photoshop cc 2018ནང་དུ་བོད་ཡིག་སྒྲིག་སྟངས།

photoshop cc 2018་ནང་དུ་བོད་ཡིག་སྒྲིག་སྟངས་པར་རིས་ལམ་ནས་འགྲེལ་བཤད་བྱས་ཡོད་པས་གཤམ་འཁོད་པར་ལ་བལྟས་ཏེ་སྒྲིགས་རོགས་ཞུ།

Torrent དྲ་ཚིགས་སྤྱད་དེ་གློག་བརྙན་སོགས་ཕབ་ལེན་བྱེད་ཚུལ། (བརྙན)

Torrent དྲ་ཚིགས་ནི་གློག་བརྙན་དང་མཉེན་ཆས་སོགས་ཡིག་ཆ་མང་པོ་ཞིག་རིན་མེད་དུ་ཕབ་ལེན་ཐུབ་པའི་དྲ་ཚིགས་ཧ་ཅང་ཕན་ཐོགས་ཅན་ཞིག་ཡིན། རིན་ཡོད་ཀྱི་བརྙན་དང་ཡིག་ཆ་མང་པོ་ཞིག་འདི་ནས་རིན་མེད་ངང་ཕབ་ལེན་བྱ་ཐུབ་ཀྱི་ཡོད། ད་རེས་ངེད་ཀྱིས་བརྙན་ལམ་ནས་Torrent དྲ་ཚིགས་སྤྱད་དེ་ལྟད་མོ་རིགས་ཕབ་ལེན་བྱེད་སྟངས་སྐོར་སྟབས་བདེ་ཞིག་བསྟན་ཡོད་པས་སྐུ་ཉིད་ཀྱིས་ལྟད་མོ་དེ་ལྟ་ཙམ་གྱིས་དང་ཕན་ཐོགས་གཏན་གཏན་ཡོད།
དྲ་ཚིགས་འདིའི་སྐོར་བོད་ཡིག་གི་ལམ་ནས་རྒྱུས་ལེན་བྱ་འདོད་ན་དྲ་སྣེ་http://www.sonamdawa.com/2013/05/torrent.htmlའདི་ནས་གཟིགས་རོགས། དེ་མིན་གྱི་Torrent དྲ་ཚིགས་ལེགས་ཤོས་བཅུ་ཞེས་པ་རྩོམ་ཡིག་དེའང་འདི་ནས་གཟིགས་ཐུབ།http://www.sonamdawa.com/2015/04/blog-post_10.html

རྗེ་ཙོང་ཁ་པའི་རྣམ་ཐར་ཕྱོགས་བསྒྲིགས་འཕྲུལ་དེབ་སྤུས་ལེགས་གཉིས།

རྗེ་ཙོང་ཁ་པའི་རྣམ་ཐར་ཕྱོགས་བསྒྲིགས་འཕྲུལ་དེབ་PDFསྤུས་ལེགས་གཉིས།

1. འཕྲུལ་དེབ་དང་པོའི་ནང་དུ་རྣམ་ཐར་ཚན་པ་29དང་ཤོག་གྲངས་647
2. འཕྲུལ་དེབ་གཉིས་པའི་ནང་དུ་རྣམ་ཐར་ཚན་པ་15དང་ཤོག་གྲངས702འདུག

• གསལ་བཤད་དུ། འཕྲུལ་དེབ་ཏུ་སྒྲིག་མཁན་སུ་ཡིན་རྩད་མ་ཆོད་པས་མཚན་སོགས་འགོད་ཐབས་མ་བྱུང་།

འཕྲུལ་དེབ་དང་པོ་ཕབ་ལེན།

འཕྲུལ་དེབ་གཉིས་པ་ཕབ་ལེན།

རྗེ་ཙོང་ཁ་པས་རྒྱ་ནག་གོང་མ་ལ་བསྩལ་བའི་ཆབ་ཤོག

ཁམས་པའི་རྩོམ་རིག་དགའ་ཚལ་གྱི་འཕྲིན་སྟེགས་ལས་དྲངས།

ཨོཾ་བདེ་ལེགས་སུ་གྱུར་ཅིག 

རླབས་པོ་ཆེའི་བསོད་ནམས་ཀྱི་མཐུ་ལ་བརྟེན་ནས་ས་ཆེན་པོ་རྒྱ་མཚོའི་མཐར་ཐུག་པར་ཚུལ་བཞིན་སྐྱོང་བའི་མིའི་དབང་པོ་ཆེན་པོའི་སྤྱན་སྔར། ནུབ་ཕྱོགས་གངས་ཅན་གྱི་ཁྲོད་ཡུལ་དབུས་ཀྱི་ཆ་ན་གནས་པའི་ཤཱཀྱའི་དགེ་སློང་བློ་བཟང་གྲགས་པའི་དཔལ་གྱིས་ཞུ་བ། 

ཆོས་ཀྱི་རྒྱལ་པོ་ཆེན་པོའི་བསོད་ནམས་རི་རབ་ལྷུན་པོ་ལྟར་འཕང་མཐོ་ཞིང་བཀའ་འབངས་རྣམས་ཀྱི་བདེ་སྐྱིད་ལྷ་ཡུལ་ལྟར་ཕུན་སུམ་ཚོགས་པར་བཀའ་ལུང་གཉན་པོ་རྒྱལ་ཕྲན་དུ་མས་སྤྱི་བོས་ལེན་པར་བཞུགས་པའི་སྐབས་ནས། དཀོན་མཆོག་གསུམ་གྱི་མཐུ་སྟོབས་བསྐྱེད་པའི་ཕྱིར་དུ་ལུང་གིས་འདི་ཕྱོགས་སུ་མངགས་པའི་གསེར་ཡིག་པ་རྣམས་ཀྱིས་འཇའ་ས། མེ་ཏོག་ཞིབ་མོ་སྤྲིན་རིས་ཡོད་པའི་གོས་ཡུག་དམར་པོ་གཅིག་དང་། ལྗང་གུ་ཡུག་གཅིག མེ་ཏོག་མེད་པའི་གོས་ཡུག་དམར་པོ། སྔོན་པོ། ལྗང་གུ་ཡུག་གསུམ་དང་། དར་མདོག་ཅན་ཡུག་བདུན། གོས་ཆེན་གྱི་ཆོས་གོས། ཕྱག་ཚེ། གོང་ཐུང་། རིང་འགག ཐང་ཐེབ། ཆུ་ཤེལ་གྱི་ཕྲེང་བ། རྡོ་རྗེ་དྲིལ་བུ་བུབས་གཉིས། དཀར་ཡོལ་གཉིས། རྟེན་ཁེབས་གཉིས། ལག་ཕྱིས་གསུམ། པང་ཁེབས་མཎྜལ་གྱི་རྒྱན་གསུམ། སྐ་རགས། ཏིང་ཤགས་བུབས་གཉིས། ལྷམ་འབོག་དང་བཅས་པ། ཇ་རྒྱ་མ་ལྔ་བཅུ། ཙན་དན་དུམ་གཅིག་གི་གནང་སྦྱིན་དང་བཅས་པ་འདིར་འཕྲོད་པས་ཐུགས་ལ་བཏགས། 

གོང་མ་ཆེན་པོའི་ཐུགས་ཀྱི་དགོངས་པ་ལ། ངེད་དེ་ཕྱོགས་སུ་ལན་ཅིག་འོང་བགྱིས་གསུང་བ་ཡིན་ཟེར་བའི་ལུང་བུད་པའི་རྒྱུ་མཚན་གསེར་ཡིག་པ་རྣམས་དང་། ཝང་གིས་ནན་གྱིས་གསུང་འབྱོན་ཡིན་འདུག་པའི་དོན་ཁོང་དུ་ཆུད། སའི་བདག་པོ་ཆེན་པོས་སངས་རྒྱས་ཀྱི་བསྟན་པ་ལ་དགོངས་པའི་ལུང་ཡིན་པར་འདུག་པ་མ་ག་ཞིང་ལུང་བུད་ལ་མ་གུས་པ་དང་། བརྙས་པ་བྱས་པ་མ་ལགས་ནའང་། མི་མང་པོ་དང་ནམ་ཕྲད་པའི་དུས་རྣམས་སུ་ནད་དྲག་པོ་འབའ་ཞིག་འོང་བ་བྱུང་བའི་དོན་གྱིས། བཀའ་ལུང་བཞིན་དུ་བསྒྲུབ་བར་མ་ནུས་པ་ལ་ནམ་མཁའ་དང་འདྲ་བར་ཟབ་ལ་ཤིན་ཏུ་རྒྱ་ཆེ་བའི་ཐུགས་ཀྱིས་མི་དགྱེས་པ་མི་མཛད་པ་ཐུགས་ལ་འདོགས་པར་ཞུ། སྔོན་གྱི་དུས་སུ་བྱོན་པའི་ཆོས་རྒྱལ་ཆེན་པོ་རྣམས་ཀྱིས་འཇིག་རྟེན་འདིའི་ཁྲིམས་ལུགས་དང་འཇིག་རྟེན་ཕྱི་མའི་ཆོས་ལུགས་ཕྱོགས་ཐམས་ཅད་དུ་ལེགས་པར་དར་བའི་ཐུགས་ཀྱི་ཁུར་ཆེན་པོ་བསྣམས་འདུག་པའི་ལུང་བཞིན་དུ། ད་ལྟའི་དུས་སུ་གོང་མ་ཆེན་པོའི་ཐུགས་དགོངས་རྣམ་པར་དག་པ་དང་མཛད་པ་འཕྲིན་ལས་ངོ་མཚར་བས་ལྷ་དང་བཅས་པའི་འཇིག་རྟེན་གྱི་ཡིད་མགུ་བར་བྱེད་པའི་གཏམ་སྙན་པོ་ཡང་དང་ཡང་དུ་ཐོས་པས། བདག་ཅག་འདི་ཕྱོགས་ན་ཡོད་པའི་རབ་བྱུང་དྲག་པ་ཕལ་མོ་ཆེས། གོང་མ་ཆེན་པོའི་སྐུ་ཚེ་དང་རྒྱལ་སྲིད་ཡུན་རིང་དུ་བརྟན་པའི་སྨོན་ལམ་རྣམ་པར་དག་པ་ཡང་དང་ཡང་དུ་འདེབས་ཀྱིན་ཡོད་པའི་ཚུལ་འདི་དགོངས་པར་ཞུ་ཞིང་། དེ་ལྟར་ཡིན་ལགས་ན་དེ་ལ། ས་སྐྱོང་ཆེན་པོའི་འཕྲིན་ལས་ཀྱིས་ཇི་ལྟར་སྐྱོང་། ཆོས་ཀྱི་རྒྱལ་པོ་ཉིད་ཀྱིས་མཁྱེན་པས། བདག་ཅག་འདྲ་བས་ཞིབ་ཏུ་མི་སྤོབས་ལགས། 

གུས་པས་ཕུལ་བའི་ཞུ་ཡིག སྤྱན་ལམ་དུ་བབ་པའི་ཐབས་ཀྱི་རྟེན་མཚོན་པར། ལིའི་ཡུལ་ནས་སྤྱན་དྲངས་པའི་སྤྱན་རས་གཟིགས་ཀྱི་སྐུ་གཅིག བཅོམ་ལྡན་འདས་ཤཱཀྱ་ཐུབ་པའི་གསེར་སྐུ་གཅིག དེ་བཞིན་གཤེགས་པ་འཇམ་དཔལ་གྱི་གསེར་སྐུ་གཅིག དེ་བཞིན་གཤེགས་པའི་རིང་བསྲེལ་འཕེལ་བཞིན་པ་གསུམ་སྦྲེལ་གཅིག ཡང་དེ་བཞིན་གཤེགས་པའི་རིང་བསྲེལ་གཅིག རྒྱ་གར་གྱི་གྲུབ་ཆེན་རྒྱ་དང་བོད་གཉིས་ཀར་སངས་རྒྱས་ཀྱི་བསྟན་པ་དར་རྒྱས་སུ་མཛད་པའི་སྐུ་དྲིན་ཅན་ཇོ་བོ་ཆེན་པོ་ལྷ་ཞིག་གི་གདུང་རུས་ལས་བྱོན་པའི་རིང་བསྲེལ་གཅིག་རྣམས་ཕུལ། 

བྱི་བ་ལོ་ཟླ་བ་དྲུག་པའི་ཚེས་བཅུ་དགུ་ལ་ཡུལ་དབུས་ནས་ཕུལ་བའི་ཞུ་ཡིག

ཕྱི་ཕྲེད་ན་ཅི་ཞིག་ཡོད།

དུས་ཀྱི་ཕྲེང་ཐག་ཆད་པའི་ཕྱི་ཕྲེད་ན།།
མུན་པས་མུན་པ་དེད་དེ་འཕྱོ་ཞིང་བཞུར།།
ཉི་མའི་ཁ་ངོ་རུབ་ཅིང་རྐང་རྩེ་འདར།།
རི་ཉལ་ཐག་རིང་དེ་ན་ཅི་ཞིག་ཡོད།།

སྲ་འཐས་ཆར་རླུང་འུར་པོས་སྦང་ནས་བརླན།།
ལམ་ནག་གྱ་མ་གྱུ་དེ་ནུར་ཅིང་གོག།
ཤིང་ལོ་ཐུར་ལ་འཛར་བའི་ཚུགས་ཀ་ན།།
སེམས་ཀྱིས་ཁོག་པ་མེད་ལུགས་ཅི་ཞིག་ཡོད།


གྲིབ་ཡོར་རིང་ནས་རིང་དུ་བསྣར་བའི་ཚེ།།
རང་ལུས་འདོམ་ལ་གཞར་བའི་ཚད་ཀྱང་དཀའ།།
རྟིང་པ་འདམ་ལ་ཟུག་པའི་མཁར་ཤུལ་དེར།།
བཤད་ན་རྫོགས་མཐའ་མེད་པ་ཅི་ཞིག་ཡོད།།

ལྷམ་མཐིལ་ས་ལ་རེག་པའི་རྡིག་སྒྲ་མཉན།།
མཚན་མའི་སྨག་ཏུ་མགྲོན་ལ་འདུར་བ་ཚོ་།།
ནུབ་ཀྱི་ལམ་སྣེར་ཐོགས་ནས་ནུབ་ལ་བཤར།།
ནགས་ཚལ་སྟུག་པའི་ཕ་ན་ཅི་ཞིག་ཡོད།།


གླང་རྭས་ནམ་མཁའ་འབིག་པའི་ཕྲེད་ལམ་ན།།
རས་ལྷེ་བརླ་རྩ་རྫིང་བའི་རྒན་པོ་འགོས།།
ཙ་འཇམ་རྡོག་པས་བཙུར་བཞིན་དལ་མོ་སོང་།།
དེའུ་འབུར་ཡ་གི་ཕག་ན་ཅི་ཞིག་ཡོད།།

སྤྲིན་གནག་ཚོམ་བུ་མགོ་བོའི་དབྱིབས་སུ་སྐྱེས།།
མགོ་བོ་གས་ནས་བར་སྣང་ཧུབ་འཇུབ་བྱས།།
དེ་མ་དེ་མར་ཆུ་ཐིགས་ལྷུང་ནས་བྱུང་།།
ཆུ་ཐིགས་ཡན་ན་ཨུ་ཚུགས་སུ་ལ་ཡོད།
2017-8-21ཕྱི་ཕྲེད།


