ཆོས་ར་སོགས་ཀྱང་མཐའ་གང་དུ་ཡང་མ་ལྷུང་བར་དམ་ལྷོད་ཧ་ཅང་འཚམས་པོ་ཞིག་བཟོས་པ་སོགས་མདོར་ན་བསྒྲིགས་ལམ་ཆེ་མ་ཆུང་གསུམ་གང་ཞིག་ཡིན་རུང་གྲྭ་མང་གི་འདོད་བློ་ཡོངས་སུ་ཁེངས་ཤིང་བསྔགས་རྗེད་ཀྱི་མེ་ཏོག་གཏོར་བའི་གནས་སུ་གྱུར་བས། ལོ་འདིའི་ཁོང་གི་ཕྱག་ལས་དེ་དག་ལ་ཡི་རང་ལན་བརྒྱར་ཞུས་ཡོད། ངས་འདི་ལྟར་ཡི་རངས་ཞུས་པ་ནི་གཞན་ལ་ཟུར་ཟ་སོགས་ཀྱི་བསམ་པས་མ་ཡིན་པར་ལེགས་པར་བྱས་པ་ཡི་རངས་སུ་ཞུས་བ་ཙམ་ཡིན་ལ། རྩོམ་ཡིག་ཐུང་ཐུང་འདིའི་བརྗོད་བྱ་ལ་ང་རང་ཉིད་ཀྱིས་འགན་ཁུར་གཙང་མ་་བྱས་ཡོད།
ཅེས་ཟླ་ཚེས་དགེ་བའི་ཉིན་སེར་བྱས་བྱ་བྲལ་བསྟན་པ་དགེ་འཕེལ་གྱིས་བྲིས།།

མདང་ནུབ་ངའི་སྐད་འཕྲིན་ནང་དུ་རྐུན་མ་འཛུལ་བ།

མདང་ནུབ་ངའི་སྐད་འཕྲིན་(Wechat)ནང་དུ་གསང་ཨང་གཏོར་ནས་ནང་དུ་དྲ་རྐུན་ཞིག་འཛུལ་བའི་གནས་ཚུལ་བྱུང་།

དེང་གི་དབྱིན་སྐད་ཐ་སྙད་Hackerལ་དྲ་ཐོག་གཏོར་རྒོལ་བ་དང་དྲ་ཇག་དང་དྲ་རྐུན་ཞེས་བསྒྱུར་ཏེ་བེད་སྤྱོད་གཏོང་གི་ཡོད་ཅིང་དོན་ནི་དྲ་བའི་ནང་དུ་མི་སྒེར་དང་ཚོགས་པ་སོགས་ཀྱི་དྲ་བ་དང་གློག་འཕྲིན། དེ་མིན་གྱི་འཕྲིན་གཏོང་མ་ལག་སོགས་སུ་གསང་ཨང་གཏོར་ནས་གསང་བའི་གནས་ཚུལ་སོགས་རྐུ་འཁྱེར་བྱེད་པའི་དྲ་ཐོག་གཏོར་རྒོལ་བའི་བྱ་སྤྱོད་སྤེལ་བ་ལ་གོ་ན་འགྲིག་པ་རེད།

འདི་ཟླའི་ནང་དུ་དྲ་ཐོག་གཏོར་རྒོལ་ཚོགས་པ་ཞིག་གིས་རྒྱ་གར་གྱི་ར་ཧུལ་གྷན་དྷི་སོགས་མི་སྣ་མང་པོའི་གསང་ཨང་གཏོར་ནས་སྒེར་གྱི་གནས་ཚུལ་རྐུ་འཁྱེར་བྱས་པའི་གནས་ཚུལ་མཐོན་མ་ཐག་རེད། ད་དུང་རྒྱ་ནག་གི་ཚོགས་སྡེ་མང་པོས་ཨ་རིའི་སྣེ་ཡོད་མི་སྣ་ཚོའི་གསང་བའི་ཡིག་ཆ་རྐུ་འཁྱེར་བྱས་པའི་གནས་ཚུལ་ཐད་དུ་ཨ་རྒྱ་གཉིས་བར་མི་མཐུན་པ་ཡོང་གཞི་ཆེ་ཤོས་ཤིག་ཆགས་ཡོད།

ཉེ་སྔོན་པེ་ཅིང་གི་བུ་མོ་ཞིག་གིས་རང་གི་གྲོགས་པོའི་སྐད་འཕྲིན་བེད་སྤྱད་དེ་གྲོགས་པོའི་གྲོགས་པོའི་ལག་ནས་སྒོར་ས་ཡ་གཉིས་ལྷག་གཡོ་ལེན་བྱས་པ། 

ཧི་པེ་ཞིང་ཆེན་ཧྲི་ཅཱ་ཀྲང་གྲོང་ཁྱེར་གྱི་སློབ་ཆེན་སློབ་མ་ཀྲང་ལགས་མི་རྒྱུས་མེད་ཅིག་གིས་སྐད་འཕྲིན་ཚོགས་པ་ཞིག་ཏུ་བཞག་རྗེས།  དེ་མུར་ཁུག་དམར་སྒོར་མོ700ཅན་ཞིག་འཕྲོག་རྒྱུ་བྱུང་། ཁོ་རང་དགའ་སྤྲོ་རབ་ཏུ་འཕེལ་ཞིང་མགྱོགས་པོར་ཁུག་དམར་ལས་སྒོར་མོ་དངུལ་བྱང་དུ་ལེན་རྩིས་བྱས། ཡིན་ནའང་ཁུག་དམར་ནང་གི་སྒོར་མོ་དངུལ་བྱང་དུ་གཏན་ནས་ལེན་ཐུབ་ཀྱིན་མི་འདུག་པར་དེ་ལས་ལྡོག་སྟེ་རང་གི་དངུལ་བྱང་ལས་སྒོར་མོ700མེད་པར་གྱུར་འདུག་པ་རེད།

གཞུང་སྒེར་གྱི་དྲ་ཐོག་འཇབ་རྒོལ་བ་མང་པོས་བཙན་བྱོལ་བོད་མི་ཚོའི་དྲ་ཐོག་ཏུ་གསང་འཛུལ་བྱེད་ཀྱི་ཡོད་པའི་གནས་ཚུལ་ཐོན་ཡོད་པ་ཀུན་གྱིས་ཤེས་གསལ་རེད། ངེད་ཀྱི་ངོ་ཤེས་དྲ་གྲོགས་རེ་གཉིས་ཀྱི་སྐད་འཕྲིན་གྱི་གསང་ཨང་གཏོར་ནས་ནང་འཛུལ་བྱས་པའི་དྲ་རྐུན་ཞིག་བྱུང་སྟེ་ཡུན་རིང་སོང་མེད། མདང་ནུབ་རྒྱ་གར་གྱི་དགུང་མོའི་ཆུ་ཚོད་8:37ཐོག་ཏུ་ངེད་ཀྱི་སྐད་འཕྲིན་ཁ་ཕྱེས་ཏེ་ནང་དུ་གསང་འཛུལ་བྱས་པའི་གནས་ཚུལ་དེ་བྱུང་ཞིང་། ipad ཞིག་གི་ནང་དུ་ཁྱེད་ཀྱི་སྐད་འཕྲིན་ཁ་ཕྱེས་སོང་ཞེས་ཉེན་བརྡ་ཞིག་འབྱོར་འདུག འདི་ཟླའི་ཚེས་12གྱི་ཞོགས་པའི་ཆུ་ཚོད8:26དང་ཚེས་13གྱི་དགོང་མོའི་ཆུ་ཚོད7:17ཐོག་ཏུ་ངེད་ཀྱི་ཁ་པར་ཨང་གྲངས་སྤྱད་དེེ་སྐད་འཕྲིན་ཁ་ཕྱེ་ཐབས་ཀྱིས་ར་སྤྲོད་ཨང་(Enter Code)ཐེངས་གཉིས་ལེན་ཐབས་བྱས་སོང་། ངས་དེ་མ་ཉིད་དུ་དོགས་ཟོན་གྱིས་གསང་ཨང་གསར་རྗེ་བྱས་ཏེ་བརྟན་པོར་ཡོང་ཐབས་བྱས་རུང་མདང་ནུབ་གསང་ཨང་གཏོར་བའི་གནས་ཚུལ་དེ་བྱུང་ནས། ངའི་སྐད་འཕྲིན་ཁ་ཕྱེས་ཏེ་མི་གཞན་གྱི་ཚུར་བཏང་བའི་འཕྲིན་ཡིག་ཚང་མ་ལྟ་ཀློག་བྱས་འདུག འདི་ནི་སྤྱི་སྒེར་སུས་བྱས་པར་མིན་ཤེས་ལ་དྲ་ཐོག་གཏོར་རྒོལ་བས་གནས་ཚུལ་རྐུ་འཁྱེར་བྱ་ཐབས་ཤིག་ཡིན་མིན་ཡང་ཆ་མ་འཚལ།

ངས་མདང་ནུབ་གནས་ཚུལ་དེ་ཤེས་མ་ཐག་ནས་དྲ་གྲོགས་ཡོངས་ལ་རྒྱ་གར་གྱི་མཚན་མོའི་ཆུ་ཚོད་8ནས10ཡི་བར་དུ་ཁྱེད་ལ་ངའི་མིང་ཐོག་ནས་འཕྲིན་ཡིག་སོགས་ཅི་ཞིག་འབྱོར་ཡོད་ན་ཕྱིར་ལན་སྤྲོད་རོགས་ཞེས་རེ་སྐུལ་བཏང་ཡོད། འོན་ཀྱང་སུ་ལའང་འབྲེལ་བ་བྱས་མི་འདུག་ཅིང་ཁུག་དམར་སྒོར་༡༠༠ལྷག་ཡོད་པ་དེའང་རྐུ་འཁྱེར་བྱས་མི་འདུག ཡ་མཚན་པ་ནི་དྲ་གྲོགས་མང་པོ་ལ་འདིའི་ཐད་དུ་གོ་རྟོགས་ཉུང་བའམ་དོགས་ཟོན་ཞིག་གཏན་མེད་པར་མ་ཟད། ད་རུང་ཁོ་ཚོ་མང་པོ་ཞིག་དགོད་མོ་ཤོར་སྡོད་འདུག

བོད་ནང་དུ་ཐད་ཀར་འབྲེལ་བ་བྱེད་མི་དགོས་པའི་བཙན་བྱོལ་ནང་གི་བོད་མི་མང་པོ་ཞིག་སྐད་འཕྲིན་ལ་ཡིད་ཆེས་མེད་པ་མ་ཟད་བེད་སྤྱོད་ཀྱང་གཏོང་གི་མེད་པ་འདི་ཉུང་ཉུང་ཞིག་ཁྱོན་ནས་མ་རེད། འོན་ཀྱང་ང་ཚོ་སྟ། བོད་ནང་དུ་ཐད་ཀར་འབྲེལ་འདྲིས་བྱེད་དགོས་མཁན་ཚོ་ལ་སྐད་འཕྲིན་འདི་བེད་སྤྱོད་མ་བྱེད་རོགས་བྱེད་འདྲ་པོ་ཆགས་འདུག་ལ། འདི་ལས་སྟབས་བདེ་བའི་བརྒྱུད་ལམ་ཞིག་རག་མེད་དུས་འདི་ཉིད་ལ་མ་འཇུག་རང་འཇུག་ཆགས་ཡོད། བོད་ནང་གི་བོད་མི་ཚོས་སྐད་འཕྲིན་སྤྱད་ཤུགས་ཆེ་བས་ང་ཚོས་ཀྱང་སྐད་འཕྲིན་ལམ་ནས་ཕན་ཚུན་འབྲེལ་གཏུགས་བྱེད་བཞིན་པ་ཡིན། དེ་ལྟ་ནའང་སླད་ནས་སྐད་འཕྲིན་བརྒྱུད་གནས་ཚུལ་གལ་ཆེན་རིགས་དང་ཆབ་སྲིད་བའི་འབྲེལ་བའི་གནས་ཚུལ་རིགས་བརྒྱུད་གཏོང་དང་། སྐད་འཕྲིན་ནང་དུ་གལ་ཆེན་ཡིག་ཆ་བདག་ཉར་དང་དངུལ་ཁང་ཁ་བྱང་དང་གསང་ཨང་སོགས་བདག་ཉར་བྱས་ཚེ་གནས་ཚུལ་མི་ལེགས་པ་རེའང་ཐོན་སྲིད་པ་འདུག་པས་ངེད་ཀྱི་གནས་ཚུལ་དང་འབྲེལ་ནས་ཁྱེད་རྣམ་པར་དྲན་སྐུལ་རེ་ཞུ་བ་ཡིན།

2016ཟླ12ཚེས16

ཏྲེ་ཧོར་སྐྱོར་དཔོན་རིན་པོ་ཆེ་དང་ཕྱག་ཡིག

ཏྲེ་ཧོར་སྐྱོར་དཔོན་རིན་པོ་ཆེ་དང་ཕྱག་ཡིག་འདིའི་སྐོར། 

མཚམས་སྦྱོར་བ། ཏྲེ་ཧོར་ཟླ་བ་ཚེ་རིང་། 

ཁོང་རྗེས་སུ་དྲན་པ། 

འཕགས་མཆོག་ཕྱག་ན་པདྨོས་ཀྱང་གླང་ཐང་པ་རྡོ་རྗེ་སེངྒེ་ཞེས་ཡང་ཡང་བསྔགས་པའི་གྲུབ་པའི་དབང་ཕྱུག་ཆེན་པོ་ཁོང་གི་སྐུ་པར་མཐོང་གྲོལ་རིན་པོ་ཆེ་ཤིན་ཏུ་དག་ཅིང་གཙང་བ་ཉེ་ཆར་བླངས་པ་ལྟ་བུ་ཞིག་མཇལ་བའི་སྐལ་བཟང་བྱུང་བས། དམ་པ་གོང་མ་རྣམས་ཀྱི་ཞལ་ནས་ཐོས་པའི་ཁོང་གི་རྣམ་ཐར་རྣམས་དྲན་གསོ་ཐེངས་ཤིག་རང་བཞིན་གྱིས་བྱ་དགོས་བྱུང་། དུས་རབས་ཉི་ཤུ་པའི་ནང་མཁས་གྲུབ་གཉིས་ལྡན་གྱི་རྣལ་འབྱོར་པ་ཞིག་འཚོལ་དགོས་ཚེ། སེམས་ན་རང་བཞིན་གྱིས་ཐོག་མར་འཆར་འོང་བ་ནི་གདན་གསུམ་མཁས་མང་སྐར་ཚོགས་ལྟ་བུའི་དབུས་ནས་ལྷ་རམས་པ་རྩེ་ཕུད་དང་པོའི་མཚན་གནས་བཞེས་ཀྱང་ཇི་མི་སྙམ་པར་ཆོས་བརྒྱད་འགོང་པོ་རྒྱབ་ཏུ་བསྐྱུར། བྱ་བཏང་སྤྲོས་མེད་སྤྱད་དེ། མི་ལོ་ཧྲིལ་པོ་བཞི་བཅུ་ལྷག་སྨིག་དྲུག་རྫ་རི་སོགས་གནས་ངེས་མེད་རྣམས་སུ་ལྟོ་སྐྱ་གོས་ཧྲུལ་གྱིས་ཚེ་དང་སྒྲུབ་པ་མཉམ་པར་བཞུགས་པའི་དམ་པ་ཁོང་ལོས་ཡིན། 

འཁྲུངས་འདས་ཀྱི་སྐོར། 

བོད་རབ་བྱུང་བཅོ་ལྔའི་ས་མོ་ཕག་(1899)ལོར་སྐུ་བལྟམས། རབ་བྱུང་བཅུ་དྲུག་པའི་མེ་ལུག(1967) ཟླ་5ཚེས་30་ལ་ངོ་མཚར་བའི་ལྟས་དུ་མ་དང་བཅས་མྱ་ངན་ལས་འདས། འདའ་ཁར་ཞལ་ནས། "ང་རང་ཚོ་རི་ལ་ཤི་ན་བྱ་རོ་དང་། ཀླུང་ལ་ཤི་ན་ཁྱི་རོ་དང་འདྲ་བ་བདག་མེད་རང་སར་འདོར་དགོས། གདུང་མཇལ་ཟེར་བ་སོགས་གཏན་ནས་མ་བྱེད། མཇུག་ཏུ་བྱ་བྱེད་མང་མི་དགོས། རྒྱལ་བ་ཐམས་ཅད་མཁྱེན་པའི་སྙན་དུ་འཁྱོལ་བ་ཞིག་བྱུང་ན་དེ་གས་འགྲིག" ཅེས་ཤག་སྐོར་རྒན་ཉི་མ་སོགས་ལ་ཞལ་ཆེམས་ནན་པོ་གནང་འདུག