པར་པ། རང་ཉིད།

ཨ་མའི་བུ་ལ་ཡོན་ཏན་ཡོད་ན་དགའ་ལྡན་ཁྲི་ལ་བདག་པོ་མེད།

(ཕྱི་ལོ 1935 ལོར་གཙང་ལྷ་རྩེར་སྐུ་འཁྲུངས།)


ཨ་མའི་བུ་ལ་ཡོན་ཏན་ཡོད་ན་དགའ་ལྡན་ཁྲི་ལ་བདག་པོ་མེད། གཏམ་དཔེ་འདི་ནི་བོད་མི་ཚོའི་ཁ་ལ་རླུང་ལྟར་གྲགས་པའི་གྲགས་ཅན་གཏམ་དཔེ་ཞིག་ཡིན་ཅིང་། ནང་དོན་ཡང་ཧ་ཅང་ཕུན་སུམ་ཚོགས་པ་ལྡན་ཡོད། གཏམ་དཔེ་འདིའི་འབྱུང་རྩ་ནི་རི་བོ་དགེ་ལྡན་པའི་བསྟན་པའི་བདག་པོ་རྗེ་ཙོང་ཁ་པ་དགོངས་པ་གཞན་དོན་དུ་བཤེགས་རྗེས། རྗེ་ཉིད་ཀྱི་ཚབ་གནང་སྟེ་དགེ་ལྡན་པའི་ལྟ་སྒོམ་སྤྱོད་གསུམ་གཙང་མ་རྒྱུན་འཛིན་དང། རྗེས་སྲོལ་བཟང་གཏོད་པའི་ཀློག་པ་ཐོས་བསམ། སྤང་བ་བསམ་གཏན་བྱེད་བཞིན་པའི་དགེ་ལྡན་པའི་ཆོས་ཕྱོགས་ཀྱི་ཐུགས་འགན་ཡོངས་རྫོགས་བཞེས་པའི་ཆོས་ཀྱི་དབུ་ཁྲིད་ཅིག་བསྐོ་སྲོལ་བྱུང་བ་འདི་ལ་ཐུག་ཡོད།

རྗེ་ཙོང་ཁ་པ་ཞི་བར་བཤེགས་རྗེས་རྗེའི་ཁྲི་ཚབ་དང་པོ་གནང་མཁན་ནི་རྒྱལ་ཚབ་དར་མ་རིན་ཆེན་ཡིན་ཞིང་ཁོང་གིས་ལོ་བཅུ་གཅིག་རིང་དུ་ཁྲི་པ་གནང་བས་རྒྱལ་ཚབ་རྗེའམ་རྒྱལ་ཚབ་དར་མ་རིན་ཆེན་ཞེས་མཚན་ཟུར་ན་རྒྱལ་ཚབ་ཀྱི་མཚན་གནས་ཀྱང་ཐོགས་ཡོད་ཅིང་། ཁོང་གི་སྐུ་འདྲ་བཞེས་དུས་དབུ་སྐྲ་དཀར་པོ་དང་ཞལ་འགུལ་སོགས་གཉེར་མས་ཁེངས་པ་ཞིག་བཞེས་དོན་ཡང་ཁོང་ཉིད་ལ་གུས་བཀུར་མཚོན་བྱེད་ཅིག་ཡིན་ནམ་སྙམ། 

སྐབས་འདི་ནས་དབུ་བཙུགས་ཏེ་དགའ་ལྡན་ཁྲི་པའམ་མཚན་ཆ་ཚང་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་། རྒྱུན་སྤྱོད་མཚན་ནི་དགའ་ལྡན་ཁྲི་རིན་པོ་ཆེ་ཞེས་ཡོངས་སུ་གྲགས་པ་དེ་བྱུང་བ་ཡིན། ད་བར་དགའ་ལྡན་ཁྲི་རབས་༡༠༤བྱུང་ཞིང་མི་རིགས་དང་རྒྱལ་མཚམས་མེད་པར་བསླབ་པ་རྒན་རིམ་བཞིན་དགའ་ལྡན་ཁྲི་པའི་མཚན་གནས་ཐོབ་ཀྱི་ཡོད་པས་ཨ་མའི་བུ་ལ་ཡོན་ཏན་ཡོད་ན་དགའ་ལྡན་ཁྲི་ལ་བདག་པོ་མེད་ཟེར་བའི་གཏམ་དཔེ་དེ་ཡང་ཧ་ཅང་དོན་ལ་གནས་ཡོད།

ཁྲི་རབས་བརྒྱ་དང་བཅུ་མེད་བཞིའི་ནང་དུ་ཕེབས་པ་དག་གྲྭ་རྐྱང་སློབ་གཉེར་བ་ཤ་སྟག་ཡིན་ཞེས་བཤད་ཆོག་པ་ལྟ་བུ་ཡིན། བླ་ཆེན་རེ་ཟུང་གིས་ཁྲི་པ་གནང་ཡོད་རུང་ཁོང་དག་ཀྱང་བླ་ཆེན་ཡིན་པས་མཚན་གནས་གནང་བཞག་པ་ཞིག་མ་ཡིན་པར་སློབ་གཉེར་ལེགས་པོར་བྱས་ཏེ་མཁས་གྲུབ་གཉིས་ལྡན་གྱི་སྐྱེས་བུའི་གྲལ་ལ་བསྡད་དེ་དགའ་ལྡན་ཁྲི་པའི་མཚན་གནས་ཐོབ་པ་ཞིག་ཡིན།

གསར་དུ་བསྐོ་བཞག་བྱུང་མ་ཐག་པའི་དགའ་ལྡན་ཁྲི་ཆེན་རྡོ་རྗེ་འཆང་སེར་བྱེས་གཙང་པ་རྗེ་བཙུན་བློ་བཟང་བསྟན་འཛིན་ནི་ཁྲི་རབས་ ༡༠༤ པ་དེ་ཆགས་ཡོད་ཅིང་། ཁོང་ནི་གྲྭ་རྐྱང་ཞིག་གི་གནས་བབས་ནས་སློབ་གཉེར་ལེགས་པོར་བྱས་ཤིང་གདན་སའི་དཔེ་ཁྲིད་དགེ་རྒན་སོགས་གནང་སྟེ་གྲྭ་པ་གྲྭ་རྐྱང་ཞིག་གི་བཞུར་ལམ་རང་ནས་འོད་དུ་འཚེར་བ་ཞིག་ཡིན། མདོ་སྔགས་གཉིས་ཀ་ལ་མཁྱེན་རྒྱ་ཆེ་བ་མ་ཟད་འཚོ་བ་རྒྱས་སྤྲོས་མེད་པར་གྲྭ་རྐྱང་ལྟ་བུས་བཞུགས་མཁན་ཞིག་ཡིན་པ་འདི་ནི་དེང་གི་མིག་དཔེར་འཛིན་འོས་པ་ཞིག་ཡིན།

སེར་བྱེས་གྲྭ་ཚང་ལ་དགའ་ལྡན་ཁྲི་རབས་བཅོ་ལྔ་པཎ་ཆེན་བསོད་ནམས་གྲགས་པ་ནས་དབུ་བཙུགས་ཏེ་ཁྲི་རབས་ ༡༠༤ རྗེ་བཙུན་བློ་བཟང་བསྟན་འཛིན་བར་དགའ་ལྡན་ཁྲི་པ་ ༡༦ ཕེབས་མྱོང་ཞིང་། བྱེས་གཙང་པ་ཁང་ཚན་ནི་ཁང་ཚན་ཆུང་གྲས་ཤིག་ཡིན་རུང་རྗེ་བཙུན་བློ་བཟང་བསྟན་འཛིན་ཁོང་ཉིད་བརྩིས་པའི་དགའ་ལྡན་ཁྲི་པ་ལྔ་བྱུང་མྱོང་བའང་ཁང་ཚན་དེའི་གཟི་བརྗིད་ཅིག་ལ་བརྩི་འོས།

རྒྱ་དཀར་ནག་གི་གདོང་ཐུག་ལས་དབུ་མའི་ལམ་ལ་མཛད་དཀའ་ཡོང་ངེས།

དབུ་མའི་ལམ་ནི་རྒྱ་ནག་གོང་བུ་གཅིག་གྱུར་ཁས་ལེན་པའི་ཐབས་ལམ་ཞིག་ཡིན་སྟབས་རྒྱ་ནག་དང་འབྲེལ་ལམ་བཟང་བའི་རྒྱལ་ཁབ་ཚོས་བོད་ཀྱི་དཀའ་རྙོག་ལ་ལག་པ་འཆང་རྒྱུ་ཅུང་སྟབས་བདེ་པོ་ཡོད། རྒྱ་ནག་གོང་བུ་གཅིག་གྱུར་ནི་རྒྱ་ནག་གི་ཚོང་འབྲེལ་ཚུན་གྱི་དཔལ་འབྱོར་དང་ཆབ་སྲིད་ཀྱི་གཞི་རྩའི་རྨང་གཞི་དེ་ཡིན་པས་དེ་ཉིད་ཁས་ལེན་མ་ཐུབ་ཚེ་རྒྱལ་ཁབ་བར་སྐད་ཆ་ཙམ་ཡང་བཤད་ས་ལྷག་མེད་ཅེས་རྒྱ་ནག་གིས་མཐའ་ལ་བཀར་བཞིན་ཡོད་ཅིང་། ཨ་རི་སྲིད་འཛིན་ཊོམ་གྱིས་ཀྱང་ཐ་མར་རྒྱ་ནག་གཅིག་ཁས་ལེན་བྱེད་ཀྱི་ཡིན་ཞེས་ཡོངས་གྲགས་བྱེད་དགོས་ཐུག་པའི་གནས་ཚུལ་ཡང་ཐོན་མྱོང་ཡོད་པ་རེད། རྒྱ་ནག་གི་དཔལ་འབྱོར་སྟོབས་ཤུགས་དེས་ཤར་ནུབ་ཡོངས་ལ་ཁྱབ་པ་ཙམ་མ་ཟད་སྟོབས་ཤུགས་དེས་རང་ཉིད་ཀྱི་སྲིད་དབང་སྲ་བརྟན་དང་བོད་དང་ཐེ་ཝན་སོགས་ཀྱི་གནད་དོན་ཡང་རང་འདོད་ལྟར་སྡོམ་བཅུར་བཟོ་ཐུབ་པའི་ཐབས་ལམ་ཞིག་ཏུ་བེད་སྤྱོད་གཏོང་རྒྱུར་རེ་བ་དང་དམིགས་ཡུལ་ཆེན་པོ་བཟུང་ཡོད། ནུབ་ཕྱོགས་ཀྱི་དཔལ་འབྱོར་ཉམས་ཉེས་ཚབས་ཆེན་བྱུང་བ་ནས་འགོ་ཚུགས་ཏེ་རྒྱ་ནག་གི་དཔལ་འབྱོར་སྟོབས་ཤུགས་རྒྱ་སྐྱེད་བྱུང་ཞིང་དེ་དང་མཉམ་དུ་ཆབ་སྲིད་ཀྱི་ལག་པ་ཡང་ཇེ་རིང་སོང་ནས་བོད་དང་ཐེ་ཝན་སོགས་ཀྱི་གནད་དོན་ཡང་རང་ཉིད་ཀྱི་ལག་འོག་ཏུ་འཚུད་ཐབས་ལ་རེ་བ་ཆེ་རུ་སོང་ཡོད། ཞི་བའི་དོན་ཚན་ལྔ་ནས་ཀྲུང་གོའི་རྩ་ཁྲིམས་ཁས་ལེན་བྱེད་པའི་འགྱུར་འགྲོས་ཆེན་པོ་དེ་ནི་རྒྱ་ནག་གི་དཔལ་འབྱོར་སྟོབས་ཤུགས་ཀྱིས་མཐའ་ལ་བཀའ་བའི་བཙན་མནན་འོག་ནས་འགྲོ་ལམ་མེད་པའི་ཐབས་ལམ་དེ་མ་འཚོལ་དཀའ་མེད་ཆགས་པའི་གནས་ཚུལ་སྐྱོ་པོ་ཞིག་གི་དཔེ་མཚོན་དེ་ཆགས་ཡོད། 

རྒྱ་དཀར་ནག་བར་གདོང་ཐུག་དེ་ཇེ་ཉེ་དང་ཛ་དྲགས་པའི་གནས་བབ་དེ་ལོ་རེ་བཞིན་ཇེ་སྡུག་ཏུ་འགྲོ་བཞིན་པའི་དུས་སྐབས་འདི་འདྲ་ལ་ཕྱོགས་གཉིས་ཀས་བེད་སྤྱོད་གཏོང་རྒྱུ་གང་ཡོད་ལ་ལག་པ་འཆང་འགོ་བཙུགས་ཡོད་ཅིང་། ཇ་མུ་ཀ་ཤི་མིར་ནི་རྒྱ་ནག་གིས་རང་ལག་གི་དབྱུག་པ་བྱས་ཏེ་རྒྱ་གར་ལ་ཚུལ་རྒོལ་བྱེད་ཆོག་པའི་ལག་ཆ་ཡག་པོ་ཞིག་ཡིན་པས་ཉེ་ཆར་རང་དུ་རྒྱ་ནག་གིས་ཇ་མུ་ཀ་ཤི་མིར་རང་བཙན་འཐབ་རྩོད་ལ་རྒྱབ་སྐྱོར་བྱེད་སྲིད་པའི་ཉེས་བརྡ་བཏང་བ་བྱུང་ཡོད། དེ་བཞིན་རྒྱ་གར་གྱིས་ཀྱང་༸གོང་ས་མཆོག་མོན་ཡུལ་དུ་ཕེབས་བཅུག་པ་ཙམ་མ་ཟད་ཆིབས་སྒྱུར་དང་མཛད་རིམ་ཁག་དེ་སྔ་བྱུང་མ་མྱོང་བའི་རྒྱ་གར་གྱི་གསར་ཁང་ཁག་གིས་སྦིར་གྲགས་དང་མོན་ཡུལ་ནི་རྒྱ་གར་གྱི་ས་ཁོངས་འཁྲུལ་མེད་ཡིན་ཚུལ་གསལ་པོར་སྟོན་ཐབས་བྱས་ཡོད། སྤང་མགོ་མཚོ་ཁར་བོད་ཀྱི་རྒྱ་དར་སྒྲེངས་བའི་གནས་ཚུལ་དེ་གསར་པ་ཞིག་ནམ་ཡང་མིན་རུང་ད་ལོའི་རྒྱ་དར་སྒྲེངས་འཛུགས་དེ་སྦིར་གྲགས་ཆེན་པོ་བྱུང་བའང་རྒྱ་གར་གྱིས་བེད་སྤྱད་དེ་རྒྱ་ནག་ལ་རྣམ་འགྱུར་སྟོན་པའི་ཆབ་སྲིད་ཀྱི་ཐབས་ཇུས་ཤིག་ལས་བྱུང་བ་ཡིན་པར་གསལ་པོ་རེད།  སྐུ་ཞབས་ཀོ་ཤཱེ་ཡཱ་རེས་སྒེར་གྱི་བསམ་ཚུལ་བརྒྱུད་བོད་རང་བཙན་ལ་རྒྱ་སྐྱོར་བྱེད་སྲིད་ཅེས་ཉེན་བརྡ་བཏང་བ་ནི་མ་འོངས་པའི་རྒྱ་གར་གཞུང་གི་ལངས་ཕྱོགས་ཤིག་ལ་མི་འགྱུར་བར་སུས་ཀྱང་བརྗོད་མི་ཐུབ་ལ་ད་ཡོད་ཀྱི་རྒྱ་དཀར་ནག་གི་གནས་ཚུལ་ལ་གཞིགས་ན་རིང་པོ་མི་ཐོགས་པར་རྒྱ་གར་གྱི་བོད་ལ་འཛིན་པའི་གཞུང་སྲིད་ལ་འགྱུར་ལྡོག་ཆེན་པོ་ཞིག་འགྲོ་རྒྱུ་ངེས། 

དབུ་མའི་ལམ་ནི་བོད་ཀྱི་བདག་དབང་ཁྲིམས་མཐུན་གྱི་ཐོག་ནས་རྒྱ་ནག་ལ་སྤྲོད་རྒྱུའི་སྲིད་ཇུས་ཞིག་ཆགས་ཡོད་སྟབས་དབུ་ལམ་གྱི་ཐོག་ནས་བོད་ཀྱི་དཀའ་ངལ་ཡོངས་སུ་སེལ་མཚམས་རྒྱ་ནག་ལ་སྔར་བྱུང་མ་བའི་ས་ཁོངས་བདག་དབང་དང་ཨེ་ཤ་ཡའི་ཆུ་བོ་ཀུན་གྱི་མགོ་ཁུངས་ཡིན་པའི་བོད་ཀྱི་ས་ཆེན་དེ་ཁྲིམས་མཐུན་གྱི་ཐོག་ནས་ཐོབ་བཞིན་ཡོད་སྟབས་འདི་ནིི་རྒྱ་གར་མཚོན་ན་མཐོང་མི་འདོད་པའི་གནས་བབ་ཅིག་ཡིན། 

རྒྱ་དཀར་ནག་བར་ཅི་ཙམ་འགལ་ཟླ་ཇེ་ཆེ་འགྲོ་ན་དབུ་མའི་ལམ་ལ་དཀའ་ཁག་འབྱུང་རྒྱུ་གཏན་འཁེལ་ཡིན་ཅིང་། སྟབས་ཉེས་ན་རྒྱ་ནག་ལ་དབུ་ལམ་གྱི་ཐོག་ནས་གྲོས་མོལ་བྱེད་པའི་འགོག་རྐྱེན་བྱེད་མཁན་གཙོ་བོ་རྒྱ་གར་ཆགས་སྲིད་པས་བཙན་བྱོལ་སྒྲིག་འཛུགས་དང་རྒྱ་གར་ནང་གི་བོད་པ་སྐྱབས་བཅོལ་བ་ཚོ་ཕར་ཡང་མི་གློད་ཚུར་ཡང་མི་འཛིན་པའི་དཀའ་ངལ་ཞིག་འོག་ནས་བཀག་སྡོམ་ཆེན་པོ་ཞིག་ཡོང་ཉེན་འདུག སྐབས་དེ་འདྲ་ལ་ནུབ་ཕྱོགས་སུ་འགྲོ་བསམ་ན་འཕུར་མི་བཅུག །སྡོད་ན་བསམ་ན་ད་ཡོད་ཀྱི་ཐོབ་ཐང་ཕྱིར་བསྡུ་དང་དམ་དྲག་ཇེ་ཆེར་གཏོང་ངེས་པས་རང་རེ་སྒྲིག་འཛུགས་དང་མི་མང་གཉིས་ཀ་ཧ་ཅང་དཀའ་ཚེགས་ཤིག་འོག་ཏུ་གནས་རྒྱུ་ངེས་པས། ད་སྐབས་ནས་གནས་ཚུལ་ཇེ་སྡུག་སོང་ན་སྒྲིག་འཛུགས་གནས་ཡུལ་རྒྱ་ཁབ་གསར་པ་ཞིག་ཏུ་སྤོ་ཐབས་ལ་ཞིབ་འཇུག་དང་ཆ་གཞི་སྒྲིག་རྒྱུ་དགོས་ངེས་མཐོང་ལ། རྒྱལ་ཁབ་གསུམ་པ་ཞིག་ཏུ་ཆབ་སྲིད་སྐྱབས་བཅོལ་ལེན་རྒྱུར་ཤུགས་སྣོན་བརྒྱབ་སྟེ་ནུབ་ཕྱོགས་སུ་འགྲོ་ཐབས་རྒྱ་ཇེ་ཆེར་དང་གྲངས་ཀ་ཇེ་མང་དུ་གཏོང་ཐུབ་དགོས་པ་སྙམ། ཡང་མིན་ན་ལོ་དུས་ཚད་བཀག་གིས་དབུ་མའི་ལམ་ཕྱིར་བསྡུ་དང་རང་བཙན་ཐོག་ཏུ་བསྐྱར་བགྲོད་བྱེད་རྒྱུ་དེ་གདམ་ཀ་བཟང་ཤོས་སུ་ཡིན་པས་རང་བཙན་ཐོག་ཏུ་བགྲོད་ཐུབ་ན་གནས་ཡུལ་རྒྱ་གར་གྱི་ཆབ་སྲིད་དང་འགལ་ཟླ་མི་ཡོང་བའི་ཐབས་ལམ་ལེགས་པོ་ཞིག་ཆགས་རྒྱུ་རེད། འོན་ཀྱང་རྒྱ་ནག་གི་སྟོབས་ཤུགས་ཇེ་རྒྱས་སུ་འགྲོ་མུར་དེར་རང་བཙན་འཐབ་རྩོད་ཀྱི་ལམ་དུ་བསྐྱོད་ན་ཕྱོགས་གང་ཐད་ནས་དཀའ་ངལ་ཆེན་པོ་ཞིག་འཕྲད་རྒྱུ་ངེས་པས་ལྐུག་པའི་ཨུ་ཚུགས་འདྲ་མ་བྱེད་ན་ནི་ཆེས་ལེགས་པའི་ཐབས་ལམ་ཞིག་རྙེད་དུ་མེད་ཚོད་རེད། དེས་ན་ཐབས་ལམ་བཟང་ཤོས་དེ་ཁྱེད་ཀྱིས་ལྟ་ན་ཅི་འདྲ་ཞིག་དགོས་སམ། 

2017/7/18

བོད་ཡིག་ལམ་ནས་ཚན་རིག་སྦྱོང་ཐབས། དྲ་ཚིགས་ཡག་པོ།

phETདྲ་ངོས་སུ་སྐད་ཡིག་འདེམ་ཁུལ་དུ་བལྟས་ན་རང་རེའི་བོད་ཡིག་ཀྱང་མཐོང་ཐུབ། འདི་ནས་བོད་ཡིག་གི་ལམ་ནས་དངོས་ཁམས་དང་སྐྱེ་དངོས་སོགས་ཀྱི་ཚན་རིག་གི་རྟོགས་དཀའ་བ་མང་པོ་ཞིག་ཐབས་ལམ་ལེགས་པོ་སྤྱད་དེ་ཁྱེད་ལ་ར་འཕྲོད་ཐབས་ལས་སླ་པོར་བཟོས་ཡོད། ཚན་པ་ཉི་ཤུ་ལྷག་གཅིག་བོད་སྒྱུར་དང་བཅོས་སྒྲིག་ལེགས་པོར་བྱས་ནས་རང་ཉིད་ཀྱིས་ཚོད་ལྟ་འདྲ་མིན་བྱས་ཏེ་གྲུབ་དོན་ཅི་ཞིག་བབ་ཀྱི་ཡོད་མེད་ལྟ་ཐུབ།
དྲ་སྣེ།

གློག་བརྙན་སྐད་གྲགས་ཅན་The Fate of the Furious8 དྲ་ཐོག་ཏུ་སླེབས་འདུག

གློག་བརྙན་སྐད་གྲགས་ཅན་The Fate of The Furious 8 དྲ་ཐོག་ནས་རིན་མེད་དུ་བརྙན་ཚོདHD720pལྟ་ཐུབ་པས་ཁྱེད་ཀྱིས་གཤམ་གྱི་དྲ་སྣེ་བརྒྱུད་གཟིགས་རོགས། ཤེས་དགོས་པ་ཞིག་ལ་དྲ་ངོས་དེ་ནས་དྲ་དུག་ཤུགས་ཆེན་འགོས་སྲིད་པས་ཁྱེད་ཀྱི་གློག་ཀླད་ལ་དུག་འགོག་མཉེན་ཆས་ཚད་ལྡན་ཡོད་རྒྱུ་གལ་ཆེ། དྲ་དུག་འགོས་པའི་གནད་དོན་བྱུང་ཚེ་ངེད་ལ་འགན་འཁྲི་མེད།

དྲ་སྣེ་Link

པཎ་ཆེན་བཅུ་པ་ཆེན་པོ་དྲན་པ།

ངེད་ཅག་གི་སྐྱེས་ཆེན་དག་སྤྲུལ་པ་ཡང་སྤྲུལ་ཤ་སྟག་ཡིན་ཚུལ་བཤད་དེ་ཅི་མཛད་ཀུན་ལ་དག་སྣང་དང་གང་གསུངས་ཐམས་ཅད་ལ་འཁྲུལ་མེད་བཀའ་རྟགས་ཀྱི་ཕྱག་བརྒྱ་ཞིག་ཏུ་བཟུང་ནས་གཅིག་ལ་གཉིས་བཏགས་ཤིང་གཉིས་ལ་བཞི་འདོགས་ཏེ་མི་ནས་ལྷ་རུ་བཀུར་མྱོང་བ་ནི་སྔ་ཙམ་མ་ཟད་ད་ལྟའང་དེ་ཁོ་ནར་ཟད། འོན་ཀྱང་མིའི་རིགས་ཀྱི་ལོ་རྒྱུས་བྱུང་འཕེལ་དང་འགྲོ་བ་མིའི་ཁྲོད་ན་འོད་དུ་འཚེར་བའི་སྐྱེས་ཆེན་མི་ཉུང་བ་ཞིག་གི་ཞབས་རྗེས་ལ་བལྟས་ན་སྤྲུལ་པ་ཡང་སྤྲུལ་ཅི་ཡང་མིན་རུང་ཁྱད་དུ་འཕགས་པའི་མཛད་རྗེས་དང་སྨད་དུ་བྱུང་བའི་ཕྱག་རྗེས། བླ་ན་མཐོ་བའི་གསར་བཏོད་སྣ་ཚོགས་ཀྱིས་མིའི་རིགས་ལ་འོད་སྣང་སྦར་མྱོངས་བའང་མཇལ་དུ་ཡོད། མཚམས་རེ་རང་གིས་རང་ལ་ལན་འདེབས་མི་ནུས་པའི་འགལ་བ་ཅན་གྱི་དྲི་རྟགས་རེ་བྱུང་བ་ནི་མགོན་པོ་འོད་དཔག་མེད་ཀྱི་རྣམ་སྤྲུལ་དུ་གྲགས་པའི་ཁོང་ལྟ་བུ་འཆི་དུས་དུག་གིས་འཆི་བ་དང་གསོན་དུས་བཙོན་མུན་དུ་ཚུད་པ་འདི་ཅི་ཞིག་ཡིན་ནམ་སྙམ་དུས་རང་མགོ་གཡོགས་པའི་ལན་ཞིག་འདེབས་རྒྱུ་ཡོད་པ་ནི་ངེད་ཅག་གིས་བསོད་ནམས་ཀྱིས་མ་འཁྱོགས་སོ་ཞེས་མུན་ཁྲོད་ན་ལག་སྙོབས་བྱས་ཏེ་འདི་ལྟར་ལན་འདེབས་བྱེད་བཞིན་ཡོད།

པཎ་ཆེན་བཅུ་པ་ཆེན་པོ་ལྷ་རུ་བཀུར་མི་དགོས་པར་མི་ཞིག་གི་ཚད་ཤིང་དེ་བཏབས་ནས་བལྟས་རུང་ངེད་ཅག་ལ་ཤིན་ཏུ་ནས་བཀའ་དྲིན་ཆེ་བའི་མཛད་པ་བླ་མེད་བསྐྱངས་ཡོད་ཅིང་། མི་རིགས་ཤིག་འཆི་ཁ་ནས་བསྐྱབས་པའི་ནུས་པ་བླ་ལྷག་ཏུ་འདོན་མྱོང་བ་ནི་ངེད་ཅག་གིས་དྲན་འོས་པ་ཞིག་ལ་ནམ་ཡང་རྡོ་རིང་དུ་བརྐོས་ཏེ་སློང་དགོས་པ་ཞིག་ཡིན། ཁོང་ཉིད་ཞལ་བཞུགས་པའི་དུས་སྐབས་དེར་བོད་ཀྱི་མདོ་དབུས་ཁམས་གསུམ་དུ་ཆོས་ལུགས་སླར་གསོ་དང་སྐད་ཡིག་བདག་གཅེས། རིག་གཞུང་གཅེེས་འཛིན་སོགས་ལ་འབད་པ་ཆེས་ཆེར་མཛད་དེ་ཕྱོགས་གང་ས་ནས་བོད་མི་རིགས་ལ་རེ་བ་ཅུང་ཙམ་སྐྲུན་པའང་ཁོང་གི་ཐུགས་བསྐྱེད་ཉག་གཅིག་ལ་ལྟོས་ཏེ་བྱུང་བ་ཞིག་ཡིན།

འཆི་རྐྱེན་ཁ་མི་གསལ་བའི་ཆག་སྒོ་དེ་བྱུང་ཉིན་ནས་བོད་ཀྱི་མདོ་དབུས་ཁམས་གསུམ་ལ་ལམ་སྟོན་དང་དབུ་ཁྲིད་བྱེད་མཁན་མེད་པར་ཆགས་རྗེས་ཀྲུང་གོའི་ལག་པ་ཇེ་དམ་དང་བཙན་བཀའ་བཏང་བའི་སྐད་འགོ་ཇེ་ཆེར་སོང་ནས་བོད་ལ་ཕྱོགས་གང་ཐད་ནས་འཐོར་ཞིག་དང་སྔ་བཞིན་སྲ་བརྟན་ཞིག་འབྱུང་ཐབས་མེད་པར་གྱུར་སོང་། སྐབས་དེ་ནས་བཟུང་མི་རིགས་ཟུར་འབུད་དང་སྐད་ཡིག་ཉམས་ཆག་རིག་གཞུང་རྩ་གཏོར་བྱེད་ཚད་ཀྱང་ཇེ་མགྱོགས་སུ་སོང་ཡོད།