ངོ་མཚར་བའི་ཞལ་གསུང་དུམ་བུ།

བྱ་བྲལ་བཞུགས་དུས་སུ། ཉིན་ཞིག་དགེ་སློབ་རྣམས་རི་མགོར་བུད་ཤིང་དང་ལྕི་བ་བསྒྲུགས་ནས་ཕེབས་སྐབས་ཤིིག་ན་ཞལ་སློབ་ཚོས་དམ་པ་ཁོང་གིས་ལྷ་རམས་པའི་མཚན་རྟགས་ཇི་ལྟར་བཞེས་ཚུལ་བཀའ་འདྲི་ཞུས་པར། ཐུགས་ཆེས་མ་རངས་པའི་ཚུལ་གྱིས། "ངའི་བསམ་ན་ལྷ་རམས་ཨང་དང་པོའི་མིང་གིས་ཇ་ཕོ་པ་གང་ཡང་སྐོལ་མི་ཐུབ། ལྕི་བ་སླེ་བོ་གང་འདིས་ཇ་ཞིམ་པོ་ཞིག་སྐོལ་ཐུབ་རྒྱུ་རེད། ཁྱོད་ཚོས་ཅི་འདྲ་བསམ་གྱི་འདུག་གསུངས་པར་" སུས་ཀྱང་ལན་ཞུ་མ་ནུས་པ་རེ་ཞིག་འཇམ་ཐིང་ངེར་འདུག་དགོས་པའི་ཚུལ་ཡང་བྱུང་འདུག

བུ་སློབ། 

མཁན་ཆེན་པདྨ་རྒྱལ་མཚན་དང་། ཤག་སྐོར་རྒན་ཉི་མ་རྒྱལ་མཚན།རྒྱལ་རོང་མཁན་ཟུར་འཇམ་དཔལ་བསམ་འཕེལ། ཚུལ་ཁང་རྒན་ཡེ་ཤེས་ཐུབ་བསྟན། ཏྲེ་ཧོར་མཁན་ཟུར་རྗེ་བཙུན་བློ་བཟང་ཉི་མ་སོགས་སྐབས་དེའི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་རྣམས་ཁོང་གི་ཞལ་སློབ་དུ་མ་གྱུར་པ་མེད། ཁྱད་པར་ཌ་ལ་ཧོ་སིར་ཞེས་པའི་གནས་མཆོག་ན། གོང་ས་མཆོག་གི་བཀའ་འབྲེལ་བཞིན་རྗེ་ཙོང་ཁ་པ་ཆེན་པོའི་ཐུགས་ཀྱི་ཉིང་ཁུ་བྱང་ཆུབ་ལམ་རིམ་ཆེན་མོ།ཞི་ལྷག་གི་བར་ཟླ་བ་གསུམ་དང་། དེ་ནས་སྡེ་སྣོད་འཛིན་པ་བརྒྱ་ཕྲག་ལྷག་ཙམ་བཟང་བསྒྲུག་གིས་ཞི་ལྷག་མན་ཟླ་བ་གཅིག་སྟེ་ཁྱོན་ཟླ་བ་བཞིའི་རིང་བཀའ་ཁྲིད་མཛད་པས། སྐབས་དེའི་གདན་གསུམ་མཁས་པའི་ཡང་རྩེ་སོན་པ་ཕལ་མོ་ཆེ་རྗེ་འདི་ཉིད་ཀྱི་གསུང་གི་བདུད་རྩི་མྱོང་བའི་ཞལ་སློབ་ཏུ་འདུས་ཡོད་པའང་དམ་པ་མང་པོས་གསུངས། ཕྱག་ཡིག་འདིའི་སྐོར། ཕྱག་ཡིག་འདི་ཁོང་གི་ཐུགས་ལ་ལྟ་བའི་ཉམས་རྟོགས་ཤར་བ་རྣམས་ཡི་གེ་བཀོད་དེ་གོང་ས་མཆོག་ལ་གསང་ཞིང་སྦས་པའི་ཚུལ་དུ་ཕུལ་བའི་བཀའ་རྩོམ་ཞིག་ཡིན། ཕྱག་ཡིག་གི་མཇུག་ཏུའང་ཡི་གེ་འདི་གཞན་ལ་མི་གསུང་བ་ཞུ། ཞེས་གསལ་ཡོད། ཁོང་བཞུགས་པའི་རིང་ལ་ཕྱག་ཡིག་འདི་སུ་ལའང་གནང་མེད། དམ་པ་ཁོང་སྐུ་མྱ་ངན་ལས་འདས་པའི་རྗེས་ལ་གོང་ས་མཆོག་གིས་དགོས་པ་ཁྱད་པར་ལ་གཟིགས་ཏེ་ཤག་སྐོར་རྒན་ཉི་མ་ལ་གནང་སྟེ་གདན་སའི་སློབ་གཉེར་བ་དྲག་གྲས་རྣམས་ཀྱིས་གཟིགས་རྟོག་མཛད་དགོས་པའི་ཞལ་ཏ་ནན་པོ་གནང་ཡོད། དེ་ནས་རིམ་གྱིས་ངེད་ཅག་རྣམས་ཀྱིས་ཀྱང་མཇལ་བའི་སྐལ་བཟང་གི་གོ་སྐབས་འདི་བྱུང་ཡོད། 

གསུང་རྩོམ་གཞན་གྱི་སྐོར། 

ཞུ་ཡིག་འདི་དང་། དབུ་མ་ཐལ་འགྱུར་བའི་དགག་བྱ་ངོས་འཛིན། རྟེན་འབྲེལ་རྟགས་དང་དགག་བྱ་སྣང་ཚུལ། བདེ་ལམ་སྙིང་པོའི་ས་བཅད། ལམ་རིམ་བདེ་ལམ་སྙིང་པོ། ལམ་རིམ་དོན་བསྡུས། ཐར་འདོད་རྣམས་ལ་སྙིང་ལྟར་གཅེས་པའི་ཉེ་མཁོ་འགའ་ཞིག་སོགས་བཞུགས།

དགེ་བཤེས་ཚེ་དབང་སྟོབས་ལྡན་གྱི་གཏམ་བཤད་མ་ཟིན།

སེར་བྱེས་གཙུག་ལག་སློབ་གཉེར་ཁང་དང་། རྒྱ་གར་གྱི་དྷར་ཝཌ་གཙུག་ལག་སློབ་གཉེར་ཁང་གཉིས་ཐུན་མོང་གི་གོ་སྒྲིག་འོག་"འཛམ་གླིང་ཇི་ལྟར་བཟང་དུ་གཏོང་བ"ཞེས་པའི་བརྗོད་གཞིའི་ཐོག་རྒྱལ་སྤྱིའི་རང་བཞིན་ལྡན་པའི་ཉིན་གསུམ་གྱི་བགྲོ་གླེང་ཐོག་ཏུ་སེར་བྱེས་ཏྲེ་ཧོར་ལྷ་རམས་དགེ་བཤེས་ཚེ་དབང་སྟོབས་ལྡན་གྱིས་དབྱིན་སྐད་ཀྱིས་(རིས་མེད་བཟང་སྤྱོད)ཅེས་པའི་ཐོག་ཏུ་གཏམ་བཤད་བྱས་པའི་བོད་ཡིག་གི་མ་ཟིན།

དེ་རིང་ངའི་བརྗོད་གཞི་གཙོ་བོ་དེ་རིས་མེད་བཟང་སྤྱོད་ཅེས་པ་འདིའི་ཐོག་ལ་རེད་འདུག  སྤྱིར་བཏང་གི་ཡ་རབས་བཟང་སྤྱོད་ཟེར་བ་དེ་ཧ་ཅང་རྒྱ་ཆེན་པོ་ཞིག་རེད། མི་རིགས་སོ་སོ་དང་རྒྱལ་ཁབ་སོ་སོ། དེ་བཞིན་ཆོས་ལུགས་དང་ལུང་ཚན་སོ་སོ་ལ་ཡང་རང་རང་གི་དམིགས་བསལ་གྱི་ཡ་རབས་གོམས་སྲོལ་རྩི་སྟངས་མི་འདྲ་བ་མང་པོ་ཞིག་ཡོད་ཚོད་རེད། དེ་དག་ཐམས་ཅད་བཤད་ཐུབ་ཀྱི་མ་རེད་ལ། ངས་བཤད་ཤེས་ཀྱི་ཡང་མེད། ཡིན་ན་ཡང་གྲྭ་ཚང་གིས་ངོས་རང་བརྗོད་གཞིའི་འདིའི་སྟེང་དུ་གཏམ་བཤད་བྱེད་མཁན་དུ་བཏང་པ་ཡིན་དུས། གྲྭ་ཚང་རིན་པོ་ཆེའི་བཀའ་མ་ལྡོག་ཙམ་ཞིག་མ་ཞུ་རང་ཞུ་འདྲ་པོ་ཞིག་ཆགས་སོང། དེ་འདྲ་ཡིན་དུས་ངས་དེ་རིང་འདིར་༸གོང་ས་མཆོག་གི་གཙོས་སྐྱེས་ཆེན་རྣམས་ཀྱི་བསླབ་བྱ་རྣམས་གཞི་བྱས་ཏེ། ང་རང་གི་འཆར་སྣང་དང་་མྱོང་ཚོར་མདོར་བསྡུས་ཤིག་ཞུ་བར་འབད་བརྩོན་བྱེད་ཀྱི་ཡིན། དེ་ཡང་ངས་བརྗོད་གཞི་འདི་དོན་ཚན་ལྔའི་ཐོག་ནས་ཞུ་ན་བསམ་སོང་། 

ཐོག་མ་དེ་ལ་ཡ་རབས་བཟང་སྤྱོད་ཟེར་བ་དེ་གང་འདྲ་ཞིག་ལ་ངོས་འཛིན་བྱེད་དགོས་མིན། 

གཉིས་པ། དེང་རབས་ཀྱི་ཀུན་སྤྱོད་དེ་གང་འདྲ་ཞིག་གི་ཐོག་ལ་འགྲོ་ཡི་ཡོད་མེད། 

གསུམ་པ། དེང་རབས་ཀྱི་ཀུན་སྤྱོད་དེ་དང་འབྲེལ་བའི་དཀའ་རྙོག  

བཞི་པ། དེ་འདྲའི་དཀའ་རྙོག་དེ་དག་ཡོང་བའི་རྒྱུ་རྐྱེན་ག་རེ་ཡིན་མིན། 

ལྔ་པ། དཀའ་རྙོག་དེ་སེལ་ཐབས་ལ་ང་རང་གི་བསམ་ཚུལ་མདོར་བསྡུས་ཤིག་སྟེ་དོན་ཚན་ལྔའི་སྒོ་ནས་ཞུ་ན་བསམ་བྱུང་།

དེ་ལ་དང་པོ་ཡ་རབས་བཟང་སྤྱོད་ཟེར་བ་དེ་གོང་དུ་ཞུས་པ་བཞིན་ཧ་ཅང་རྒྱ་ཆེན་པོ་ཞིག་རེད་དེ། ཡིན་ན་ཡང་འཇིན་རྟེན་ཀུན་ཁྱབ་ཀྱི་ཡ་རབས་བཟང་སྤྱོད་ཅེས་པ་དེའི་ཐོག་ལ་ང་རང་གི་བསམ་ཚུལ་ཞིག་ཞུས་པ་ཡིན་ན། རྒྱུའི་ཁྱད་པར་ཀུན་སློང་བཟང་པོ་ཞིག་གི་ཐོག་ནས། ངོ་བོའི་ཁྱད་པར་གཞན་ལ་དངོས་སུ་གནོད་པའམ་བརྒྱུད་ནས་གནོད་པའི་བྱ་བའི་རིགས་ལས་ལྡོག་པ། འབྲས་བུའི་ཁྱད་པར་གཞན་ལ་ཕན་པ་སྟེ་ཁྱད་ཆོས་གསུམ་ལྡན་གྱི་སྤྱོད་ཚུལ་ཞིག་ལ་ཡ་རབས་བཟང་སྤྱོད་ཅེས་བརྗོད་ན་འགྲིག་གམ་སྙམ། དེ་ཡང་ང་ཚོ་བོད་ལ་ཆ་མཚོན་པ་ཡིན་ན། སྔོན་གྱི་ཆོས་རྒྱལ་ཚོའི་གནས་སྐབས་ནས་ལྷ་ཆོས་དགེ་བ་བཅུ་དང་། མི་ཆོས་གཙང་མ་བཅུ་དྲུག་ཅེས་མིའི་བཟང་སྤྱོད་ཀྱི་ཐོག་ལ་ལུགས་སྲོལ་ལམ་ཁྲིམས་ལུགས་ལྟ་བུ་ཞིག་གཏན་འབེབས་གནང་ཡོད་རེད། ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག་ཟེར་ན་ཡང་། ཚུར་བསྡུས་པ་ཡིན་ན་ལྷ་ཆོས་དགེ་བ་བཅུའི་ནང་དུ་ཕལ་ཆེར་འདུས་པ་ལྟ་བུ་ཞིག་རེད། དེ་འདྲའི་ལྷ་ཆོས་དགེ་བ་བཅུ་པོ་དེ་ཡང་གཞན་གནོད་གཞི་དང་བཅས་པ་ལས་ལྡོག་པའི་སྤྱོད་ཚུལ་ཞིག་གསུངས་ཀྱི་ཡོད་རེད། དེ་ཡང་སྲོག་གཅོད་པ། མ་བྱིན་པ་ལེན་པ། ལོག་གཡེམ་སྟེ་གསུམ་པོ་དེ་ཕྱིའི་ལུས་ཀྱི་ཐོག་ནས་གཞན་ཕ་རོལ་པོ་ལ་དངོས་སུ་གནོད་པའི་ངན་སྤྱོད་དང་། དེ་ནས་རྫུན། ཕྲ་མ། ཚིག་རྩུབ། ངག་འཁྱལ་བཅས་བཞི་པོ་དེ་ངག་གི་ཐོག་ནས་གཞན་ཕ་རོལ་པོ་ལ་དངོས་སུ་གནོད་པའི་ངན་སྤྱོད་དང་། བརྣབ་སེམས། གནོད་སེམས། ལོག་ལྟ་གསུམ་པོ་དེ། དེ་ལྟ་བུའི་ཕྱིའི་ལུས་ངག་གི་ངན་སྤྱོད་འབྱུང་བའི་གཞི་ནང་གི་བསམ་ངན་རྣམས་རེད། དེ་ལྟ་བུའི་གཞན་གནོད་གཞི་དང་བཅས་པ་ལས་ལྡོག་པའི་སྤྱོད་ཚུལ་ཞིག་ལ་ནང་པ་ཚོས་མི་དགེ་བཅུ་སྤོང་གི་ཚུལ་ཁྲིམས་ཞེས་ཐ་སྙད་བྱེད་ཀྱི་ཡོད་རེད་ལ། འདི་ཡང་འཇིག་རྟེན་ཀུན་ཁྱབ་ཀྱི་བཟང་སྤྱོད་ལ་འགྲོ་ཡི་རེད་བསམ་གྱི་འདུག  འོ་ན་འདིའི་ནང་དུ་གཞན་གནོད་གཞི་དང་བཅས་པ་ལས་ལྡོག་པ་ཞེས་པའི་ལོག་ལྟ་ལས་ལྡོག་ཅེས་པ་ཇི་ལྟར་ཞེ་ན། དེ་ལ་བཤད་ཚུལ་གཉིས་འདྲ་པོ་ཞིག་ཡོང་ཆོག་གམ་སྙམ་སྟེ།  དེ་ཡང་ནང་པའི་ཐུན་མོང་མ་ཡིན་པའི་དབང་དུ་བྱས་ན་ལོག་ལྟ་ཟེར་བ་དེ་ནང་པའི་གཞུང་ནས་བཤད་པའི་དཀོན་མཆོག་དང་། ལས་འབྲས། སྐྱེ་བ་སྔ་ཕྱི་སོགས་མེད་པར་ལྟ་བ་ལ་ལོག་ལྟ་ཞེས་འདོད་དགོས་ཀྱང་། ཡིན་ན་ཡང་འཇིག་རྟེན་ཀུན་ཁྱབ་ཀྱི་ཡ་རབས་བཟང་སྤྱོད་བཤད་ཡོང་དུས། གཞི་དང་བཅས་པ་ལས་ལྡོག་ཅེས་པའི་ལྡོག་སའི་ལོག་ལྟ་དེ་ངས་བལྟས་ན་དེ་ཙམ་ཞིག་ལ་ངོས་འཛིན་བྱེད་དགོས་མི་དགོས་པར་བྱ་བ་ཡག་པོ་ཞིག་བྱེད་ན་དེ་ལས་འབྲས་བུ་བཟང་པོ་ཞིག་འབྱུང་གི་ཡོད་པ་དང་། བྱ་བ་ངན་པ་ཞིག་བྱེད་ན་དེ་ལས་འབྲས་བུ་ཡང་ངན་པ་ཞིག་འབྱུང་གི་ཡོད་པའི་བསམ་ཚུལ་དེ་འཇིག་རྟེན་ཀུན་ཁྱབ་ཀྱི་ནང་སེམས་ཀྱི་ཐོག་ནས་བཟང་སྤྱོད་ཅིག་ཆགས་ཡོད་རེད། དེ་ལས་ལྡོག་ཏེ་བྱ་བ་བཟང་པོ་བྱེད་ན་དེ་ལས་འབྲས་བུ་བཟང་པོ་ཞིག་མི་འབྱུང་བར་གྱོང་རག་གི་ཡོད་པ་ལྟ་བུ་དང་། བྱ་བ་ངན་པ་ཞིག་བྱེད་པ་ཡིན་ན་དེ་ལས་འབྲས་བུ་ངན་པ་ཞིག་མི་འབྱུང་བར་དེ་ལ་ཁེ་ཕན་དང་འབྲས་བུ་བཟང་པོ་འབྱུང་གི་ཡོད་པའི་བསམ་ཚུལ་ལྟ་བུ། མ་ཟད་རྒྱུ་ནོར་དཔལ་འབྱོར་ཡང་དེ་ལ་བརྟེན་ནས་ཡོང་གི་ཡོད་པར་ལྟ་བའི་བསམ་ཚུལ་དེ་རྣམས་འཇིག་རྟེན་ཀུན་ཁྱབ་ཀྱི་ཡ་རབས་བཟང་སྤྱོད་བཤད་པའི་སྐབས་ཀྱི་ལོག་ལྟ་ཟེར་བ་དེ་འདྲའི་ཞིག་ལ་ངོས་འཛིན་དགོས་པ་མིན་འགྲོ་བསམ་གྱི་འདུག  དེར་བརྟེན་མི་དགེ་བཅུ་སྤོང་གི་ཚུལ་ཁྲིམས་ཡིན་ན་ཡང་རེད། གཞན་གནོད་གཞི་དང་བཅས་པ་ལས་ལྡོག་པའི་སྤྱོད་ཚུལ་དེ་འཇིག་རྟེན་ཀུན་ཁྱབ་ཀྱི་དབང་དུ་བྱས་ནས་ཆོས་ཁས་ལེན་མ་ལེན་ཚང་མས་བཟང་སྤྱོད་དུ་འདོད་དགོས་པ་གཅིག་དང་། ཚེ་འདི་ཙམ་གྱི་བདེ་སྐྱིད་ཀྱི་ཆེད་དུ་ཡང་ངེས་པར་དུ་དགོས་པ་ཞིག་རེད་སྙམ། མདོར་ན་ངའི་ངོས་ནས་ཡ་རབས་བཟང་སྤྱོད་ཟེར་བ་དེ་ཀུན་སློང་བཟང་པོ་ཞིག་གི་ཐོག་ནས་གཞན་ལ་དངོས་སུ་གནོད་པའམ་བརྒྱུད་ནས་གནོད་པའི་བྱ་བ་ལས་ལྡོག་པའི་སྤྱོད་ཚུལ་ཞིག་ལ་ཡ་རབས་བཟང་སྤྱོད་ཅེས་ངོས་འཛིན་བྱེད་ཀྱི་ཡོད།