དེ་རིང་པཎ་ཆེན་བཅུ་གཅིག་པ་མཆོག་གི་འཁྲུངས་སྐར་ཡིན་ཟེར་རུང་ཁོང་ལ་ཆ་རྒྱུས་ཅི་ཡང་མེད་ཅིང་མཐའ་ན་སྐུ་པར་ཞིག་ལས་སྐུ་དངོས་མཇལ་མ་མྱོངས། ཁོང་ཕོ་ལོ27སོན་པའི་ཕོ་གཞོན་དར་མ་ཞིག་ཆགས་ཏེ་སྐུ་གོང་མ་བཞིན་དཔལ་སྟོབས་དང་སྙིང་རུས་ལྡན་ཞིང་། ཕོ་ཤེད་དང་བློ་ཁོག་ཆེ་བའི་དཔའ་རྒོད་ཅིག་ཡིན་ནམ། རྒྱ་སྐད་ལྷུག་ལྷུག་བརྒྱབ་པ་ལས་བོད་སྐད་སྣ་གཅིག་མི་གོ་བའི་རྒྱ་ཕྲུག་ཅིག་ཆགས་ཡོད་མིན་སུས་ཀྱང་བཤད་དཀའ་ཨང་། གང་ལྟར་ལྷན་སྐྱེས་ཀྱི་ཡོན་ཏན་ཞིག་ཡོད་སྲིད་ན་ལས་བོད་ཀྱི་ཆོས་རིག་ལ་ཅི་ཡང་ཆ་རྒྱུས་མེད་པའི་གླེན་པ་ཞིག་བཟོས་ཡོད་པ་ནི་བཤད་ཅི་དགོས། གཅིག་ཏུ་བྱས་ན་གུང་ཁྲན་ལ་མགོ་འདོགས་བྱས་པ་ལས་འཕག་འཚག་བརྒྱབ་ཐུབ་མཁན་ཞིག་མེད་ཀྱང་སྲིད། གང་ལྟར་ཁོང་ལ་རེ་བ་ཞིག་བརྒྱབ་ས་མེད་པའང་གསལ་པོ་གྱུར་ཟིན་ལ། ཁོང་ཉིད་མི་རིགས་ཤིག་གསོད་པའི་ལག་ཆ་ཞིག་མ་ཆགས་ན་འགྲིག་པ་རེད།

བསྟོད་པ་རིན་ཆེན་རྒྱ་མཚོ་མ།

སྐྱེ་མ་ཐག་ཏུ་གད་མོ་ཤོར་རབས་འདུག།།
ཉིན་གསུམ་རྗེས་ལ་སོ་ཡང་སྐྱེས་ཚུལ་གླེང་།།
བྱིས་པ་ཡིན་རུང་བྱིས་པའི་ཚུལ་མེད་པ།།
རིན་ཆེན་རྒྱ་མཚོའི་ཞབས་ལ་གསོལ་བ་འདེབས།།

འཇིག་རྟེན་སྲིད་པའི་འདམ་གྱིས་མ་གོས་པར།།
ཆུང་ནས་དགོན་གྱི་སྒོ་ཐེམ་ཞབས་ཀྱིས་བརྡར།།
ཆོས་སྒྲ་དབྱངས་དང་འགྲོགས་ནས་འཚར་བ་ཡི།།
རིན་ཆེན་རྒྱ་མཚོའི་ཞབས་ལ་གསོལ་བ་འདེབས།།

རི་བོ་གོམ་པས་གཤག་བཞིན་ནུབ་ཏུ་བཞུད།།
ཆུ་བོའི་སྐེད་པ་བཅད་ཅིང་བྱེ་ཐང་དེད།།
ཉིན་མཚན་ཡུན་གྱིས་ཕ་ཡུལ་བསྐྱུར་ཏེ་སོང་།།
རིན་ཆེན་རྒྱ་མཚོའི་ཞབས་ལ་གསོལ་བ་འདེབས།།

སློབ་གྲྭའི་རྡོ་སྐས་རྐང་སྣེས་ཐུག་པ་ནས།།
གནའ་དང་ད་ཡི་ཤེས་བྱའི་མེ་ཏོག་འཐུས།།
སྐད་གསུམ་སྦྱོང་ལ་སྨྲ་བའི་ལྗགས་ལྕེ་གྲོལ།།
རིན་ཆེན་རྒྱ་མཚོའི་ཞབས་ལ་གསོལ་བ་འདེབས།།

བསྡུས་གྲྭའི་རིགས་ལམ་དེ་ནས་དབུ་ཚུགས་ཏེ།།
གཞུང་ལུགས་རབ་འབྱམས་རང་ནུས་དཔྱད་ཅིང་མཐར།།
རབ་འབྱམས་པ་ཡི་ཕྱག་ཁྱེར་གསེར་ཡིག་འཐོབ།།
རིན་ཆེན་རྒྱ་མཚོའི་ཞབས་ལ་གསོལ་བ་འདེབས།།

ཕྱག་ཟུང་གསེར་གྱི་ཡལ་འདབ་གཡོ་ཙམ་ལ།།
རོ་བརྒྱ་བཅུད་ཀྱི་ཉིད་ཁུ་རབ་ཏུ་འབབ།།
སྣ་ཚོགས་ཟས་ཀྱི་བཀོད་པ་བཞེས་མཁས་པ།།
རིན་ཆེན་རྒྱ་མཚོའི་ཞབས་ལ་གསོལ་བ་འདེབས།།

ཕྱག་མཛུབ་གློག་གི་གར་སྟབས་འཁྱུག་ཙམ་ལ།།
དུས་རབས་ཚོན་གྱིས་བྲིས་པའི་རི་མོ་འབུས།།
པར་མིག་བརྙན་དུ་ཅི་ཡང་ལེན་མཁས་པ།
རིན་ཆེན་རྒྱ་མཚོའི་ཞབས་ལ་གསོལ་བ་འདེབས།།

ཨ་བྱང་གཉིས་ཀྱི་རྡུལ་མཚོན་གཡུལ་འཁྲུགས་ཀྱང་།
ཁྱེད་ཀྱི་ཕྱག་ཟུང་འཇིག་པར་མ་གྱུར་ན།།
ངེད་ཅག་སྐྱིད་ཀྱི་ཉི་མ་ནུབ་དོགས་མེད།།
རིན་ཆེན་རྒྱ་མཚོའི་ཞབས་ལ་གསོལ་བ་འདེབས།།

ཁ་ཆེ་དམག་གི་གཏོར་བཅོམ་ཆེ་ཡང་རུང་།།
ཁྱེད་ཀྱི་བརྙན་མིག་གས་ཆགས་མ་ཐེབས་ན།།
ངེད་ཚང་རྟེན་འབྱུང་མཛད་སྒོ་དཀའ་བ་མེད།།
རིན་ཆེན་རྒྱ་མཚོའི་ཞབས་ལ་གསོལ་བ་འདེབས།།

ཅི་མཛད་ལས་ལ་ཉེས་པའི་མ་གོས་ཤིང་།།
གང་བརྩམས་མཐའ་ཐག་འབད་པས་སྒྲུབ་མཁས་པ།།
རིན་ཆེན་རྒྱ་མཚོ་གང་དེར་ཕྱག་གི་ཡུལ།།
མི་ནུབ་བསྐལ་བརྒྱར་བརྟན་པར་བཞུགས་སུ་གསོལ།།

སྐྱེལ་མ།

ཐོག་མའི་རྟེན་འབྲེལ་ཇ་དང་དར་གྱིས་ཕྱེས།།
གཙུག་ཕུད་འབྲེག་བཏུབ་མིང་གསར་ཚིག་གིས་དྲངས།།
གྲྭ་ས་ཆེན་པོའི་སྒོ་ཐེམ་རེག་ཉིན་ནས།།
ངེད་ཅག་མཛའ་བའི་འཛིན་གྲོགས་མིང་གིས་བསྙེག

གསར་བུ་ཟེར་བའི་མགོ་ཐོམ་རི་ལྟར་སྤུངས།།
སྐད་བརྡ་མ་འཕྲོད་ལུང་སྐད་དུ་རུ་རུ།།
རྐ་བ་བུམ་པའི་རྩོད་འཐབ་མགོ་མ་ནས།།
ངེད་ཅག་གཤིབ་པའི་འཛིན་གྲོགས་སོ་མ་ཡིན།།

རིམ་བགྲོད་ལོ་དུས་ཕར་ཕར་སྐྱེལ་ཉིན་མོ།།
སེམས་མཐུན་མཛའ་བ་སྙིང་ལ་དལ་གྱིས་བརླན།།
ཐལ་ཕྱིར་ཕྲེང་བས་ཀུན་པོར་ལྷན་དུ་དེད།།
ངེད་ཅག་བར་ལ་མི་ནུབ་འཛིན་གྲོགས་མཆིས།།

འདུ་འབྲལ་འགྱུར་བ་དངོས་པོའི་གཤིས་སུ་གྲུབ།།
ཕྱོགས་སུ་གྲམ་པ་ལས་རླུང་བརྒྱུད་ཕྱོགས་བཞུར།།
ཤར་ནུབ་རུ་ཆུ་ཐག་གིས་སྐལ་ན་ཡང་།།
ངེད་ཅག་བར་ལ་འཛིན་གྲོགས་གསེར་ཟམ་ཡོད།།

ན་རྒས་ལུས་དཀྱོག་གཉེར་སུལ་ཐད་དུ་ལྟེབ།།
མིག་གི་རྒྱ་མོའི་དྭངས་ཤེལ་རྙིང་དུ་སོང་།།
སོ་ཐག་ཆད་པས་ཟས་ཀྱང་མིད་མིད་འཇུབ།།
རྒས་ཁ་དུས་ཀྱང་ངེད་ཅག་འཛིན་གྲོགས་ཡིན།།

སྐྱིད་སྡུག་མེ་ཏོག་དར་རྒུད་རེས་སུ་འཁོར།།
གཤིན་རྗེ་ཐག་ཞགས་སུ་དང་གང་ལ་ཐེབས།།
ཕྱི་མའི་ཡུལ་ནས་ཚེ་སྲོག་གསར་རྙེད་ཀྱང་།།
ངེད་ཅག་ཆོས་མཐུན་འཛིན་གྲོགས་ཞིག་པ་མེད།།

ད་ནང་ཞོགས་པ་ཉལ་གོས་འོག་ནས་འཛིན་གྲོགས་བོད་ལ་ཕེབས་མཁན་ཚོར་སྐྱེལ་མའི་ཚབ་ཏུ་བྲིས།

2015-3-5

ཏྲེ་ཧོར་ཡུལ་སྐད་ནང་གི་ཐ་སྙད་རེ་ཟུང་།

རྣམ་པ་ཚོས་མཆན་ཡིག་ཏུ་བཀོད་པའམ་སྒེར་གྱི་གློག་འཕྲིན་ཐོག་ཏུ་ཏྲེ་ཧོར་ཡུལ་གྱི་ཐ་སྙད་དང་འགྲེལ་བཤད་སོགས་གཏོང་ཐུབ་ན་དགའ་བསུ་ཞུ།

ཀ

ཀ་ནི་ཀི་ནི།

ཀ་ནི་ཀི་ནི་བཟོ་མ་འདུག་མགྱོགས་པོར་བྱོས།

ལས་ཀ་སོགས་འགོར་པོར་བྱེད་པ།

ཀ་ར་ཀོ་རེ།

ཀ་ར་ཀོ་རེ་ཅི་བཤད་འདུག

ཐད་ཀར་མ་བཤད་པར་ཉ་ཉོག་མང་པོ་བཤད་པ། ལས་ཀ་སོགས་འགོར་པོ་བྱེད་པ།

ཀྲོག་ཀྲོག། 

མི་ཀྲོག་ཀྲོག་ཅིག་འདུག

ཡིན་མདོག་གི་བཟོ་ལྟ་སྟོན་པ།

སྐེ་ཚ་ཚ་ལྦུ་བ་ནར་ནར།

སྐེ་ཚ་ཚ་ལྦུ་བ་ནར་ནར་བཤད་ཡོད།

མང་པོ་བཤད་པའི་དོན། ཡང་ཡང་བཤད་པའི་དོན།

བསྐྱུར་ཤོག

སྐད་ཆ་དེ་བསྐྱུར་ཤོག

སྐད་ཆ་དང་ལས་དོན་མཚམས་འཇོག་པ།

ཁ

ཁ་ཡག

ཁ་ཡག་བཤད་མ་འདུག

སྤེལ་ལད་བཤད་པ། ཁ་མཁས་འདྲ་ཆགས་བྱེད་པ།

ཁ་ལྕེ་རྣོན་པོ། 

མི་ཁ་ལྕེ་རྣོན་པོ་ཞིག་འདུག

ཁ་བདེ་ལ་ལྕེ་རྣོ་བ། བཤད་མཁས་པ།

ཁ་ངན་ཚིག་ངན།

མི་ལ་ཁ་ངན་ཚིག་ངན་མ་སྦྱིན།

ཚིག་ངན་ལབ་པ།

ཁ་ནག

མི་ཁ་ནག་ཅིག་འདུག

མི་བཀྲ་མི་ཤེས་པ། ཅི་བྱའ་ལམ་དུ་མི་འགྲོ་མཁན།

ཁ་འཕྲོ་འཆའ།

མིའི་ཁ་འཕྲོ་འཆའ་མ་འདུག

མིའི་སྐད་ཆ་བསྐྱར་བཤད། སྐད་ཆ་ལ་ལད་ཟློས་བྱེད་པ།

ཁ་མ་དགེ་དགོས་རྒྱུ།

ཁྱེད་ཁ་མ་དགེ་དགོས་རྒྱུ་ཞིག་འདུག

ཁ་མི་དྲོ་བ། བཀྲ་མི་ཤེས་པ།

ཁ་བའི་ལུགས་ཟད།

མི་ཁ་བའི་ལུགས་ཟད་གཅིག་འདུག

མི་སྤྱོད་ངན། ངན་དགུ་ཚང་བ།

ཁ་ཕོ་རུས། མགོ་རྣ་བ།

མི་ཞིག་ཡིན་ན་ཁ་ཕོ་རུས་དང་མགོ་རྣ་བ་ཡོད་དགོས།

གཞན་གྱི་མདུན་དུ་མགོ་རྣ་ཁུར་དགོས་པའི་དོན།

ཁ་རྒན་བསམ་ཡོད།

མི་ཁ་རྒན་བསམ་ཡོད།

ན་ཚོད་རྒས་ཤིང་བསམ་བློ་གཏོང་ཤེས་པ།

ཁ་མཐུན།

ཁ་མཐུན་ན་རྐུ་ལེན།

འཆམ་པོ་དགོས་པ། གྲོས་ཁ་འཆམ་པ།

ཁ་རྗེ་དབང་ཐང་།

ཁ་རྗེ་དབང་ཐང་ཚང་མ་ཤོར་སོང་།

དབང་ཆ་ཐོབ་ཐང་ལོངས་སྤྱོད་སོགས་འཛོམས་པ།

ཁ་འཁོབ་པོ།

མི་ཁ་འཁོབ་པོ་ཞིག་འདུག

ཁ་ལྕེ་བདེ་མོ་མིན་པ། བཤད་མི་ཤེས་མཁས་པ།

ཁ་ཁུར་པོ་གཟུགས་སྐྱེ་བ།

མི་འདི་ཁ་ཁུར་པོ་གཟུགས་སྐྱེ་བ་བཤད་དགོས་ས་མེད།

ཁ་ངོ་བཟང་ལ་གཟུགས་པོ་ཡག་པ། སྐྱེ་ཁུངས་གཙང་བ།

ཁ་རུ་ངོ་མདོག

ཕྱིའི་ཁ་རུ་ངོ་མདོག་ལ་མ་བལྟ།

ཕྱིའི་ཁ་ངོ་གཙོག་པོ། ཁ་འཐབ་སྐྱོ་པོ།

ཁ་ལད།

མི་ཆུང་ཆུང་ཁ་ལད་བཤད་མ་འདུག

འུད་ཤོབ་བཤད་པ། མེད་ནའང་ཡོད་ཟེར་ནས་རྫུན་ངོམ་བྱེད་པ།

ཁ་རྒྱགས་པ།

ཁ་རྒྱགས་པ་བཤད་མ་འདུག

ཁ་ནས་གང་འདོད་རྫིག་གཏམ་བཤད་པ།

ཁ་རྒྱགས་ཁོག་སྟོང་།

མི་ཁྱེད་ཁ་རྒྱགས་ཁོག་སྟོང་ཞིག་རེད་འདུག

ཁ་ནས་རྫིག་པོ་བཤད་རུང་དོན་ལ་ལག་ལེན་པ།

ཁ་རུ་ཁ་ཐུག

མི་ཁོ་ཁ་རུ་ཁ་ཐུག་རེད།

གང་བསམ་པ་ཐད་ཀར་བཤད་མཁན།

ཁ་སུ་མགྱོགས།

ཁ་སུ་མགྱོགས་བཟོ་མ་འདུག

བཤད་རེས་ཉན་རེས་མེད་པར་ཁ་སུ་མགྱོགས་ལྟ་བུས་བཤད་པ།

ག

ག་ཤེད།

ག་ཤེད་ཅིག་ལ་འཆམ་འགྲོ

ས་ཆ་ག་གེ་མོ་ཞིག། ངོས་བཟུང་མེད་པ།

ག་གཏོང་གོ་ཆོད།

མི་ག་གཏོང་གོ་ཆོད་ཅིག་ཡོད།

གང་ན་བཏང་རུང་ལས་དོན་སྒྲུབ་ཐུབ་མཁན།

གང་ངན་གང་སྡུག

མི་དེ་ལ་གང་ངན་གང་སྡུག་བཤད་རྒྱུ་འདུག

མི་དེ་ལ་གང་ངན་གང་སྡུག་ཡོང་སོང་། གང་ངན་གང་སྡུག་བྱས་སོང་།

གང་ཐད་ཅི་ཐད།

གང་ཐད་ཅི་ཐད་ནས་རོགས་པ་བྱོས།

གང་ཐད་ཅི་ཐད་ནས་ཡག་པོ་བྱུང་། ག་ས་གང་ནས་ཞེས་པའི་དོན།

གད་དིག

མི་གད་དིག་ཅིག་འདུག གད་དིག་པོ།

མི་སེར་སྣ་ཚ་པོ།

ང

མངགས་བཀའ་འགྲོ་པོ།

མི་མངགས་བཀའ་འགྲོ་པོ་ཞིག་འདུག

མངགས་བཞག་ན་གང་ན་འགྲོ་ཐུབ་མཁན།

ངུ་ཁ་ལ་ལུག

ངུ་ཁ་ལ་ལུག་ནས་འདུག་མ་སྡོད།

ངུ་གྲབས་བྱེད་ནས་འདུག་མཁན། ངུ་རྒྱུ་འབེལ་པོ།

ངུ་ལུགས་ཡག

བུ་ངུ་ལུགས་ཡག་ཅིག་འདུག

ཡང་སེ་ངུ་བའམ། ངུ་ཆོག་ཆོག་ལྟ་བུ།

ངུ་ལ་དགོད།

ངུ་ལ་དགོད་བྱས་སོང་།

ངུ་བཞིན་པའི་སྐབས་དགོད་བྱུང་བ།

རྔན་པ་མ་བསྟེར་ནས་ངུ་སྒོང་ལ་བསྟེར་མ་ཐག་དགོད་བྱུང་བ་ལྟ་བུ།

 ངོ་ཡོད་མཁན།

མི་ངོ་ཡོད་མཁན་ཞིག་འདུག ངོ་ཡོད་མཁན་བཟོས།

ཕར་རོགས་རམ་བཟོ་དུས་དྲིན་ཚོར་མཁན།

གཞན་ལ་ལས་ཀ་སོགས་བྱེད་དུས་ཕ་རོལ་པོའི་ཡིད་ཁ་གང་བར་བྱེད་པ།

ངོ་ཐུག་ངོ་རྒྱག

ངོ་ཐུག་ངོ་རྒྱག་བཟོས་ཏེ་བཤད་དགོས།

ཕན་ཚུན་གདོང་བཏུགས་ནས་ར་སྤྲོད་བྱེད་པ།

ང་འགྲོ་ཁོ་འགྲོ

ཚང་མ་ང་འགྲོ་ཁོ་འགྲོ་རེད་འདུག

ལས་དོན་ཆེད་འགྲོ་རྒྱུ་འཚང་ཀ་ཡོད་པ།

དམག་ལ་ང་འགྲོ་ཁོ་འགྲོ་བྱས་སོང་།

ང་ཡིན་ཁོ་ཡིན།

བཤད་དུས་ང་ཡིན་ཁོ་ཡིན་རེད་འདུག

རང་རང་གིས་བཤད་རྒྱུར་འཚང་ཀ་བྱས་པ།

ང་མིན་ཁོ་མིན།

ལས་ཟེར་དུས་ང་མིན་ཁོ་མིན།

ཟ་ཟེར་དུས་འཚང་ཀ་ཤིག་ཤིག

ང་རབས། ངེད་རབས།

ང་རབས་ལ་རྟ་མང་པོ་ཡོད།

ང་ཚོ་ཞེས་པའི་དོན། གྲོང་པ་དང་སྡེ་པ། ཡུལ་ཕྱོགས་སོགས་ལ་གོ་བ་ལས། ཁྱིམ་གཅིག་ལ་བཤད་པའི་སྐབས་ཀྱི་ང་ཚོ་ལ་རྟ་ཡོད་ཅེས་པར། ང་རབས་ལ་རྟ་ཡོད་མི་ཟེར།

ང་རིགས་བཅས། ང་བཅས།

ང་རིགས་བཅས་པ་སླེབས་ཡོང་། ང་བཅས་སླེབས་ཡོང་།

ང་ཚོ་ཚང་མ་ཞེས་པའི་དོན། (ཁ་ཤས་ཀྱིས་རིགས་གཅིག་པ་ཞེས་འབྲི།)

ང་རིགས་ཚང་།

ང་རིགས་ཚང་འགྲོ ཁོ་རིགས་ཚང་སྐྱུར་ཤོག

ང་རང་ཚོ་ཞེས་པའི་དོན།

ངུ་རྡུང་།

ཨ་མས་ངུ་རྡུང་སྤྲོད་བྱུང་།

ངུས་ནས་ཞུ་བ་བྱས་པ། བུ་ཁ་ལ་མི་ཉན་དུས་ཨ་མས་ངུ་རྡུང་སྤྲོད་པ།

ངུ་ནས་འཛིང་པ། མནའ་མས་ངུ་རྡུང་སྤྲོད་ཐོས།

ངུ་ཤར་རྒྱག

ཨ་མས་ངུ་ཤར་བརྒྱབ་སོང་།

ཚང་མའི་གོ་བར་བྱས་ཏེ་ངུ་ནས་སེམས་སྡུག་དང་ཞུ་བ་བྱས་པ།

ངོ་འགྲོ་ཡོད་མི།

མི་ངོ་འགྲོ་ཡོད་མི་ཞིག་འདུག

ངོ་ཤེས་མང་བ། ངོ་ཡག་པོར་ཤེས་པ།

ངོ་ཤེས་ཤེས་རྒྱུས་ལོན་ལོན།

ངོ་ཤེས་ཤེས་རྒྱུས་རྒྱུས་ལོན་ལོན་བཟོ་མ་ཡོང་།

ངོ་ཡག་པོ་ཤེས་དུས་རྒྱུས་ལོན་མདོག་བྱེད་པ།

ངོ་རྩིས་ལེན།

ངོ་རྩིས་ལེན་ནས་ཨེ་ཚང་ལྟོས།

མི་ངོ་ཡོད་ཨེ་འདུག་གིས་རྩིས་ལེན་པ།

ངོ་མ་ཆེ།

ངོ་མ་ཆེ་བཤད་ལེ་ཡིན།

དངོས་གནས་དྲང་གནས་ཀྱི་དོན།

སྐད་འཕྲིན་གཉིས་པ་ཞིག་ཕབ་ལེན།

འདི་ནི་དུས་རྒྱུན་བེད་སྤྱོད་བྱེད་བཞིན་པའི་སྐད་འཕྲིན་དེ་དང་གཅིག་མཚུངས་ཤིག་ཡིན་ལ་འདིའི་དགེ་མཚན་ནི་ཁྱེད་ཀྱི་ཁ་པར་དུ་ཁ་བྱང་མི་འདྲ་བ་གཉིས་ཀྱི་ཐོག་ནས་སྐད་འཕྲིན་གཉིས་བེད་སྤྱོད་གཏོང་ཆོག་པ་ཞིག་ཡིན། དུས་རྒྱུན་ཁ་བྱང་གཉིས་ཡོད་མཁན་ཚོས་གཅིག་ཕྱེ་དུས་གཞན་དེ་ཁ་རྒྱབ་དགོས་པའི་དཀའ་ངལ་འདིས་སེལ་ཡོད། ཕབ་ལེན་ཚར་རྗེས་ནང་འཇུག་བྱེད་སྟངས་མི་འདྲ་ཅུང་ཡོད་པས་གཤམ་དུ་པར་རིས་ལམ་ནས་བསྟན་ཡོད།

བོད་རྒྱ་ཡིག་སྒྱུར་མཉེན་ཆས་གཉིས།

ཉི་འོད་བོད་རྒྱ་ཡིག་སྒྱུར་མཉེན་ཆས་དང་སྟབས་བདེ་ཡིག་སྒྱུར་ཨེ་མ་ཧོ།

བོད་ལྗོངས་སློབ་ཆེན་གྱིས་དེ་སྔ་ནས་དྲ་ཐོག་ཏུ་རྒྱ་བོད་ཡིག་སྒྱུར་མ་ལག་གཅིག་གསར་བཟོ་བྱས་ཏེ་བོད་རྒྱ་ཡིག་རིགས་གཉིས་མིང་ཚིག་ཙམ་མིན་པར་ཚིག་གྲུབ་ཐུང་ངུ་རིགས་ཕན་ཚུན་བསྒྱུར་པའི་ལས་གཞི་གསར་པ་ཞིག་གི་གོམ་སྟོབས་ཆེན་པོ་ཞིག་སྤོས་འདུག སྒེར་དང་ཞོར་ལས་ཙམ་མིན་པར་སློབ་ཆེན་དེ་གའི་སྡེ་ཁག་ནས་ལས་གཞི་ལག་བསྟར་བྱེད་ཀྱི་ཡོད་སྟབས་ཚ་ཚ་འུར་འུར་ངང་རྣམ་གྲངས་ཁག་ལ་ཞིབ་འཇུག་དང་ཁ་སྣོན་བཟོ་བཅོས་བྱེད་བཞིན་འདུག་པས་ཧ་ཅང་མགྱོགས་པའི་ངང་འཐུས་སྒོ་ཇེ་ཚང་ཆགས་རྒྱུ་ནི་བཤད་ག་ལ་དགོས། ད་ཆར་དྲ་ངོས་ཙམ་མིན་པར་androidདང་iOS མ་ལག་གཉིས་ཀྱི་ཐོག་ཏུ་མཉེན་ཆས་བཟོས་ཏེ་ཁ་པར་སོགས་སུ་བེད་སྤྱོད་གཏོང་ཆོག་པ་ཆགས་འདུག  

དྲ་གནས། http://mt.utibet.edu.cn/

ཀུ་ཤུ་པར་གཞི།  https://appsto.re/in/CcEdib.i

ཨན་ཌོ་པར་གཞི། http://mt.utibet.edu.cn/TibetanAndChineseTranslateV0.9.apk

ཨེ་མ་ཧོ་སྟབས་བདེ་ཡིག་སྒྱུར་ནི་སྐད་འཕྲིན་ཐོག་ནས་བོད་རྒྱ་ཡིག་སྒྱུར་བྱེད་ཐུབ་པའི་བྱེད་ནུས་ཅན་ཞིག་རེད། མཚོ་སྔོན་ཨེ་མ་ཧོ་བཟོ་ཚོང་ཁང་གིས་ལས་གཞིའི་རྣམ་གྲངས་སུ་སྤེལ་བའི་ཨེ་མ་ཧོ་སྟབས་བདེ་ཡིག་སྒྱུར་ནི་མིང་ཚིག་དང་ཚིག་གྲུབ་ཀྱང་ལེགས་པོར་སྒྱུར་ཐུབ་པའི་གལ་ཆེའི་བྱེད་ནུས་ཅན་ཞིག་ཆགས་འདུག 

སྤྱིར་སྟེགས། amahoo22

ལས་གཞིའི་རྣམ་གྲངས་འདི་ཚོ་ཡོངས་སུ་འཐུས་སྒོ་ཚང་བ་ཞིག་ཆགས་མེད་ནའང་བོད་ཀྱི་སྐད་ཡིག་དེ་དབྱིན་ཡིག་བཞིན་ཡིག་སྒྱུར་བཟོ་ཐུབ་པ་དང་འབྲི་མི་དགོས་པར་ངག་ལམ་ནས་འདོན་བཞིན་ཡིག་ཐོག་ཏུ་ཕབ་ཐུབ་པའི་ཚོད་ལྟའི་གོམ་པ་དངོས་སུ་སྤོ་བ་ཞིག་ཆགས་ཡོད་པས་རིམ་བཞིན་ཉམས་མྱོང་རིམ་གསགས་དང་ཐབས་ལམ་སྣ་ཚོགས་སྤྱད་དེ་བརྡ་འཕྲིན་གྱི་དུས་རབས་སུ་བེད་སྤྱོད་བྱ་མི་ཐུབ་པའི་སྐད་ཡིག་གི་གནས་བབ་ལས་སྐྱབས་ཐུབ་པའི་གྲུབ་འབྲས་བཟང་པོ་དེ་མངོན་འགྱུར་ཡོང་རེ་ཤིན་ཏུ་ཆེ།

གླུ་གཞས་མཉེན་ཆས་gaana

དབྱིན་གཞས་དང་ཧིན་གཞས་ཉན་རྒྱུ་དགའ་མཁན་ཚོས་gaanaཞེས་པའི་མཉེན་ཆས་དེ་ཕབ་ལེན་བྱོས་དང་གླུ་གཞས་མཉེན་ཆས་གཞན་ལས་ཡག་པ་འདྲ་ཞིག་འདུག དྲ་བ་སྤྱད་དེ་ཐད་ཀར་ཉན་རྒྱུ་ཚད་བཀག་གང་ཡང་མི་འདུག་མོད་ཕབ་ལེན་བྱེད་དགོས་ན་རིན་སྤྲོད་དེ་མ་ཉོ་ན་ཕབ་ལེན་བྱེད་མི་ཐུབ། མ་གཞི་ཀུ་ཤུ་ཁ་པར་རིགས་ལ་Musicནང་དུ་གླུ་གཞས་ལེགས་པོ་དེ་འདྲ་ཡོད་རུང་རིན་སྤྲོད་ནས་མ་ཉོས་ཚེ་ཉན་མི་ཐུབ། Google musicནང་ནས་རིན་མེད་ངང་གླུ་གཞས་ཉན་ཐུབ་ནའང་དེ་ཙམ་གླུ་གཞས་ཕུན་སུམ་ཚོགས་པ་ཞིག་མི་འདུག