གཉིས་པ། དེང་རབས་ཀུན་སྤྱོད་ལ་བཟང་ངན་གྱི་ཆ་གཉིས་ཀ་ཡོད་ཀྱང་། དེ་རིང་ངས་དགོས་དབང་གིས་ངན་ཕྱོགས་ནས་བཤད་ཀྱི་ཡིན། དུས་རབས་ཉེར་གཅིག་པ་འདིའི་ནང་གི་ཀུན་སྤྱོད་དེ་ག་འདྲ་ཞིག་ཆགས་ཡོད་རེད་ཟེར་ན། སྤྱིར་བཏང་ང་རང་ཚོ་འཛམ་བུ་གླིང་ཕྱོགས་ག་བར་བལྟས་པ་ཡིན་ན་ཡང་། ཚན་རིག་དར་རྒྱས་ཕྱིན་པའི་དབང་གིས་ཕྱིའི་དངོས་པོའི་རིགས་ཧ་ཅང་གི་ཡར་རྒྱས་ཚད་མཐོ་པོར་སླེབས་ཡོད་པ་དང་། མིའི་འཚོ་བའི་མཐུན་རྐྱེན་གྱི་ཆ་ནས་ཡིན་ན་ཡང་སྤྱི་ཡོངས་ནས་ཡར་རྒྱས་རྣམ་པ་འདྲ་པོ་ཞིག་ཕྱིན་ཡོད། དེ་བཞིན་དུ་མི་དང་མིའི་བར། རྒྱ་ཁབ་དང་རྒྱལ་ཁབ་ཀྱི་བར། གླིང་ཆེན་དང་གླིང་ཆེན་གྱི་བར་ལ། སྤྱིར་བཏང་གི་འབྲེལ་བ་དེ་སྔར་དང་མི་འདྲ་བར་འབྲེལ་བ་ཆེ་རུ་ཕྱིན་ཡོད་རེད་དེ། ཡིན་ན་ཡང་མང་ཆེ་བའི་འབྲེལ་བ་དེ་བཟང་སྤྱོད་ཀྱི་འབྲེལ་བ་ཞིག་མ་ཡིན་པར། སོ་སོའི་ཁེ་ཕན་གྱི་ཆེད་མ་བྱེད་ཐབས་མེད་དང་། ཡང་འགའ་ཞིག་ནི་ངོ་ཤེས་ཀྱི་འབྲེལ་བ་ཙམ་ཡིན། གང་ལྟར་ཕན་ཚུན་སེམས་ཐག་ཉེ་པོའི་ཐོག་ནས་གཅིག་གིས་གཅིག་ལ་ཡིད་ཆེས་བློས་འགེལ་གྱི་འབྲེལ་བ་དེ་ཆེས་དཀོན་པའི་གནས་སྟངས་ཤིག་ཆགས་ཡོད་པ་ཚོར་གྱི་འདུག  དཔེ་མཚོན་འགའ་ཞུ་བ་ཡིན་ན། དེ་ཡང་གཙོ་བོ་གསུམ་གྱི་ཐོག་ནས་བཤད་ཀྱི་ཡིན། གསུམ་དེ་ནི། རྩེད་འགྲན་པ། ཤེས་ཡོན་ཅན། སྒྱུ་རྩལ་བ་བཅས་གསུམ་གྱི་སྤྱོད་ཚུལ་ཐོག་ནས་ཞུ་ཡི་ཡིན། དེའི་དགོས་པ་རྒྱུ་མཚན་ཡང་། དེ་གསུམ་པོ་དེང་རབས་ཀྱི་གཞོན་སྐྱེས་ཚོའི་ཀུན་སྤྱོད་ལ་ཤུགས་རྐྱེན་ཧ་ཅང་ཆེན་པོ་ཐེབས་ཀྱི་ཡོད་པས་ཡིན།

༡༽ རྒྱལ་སྤྱིའི་ནང་དུ་རྩེད་འགྲན་འདྲ་པོ་ཞིག་གི་དབང་དུ་བྱེད་ན། རྒྱལ་སྤྱིའི་ཐོག་ལ་༼ཨོ་ལིམ་ཕིག་༽ཟེར་བ་འདྲ་པོ། དེ་བཞིན་གླིང་ཆེན་ནང་ཕན་ཚུན་དང་རྒྱལ་ཁབ་ཕན་ཚུན། ཚོགས་པ་དང་ལུང་ཚན་ཕན་ཚུན་བར་ལ་རྩེད་མོའི་རིགས་ཀྱི་བྱེད་སྒོ་སྣ་ཚོགས་པ་ཞིག་སྤེལ་དང་སྤེལ་བཞིན་པ་དེ་རེད། རྩེད་རིགས་ཀྱི་བྱེད་སྒོ་དེ་ཚོ་ཐོག་མའི་ཆ་ལ་འཛུགས་མཁན་ཚོས་དམིགས་ཡུལ་དེ། རྒྱལ་ཁབ་དང་རྒྱལ་ཁབ་ཀྱི་བར། ཚོགས་པ་དང་ཚོགས་པའི་བར། མི་དང་མིའི་བར་ལ་སེམས་ཐག་ཉེ་བོའི་མཐུན་འབྲེལ་དང་། ལྟད་མོ་ལྟ་མཁན་ཚོ་ལ་སྤྲོ་སྣང་དང་། རྩེད་མོ་བ་ཁོང་རང་ཚོ་ལ་ཡང་ལུས་བདེ་ཐང་ཡོང་བ་སོགས་གཞི་བཟུང་གིས་བཙུགས་ཡོད་ཀྱི་རེད་བསམ་གྱི་འདུག །ཡིན་ན་ཡང་ད་ཆར་དེ་དག་མང་ཆེ་བ་ཞིག་དམིགས་ཡུལ་དེའི་ཐོག་མ་སོང་བར་རྒྱལ་ཁབ་སོ་སོའི་མིང་གྲགས་དང་རྒྱལ་ཁབ་ཕན་ཚུན་འགྲན་རྩོད་ཀྱི་རྣམ་པ་དང་། གང་ཟག་སྒེར་སོ་སོ་ཡིན་ན་ཡང་མིང་གྲགས་དང་དཔལ་འབྱོར་འདུ་འགོད་འདྲ་པོ་ཞིག་གི་བསམ་བློའི་ཐོག་ནས་རྩེད་འགྲན་བྱེད་པའི་རྣམ་པ་ཞིག་ཆགས་སྡོད་ཀྱི་ཡོད་རེད། དེ་ལ་བརྟེན་ནས་སེམས་ཐག་ཉེ་པོ་དང་སེམས་གཏིང་གི་མཛའ་བརྩེའི་འབྲེལ་ལམ་དེ་ཡག་ཏུ་འགྲོ་བའི་ཚབ་ཏུ་སྡུག་ཏུ་ཕྱིན་པ་དང་། ལྟད་མོ་ལྟ་མཁན་ཚོ་ལ་ཡིན་ན་ཡང་སྤྲོ་སྣང་སྟེར་བའི་ཚབ་ཏུ་དངངས་སྐྲག་དང་འཇིགས་སྣང་། ཕན་ཚུན་ཞེ་འཁོན་སླེབས་པའི་རྒྱུར་འགྲོ་བ་འདྲ་བོ་མཐོང་གི་འདུག

༢༽ཤེས་ཡོན་གྱི་ཐོག་ལ་བསམ་བློ་ཞིག་གཏོང་བ་ཡིན་ན་ཡང་། སྤྱིར་བཏང་ཤེས་ཡོན་དེ་མི་སོ་སོའི་མི་ཚེའི་བདེ་སྐྱིད་དང་། དེ་དང་འབྲེལ་བའི་སོ་སོའི་ཉེ་འཁོར་དང་། དེ་ལས་ཁྱབ་ཆེར་བཏང་པ་ཡིན་ན་རྒྱལ་ཁབ་དང་མི་རིགས་རེད། འཛམ་བུ་གླིང་སྤྱི་ཡོངས་ལ་ཕན་ཐོགས་པའི་དངོས་པོ་ཞིག་ཡིན་དགོས་ཀྱི་ཡོད་རེད། དེར་བརྟེན་སྔ་མོ་ཡིན་ན་སློབ་སྦྱོང་བྱེད་དགོས་པའི་དམིགས་ཡུལ་ཡང་དེ་འདྲ་ཞིག་བཟུང་གི་ཡོད་རེད་དེ། ཡིན་ན་ཡང་ད་ཆར་མི་མང་ཆེ་བའི་བསམ་བློའི་ནང་ཤེས་ཡོན་དེ་དམིགས་ཡུལ་དེའི་ཐོག་མ་ཡིན་པར། གོང་དུ་ཞུས་པ་བཞིན་རང་གཅིག་པུའི་ཚེ་འདིའི་བདེ་སྐྱིད་ཀྱི་ཆེད་དུ་དང་། དེ་ཡང་ཕྱི་དངོས་པོ་ཁོ་ནས་འགྲུབ་ཀྱི་ཡོད་པའི་བསམ་ཚུལ་ཞིག་དང་། ཕ་རོལ་པོ་དང་འགྲན་རྩོད་ཀྱིི་རྣམ་པ་ཞིག་གི་ཐོག་ནས་ཤེས་ཡོན་སྦྱོང་པ་དང་།

༣༽ སྒྱུ་རྩལ་གྱི་ཐོག་ནས་ཞུ་ན། སྒྱུ་སྩལ་ལ་མང་པོ་ཞིག་ཡོད་པ་ལས་གློག་བརྙན་དང་གླུ་གར་བཅས་རེད། དེ་དག་དང་འཁྲབ་མཁན་ཚོས་གཞོན་སྐྱེས་ཚོར་སློབ་གསོ་བཟང་པོ་སྤྲོད་དགོས་པ་ཡིན་ཡང་། དེང་སྐབས་མང་ཆེ་བ་དེ་ལས་ལྡོག་སྟེ་ཆགས་སྡང་སོགས་སློང་བྱེད་དང་རྐུན་ཇག་སོགས་སློབ་མཁན་གྱི་དགེ་རྒན་ལྟ་བུར་འགྱུར་བཞིན་ཡོད། དེ་དང་དེ་མཚུངས་ཀྱི་དེང་དུས་ཀྱི་ཚོང་ལས་ཡིན་ནའང་རེད། ལས་དོན་ཆེ་ཕྲ་ཆུང་གསུམ་ག་འདྲ་ཞིག་ཡིན་ན་ཡང་། མང་པོ་ཞིག་གིས་རྒྱུ་ནོར་དཔལ་འབྱོར་སྒྲུབ་ཡ་ཞིག་དང་། མིང་གྲགས་དང་འགྲན་རྩོད་ཁོ་ནའི་རྣམ་པའི་ཐོག་ལ་འཇུག་སྡོད་པ་ཞིག་ཆགས་སྡོད་ཀྱི་ཡོད་རེད། བྱས་ཙང་དེང་རབས་ཀྱི་ཀུན་སྤྱོད་དེ་དེ་འདྲ་ཞིག་ཐོག་ལ་ཕལ་ཆེར་འགྲོ་བཞིན་པ་འདྲ་པོ་མཐོང་གི་འདུག

གསུམ་པ། འོ་ན་དེང་རབས་ཀྱི་ཀུན་སྤྱོད་དེ་དང་འབྲེལ་བའི་དཀའ་རྙོག་ག་རེ་ཡོད་རེད་ཅེ་ན། དེ་རིང་ཁ་སང་ང་རང་ཚོས་འཚོ་གནས་བྱེད་ས་འདི་ལ་། ས་མཚམས་ཆུ་མཚམས་འདྲ་བཅད་ནས་རྒྱལ་ཁབ་ཕན་ཚུན་བར་ལ་ས་རྩོད་དང་། ཆུ་རྩོད། གནམ་རྩོད་སོགས་དང་། དེའི་ཐོག་ནས་ཕན་ཚུན་དམག་འཁྲུག་གིས་དོན་མེད་མི་སེར་མང་པོ་ཞིག་གི་ལུས་སྲོག་ལ་གནོད་འཚེ་བྱེད་པ། དེ་དང་དེ་མཚུངས་ལྟ་གྲུབ་དང་ཤ་མདོག་སོགས་མི་འདྲ་རྒྱུ་མཚན་ཙམ་བཟུང་ནས་ཆོས་ལུགས་ཕན་ཚུན་དང་མི་རིགས་ཕན་ཚུན་བར་མཐོང་ཆུང་དང་ཁྱད་གསོད་བརྙས་བཅོས་དང་གསོད་རེས་ཀྱི་ཡ་ང་བའི་གནས་ཚུལ་གྱི་ཇི་རྙེད་ཅིག་བྱུང་དང་འབྱུང་བཞིན་པ་རེད། དེ་བཞིན་དུ་རྒྱལ་ཁབ་ནང་ལོག་ཡིན་ན་ཡང་མངའ་སྡེ་ཕན་ཚུན། ལུང་པ་ཕན་ཚུན། ཁྱིམ་མཚེས་ཕན་ཚུན། དེའི་ནང་ནས་ཀྱང་ནང་མི་ཕན་ཚུན། དེ་བས་ཀྱང་ཕ་མ་བུ་རྒྱུད་ཀྱི་བར་ལ་རྒྱུ་ནོར་སོགས་ཀྱི་རྩོད་རྙོག་དང་གསོད་རེས་མཚོན་པའི་བྱ་བ་ངན་པ་སྣ་ཚོགས་ཞིག་དེ་རིང་ཁ་སང་ཇེ་མང་ནས་ཇེ་མང་དུ་འགྲོ་བཞིན་ཡོད་པ་དེ་ང་རང་ཚོས་མཐོང་ཆོས་སུ་ཡོད་བཞིན་པ་དེ་རེད། དེ་དག་ཚང་མ་དུས་རབས་འདིར་མིའི་བཟང་སྤྱོད་ཉམས་ཆག་སོང་བའི་དབང་གིས་ཡོང་བ་ཤ་སྟག་རེད། དེ་ནི་ང་རང་ཚོ་ནང་བཅུད་ཀྱི་སེམས་ཅན་ཐོག་དཀའ་རྙོག་ཅིག་རེད།