གློག་ཀླད་པར་གཞི gaana.com

ཀུ་ཤུ་པར་གཞི་ios ཕབ་ལེན།Donwload

ཨན་ཌོ་པར་གཞི android ཕབ་ལེན།Donwload

ཁམས་སྐད་ལྟད་མོའི་དྲ་སྣེ།

ཁམས་པའི་བརྙན་འཕྲིན་ཁང་གིས་སྒྲ་སྦྱོར་བྱས་པའི་ཁམས་སྐད་ཅན་གྱི་རྒྱ་ནག་གི་གློག་བརྙན་ལེའུ་ཅན་ཕབ་ལེན་དང་ལྟ་འདོད་ཡོད་ཚེ་ཁམས་པའི་བརྙན་འཕྲིན་ཁང་གི་དྲ་ངོས་ནས་ལྟ་ཆོག དྲ་ངོས་ཀྱི་ཚན་པ་རོལ་རྩེད་ཞེས་པ་ནས་འཇུག་ན་ལྟད་མོ་གང་མང་ལྟ་ཐུབ་པ་མ་ཟད་ཕབ་ལེན་ཀྱང་བྱེད་ཆོག

ཁམས་པའི་བརྙན་འཕྲིན།
གློག་བརྙན་ཚན་པ་གཅིག་ཅན། གློག་བརྙན།
གློག་བརྙན་ལེའུ་ཅན། བརྙན་འཕྲིན་ཟློས་གར།
བྱིས་པའི་ལྟད་མོ། འགུལ་རིས་བརྙན་ཕབ། 
དངོས་བཤུས་ལྟད་མོ། དངོས་ཟིན་བརྙན་ཕབ། 

གློག་བརྙན་གསར་པ་Logan 2017

གློག་བརྙན་འདི་ནི་ད་ལོའི་གསར་དུ་ཐོན་པའི་ཆེས་ལེགས་པའི་གློག་བརྙན་ཞིག་ཡིན། ཁྱེད་ཀྱིས་བརྙན་ཚད་HD1080pཅན་གྱི་གློག་བརྙན་འདི་རིན་མེད་ཐོག་ནས་ལྟ་འདོད་ཡོད་ཚེ་གཤམ་གྱི་ད་སྣེ་ནས་འཇུག་རོགས། ཤེས་དགོས་པ་ཞིག་ལ་དྲ་ངོས་དེ་ནས་དྲ་དུག་ཤུགས་ཆེན་འགོས་སྲིད་པས་ཁྱེད་ཀྱི་གློག་ཀླད་ལ་དུག་འགོག་མཉེན་ཆས་ཚད་ལྡན་ཡོད་རྒྱུ་གལ་ཆེ། དྲ་དུག་འགོས་པའི་གནད་དོན་བྱུང་ཚེ་ངེད་ལ་འགན་འཁྲི་མེད།

ཕྱི་ལོ་2017ལོའི་གློག་བརྙན་གསར་པ། མི་རྒོད།

ཕྱི་ལོ་2017ལོའི་གློག་བརྙན་གསར་པ་མི་རྒོད་ཀྱི་གློག་བརྙནKong Skull lslandཞེས་པ་འདི་ཁྱེད་ཀྱིས་བལྟས་ཨེ་མྱོངས། ཁྱེད་ཀྱིས་དྲ་ཐོག་ནས་རིན་མ་སྤྲོད་པར་ལྟ་ཐུབ་པ་དང་ཡང་ན་འདྲ་བཤུས་བཟོས་པ་ཞིག་ལས་ལྟ་ཐུབ་ཡོད་མི་སྲིད། གལ་ཏེ་ཁྱེད་ཀྱིས་ལྟ་འདོད་ན་HD720pཅན་གྱི་བརྙན་གཙང་མ་ཞིག་ལྟ་ཐུབ། གཤམ་དུ་དྲ་སྣེ་དེ་ལས་ཁྱེད་ཀྱིས་མི་རྒོད་ཀྱི་གློག་བརྙན་འདི་རིན་མེད་ཐོག་ལྟ་ཆོག ཤེས་དགོས་པ་ཞིག་ལ་དྲ་ངོས་དེ་ནས་དྲ་དུག་ཤུགས་ཆེན་འགོས་སྲིད་པས་ཁྱེད་ཀྱི་གློག་ཀླད་ལ་དུག་འགོག་མཉེན་ཆས་ཚད་ལྡན་ཡོད་རྒྱུ་གལ་ཆེ། དྲ་དུག་འགོས་པའི་གནད་དོན་བྱུང་ཚེ་ངེད་ལ་འགན་འཁྲི་མེད།

ཕྱི་སྡོད་བོད་རིགས་ཚོས་བོད་ཡིག་མ་སྦྱོང་ན་ཆོག

(རྩོམ་ཡིག་འདིས་སྐད་ཡིག་དེ་ཉིན་རྒྱུན་འཚོ་བའི་ནང་བེད་སྤྱོད་ཡོང་ཐབས་ཤིག་བྱེད་མ་ཐུབ་ན་འཇིག་ཉེན་ཡོད་པ་དང་མི་རབས་རྗེས་མ་ཚོས་སྐད་ཡིག་འདོར་སྲིད་པའི་ཉེན་ཁའི་རང་བཞིན་གླེང་ཡོད།)

བོད་ཀྱི་ནང་བསྟན་ལ་སློབ་གཉེར་བྱེད་མི་ཐུབ་པའི་བོད་རིགས་ཚོས་བོད་སྐད་ཙམ་མ་བརྗེད་ན་དེས་འགྲིག དེ་མིན་བོད་ཀྱི་སྐད་ཡིག་ནང་དུ་འཚོ་གནས་ལ་ཕན་པའི་ཆ་ཞིག་ཧ་ལམ་མེད། དེ་ལས་ཁྱེད་ཚོས་དབྱིན་དང་རྒྱ་ཡིག་སྦྱོངས་དང་ཉིན་རེའི་བྱ་བཞག་གི་དགོས་མཁོ་སྐོང་ཐུབ།

སྐད་ཡིག་ཅེས་པ་དེ་ཐོག་མ་བྱུང་དོན་ཡང་འཚོ་གནས་ཀྱི་དགོས་མཁོ་ཆེད་རེད། སྐད་ཡིག་གང་ཞིག་གིས་འཚོ་གནས་ཀྱི་དགོས་མཁོ་ལ་ཕན་ཐོགས་ཆེ་བ་སྐྲུན་ཐུབ་ན་དེ་ཉིད་ལ་འཇུག་དགོས། ངེད་ཅག་ཆོས་ཀྱི་ཕ་ཡུལ་དང་ཆོས་ལུགས་སྣ་མང་གི་ཕ་ས་རྒྱ་གར་ལྟ་བུས་ཀྱང་ཧིན་དྷིའི་སྐད་ཡིག་ལས་དབྱིན་སྐད་ཀྱིས་འཚོ་གནས་ལ་ཕན་ཐོགས་ཆེ་བ་མཐོང་ནས་སྤྱི་ཚོགས་སུ་ཧིན་སྐད་ལས་དབྱིན་སྐད་སྤྱད་ཆེ་བ་ཡོད།

དབྱིན་ཇི་སྐད་ཡིག་འདི་རྒྱལ་ཁབ་མང་པོ་ཞིག་གི་ནང་མ་སྐད་ཚུལ་དུ་སྤྱོད་བཞིན་ཡོད་ལ། དེ་ནི། དཔེར་ན། Australia, New Zealand, Canada, South America, སོགས་དང་དེ་བཞིན་རྒྱ་གར་དང་ Caribbean   སོགས་ཀྱི་ནང་དུའང་དར་ཁྱབ་ཆེན་པོ་ཡོད། ཁོ་ཚོའི་མི་རིགས་ཀྱི་ངོ་བོ་བརླགས་ནས་སུ་ཡང་དབྱིན་ཇི་མི་རིགས་ཆགས་མེད་ན་ངེད་ཅག་གིས་དབྱིན་སྐད་སྤྱད་ན་ནམ་ཡང་དབྱིན་ཇི་མི་རིགས་ཆགས་དོན་མེད། 

དུས་དེང་སང་བཀྲས་མཐོང་ལྷ་སྒྲོན་སོགས་བོད་ཀྱི་མི་རབས་གསར་པ་ཆེས་མང་པོ་ཞིག་ནི་ངེད་ཅག་བོད་ཀྱི་སྐད་ཡིག་ཐར་ཐོར་ཤེས་མི་དག་ལས་བོད་ལ་སེམས་ཤུགས་དང་ལ་རྒྱ་ཆེ་ཞིང་། མི་རིགས་ཀྱི་དོན་དུ་ཕྱག་ལས་ཀྱང་ངེད་ཅག་ལས་སྟོང་འགྱུར་གྱི་ཆེ་བ་ལས་བཞིན་པ་མ་མཐོང་ངམ། ངེད་ཅག་བོད་ཀྱི་སྐད་ཡིག་ཤེས་པས་བོད་མི་གསོན་པོ་ཞིག་ཡིན་མདོག་དང་ཁོ་ཚོས་བོད་སྐད་མི་ཤེས་པས་བོད་མི་ཕྱེད་ཀ་ཡིན་ཚུལ་བཤད་པ་ནི་དགོད་བྲོ་བ་ཞིག་མི་འདུག་གམ། 

ལམ་ལྷོང་མ་བྱུང་བའི་མར་ཁེ་སིའི་སྐད་ཆ་སྙིང་པ་ཞིག་བསྐྱར་ཟློས་ཡང་ཟློས་བྱས་ཏེ་ད་རུང་ཡང་གླེང་བཞིན་ཡོད། མར་ཁེ་སི་ལ་འདི་འདྲ་ཡིད་ཆེས་བྱེད་མཁན་བོད་མི་ཙམ་ལས་ཧ་ལམ་མེད་ཚོད་རེད། མར་ཁེ་སིས་དམག་ཤོག་དར་སྤེལ་གྱི་ཧམ་པ་དེས་སྡོམ་ཚིག་བེད་མེད་རེ་འགའ་བཞག་ཡོད་ལ་ལམ་སྟོན་ནོར་བ་མང་པོ་ཞིག་བཞག་ཡོད། འདི་ལ་ཤི་འཐོམ་རོ་འཐོམ་བྱེད་མཁན་ནི་གུང་ཁྲན་དང་བོད་མི་ཙམ་ཡིན་ཤས་ཆེ། རྒྱལ་སྤྱི་ཅན་དུ་འགྱུར་བཞིན་པའི་དུས་སྐབས་སུ་སྐད་ཡིག་ཀྱང་དབྱིན་སྐད་ཅན་དུ་འགྱུར་བཞིན་པའི་དུས་ཚོད་ཅིག་ལ་ད་རུང་སྐད་ཡིག་ཉམས་ན་མི་རིགས་ཉམས་ཟེར་བའི་སྐད་ཆ་རྙིང་པ་དེ་བཤད་མ་སྡོད་རོགས། གལ་སྲིད་དེང་སྐབས་དབྱིན་སྐད་མ་སྐད་ཚུལ་དུ་སྤྱོད་བཞིན་པའི་རྒྱལ་ཁབ་དང་མི་རིགས་དེ་དག་ཉམས་ཆག་ཇི་ཙམ་སོང་ཡོད་པའི་གནས་ཚུལ་འདི་ཡིན་ཟེར་བ་ཞིག་སྟོན་དང་ངས་ཕྱག་ཐལ་མོ་སྦྱར་ཆོག 

གལ་སྲིད་ཁྱེད་ཅག་བོད་ཀྱི་སྐད་ཡིག་ལ་དེ་ཙམ་དགའ་མདོག་ཡོད་ཚེ། ནང་བསྟན་ལ་སློབ་སྦྱོང་བྱེད་དགོས། བོད་ཀྱི་སྐད་ཡིག་ནང་དུ་བསམ་རིན་ཡོད་པ་ཞིག་ནི་ནང་བསྟན་འདི་ཉིད་ཡིན། འདི་ཉིད་ལ་དོ་སྣང་ཙམ་ཡང་མ་བྱས་པར་ད་དུང་བོད་ཀྱི་སྐད་ཡིག་དེ་ཞེ་པོ་ཞིག་རེད་མདོག་མདོག་བཤད་ན་རྫུན་རྫུན་ནག་རེད།

ངས་དེ་སྔ་ནས་བཤད་མྱོང་། ནང་བསྟན་མི་དགོས་མཁན་དག་ལ་ནི་བོད་ཀྱི་སྐད་ཡིག་དེ་ཨུ་ཚུགས་ཀྱིས་འཇུ་དགོས་དོན་གང་ཡང་མེད། སྦྱོང་ཁག་ལ་ཤེས་དཀའ་བའི་སྐད་རིགས་སུ་ཚུད་པའི་སྐད་ཡིག་དེས་རང་ཉིད་ཀྱི་འཚོ་གནས་ལ་ཕན་ནུས་ཙམ་ཐོན་ན་ཨུ་ཚུགས་རེ་བྱེད་ནའང་རྒྱུ་མཚན་ལྡན་ཡོད། རང་ཉིད་ཀྱི་སྐད་ཡིག་དོ་ཟེར་ནས་ཤི་འཇུ་རོ་འཇུ་ཙམ་གྱིས་ནི་ཅི་ཡང་མི་ཕན། ད་བར་སྐད་ཡིག་སྟོང་ཕྲག་ལྷག་ཅིག་རྩ་མེད་དུ་འགྲོ་ཟིན་ཞིང་ད་རུང་སྤྱི་ཚོགས་སུ་དགོས་མཁོ་སྐོང་མི་ཐུབ་པའི་སྐད་ཡིག་གང་མང་རྩ་སྟོང་འགྲོ་རྒྱུ་ཉག་ཅིག་རེད། སྐད་ཡིག་ཙམ་ལ་ནི་ཧང་སང་དོན་ཅི་ཡང་མེད་ལ་མི་སྟོང་ཚོ་ཁ་ཤས་ལས་མེད་པའི་མི་རིགས་རེ་འགས་ཀྱང་རང་གི་སྐད་ཡིག་དེ་སྤྱད་ནས་རང་གི་སྐད་ཡིག་ལས་ཡག་ཅིག་མེད་རབས་གླེང་ནས་ཉི་མ་ཕུད་དེ་སྡོད་ཡོད། ངེད་ཅག་བོད་ལའང་རྟའུ་དང་མི་ཉག་ཅོ་ནེ་དཔའ་རིས་སོགས་ཀྱི་ལོག་སྐད་དེ་ལྟ་བུ་ཡོད་པས་དེ་དག་ནི་ཧ་ཅང་རྩ་ཆེར་བརྩིས་ནས་སོར་གང་མི་གློད་པར་སྡོད་ནའང་དགོས་པ་ནི་དེ་ཙམ་རེད། 

བོད་ཀྱི་སྐད་ཡིག་དེས་ཕན་བདེ་རླབས་ཆེན་སྐྲུན་ས་ནི་ནང་བསྟན་ཆོས་ལུགས་དེ་ཉིད་ཡིན་ལ། འཆད་རྩོད་རྩོམ་གསུམ་གྱི་བྱ་བ་ཅི་ལའང་ལག་མི་འགོར་བར་བེད་སྤྱོད་ཆོག་ཆོག་ཅིག་བཟོས་ཡོད། ནང་ཆོས་སློབ་གཉེར་གྱིས་མི་ཚེ་རྫོགས་དགོས་པའི་གྲྭ་བཙུན་ཚོས་སྐད་ཡིག་བེད་སྤྱོད་བཏང་རྗེས་སྐད་ཡིག་གི་ཁྱབ་ཁོངས་ཇེ་ཆེར་སོང་ཡོད་ལ་ཆོས་ལུགས་ཐད་ནས་མིང་ཚིག་ཧ་ཅང་ཕྱུག་པོར་བཟོས་ཡོད། བོད་ཀྱི་སྐད་ཡིག་དང་གྲྭ་བཙུན་བར་ཕན་ཚུན་རམ་འདེགས་ཤུགས་ཆེན་བྱས་ལ་གཉིས་ཀའི་ནུས་སྟོབས་ཀྱང་ཇེ་ཆེར་སོང་ཡོད། འོན་ཀྱང་ནང་བསྟན་འདི་ཉིད་མེད་རླབས་སུ་སོང་ཚེ་བོད་ཀྱི་སྐད་དེ་ལའང་རིན་མཐོང་གང་མེད་པ་ནི་ཟམ་གདོང་རིན་པོ་ཆེས་ཆོས་ལུགས་དར་ན་མི་རིགས་ཉམས་ཀྱང་ཆོག་ཟེར་བ་ལས་ལེགས་པར་གོ་ཐུབ། ཁ་གསལ་པོ་བཤད་ན་བོད་ལ་ནང་བསྟན་འདི་ཉིད་མེད་ན་རྩ་ཆེན་གྱི་མི་རིགས་དང་རླབས་ཆེ་བའི་སྐད་ཡིག་ཟེར་བ་ཞིག་མེད་པས་ན་ཟམ་གདོང་རིན་པོའི་གསུང་བཤད་དེའང་གནད་ལ་ཁེལ་ཞིང་དོན་ལ་གནས་པ་ཞིག་ཆགས་ཡོད་པ་མཐོང་ཐུབ།  དེ་ནི་ལོས་ཀྱང་ཡིན་ཏེ། རྩ་ཆེན་དང་རླབས་ཆེན་ཞེས་པའང་མི་རིགས་ཀྱི་དགོས་མཁོ་སྐོང་བར་ཕན་གྲོགས་རྒྱ་ཆེར་བྱེད་མིན་ལས། ཆེས་དཀོན་པ་དང་ཧ་ཅང་རྙིང་པ་ཞིག་ལ་རྩ་ཆེན་རྩི་རྒྱུ་ཅི་ཞིག་ཡོད། ལོ་ངོ་སྟོང་ཚོ་སྔོན་གྱི་རྡོ་ལོག་ཅིག་ལ་རྩ་ཆེན་ཡིན་རབས་བཤད་ནས་ཉར་ཚགས་བྱས་ན་དགེ་མཚན་ཞིག་ཡོད་དམ། དེར་དགེ་མཚན་ཡོད་ན་རྙིང་པ་ཡིན་རྒྱུ་ཙམ་རེད། འདི་དང་འདྲ་བར་བོད་སྐད་ཡིག་གིས་མི་རིགས་ཀྱི་དགོས་མཁོ་སྐོང་མ་ཐུབ་ཚེ་རང་གི་སྐད་ཡིག་ཡིན་ཟེར་ནས་དགའ་ཞེན་ཙམ་ལས་འདོར་མི་ཐུབ་པའི་གནས་སྟངས་གང་ཡང་མེད།

དམག་འཁྲུག་ལ་དགའ་བའི་བོད་མིའི་འདུ་ཤེས།

ད་ཆར་ཨ་རི་དང་བྱང་ཀོ་རི་ཡའི་བར་དམག་འཁྲུག་ལང་ཉེན་ཆེ་བའི་མཚམས་སུ་སླེབས་ཡོད་ཅིང་། ཉི་མ་རེ་རེ་བཞིན་ཆེས་ཛ་དྲག་གི་ཕྱོགས་སུ་གོམ་པ་རེ་རེ་ཇེ་མགྱོགས་སུ་འགྲོ་བཞིན་ཡོད་པའི་གནས་ཚུལ་ཐོན་བཞིན་ཡོད། གནས་ཚུལ་འདིས་འཛམ་གླིང་ཧྲིལ་པོ་འཇིགས་སྐྲག་དང་སེམས་འཚབ་ཆེན་པོ་ཞིག་སློང་བཞིན་ཡོད་ཅིང་ཆབ་སྲིད་ཐད་ནས་གླེང་ན་ལྟ་ཚུལ་མི་འདྲ་བ་གཉིས་ཀྱི་འོག་ནས་ཐེངས་འདིའི་དམག་འཁྲུག་ལ་སེམས་འཚབ་ཡོད་པ་མཐོང་རྒྱུ་ཡོད། རྒྱ་ནག་དང་ར་ཤི་ཡ་ལྟ་བུའི་སེམས་འཚབ་དེ་ནི་ཨ་རི་ལ་སྡང་སེམས་ཞིག་གི་འོག་ནས་འབྱུང་བཞིན་ཡོད་ཅིང་གལ་ཏེ་ཨ་བྱང་བར་དམག་འཁྲུག་དངོས་སུ་བྱུང་ཚེ་སྔ་ཕྱི་ཙམ་ལས་བྱང་ཀོ་རི་ཡ་ཕམ་ཉེས་ཙམ་མ་ཟད་ཨ་མི་རི་ཀས་རྒྱལ་ཁབ་འདིའི་ནང་དུ་རྐང་པ་བརྟན་པོ་ཞིག་བཙུགས་ཏེ་ཨེ་ཤ་ཡི་འཐབ་ར་གལ་ཆེན་ཞིག་ཨ་མི་རི་ཀི་ལག་ཏུ་འཚུད་རྒྱུ་ཡིན་པ་ནི་གསལ་པོ་མཐོང་གི་ཡོད། རྒྱ་ནག་དང་ར་ཤི་ཡ་གཉིས་ལ་དོགས་ཟོན་གྱི་འཐབ་ར་སྐྲུན་དགོས་ན་རྒྱ་ཁབ་འདི་ནི་རྒྱ་ནག་དང་ར་ཤི་ཡ་གཉིས་དང་ས་འབྲེལ་ཡིན་པ་སོགས་ཀྱིས་ལྷོ་ཀོ་རི་ཡ་ལས་ཀྱང་བཟང་བ་ཡོད། ཕྱོགས་གཞན་ཞིག་ནས་རྡུལ་མཚོན་གྱི་དམག་འཁྲུག་ལང་ན་ས་འབྲེལ་དུ་ཡོད་པའི་རྒྱ་ཁབ་གཉིས་ཀྱི་མངའ་སྡེ་ཁག་ལའང་རྫས་ངན་ཁྱབ་པའི་འཇིགས་སྣང་དང་དཀའ་ངལ་ཞིག་ཡོང་རྒྱུ་ནི་གཏན་ཁེལ་ལྟ་བུ་ཡིན། འོན་ཀྱང་བྱང་ཀོ་རི་ཡ་དང་ས་ཐག་གིས་ཆོད་ཅིང་། དཔལ་འབྱོར་གྱི་འབྲེལ་ལམ་དེ་ཙམ་མེད་པའི་ཨེ་ཤ་ཡ་ཁུལ་དང་ཡུ་རོབ་ས་ཁུལ། ལྷོ་བྱང་ཨ་མི་རི་ཀ་སོགས་ཀྱིས་སེམས་འཚབ་བྱེད་སྟངས་དེ་ནི་ཐད་ཀར་རང་ཉིད་ལ་ཉེན་ཁའི་རང་བཞིན་དེ་ཙམ་མཐོང་གི་མེད་ནའང་གོ་ལ་གཅིག་རྟེན་གྱི་དཔལ་འབྱོར་ཐད་ནས་རྒྱ་ནང་གི་དཔལ་འབྱོར་ཉམས་ཉེས་དང་ཚོང་འབྲེལ་ལ་དོ་ཕོག་ཅིག་ཡོང་སྲིད་པའི་ཚོད་དཔག་ཀྱང་བྱེད་ཀྱི་ཡོད། དེ་ལས་ཀྱང་སེམས་འཚབ་དགོས་པ་དེ་ནི་ཉེས་མེད་མི་དམངས་ཤི་རྨས་དང་དཀའ་སྡུག་བསམ་མི་ཕོད་པ་ཞིག་ཡོད་འབྱུང་ཉེན་ཆེ་ཞིང་ཕྱི་ལོ1950ལོའི་ལྷོ་བྱང་ཀོ་རི་ཡའི་དམག་འཁྲུག་གི་ནང་དུ་མི་སེར་ས་ཡ་གཅིག་ལྷག་གི་ཚེ་སྲོག་ཤོར་ཡོད་ཅིང་། ཐེངས་འདིར་རྡུལ་མཚོན་གྱི་གཏོར་རྒོལ་བྱས་ཚེ་དེས་ཚེ་སྲོག་སྔ་ལྷག་འཕྲོག་རྒྱུ་མ་ཟད། ལོ་རབས་མང་པོར་དཀའ་ངལ་བཟོ་རྒྱུ་ནི་ངེས་བརྟན་ལྟ་བུ་ཆགས་ཡོད། དམངས་གཙོའི་དཔལ་ཡོན་དར་བའི་རྒྱལ་ཁབ་འདི་ཚོས་བྱང་ཀོ་རི་ཡའི་མི་མང་ལ་དམག་འཁྲུག་གི་བཟོད་དཀའ་བའི་སྡུག་བསྔལ་སྐྲུན་རྒྱུར་སེམས་འཚབ་བྱས་པ་ནི་འགྲོ་བ་མིའི་རིགས་ཀྱི་བྱམས་བརྩེ་འགན་ཁུར་དང་བསམ་པའི་དཔལ་ཡོན་གྱིས་ཕྱུག་པ་མཚོན་ཐུབ་པས་ཡིད་སྨོན་སྐྱེ་དགོས་པ་ཞིག་ལོས་ཡིན།

ངེད་ཅག་བོད་མི་རྣམས་ལ་ནི་རྡུལ་མཚོན་གྱི་དམག་འཁྲུགས་འོག་གི་དཀའ་སྡུག་མྱོང་མེད་ནའང་དམག་འཁྲུག་གི་འཇིག་པ་དང་བཙན་འཛུལ་གྱི་དཀའ་ངལ་ཆེས་ཆེར་འཕྲད་དེ་མི་ལོ་དྲུག་ཅུ་སོང་ཟིན་ནའང་ད་དུང་ཡང་གཞིས་བྱེས་གཉིས་སུ་གྱེར་ཞིང་རང་ས་ན་དབང་སྒྱུར་བས་དངོས་ཤུགས་བརྒྱུད་གསུམ་ནས་བཙན་མནོན་དང་མི་རིགས་ཀྱི་ངོ་བོ་རྩ་བརླག་གཏོང་ཐབས་ཀྱིས་ལས་དོན་སྤེལ་བཞིན་ཡོད་པས་དམག་འཁྲུག་གིའཇིག་པ་ལ་སེམས་འཚབ་དང་དཀའ་སྡུག་ངེས་ཟིན་དགོས་ངེས་ཤིག་ཆགས་ཡོད། དེ་ལྟར་ནའང་ཨ་བྱང་དམག་འཁྲུག་གི་གསར་འགྱུར་ལ་བལྟས་ཏེ་གཡུལ་འཁྲུག་ཤིག་ལང་ན་བསམ་པའི་འདུ་ཤེས་ཡོད་པ་མང་པོ་མཐོང་རྒྱུ་འདུག་ཅིང་། མི་མང་ས་ཡ་དུ་མའི་ཤི་རྐྱེན་ལའང་སེམས་འཚབ་མེད་པ་ལྟ་བུའི་ཀུན་སྤྱོད་འདི་མ་གྱུར་སེམས་ཅན་ཐམས་ཅད་ཅེས་མ་ཎི་བཞིན་འདོན་བཞིན་པའི་མི་རིགས་ཤིག་གི་ཀུན་སྤྱོད་དང་གཏན་ནས་མི་མཐུན་པ་ཨ་ཅང་ཅང་། ནང་བསམ་བློ་ལས་ཕྱིའི་དཔལ་འབྱོར་ལ་དང་དོད་ཆེ་བའི་ནུབ་ཕྱོགས་པའི་བསམ་བློའི་ཆུ་ཚད་ལའང་དོ་དཀའ་བའི་ངེད་ཅག་གི་བསམ་བློ་དེ་ཡང་སྙིང་བྱམས་བརྩེ་ཆེ་བའི་མི་རིགས་དང་སྙིང་རྗེ་ལྡན་པའི་སྤྱི་ཚོགས་ཤིག་ཡིན་མིན་དྲི་ཚིག་ཅིག་གི་ངོ་བོར་ལྷག་འདུག 

ཕྱོགས་གཞན་ཞིག་ནས་བལྟས་ན། ངེད་ཅག་གི་འཚེ་མེད་ཞུ་བའི་འཐབ་རྩོད་ཀྱང་༸གོང་ས་མཆོག་ལ་སྤྲེལ་ལད་ཙམ་ལས་སེམས་ཀྱི་གཏིང་ན་འཚེ་བ་མེད་པའི་དགེ་མཚན་དང་དམག་འཁྲུག་ལ་ཡིད་སུན་པའི་བློ་རྣལ་མ་ཞིག་ཡོད་ཚོད་མི་འདུག་སྙམ་པ་ཞིག་དྲན་སོང་ཞིང་། འཚེ་བ་སྐྱོན་དུ་ལྟ་བའི་ནང་བསྟན་དེས་བོད་ཡུལ་དུ་ས་ཁྱབ་རྡོ་ཁྱབ་ཡིན་རུང་བོད་མིའི་བློ་ངོ་ན་ནི་ནང་བསྟན་དང་ལྡོག་ཕྱོགས་སུ་སོང་བའི་འདུ་ཤེས་དེ་འདྲ་ཞིག་ཡོད་འདུག གཅིག་བྱེད་ན་དམག་འཁྲུག་ལ་དགའ་བའི་འདུ་ཤེས་དེ་ཤ་ཀྱཱའི་ནང་བསྟན་དང་རྒྱབ་འགལ་དུ་སོང་རུང་མི་རིགས་ཤིག་དང་རྒྱལ་ཁབ་ཅིག་སླར་གསོ་བྱེད་ཐུབ་པའི་རྒྱུ་རྐྱེན་ལེགས་པོ་ཞིག་ཡིན་ཤས་ཆེ་ལ། "མེ་མདའི་ཁ་ནས་སྲིད་དབང་འཐོབ་"པའི་འཐབ་ཇུས་དང་ཧ་ཅང་འཚམ་པོ་པའང་ཡོད་སྲིད། 