དེ་བཞིན་དུ་ཕྱིའི་འཁོར་ཡུག་གི་ཆ་ནས་བསམ་བློ་ཞིག་གཏོང་པ་ཡིན་ན་ཡང་། དེ་རིང་ཁ་སང་ཁོར་ཡུག་ཧ་ཅང་གི་ཉམས་ཆག་འགྲོ་བཞིན་པ་རེད། གོ་ལའི་ཚ་དྲོད་ཧ་ཅང་འཕར་འགྲོ་གིན་འདུག་ཟེར་བ་འདྲ་པོ། འཛམ་གླིང་འདི་ལ་སེམས་འཁུར་ཡོད་པའི་མཁས་དབང་དང་གནད་ཡོད་མི་སྣ་ཚོས་དུས་རྒྱུན་དུ་སེམས་འཚབ་བྱས་དང་བྱེད་བཞིན་པ་དང་སྡུག་སྐད་རྒྱབ་དགོས་པ་ཞིག་ཆགས་ཀྱི་ཡོད་རེད།  དེ་དག་ཀྱང་མིའི་འདོད་རྔམས་ལ་བརྟེན་པའི་སྤྱོད་ཚུལ་ངན་པ་དེ་ལ་བརྟེན་ནས་བྱུང་བ་ཞིག་ཆགས་ཡོད་རེད། མིའི་འདོད་རྔམས་གྱིས་ཚད་ལས་རྒལ་བའི་བཟོ་གྲྭ་མང་པོ་འཛུགས་པ་དང་གཏེར་ཁ་སྔོག་འདོན། རྡུན་ཕྲན་དང་རྫས་ངན་རིགས་མང་པོ་བཟོ་སྐྲུན་བྱས་པ་སོགས་ལ་བརྟེན་དེ་རིང་ཁ་སང་སྔར་དང་མི་འདྲ་བ་ས་ཡོམ་དང་། ཆུ་ལོག རླུང་འཚུབ། མེའི་འཇིགས་པ་ལ་སོགས་དང་། ཡང་ཚ་སར་ཚ་དྲགས་པའི་དཀའ་ངལ་དང་། གྲང་སར་གྲང་དྲགས་པའི་དཀའ་ངལ། དེ་བཞིན་དུ་ཁ་ཤས་ལ་ཆུ་མང་དྲགས་པའི་དཀའ་ངལ། ལ་ལ་ཆུ་ཉུང་དྲགས་པའི་དཀའ་ངལ་སོགས་གོ་ལ་འདིའི་ཁོར་ཡུག་ཧ་ཅང་གི་ཉམས་ཆག་སོང་ནས། མཐའ་ན་རྩི་ཤིང་ཡན་ཆད་ཧ་ཅང་གི་ཉུང་ཉུང་ཆགས་འགྲོ་ཡི་ཡོད་པའི་གནས་སྟངས་ཆགས་ཡོད། དེ་འདྲ་ཡིན་དུས་ཕྱིའི་ཁོར་ཡུག་ཉམས་ཆག་དེ་ལ་བརྟེན་ནས་ནང་བཅུད་ཀྱི་སྲོག་ལྡན་ཚོར་ནད་ཡམས་འདྲ་མིན་སྣ་ཚོགས་ཤིག་བྱུང་དང་འབྱུང་བཞིན་པ་དེ་རེད། མ་ཟད་སྔར་དང་མི་འདྲ་བར་བཅོས་སུ་མེད་པའི་ནད་ངན་རིགས་ཧ་ཅང་མང་པོ་སྤང་ལས་ཤ་མོ་རྡོལ་བ་བཞིན་འབྱུང་གི་ཡོད་པ་འདི་རེད། བྱས་ཙང་དཀའ་རྙོག་དེ་ཚོ་ཕལ་ཆེ་བ་འགྲོ་བ་མིའི་རིགས་ཀྱི་ཀུན་སྤྱོད་དང་འབྲེལ་བའི་དཀའ་རྙོག་རེད།

བཞི་པ། འོ་ན་དེ་ལྟ་བུའི་བཟང་སྤྱོད་ཉམས་ཆག་དང་དེ་དང་འབྲེལ་བའི་དཀའ་རྙོག་ཡོང་སའི་གཞི་འདྲ་པོ་དེ་ག་འདྲ་ཞིག་རེད་ཅེས་ཟེར་བ་ཡིན་ན། ང་རང་གི་བསམ་ཚུལ་འདྲ་པོ་ཞིག་ཞུས་པ་ཡིན་ན། གཙོ་བོ་དེ་ང་རང་ཚོ་མི་ལ་རང་ཆས་སུ་ཡོད་པའི་བྱམས་བརྩེ་དང་བཟོད་བསྲན་འདྲ་བོ་ཡོད་པ། དཔེར་ན་ང་རང་ཚོ་བྱིས་པའི་དུས་ནས་ཕ་མ་ལ་བརྩེ་བ་དང་། དེ་བཞིན་དུ་ཕ་མ་ལ་བཟོད་བསྲན་འདྲ་པོ་ཞིག་ང་ཚོ་ལ་ཡོད་རེད། དེ་སུ་གང་གིས་ཀྱང་བསླབ་མི་དགོས་པར་རང་ཆས་སུ་ཡོད་པ་ཞིག་རེད། དེ་འདྲའི་ང་རང་ཚོའི༷་མིའི་རིན་ཐང་དེ་ཡར་རྒྱས་འགྲོ་བའི་ཚབ་ཏུ། དེ་ལས་ལྡོག་ཏེ་འདོད་རྔམས་དང་འཚེ་བའི་བསམ་པ་ལ་སོགས་པ། མདོར་ན་རང་གཞན་གྱི་རྒྱུད་འཁྲུག་བྱེད་མ་རབས་ཀྱི་བསམ་བློ་འདྲ་པོ་དེ་ཤུགས་ཆེ་རུ་དང་གོང་འཕེལ་དུ་ཕྱིན། དེ་ལ་བརྟེན་ནས་བཟང་སྤྱོད་རིགས་ཉམས་ཆག་འགྲོ་བ་དང། ངན་སྤྱོད་རིགས་གོང་འཕེལ་དུ་སོང་ནས་འཛམ་གླིང་འདིའི་ནང་དུ་དཀའ་རྙོག་མང་པོ་ཞིག་ཡོང་སྡོད་པའི་གནས་སྟངས་ཤིག་ཆགས་ཀྱི་ཡོད་རེད།

དེས་ན་མིའི་ཀུན་སྤྱོད་ངན་པ་དེ་ཡང་ནང་བསམ་བློ་ངན་པ་ཞིག་ལས་བྱུང་བ་དང་། བསམ་ངན་དེ་ཡང་གང་ལས་འབྱུང་བ་དང་ཇི་ལྟར་གོང་འཕེལ་དུ་འགྲོ་བ་ནི། ཕྱི་རོལ་ནས་གཞན་གྱིས་ཤུགས་རྐྱེན་དང་། གཞན་གྱིས་གནོན་ཤུགས་འདྲ་པོ་ཞིག་ལ་རག་ལས་པ་དང་དེ་དག་དང་ཧ་ཅང་གིས་འབྲེལ་བ་ཆེན་པོ་ཡོད་པ་ཞིག་མཐོང་གི་འདུག ། གང་ཡིན་ཟེར་ན་ཕ་མ་དང་དགེ་རྒན་གཙོས་པའི་སྤྱི་ཚོགས་ནང་གི་སློབ་གསོ་བ་ཚོས་སློབ་གསོ་དང་སློབ་སྦྱོང་སྤྲོད་སྟངས་བཅས་ཀྱི་ཐོག་འཐུས་ཤོར་ཆེན་པོ་ཤོར་བ་དང་། གཞན་ལ་ཁ་མིག་ཡ་བལྟ་བྱེད་ས་ཧ་ཅང་དཀོན་པ་སོགས་རྐྱེན་གྱིས་ཡིན་པ་ཚོར་གྱི་འདུག གོང་དུ་ཞུས་པ་བཞིན་རེད། ཤེས་ཡོན་དང་སྤྱི་སྒེར་གང་གི་ལས་དོན་བྱ་བ་གང་འདྲ་ཡིན་ན་ཡང་དེ་དག་ཕལ་ཆེ་བ་གཞན་གྱི་སློབ་གསོའི་ཤུགས་རྐྱེན་འདྲ་པོ་ཞིག་གིས། གཞན་འབུར་འཇོམས་བྱེད་ཡ་འདྲ་པོ་དང་། ཕྱི་དངོས་པོའི་དཔལ་འབྱོར་ཁོ་ནའི་ཆ་རྐྱེན་དུ་སྒྲུབ་ཀྱི་ཡོད་པ་འདྲ་བོ་རེད་འདུག  དཔེར་ན་ཕ་མ་མང་པོ་ཞིགགིས་རང་གི་ཕྲུ་གུ་ལ་ཐོག་མ་སློབ་སྦྱོང་བྱེད་ཕྱོགས་ཀྱི་ཐོག་ལ་སློབ་གསོ་ཞིག་སྤྲོད་ཡོང་དུས་ནས། ཁྱོད་ཀྱིས་སློབ་སྦྱོང་བྱེད་དགོས་ཀྱི་རེད། ཁྱེད་ཀྱིས་སློབ་སྦྱོང་མ་བྱེད་པ་ཡིན་ན་མ་འོངས་པར་ཁྱེད་རང་མི་གཞན་དང་འདྲ་མཉམ་བྱེད་ནས་འགྲོ་མི་ཐུབ་པར་ཁྱེད་རང་རྗེས་ལུས་ཐེབས་ཀྱི་རེད་ཟེར་བ་འདྲ་བོ་དང། ཡང་ན་ཁྱེད་རང་མི་གཞན་ལས་ལྷག་པ་ཞིག་བྱེད་དགོས་ཀྱི་རེད། དེ་མ་བྱེད་པ་ཡིན་ན་ཁྱེད་རང་མི་གཞན་དང་ཁྱད་མེད་དུ་འགྱུར་གྱི་རེད། ཡང་ན་ཁྱེད་རང་གིས་སློབ་སྦྱོང་བྱེད་དགོས་ཀྱི་རེད། གང་ལགས་ཟེར་ན། མ་འོངས་པ་ན་ཁྱེད་རང་ལ་དཔལ་འབྱོར་དགོས་ཀྱི་ཡོད་རེད། རྒྱུ་ནོར་དཔལ་འབྱོར་མེད་པ་ཡིན་ན་མི་ཚེར་བདེ་སྐྱིད་མི་འབྱུང་བ་དང་མིའི་གཞན་དབང་དུ་འགྲོ་བ་ལས་རང་དབང་ཡང་མེད་པ་དང་། གལ་ཏེ་རྒྱུ་ནོར་དཔལ་འབྱོར་ཡོད་ན་ག་རེ་བྱེད་བྱེད་རེད་ཟེར་བ་ལྟ་བུའི་དེ་འདྲའི་སློབ་གསོ་སྤྲོད་པ་དང་། གང་ལྟར་ཡང་རྒྱལ་ཁབ་སོ་སོ་ཡིན་ནའང་རང་གི་མི་སེར་རྣམས་ལ་སློབ་གསོ་སྤྲོད་སྟངས་དེ་སོ་སོའི་རྒྱལ་ཁབ་འདི། དཔལ་འབྱོར་དང་། འཕྲུལ་རིག་ལག་རྩལ་དང་འཕྲུལ་འཁོར་ཡིན་ན་རེད། རྡུལ་ཕྲན་མཚོན་ཆའི་གཙོས་གོ་ལག་ཆ་སོགས་གང་ཅི་ཐད་ནས་འཛམ་གླིང་གི་ནང་དུ་འབུར་དུ་ཐོན་པ་ཞིག་དང་། རྒྱལ་ཁབ་གཞན་པ་ཚོ་ལས་ཁྱད་དུ་འཕགས་པ་བཟོ་རྒྱུ་ཞིག་གི་ཆེད་དུ་སློབ་གསོ་སྤྲོད་སྡོད་པ་འདྲ་པོ་རེད། དེ་འདྲ་ཞིག་གི་ཐོག་ནས་གཞོན་སྐྱེས་ཚོ་ལ་གཞན་ལས་རང་གཙོ་ཆེར་བཟུང་བའི་བསམ་པ་དེ་ཤུགས་ཆེན་པོ་ཞིག་སྤེལ་གྱི་ཡོད་པ་དང་། སོ་སོ་གཅིག་པོའི་ཁེ་ཕན་གྱི་བསམ་བློ་ཞིག་དང་། ཡང་ན་ཁོ་རང་གི་རྒྱལ་ཁབ་དང་མི་རིགས་སྤྱི་ཚོགས་དེ་ཁོ་ནའི་ཁེ་ཕན་གྱི་བསམ་བློ་ཆུང་ཆུང་ཞིག་རྒྱ་བསྐྱེད་དེ་དེ་ལ་བརྟེན་ནས་མི་རིགས་དང་སྤྱི་ཚོགས་གཞན་ལ་བརྩི་མཐོང་མེད་པ་དང་བརྙས་བཅོས་སོགས་སྤྱོད་ཚུལ་ངན་པ་ཤུགས་ཆེན་པོ་དེ་འདྲ་ཡོང་གི་མེད་འགྲོ་སྙམ། བསམ་ཚུལ་དེ་འདྲ་ཞིག་གི་ཐོག་ནས་མ་འོངས་པར་གཞོན་སྐྱེས་ཚོ་ཤེས་ཡོན་ཅན་ཞིག་ཆགས་པ་ཡིན་ན་ཡང་རེད། རྒྱུ་ནོར་ཅན་ཞིག་ཆགས་པ་ཡིན་ན་ཡང་འདྲ། ཡང་ན་ཆབ་སྲིད་པ་དང་། འཛམ་གླིང་གི་རྩེ་ཕུད་ཀྱི་རྩེད་འགྲན་པ་སྙན་གྲགས་ཆེན་པོ་ཞིག་ཆགས་པ་ཡིན་ན་ཡང་རེད། ག་འདྲ་ཞིག་ཆགས་པ་ཡིན་ན་ཡང་འཛམ་གླིང་སྤྱི་ཡོངས་ལ་ཕར་བཞག སོ་སོའི་རྒྱལ་ཁབ་ཀྱི་ནང་དུ། སོ་སོའི་སྤྱི་ཚོགས་ཀྱི་ནང་དུ་ཡང་ཕན་ཐོགས་ངེས་ཅན་ཞིག་ཡོང་ཁག་པོ་རེད།  ཁོ་རང་ལ་ཡང་དོན་དམ་པའི་སེམས་ཀྱི་ཞི་བདེ་ཞིག་ཡོང་ཁག་པོ་རེད། གང་ཡིན་ཟེར་ན། ཐོག་མའི་ཀུན་སློང་གི་བསམ་པ་དེ་མ་དག་པ་ཞིག་ཡིན་དུས། དེ་ལ་བརྟེན་ནས་དོན་དམ་པའི་འབྲས་བུ་བཟང་པོ་ཞིག་དང་ཕན་ཐོགས་མཁན་ཞིག་མི་ཡོང་བ་ནི། འབྲས་བུ་རྒྱུའི་རྗེས་སུ་འགྲོ་དགོས་པའི་ཆོས་ཉིད་ཅིག་ཆགས་སྡོད་ཡོད་རེད། བྱས་ཙང་ཐོག་མའི་ཀུན་སློང་དེ་མ་དག་པ་ཡིན་དུས། མ་འོངས་པར་དཔལ་འབྱོར་ཆེན་པོ་ཞིག་ཆགས་པ་ཡིན་ན་ཡང་། དེས་སྤྱི་ཚོགས་ཀྱི་ནང་དུ་གཉའ་གནོན་དང་བཤུ་གཞོག་གཏོང་བྱེད་ལྟ་བུ་དང་། ཤེས་ཡོན་གྱི་ཐོག་ནས་ཆབ་སྲིད་མཁས་ཅན་ལྟ་བུ་ཞིག་ཆགས་པ་ཡིན་ན་ཡང་ཆབ་སྲིད་དེས་མི་མང་གི་བདེ་བ་སྒྲུབ་པ་དང་། དཀའ་ངལ་སེལ་རྒྱུའི་ཚབ་ཏུ་མི་མང་དབང་བསྒྱུར་བྱེད་ཡ། མི་མང་བེད་སྤྱད་ནས་སྤྱི་ཚོགས་ཀྱི་ནང་དུ་བརྡབ་གསིག་གཏོང་བ་མཚོན་པའི་སོ་སོའི་དཔལ་འབྱོར་ཁོ་ན་འདུ་འགོད་བྱེད་ས་ཡིན་པའི་བཟོ་འདྲ་ཞིག་གིས། ལྐོག་ཟ་རུལ་སུང་ལ་སོགས་པའི་བྱ་བ་ངན་པ་མང་པོ་ཞིག་སྒྲུབ་སྡོད་པའི་གནས་ཚུལ་ཞིག་ཆགས་ཀྱི་ཡོད་རེད། དེ་མ་ཟད་མིང་གྲགས། འགྲན་སེམས་དང་རྒྱུ་ནོར་སོགས་ཁོ་ནའི་ཆེད་དུ་ཤེས་ཡོན་ཞིག་སྦྱོང་དུས། དེ་ལ་བརྟེན་པའི་དྭོགས་པ་རྣམ་རྟོག་མང་པོ་ཞིག་སླེབས་ཡ་དང་། དེའི་ཐོག་ཏག་ཏག་ཅིག་འགྲོ་མ་ཐུབ་པ་དེས་སེམས་ལ་འཇིགས་སྣང་དང་སྔངས་སྐྲག སེམས་སྡུག་མང་པོ་ཞིག་སླེབས་སྡོད་པ། དེ་ལ་བརྟེན་ནས་ཆང་རག་ཚད་མེད་བཏུང་སྡོད་པ། བཟི་སྨན་སྤྱོད་པ་དང་། རྒྱུ་ནོར་དཔལ་འབྱོར་དང་ཐོབ་གོ་ས་སོགས་ཀྱི་ཆེད་དུ་རྫུན་བཤད་པ། དེ་བཞིན་དུ་རྐུ་མ་དང་ཇག་པ་རྒྱབ་པ་སོགས་སྤྱོད་ངན་རིགས་མང་པོ་ཞིག་བྱུང་བ་དང་། དེ་དག་ཐམས་ཅད་ཀྱང་མཐར་གཏུགས་ན་ཐོག་མའི་ཀུན་སློང་གི་བསམ་པ་དེ་མ་འགྲིག་པའི་དབང་གིས་རེད་སྙམ། དེ་ལྟ་བུའི་ཀུན་སློང་གི་བསམ་པ་ངན་པ་དེ་ཕྲུ་གུ་ཆུང་དུས་ནས་ཡོད་པ་ཞིག་རེད་དམ་ཞེ་ན། རྩ་བ་ནས་མ་རེད། གཞི་རྩའི་ཆ་ནས་བག་ཆགས་འདྲ་པོ་ཞིག་ཡོད་རྒྱུ་རེད་དེ། དེ་འདྲའི་བསམ་ངན་སློང་བའམ་ཤུགས་ཆེར་སྐྱེ་རུ་འཇུག་མཁན་ལྟ་བུ་དེ་ཕ་མ་དང་དགེ་རྒན། གྲོགས་པོ། ཉེ་འཁོར་བ་ཚོའི་ཤུགས་རྐྱེན་དང་སློབ་གསོ་སྤྲོད་སྟངས་དབང་གིས་དང་དེ་དག་ཤུགས་རྐྱེན་གྱིས་ཡོང་གི་ཡོད་འགྲོ་བསམ་གྱི་འདུག །གང་ལྟར་ཡང་རྐྱེན་རྩ་གཙོ་བོ་འདྲ་པོ་དེ་རང་ཉིད་ཀྱི་ཁེ་ཕན་ཁོ་ནའི་བསམ་བློ་དང་། བཟོད་བསྲན་འདྲ་པོ་ཞིག་གཏན་ནས་མེད་པར་མི་སྒེར་སོ་སོ་ཡིན་ནའང་རེད། རྒྱལ་ཁབ་ཕན་ཚུན། མི་རིགས་དང་ཆོས་ལུགས་ཕན་ཚུན་ཡིན་ན་རེད། ཕན་ཚུན་གནོད་པའི་བྱ་བ་ཆུང་ཙག་ཞིག་བྱུང་བ་ཡིན་ན་ཡང་གཅིག་ལ་གཅིག་ལན་དང་གཉིས་ལ་གཉིས་ལན་བྱས། དེ་འདྲའི་གནས་སྟངས་དེ་ཤུགས་ཆེ་རུ་འགྲོ་ཡོང་དུས་འཛམ་གླིང་འདིའི་ནང་དུ་མི་གསོད་ཁྲག་སྦྱོར་མཚོན་པའི་དཀའ་ངལ་མང་པོ་ཞིག་ཡོང་བཞིན་པ་དེ་རེད། མདོར་ན་རང་གཅིག་པུའི་བསམ་བློའི་ངན་པ་དེ་ཡང་ཐུག་ས་་གོང་དུ་ཞུས་པ་བཞིན་ཕྱིའི་འཁོར་ཡུག་ལ་ཧ་ཅང་འབྲེལ་བ་ཆེན་པོ་ཞིག་ཡོད་ས་རེད་བསམ་གྱི་འདུག

ལྔ་པ། འོ་ན་དཀའ་རྙོག་དེ་དག་སེལ་ཐབས་ག་འདྲ་ཞིག་དགོས་འདུག་ཞུ་ན། གོང་དུ་ཞུས་པ་བཞིན་རྒྱལ་ཁབ་ཡིན་ན་ཡང་རེད། སྤྱི་ཚོགས་ཡིན་ན་ཡང་རེད། སུ་འདྲ་ཞིག་ཡིན་ན་ཡང་བསམ་བློའི་སློབ་གསོ་བའི་མི་སྣ་དང་དགེ་རྒན། ལྷག་པར་དུ་ཕ་མ་ཚོ་ཤིན་ཏུ་ནས་གལ་ཆེན་པོ་ཞིག་རེད། ཕྲུ་གུ་ཆུང་ཆུང་གི་སྐབས་སུ་སློབ་གསོའི་ཁྱད་པར་གྱིས་ཕྲུ་གུ་ཆེན་པོའི་གནས་སྐབས་སུ་ཤུགས་རྐྱེན་ཐེབས་ཀྱི་ཡོད་པ་དེ་གསལ་པོ་ཆགས་སྡོད་ཡོད་པ་སོང་ཙང་ཕ་མ་གཙོས་པའི་སྤྱི་ཚོགས་སློབ་གསོ་བ་ཚོས་ཕྲུ་གུ་ལ་རང་ཆས་སུ་ཡོད་སྡོད་པའི་བྱམས་བརྩེ་དང་བཟོད་བསྲན་དེ་ཚོ་གྲས་དེ་ཡར་གོང་འཕེལ་དུ་གཏོང་བའི་ཐབས་ལམ་ཞིག་བསྟན་རྒྱུ་དང་། དཔེར་ན་ང་ཚོ་བོད་པ་ལྟ་བུ་ལ་ཆ་མཚོན་ན། སྔོན་གྱི་རྒན་རབས་ཚོའི་གནས་སྐབས་སུ་སྲོལ་བཟང་ཡོད་པ་ནི། རང་རང་གི་བུ་རབས་ཚ་བརྒྱུད་ཚོ་ལ་ཞར་དང་ཞོར་དུ་རྒྱུ་འབྲས་དགེ་སྡིག་གི་བླང་དོར་གྱི་གནས་ལ་སློབ་གསོ་ཡང་ནས་ཡང་དུ་གནང་སྲོལ་ཡོད་པ་རེད། ཡང་སྙིང་རྗེ་དང་བྱམས་པ་ལྟ་བུ་དང་། དེ་བཞིན་དུ་འདི་བྱེད་ན་དགེ་བ་རེད་ཟེར་བ་དང་། འདི་བྱེད་ན་མི་དགེ་བ་རེད་ཟེར་བ་ལྟ་བུ་དང་། ཡང་དེ་འདྲ་བྱེད་རྒྱུ་ཡོད་མ་རེད་སེམས་ཅན་ལ་གནོད་འཚེ་ཐེབས་ཀྱི་རེད་ཟེར་བ་ལྟ་བུ། ཐ་ན་ལམ་ཁ་ནས་འབུ་ཞིག་མཐོང་བ་ཡིན་ན་ཡང་དེ་སྐྱབས་དགོས་པ་སོགས་ཀྱི་ཐོག་སློབ་གསོ་སྤྲོད་པའི་ལུགས་སྲོལ་ཞིག་ང་ཆུང་ཆུང་གི་སྐབས་སུ་ནི་འདུག མི་རིགས་གཞན་ལའང་དེ་ལྟར་ཡིན་གྱི་རེད། དེ་ལྟ་བུ་དེང་སང་གི་ཕ་མ་ཚོར་ཡོད་མེད་མི་ཤེས། དེས་ན་ཕ་མ་ཚོས་ཕྲུ་གུ་ཚོ་ཆུང་ཆུང་ཡིན་པའི་གནས་སྐབས་ནས་གཞན་བརྟེན་གྱི་བསམ་བློའི་སློབ་གསོ་སྤྲོད་རྒྱུ་དང་། དཔེར་ན་ང་རང་ཚོ་ལ་བདེ་སྐྱིད་ག་འདྲ་ཞིག་དང་ཕྱིའི་དངོས་པོ་བཟང་པོ་ག་འདྲ་ཞིག་ཐོབ་པ་ཡིན་ན་ཡང་། གཞན་ལ་བརྟེན་ནས་ཡོང་དགོས་པ་མ་གཏོགས་རང་རང་སོ་སོ་གཅིག་པུས་ཡོང་མི་ཐུབ་པ་རེད། དེར་བརྟེན་གཞན་བརྟེན་གྱི་བསམ་བློ་ཞིག་བསྐྲུན་གང་ཐུབ་བྱ་རྒྱུ་དེ་ཧ་ཅང་གི་གལ་ཆེན་པོ་རེད། བསམ་པ་དེ་ནི་ང་ཚོ་ནང་པའི་གཞུང་ནས་བཤད་སྟངས་བྱེད་པ་ཡིན་ན་རྟེན་འབྱུང་ལྟ་གྲུབ་ཀྱི་ནང་དུ་བསྡུ་བ་རེད། གཞན་ལ་གནོད་ཚེ་ལྡོག་པའི་སྤྱོད་ཚུལ་དེ་སྤྱོད་པ་འཚེ་བ་མེད་པར་བསྡུ་བ་རེད། མདོར་ན་བདེ་སྡུག་ག་འདྲ་ཞིག་བྱུང་བ་ཡིན་ན་ཡང་རྒྱུ་ལ་བརྟེན་ནས་ཡོང་དགོས་པ་ཞིག་དང་། གཞན་ལ་བརྟེན་ནས་ཡོང་དགོས་པ་ཡིན་པས་འབྲས་བུ་བཟང་པོ་ཞིག་ཡིན་ན་དེ་ལ་རྒྱུ་བཟང་པོ་ཞིག་ཡོད་དགོས་པ་དང་དེ་མེད་ན་ཡོང་རྒྱུ་མེད་པ་ཞིག་རེད། དཔེར་ན་འབྲས་ཀྱི་མྱུ་གུ་སྐྱེ་བ་ལ་འབྲས་ཀྱི་ས་བོན་ཞིག་དགོས་ཀྱི་ཡོད་རེད་མ་གཏོགས། ནས་ཀྱི་ས་བོན་ལ་བརྟེན་ནས་ཡོང་རྒྱུ་མེད་པའི་གནས་སྟངས་ཤིག་གིས། འབྲས་བུ་ག་འདྲ་ཞིག་ཡིན་ན་ཡང་རང་དང་མཐུན་པའི་རྒྱུ་ཞིག་ལས་བྱུང་དགོས་པར་སོང་ཙང་། འབྲས་བུ་བདེ་སྡུག་གམ་བཟང་ངན་དེ་རྒྱུ་བཟང་ངན་གྱིས་ཁྱད་པར་ལས་བྱུང་བ་དང་། དེ་ཡང་སྡུག་བསྔལ་དེ་གཞན་ལ་གནོད་པའི་བྱ་བ་ཞིག་གི་སྟེང་ནས་བྱུང་བ་དང་། བདེ་བ་དེ་གཞན་ལ་ཕན་པར་བྱེད་པའི་རྒྱུ་ཞིག་དང་འབྲེལ་ནས་བྱུང་བ་ཡིན་ཞིང་། ང་རང་ཚོ་སུ་ཡིན་ན་ཡང་བདེ་བ་འདོད་ལ་སྡུག་བསྔལ་མི་འདོད་པ་གཅིག་མཚུངས་ཡིན་པས། བདེ་བ་དེ་ཐོབ་པ་ལ་དེའི་རྒྱུ་བསྒྲུབ་དགོས་པ་དང་། སྡུག་བསྔལ་དེ་མེད་པར་བཟོ་བ་ལ་དེའི་རྒྱུ་དེ་མེད་པ་བཟོ་དགོས་པ་ཞིག་ཡིན་དུས། ཕ་མ་ཚོས་རང་གི་ཕྲུ་གུ་ཆུང་ཆུང་ཡིན་པའི་གནས་སྐབས་ནས་རྒྱུ་འབྲས་རྟེན་འབྱུང་གི་རྣམ་བཞག་དང་། གཞན་ལ་བརྟེན་དགོས་པའི་བསམ་བློ། གཞན་ལ་ཕན་སེམས་བཅས་བསྐྲུན་གང་ཐུབ་བྱེད་དགོས་པ་དེ་ཧ་ཅང་གལ་ཆེན་པོ་ཞིག་རེད། དེ་བཞིན་དགེ་རྒན་ཚོ་ཡིན་ན་ཡང་དགེ་ཕྲུག་ཚོར་ཤེས་ཡོན་སློབ་སྦྱོང་དེ་གཙོ་བོ་མི་ཚེ་འདི་གའི་བདེ་སྐྱིད་ཀྱི་ཆེད་དུ་སྤྲོད་ན་ཡང་འགྲིག་གི་རེད་དེ། ཡིན་ན་ཡང་གཞན་ལ་འགྲན་པའི་ཕྱིར་རམ་རྒྱུ་ནོར་དཔལ་འབྱོར་ཁོ་ནའི་ཆེད་དུ་མ་ཡིན་པར་སློོབ་སྦྱོང་དང་མཉམ་དུ་རང་ཉིད་ཀྱི་བདེ་སྐྱིད་སོགས་ལེགས་ཚོགས་གང་ཡིན་ཡང་གཞན་ལ་བརྟེན་ནས་ཡོང་དགོས་པའི་སློབ་གསོ་བཟང་པོ་སྤྲོད་དགོས་པར་དགེ་མཚན་ཆེན་པོ་ཡོད་པར་མཐོང་། དེ་བཞིན་དུ་རྒྱལ་ཁབ་སོ་སོ་ཡིན་ན་ཡང་ཡ་རབས་བཟང་སྤྱོད་དེའི་སྒང་ལ་ཤུགས་རྐྱེན་ཐེབས་པ་ཞིག་བྱེད་དགོས་ཀྱི་འདུག་ཅེས་ཞུ་རྒྱུ་དང་། ལྷག་པར་དམག་འཁྲུག་གི་དུས་རབས་འདིར་བཟོད་སྒོམ་ནི་ཧ་ཅང་གི་གལ་ཆེན་ཞིག་མཐོང་གི་འདུག གང་ལགས་ཞུ་ན། འགྲོ་བ་མིའི་ཞེ་སྡང་གིས་བསྐྲུན་པའི་འཇིག་རྟེན་འདིའི་དམག་འཁྲུག་དེ་འགྲོ་བ་མི་རང་ཉིད་ཀྱིས་མེད་པར་བཟོ་དགོས་པ་མ་གཏོགས་གཞན་གང་གིས་ཀྱང་མི་ནུས། གལ་སྲིད་དེ་མེད་པར་མ་བཟོ་བར་དེ་མུར་ལུས་ན། ནམ་ཞིག་དམག་འཁྲུག་དེས་ཚུར་སྣོད་བཅུད་ཡོངས་རྫོགས་རྩ་མེད་དུ་གཏོང་ངེས་པ་རེད། དཔེར་ན་ཤིང་ལས་སྐྱེས་པའི་སྲིན་འབུས་ཤིང་བཟོས་པ་བཞིན་འགྱུར་ངེས་རེད། འོ་ན་དམག་འཁྲུག་སེལ་ཐབས་ཅི་ཡོད་ཅེ་ན། ཐབས་ལམ་ཡག་ཤོས་ནི་བཟོད་པ་རེད། རྒྱུ་མཚན་ནི་དམག་འཁྲུག་ནི་ཁོང་ཁྲོ་ལ་བརྟེན་ནས་བྱུང་བ་དང་། བཟོད་པ་ནི་ཁོང་ཁྲོའི་བཉེན་པོ་ཡིན་པས། དཔེར་ན་མེ་གསོད་བྱེད་ཆུ་མཆོག་ཡིན་པ་བཞིན་དུ་ཞེ་སྡང་གི་མེ་ལྕེ་འཇོམ་པ་ལ་བཟོད་པའི་ཆུ་བོ་དེ་ལས་ལྷག་པ་ཞིག་མེད། དེར་བརྟེན་ང་རང་ཚོས་ཕུགས་ཀྱི་ཁེ་ཕན་འཛམ་གླིང་འདིའི་མཐུན་འབྲེལ་དང་ཞི་བདེ་ལ་བསམ་ནས་གནས་སྐབས་བཟོད་བསྲན་བསྟེན་རྒྱུ་ཧ་ཅང་གལ་ཆེ། ལྷག་པར་དུ་དེང་གི་འཇིག་རྟེན་འདི་ཁ་ལོ་སྒྱུར་མཁན་ཐོབ་གོ་ས་ཡོད་པའི་དཔོན་རིགས་དང་། རྒྱུ་དངོས་པོ་ཡོད་པའི་འབྱོར་ལྡན། རྣམ་དཔྱོད་དང་ལག་བརྩལ་ཡོད་པའི་འཕྲུལ་ལས་མཁས་ཅན་ཚོར་གཞན་ལ་བྱམས་བརྩེ་དང་བཟོད་སྒོམ་དང་དཀྱེལ་ཡངས་དགོས་པ་ནི་ཤིན་ཏུ་ནས་གལ་ཆེའོ།