འཕེལ་འགྱུར་རིག་པའི་རྣམ་བཞག་ལྟར་ན་རང་ཉིད་རང་སྲུང་ནི་རང་ཉིད་འཚོ་ཐབས་དང་གཞན་ལ་འགོག་རྒོལ་བྱེད་པ་ནི་འཚོ་གནས་རྒྱ་སྐྱེད་གཏོང་བའི་སྲོག་ལྡན་ཞིག་གི་གཞི་རྩའི་ཆ་རྐྱེན་ཡིན་པར་བཤད་བཞིན་ཡོད་ལ རང་སྲུང་དང་འགོག་རྒོལ་མེད་ན་སྲོག་ལྡན་མེ་ཏོག་དང་། རྩི་ཤིང་ལྟ་བུ་ཡང་ཡུན་རིང་འཚོ་གནས་མི་ཐུབ་པར་མེ་ཏོག་རྙིད་བ་དང་རྩི་ཤིང་སྐམ་རྒྱུ་ནི་ཆོས་ཉིད་དུ་གྲུབ་ཡོད་པར་བཤད་པས། རང་ཅག་གི་འདུ་ཤེས་དེའང་འཕེལ་འགྱུར་རིག་པའི་རྣམ་བཞག་དང་མཐུན་པོ་བྱུང་ཡོད། འོན་ཀྱང་འཕེལ་འགྱུར་ཚན་རིག་དང་རོ་རྒྱབ་གཏད་པའི་ནང་བསྟན་ཤེས་རིག་ལ་སྐྱབས་སུ་སོང་བའི་ངེད་ཅག་བོད་མི་ཚོའི་ནང་བསམ་བློ་ནི་ནང་བསྟན་ལས་འཕེལ་འགྱུར་ཚན་རིག་དང་མཐུན་ཚབས་ཆེ་བ་ཞིག་ཆགས་འདུག་པ་འདི་ཡག་རྟགས་ཡིན་དང་སྡུག་རྟགས་ཡིན་གསལ་པོར་མི་ཤེས་པ་འདུག

གསུམ་བཅུ་དུས་དྲན་ཆབ་སྲིད་བསྐྱར་ཞིབ།

ཉེ་ཆར་རང་དུ་རྒྱ་ནག་གིས་མི་མེད་གནམ་གྲུ་བཟོ་ཐུབ་པ་བྱུང་སྟེ་དམག་དོན་ཐད་ཀྱི་གོམ་སྟོབས་ཆེན་པོ་སྤོས་ཡོད་པ་དང་དམག་དོན་མཁོ་ཆས་བཟོ་སྐྲུན་ཇེ་མགྱོགས་ཇེ་མང་དུ་བཏང་ནས་ཕྱི་འཚོང་གི་ཁྲོམ་ར་ན་དབང་སྒྱུར་བྱེད་སེམས་ཡོད་པར་དབྱེ་ཞིབ་བྱེད་བཞིན་འདུག དམག་དོན་ཐད་ཀྱི་ལག་རྩལ་འཕེལ་རྒྱུས་ནི་རྒྱ་ནག་གི་ཆེས་མི་འདང་ས་དེ་ཡིན་པས་འདི་ནས་གོང་འཕེལ་དང་འཐུས་ཚང་དུ་བྱུང་ན་ད་སྐབས་ལས་ཀྱང་བརྡབ་བརྒྱ་འགྱུར་གྱིས་ཧམ་སེམས་དང་ང་རྒྱལ། དམ་དྲག་དང་བཙན་བཟུང་བྱ་རྒྱུ་གཏན་འཁེལ་ཆགས་ཡོད། གནས་ཚུལ་འདི་བཞིན་བྱུང་ན་རྒྱ་ནག་གི་རང་ལག་ཏུ་མེད་པའི་ཐེ་ཝན་ལྟ་བུའང་ཕྱིར་ལེན་རྒྱུ་དཀའ་ཁག་ཅི་ཡང་མེད་ལ་དེ་ལས་ཀྱང་བོད་དང་ཤིན་ཅང་། ནང་སོགས་སོགས་དམ་བཟུང་དང་དྲག་གནོན་བྱ་རྒྱུ་ནི་བཤད་མི་དགོས་པ་ཞིག་ཆགས་ཡོད། 

སྟོབས་ཆེན་རྒྱལ་ཁབ་ཨང་དང་པོའི་གྲས་སུ་སླེབས་ཉེ་ཡོད་པའི་རྒྱ་ནག་ལ་མཚོན་ན་ཐབས་བརྒྱ་ཇུས་སྟོང་གི་རྒྱལ་ཁབ་བརྟན་སྲུང་དང་གུང་ཁྲན་ཏང་གི་དབང་སྒྱུར་སྲ་བརྟན་དུ་གཏོང་བཞིན་པ་ནི་ཧ་ཅང་གསལ་པོ་ཡིན་སྟེ། ཁོ་ཚོས་རྒྱལ་སྤྱི་ཁྲོད་དུ་དཔལ་འབྱོར་སྟོབས་ཤུགས་ཇེ་ཆེར་བཏང་རྗེས་ཕྱིར་རང་གི་མི་དམངས་ལ་བློ་ཁ་འཚིམ་ཐབས་དང། བོད་དང་ཤིན་ཅང་ལྟ་བུ་རང་ཤུགས་ཀྱིས་དཔའ་འཁུམ་གཅུག་གི་ཡོད། དེ་སྔ་ནས་ཡང་ཡང་བཤད་བཞིན་པའི"ས་གུང་ཁྲན་ཏང་། གནམ་གུང་ཁྲན་ཏང་"ཞེས་པའི་ཞེད་སྣང་སྐུལ་བའི་ཚིག་འདི་ད་ཆར་དོན་ངོ་མར་གུང་ཁྲན་ཏང་གི་ནུས་ཤུགས་སྟོན་ཐུབ་པ་ཆགས་ཀྱི་ཡོད། 

ངེད་ཅག་བཙན་བྱོལ་བའི་ཐབས་ཟད་པའི་རྣམ་འགྱུར་ཞིག་གིས་རྒྱ་ནག་བཀྲ་མི་ཤེས་པ་ཡོང་རྒྱུ་སྒུག་སྡོད་པ་ལས་བྱ་རྒྱུ་གང་ཡང་ལྷག་མེད་ལ། སྟོན་པ་འཁྲུངས་དུས་བྲམ་ཟེ་མི་ལྷག་པའི་ལོ་རྒྱུས་བཞིན་འབྱུང་ཉེན་ཆེ་བའང་ལོ་རེ་ནས་ཇེ་གསལ་དུ་འགྲོ་བཞིན་འདུག མ་གཞི་སྐྱབས་བཅོལ་བ་མི་འབུམ་གཅིག་ཙམ་དེ་བོད་དུ་ཕྱི་ལོག་ཐུབ་མིན་ནི་གནད་འགག་ཅིག་གང་ཡང་མིན། གཙོ་བོ་ནི་བོད་ནང་དུ་དྲག་མནོན་དང་བཙན་འཇུག། དཔལ་འབྱོར་དབྱེ་འབྱེད་དང་རང་ས་ནས་མི་རིགས་གྲངས་ཉུང་དུ་བསྒྱུར་བའི་གནས་ཚུལ་འདི་ཚོ་སེལ་ཐུབ་དགོས། དཀའ་ངལ་འདི་སེལ་དགོས་ན་ཨ་མེ་རི་ཀར་སྐྱོབས་བཅོལ་བས་མི་ཕན་ལ་ཡུ་རོབ་མཉམ་འབྲེལ་ལ་ཞུ་གཏུགས་བྱས་པས་ཀྱང་ནུས་པ་མི་འཐོན་པར་གསལ་པོ་ཡིན། གཅིག་བྱས་ན་ནུབ་ཕྱོགས་པ་ལ་རེ་བཅོལ་བྱས་པ་དེའི་མཇུག་འབྲས་ཀྱང་འཚབ་ཆེན་རེ་ཡོང་སྲིད་པ་ཡིན། 

སྐུ་ངོ་འཇུ་ཆེན་ལ་པཎ་ཆེན་སྐུ་གོང་མས་ནང་མོལ་ཚུལ་དུ་ལམ་སྟོན་རེ་གཉིས་གནང་ཡོད་ཅིང་གལ་ཆེ་བ་ཞིག་ནི་"ཁྱེད་ཚོས་ཕྱི་ལོག་ནས་སྐད་འབོད་བརྒྱབ་ནས་ངོ་རྒོལ་བྱེད་མ་འདུག ཚགས་པ་ཞིག་གི་མདུན་ངོས་སུ་ཐོན་པ་ཙམ་རེད། ཁོ་ཚོ་ཁོང་ཁྲོ་སློང་ན་ཕན་ལས་གནོད་པ་ཆེ་བ་ཡོང་"(ནང་དོན་ལས་ཚིག་ཇི་བཞིན་མིན)ཞེས་གསུངས་པ་འདི་ད་ཆར་ཧ་ལམ་གསལ་པོ་ཆགས་ཡོང་གི་འདུག འོན་ཀྱང་བཙན་བྱོལ་བ་ཚོས་རྒྱ་ནག་ཁོང་ཁྲོ་སློང་བའི་བྱ་སྤྱོད་མི་མཐུད་དེ་སྤེལ་བཞིན་ཡོད། ལྷག་པར་དུ་རྒྱ་ནག་གི་ཚོར་བ་རྣོ་པོ་བྱ་སའི་ཨ་རུ་ན་ཅལ་ཁུལ་དུ་༸གོང་ས་མཆོག་ཕེབས་རྒྱུ་འདི་ནི་ཧ་ཅང་གཟབ་ནན་བྱེད་དགོས་པ་ཞིག་ཆགས་ཡོད། ཉིན་གཅིག་རྒྱ་ནག་ཁོང་ཁྲོ་སློང་ན་ང་ཚོའི་འབྲེལ་མོལ་གྱི་སྒོ་ཆེན་དེ་ཉིན་གཅིག་ཇེ་དམ་ཇེ་བཙན་ཆགས་ཀྱི་ཡོད་པས་འགྲོ་མཁས་འདུག་མཁས་བྱེད་རྒྱུ་ནི་ལྷོད་གཡེང་ཤོར་མི་ཉན་པ་ཞིག་ཡིན། 

ད་ཆར་ནི་རང་བཙན་དང་དབུ་ལམ་བཤད་མཁན་དང་བསམ་མཁན་སུ་གཅིག་ལ་ཐབས་ལམ་སྣ་གཅིག་སྟོན་རྒྱུ་མེད་པ་གྱུར་ནས་རྒྱ་ནག་འཐོར་ཞིག་འགྲོ་རྒྱུ་སྒུག་སྡོད་པའི་ཟོལ་ཞིག་འདུག མང་པོ་ཞིག་ལ་ཁག་ཀྱང་མེད་དེ། རྒྱ་ནག་དང་ཆབ་སྲིད་ཐ་དད་ཡིན་པའི་ནུབ་ཕྱོགས་པ་ཚོས་ཆབ་སྲིད་དབྱེ་ཞིབ་སྣང་བ་སྐྱིད་པོ་དང་དཔྱད་བརྗོད་ཤ་ཚ་མོ་རེ་སྤེལ་བཞིན་ཡོད་པས་འདི་ལ་མགོ་འཁོར་ནས་ལྷག་བཞིན་ཡོད། དོན་ངོ་མར་ཨ་མེ་རི་ཀིའི་རྒྱ་ནང་དུ་ལོ་གཅིག་གི་རྙོག་གྲ་འདྲ་བར་རྒྱ་ནག་ཏུ་ལོ་བཅུ་ནང་དུ་འབྱུང་མེད། ལྷག་པར་དུ་རྒྱ་ནག་མི་དམངས་ཀྱིས་རྒྱ་ནག་གི་ཆབ་སྲིད་ལྟ་བ་དང་ཏང་གི་ལས་དོན་ཁག་ལ་ཧ་ལམ་དོགས་པ་ཟ་གི་མེད། ནུབ་ཕྱོགས་ཡུ་རོབ་དང་བྱང་ཨ་རིའི་ཁུལ་གྱི་མང་གཙོའི་ཡུལ་གྲུ་དག་ཏུ་ཀྲུང་གོ་བ་ས་ཡ་དུ་ཙམ་གནས་སྡོད་བྱས་ཡོད། རང་ཉིད་ཀྱི་རྒྱལ་ཁབ་དང་མི་དམངས་ཀྱི་དཀའ་སྡུག་མཐོང་ནས་ཡོངས་ཁྱབ་ངོ་རྒོལ་བྱས་པ་ཅི་ཙམ་ཡོད། མང་གཙོ་ལས་འགུལ་བ་མི་སྣ་བརྒྱ་ཕྲག་ཙམ་གྱིས་སྐད་ཆུང་ཆུང་རེ་བརྒྱབ་གི་ཡོད། ཕྱི་སྡོད་ཀྲུང་གོ་བ་ས་ཡ་དུ་མ་གཉིད་ཁུག་པ་རེད་དམ། མ་རེད། ཁོ་ཚོས་རྒྱ་ནག་གི་ཆབ་སྲིད་དེ་སྡུག་པོ་ཞིག་མཐོང་གི་མེད་ལ། རྒྱ་ནག་མི་མང་ལ་དེ་ཙམ་སྡུག་རྩུབ་དང་དཀའ་ངལ་ཡོད་པའང་ཚོར་གྱི་མེད། དེ་ལས་ལྡོག་སྟེ། རང་ཉིད་ཀྲུང་གོ་བ་ཡིན་པ་སྤོབས་པ་ཇེ་ཆེར་འགྲོ་བཞིན་ཡོད། རྒྱ་ནག་གི་བྱ་འཕུར་བ་ལྟ་བུའི་འཕེལ་རྒྱུས་དེ་ལ་དགའ་བ་དང་སེམས་ཁུར་བྱེད་ཀྱི་ཡོད། རང་ཉིད་ཀྱི་རྒྱལ་ཁབ་འདི་གང་མགྱོགས་སྟབས་ཆེན་རྒྱལ་ཁབ་ཨང་དང་པོ་ཆགས་རྒྱུ་ཡིད་ཆེས་དང་རེ་བ་རྒྱག་བཞིན་ཡོད། གནས་ཚུལ་འདི་ཚོ་ལ་བལྟས་ནས་རྒྱ་ནག་དམངས་གཙོའི་ཕྱོགས་སུ་གོམ་པ་སྤོ་རྒྱུ་ལ་སྒུག་སྡོད་པའི་ང་ཚོའི་རེ་བ་དང་ཐབས་ཇུས་དེ་སྟོང་པ་སྟོང་རྐྱང་ཞིག་ཡིན་པར་ར་འཕྲོད་བཞིན་ཡོད།

(བསྐྱར་ཞིབ་དང་བཟོ་བཅོས་བྱ་ཁོམ་མ་བྱུང་བས་ནོར་བ་མཆན་དུ་བཀོད་རོགས་ཞུ།)

2017-3-10