མཐའ་དོན་ཞུ་རྒྱུ་ནི། གོ་ལ་འདིའི་སྒང་གི་སྲོག་ལྡན་ཡོད་དོ་ཅོག་རང་ཉིད་བདེ་བ་འདོད་ལ་སྡུག་བསྔལ་མི་འདོད་པ་གཅིག་གྱུར་ཡིན་པ་དང་། ས་ཆེན་པོ་འདི་ནི་གོ་ལ་འདིའི་སྒང་གི་སྲོག་ལྡན་ཡོངས་རྫོགས་ལ་ཐོབ་ཐང་འདྲ་མཉམ་ཡིན་པར་མ་གཏོགས་ད་ལྟའི་དུས་རབས་འདིའི་འགྲོ་བ་མིའི་རིགས་གཅིག་པུར་མི་དབང་། དེར་བརྟེན་ང་ཚོས་སོ་སོའི་བདེ་སྡུག་གི་མྱོང་ཚོར་ལ་དཔག་ནས་གཞན་གྱི་ལུས་སྲོག་ལ་བརྩི་མཐོང་གནང་རོགས་ཞུ་རྒྱུ་དང། མ་ཟད་མི་རབས་རྗེས་མ་རྣམས་ལ་ཡང་ཐུགས་བསམ་བཞེས་ནས་བཟའ་བཏུང་གྱོན་གོས་སོགས་འཚོ་བའི་ལོངས་སྤྱོད་གང་གི་ཐད་ལའང་ངེས་པར་དུ་ཚོད་འཛིན་དང་གོ་ལ་འདི་ལ་གཅེས་སྤྲས་གནང་རོགས། ལྷག་པར་རང་ཅག་གི་ཚེ་སྲོག་ཡུན་གནས་དང་ལུས་སེམས་བདེ་ཐང་འདོད་ཚེ། ཁོར་ཡུག་འདི་བདག་སྐྱོང་ངེས་པར་དུ་གནང་དགོས། དེའི་འགན་འཁྲི་ཡང་ང་ཚོ་མི་རེ་ངོ་རེ་ལ་ཡོད་པ་ཤེས་དགོས། ། ཐུགས་རྗེ་ཆེ། སེར་བྱེས་དགེ་བཤེས་ཚེ་དབང་སྟོབས་ལྡན་གྱིས་ ༢༠༡༦-༩-༡༧ ཉིན།

ལས་དང་པོ་བའི་སློབ་གཉེར་བ་ཞིག་ལ་ངེས་པར་ཚང་དགོས་པའི་གཞི་རྩའི་དགོས་མཁོ་གསུམ།

ལྷ་རམས་པ་ཏྲེ་ཧོར་ཟླ་བ་ཚེ་རིང་།

དེ་རིང་ཞོར་འཕྲོས་ཙམ་གྱིས་སྤྱིར་སློབ་གཉེར་བ་ཞིག་དང་ཁྱད་པར་དུ་ནང་བསྟན་གཞུང་ལུགས་ལ་སློབ་གཉེར་བྱེད་མཁན་ཞིག་ཡིན་ན་དེ་ལ་ཚང་དགོས་པའི་གཞི་རྩའི་ཆ་ཅན་འགའ་རེ་འདི་ནས་འཆད་ཁྲིད་ཀྱི་ཞར་ལ་སླར་ཡང་དྲན་གསོ་ཐེངས་གཅིག་བྱ་འདོད་བྱུང་།

དང་པོ།

མི་ཚེ་དོན་སྙིང་ལྡན་པ་ཞིག་དང་། དེ་ལས་བཟང་ན་བྱ་བཞག་རླབས་ཆེན་ཞིག་གི་དོན་དུ་གཏོང་བ་ལ་སློབ་གཉེར་གྱི་རྨང་གཞི་བརྟན་པོ་ཞིག་དགོས། བསླབ་གཞིའི་སློབ་གཉེར་གྱི་སྡེ་ཚན་གང་འདྲ་ཞིག་གི་ནང་དུ་ཞུགས་ན་ཡང་གཞན་གྱིས་བཙན་ཤུགས་ཀྱིས་དེད་པ་དང་། རི་བོང་ཅལ་འདྲོགས་ཀྱིས་རྒྱུགས་ནས་ཚུད་སོང་བ་ལྟ་བུ་ནི་བརྟན་པོ་མེད་ལ། དེ་འདྲ་ཞིག་གིས་སློབ་གཉེར་བའི་གྲལ་དུ་འཚང་མཁན་རྣམས་ནི། ངས་བལྟས་ན་ཕན་ཐོགས་མིན་གཉིས་ཀྱི་ཕྱི་མའི་བརྒྱ་ཆ་མང་བ་ཡོད་རེད་དྲན།

དེ་འདྲ་ཕལ་ཆེ་བ་ལ་རང་ངོས་ནས་ནུས་ཤུགས་དང་དོ་དབྱིངས་ཅི་ཡང་མེད་པས་ཁྲལ་ལྟ་བུ་ཆགས་ཀྱི་རེད། དེ་འདྲ་ཡིན་ཙང་རང་གི་སེམས་གཏིང་ནས་དབྱིངས་དང་དོ་སྣང་ཡོད་པའི་སློབ་གཉེར་བའི་སྡེ་ཚན་ཞིག་ཏུ་ངེས་པར་ཞུགས་དགོས། དེ་ནི་བརྟན་པོ་ཡོད་ལ། སློབ་གཉེར་བྱེད་ཚུལ་ལ་ཡང་གཞི་རིམ་གྱིས་ནུས་ཤུགས་ཡོད། འདི་ཤིན་ཏུ་གལ་ཆེ་རེད།

གཉིས་པ།

སློབ་གཉེར་བ་སྤྱིར་དང་ཁྱད་པར་ནང་བསྟན་སློབ་གཉེར་བྱེད་མཁན་ཞིག་ཡིན་ན་དངོས་པོའི་གནས་ལུགས་དང་། བདེན་དོན། དངོས་ཡོད་གནས་ཚུལ་ཅི་ཞིག་ཡིན་མིན་བརྟག་དཔྱད་བྱེད་མཁན་ཞིག་ཡིན་པ་ལས་བཤད་མཁན་སུ་ཡིན་དང་དེ་ཉིད་གྲུབ་མཐའ་གང་དུ་གཏོགས་མིན་ལ་འབྲེལ་བ་སྤུ་ཙམ་ཡང་མེད་པས། བློ་གཟུ་བོར་གནས་དགོས་པ་འདི་ཤིན་ཏུ་གལ་ཆེ་པོ་རེད།

ཀུན་ལ་ཐེ་ཚོམ་དང་བཅས་པ་དང་། གང་ཡང་ཡིན་ཆོག་པ་དང་། ཡིན་མི་སྲིད་པ་མིན་སྙམ་པ་དང་། ཁོང་གིས་དེ་ལྟར་གསུངས་ཀྱང་དངོས་གནས་ཅི་ཡིན་ནམ་སྙམ་པའི་སེམས་ཚོར་གྱི་ཟུར་ཞིག་དུས་རྟག་ཏུ་ངེས་པར་ཡོད་དགོས།

དང་པོ་ཉིད་ནས་ང་དགེ་ལྡན་པ་ཡིན། ང་ས་སྐྱ་པ་ཡིན་སྙམ་པ་དང་། འདི་གསུང་མཁན་བླ་མ་རྩ་ཆེན་ཡིན་པས་དེ་ལོས་ཡིན་སྙམ་པའི་ཕྱོགས་གཅིག་ཏུ་ལྷུང་ཚེ། གང་མཐོང་བ་དང་གང་ཐོས་པ་ཚང་མ་དེའི་ཕྱོགས་དང་སྒྲུབ་བྱེད་ཉག་གཅིག་ཏུ་འཆར་བ་ལས་ཕྱོགས་གཞན་པ་དེ་གཏན་ནས་མཐོང་མི་ཐུབ།

ཁྱད་པར་ངེད་ཅག་སློབ་གཉེར་བ་ཕལ་མོ་ཆེའི་ཁྲོད་དུ་རིམས་ནད་ལྟ་བུའི་ཀུན་ལ་ཁྱབ་པའི་ན་ཚ་ཞིག་ཡོད་པ་ནི། ཁོ་ང་ལས་མཁས་པ། བླ་མ་རྩ་ཆེན། སྐྱེས་བུ་དམ་པ་ཡིན་པས། ངས་ཁོང་གི་གསུངས་པ་དེ་ལས་གཞན་ཞིག་བསམ་མི་ཕོད། བརྟག་མི་ཕོད། བཤད་མི་ཕོད་པ་ལག་ཐལ་མོ་སྙིང་ཁར་སྦྱར་ནས་འདུག་ཅང་བྱེད་པ་འདི་ནི། འཕྲལ་སེལ་ལ་ཕན་ཐོགས་ལྟ་བུ་ཞིག་ཚོར་སྲིད་ཀྱང་ཕུགས་སུ་བརྟན་པོ་གཏན་ནས་མ་རེད།

སྟབས་ཉེན་ན་ སེམས་ཁམས་དང་ཀླད་པ་རང་དབང་གི་འཕེལ་རྒྱས་འགྲོ་བའི་གེགས་དང་འཆིང་ཐག་གི་རྒྱུ་སྡུག་ཤོས་དེ་ཆགས་སྲིད། ངེད་ཅག་ནི་དངོས་པོའི་བདེན་དོན་འཚོལ་མཁན་ཡིན་པས། བདེན་དོན་གྱི་ཆེད་དུ་གྲུབ་མཐའ་དགོས་པ་ཞིག་ཡིན་པ་ལས། གྲུབ་མཐའི་ཆེད་དུ་བདེན་དོན་རྩོད་པ་ནི་རྒྱུ་འབྲལ་གོལ་འཛོལ་དང་ཡོངས་སུ་ནོར་བ་རེད།

དེས་ན་སློབ་གཉེར་བ་སུ་ཞིག་ཡིན་ཡང་རང་གི་མོས་ཁམས་དང་འཚམ་པའི་གྲུབ་མཐའ་གང་དུ་ཞུགས་མིན་དང་། དགེ་རྒན་སུ་ཞིག་བསྟེན་མིན་དབང་ཚད་དང་གདམ་ཁ་ཡང་མཐར་ཐུག་ན་རང་ཉིད་ཁོ་ན་ལ་ཡོད་དགོས།

སློབ་གཉེར་བ་སུ་ཞིག་ཡིན་ཡང་སྒོ་གསུམ་ལ་གནོད་ཤུགས་མེད་པ་སེམས་ཁམས་དང་ཀླད་རྒྱ་རང་དབང་གི་སྒོ་ནས་འཕེལ་རྒྱས་སུ་འགྲོར་བཅུག་དགོས་པ་ཆེས་ཤིན་ཏུ་གལ་ཆེ་རེད། དེ་འདྲ་བྱས་ན་མི་སོ་སོ་ལ་ཡོད་པའི་ལྷན་སྐྱེས་ཀྱི་ནུས་པ་རྒྱས་ཏེ་སྐབས་རེ་ཡ་མཚན་པའི་བསམ་བློ་བ་དང་ལྟ་གྲུབ་པ་ངོ་མཚར་ཅན་དེ་འདྲའང་ཐོན་སྲིད་པ་རེད།

གསུམ་པ།

དགོན་སྡེ་ལ་ལར་སློབ་མ་སོ་སོས་བརྟག་དཔྱད་ནན་པོར་བྱས་ནས་རང་གི་འདོད་མོས་དང་འཚམ་པའི་དད་པ་བྱ་ཡུལ་གྱི་དགེ་རྒན་གྱི་མདུན་དུ་སློབ་ཁྲིད་འགྲོ་འདོད་ཤིན་ཏུ་ཆེ་ཡང་འགྲོར་མ་བཅུག་པར་དགེ་རྒན་གྱི་འོས་ཆོས་ཚང་མིན་དང་། སློབ་མའི་འདོད་པ་ཡོད་མེད་་སོགས་ལ་གཏན་མ་བལྟས་པར་ཁང་ཚན་དང་། མི་ཚན། ཤག་ཚང་སོགས་ཀྱི་ཆེད་བསྐོས་དང་ཐད་བསྐོས་ཀྱི་དགེ་རྒན་གྱི་འོས་ཆོས་གཏན་མ་ཚང་བའི་མི་རེ་གཉིས་ཀྱི་མདུན་དུ་ཨུ་ཚུགས་ཀྱིས་བཙན་བརྫངས་བྱས་པ་སོགས་ནི་སངས་རྒྱས་ཀྱི་དགོངས་པ་དང་འགལ། དམ་ཆོས་འདུལ་བ་སོགས་དང་མི་མཐུན་པར་མ་ཟད།

འཇིག་རྟེན་མི་ཆོས་རིང་ལུགས་ཙམ་དང་ཡང་རྒྱབ་འགལ་དུ་སོང་ཞིང་། དད་མོས་བྱ་ཡུལ་གྱི་དགེ་བའི་བཤེས་གཉེན་ནི་ལེགས་ཚོགས་ཐམས་ཅད་ཀྱི་རྩ་བ་ཡིན་པས། ཚེས་གཅིག་ནས་ནོར་ན་སུམ་ཅུའི་བར་འཁྲུག་ངེས་པས། མི་འདོད་སར་བཙན་བརྫངས་དང་འདོད་སར་བཙན་བཀག་ནི་བཀྲ་མི་ཤིས་པའི་བདུད་ལས་ཐུ་བོ་ཆེ་ཡིན་པས། བརྟག་དཔྱད་ནན་ཏན་གྱིས་འོས་ཆོས་ཚང་ཞིང་། འདོད་མོས་ཡོད་པའི་བཤེས་གཉེན་འཚོལ་བའི་དབང་ཚད་ཀྱང་སློབ་མ་རང་ཉིད་ལ་ངེས་པར་ཡོད་དགོས། རང་གི་འདོད་པ་དང་དད་པ་ཡོད་པའི་དགེ་བའི་བཤེས་གཉེན་ཞིག་བསྟེན་ཐུབ་ན་གཞན་ལྟ་ཞོག དད་མོས་ཙམ་གྱིས་སྟོབས་ཀྱིས་ཀྱང་འཆད་ཁྲིད་སེམས་ལ་འཇགས་བདེ་བ་དང་། ཡུན་རིང་མི་བརྗེད་པ་དང་། བཤེས་གཉེན་གྱི་བྱིན་རླབས་ཀྱང་རྒྱུད་ལ་འབྱུང་ངེས་པའི་ཁྱད་པར་ཏན་ཏན་ཡོད་རེད་སྙམ།

སེར་བྱེས་མཁན་རབས་དོན་དྲུག་པ་རྗེ་བཙུན་དགེ་འདུན་ཆོས་འཕེལ་གྱི་རྣམ་ཐར་རགས་བསྡུས།

 

སེར་བྱེས་མཁན་རབས་དོན་དྲུག་པ་རྗེ་བཙུན་དགེ་འདུན་ཆོས་འཕེལ་གྱི་རྣམ་ཐར་རགས་བསྡུས།

སེར་བྱེས་ཏྲེ་ཧོར་རྗེ་བཙུན་དགེ་འདུན་ཆོས་འཕེལ་མཆོག་ནི་ཕྱི་ལོ་1941ལོར་ཏྲེ་ཧོར་དཀར་མཛེས་གྲོང་ཁྱེར་གྱི་ཉེ་འདབས་སུ་ཆགས་པའི་སུ་ངོ་ཞེས་པའི་གྲོོང་ཚོ་ཞིག་ཏུ་ཡབ་ཨ་དགའ་དང་ཡུམ་བསོད་ནམས་སྒྲོལ་མ་གཉིས་སུ་སྐུ་འཁྲུངས། དགུང་ལོ་བརྒྱད་ལོན་པ་ན་དཀར་མཛེས་དགོན་དུ་ཆོས་བཞུགས་གནང་ཞིང་དགོན་དུ་ལོ་ཤས་བཞུགས་རྗེས་གྲྭ་སར་ཕེབས། ཕྱི་ལོ་1955ལོར་གདན་ས་ཆེན་པོ་སེ་ར་དགོན་དུ་ཕེབས་གནང་གིས་བྱེས་མཁས་སྙན་གྲྭ་ཚང་དུ་གསར་ཞུགས་བྱས་ཏེ་རྒན་བསྟན་པ་ཉིི་མ་ཁག་ཐེག་དགེ་རྒན་དུ་བསྟེན་པར་གནང་། སྦས་པའི་རྣམ་འབྱོར་པ་ཆེན་པོ་རྒན་བློ་དགའ་མཆོག་དང་བྱེས་མཁས་སྙན་གྲྭ་ཚང་གི་མཁས་པའི་གཙུག་རྒྱན་རྒན་རིན་པོ་ཆེ་དགེ་བཤེས་བློ་བཟང་དབང་ཕྱུག་(སེར་བྱེས་མཁན་རབས་རེ་དྲུག་པ)ཅེས་གྲགས་པའི་སྙན་པ་ས་སྟེང་དུ་ཁྱབ་པའི་དམ་པ་གང་དེའི་ཞབས་རྡུལ་སྤྱི་བོས་བླངས་ཏེ་འགོ་བསྡུས་གྲྭ་ནས་བཟུང་གཞུང་ཆེན་ཁག་ལེགས་གཟིགས་གནང། དུས་འགྱུར་སྐབས་སྦག་ས་ཆོས་སྒ་དང་བྱེས་ཀྱི་སེ་ར་དགོན་དུ་རིམ་བཞིན་སློབ་གཉེར་འཕྲོ་སྐྱོང་གནང་།

ང་རང་གསར་བཞུགས་བྱས་ཏེ་ཐོག་མའི་དཔེ་ཁྲིད་ཞུས་པ་ནས་ད་བར་རྒན་ཁོང་གི་མདུན་དུ་དཔེ་ཁྲིད་དང་འཆད་ཁྲིད་དབང་གནང་ལུང་མན་ངག་སོགས་ཞུ་སྐལ་ཐོབ་ཅིང་། རྒན་ཁོང་གི་སྐུ་ཡོན་དང་དགོངས་པ་བཞེས་ཕྱོགས་སོགས་མི་ཉུང་བ་ཞིག་མཐོང་ཐོས་བྱུང་་ཡོད། དུས་རྒྱུན་གདན་སའི་གསར་བུ་བ་ཚོ་ལ་དཔེ་ཁྲིད་གནང་དུས་ཉིན་ཡ་ལ་དཔེ་ཁྲིད་དང་ཉིན་ཡར་བསླབ་བྱ་གནང་གི་ཡོད་ཅིང་། དཔེ་ཆ་ཁྲིད་དུས་ཀྱང་བཤད་པ་གཅིག་པོ་མིན་པར་རྟག་ཏུ་བསླབ་བྱ་དང་འབྲེལ་ནས་གསུངས་གནང་གི་ཡོད།

རྒན་ཁོང་ཉིད་བོད་ཀྱི་རྒྱལ་རབས་དང་ལོ་རྒྱུས། དམ་པ་ཚོའི་རྣམ་ཐར་སོགས་ཀློག་རྒྱུར་མཉེས་པོར་ཡོད་སྟབས་སྐབས་རེ་འདས་པའི་ལོ་རྒྱུས་ཀྱི་ཆགས་འཇིག་དང་སླད་མ་འོངས་བྱེད་འཆར་ཅི་དགོས་ཀྱང་ཁ་གསལ་གནད་ལ་ཁེལ་བའི་བཀའ་སློབ་ཡང་ཡང་གནང་གི་ཡོད། བཀའ་སློབ་དང་གསུང་བཤད་ཅི་འདྲ་ཞིག་གནང་རུང་རྙིང་ཞེན་དང་ཨུ་ཚུགས་མི་གནང་བར་ཐུགས་བབ་ཡངས་པོ་དང་གཟིགས་རྒྱ་ཆེན་པོས་དོན་དངོས་དང་མཐུན་པ་ཞེ་ཅིག་གནང་གིན་ཡོད་པས་གདན་སའི་བགྲེས་སོང་ཚོའི་གྲས་ན་དུས་དང་མཐུན་པ། གུ་ཡངས་དང་གཟིགས་རྒྱ་ཆེ་བ་དེ་ལྟ་བུ་རེ་ཨེ་ཡོད་སྙམ་པ་དྲན་མྱོང་། མཐུན་རྐྱེན་གང་འདྲ་ཞིག་འཛོམས་ནས་དེ་ལྟར་ཆགས་པ་ཡིན་མིན་ཁ་གསལ་ཞིག་མ་ཤེས་རུང་། ངས་བསམ་ཚོད་ལ་རྒན་ཁོང་དཔེ་དེབ་ཀློག་རྒྱུར་ཧ་ཅང་མཉེས་ཤིང་དཔེ་དེབ་སྣ་ཚོགས་གཟིགས་པའི་རྐྱེན་གྱིས་མིན་ནམ་སྙམ། ཐེངས་ཤིག་ལ་དགེ་ཕྲུག་ཅིག་གིས་དཔེ་དེབ་ལེགས་པོ་ཞིག་གཟིགས་འབུལ་ཆེད་རྒན་གྱི་སྐུ་ཚ་དེ་ལ་སྤྲོད་འདུག སྐུ་ཚ་དེས་དོ་ནུབ་དཔེ་དེབ་འདི་རྒན་ལ་འབུལ་རྒྱུ་མིན། དཔེ་དེབ་འདི་བཀླགས་ནས་མ་གཟིམ་པར་ཕྱི་པོར་བཞུགས་ཀྱི་རེད་ཅེས་བཤད་འདུག

ན་ནིང་ད་ལོ་གདན་སའི་སྐྱེས་ཆེན་མང་པོ་ཞིག་དགོངས་པ་གཞན་དོན་དུ་བཤེགས་ཏེ་དབང་ལུང་མན་ངག་གནང་མཁན་ཡང་དཀོན་ཙམ་གྱུར་ཡོད་སྟབས། གཞི་ནས་རྒན་ཁོང་གི་དབང་ལུང་མན་ངག་སྩོལ་རྒྱུར་ཞལ་བཞེས་གནང་བ་ལས། དེ་སྔ་ཡིན་ན་དཔེ་ཁྲིད་ཤ་སྟག་གནང་བཞིན་བཞུགས་པ་ལས་དབང་ལུང་གནང་རྒྱུ་ཞལ་བཞེས་གནང་གི་མེད། དེ་སྔར་དགེ་ཕྲུག་ཅིག་གིས་རྡོ་རྗེ་འཇིགས་བྱེད་ཀྱི་དབང་ཞུ་ཆེད་གསོལ་འདེབས་ཞུས་དུས། རྒན་ཁོང་གིས་ཟམ་པ་ལྟག་ཏུ་བཞག་སྟེ་ཆུ་རག་འོག་ནས་རྒྱག་ན་མི་འགྲིག ད་ལྟ་སྐྱབས་རྗེ་ཆོས་ལྡན་རིན་པོ་ཆེ་སོགས་བཞུགས་མུས་ཡིན་སྟབས་ཁོང་རྣམ་པར་ཞུས་ན་ཡག་ཚུལ་གྱི་བཀའ་སློབ་ཕེབས་ནས་ཞལ་བཞེས་གནང་མི་འདུག

ཟམ་གདོང་རིན་པོ་ཆེས་སེ་རར་གསུང་ཆོས་གནང་གཏན་ཁེལ་བ་རྒན་ཁོང་གིས་གསན་རྗེས། བུམ་པ་མགོ་ཐོག་བཞག་ནས་བྱིན་རླབས་ཐོབ་མིན་མི་ཤེས། བྱིན་རླབས་ཞེས་པ་ནི་མཁས་པ་ཚོའི་ལེགས་བཤད་ཉན་ནས་བློ་སྐྱེད་ཐོབ་པ་འདི་རང་ཡིན་ཞེས་ཟམ་གདོང་རིན་པོ་ཆེའི་གསུང་ཆོས་ལ་འགྲོ་ཐུབ་ན་བློ་སྐྱེད་ཧ་ཅང་ཆེན་པོ་ཡོད་ཚུལ་གསུངས་ཏེ་རྒན་ཁོང་ཉིད་ཀྱང་གསུང་ཆོས་སུ་ཕེབས་གནང་འདུག

སྔ་ལོ་སྔ་ལོ་ཞིག་ཏུ་དགེ་སྐོས་ཤིག་གིས་རྒན་རིན་པོ་ཆེ་ལ་ཆོས་རྭའི་ནང་དུ་སློབ་གཉེར་བ་དག་ལ་བཀའ་སློབ་གནང་དགོས་ཚུལ་གྱི་བཀའ་ཕེབས་བྱུང་རྗེས། བཀའ་ནན་མ་ཆོག་པར་དགེ་འདུན་འདུས་པ་རྒྱ་མཚོ་ལ་རྒན་ཁོང་གི་དགོངས་ཚུལ་ཅི་ཡོད་གསུང་གནང་སོང་། སྐབས་དེར་ད་ཡོད་ཀྱི་གདན་སའི་དཔེ་ཁྲིད་གནང་སྟངས་འདིར་འགྱུར་བ་ཞིག་བྱུང་ན་ཡག་ཚུལ་གྱི་བཀའ་སློབ་ཕེབས་ཤིང་། རྒན་རང་ཉིད་དཔེ་ཁྲིད་དགེ་རྒན་ཞིག་ཡིན་སྟབས་ཞོགས་པ་ནས་དགོང་མོའི་བར་འཛིན་གྲྭ་ཧ་ཅང་མང་པོ་ཞིག་ལ་གཞུང་ཆ་ཚང་ཁྲིད་དགོས་དུས་དགེ་རྒན་ཚོས་ཁྲིད་བྱའི་སློབ་ཚན་ཁག་གྲ་སྒྲིག་ལེགས་པོར་བྱེད་ཁོམ་མེད་པས་སློབ་ཁྲིད་སྐབས་ཇི་བཞིན་ཁྲིད་མ་ཐུབ་པའི་སྐྱོན་གནས་འབྱུང་ཉེ་ཆེ་ཚུལ། དེ་ལས་ཕར་ཕྱིན་དང་དབུ་མ་སོགས་གཞུང་ཆེན་ཁག་ཁྱད་ལས་ལྟ་བུས་གཞུང་གཅིག་རང་ཁྲིད་ཐུབ་མཁན་ཞིག་བྱུང་ན་སློབ་མ་ཚོ་ལ་བློ་སྐྱེད་ཆེ་བ་ཡོང་ཚུལ་སོགས་ཀྱི་གལ་འགངས་ཆེ་བའི་བཀའ་སློབ་ནན་པོར་གནང་། (བཀའ་སློབ་འདི་ཡིག་ཐོག་ཕབ་བཞིན་འདུག་པས་མི་རིང་བར་དྲ་གྲོགས་ཚོས་སྤྱན་གཟིགས་གནང་ཐུབ་སྲིད།) དུས་སྐབས་དེ་འདྲ་ལ་དེ་ལྟ་བུའི་དགོངས་པ་བཞེས་ཐུབ་མཁན་ཡང་དཀོན་ཙམ་ཡིན་ལ་སྐབས་དེ་ཤད་ནས་བཟུང་རྒན་ཁོང་གིས་ཉིན་རྒྱུན་སློབ་ཚན་ཆ་ཚང་ཁྲིད་རྒྱུ་མཚམས་བཞག་ནས་གལ་ཆེའི་གཞུང་ལུགས་མང་པོ་ཞིག་ཆེད་དུ་ཟླ་ངོ་མང་པོར་དཔེ་གཟིགས་གནང་རྗེས་འཆད་ཁྲིད་བྱེད་འགོ་བཙུགས་ཡོད། ཕར་ཕྱིན་གཟིགས་མཁན་ལས་དང་པོ་བ་ཚོར་དམིགས་ཏེ་རྗེ་བཙུན་ཆོས་ཀྱི་རྒྱལ་མཚན་གྱིས་མཛད་པའི་ཕར་ཕྱིན་སྐབས་དང་པོ་ཆ་ཚང་། དབུ་མ་གཟིགས་མཁན་ལས་དང་པོ་བ་དག་ལ་དམིགས་ཏེ་དབུ་མའི་སྤྱི་དོན་འཆད་ཁྲིད། རྗེའི་ལྟ་བའི་ལེགས་བཤད་ཆེན་པོ་ལྔ་ཁྲིད་རྒྱུ་དགོངས་བཞེས་ཀྱིས། ལྷག་མཐོང་ཆེན་མོ་ཆ་ཚང་འཆད་ཁྲིད། རྩ་ཤེར་ཊིཀ་ཆེན། དབུ་མ་དགོངས་པ་རབ་གསལ། ལེགས་བཤད་སྙིང་པོ་དབུ་མའི་སྐོར་ཆ་ཚང་འཆད་ཁྲིད་(འདི་མཇུག་མ་རྫོགས།)

སློབ་གཉེར་བ་དག་ལ་རྒྱུན་དུ་གཞུང་ཆེན་གཟིགས་དུས་རྩོད་རྒྱུ་ཞིག་དང་ལུང་འགལ་ཞིག་ག་འདུག་བལྟས་ཏེ་དཔེ་ཆ་ལྟ་བའི་གོམས་གཤིས་དེ་འཇག་མི་རུང་། གཞུང་གི་ཁོག་ལོན་པར་བྱས་ཏེ་དོན་ཇི་བཞིན་ཤེས་ཐབས་བྱེད་དགོས། གཞུང་མཁྲེགས་པོ་ཞིག་མདུན་དུ་བཞག་དུས་བཤད་ཐུབ་པ་ཞིག་ཡིན་ན་དཔེ་ཆ་ཤེས་པ་རེད་ཅེས་ཡང་ཡང་ནན་གསུང་གནང། ཚིག་གི་གོ་དོན་། དོན་གྱི་ཞིབ་ཆ། རང་གི་འཛིན་མཚམས་སོགས་ཀྱི་རྨང་གཞི་ལེགས་པོ་ཞིག་མེད་ཕྱིན་རང་ལུགས་གཏོད་སོ་མེད་པར་ཆགས་ཉེ་ཆེ་ཚུལ་དང་། ཡང་ནས་ཡང་དུ་དཔེ་ཆ་དང་འདྲིས་པར་བྱས་ན་ཤེས་ནས་དད་པ་ཐོབ་པ་ཞིག་ཡོང་རྒྱུ་ཡོད་ཅེས་གདམ་པར་མཛད།

རྒན་ཁོང་གི་སྐུ་ཚེ་ལོ་རྒྱུས་ཀྱི་རྡོ་རིང་ལྟ་བུ་དེ་ནི་གྲྭ་ས་རང་དུ་བཞུགས་ཤིང་བཞུགས་པ་ཙམ་མ་ཟད་གྲྭ་སའི་སློབ་གཉེར་བ་བརྒྱ་ཕྲག་བརྒལ་བ་གསོ་སྐྱོང་དང་གྲྭ་སའི་བསྟན་པ་ཉམས་མེད་བརྒྱུད་འཛིན་དང་དར་སྤེལ་གནང་ཡོད་པ་འདི་རང་ཡིན།

གོང་གི་རྒན་རིན་པོ་ཆེའི་རྣམ་པར་ཐར་པ་ཟུར་ཙམ་སྨྲས་འདི་ནི་ཁོ་བོའི་མཐོང་ཐོས་དབང་པོའི་མངོན་སུམ་དུ་གྱུར་པའི་གནད་ཅན་རགས་བསྡུས་ཙམ་ཡིན་གྱི་ཞིབ་ཅིང་ཕྲ་བ་ཞིག་ནི་ཁོ་བོ་ལྟ་བུ་ཞིག་གིས་བཤད་ཤེས་དང་འབྲི་ཐབས་མེད་པའི་ཚོད་དུ་ཡོད་ན། མི་སྙོབ་པ་ལ་ལག་སྙོབ་དེ་མ་བྱས་སོ།། ཆེད་དུ་བཤད་རྒྱུ་ཞིག་ལ་སྔ་སྲོལ་གྱི་རྣམ་ཐར་འབྲི་སྟངས་བཞིན་ཁ་ཡག་དང་ཚིག་ཡག་སྤུང་ཐབས་བྱས་མེད་ཅིང་། མ་མཐོང་བ་ལ་མཐོང་མདོག་དང་མ་དད་པ་ལ་དད་མདོག་དེའང་ཁོ་བོའི་གཤིས་སུ་མེད་པས་ན་གང་ཞིག་མཐོང་བ་དང་ཐོས་པ་དག་ཡི་གེར་ཕབ་པ་ཡིན་ནོ།།

སེར་བྱེས་ཏྲེ་བོ་སྲོང་བཙན་གྱིས་རྒན་རིན་པོ་ཆེའི་ཁྲི་འདོན་མཛད་སྒོ་ཉིན་རྟེན་འབྲེལ་མཚོན་སླད་དུ་སྤེལ།

ཆེན་དང་ཆེ་ཇི་ལྟར་འབྲི་དགོས།

བོད་སྐད་ཡིག་གི་མིང་ཚིག་འབྲི་ལུགས་རེ་འགའ་ཅུང་མགོ་རྙོག་པོ་དང་། སྟབས་བདེ་མིན་པར་ཡོད་ཅིང་དེ་དག་ཇི་ལྟར་འབྲི་དགོས་པའི་དཔྱད་རྩོམ་རེ་ད་བར་མ་མཐོང་ལ་འོན་ཀྱང་རང་ཉིད་ཐེ་བའི་མི་མང་པོ་ལ་ཉིན་རྒྱུན་དཀའ་ངལ་འཕྲད་ས་ཞིག་ཡིན་སྟབས་ཁོ་བོོས་འདིའི་ཐད་དཔྱད་ཞིབ་མི་ཉུང་བ་ཞིག་ལ་ཞིབ་འཇུག་བྱས་ཏེ་ལས་སླ་པོའི་ཐོག་ནས་འབྲི་ཐབས་ཤིག་སྟོན་ཁུལ་བྱས་ཡོད།

ཚིག་མཛོད་ཁག་ཏུ་ཆེན་པོའི་དོན་བཤད་དུས། ཆུང་བའི་ལྡོག་ཕྱོགས་སྤྱིར་བཏང་ཞེས་བྲིས་ཡོད་ཅིང་། རིགས་མཐུན་གཞན་ལས་ཆེ་བ། བོངས་ཚོད་དང་རྒྱ་ཁྱོན་སོགས་གཞན་ལས་ཆེ་བའི་དོན་ཡང་བྲིས་འདུག མཚན་གཞི་ལ། ལམ་ཆེན་པོ། ཆུ་ཆེན། ལམ་ཆེན། སོགས་དང་། ཡང་ལོ་ཚོད་མཐོ་བ་ལ་འཇུག་པ། དགུང་ལོ་ཆེན་པོ་དང་། ལོ་ཆེན་པོ། ངའི་ཨ་མ་ལོ་ཆེན་པོ་ཡིན། ལྟ་བུ། གོ་གནས་དང་དབང་ཆ་ཆེ་བའི་དོན་ལ་འཇུག་པ། བླ་མ་ཆེན་པོ། དཔོན་པོ་ཆེན་པོ། ལྟ་བུ་ཡིན།

ཆེན་པོ་ཟེར་དུས་ཆེ་ཆུང་གཉིས་གཤིབ་ནས་གང་ཞིག་ཆེ་བ་དེ་ངོས་འཛིན་པ་ཞིག་མིན་པར་སྤྱིར་བཏང་ནས་ཆེ་བའི་རིགས་ལ་གོ་དགོས་པ་འདུག དཔེར་ན། ས་ཆ་ཞིག་ལ་ཤིང་སྡོང་ཆེན་པོ་གཅིག་བུ་ཞིག་ཡོད་ཚེ་དེ་ལ་ཤིང་སྡོང་ཆེན་པོ་ཞེས་ལབ་ཆོག་པ་ཡིན། དེ་ནི་སྤྱིར་ཆེན་པོའི་རིགས་སུ་བཏོགས་པའི་རྒྱུ་མཚན་གྱིས་ཡིན།  འོན་ཀྱང་དེ་ལ་ཤིང་སྡོང་ཆེ་བ་ཞེས་ནི་མི་ཟེར་ཏེ། གལ་སྲིད་དེ་བཞིན་ལབ་ན་ས་ཆ་དེར་ཤིང་སྡོང་ཆེ་ཆུང་གཉིས་སམ་དུ་མ་ཡོད་པའི་གྲས་ནས་ཆེ་བ་ངོས་འཛིན་པ་ཞིག་ཆགས་འགྲོ་བ་ཡིན། དེ་བཞིན་བུ་ཆེ་བ་དེ། ཁང་པ་ཆེ་བ། ལམ་ཆེ་བ། སོགས་ནི་ཆེ་ཆུང་གཉིས་བསྡུར་ནས་ཆེ་བ་ངོས་འཛིན་པ་ཞིག་དང་། གལ་སྲིད་བུ་གཅིག་ལས་མེད་པ་ཞིག་ཡིིན་ན་བུ་ཆེ་བ་ཞེས་མི་ཟེར། དེ་མཚུངས་ཆེ་ཤོས་ཞེས་པའང་ན་ཡིག་མེད་པ་དེ་འབྲི་དགོས།

ཆེན་པོ་ཚིག་བསྡུ་བྱེད་པ། དཔེར་ན། ལམ་ཆེན།-ལམ་ཆེན་པོ། གལ་ཆེན།-གལ་ཆེན་པོ། འགངས་ཆེན།-འགངས་ཆེན་པོ། རླབས་ཆེན།-རླབས་ཆེན་པོ། པཎ་ཆེན།-པཎ་གྲུབ་ཏ་ཆེན་པོ། སྒྲ་ཆེན།-སྒྲ་ཆེན་པོ། བསྐལ་ཆེན།-བསྐལ་བ་ཆེན་པོ། མཁས་ཆེན།-མཁས་པ་ཆེན་པོ། ས་ཆ་ཧ་ཅང་རྒྱ་ཆེན་པོ་འདུག་ཅེས་པ་ཚིག་བསྡུ་བྱེད་དགོས་ཚེ། ས་ཆ་ཧ་ཅང་རྒྱ་ཆེན་འདུག་ཅེས་འབྲི་ཆོག་པ་ཡིན།

ཆེ་བའི་ཚིག་བསྡུ། ལམ་ཆེ།-ལམ་ཆེ་བ། གལ་ཆེ།-གལ་ཆེ་བ། འགངས་ཆེ།-འགངས་ཆེ་བ། རླབས་ཆེ།-རླབས་ཆེ་བ། སྒྲ་ཆེ།-སྒྲ་ཆེ་བ། བསྐལ་ཆེ།-བསྐལ་པ་ཆེ་བ། རྒྱ་ཆེ།-རྒྱ་ཆེ་བ། གནད་དོན་འདི་ནི་ཧ་ཅང་གལ་ཆེ་བ་ཞིག་ཡིན་ཞེས་པ་ཚིག་བསྡུ་བྱེད་ན། གནད་དོན་འདི་ནི་ཧ་ཅང་གལ་ཆེ་ཡིན་ཞེས་འབྲི་དགོས། རང་གིས་འབྲི་བ་ཙམ་མིན་པར་གཞན་གྱིས་བྲིས་པ་གོ་བ་ལེན་དུས་ཀྱང་གཅིག་མཚུངས་ཡིན། གལ་ཏེ་ཁྱེད་ཀྱིས་ཚིག་བསྡུ་འདི་དག་ཤེས་པར་བྱོས་དང་དུས་རྒྱུན་ཆེན་དང་ཆེ་གཉིས་ཇི་ལྟར་བེད་སྤྱོད་བྱེད་དགོས་མིན་ལེགས་པར་ཁོང་དུ་ཆུད་ཐུབ།

འདི་ནས་བཤད་དགོས་པ་ཞིག་ལ་ཆེན་མོ་ཞེས་པ་འདི་ཇི་ལྟར་འབྲི་དགོས་པའི་སྐོར་གྱི་དཔྱད་གཞི་ཞིག་མ་རྙེད་ལ། ཚིག་མཛོད་དུ། ཆེན་པོ་དང་དོན་འདྲ་ཞིང་གཙོ་བོར་ཆེད་དུ་བཏགས་པའི་མིང་མཐར་སྦྱོར་བ་ཞེས་འཁོད་འདུག། ལམ་རིམ་ཆེན་མོ། སློབ་གྲྭ་ཆེན་མོ། ནང་བསྟན་སློབ་གཉེར་ཁང་ཆེན་མོ། རྒྱུགས་སྤྲོད་ཆེན་མོ། ཚིག་མཛོད་ཆེན་མོ། སོགས་བེད་སྤྱོད་དང་ལག་ལེན་བྱེད་མུས་ཡིན། ངས་བསམ་ན་ནང་དོན་རྒྱ་ཆེ་ཆུང་སོགས་ཀྱི་དབང་ལས་ཆེན་མོ་ཞིག་བཏགས་ཀྱི་འདུག་སྙམ་སྟེ། སློབ་གྲྭ་ཆེན་པོ་ལབ་དུས་ཕྱིའི་བཀོད་པ་སོགས་རྒྱ་ཆེ་ཆུང་བཤད་པ་དང་། སློབ་གྲྭ་ཆེན་མོ་ཟེར་དུས་ཕྱིའི་བཀོད་པ་སོགས་མིན་པར་ནང་གི་སློབ་ཚན་དང་གནས་རིམ་སོགས་སློབ་ཆུང་དང་སློབ་འབྲིང་དག་ལས་ཆེ་བའི་རྒྱུ་མཚན་གྱིས་ཡིན། དེ་བཞིན་མདུན་རེ་རྒྱུགས་སྤྲོད་རེ་བཏང་བ་ལ་རྒྱུགས་སྤྲོད་དང་ལོ་འཁོར་རྒྱུགས་སྤྲོད་ལ་རྒྱུགས་སྤྲོད་ཆེན་མོ་ལྟ་བུ་ནང་དོན་གྱི་ཆ་ནས་ཆེན་མོ་འབྲི་མིན་ཐད་ལག་ལེན་དང་བེད་སྤྱོད་གཏོང་བཞིན་འདུག་སྙམ་པའོ།།

ཕྱི་ལོ་2016ལོ་འགོ་བྲིས་ཤིང་ཟླ་6-29ལ་བསྐྱར་བཅོས་དང་ཁ་གསབ་བྱས།

ཨེ་མོ་རི་ཚན་རིག་ཟབ་སྦྱོང་འགོ་བཙུགས་པ།

མི་ལོ་སུམ་ཅུ་ལྷག་གི་སྔོན་ནས་༸གོང་ས་མཆོག་གིས་ནང་པ་ཚོས་ཚན་རིག་སྦྱོང་གལ་ཆེ་ཚུལ་གྱི་བཀའ་སློབ་ཐེངས་མང་གནང་བ་ཙམ་མ་ཟད། འགྲོ་གྲོན་ཕོན་ཆེར་གནང་སྟེ་བོད་ཀྱི་དཔེ་མཛོད་ཀྱི་འགན་ཁུར་འོག དགེ་བཙུན་དད་གཉེར་ཅན་མི་ཉུང་བ་ཞིག་གིས། མི་ལོ་བཅུ་ལྷག་གི་རིང་དུ་ཚན་རིག་ཟུར་སྦྱོང་མཛད་དེ་སྐུ་ལས་གང་མང་སྐྱོན་པའི་གྲུབ་འབྲས་སུ། ཨེ་མོ་རི་གཙུག་ལག་སློབ་གཉེར་ཁང་དུ་དགེ་འདུན་པ་སྐོར་ཐེངས་གསུམ་ཕེབས་ཐུབ་པ་བྱུང་ཡོད་ཅིང་། 2013ལོ་རྒྱུས་ཐོག་ཏུ་བོད་ཀྱི་དགེ་འདུན་པ་སྐོར་ཞིག་གིས་ཨེ་མོ་རི་གཙུག་ལག་ཁང་ནས་སློབ་ཐོན་ལག་ཁྱེར་ལེན་པའི་མཛད་སྒོ་ཐོག་ཏུ་བགྲེང་སྟེ་ཐེངས་དང་པོའི་སློབ་ཐོན་ལག་ཁྱེར་བླངས་ཡོད། ཁོ་ཚོས་གྲས་ཀྱིས་ད་སྐབས་བོད་ཀྱི་དགོན་སྡེ་ཁག་ཏུ་ཚན་རིག་སློབ་དེབ་བསྒྱུར་སྒྲིག་དང་ཉིན་རེའི་སློབ་ཚན་ཁྲིད་རྒྱུ། དགེ་སྡེའི་ཚན་རིག་དང་འབྲེལ་བའི་ཕྱག་ལས་སྣ་མང་ལ་རྐང་འགན་ཁུར་བཞིན་ཡོད།

ད་དུང་༸གོང་ས་མཆོག་སྐུ་སྒེར་གྱིས་ཚན་རིག་པ་དག་དང་<སེམས་དང་སྲོག>གི་ལས་རིམ་དུ་ཐུགས་འགན་བཞེས་ཏེ་བགྲོ་གླེང་མཛད་བཞིན་ཡོད་ཅིང་། སྔ་ལོར་སེ་ར་དགོན་དུ་<སེམས་དང་ཚེ་སྲོག་>གི་བགྲོ་གླེང་ཐེངས་30པ་དེ་བསྐྱངས་ཡོད།

1987ལོར<སེམས་དང་ཚེ་སྲོག>ཚོགས་པ་གསར་འཛུགས་གནང་ཞིང་། ༸གོང་ས་མཆོག་ནི་ཚོགས་པ་འདི་གསར་འཛུགས་གནང་མཁན་གྱི་གྲས་ནས་གཅིག་ཡིན། ལྷག་པར་དུ་ད་བར་ཚོགས་པ་འདི་འཕེལ་རྒྱས་དང་རྒྱ་བསྐྱེད་ཡོང་བའི་གཞི་རྩ་ནི་ཁོང་ཆགས་ཡོད་ཅེས་འབྲེལ་ཡོད་ཡིག་ཆར་འཁོད་འདུག

ད་བར་<སེམས་དང་ཚེ་སྲོག>ཚོགས་པར་ཚོགས་མི་ཉིས་ཁྲི་རྒལ་བྱུང་འདུག་ཅིང་། ཚོགས་པ་འདིས་ཚན་རིག་དང་འབྲེལ་བའི་ཉམས་ཞིབ་དང་ལས་རིམ་སྣ་ཚོགས་ཤིག་གཉེར་ནས་འགྲོ་གྲོན་ཡང་ཨ་སྒོར་ས་ཡ་ལྔ་བཅུ་ང་ལྔ་ལྷག་ནར་གཏོང་བྱས།

བཀའ་སློབ་ཙམ་མིན་པར་བོད་ཀྱི་དགོན་སྡེ་དག་ཏུ་ཤུགས་རྐྱེན་ཡོང་ཐབས་སུ་<སེམས་དང་སེམས་སྲོག་>གི་བགྲོ་གླེང་གདན་ས་ཁག་ཏུ་འཚོག་རྒྱུ་བྱས་པ་སོགས་ལས་རིམ་གང་མང་དབུ་འཛུགས་མཛད་ནའང་བོད་ཀྱི་དགོན་སྡེ་ཁག་ཏུ་འགུལ་དཀྱོག་ཅིག་ཐེབས་མེད། མཐའ་མར་ཨུ་ཐུག་པ་ལྟ་བུས་གདན་ས་གསུམ་གཙོས་པའི་དགེ་ལྡན་པའི་དགོན་ཁག་དུ་མར་ཚན་རིག་འཛིན་གྲྭ་གསར་འཛུགས་དགོས་ཚུལ་དང་རི་བོ་དགེ་སྡེ་པའི་དགེ་ལུགས་རྒྱུགས་སྤྲོད་ཆེན་མོའི་ནང་དུ་ཚན་རིག་རྒྱུགས་སྤྲོད་འཇུག་དགོས་པའི་བཀའ་སློབ་ནན་ཆེར་ཕེབས་རྗེས་གདན་ས་གསུམ་དང་དགོན་སྡེ་མང་པོའི་ནང་དུ་དངོས་སུ་ཚན་རིག་འཛིན་གྲྭ་གསར་འཛུགས་དང་། སློབ་ཚན་བཀོད་བསྒྲིགས། སློབ་དེབ་ཆེད་བསྒྲིགས། དགེ་རྒན་ཐབས་འཚོལ་སོགས་བྱས་ཏེ་ཚ་ཚ་འུར་འུར་མ་བྱས་དཀའ་མེད་ཅིག་ལ་ཐུག་སྟེ་ཕྱི་ལོ་2012ལོར་དངོས་སུ་གདན་ས་གསུམ་དུ་ཚན་རིག་འཛིན་གྲྭ་གསར་འཛུགས་ཐུབ་པ་བྱུང་ཡོད།

སློབ་ཚན་དང་དགེ་རྒན་སོགས་ཀྱི་དཀའ་ངལ་ཙམ་མིན་པར་དགེ་འདུན་པར་ཚོར་ཚན་རིག་གི་རྨང་གཞི་ཨང་རྩིས་སོགས་ཀྱི་གཞི་རྩ་ཡག་པོ་མེད་རྐྱེན་སྐྱེ་དངོས་དང་རྫས་འགྱུར་ཚན་རིག་གཏིང་ཟབ་པོ་ཤེས་ཐབས་དཀའ་ཡང་ཐོག་མའི་ཚན་རིག་ངོ་སྤྲོད་དང་ཨང་རྩིས་རྒྱབ་ལྗོངས་སུ་མི་དགོས་པའི་རིག་ཚན་མང་པོ་སྦྱོང་པར་བྱས།

 ཕྱི་ལོ2014ནས་ཨེ་མོ་རི་དང་བོད་ཀྱི་ཚན་རིག་ཟུང་འབྲེལ་གྱིས། ཨེ་མོ་རི་ཚན་རིག་ཟབ་སྦྱོང་དབུ་འཛུགས་གནང་སྟེ་ཟླ་བ་གཅིག་གི་རིང་དུ་ཟབ་སྦྱོང་བྱེད་བཞིན་ཡོད་ཅིང་། འདི་ལོ་ཡང་ཕྱི་ཟླ་5ཚེས་18ནས་ཟླ་ངོ་གཅིག་གི་རིང་དུ་ཟབ་སྦྱོང་གནང་གཏན་ཁེལ་ཡོད། ད་ལོའི་ཨེ་མོ་རི་ཚན་རིག་ཟབ་སྦྱོང་ཐེངས་གསུམ་པ་གདན་ས་གསུམ་དུ་འཚོག་རྒྱུ་དང་། འདི་གར་སེ་ར་དགོན་དུ་ཟབ་སྦྱོང་དུ་བཞུགས་པའི་ཚན་རིག་འཛིན་གྲྭའི་ཁོང་ནས་འཛིན་གྲྭ་གསུམ་མཉམ་བཞུགས་དང་སེ་ར་བྱེས་སྨད་གཉིས། བཀྲིས་ལྷུན་པོ་བཅས་ནས་དགེ་འདུན་པ་332མཉམ་བཞུགས་གནང་བཞིན་ཡོད།

ཧིན་སྒོར་འབུམ་བཅུ་ལྷག་གི་འགྲོ་སོང་ཡོད་པའི་ཟླ་ངོ་གཅིག་གི་ཟབ་སྦྱོང་འདིར། ཨེ་མོ་རི་གཙུག་ལག་སློབ་གཉེར་ཁང་དང་དེ་མིན་གྱི་གཙུག་ལག་སློབ་གཉེར་ཁང་གི་འབུམ་རམས་པ་དང་ཉམས་ཞིབ་པ། སློབ་ཆེན་ཁག་གི་སློབ་དཔོན་ཆེན་མོའི་གོ་གནས་བཞེས་པའི་དགེ་རྒན་ཉི་ཤུ་ཙམ་ཆེད་ཕེབས་ཀྱིས་ཟབ་སྦྱོང་གནང་གི་རེད། སློབ་ཚན་དུ་ཚན་རིག་གི་ལྟ་གྲུབ། སྐྱེ་དངོས་ཚན་རིག དངོས་ཁམས་ཚན་རིག དབང་རྩའི་ཚན་རིག་བཅས་ཁྲིད་རྒྱུ་དང་། ཉིན་རེའི་སློབ་ཐུན་བཞི་རེ་དང་ཆུ་ཚོད་5་ལྷག་བཅས་གཏོང་དགོས་ལ། གཟའ་མཇུག་ཏུ་བདུན་གཅིག་གི་ཁྲིད་ཟིན་པ་ཁག་ལ་རྒྱུགས་སྤྲོད་གཏོང་དགོས།